Kṛṣṇayajuḥ Taittirīyasaṃhitā — Pañcama kāṇḍa, prapāṭhaka 7 (51 anuvākāḥ)
Kṛṣṇayajuḥ Taittirīyasaṃhitā — Pañcama kāṇḍa, prapāṭhaka 7
Section titled “Kṛṣṇayajuḥ Taittirīyasaṃhitā — Pañcama kāṇḍa, prapāṭhaka 7”pañcamakāṇḍe saptamaḥ praśnaḥ 7
Anuvākāḥ
Section titled “Anuvākāḥ”1 yo vā aya̍thādevatama̱gniṃ ci̍nu̱ta ā de̱vatā̎bhyo vṛścyate̱ pāpī̍yānbhavati̱ yo ya̍thādeva̱taṃ na de̱vatā̎bhya̱ ā vṛ̍ścyate̱ vasī̍yānbhavatyāgne̱yyā gā̍yatri̱yā pra̍tha̱māṃ citi̍ma̱bhi mṛ̍śettri̱ṣṭubhā̎ dvi̱tīyā̱ṃ jaga̍tyā tṛ̱tīyā̍manu̱ṣṭubhā̍ catu̱rthīṃ pa̱ṅktyā pa̍ñca̱mīṃ ya̍thādeva̱tame̱vāgniṃ ci̍nute̱ na de̱vatā̎bhya̱ ā vṛ̍ścyate̱ vasī̍yānbhava̱tīḍā̍yai̱ vā e̱ṣā vibha̍ktiḥ pa̱śava̱ iḍā̍ pa̱śubhi̍renaṃ 2 cinute̱ yo vai pra̱jāpa̍taye prati̱procyā̱gniṃ ci̱noti̱ nārti̱mārccha̱tyaśvā̍va̱bhita̍stiṣṭhetāṃ kṛ̱ṣṇa u̍ttara̱taḥ śve̱to dakṣi̍ṇa̱stāvā̱labhyeṣṭa̍kā̱ upa̍ dadhyāde̱tadvai pra̱jāpa̍te rū̱paṃ prā̍jāpa̱tyo’śva̍ḥ sā̱kṣāde̱va pra̱jāpa̍taye prati̱procyā̱gniṃ ci̍noti̱ nārti̱mārccha̍tye̱tadvā ahno̍ rū̱paṃ yacchve̱to’śvo̱ rātri̍yai kṛ̱ṣṇa e̱tadahno̍ 3 rū̱paṃ yadiṣṭa̍kā̱ rātri̍yai̱ purī̍ṣa̱miṣṭa̍kā upadhā̱syañchve̱tamaśva̍ma̱bhi mṛ̍śe̱t purī̍ṣamupadhā̱syan kṛ̱ṣṇama̍horā̱trābhyā̍me̱vaina̍ṃ cinute hiraṇyapā̱traṃ madho̎ḥ pū̱rṇaṃ da̍dāti madha̱vyo̍’sā̱nīti̍ sau̱ryā ci̱trava̱tyāve̎kṣate ci̱trame̱va bha̍vati ma̱dhyaṃdi̱ne’śva̱mava̍ ghrāpayatya̱sau vā ā̍di̱tya indra̍ e̱ṣa pra̱jāpa̍tiḥ prājāpa̱tyo’śva̱stame̱va sā̱kṣādṛ̍dhnoti ||5.7.1||
e̱na̱me̱tadahno̱’ṣṭā ca̍tvārṛśacca ||5.7.1||
4 tvāma̍gne vṛṣa̱bhaṃ ceki̍tāna̱ṃ puna̱ryuvā̍naṃ ja̱naya̍nnu̱pāgā̎m | a̱sthū̱riṇo̱ gārha̍patyāni santu ti̱gmena̍ no̱ brahma̍ṇā̱ sṛ śi̍śādhi || pa̱śavo̱ vā e̱te yadiṣṭa̍kā̱ścityā̎ṃ cityāmṛṣa̱bhamupa̍ dadhāti mithu̱name̱vāsya̱ tadya̱jñe ka̍roti pra̱jana̍nāya̱ tasmā̎dyū̱theyū̍tha ṛṣa̱bhaḥ || sa̱ṃva̱thsa̱rasya̍ prati̱māṃ yāṃ tvā̍ rātryu̱pāsa̍te | pra̱jṛ su̱vīrā̎ṃ kṛ̱tvā viśva̱māyu̱rvya̍śnavat || prā̱jā̱patyā 5 me̱tāmupa̍ dadhātī̱yaṃ vāvaiṣaikā̎ṣṭa̱kā yade̱vaikā̎ṣṭa̱kāyā̱manna̍ṃ kri̱yate̱ tade̱vaitayāva̍ ruṃdha e̱ṣā vai pra̱jāpa̍teḥ kāma̱dughā̱ tayai̱va yaja̍māno̱’muṣmi̍3ṛllo̱ke̎’gniṃ du̍he̱ yena̍ de̱vā jyoti̍ṣo̱rdhvā u̱dāya̱ṉ yenā̍di̱tyā vasa̍vo̱ yena̍ ru̱drāḥ | yenāṃgi̍raso mahi̱māna̍māna̱śustenai̍tu̱ yaja̍mānaḥ sva̱sti || su̱va̱rgāya̱ vā e̱ṣa lo̱kāya̍ 6 cīyate̱ yada̱gniryena̍ de̱vā jyoti̍ṣo̱rdhvā u̱dāya̱nnityukhyṛ̱ sami̍nddha̱ iṣṭa̍kā e̱vaitā upa̍ dhatte vānaspa̱tyāḥ su̍va̱rgasya̍ lo̱kasya̱ sama̍ṣṭyai śa̱tāyu̍dhāya śa̱tavī̎ryāya śa̱tota̍ye’bhimāti̱ṣāhe̎ | śa̱taṃ yo na̍ḥ śa̱rado̱ ajī̍tā̱nindro̍ neṣa̱dati̍ duri̱tāni̱ viśvā̎ || ye ca̱tvāra̍ḥ pa̱thayo̍ deva̱yānā̍ anta̱rā dyāvā̍pṛthi̱vī vi̱yanti̍ | teṣā̱ṃ yo ajyā̍ni̱majī̍timā̱vahā̱ttasmai̍ no devā̱ḥ 7 pari̍ datte̱ha sarve̎ || grī̱ṣmo he̍ma̱nta u̱ta no̍ vasa̱ntaḥ śa̱radva̱ṟṣāḥ su̍vi̱taṃ no̍ astu | teṣā̍mṛtū̱nṛ śa̱taśā̍radānāṃ nivā̱ta e̍ṣā̱mabha̍ye syāma || i̱du̱va̱thsa̱rāya̍ parivathsa̱rāya̍ saṃvathsa̱rāya̍ kṛṇutā bṛ̱hannama̍ḥ | teṣā̎ṃ va̱yṛ su̍ma̱tau ya̱jñiyā̍nā̱ṃ jyogajī̍tā̱ aha̍tāḥ syāma || bha̱drānna̱ḥ śreya̱ḥ sama̍naiṣṭa devā̱stvayā̍va̱sena̱ sama̍śīmahi tvā | sa no̍ mayo̱bhūḥ pi̍to̱ 8 ā vi̍śasva̱ śaṃ to̱kāya̍ ta̱nuve̎ syo̱naḥ || ajyā̍nīre̱tā upa̍ dadhātye̱tā vai de̱vatā̱ apa̍rājitā̱stā e̱va pra vi̍śati̱ naiva jī̍yate brahmavā̱dino̍ vadanti̱ yada̍rdhamā̱sā māsā̍ ṛ̱tava̍ḥ saṃvathsa̱ra oṣa̍dhī̱ḥ paca̱ntyatha̱ kasmā̍da̱nyābhyo̍ de̱vatā̎bhya āgraya̱ṇaṃ niru̍pyata̱ itye̱tā hi tadde̱vatā̍ u̱daja̍ya̱ṉ yadṛ̱tubhyo̍ ni̱rvape̎dde̱vatā̎bhyaḥ sa̱mada̍ṃ dadhyādāgraya̱ṇaṃ ni̱rupyai̱tā āhu̍tīrjuhotyardhamā̱sāne̱va māsā̍nṛ̱tūnthsa̍ṃvathsa̱raṃ prī̍ṇāti̱ na de̱vatā̎bhyaḥ sa̱mada̍ṃ dadhāti bha̱drānna̱ḥ śreya̱ḥ sama̍naiṣṭa devā̱ ityā̍ha hu̱tādyā̍ya̱ yaja̍māna̱syāpa̍rābhāvāya ||5.7.2||
prā̱jā̱pa̱tyāṃ lo̱kāya̍ devāḥ pito dadhyādāgraya̱ṇaṃ pañca̍ vṛśatiśca ||5.7.2||
9 indra̍sya̱ vajro̍’si̱ vārtra̍ghnastanū̱pā na̍ḥ pratispa̱śaḥ | yo na̍ḥ pu̱rastā̎ddakṣiṇa̱taḥ pa̱ścādu̍ttara̱to̍’ghā̱yura̍bhi̱dāsa̍tye̱tṛ so’śmā̍namṛcchatu || de̱vā̱su̱rāḥ saṃya̍ttā āsa̱nte’su̍rā di̱gbhya ābā̍dhanta̱ tānde̱vā iṣvā̍ ca̱ vajre̍ṇa̱ cāpā̍nudanta̱ yadva̱jriṇī̍rupa̱dadhā̱tīṣvā̍ cai̱va tadvajre̍ṇa ca̱ yaja̍māno̱ bhrātṛ̍vyā̱napa̍ nudate di̱kṣūpa̍ 10 dadhāti devapu̱rā e̱vaitāsta̍nū̱pānī̱ḥ paryū̍ha̱te’gnā̍viṣṇū sa̱joṣa̍se̱mā va̍rdhantu vā̱ṃ gira̍ḥ | dyu̱mnairvāje̍bhi̱rā ga̍tam || bra̱hma̱vā̱dino̍ vadanti̱ yanna de̱vatā̍yai̱ juhva̱tyatha̍ kiṃdeva̱tyā̍ vaso̱rdhāretya̱gnirvasu̱stasyai̱ṣā dhārā̱ viṣṇu̱rvasu̱stasyai̱ṣā dhārā̎gnāvaiṣṇa̱vyarcā vaso̱rdhārā̎ṃ juhoti bhāga̱dheye̍nai̱vainau̱ sama̍rdhaya̱tyatho̍ e̱tā 11 me̱vāhu̍timā̱yata̍navatīṃ karoti̱ yatkā̍ma enāṃ ju̱hoti̱ tade̱vāva̍ ruṃdhe ru̱dro vā e̱ṣa yada̱gnistasyai̱te ta̱nuvau̍ gho̱rānyā śi̱vānyā yaccha̍taru̱drīya̍ṃ ju̱hoti̱ yaivāsya̍ gho̱rā ta̱nūstāṃ tena̍ śamayati̱ yadvaso̱rdhārā̎ṃ ju̱hoti̱ yaivāsya̍ śi̱vā ta̱nūstāntena̍ prīṇāti̱ yo vai vaso̱rdhārā̍yai 12 prati̱ṣṭhāṃ veda̱ pratye̱va ti̍ṣṭhati̱ yadājya̍mu̱cchiṣye̍ta̱ tasmi̍nbrahmauda̱naṃ pa̍ce̱ttaṃ brā̎hma̱ṇāśca̱tvāra̱ḥ prāśnī̍yure̱ṣa vā a̱gnirvai̎śvāna̱ro yadbrā̎hma̱ṇa e̱ṣā khalu̱ vā a̱gneḥ pri̱yā ta̱nūryadvai̎śvāna̱raḥ pri̱yāyā̍me̱vainā̎ṃ ta̱nuvā̱ṃ prati̍ ṣṭhāpayati̱ cata̍sro dhe̱nūrda̍dyā̱ttābhi̍re̱va yaja̍māno̱’muṣmi̍3ṛllo̱ke̎’ gniṃ du̍he ||5.7.3||
upai̱tāṃ dhārā̍yai̱ ṣaṭca̍tvārṛśacca ||5.7.3||
13 citti̍ṃ juhomi̱ mana̍sā ghṛ̱tenetyā̱hādā̎bhyā̱ vai nāmai̱ṣāhu̍tirvaiśvakarma̱ṇī naina̍ṃ cikyā̱naṃ bhrātṛ̍vyo dabhno̱tyatho̍ de̱vatā̍ e̱vāva̍ ru̱ṃdhe’gne̱ tama̱dyeti̍ pa̱ṅktyā ju̍hoti pa̱ṅktyāhu̍tyā yajñamu̱khamā ra̍bhate sa̱pta te̍ agne sa̱midha̍ḥ sa̱pta ji̱hvā ityā̍ha̱ hotrā̍ e̱vāva̍ ruṃdhe̱’gnirde̱vebhyo’pā̎krāmadbhāga̱dheya̍ 14 mi̱cchamā̍na̱stasmā̍ e̱tadbhā̍ga̱dheya̱ṃ prāya̍cchanne̱tadvā a̱gnera̍gniho̱trame̱tarhi̱ khalu̱ vā e̱ṣa jā̱to yarhi̱ sarva̍ści̱to jā̱tāyai̱vāsmā̱ anna̱mapi̍ dadhāti̱ sa e̍naṃ prī̱taḥ prī̍ṇāti̱ vasī̍yānbhavati brahmavā̱dino̍ vadanti̱ yade̱ṣa gārha̍patyaścī̱yate’tha̱ kvā̎syāhava̱nīya̱ itya̱sāvā̍di̱tya iti̍ brūyāde̱tasmi̱ṉ hi sarvā̎bhyo de̱vatā̎bhyo̱ juhva̍ti̱ 15 ya e̱vaṃ vi̱dvāna̱gniṃ ci̍nu̱te sā̱kṣāde̱va de̱vatā̍ ṛdhno̱tyagne̍ yaśasvi̱ṉ yaśa̍se̱mama̍rpa̱yendrā̍vatī̱mapa̍citīmi̱hā va̍ha | a̱yaṃ mū̱rdhā pa̍rame̱ṣṭhī su̱varcā̎ḥ samā̱nānā̍mutta̱maślo̍ko astu || bha̱draṃ paśya̍nta̱ upa sedu̱ragre̱ tapo̍ dī̱kṣāmṛṣa̍yaḥ suva̱rvida̍ḥ | tata̍ḥ, kṣa̱traṃ bala̱moja̍śca jā̱tantada̱smai de̱vā a̱bhi saṃ na̍mantu || dhā̱tā vi̍dhā̱tā pa̍ra̱mo 16 ta sa̱ṃdṛkpra̱jāpa̍tiḥ parame̱ṣṭhī vi̱rājā̎ | stomā̱śchandṛ̍si ni̱vido̍ ma āhure̱tasmai̍ rā̱ṣṭrama̱bhi saṃ na̍māma || a̱bhyāva̍rtadhva̱mupa̱meta̍ sā̱kama̱yṛ śā̱stādhi̍patirvo astu | a̱sya vi̱jñāna̱manu̱ sṛ ra̍bhadhvami̱maṃ pa̱ścādanu̍ jīvātha̱ sarve̎ || rā̱ṣṭra̱bhṛta̍ e̱tā upa̍ dadhātye̱ṣā vā a̱gneścitī̍ rāṣṭra̱bhṛttayai̱vāsmi̍nrā̱ṣṭraṃ da̍dhāti rā̱ṣṭrame̱va bha̍vati̱ nāsmā̎drā̱ṣṭraṃ bhrṛ̍śate ||5.7.4||
bhā̱ga̱dheya̱ṃ juhva̍ti para̱mā rā̱ṣṭraṃ da̍dhāti sa̱pta ca̍ ||5.7.4||
17 yathā̱ vai pu̱tro jā̱to mri̱yata̍ e̱vaṃ vā e̱ṣa mri̍yate̱ yasyā̱gnirukhya̍ u̱dvāya̍ti̱ yanni̍rma̱nthya̍ṃ ku̱ryādvi cchi̍ndyā̱dbhrātṛ̍vyamasmai janaye̱thsa e̱va puna̍ḥ pa̱rīdhya̱ḥ svāde̱vaina̱ṃ yone̎rjanayati̱ nāsmai̱ bhrātṛ̍vyaṃ janayati̱ tamo̱ vā e̱taṃ gṛ̍hṇāti̱ yasyā̱gnirukhya̍ u̱dvāya̍ti mṛ̱tyustama̍ḥ kṛ̱ṣṇaṃ vāsa̍ḥ kṛ̱ṣṇā dhe̱nurdakṣi̍ṇā̱ tama̍sai̱ 18 va tamo̍ mṛ̱tyumapa̍ hate̱ hira̍ṇyaṃ dadāti̱ jyoti̱rvai hira̍ṇya̱ṃ jyoti̍ṣai̱va tamo’pa̍ ha̱te’tho̱ tejo̱ vai hira̍ṇya̱ṃ teja̍ e̱vātmandha̍tte̱ suva̱rna gha̱rmaḥ svāhā̱ suva̱rnārkaḥ svāhā̱ suva̱rna śu̱kraḥ svāhā̱ suva̱rna jyoti̱ḥ svāhā̱ suva̱rna sūrya̱ḥ svāhā̱rko vā e̱ṣa yada̱gnira̱sāvā̍di̱tyo̎ 19 ‘śvame̱dho yade̱tā āhu̍tīrju̱hotya̍rkāśvame̱dhayo̍re̱va jyotṛ̍ṣi̱ saṃ da̍dhātye̱ṣa ha̱ tvā a̍rkāśvame̱dhī yasyai̱tada̱gnau kri̱yata̱ āpo̱ vā i̱damagre̍ sali̱lamā̍sī̱thsa e̱tāṃ pra̱jāpa̍tiḥ pratha̱māṃ citi̍mapaśya̱ttāmupā̍dhatta̱ tadi̱yama̍bhava̱ttaṃ vi̱śvaka̍rmābravī̱dupa̱ tvāyā̱nīti̱ neha lo̱ko̎’stītya̍ 20 bravī̱thsa e̱tāṃ dvi̱tīyā̱ṃ citi̍mapaśya̱ttāmupā̍dhatta̱ tada̱ntari̍kṣamabhava̱thsa ya̱jñaḥ pra̱jāpa̍timabravī̱dupa̱ tvāyā̱nīti̱ neha lo̱ko̎’stītya̍bravī̱thsa vi̱śvaka̍rmāṇamabravī̱dupa̱ tvāyā̱nīti̱ kena̍ mo̱paiṣya̱sīti̱ diśyā̍bhi̱ritya̍bravī̱ttaṃ diśyā̍bhiru̱paittā upā̍dhatta̱ tā diśo̍ 21 ‘bhava̱nthsa pa̍rame̱ṣṭhī pra̱jāpa̍timabravī̱dupa̱ tvāyā̱nīti̱ neha lo̱ko̎’stītya̍bravī̱thsa vi̱śvaka̍rmāṇaṃ ca ya̱jñaṃ cā̎bravī̱dupa̍ vā̱māyā̱nīti̱ neha lo̱ko̎’stītya̍brūtṛ̱ sa e̱tāṃ tṛ̱tīyā̱ṃ citi̍mapaśya̱ttāmupā̍dhatta̱ tada̱sāva̍bhava̱thsa ā̍di̱tyaḥ pra̱jāpa̍timabravī̱dupa̱ tvā 22 ‘yā̱nīti̱ neha lo̱ko̎’stītya̍bravī̱thsa vi̱śvaka̍rmāṇaṃ ca ya̱jñaṃ cā̎bravī̱dupa̍ vā̱māyā̱nīti̱ neha lo̱ko̎’stītya̍brūtṛ̱ sa pa̍rame̱ṣṭhina̍mabravī̱dupa̱ tvāyā̱nīti̱ kena̍ mo̱paiṣya̱sīti̍ lokaṃ pṛ̱ṇayetya̍bravī̱ttaṃ lo̍kaṃ pṛ̱ṇayo̱paittasmā̱dayā̍tayāmnī lokaṃ pṛ̱ṇā’yā̍tayāmā̱ hya̍sā 23 vā̍di̱tyastānṛṣa̍yo’bruva̱nnupa̍ va̱ āyā̱meti̱ kena̍ na u̱paiṣya̱theti̍ bhū̱mnetya̍bruva̱ntāndvābhyā̱ṃ citī̎bhyāmu̱pāya̱nthsa pañca̍citīka̱ḥ sama̍padyata̱ ya e̱vaṃ vi̱dvāna̱gniṃ ci̍nu̱te bhūyā̍ne̱va bha̍vatya̱bhīmā3ṛllo̱kāñja̍yati vi̱dure̍naṃ de̱vā atho̍ e̱tāsā̍me̱va de̱vatā̍nṛ̱ sāyu̍jyaṃ gacchati ||5.7.5||
tama̍sā’di̱tyo̎’stīti̱ diśa̍ ādi̱tyaḥ pra̱jāpa̍timabravī̱dupa̍ tvā̱sau pañca̍ catvārṛśacca ||5.7.5||
24 vayo̱ vā a̱gniryada̍gni̱cit pa̱kṣiṇo̎’śnī̱yāt tame̱vāgnima̍dyā̱dārti̱mārcche̎thsaṃvathsa̱raṃ vra̱taṃ ca̍rethsaṃvathsa̱rṛ hi vra̱taṃ nāti̍ pa̱śurvā e̱ṣa yada̱gnirhi̱nasti̱ khalu̱ vai taṃ pa̱śurya e̍naṃ pu̱rastā̎tpra̱tyañca̍mupa̱ cara̍ti̱ tasmā̎tpa̱ścātprāṅu̍pa̱carya̍ ā̱tmano’hṛ̍sāyai̱ tejo̍’si̱ tejo̍ me yaccha pṛthi̱vīṃ ya̍ccha 25 pṛthi̱vyai mā̍ pāhi̱ jyoti̍rasi̱ jyoti̍rme yacchā̱ntari̍kṣaṃ yacchā̱ntari̍kṣānmā pāhi̱ suva̍rasi̱ suva̍rme yaccha̱ diva̍ṃ yaccha di̱vo mā̍ pā̱hītyā̍hai̱tābhi̱rvā i̱me lo̱kā vidhṛ̍tā̱ yade̱tā u̍pa̱dadhā̎tye̱ṣāṃ lo̱kānā̱ṃ vidhṛ̍tyai svayamātṛ̱ṇṇā u̍pa̱dhāya̍ hiraṇyeṣṭa̱kā upa̍ dadhātī̱me vai lo̱kāḥ sva̍yamātṛ̱ṇṇā jyoti̱ṟhira̍ṇya̱ṃ yathsva̍yamātṛ̱ṇṇā u̍pa̱dhāya̍ 26 hiraṇyeṣṭa̱kā u̍pa̱dadhā̍tī̱māne̱vaitābhi̍rlo̱kāñjyoti̍ṣmataḥ kuru̱te’tho̍ e̱tābhi̍re̱vāsmā̍ i̱me lo̱kāḥ pra bhā̎nti̱ yāste̍ agne̱ sūrye̱ ruca̍ udya̱to diva̍māta̱nvanti̍ ra̱śmibhi̍ḥ | tābhi̱ḥ sarvā̍bhī ru̱ce janā̍ya naskṛdhi || yā vo̍ devā̱ḥ sūrye̱ ruco̱ goṣvaśve̍ṣu̱ yā ruca̍ḥ | indrā̎gnī̱ tābhi̱ḥ sarvā̍bhī̱ ruca̍ṃ no dhatta bṛhaspate || ruca̍ṃ no dhehi 27 brāhma̱ṇeṣu̱ rucṛ̱ rāja̍su naskṛdhi | ruca̍ṃ vi̱śye̍ṣu śū̱dreṣu̱ mayi̍ dhehi ru̱cā ruca̎m || dve̱dhā vā a̱gniṃ ci̍kyā̱nasya̱ yaśa̍ iṃdri̱yaṃ ga̍cchatya̱gniṃ vā̍ ci̱tamī̍jā̱naṃ vā̱ yade̱tā āhu̍tīrju̱hotyā̱tmanne̱va yaśa̍ iṃdri̱yaṃ dha̍tta īśva̱ro vā e̱ṣa ārti̱mārto̱ṟyo̎’gniṃ ci̱nvanna̍dhi̱ krāma̍ti̱ tattvā̍ yāmi̱ brahma̍ṇā̱ vanda̍māna̱ iti̍ vāru̱ṇyarcā 28 ju̍huyā̱cchānti̍re̱vaiṣāgnergupti̍rā̱tmano̍ ha̱viṣkṛ̍to̱ vā e̱ṣa yo̎’gniṃ ci̍nu̱te yathā̱ vai ha̱viḥ skanda̍tye̱vaṃ vā e̱ṣa ska̍ndati̱ yo̎’gniṃ ci̱tvā striya̍mu̱paiti̍ maitrāvaru̱ṇyāmikṣa̍yā yajeta maitrāvaru̱ṇatā̍me̱vopai̎tyā̱tmano’ska̍ndāya̱ yo vā a̱gnimṛ̍tu̱sthāṃ veda̱rturṛ̍turasmai̱ kalpa̍māna eti̱ pratye̱va ti̍ṣṭhati saṃvathsa̱ro vā a̱gnir 29 ṛtu̱sthāstasya̍ vasa̱ntaḥ śiro̎ grī̱ṣmo dakṣi̍ṇaḥ pa̱kṣo va̱ṟṣāḥ pucchṛ̍ śa̱radutta̍raḥ pa̱kṣo he̍ma̱nto madhya̍ṃ pūrvapa̱kṣāścita̍yo’parapa̱kṣāḥ purī̍ṣamahorā̱trāṇīṣṭa̍kā e̱ṣa vā a̱gnirṛ̍tu̱sthā ya e̱vaṃ veda̱rturṛ̍turasmai̱ kalpa̍māna eti̱ pratye̱va ti̍ṣṭhati pra̱jāpa̍ti̱rvā e̱taṃ jyaiṣṭhya̍kāmo̱ nya̍dhatta̱ tato̱ vai sa jyaiṣṭhya̍magaccha̱dya e̱vaṃ vi̱dvāna̱gniṃ ci̍nu̱te jyaiṣṭhya̍me̱va ga̍cchati ||5.7.6||
pṛ̱thi̱vīṃ ya̍ccha̱ yathsva̍yamātṛ̱ṇṇā u̍pa̱dhāya̍ dhehyṛ̱cā’gniści̍nu̱te trīṇi̍ ca ||5.7.6||
30 yadākū̍tāthsa̱masu̍sroddhṛ̱do vā̱ mana̍so vā̱ saṃbhṛ̍ta̱ṃ cakṣu̍ṣo vā | tamanu̱ prehi̍ sukṛ̱tasya̍ lo̱kaṃ yatrarṣa̍yaḥ prathama̱jā ye pu̍rā̱ṇāḥ || e̱tṛ sa̍dhastha̱ pari̍ te dadāmi̱ yamā̱vahā̎ccheva̱dhiṃ jā̱tave̍dāḥ | a̱nvā̱ga̱ntā ya̱jñapa̍tirvo̱ atra̱ ta2ṛ sma̍ jānīta para̱me vyo̍man || jā̱nī̱tāde̍naṃ para̱me vyo̍ma̱ndevā̎ḥ sadhasthā vi̱da rū̱pama̍sya | yadā̱gacchā̎t 31 pa̱thibhi̍rdeva̱yānai̍riṣṭāpū̱rte kṛ̍ṇutādā̱vira̍smai || saṃ pra cya̍vadhva̱manu̱ saṃ pra yā̱tāgne̍ pa̱tho de̍va̱yānā̎n kṛṇudhvam | a̱sminthsa̱dhasthe̱ adhyutta̍rasmi̱nviśve̍ devā̱ yaja̍mānaśca sīdata || prasta̱reṇa̍ pari̱dhinā̎ sru̱cā vedyā̍ ca ba̱ṟhiṣā̎ | ṛ̱cemaṃ ya̱jñaṃ no̍ vaha̱ suva̍rde̱veṣu̱ ganta̍ve || yadi̱ṣṭaṃ yatpa̍rā̱dāna̱ṃ yadda̱ttaṃ yā ca̱ dakṣi̍ṇā | ta 32 da̱gnirvai̎śvakarma̱ṇaḥ suva̍rde̱veṣu̍ no dadhat || yenā̍ sa̱hasra̱ṃ vaha̍si̱ yenā̎gne sarvaveda̱sam | tene̱maṃ ya̱jñaṃ no̍ vaha̱ suva̍rde̱veṣu̱ ganta̍ve || yenā̎gne̱ dakṣi̍ṇā yu̱ktā ya̱jñaṃ vaha̍ntyṛ̱tvija̍ḥ | tene̱maṃ ya̱jñaṃ no̍ vaha̱ suva̍rde̱veṣu̱ ganta̍ve || yenā̎gne su̱kṛta̍ḥ pa̱thā madho̱rdhārā̎ vyāna̱śuḥ | tene̱maṃ ya̱jñaṃ no̍ vaha̱ suva̍rde̱veṣu̱ ganta̍ve || yatra̱ dhārā̱ ana̍petā̱ madho̎rghṛ̱tasya̍ ca̱ yāḥ | tada̱gnirvai̎śvakarma̱ṇaḥ suva̍rde̱veṣu̍ no dadhat ||5.7.7||
ā̱gacchā̱ttadvyā̍na̱śustene̱maṃ ya̱jñaṃ no̍ vaha̱ suva̍rde̱veṣu̱ ganta̍ve̱ catu̍rdaśa ca ||5.7.7||
33 yāste̍ agne sa̱midho̱ yāni̱ dhāma̱ yā ji̱hvā jā̍tavedo̱ yo a̱rciḥ | ye te̍ agne me̱ḍayo̱ ya inda̍va̱stebhi̍rā̱tmāna̍ṃ cinuhi prajā̱nan || u̱thsa̱nna̱ya̱jño vā e̱ṣa yada̱gniḥ kiṃ vāhai̱tasya̍ kri̱yate̱ kiṃ vā̱ na yadvā a̍dhva̱ryura̱gneści̱nvanna̍nta̱retyā̱tmano̱ vai tada̱ntare̍ti̱ yāste̍ agne sa̱midho̱ yāni̱ 34 dhāmetyā̍hai̱ṣā vā a̱gneḥ sva̍yaṃ ci̱tira̱gnire̱va tada̱gniṃ ci̍noti̱ nādhva̱ryurā̱tmano̱’ntare̍ti̱ cata̍sra̱ āśā̱ḥ pra ca̍rantva̱gnaya̍ i̱maṃ no̍ ya̱jñaṃ na̍yatu prajā̱nan | ghṛ̱taṃ pinva̍nna̱jarṛ̍ su̱vīra̱ṃ brahma̍ sa̱midbha̍va̱tyāhu̍tīnām || su̱va̱rgāya̱ vā e̱ṣa lo̱kāyopa̍ dhīyate̱ yatkū̱rmaścata̍sra̱ āśā̱ḥ pra ca̍rantva̱gnaya̱ ityā̍ha̱ 35 diśa̍ e̱vaitena̱ pra jā̍nātī̱maṃ no̍ ya̱jñaṃ na̍yatu prajā̱nannityā̍ha suva̱rgasya̍ lo̱kasyā̱bhinī̎tyai̱ brahma̍ sa̱midbha̍va̱tyāhu̍tīnā̱mityā̍ha̱ brahma̍ṇā̱ vai de̱vāḥ su̍va̱rgaṃ lo̱kamā̍ya̱ṉ yadbrahma̍ṇvatyopa̱dadhā̍ti̱ brahma̍ṇai̱va tadyaja̍mānaḥ suva̱rgaṃ lo̱kame̍ti pra̱jāpa̍ti̱rvā e̱ṣa yada̱gnistasya̍ pra̱jāḥ pa̱śava̱śchandṛ̍si rū̱pṛ sarvā̱ṉ varṇā̱niṣṭa̍kānāṃ kuryādrū̱peṇai̱va pra̱jāṃ pa̱śūñchandā̱g̱syava̍ ru̱ṃdhe’tho̎ pra̱jābhya̍ e̱vaina̍ṃ pa̱śubhya̱śchando̎bhyo’va̱ruddhya̍ cinute ||5.7.8||
yānya̱gnaya̱ ityā̱heṣṭa̍kānṛ̱ ṣoḍa̍śa ca ||5.7.8||
36 mayi̍ gṛhṇā̱myagre̍ a̱gnṛ rā̱yaspoṣā̍ya suprajā̱stvāya̍ su̱vīryā̍ya | mayi̍ pra̱jāṃ mayi̱ varco̍ dadhā̱myari̍ṣṭāḥ syāma ta̱nuvā̍ su̱vīrā̎ḥ || yo no̍ a̱gniḥ pi̍taro hṛ̱thsva̍ntarama̍rtyo̱ martyṛ̍ ā vi̱veśa̍ | tamā̱tmanpari̍ gṛhṇīmahe va̱yaṃ mā so a̱smṛ a̍va̱hāya̱ parā̍ gāt || yada̍dhva̱ryurā̱tmanna̱gnimagṛ̍hītvā̱gniṃ ci̍nu̱yādyo̎’sya̱ svo̎’gnistamapi̱ 37 yaja̍mānāya cinuyāda̱gniṃ khalu̱ vai pa̱śavo’nūpa̍ tiṣṭhante’pa̱krāmu̍kā asmātpa̱śava̍ḥ syu̱rmayi̍ gṛhṇā̱myagre̍ a̱gnimityā̍hā̱tmanne̱va svama̱gniṃ dā̍dhāra̱ nāsmā̎tpa̱śavo’pa̍ krāmanti brahmavā̱dino̍ vadanti̱ yanmṛccāpa̍ścā̱gnera̍nā̱dyamatha̱ kasmā̎nmṛ̱dā cā̱dbhiścā̱gniścī̍yata̱ iti̱ yada̱dbhiḥ sa̱ṃyau 38 tyāpo̱ vai sarvā̍ de̱vatā̍ de̱vatā̍bhire̱vainṛ̱ sṛ sṛ̍jati̱ yanmṛ̱dā ci̱notī̱yaṃ vā a̱gnirvai̎śvāna̱ro̎’gninai̱va tada̱gniṃ ci̍noti brahmavā̱dino̍ vadanti̱ yanmṛ̱dā cā̱dbhiścā̱gniścī̱yatetha̱ kasmā̍da̱gniru̍cyata̱ iti̱ yaccchando̍bhiści̱notya̱gnayo̱ vai chandṛ̍si̱ tasmā̍da̱gniru̍cya̱te’tho̍ i̱yaṃ vā a̱gnirvai̎śvāna̱ro yan 39 mṛ̱dā ci̱noti̱ tasmā̍da̱gniru̍cyate hiraṇyeṣṭa̱kā upa̍ dadhāti̱ jyoti̱rvai hira̍ṇya̱ṃ jyoti̍re̱vāsmi̍ndadhā̱tyatho̱ tejo̱ vai hira̍ṇya̱ṃ teja̍ e̱vātmandha̍tte̱ yo vā a̱gnṛ sa̱rvato̍mukhaṃ cinu̱te sarvā̍ su pra̱jāsvanna̍matti̱ sarvā̱ diśo̱’bhi ja̍yati gāya̱trīṃ pu̱rastā̱dupa̍ dadhāti tri̱ṣṭubha̍ṃ dakṣiṇa̱to jaga̍tīṃ pa̱ścāda̍nu̱ṣṭubha̍muttara̱taḥ pa̱ṅktiṃ madhya̍ e̱ṣa vā a̱gniḥ sa̱rvato̍mukha̱staṃ ya e̱vaṃ vi̱dvāgści̍nu̱te sarvā̍su pra̱jāsvanna̍matti̱ sarvā̱ diśo̱’bhi ja̍ya̱tyatho̍ di̱śye̍va diśa̱ṃ pra va̍yati̱ tasmā̎ddi̱śi dikprotā̎ ||5.7.9||
api̍ sa̱ṃyauti̍ vaiśvāna̱ro yade̱ṣa vai pañca̍vṛśatiśca ||5.7.9||
40 pra̱jāpa̍tira̱gnima̍sṛjata̱ so̎’smāthsṛ̱ṣṭaḥ prāṅprādra̍va̱ttasmā̱ aśva̱ṃ pratyā̎sya̱thsa da̍kṣi̱ṇāva̍rtata̱ tasmai̍ vṛ̱ṣṇiṃ pratyā̎sya̱thsa pra̱tyaṅṅāva̍rtata̱ tasmā̍ ṛṣa̱bhaṃ pratyā̎sya̱thsa uda̱ṅṅāva̍rtata̱ tasmai̍ ba̱staṃ pratyā̎sya̱thsa ū̱rdhvo̎’drava̱ttasmai̱ puru̍ṣa̱ṃ pratyā̎sya̱dyatpa̍śuśī̱ṟṣāṇyu̍pa̱dadhā̍ti sa̱rvata̍ e̱vaina̍ 41 mava̱rudhya̍ cinuta e̱tā vai prā̍ṇa̱bhṛta̱ścakṣu̍ṣmatī̱riṣṭa̍kā̱ yatpa̍śuśī̱ṟṣāṇi̱ yatpa̍śuśī̱ṟṣāṇyu̍pa̱dadhā̍ti̱ tābhi̍re̱va yaja̍māno̱’muṣmi̍3ṛllo̱ke prāṇi̱tyatho̱ tābhi̍re̱vāsmā̍ i̱me lo̱kāḥ pra bhā̎nti mṛ̱dābhi̱lipyopa̍ dadhāti medhya̱tvāya̍ pa̱śurvā e̱ṣa yada̱gniranna̍ṃ pa̱śava̍ e̱ṣa khalu̱ vā a̱gniryatpa̍śuśī̱ṟṣāṇi̱ yaṃ kā̱maye̍ta̱ kanī̍yo̱’syānnagg̍ 42 syā̱diti̍ saṃta̱rāṃ tasya̍ paśuśī̱ṟṣāṇyupa̍ dadhyā̱tkanī̍ya e̱vāsyānna̍ṃ bhavati̱ yaṃ kā̱maye̍ta sa̱māva̍da̱syānnagg̍ syā̱diti̍ madhya̱tastasyopa̍ dadhyāthsa̱māva̍de̱vāsyānna̍ṃ bhavati̱ yaṃ kā̱maye̍ta̱ bhūyo̱’syānnagg̍ syā̱dityante̍ṣu̱ tasya̍ vyu̱dūhyopa̍ dadhyādanta̱ta e̱vāsmā̱ anna̱mava̍ ruṃdhe̱ bhūyo̱’syānna̍ṃ bhavati ||5.7.10||
e̱va̱ma̱syā’nna̱ṃ bhūyo̱’syā’nna̍ṃ bhavati ||5.7.10||
43 ste̱gānda2ṛṣṭrā̎bhyāṃ ma̱ṇḍūkā̱ñjaṃbhye̍bhi̱rāda̍kāṃ khā̱denorjṛ̍ sṛsū̱denāra̍ṇya̱ṃ jāṃbī̍lena̱ mṛda̍ṃ ba̱ṟsve̍bhi̱ḥ śarka̍rābhi̱rava̍kā̱mava̍kābhi̱ḥ śarka̍rāmuthsā̱dena̍ ji̱hvāma̍vakra̱ndena̱ tālṛ̱ sara̍svatīṃ jihvā̱greṇa̍ ||5.7.11||
ste̱gāndvāvṛ̍śatiḥ ||5.7.11||
44 vājṛ̱ hanū̎bhyāma̱pa ā̱sye̍nādi̱tyāṃ chmaśru̍bhirupayā̱mamadha̍re̱ṇoṣṭhe̍na̱ sadutta̍re̱ṇānta̍reṇānūkā̱śaṃ pra̍kā̱śena̱ bāhyagg̍ stanayi̱tnuṃ ni̍rbā̱dhena̍ sūryā̱gnī cakṣu̍rbhyāṃ vi̱dyutau̍ ka̱nāna̍kābhyāma̱śani̍ṃ ma̱stiṣke̍ṇa̱ bala̍ṃ ma̱jjabhi̍ḥ ||5.7.12||
vāja̱ṃ pañca̍vṛśatiḥ ||5.7.12||
45 kū̱rmāñcha̱phaira̱cchalā̍bhiḥ ka̱piñja̍lā̱nthsāma̱ kuṣṭhi̍kābhirja̱vaṃ jaṅghā̍bhiraga̱daṃ jānu̍bhyāṃ vī̱rya̍ṃ ku̱hābhyā̎ṃ bha̱yaṃ pra̍cā̱lābhyā̱ṃ guho̍papa̱kṣābhyā̍ma̱śvinā̱vṛsā̎bhyā̱madi̍tṛ śī̱ṟṣṇā nirṛ̍ti̱ṃ nirjā̎lmakena śī̱rṣṇā ||5.7.13||
kū̱rmāntrayo̍vṛśatiḥ ||5.7.13||
46 yoktra̱ṃ gṛdhrā̍bhiryu̱gamāna̍tena ci̱ttaṃ manyā̍bhiḥ saṃkro̱śānprā̱ṇaiḥ pra̍kā̱śena̱ tvaca̍ṃ parākā̱śenānta̍rāṃ ma̱śakā̱nkeśai̱rindra̱gg̱ svapa̍sā̱ vahe̍na̱ bṛha̱spatṛ̍ śakunisā̱dena̱ ratha̍mu̱ṣṇihā̍bhiḥ ||5.7.14||
yoktra̱meka̍vṛśatiḥ ||5.7.14||
47 mi̱trāvaru̍ṇau̱ śroṇī̎bhyāmindrā̱gnī śi̍kha̱ṇḍābhyā̱mindrā̱bṛha̱spatī̍ ū̱rubhyā̱mindrā̱viṣṇū̍ aṣṭhī̱vadbhyṛ̍ savi̱tāra̱ṃ pucche̍na gandha̱rvāñchepe̍nāpsa̱raso̍ mu̱ṣkābhyā̱ṃ pava̍mānaṃ pā̱yunā̍ pa̱vitra̱ṃ potrā̎bhyāmā̱krama̍ṇa2ṛ sthū̱rābhyā̎ṃ prati̱krama̍ṇa̱ṃ kuṣṭhā̎bhyām ||5.7.15||
48 indra̍sya kro̱ḍodi̍tyai pāja̱sya̍ṃ di̱śāṃ ja̱travo̍ jī̱mūtā̎nhṛdayaupa̱śābhyā̍ma̱ntari̍kṣaṃ puri̱tatā̱ nabha̍ uda̱rye̍ṇendrā̱ṇīṃ plī̱hnā va̱lmīkā̎nklo̱mnā gi̱rīnplā̱śibhi̍ḥ samu̱dramu̱dare̍ṇa vaiśvāna̱raṃ bhasma̍nā ||5.7.16||
mi̱trāvaru̍ṇā̱viṃdra̍sya̱ dvāvṛ̍śati̱rdvāvṛ̍śatiḥ ||5.7.16||
49 pū̱ṣṇo va̍ni̱ṣṭhura̍ndhā̱hessthū̍ragu̱dā sa̱rpāngudā̍bhir ṛ̱tūn pṛ̱ṣṭībhi̱rdiva̍ṃ pṛ̱ṣṭhena̱ vasū̍nāṃ pratha̱mā kīka̍sā ru̱drāṇā̎ṃ dvi̱tīyā̍di̱tyānā̎ṃ tṛ̱tīyāṃgi̍rasāṃ catu̱rthī sā̱dhyānā̎ṃ pañca̱mī viśve̍ṣāṃ de̱vānṛ̍ ṣa̱ṣṭhī ||5.7.17||
pū̱ṣṇaścatu̍rvṛśatiḥ ||5.7.17||
50 ojo̎ grī̱vābhi̱rnirṛ̍tima̱sthabhi̱rindra̱gg̱ svapa̍sā̱ vahe̍na ru̱drasya̍ vica̱laḥ ska̱ndho̍’horā̱trayo̎rdvi̱tīyo̎’rdhamā̱sānā̎ṃ tṛ̱tīyo̍ mā̱sāṃ ca̍tu̱rtha ṛ̍tū̱nāṃ pa̍ñca̱maḥ sa̍ṃvathsa̱rasya̍ ṣa̱ṣṭhaḥ ||5.7.18||
ojo̍vṛśa̱tiḥ ||5.7.18||
51 ā̱na̱ndaṃ na̱ndathu̍nā̱ kāma̍ṃ pratyā̱sābhyā̎ṃ bha̱yṛ śi̍tī̱mabhyā̎ṃ pra̱śiṣa̍ṃ praśā̱sābhyṛ̍ sūryācandra̱masau̱ vṛkyā̎bhyāg śyāmaśaba̱lau mata̍snābhyā̱ṃ vyu̍ṣṭṛ rū̱peṇa̱ nimru̍kti̱marū̍peṇa ||5.7.19||
ā̱na̱ndṛ ṣoḍa̍śa ||5.7.19||
52 aha̍rmṛ̱sena̱ rātri̱ṃ pīva̍sā̱po yū̱ṣeṇa̍ ghṛ̱tṛ rase̍na̱ śyāṃ vasa̍yā dū̱ṣīkā̍bhirhrā̱duni̱maśru̍bhi̱ḥ pṛṣvā̱ṃ divṛ̍ rū̱peṇa̱ nakṣa̍trāṇi̱ prati̍rūpeṇa pṛthi̱vīṃ carma̍ṇā cha̱vīṃ cha̱vyo̍pākṛ̍tāya̱ svāhāla̍bdhāya̱ svāhā̍ hu̱tāya̱ svāhā̎ ||5.7.20||
aha̍ra̱ṣṭā vṛ̍śatiḥ ||5.7.20||
53 a̱gneḥ pa̍kṣa̱tiḥ sara̍svatyai̱ nipa̍kṣati̱ḥ soma̍sya tṛ̱tīyā̱pāṃ ca̍tu̱rthyoṣa̍dhīnāṃ pañca̱mī sa̍ṃvathsa̱rasya̍ ṣa̱ṣṭhī ma̱rutṛ̍ sapta̱mī bṛha̱spate̍raṣṭa̱mī mi̱trasya̍ nava̱mī varu̍ṇasya daśa̱mīndra̍syaikāda̱śī viśve̍ṣāṃ de̱vānā̎ṃ dvāda̱śī dyāvā̍pṛthi̱vyoḥ pā̱rśvaṃ ya̱masya̍ pāṭū̱raḥ ||5.7.21||
a̱gnerekā̱nna trṛ̱śat ||5.7.21||
54 vā̱yoḥ pa̍kṣa̱tiḥ sara̍svato̱ nipa̍kṣatiśca̱candrama̍sastṛ̱tīyā̱ nakṣa̍trāṇāṃ catu̱rthī sa̍vi̱tuḥ pa̍ñca̱mī ru̱drasya̍ ṣa̱ṣṭhī sa̱rpāṇṛ̍ sapta̱mya̍rya̱mṇo̎’ṣṭa̱mī tvaṣṭu̍rnava̱mī dhā̱turda̍śa̱mīndrā̱ṇyā e̍kāda̱śyadi̍tyai dvāda̱śī dyāvā̍pṛthi̱vyoḥ pā̱rśvaṃ ya̱myai̍ pāṭū̱raḥ ||5.7.22||
vā̱yora̱ṣṭā vṛ̍śatiḥ ||5.7.22||
55 panthā̍manū̱vṛgbhyṛ̱ saṃta̍ti2ṛ snāva̱nyā̎bhyṛ̱ śukā̎npi̱ttena̍ hari̱māṇa̍ṃ ya̱knā halī̎kṣṇānpāpavā̱tena̍ kū̱śmāñchaka̍bhiḥ śava̱rtānūva̍dhyena̱ śuno̍ vi̱śasa̍nena sa̱rpā3ṛllo̍hitaga̱ndhena̱ vayṛ̍si pakvaga̱ndhena̍ pi̱pīli̍kāḥ praśā̱dena̍ ||5.7.23||
panthā̱ṃ dvāvṛ̍śatiḥ ||5.7.23||
56 kramai̱ratya̍kramīdvā̱jī viśvai̎rde̱vairya̱jñiyai̎ḥ saṃvidā̱naḥ | sa no̍ naya sukṛ̱tasya̍ lo̱kaṃ tasya̍ te va̱ya2ṛ sva̱dhayā̍ madema ||5.7.24||
kramai̍ra̱ṣṭāda̍śa ||5.7.24||
57 dyauste̍ pṛ̱ṣṭhaṃ pṛ̍thi̱vī sa̱dhastha̍mā̱tmāntari̍kṣṛ samu̱dro yoni̱ḥ sūrya̍ste̱ cakṣu̱rvāta̍ḥ prā̱ṇaśca̱ndramā̱ḥ śrotra̱ṃ māsā̎ścārdhamā̱sāśca̱ parvā̎ṇyṛ̱tavoṅgā̍ni saṃvathsa̱ro ma̍hi̱mā ||5.7.25||
dyauḥ pañca̍ vṛśatiḥ ||5.7.25||
58 a̱gniḥ pa̱śurā̍sī̱ttenā̍yajanta̱ sa e̱taṃ lo̱kama̍jaya̱dyasmi̍nna̱gniḥ sa te̍ lo̱kastaṃ je̎ṣya̱syathāva̍ jighra vā̱yuḥ pa̱śurā̍sī̱ttenā̍’yajanta̱ sa e̱taṃ lo̱kama̍jaya̱dyasmi̍nvā̱yuḥ sa te̍ lo̱kastasmā̎ttvā̱ntare̎ṣyāmi̱ yadi̱ nāva̱jighra̍syādi̱tyaḥ pa̱śurā̍sī̱ttenā̍yajanta̱ sa e̱taṃ lo̱kama̍jaya̱dyasmi̍nnādi̱tyaḥ sa te̍ lo̱kastaṃ je̎ṣyasi̱ yadya̍va̱jighra̍si ||5.7.26||
yasmi̍nna̱ṣṭau ca̍ ||5.7.26||