Kṛṣṇayajuḥ Taittirīyasaṃhitā — Saptama kāṇḍa, prapāṭhaka 4 (44 anuvākāḥ)
Kṛṣṇayajuḥ Taittirīyasaṃhitā — Saptama kāṇḍa, prapāṭhaka 4
Section titled “Kṛṣṇayajuḥ Taittirīyasaṃhitā — Saptama kāṇḍa, prapāṭhaka 4”saptamakāṇḍe caturthaḥ praśnaḥ 4
Anuvākāḥ
Section titled “Anuvākāḥ”1 bṛha̱spati̍rakāmayata̱ śranme̍ de̱vā dadhī̍ra̱ngacche̍yaṃ puro̱dhāmiti̱ sa e̱taṃ ca̍turvṛśatirā̱trama̍paśya̱ttamāha̍ra̱ttenā̍yajata̱ tato̱ vai tasmai̱ śradde̱vā ada̍dha̱tāga̍cchatpuro̱dhāṃ ya e̱vaṃ vi̱dvṛsa̍ścaturvṛśatirā̱tramāsa̍te̱ śrade̎bhyo manu̱ṣyā̍ dadhate̱ gaccha̍nti puro̱dhāṃ jyoti̱rgaurāyu̱riti̍ trya̱hā bha̍vantī̱yaṃ vāva jyoti̍ra̱ntari̍kṣa̱ṃ gaura̱sāvāyu̍ 2 ri̱māne̱va lo̱kāna̱bhyāro̍hantyabhipū̱rvaṃ trya̱hā bha̍vantyabhipū̱rvame̱va su̍va̱rgaṃ lo̱kama̱bhyāro̍ha̱ntyasa̍ttra̱ṃ vā e̱tadyada̍cchando̱maṃ yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va pṛ̱ṣṭhairava̍ ruṃdhate pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍ pa̱śava̍śchando̱mā oja̍sye̱va vī̱rye̍ pa̱śuṣu̱ prati̍ tiṣṭhanti bṛhadrathaṃta̱rābhyā̎ṃ yantī̱yaṃ vāva ra̍thaṃta̱rama̱sau bṛ̱hadā̱bhyāme̱va 3 ya̱ntyatho̍ a̱nayo̍re̱va prati̍ tiṣṭhantye̱tevai ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ lo̱kaṃ ya̍nti caturvṛśatirā̱tro bha̍vati̱ catu̍rvṛśatirardhamā̱sāḥ sa̍ṃvathsa̱raḥ sa̍ṃvathsa̱raḥ su̍va̱rgo lo̱kaḥ sa̍ṃvathsa̱ra e̱va su̍va̱rge lo̱ke prati̍ tiṣṭha̱ntyatho̱ catu̍rvṛśatyakṣarā gāya̱trī gā̍ya̱trī bra̍hmavarca̱saṃ gā̍yatri̱yaiva bra̍hmavarca̱samava̍ ruṃdhate’tirā̱trāva̱bhito̍ bhavato brahmavarca̱sasya̱ pari̍gṛhītyai ||7.4.1||
a̱sāvāyu̍rā̱bhyāme̱va paṃca̍ catvārṛśacca ||7.4.1||
4 yathā̱ vai ma̍nu̱ṣyā̍ e̱vaṃ de̱vā agra̍ āsa̱nte̍’kāmaya̱ntāva̍rtiṃ pā̱pmāna̍ṃ mṛ̱tyuma̍pa̱hatya̱ daivṛ̍ sṛ̱sada̍ṃ gacche̱meti̱ ta e̱taṃ ca̍turvṛśatirā̱trama̍paśya̱ntamāha̍ra̱ntenā̍yajanta̱ tato̱ vai te’va̍rtiṃ pā̱pmāna̍ṃ mṛ̱tyuma̍pa̱hatya̱ daivṛ̍ sṛ̱ sada̍magaccha̱ṉ, ya e̱vaṃ vi̱dvṛsa̍ścaturvṛśati rā̱tramāsa̱te’va̍rtime̱va pā̱pmāna̍mapa̱hatya̱ śriya̍ṃ gacchanti̱ śrīrhi ma̍nu̱ṣya̍sya̱ 5 daivī̍ sṛ̱sajjyoti̍ratirā̱tro bha̍vati suva̱rgasya̍ lo̱kasyānu̍khyātyai̱ pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̍ḥ saṃvathsa̱rastaṃ māsā̍ ardhamā̱sā ṛ̱tava̍ḥ pra̱viśya̱ daivṛ̍ sṛ̱sada̍magaccha̱ṉ ya e̱vaṃ vi̱dvṛsa̍ścaturvṛśatirā̱tramāsa̍te saṃvathsa̱rame̱va pra̱viśya̱ vasya̍sṛ sṛ̱sada̍ṃ gacchanti̱ traya̍strayastrṛ̱śā a̱vastā̎dbhavanti̱ traya̍strayastrṛ̱śāḥ pa̱rastā̎ttrayastrṛ̱śaire̱vobha̱yato’va̍rtiṃ pā̱pmāna̍mapa̱hatya̱ daivṛ̍ sṛ̱sada̍ṃ madhya̱to 6 ga̍cchanti pṛ̱ṣṭhāni̱ hi daivī̍ sṛ̱sajjā̱mi vā e̱tatku̍rvanti̱ yattraya̍strayastrṛ̱śā a̱nvañco̱ madhye’ni̍rukto bhavati̱ tenājā̎myū̱rdhvāni̍ pṛ̱ṣṭhāni̍ bhavantyū̱rdhvāścha̍ndo̱mā u̱bhābhyṛ̍ rū̱pābhyṛ̍ suva̱rgaṃ lo̱kaṃ ya̱ntyasa̍ttra̱ṃ vā e̱tadyada̍cchando̱maṃ yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va pṛ̱ṣṭhairava̍ ruṃdhate pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍ pa̱śava̍ 7 śchando̱mā oja̍sye̱va vī̱rye̍ pa̱śuṣu̱ prati̍ tiṣṭhanti̱ traya̍strayastrṛ̱śā a̱vastā̎dbhavanti̱ traya̍strayastrṛ̱śāḥ pa̱rastā̱nmadhye̍ pṛ̱ṣṭhānyuro̱ vai tra̍yastrṛ̱śā ā̱tmā pṛ̱ṣṭhānyā̱tmana̍ e̱va tadyaja̍mānā̱ḥ śarma̍ nahya̱nte’nā̎rtyai bṛhadrathaṃta̱rābhyā̎ṃ yantī̱yaṃ vāva ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va prati̍ tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va 8 su̍va̱rgaṃ lo̱kaṃ ya̍nti̱ parā̎ñco̱ vā e̱te su̍va̱rgaṃ lo̱kama̱bhyāro̍hanti̱ ye pa̍rā̱cīnā̍ni pṛ̱ṣṭhānyu̍pa̱yanti̍ pra̱tyaṅkhṣa̍ḍa̱ho bha̍vati pra̱tyava̍rūḍhyā̱ atho̱ prati̍ṣṭhityā u̱bhayo̎rlo̱kayor̍ ṛ̱ddhvotti̍ṣṭhanti tri̱vṛto’dhi̍ tri̱vṛta̱mupa̍ yanti̱ stomā̍nṛ̱ saṃ pa̍ttyai prabha̱vāya̱ jyoti̍ragniṣṭo̱mo bha̍vatya̱yaṃ vāva sa kṣayo̱’smāde̱va tena̱ kṣayā̱nna ya̍nti caturvṛśatirā̱tro bha̍vati̱ catu̍rvṛśatirardhamā̱sāḥ sa̍ṃvathsa̱raḥ sa̍ṃvathsa̱raḥ su̍va̱rgo lo̱kaḥ sa̍ṃvathsa̱ra e̱va su̍va̱rge lo̱ke prati̍ tiṣṭha̱ntyatho̱ catu̍vṛśatyakṣarā gāya̱trī gā̍ya̱trī bra̍hmavarca̱saṃ gā̍yatri̱yaiva bra̍hmavarca̱samava̍ ruṃdhate’ti rā̱trāva̱bhito̍ bhavato brahmavarca̱sasya̱ pari̍gṛhītyai ||7.4.2||
ma̱nu̱ṣya̍sya madhya̱taḥ pa̱śava̱stābhyā̍me̱va sa̍ṃvathsa̱raścatu̍rvṛśatiśca ||7.4.2||
9 ṛ̱kṣā vā i̱yama̍lo̱makā̍sī̱thsākā̍maya̱tauṣa̍dhībhi̱rvana̱spati̍bhi̱ḥ pra jā̍ye̱yeti̱ saitāstrṛ̱śatṛ̱ rātrī̍rapaśya̱ttato̱ vā i̱yamoṣa̍dhībhi̱rvana̱spati̍bhi̱ḥ prājā̍yata̱ ye pra̱jākā̍māḥ pa̱śukā̍mā̱ḥ syusta e̱tā ā̍sīra̱npraiva jā̍yante pra̱jayā̍ pa̱śubhi̍ri̱yaṃ vā a̍kṣudhya̱thsaitāṃ vi̱rāja̍mapaśya̱t tāmā̱tmandhi̱tvānnādya̱mavā̍ru̱ṃdhauṣa̍dhī̱ 10 rvana̱spatī̎npra̱jāṃ pa̱śūntenā̍’vardhata̱ sā je̱māna̍ṃ mahi̱māna̍magaccha̱dya e̱vaṃ vi̱dvṛsa̍ e̱tā āsa̍te vi̱rāja̍me̱vātmandhi̱tvānnādya̱mava̍ ruṃdhate̱ vardha̍nte pra̱jayā̍ pa̱śubhi̍rje̱māna̍ṃ mahi̱māna̍ṃ gacchanti̱ jyoti̍ratirā̱tro bha̍vati suva̱rgasya̍ lo̱kasyānu̍khyātyai̱ pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̱ḥ ṣaṭpṛ̱ṣṭhāni̍ pṛ̱ṣṭhaire̱vartūna̱nvāro̍hantyṛ̱tubhi̍ḥ saṃvathsa̱raṃ te sa̍ṃvathsa̱ra e̱va 11 prati̍ tiṣṭhanti trayastrṛ̱śāttra̍yastrṛ̱śamupa̍ yanti ya̱jñasya̱ saṃta̍tyā̱ atho̎ pra̱jāpa̍ti̱rvai tra̍yastrṛ̱śaḥ pra̱jāpa̍time̱vāra̍bhante̱ prati̍ṣṭhityai triṇa̱vo bha̍vati̱ viji̍tyā ekavṛ̱śo bha̍vati̱ prati̍ṣṭhityā̱ atho̱ ruca̍me̱vātmanda̍dhate tri̱vṛda̍gni̱ṣṭudbha̍vati pā̱pmāna̍me̱va tena̱ nirda̍ha̱nte’tho̱ tejo̱ vai tri̱vṛtteja̍ e̱vātmanda̍dhate pañcada̱śa i̍ndrasto̱mo bha̍vatīndri̱yame̱vāva̍ 12 ruṃdhate saptada̱śo bha̍vatya̱nnādya̱syāva̍ruddhyā̱ atho̱ praiva tena̍ jāyanta ekavṛ̱śo bha̍vati̱ prati̍ṣṭhityā̱ atho̱ ruca̍me̱vātmanda̍dhate caturvṛ̱śo bha̍vati̱ catu̍rvṛśatirardhamā̱sāḥ sa̍ṃvathsa̱raḥ sa̍ṃvathsa̱raḥ su̍va̱rgo lo̱kaḥ sa̍ṃvathsa̱ra e̱va su̍va̱rge lo̱ke prati̍ tiṣṭha̱ntyatho̍ e̱ṣa vai vi̍ṣū̱vān, vi̍ṣū̱vanto̍ bhavanti̱ ya e̱vaṃ vi̱dvṛsa̍ e̱tā āsa̍te caturvṛ̱śātpṛ̱ṣṭhānyupa̍ yanti saṃvathsa̱ra e̱va pra̍ti̱ṣṭhāya̍ 13 de̱vatā̍ a̱bhyāro̍hanti trayastrṛ̱śāttra̍yastrṛ̱śamupa̍ yanti̱ traya̍strṛśa̱dvai de̱vatā̍ de̱vatā̎sve̱va prati̍ tiṣṭhanti triṇa̱vo bha̍vatī̱me vai lo̱kāstri̍ṇa̱va e̱ṣve̍va lo̱keṣu̱ prati̍ tiṣṭhanti̱ dvāve̍kavṛ̱śau bha̍vata̱ḥ prati̍ṣṭhityā̱ atho̱ ruca̍me̱vātmanda̍dhate ba̱hava̍ḥ ṣoḍa̱śino̍ bhavanti̱ tasmā̎dba̱hava̍ḥ pra̱jāsu̱ vṛṣā̍ṇo̱ yade̱te stomā̱ vyati̍ṣaktā̱ bhava̍nti̱ tasmā̍di̱yamoṣa̍dhībhi̱rvana̱spati̍bhi̱rvyati̍ṣaktā̱ 14 vyati̍ṣajyante pra̱jayā̍ pa̱śubhi̱rya e̱vaṃ vi̱dvṛsa̍ e̱tā āsa̱te’klṛ̍ptā̱ vā e̱te su̍va̱rgaṃ lo̱kaṃ ya̍ntyuccāva̱cān hi stomā̍nupa̱yanti̱ yade̱ta ū̱rdhvāḥ klṛ̱ptāḥ stomā̱ bhava̍nti klṛ̱ptā e̱va su̍va̱rgaṃ lo̱kaṃ ya̍ntyu̱bhayo̍rebhyo lo̱kayo̎ḥ kalpate trṛ̱śade̱tāstrṛ̱śada̍kṣarā vi̱rāḍanna̍ṃ vi̱rāḍvi̱rājai̱vānnādya̱mava̍ ruṃdhate’tirā̱trāva̱bhito̍ bhavato̱’nnādya̍sya̱ pari̍gṛhītyai ||7.4.3||
oṣa̍dhīḥ saṃvathsa̱ra e̱vāva̍ prati̱ṣṭhāya̱ vyati̍ṣa̱ktaikā̱nna pa̍ṃcā̱śacca̍ ||7.4.3||
15 pra̱jāpa̍tiḥ suva̱rgaṃ lo̱kamai̱ttaṃ de̱vā yena̍ yena̱ chaṃda̱sānu̱ prāyu̍ñjata̱ tena̱ nāpnu̍va̱nta e̱tā dvātrṛ̍śatṛ̱ rātrī̍rapaśya̱ndvātrṛ̍śadakṣarānu̱ṣṭugānu̍ṣṭubhaḥ pra̱jāpa̍ti̱ḥ svenai̱va chaṃda̍sā pra̱jāpa̍timā̱ptvābhyā̱ruhya̍ suva̱rgaṃ lo̱kamā̍ya̱ṉ ya e̱vaṃ vi̱dvṛsa̍ e̱tā āsa̍te̱ dvātrṛ̍śade̱tā dvātrṛ̍śadakṣarānu̱ṣṭugānu̍ṣṭubhaḥ pra̱jāpa̍ti̱ḥ svenai̱va chaṃda̍sā pra̱jāpa̍timā̱ptvā śriya̍ṃ gacchanti̱ 16 śrīrhi ma̍nu̱ṣya̍sya suva̱rgo lo̱ko dvātrṛ̍śade̱tā dvātrṛ̍śadakṣarānu̱ṣṭugvāga̍nu̱ṣṭupsarvā̍me̱va vāca̍māpnuvanti̱ sarve̍ vā̱co va̍di̱tāro̍ bhavanti̱ sarve̱ hi śriya̱ṃ gaccha̍nti̱ jyoti̱rgaurāyu̱riti̍ trya̱hā bha̍vantī̱yaṃ vāva jyoti̍ra̱ntari̍kṣa̱ṃ gaura̱sāvāyu̍ri̱māne̱va lo̱kāna̱bhyāro̍hantyabhipū̱rvaṃ trya̱hā bha̍vantyabhipū̱rvame̱va su̍va̱rgaṃ lo̱kama̱bhyāro̍hanti bṛhadrathaṃta̱rābhyā̎ṃ yantī̱ 17 yaṃ vāva ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va prati̍ tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ lo̱kaṃ ya̍nti̱ parā̎ñco̱ vā e̱te su̍va̱rgaṃ lo̱kama̱bhyāro̍hanti̱ ye parā̍castrya̱hānu̍pa̱yanti̍ pra̱tyaṅtrya̱ho bha̍vati pra̱tyava̍rūḍhyā̱ atho̱ prati̍ṣṭhityā u̱bhayo̎rlo̱kayor̍ ṛ̱ddhvotti̍ṣṭhanti̱ dvātrṛ̍śade̱tāstāsā̱ṃ yāstrṛ̱śattrṛ̱śada̍kṣarā vi̱rāḍanna̍ṃ vi̱rāḍvi̱rājai̱vānnādya̱mava̍ ruṃdhate̱ ye dve a̍horā̱tre e̱va te u̱bhābhyṛ̍ rū̱pābhyṛ̍ suva̱rgaṃ lo̱kaṃ ya̍ntyatirā̱trāva̱bhito̍ bhavata̱ḥ pari̍gṛhītyai ||7.4.4||
ga̱ccha̱nti̱ ya̱nti̱ trṛ̱śada̍kṣarā̱ dvāvṛ̍śatiśca ||7.4.4||
18 dve vāva de̍vasa̱ttre dvā̍daśā̱haścai̱va tra̍yastrṛśada̱haśca̱ ya e̱vaṃ vi̱dvṛsa̍strayastrṛśada̱hamāsa̍te sā̱kṣāde̱va de̱vatā̍ a̱bhyāro̍hanti̱ yathā̱ khalu̱ vai śreyā̍na̱bhyārū̍ḍhaḥ kā̱maya̍te̱ tathā̍ karoti̱ yadya̍va̱vidhya̍ti̱ pāpī̍yānbhavati̱ yadi̱ nāva̱vidhya̍ti sa̱dṛṅya e̱vaṃ vi̱dvṛsa̍strayastrṛśada̱hamāsa̍te̱ vi pā̱pmanā̱ bhrātṛ̍vye̱ṇā va̍rtante’ha̱rbhājo̱ vā e̱tā de̱vā agra̱ āha̍ra̱ 19 nnaha̱reko’bha̍ja̱tāha̱reka̱stābhi̱rvai te pra̱bāhu̍gārdhnuva̱ṉ ya e̱vaṃ vi̱dvṛsa̍strayastrṛśada̱hamāsa̍te̱ sarva̍ e̱va pra̱bāhu̍gṛdhnuvanti̱ sarve̱ grāma̍ṇīya̱ṃ prāpnu̍vanti pañcā̱hā bha̍vanti̱ pañca̱ vā ṛ̱tava̍ḥ saṃvathsa̱ra ṛ̱tuṣve̱va sa̍ṃvathsa̱re prati̍ tiṣṭha̱ntyatho̱ pañcā̎kṣarā pa̱ṅktiḥ pāṅkto̍ ya̱jño ya̱jñame̱vāva̍ ruṃdhate̱ trīṇyā̎śvi̱nāni̍ bhavanti̱ traya̍ i̱me lo̱kā e̱ 20 ṣve̍va lo̱keṣu̱ prati̍ tiṣṭha̱ntyatho̱ trīṇi̱ vai ya̱jñasye̎ndri̱yāṇi̱ tānye̱vāva̍ ruṃdhate viśva̱jidbha̍vatya̱nnādya̱syāva̍ruddhyai̱ sarva̍pṛṣṭho bhavati̱ sarva̍syā̱bhiji̍tyai̱ vāgvai dvā̍daśā̱ho yatpu̱rastā̎ddvādaśā̱hamu̍pe̱yuranā̎ptā̱ṃ vāca̱mupe̍yurupa̱dāsu̍kaiṣā̱ṃ vāksyā̍du̱pari̍ṣṭāddvādaśā̱hamupa̍ yantyā̱ptāme̱va vāca̱mupa̍ yanti̱ tasmā̍du̱pari̍ṣṭādvā̱cā va̍dāmo’vānta̱raṃ 21 vai da̍śarā̱treṇa̍ pra̱jāpa̍tiḥ pra̱jā a̍sṛjata̱ yadda̍śarā̱tro bhava̍ti pra̱jā e̱va tadyaja̍mānāḥ sṛjanta e̱tṛ ha̱ vā u̍da̱ṅkaḥ śau̎lbāya̱naḥ sa̱ttrasyarddhi̍muvāca̱ yadda̍śarā̱tro yadda̍śarā̱tro bhava̍ti sa̱ttrasya̍rddhyā̱ atho̱ yade̱va pūrve̱ṣvaha̍ssu̱ vilo̍ma kri̱yate̱ tasyai̱vaiṣā śānti̍rdvyanī̱kā vā e̱tā rātra̍yo̱ yaja̍mānā viśva̱jithsa̱hāti̍rā̱treṇa̱ pūrvā̱ḥ ṣoḍa̍śa sa̱hāti̍rā̱treṇotta̍rā̱ḥ ṣoḍa̍śa̱ ya e̱vaṃ vi̱dvṛsa̍strayastrṛśada̱hamāsa̍ta̱ aiṣā̎ṃ dvyanī̱kā pra̱jā jā̍yate’tirā̱trāva̱bhito̍ bhavata̱ḥ pari̍gṛhītyai ||7.4.5||
a̱ha̱ra̱nne̱ṣva̍vānta̱rṛ ṣoḍa̍śa sa̱ha sa̱ptada̍śa ca ||7.4.5||
22 ā̱di̱tyā a̍kāmayanta suva̱rgaṃ lo̱kami̍yā̱meti̱ te su̍va̱rgaṃ lo̱kaṃ na prājā̍na̱nna su̍va̱rgaṃ lo̱kamā̍ya̱nta e̱tṛ ṣa̍ṭtrṛśadrā̱trama̍paśya̱ntamāha̍ra̱ntenā̍yajanta̱ tato̱ vai te su̍va̱rgaṃ lo̱kaṃ prājā̍nanthsuva̱rgaṃ lo̱kamā̍ya̱ṉ, ya e̱vaṃ vi̱dvṛsa̍ḥ ṣaṭtrṛśadrā̱tramāsa̍te suva̱rgame̱va lo̱kaṃ pra jā̍nanti suva̱rgaṃ lo̱kaṃ ya̍nti̱ jyoti̍ratirā̱tro 23 bha̍vati̱ jyoti̍re̱va pu̱rastā̎ddadhate suva̱rgasya̍ lo̱kasyānu̍khyātyai ṣaḍa̱hā bha̍vanti̱ ṣaḍvā ṛ̱tava̍ ṛ̱tuṣve̱va prati̍ tiṣṭhanti ca̱tvāro̍ bhavanti̱ cata̍sro̱ diśo̍ di̱kṣve̍va prati̍ tiṣṭha̱ntyasa̍ttra̱ṃ vā e̱tadyada̍chando̱maṃ yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va pṛ̱ṣṭhairava̍ ruṃdhate pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍ pa̱śava̍śchando̱mā oja̍sye̱va 24 vī̱rye̍ pa̱śuṣu̱ prati̍ tiṣṭhanti ṣaṭtrṛśadrā̱tro bha̍vati̱ ṣaṭtrṛ̍śadakṣarā bṛha̱tī bārha̍tāḥ pa̱śavo̍ bṛha̱tyaiva pa̱śūnava̍ ruṃdhate bṛha̱tī chaṃda̍sā̱g̱ svārā̎jyamāśnutāśnu̱vate̱ svārā̎jya̱ṃ ya e̱vaṃ vi̱dvṛsa̍ḥ ṣaṭtrṛśadrā̱tramāsa̍te suva̱rgame̱va lo̱kaṃ ya̍ntyatirā̱trāva̱bhito̍ bhavataḥ suva̱rgasya̍ lo̱kasya̱ pari̍gṛhītyai ||7.4.6||
a̱ti̱rā̱tra oja̍sye̱va ṣaṭ trṛ̍śacca ||7.4.6||
25 vasi̍ṣṭho ha̱tapu̍tro’kāmayata vi̱ndeya̍ pra̱jāma̱bhi sau̍dā̱sānbha̍veya̱miti̱ sa e̱tame̍kasmānna pañcā̱śama̍paśya̱ttamāha̍ra̱ttenā̍yajata̱ tato̱ vai so’vi̍ndata pra̱jāma̱bhi sau̍dā̱sāna̍bhava̱dya e̱vaṃ vi̱dvṛsa̍ ekasmānna pañcā̱śamāsa̍te vi̱ndante̎ pra̱jāma̱bhi bhrātṛ̍vyānbhavanti̱ traya̍stri̱vṛto̎’gniṣṭo̱mā bha̍vanti̱ vajra̍syai̱va mukhṛ̱ sa2ṛ śya̍nti̱ daśa̍ pañcada̱śā bha̍vanti pañcada̱śo vajro̱ 26 vajra̍me̱va bhrātṛ̍vyebhya̱ḥ pra ha̍ranti ṣoḍaśi̱madda̍śa̱mamaha̍rbhavati̱ vajra̍ e̱va vī̱rya̍ṃ dadhati̱ dvāda̍śa saptada̱śā bha̍vantya̱nnādya̱syāva̍ruddhyā̱ atho̱ praiva tairjā̍yante̱ pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̱ḥ ṣaṭpṛ̱ṣṭhāni̍ pṛ̱ṣṭhaire̱vartūna̱nvāro̍hantyṛ̱tubhi̍ḥ saṃvathsa̱raṃ te sa̍ṃvathsa̱ra e̱va prati̍ tiṣṭhanti̱ dvāda̍śaikavṛ̱śā bha̍vanti̱ prati̍ṣṭhityā̱ atho̱ ruca̍me̱vātma 27 nda̍dhate ba̱hava̍ḥ ṣoḍa̱śino̍ bhavanti̱ viji̍tyai̱ ṣaḍā̎śvi̱nāni̍ bhavanti̱ ṣaḍvā ṛ̱tava̍ ṛ̱tuṣve̱va prati̍ tiṣṭhantyūnātiri̱ktā vā e̱tā rātra̍ya ū̱nāstadyadeka̍syai̱ na pa̍ñcā̱śadati̍riktā̱stadyadbhūya̍sīra̱ṣṭā ca̍tvārṛśata ū̱nācca̱ khalu̱ vā ati̍riktācca pra̱jāpa̍ti̱ḥ prājā̍yata̱ ye pra̱jākā̍māḥ pa̱śukā̍mā̱ḥ syusta e̱tā ā̍sīra̱npraiva jā̍yante pra̱jayā̍ pa̱śubhi̍rvairā̱jo vā e̱ṣa ya̱jño yade̍kasmānnapañcā̱śo ya e̱vaṃ vi̱dvṛsa̍ ekasmānnapañcā̱śamāsa̍te vi̱rāja̍me̱va ga̍cchantyannā̱dā bha̍vantyatirā̱trāva̱bhito̍ bhavato̱’nnādya̍sya̱ pari̍gṛhītyai ||7.4.7||
vajra̍ ā̱tmanpra̱jayā̱ dvāvṛ̍śatiśca ||7.4.7||
28 sa̱ṃva̱thsa̱rāya̍ dīkṣi̱ṣyamā̍ṇā ekāṣṭa̱kāyā̎ṃ dīkṣeranne̱ṣā vai sa̍ṃvathsa̱rasya̱ patnī̱ yade̍kāṣṭa̱kaitasyā̱ṃ vā e̱ṣa e̱tṛ rātri̍ṃ vasati sā̱kṣāde̱va sa̍ṃvathsa̱ramā̱rabhya̍ dīkṣanta̱ ārta̱ṃ vā e̱te sa̍ṃvathsa̱rasyā̱bhi dī̎kṣante̱ ya e̍kāṣṭa̱kāyā̱ṃ dīkṣa̱nte’nta̍nāmānāvṛ̱tū bha̍vato̱ vya̍sta̱ṃ vā e̱te sa̍ṃvathsa̱rasyā̱bhi dī̎kṣante̱ ya e̍kāṣṭa̱kāyā̱ṃ dīkṣa̱nte’nta̍nāmānāvṛ̱tū bha̍vataḥ phalgunīpūrṇamā̱se dī̎kṣera̱nmukha̱ṃ vā e̱tath 29 sa̍ṃvathsa̱rasya̱ yatpha̍lgunīpūrṇamā̱so mu̍kha̱ta e̱va sa̍ṃvathsa̱ramā̱rabhya̍ dīkṣante̱ tasyaikai̱va ni̱ryā yathsāṃ me̎ghye viṣū̱vānthsa̱ṃ padya̍te citrāpūrṇamā̱se dī̎kṣera̱nmukha̱ṃ vā e̱tathsa̍ṃvathsa̱rasya̱ yacci̍trāpūrṇamā̱so mu̍kha̱ta e̱va sa̍ṃvathsa̱ramā̱rabhya̍ dīkṣante̱ tasya̱ na kāca̱na ni̱ryā bha̍vati catura̱he pu̱rastā̎tpaurṇamā̱syai dī̎kṣera̱nteṣā̍mekāṣṭa̱kāyā̎ṃ kra̱yaḥ saṃ pa̍dyate̱ tenai̍kāṣṭa̱kāṃ na cha̱ṃbaṭku̍rvanti̱ teṣā̎ṃ 30 pūrvapa̱kṣe su̱tyā saṃ pa̍dyate pūrvapa̱kṣaṃ māsā̍ a̱bhi saṃ pa̍dyante̱ te pū̎rvapa̱kṣa utti̍ṣṭhanti̱ tānu̱ttiṣṭha̍ta̱ oṣa̍dhayo̱ vana̱spata̱yo’nūtti̍ṣṭhanti̱ tānka̍lyā̱ṇī kī̱rtiranūtti̍ṣṭha̱tyarā̎thsuri̱me yaja̍mānā̱ iti̱ tadanu̱ sarve̍ rādhnuvanti ||7.4.8||
e̱taccha̱ṃbaṭku̍rvanti̱ teṣā̱ṃ catu̍strṛśacca ||7.4.8||
31 su̱va̱rgaṃ vā e̱te lo̱kaṃ ya̍nti̱ ye sa̱ttramu̍pa̱yantya̱bhīndha̍ta e̱va dī̱kṣābhi̍rā̱tmānagg̍ śrapayanta upa̱sadbhi̱rdvābhyā̱ṃ lomāva̍ dyanti̱ dvābhyā̱ṃ tvaca̱ṃ dvābhyā̱masṛ̱ddvābhyā̎ṃ mṛ̱saṃ dvābhyā̱masthi̱ dvābhyā̎ṃ ma̱jjāna̍mā̱tmada̍kṣiṇa̱ṃ vai sa̱ttramā̱tmāna̍me̱va dakṣi̍ṇāṃ nī̱tvā su̍va̱rgaṃ lo̱kaṃ ya̍nti̱ śikhā̱manu̱ pra va̍panta̱ ṛddhyā̱ atho̱ raghī̍yṛsaḥ suva̱rgaṃ lo̱kama̍yā̱meti̍ ||7.4.9||
su̱va̱rgaṃ pa̍ṃcā̱śat ||7.4.9||
32 bra̱hma̱vā̱dino̍ vadantyatirā̱traḥ pa̍ra̱mo ya̍jñakratū̱nāṃ kasmā̱ttaṃ pra̍tha̱mamupa̍ ya̱ntītye̱tadvā a̍gniṣṭo̱maṃ pra̍tha̱mamupa̍ ya̱ntyatho̱kthya̍matha̍ ṣoḍa̱śina̱mathā̍tirā̱trama̍nupū̱rvame̱vaitadya̍jña kra̱tūnu̱petya̱ tānā̱labhya̍ pari̱gṛhya̱ soma̍me̱vaitatpiba̍nta āsate̱ jyoti̍ṣṭomaṃ pratha̱mamupa̍ yanti̱ jyoti̍ṣṭomo̱ vai stomā̍nā̱ṃ mukha̍ṃ mukha̱ta e̱va stomā̱n pra yu̍ñjate̱ te 33 sa2ṛstu̍tā vi̱rāja̍ma̱bhi saṃ pa̍dyante̱ dve carcā̱vati̍ ricyete̱ eka̍yā̱ gaurati̍rikta̱ eka̱yāyu̍rū̱naḥ su̍va̱rgo vai lo̱ko jyoti̱rūrgvi̱rāṭthsu̍va̱rgame̱va tena̍ lo̱kaṃ ya̍nti rathaṃta̱raṃ divā̱ bhava̍ti rathaṃta̱raṃ nakta̱mityā̍hurbrahmavā̱dina̱ḥ kena̱ tadajā̱mīti̍ saubha̱raṃ tṛ̍tīyasava̱ne bra̍hmasā̱maṃ bṛ̱hattanma̍dhya̱to da̍dhati̱ vidhṛ̍tyai̱ tenājā̍mi ||7.4.10||
ta ekā̱nna pa̍ṃcā̱śacca̍ ||7.4.10||
34 jyoti̍ṣṭomaṃ pratha̱mamupa̍ yantya̱sminne̱va tena̍ lo̱ke prati̍ tiṣṭhanti̱ goṣṭo̍maṃ dvi̱tīya̱mupa̍ yantya̱ntari̍kṣa e̱va tena̱ prati̍ tiṣṭha̱ntyāyu̍ṣṭomaṃ tṛ̱tīya̱mupa̍ yantya̱muṣmi̍nne̱va tena̍ lo̱ke prati̍ tiṣṭhantī̱yaṃ vāva jyoti̍ra̱ntari̍kṣa̱ṃ gaura̱sāvāyu̱ryade̱tānthstomā̍nupa̱yantye̱ṣve̍va tallo̱keṣu̍ sa̱ttriṇa̍ḥ prati̱tiṣṭha̍nto yanti̱ te sa2ṛstu̍tā vi̱rāja̍ 35 ma̱bhi saṃ pa̍dyante̱ dve carcā̱vati̍ ricyete̱ eka̍yā̱ gaurati̍rikta̱ eka̱yāyu̍rū̱naḥ su̍va̱rgo vai lo̱ko jyoti̱rūrgvi̱rāḍūrja̍me̱vāva̍ ruṃdhate̱ te na kṣu̱dhārti̱mārccha̱ntyakṣo̍dhukā bhavanti̱ kṣuthsa̍ṃbādhā iva̱ hi sa̱ttriṇo̎’gniṣṭo̱māva̱bhita̍ḥ pra̱dhītāvu̱kthyā̍ madhye̱ nabhya̱ṃ tattade̱tatpa̍ri̱yadde̍vaca̱kraṃ yade̱tena̍ 36 ṣaḍa̱hena̱ yanti̍ devaca̱krame̱va sa̱māro̍ha̱ntyari̍ṣṭyai̱ te sva̱sti sama̍śnuvate ṣaḍa̱hena̍ yanti̱ ṣaḍvā ṛ̱tava̍ ṛ̱tuṣve̱va prati̍ tiṣṭhantyubha̱yato̎ jyotiṣā yantyubha̱yata̍ e̱va su̍va̱rge lo̱ke pra̍ti̱tiṣṭha̍nto yanti̱ dvau ṣa̍ḍa̱hau bha̍vata̱stāni̱ dvāda̱śāhā̍ni̱ saṃ pa̍dyante dvāda̱śo vai puru̍ṣo̱ dve sa̱kthyau̎ dvau bā̱hū ā̱tmā ca̱ śira̍śca ca̱tvāryaṅgā̍ni̱ stanau̎ dvāda̱śau 37 tatpuru̍ṣa̱manu̍ pa̱ryāva̍rtante̱ traya̍ḥ ṣaḍa̱hā bha̍vanti̱ tānya̱ṣṭāda̱śāhā̍ni̱ saṃ pa̍dyante̱ navā̱nyāni̱ navā̱nyāni̱ nava̱ vai puru̍ṣe prā̱ṇāstatprā̱ṇānanu̍ pa̱ryāva̍rtante ca̱tvāra̍ḥ ṣaḍa̱hā bha̍vanti̱ tāni̱ catu̍rvṛśati̱rahā̍ni̱ saṃ pa̍dyante̱ catu̍rvṛśatirardhamā̱sāḥ sa̍ṃvathsa̱rastathsa̍ṃvathsa̱ramanu̍ pa̱ryāva̍rta̱nte’pra̍tiṣṭhitaḥ saṃvathsa̱ra iti̱ khalu̱ vā ā̍hu̱rvarṣī̍yānprati̱ṣṭhāyā̱ itye̱tāva̱dvai sa̍ṃvathsa̱rasya̱ brāhma̍ṇa̱ṃ yāva̍nmā̱so mā̱simā̎sye̱va pra̍ti̱tiṣṭha̍nto yanti ||7.4.11||
vi̱rāja̍me̱tena̍ dvāda̱śāve̱tāva̱dvā a̱ṣṭau ca̍ ||7.4.11||
38 me̱ṣastvā̍ paca̱taira̍vatu̱ lohi̍tagrīva̱śchāgai̎ḥ śalma̱lirvṛddhyā̍ pa̱rṇo brahma̍ṇā pla̱kṣo medhe̍na nya̱grodha̍ścama̱sairu̍du̱ṃbara̍ ū̱rjā gā̍ya̱trī chando̍bhistri̱vṛthstomai̱rava̍ntī̱ḥ sthāva̍ntīstvāvantu pri̱yaṃ tvā̎ pri̱yāṇā̱ṃ varṣi̍ṣṭha̱māpyā̍nāṃ nidhī̱nāṃ tvā̍ nidhi̱patṛ̍ havāmahe vaso mama ||7.4.12||
me̱ṣaḥ ṣaṭ trṛ̍śat ||7.4.12||
39 kūpyā̎bhya̱ḥ svāhā̱ kūlyā̎bhya̱ḥ svāhā̍ vika̱ryā̎bhya̱ḥ svāhā̍’va̱ṭyā̎bhya̱ḥ svāhā̱ khanyā̎bhya̱ḥ svāhā̱ hradyā̎bhya̱ḥ svāhā̱ sūdyā̎bhya̱ḥ svāhā̍ sara̱syā̎bhya̱ḥ svāhā̍ vaiśa̱ntībhya̱ḥ svāhā̍ palva̱lyā̎bhya̱ḥ svāhā̱ varṣyā̎bhya̱ḥ svāhā̍’va̱ṟṣyābhya̱ḥ svāhā̎ hrā̱dunī̎bhya̱ḥ svāhā̱ pṛṣvā̎bhya̱ḥ svāhā̱ syanda̍mānābhya̱ḥ svāhā̎ sthāva̱rābhya̱ḥ svāhā̍ nāde̱yībhya̱ḥ svāhā̍ saindha̱vībhya̱ḥ svāhā̍ samu̱driyā̎bhya̱ḥ svāhā̱ sarvā̎bhya̱ḥ svāhā̎ ||7.4.13||
kūpyā̎bhyaścatvārṛ̱śat ||7.4.13||
40 a̱dbhyaḥ svāhā̱ vaha̍ntībhya̱ḥ svāhā̍ pari̱vaha̍ntībhya̱ḥ svāhā̍ sama̱ntaṃ vaha̍ntībhya̱ḥ svāhā̱ śīghra̱ṃ vaha̍ntībhya̱ḥ svāhā̱ śībha̱ṃ vaha̍ntībhya̱ḥ svāho̱graṃ vaha̍ntībhya̱ḥ svāhā̍ bhī̱maṃ vaha̍ntībhya̱ḥ svāhā’ṃbho̎bhya̱ḥ svāhā̱ nabho̎bhya̱ḥ svāhā̱ maho̎bhya̱ḥ svāhā̱ sarva̍smai̱ svāhā̎ ||7.4.14||
a̱dbhya ekā̱nna trṛ̱śat ||7.4.14||
41 yo arva̍nta̱ṃ jighṛ̍sati̱ tama̱bhya̍mīti̱ varu̍ṇaḥ | pa̱ro marta̍ḥ pa̱raḥ śvā || a̱haṃ ca̱ tvaṃ ca̍ vṛtraha̱nthsaṃ ba̍bhūva sa̱nibhya̱ ā | a̱rā̱tī̱vā ci̍dadri̱vo’nu̍ nau śūra mṛsatai bha̱drā indra̍sya rā̱taya̍ḥ || a̱bhi kratve̎ndra bhū̱radha̱ jmanna te̍ vivyaṅmahi̱mānṛ̱ rajṛ̍si | svenā̱ hi vṛ̱trṛ śava̍sā ja̱ghantha̱ na śatru̱ranta̍ṃ vividadyu̱dhā te̎ ||7.4.15||
vi̱vi̱da̱ dve ca̍ ||7.4.15||
42 namo̱ rājñe̱ namo̱ varu̍ṇāya̱ namo’śvā̍ya̱ nama̍ḥ pra̱jāpa̍taye̱ namo’dhi̍pata̱ye’dhi̍patira̱syadhi̍patiṃ mā ku̱rvadhi̍patira̱haṃ pra̱jānā̎ṃ bhūyāsa̱ṃ māṃ dhe̍hi̱ mayi̍ dhehyu̱pākṛ̍tāya̱ svāhāla̍bdhāya̱ svāhā̍ hu̱tāya̱ svāhā̎ ||7.4.16||
nama̱ ekā̱nna trṛ̱śat ||7.4.16||
43 ma̱yo̱bhūrvāto̍ a̱bhi vā̍tū̱srā ūrja̍svatī̱roṣa̍dhī̱rā ri̍śantām | pīva̍svatīrjī̱vadha̍nyāḥ pibantvava̱sāya̍ pa̱dvate̍ rudra mṛḍa || yāḥ sarū̍pā̱ virū̍pā̱ eka̍rūpā̱ yāsā̍ma̱gniriṣṭyā̱ nāmā̍ni̱ veda̍ | yā aṃgi̍rasa̱stapa̍se̱ha ca̱krustābhya̍ḥ parjanya̱ mahi̱ śarma̍ yaccha || yā de̱veṣu̍ ta̱nuva̱maira̍yanta̱ yāsṛ̱ somo̱ viśvā̍ rū̱pāṇi̱ veda̍ | tā a̱smabhya̱ṃ paya̍sā̱ pinva̍mānāḥ pra̱jāva̍tīrindra 44 go̱ṣṭhe ri̍rīhi || pra̱jāpa̍ti̱rmahya̍me̱tā rarā̍ṇo̱ viśvai̎rde̱vaiḥ pi̱tṛbhi̍ḥ saṃvidā̱naḥ | śi̱vāḥ sa̱tīrupa̍ no go̱ṣṭhamāka̱stāsā̎ṃ va̱yaṃ pra̱jayā̱ sṛ sa̍dema || i̱ha dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ svāhe̱ha rama̍ti̱ḥ svāhā̍ ma̱hī mū̱ṣu su̱trāmā̍ṇam ||7.4.17||
i̱ndrā̱ṣṭā trṛ̍śacca ||7.4.17||
45 ki2ṛ svi̍dāsītpū̱rvaci̍tti̱ḥ ki2ṛ svi̍dāsīdbṛ̱hadvaya̍ḥ | ki2ṛ svi̍dāsītpiśaṃgi̱lā ki2ṛ svi̍dāsītpilippi̱lā || dyaurā̍sītpū̱rvaci̍tti̱raśva̍ āsīdbṛ̱hadvaya̍ḥ | rātri̍rāsītpiśaṃgi̱lāvi̍rāsītpilippi̱lā || kaḥ svi̍dekā̱kī ca̍rati̱ ka u̍ svijjāyate̱ puna̍ḥ | ki2ṛ svi̍ddhi̱masya̍ bheṣa̱jaṃ ki2ṛ svi̍dā̱vapa̍naṃ ma̱hat || sūrya̍ ekā̱kī ca̍rati 46 ca̱ndramā̍ jāyate̱ puna̍ḥ | a̱gnirhi̱masya̍ bheṣa̱jaṃ bhūmi̍rā̱vapa̍naṃ ma̱hat || pṛ̱cchāmi̍ tvā̱ para̱manta̍ṃ pṛthi̱vyāḥ pṛ̱cchāmi̍ tvā̱ bhuva̍nasya̱ nābhi̎m | pṛ̱cchāmi̍ tvā̱ vṛṣṇo̱ aśva̍sya̱ reta̍ḥ pṛ̱cchāmi̍ vā̱caḥ pa̍ra̱maṃ vyo̍ma || vedi̍māhu̱ḥ para̱manta̍ṃ pṛthi̱vyā ya̱jñamā̍hu̱rbhuva̍nasya̱ nābhi̎m | soma̍māhu̱rvṛṣṇo̱ aśva̍sya̱ reto̱ brahmai̱va vā̱caḥ pa̍ra̱maṃ vyo̍ma ||7.4.18||
sūrya̍ ekā̱kī ca̍rati̱ ṣaṭ ca̍tvārṛśacca ||7.4.18||
47 ambe̱ aṃbā̱lyaṃbi̍ke̱ na mā̍ nayati̱ kaśca̱na | sa̱ sastya̍śva̱kaḥ || subha̍ge̱ kāṃpī̍lavāsini suva̱rge lo̱ke saṃ prorṇvā̍thām | āhama̍jāni garbha̱dhamā tvama̍jāsi garbha̱dham | tau sa̱ha ca̱tura̍ḥ pa̱daḥ saṃ pra sā̍rayāvahai | vṛṣā̍ vṛ reto̱dhā reto̍ dadhā̱tūthsa̱kthyo̎rgṛ̱daṃ dhe̎hya̱ṃjimuda̍ṃji̱manva̍ja | yaḥ strī̱ṇāṃ jī̍va̱bhoja̍no̱ ya ā̍sāṃ 48 bila̱dhāva̍naḥ | pri̱yaḥ strī̱ṇāma̍pī̱cya̍ḥ | ya ā̍sāṃ kṛ̱ṣṇe lakṣma̍ṇi̱ sardi̍gṛdiṃ pa̱rāva̍dhīt || ambe̱ aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || ū̱rdhvāme̍nā̱mucchra̍yatādveṇubhā̱raṃ gi̱rāvi̍va | athā̎syā̱ madhya̍medhatṛ śī̱te vāte̍ pu̱nanni̍va || ambe̱ aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || yaddha̍ri̱ṇī yava̱matti̱ na 49 pu̱ṣṭaṃ pa̱śu ma̍nyate | śū̱drā yadarya̍jārā̱ na poṣā̍ya dhanāyati || ambe̱ aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || i̱yaṃ ya̱kā śa̍kunti̱kāhala̱miti̱ sarpa̍ti | āha̍taṃ ga̱bhe paso̱ ni ja̍lgulīti̱ dhāṇi̍kā || ambe̱ aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || mā̱tā ca̍ te pi̱tā ca̱ te’gra̍ṃ vṛ̱kṣasya̍ rohataḥ | 50 pra su̍lā̱mīti̍ te pi̱tā ga̱bhe mu̱ṣṭima̍tṛsayat || da̱dhi̱krāvṇṇo̍ akāriṣaṃ ji̱ṣṇoraśva̍sya vā̱jina̍ḥ | su̱ra̱bhi no̱ mukhā̍ kara̱tpraṇa̱ āyṛ̍ṣi tāriṣat || āpo̱ hiṣṭhā ma̍yo̱bhuva̱stā na̍ ū̱rje da̍dhātana | ma̱he raṇā̍ya̱ cakṣa̍se || yo va̍ḥ śi̱vata̍mo̱ rasa̱stasya̍ bhājayate̱ha na̍ḥ | u̱śa̱tīri̍va mā̱tara̍ḥ || tasmā̱ ara̍ṃ gamāma vo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ ||7.4.19||
ā̱sā̱matti̱ na ro̍hato̱ jinva̍tha ca̱tvāri̍ ca ||7.4.19||
51 bhūrbhuva̱ḥsuva̱rvasa̍vastvā’ñjantu gāya̱treṇa̱ chaṃda̍sā ru̱drāsstvā̎ñjantu̱ traiṣṭu̍bhena̱ chaṃda̍sādi̱tyāstvā̎ñjantu̱ jāga̍tena̱ chaṃda̍sā̱ yadvāto̍ a̱po aga̍ma̱dindra̍sya ta̱nuva̍ṃ pri̱yām | e̱ta2ṛ sto̍tare̱tena̍ pa̱thā puna̱raśva̱mā va̍rtayāsi naḥ || lājī 3 ñchācī 3 n, yaśo̍ ma̱mā 4 m | ya̱vyāyai̍ ga̱vyāyā̍ e̱tadde̍vā̱ anna̍mattai̱tadanna̍maddhi prajāpate || yu̱ñjanti̍ bra̱dhnama̍ru̱ṣaṃ cara̍nta̱ṃ pari̍ ta̱sthuṣa̍ḥ | roca̍nte roca̱nā di̱vi || yu̱ñjantya̍sya̱ kāmyā̱ harī̱ vipa̍kṣasā̱ rathe̎ | śoṇā̍ dhṛ̱ṣṇū nṛ̱vāha̍sā || ke̱tuṃ kṛ̱ṇvanna̍ke̱tave̱ peśo̍ maryā ape̱śase̎ | samu̱ṣadbhi̍rajāyathāḥ ||7.4.20||
bra̱dhnaṃ paṃca̍ vṛśatiśca ||7.4.20||
52 prā̱ṇāya̱ svāhā̎ vyā̱nāya̱ svāhā̍pā̱nāya̱ svāhā̱ snāva̍bhya̱ḥ svāhā̍ saṃtā̱nebhya̱ḥ svāhā̱ pari̍saṃtānebhya̱ḥ svāhā̱ parva̍bhya̱ḥ svāhā̍ sa̱ṃdhāne̎bhya̱ḥ svāhā̱ śarī̍rebhya̱ḥ svāhā̍ ya̱jñāya̱ svāhā̱ dakṣi̍ṇābhya̱ḥ svāhā̍ suva̱rgāya̱ svāhā̍ lo̱kāya̱ svāhā̱ sarva̍smai̱ svāhā̎ ||7.4.21||
prā̱ṇāyā̱ṣṭāvṛ̍śatiḥ ||7.4.21||
53 si̱tāya̱ svāhāsi̍tāya̱ svāhā̱bhihi̍tāya̱ svāhāna̍bhihitāya̱ svāhā̍ yu̱ktāya̱ svāhāyu̍ktāya̱ svāhā̱ suyu̍ktāya̱ svāhodyu̍ktāya̱ svāhā̱ vimu̍ktāya̱ svāhā̱ pramu̍ktāya̱ svāhā̱ vañca̍te̱ svāhā̍ pari̱vañca̍te̱ svāhā̍ sa̱ṃvañca̍te̱ svāhā̍nu̱vañca̍te̱ svāho̱dvañca̍te̱ svāhā̍ ya̱te svāhā̱ dhāva̍te̱ svāhā̱ tiṣṭha̍te̱ svāhā̱ sarva̍smai̱ svāhā̎ ||7.4.22||
si̱tāyā̱ṣṭā trṛ̍śat ||7.4.22||