Kṛṣṇayajuḥ Taittirīyasaṃhitā — Saptama kāṇḍa, prapāṭhaka 1 (40 anuvākāḥ)
Kṛṣṇayajuḥ Taittirīyasaṃhitā — Saptama kāṇḍa, prapāṭhaka 1
Section titled “Kṛṣṇayajuḥ Taittirīyasaṃhitā — Saptama kāṇḍa, prapāṭhaka 1”saptamakāṇḍe prathamaḥ praśnaḥ 1
Anuvākāḥ
Section titled “Anuvākāḥ”1 pra̱jana̍na̱ṃ jyoti̍ra̱gnirde̱vatā̍nā̱ṃ jyoti̍rvi̱rāṭchaṃda̍sā̱ṃ jyoti̍rvi̱rāḍvā̱co̎’gnau saṃ ti̍ṣṭhate vi̱rāja̍ma̱bhi saṃ pa̍dyate̱ tasmā̱ttajjyoti̍rucyate̱ dvau stomau̎ prātaḥsava̱naṃ va̍hato̱ yathā̎ prā̱ṇaścā̍pā̱naśca̱ dvau mādhya̍ṃdinṛ̱ sava̍na̱ṃ yathā̱ cakṣu̍śca̱ śrotra̍ṃ ca̱ dvau tṛ̍tīyasava̱naṃ yathā̱ vāk ca̍ prati̱ṣṭhā ca̱ puru̍ṣa saṃmito̱ vā e̱ṣa ya̱jño’sthū̍ri̱ 2 ryaṃ kāma̍ṃ kā̱maya̍te̱ tame̱tenā̱bhya̍śnute̱ sarva̱gg̱ hyasthū̍riṇābhyaśnu̱te̎’gniṣṭo̱mena̱ vai pra̱jāpa̍tiḥ pra̱jā a̍sṛjata̱ tā a̍gniṣṭo̱menai̱va parya̍gṛhṇā̱ttāsā̱ṃ pari̍gṛhītānāmaśvata̱ro’tya̍ pravata̱ tasyā̍nu̱hāya̱ reta̱ āda̍tta̱ tadga̍rda̱bhe nya̍mā̱rṭ tasmā̎dgarda̱bho dvi̱retā̱ atho̍ āhu̱rvaḍa̍bāyā̱ṃ nya̍mā̱rḍiti̱ tasmā̱dvaḍa̍bā dvi̱retā̱ atho̍ āhu̱roṣa̍dhīṣu̱ 3 nya̍mā̱rḍiti̱ tasmā̱doṣa̍dha̱yo’na̍bhyaktā rebha̱ntyatho̍ āhuḥ pra̱jāsu̱ nya̍mā̱rḍiti̱ tasmā̎dya̱mau jā̍yete̱ tasmā̍daśvata̱ro na pra jā̍yata̱ ātta̍retā̱ hi tasmā̎dba̱ṟhiṣyana̍vaklṛptaḥ sarvaveda̱se vā̍ sa̱hasre̱ vāva̍klṛ̱pto’ti̱ hyapra̍vata̱ ya e̱vaṃ vi̱dvāna̍gniṣṭo̱mena̱ yaja̍te̱ prājā̍tāḥ pra̱jā ja̱naya̍ti̱ pari̱ prajā̍tā gṛhṇāti̱ tasmā̍dāhurjyeṣṭhaya̱jña iti̍ 4 pra̱jāpa̍ti̱rvāva jyeṣṭha̱ḥ sa hye̍tenāgre’ya̍jata pra̱jāpa̍tirakāmayata̱ pra jā̍ye̱yeti̱ sa mu̍kha̱tastri̱vṛta̱ṃ nira̍mimīta̱ tama̱gnirde̱vatānva̍sṛjyata gāya̱trī chando̍ rathaṃta̱rṛ sāma̍ brāhma̱ṇo ma̍nu̱ṣyā̍ṇāma̱jaḥ pa̍śū̱nāṃ tasmā̱tte mukhyā̍ mukha̱to hyasṛ̍jya̱ntora̍so bā̱hubhyā̎ṃ pañcada̱śaṃ nira̍mimīta̱ tamindro̍ de̱vatānva̍sṛjyata tri̱ṣṭupchando̍ bṛ̱hath 5 sāma̍ rāja̱nyo̍ manu̱ṣyā̍ṇā̱mavi̍ḥ paśū̱nāṃ tasmā̱tte vī̱ryā̍vanto vī̱ryā̎ddhyasṛ̍jyanta madhya̱taḥ sa̍ptada̱śaṃ nira̍mimīta̱ taṃ viśve̍ de̱vā de̱vatā̱ anva̍sṛjyanta̱ jaga̍tī̱ chando̍ vairū̱pṛ sāma̱ vaiśyo̍ manu̱ṣyā̍ṇā̱ṃ gāva̍ḥ paśū̱nāṃ tasmā̱tta ā̱dyā̍ anna̱dhānā̱ddhyasṛ̍jyanta̱ tasmā̱dbhūyṛ̍so̱’nyebhyo̱ bhūyi̍ṣṭhā̱ hi de̱vatā̱ anvasṛ̍jyanta pa̱tta e̍kavṛ̱śaṃ nira̍mimīta̱ tama̍nu̱ṣṭupchando 6 ‘nva̍sṛjyata vairā̱jṛ sāma̍ śū̱dro ma̍nu̱ṣyā̍ṇā̱maśva̍ḥ paśū̱nāṃ tasmā̱ttau bhū̍tasaṃkrā̱miṇā̱vaśva̍śca śū̱draśca̱ tasmā̎cchū̱dro ya̱jñe’na̍vaklṛpto̱ na hi de̱vatā̱ anvasṛ̍jyata̱ tasmā̱tpādā̱vupa̍ jīvataḥ pa̱tto hyasṛ̍jyetāṃ prā̱ṇā vai tri̱vṛda̍rdhamā̱sāḥ pa̍ñcada̱śaḥ pra̱jāpa̍tiḥ saptada̱śastraya̍ i̱me lo̱kā a̱sāvā̍di̱tya e̍kavṛ̱śa e̱tasmi̱nvā e̱te śri̱tā e̱tasmi̱nprati̍ṣṭhitā̱ ya e̱vaṃ vedai̱tasmi̍nne̱va śra̍yata e̱tasmi̱nprati̍ tiṣṭhati ||7.1.1||
asthū̍ri̱roṣa̍dhīṣu jyeṣṭhaya̱jña iti̍ bṛ̱hada̍nu̱ṣṭupchaṃda̱ḥ prati̍ṣṭhitā̱ nava̍ ca ||7.1.1||
7 prā̱ta̱ḥsa̱va̱ne vai gā̍ya̱treṇa̱ chaṃda̍sā tri̱vṛte̱ stomā̍ya̱ jyoti̱rdadha̍deti tri̱vṛtā̎ brahmavarca̱sena̍ pañcada̱śāya̱ jyoti̱rdadha̍deti pañcada̱śenauja̍sā vī̱rye̍ṇa saptada̱śāya̱ jyoti̱rdadha̍deti saptada̱śena̍ prājāpa̱tyena̍ pra̱jana̍nenaikavṛ̱śāya̱ jyoti̱rdadha̍deti̱ stoma̍ e̱va tathstomā̍ya̱ jyoti̱rdadha̍de̱tyatho̱ stoma̍ e̱va stoma̍ma̱bhi praṇa̍yati̱ yāva̍nto̱ vai stomā̱stāva̍nta̱ḥ kāmā̱stāva̍nto lo̱kāstāva̍nti̱ jyotīg̍ṣye̱tāva̍ta e̱va stomā̍ne̱tāva̍ta̱ḥ kāmā̍ne̱tāva̍to lo̱kāne̱tāva̍nti̱ jyotī̱g̱ṣyava̍ ruṃdhe ||7.1.2||
tāva̍nto lo̱kāstrayo̍daśa ca ||7.1.2||
8 bra̱hma̱vā̱dino̍ vadanti̱ sa tvai ya̍jeta̱ yo̎’gniṣṭo̱mena̱ yaja̍mā̱no’tha̱ sarva̍stomena̱ yaje̱teti̱ yasya̍ tri̱vṛta̍manta̱ryanti̍ prā̱ṇāgstasyā̱ntarya̍nti prā̱ṇeṣu̱ me’pya̍sa̱diti̱ khalu̱ vai ya̱jñena̱ yaja̍māno yajate̱ yasya̍ pañcada̱śama̍nta̱ryanti̍ vī̱rya̍ṃ tasyā̱ntarya̍nti vī̱rye̍ me’pya̍sa̱diti̱ khalu̱ vai ya̱jñena̱ yaja̍māno yajate̱ yasya̍ saptada̱śama̍nta̱ryanti̍ 9 pra̱jāṃ tasyā̱ntarya̍nti pra̱jāyā̱ṃ me’pya̍sa̱diti̱ khalu̱ vai ya̱jñena̱ yaja̍māno yajate̱ yasyai̍kavṛ̱śama̍nta̱ryanti̍ prati̱ṣṭhāṃ tasyā̱ntarya̍nti prati̱ṣṭhāyā̱ṃ me’pya̍sa̱diti̱ khalu̱ vai ya̱jñena̱ yaja̍māno yajate̱ yasya̍ triṇa̱vama̍nta̱ryantyṛ̱tūgśca̱ tasya̍ nakṣa̱triyā̎ṃ ca vi̱rāja̍ma̱ntarya̍ntyṛ̱tuṣu̱ me’pya̍sannakṣa̱triyā̍yāṃ ca vi̱rājīti̱ 10 khalu̱ vai ya̱jñena̱ yaja̍māno yajate̱ yasya̍ trayastrṛ̱śama̍nta̱ryanti̍ de̱vatā̱stasyā̱ntarya̍nti de̱vatā̍su̱ me’pya̍sa̱diti̱ khalu̱ vai ya̱jñena̱ yaja̍māno yajate̱ yo vai stomā̍nāmava̱maṃ pa̍ra̱matā̱ṃ gaccha̍nta̱ṃ veda̍ para̱matā̍me̱va ga̍cchati tri̱vṛdvai stomā̍nāmava̱mastri̱vṛtpa̍ra̱mo ya e̱vaṃ veda̍ para̱matā̍me̱va ga̍cchati ||7.1.3||
sa̱pta̱da̱śama̍nta̱ryanti̍ vi̱rājīti̱ catu̍ścatvārṛśacca ||7.1.3||
11 aṃgi̍raso̱ vai sa̱ttramā̍sata̱ te su̍va̱rgaṃ lo̱kamā̍ya̱nteṣṛ̍ ha̱viṣmāg̍śca havi̱ṣkṛccā̍hīyetā̱ṃ tāva̍kāmayetṛ suva̱rgaṃ lo̱kami̍yā̱veti̱ tāve̱taṃ dvi̍rā̱trama̍paśyatā̱ṃ tamāha̍ratā̱ṃ tenā̍yajetā̱ṃ tato̱ vai tau su̍va̱rgaṃ lo̱kamai̍tā̱ṃ ya e̱vaṃ vi̱dvāndvi̍rā̱treṇa̱ yaja̍te suva̱rgame̱va lo̱kame̍ti̱ tāvaitā̱ṃ pūrve̱ṇāhnāga̍cchatā̱mutta̍reṇā 12 ‘bhipla̱vaḥ pūrva̱maha̍rbhavati̱ gati̱rutta̍ra̱ṃ jyoti̍ṣṭomo’gniṣṭo̱maḥ pūrva̱maha̍rbhavati̱ teja̱stenāva̍ ruṃdhe̱ sarva̍stomo’tirā̱tra utta̍rṛ̱ sarva̱syāptyai̱ sarva̱syāva̍ruddhyai gāya̱traṃ pūrveha̱nthsāma̍ bhavati̱ tejo̱ vai gā̍ya̱trī gā̍ya̱trī bra̍hmavarca̱saṃ teja̍ e̱va bra̍hmavarca̱samā̱tmandha̍tte̱ traiṣṭu̍bha̱mutta̍ra̱ ojo̱ vai vī̱rya̍ṃ tri̱ṣṭugoja̍ e̱va vī̱rya̍mā̱tmandha̍tte rathaṃta̱raṃ pūrve 13 ‘ha̱nthsāma̍ bhavatī̱yaṃ vai ra̍thaṃta̱rama̱syāme̱va prati̍ tiṣṭhati bṛ̱hadutta̍re̱’sau vai bṛ̱hada̱muṣyā̍me̱va prati̍ tiṣṭhati̱ tadā̍hu̱ḥ kva̍ jaga̍tī cānu̱ṣṭupceti̍ vaikhāna̱saṃ pūrve’ha̱nthsāma̍ bhavati̱ tena̱ jaga̍tyai̱ naiti̍ ṣoḍa̱śyutta̍re̱ tenā̍nu̱ṣṭubho’thā̍hu̱ryathsa̍mā̱ne̎’rdhamā̱se syātā̍manyata̱rasyāhno̍ vī̱rya̍manu̍ padye̱tetya̍māvā̱syā̍yā̱ṃ pūrva̱maha̍rbhava̱tyutta̍rasmi̱nnutta̍ra̱ṃ nānai̱vārdha̍mā̱sayo̎rbhavato̱ nānā̍vīrye bhavato ha̱viṣma̍nnidhana̱ṃ pūrva̱maha̍rbhavati havi̱ṣkṛnni̍dhana̱mutta̍ra̱ṃ prati̍ṣṭhityai ||7.1.4||
utta̍reṇa rathanta̱raṃ pūrve’nveka̍ vṛśatiśca ||7.1.4||
14 āpo̱ vā i̱damagre̍ sali̱lamā̍sī̱ttasmi̍npra̱jāpa̍tirvā̱yurbhū̱tvāca̍ra̱thsa i̱māma̍paśya̱ttāṃ va̍rā̱ho bhū̱tvāha̍ra̱ttāṃ vi̱śvaka̍rmā bhū̱tvā vya̍mā̱rṭsāpra̍thata̱ sā pṛ̍thi̱vya̍bhava̱ttatpṛ̍thi̱vyai pṛ̍thivi̱tvaṃ tasyā̍maśrāmyatpra̱jāpa̍ti̱ḥ sa de̱vāna̍sṛjata̱ vasū̎nru̱drānā̍di̱tyānte de̱vāḥ pra̱jāpa̍timabruva̱n pra jā̍yāmahā̱ iti̱ so̎’bravī̱d 15 yathā̱haṃ yu̱ṣmāgstapa̱sāsṛ̍kṣye̱vaṃ tapa̍si pra̱jana̍namicchadhva̱miti̱ tebhyo̱’gnimā̱yata̍na̱ṃ prāya̍cchade̱tenā̱yata̍nena śrāmya̱teti̱ te̎’gninā̱yata̍nenāśrāmya̱nte sa̍ṃvathsa̱ra ekā̱ṃ gāma̍sṛjanta̱ tāṃ vasu̍bhyo ru̱drebhya̍ ādi̱tyebhya̱ḥ prāya̍cchanne̱tṛ ra̍kṣadhva̱miti̱ tāṃ vasa̍vo ru̱drā ā̍di̱tyā a̍rakṣanta̱ sā vasu̍bhyo ru̱drebhya̍ ādi̱tyebhya̱ḥ prājā̍yata̱ trīṇi̍ ca 16 śa̱tāni̱ traya̍strṛśata̱ṃ cātha̱ saiva sa̍hasrata̱mya̍bhava̱tte de̱vāḥ pra̱jāpa̍timabruvanthsa̱hasre̍ṇa no yāja̱yeti̱ so̎’gniṣṭo̱mena̱ vasū̍nayājaya̱tta i̱maṃ lo̱kama̍jaya̱ntaccā̍dadu̱ḥ sa u̱kthye̍na ru̱drāna̍yājaya̱nte̎’ntari̍kṣamajaya̱ntaccā̍dadu̱ḥ so̍’tirā̱treṇā̍di̱tyāna̍yājaya̱tte̍’muṃ lo̱kama̍jaya̱ntaccā̍dadu̱stada̱ntari̍kṣa̱ṃ 17 vyavai̎ryata̱ tasmā̎dru̱drā ghātu̍kā anāyata̱nā hi tasmā̍dāhuḥ śithi̱laṃ vai ma̍dhya̱mamaha̍strirā̱trasya̱ vi hi tada̱vairya̱teti̱ traiṣṭu̍bhaṃ madhya̱masyāhna̱ ājya̍ṃ bhavati sa̱ṃyānā̍ni sū̱ktāni̍ śṛsati ṣoḍa̱śinṛ̍ śṛsa̱tyahno̱ dhṛtyā̱ aśi̍thilaṃ bhāvāya̱ tasmā̎ttrirā̱trasyā̎gniṣṭo̱ma e̱va pra̍tha̱mamaha̍ḥ syā̱datho̱kthyo’thā̍tirā̱tra e̱ṣāṃ lo̱kānā̱ṃ vidhṛ̍tyai̱ trīṇi̍trīṇi śa̱tānya̍nūcīnā̱hamavya̍vacchinnāni dadā 18 tye̱ṣāṃ lo̱kānā̱manu̱ saṃta̍tyai da̱śata̱ṃ na vi cchi̍ndyādvi̱rāja̱ṃ nedvi̍cchi̱nadā̱nītyatha̱ yā sa̍hasrata̱myāsī̱ttasyā̱mindra̍śca̱ viṣṇu̍śca̱ vyāya̍cchetṛ̱ sa indro̍’manyatā̱nayā̱ vā i̱daṃ viṣṇu̍ḥ sa̱hasra̍ṃ varkṣyata̱ iti̱ tasyā̍makalpetā̱ṃ dvibhā̍ga̱ indra̱stṛtī̍ye̱ viṣṇu̱stadvā e̱ṣābhyanū̎cyata u̱bhā ji̍gyathu̱riti̱ tāṃ vā e̱tāma̍cchāvā̱ka 19 e̱va śṛ̍sa̱tyatha̱ yā sa̍hasrata̱mī sā hotre̱ deyeti̱ hotā̍ra̱ṃ vā a̱bhyati̍ricyate̱ yada̍ti̱ricya̍te̱ hotānā̎ptasyāpayi̱tāthā̍hurunne̱tre deyetyati̍riktā̱ vā e̱ṣā sa̱hasra̱syāti̍rikta unne̱tartvijā̱mathā̍hu̱ḥ sarve̎bhyaḥ sada̱sye̎bhyo̱ deyetyathā̍hurudā̱kṛtyā̱ sā vaśa̍ṃ care̱dityathā̍hurbra̱hmaṇe̍ cā̱gnīdhe̍ ca̱ deyeti̱ 20 dvibhā̍gaṃ bra̱hmaṇe̱ tṛtī̍yama̱gnīdha̍ ai̱ndro vai bra̱hmā vai̎ṣṇa̱vo̎’gnīdyathai̱va tāvaka̍lpetā̱mityathā̍hu̱ryā ka̍lyā̱ṇī ba̍hurū̱pā sā deyetyathā̍hu̱ryā dvi̍rū̱pobha̱yata̍ enī̱ sā deyeti̍ sa̱hasra̍sya̱ pari̍gṛhītyai̱ tadvā e̱tathsa̱hasra̱syāya̍nṛ sa̱hasragg̍ sto̱trīyā̎ḥ sa̱hasra̱ṃ dakṣi̍ṇāḥ sa̱hasra̍ saṃmitaḥ suva̱rgo lo̱kaḥ su̍va̱rgasya̍ lo̱kasyā̱bhiji̍tyai ||7.1.5||
a̱bra̱vī̱cca̱ tada̱ntari̍kṣandadātyacchāvā̱kaśca̱ deyeti̍ sa̱ptaca̍tvārṛśacca ||7.1.5||
21 somo̱ vai sa̱hasra̍mavinda̱ttamindro’nva̍vinda̱ttau ya̱mo nyāga̍ccha̱ttāva̍bravī̱dastu̱ me’trāpītyastu̱ hī3 itya̍brūtṛ̱ sa ya̱ma eka̍syāṃ vī̱rya̍ṃ parya̍paśyadi̱yaṃ vā a̱sya sa̱hasra̍sya vī̱rya̍ṃ bibha̱rtīti̱ tāva̍bravīdi̱yaṃ mamāstve̱tadyu̱vayo̱riti̱ tāva̍brūtṛ̱ sarve̱ vā e̱tade̱tasyā̎ṃ vī̱rya̍ṃ 22 pari̍ paśyā̱mo’ṛśa̱mā ha̍rāmahā̱ iti̱ tasyā̱mṛśa̱māha̍ranta̱ tāma̱psu prāve̍śaya̱nthsomā̍yo̱dehīti̱ sā rohi̍ṇī piṅga̱laika̍hāyanī rū̱paṃ kṛ̱tvā traya̍strṛśatā ca tri̱bhiśca̍ śa̱taiḥ sa̱hodaittasmā̱drohi̍ṇyā piṅga̱layaika̍hāyanyā̱ soma̍ṃ krīṇīyā̱dya e̱vaṃ vi̱dvān rohi̍ṇyā piṅga̱layaika̍hāyanyā̱ soma̍ṃ krī̱ṇāti̱ traya̍strṛśatā cai̱vāsya̍ tri̱bhiśca̍ 23 śa̱taiḥ soma̍ḥ krī̱to bha̍vati̱ sukrī̍tena yajate̱ tāma̱psu prāve̍śaya̱nnindrā̍yo̱dehīti̱ sā rohi̍ṇī lakṣma̱ṇā pa̍ṣṭhau̱hī vārtra̍ghnī rū̱paṃ kṛ̱tvā traya̍strṛśatā ca tri̱bhiśca̍ śa̱taiḥ sa̱hodaittasmā̱drohi̍ṇīṃ lakṣma̱ṇāṃ pa̍ṣṭhau̱hīṃ vārtra̍ghnīṃ dadyā̱dya e̱vaṃ vi̱dvānrohi̍ṇīṃ lakṣma̱ṇāṃ pa̍ṣṭhau̱hīṃ vārtra̍ghnī̱ṃ dadā̍ti̱ traya̍strṛśaccai̱vāsya̱ trīṇi̍ ca śa̱tāni̱ sā da̱ttā 24 bha̍vati̱ tāma̱psu prāve̍śayan, ya̱māyo̱dehīti̱ sā jara̍tī mū̱rkhā ta̍jjagha̱nyā rū̱paṃ kṛ̱tvā traya̍strṛśatā ca tri̱bhiśca̍ śa̱taiḥ sa̱hodaittasmā̱jjara̍tīṃ mū̱rkhāṃ ta̍jjagha̱nyāma̍nu̱stara̍ṇīṃ kurvīta̱ ya e̱vaṃ vi̱dvāñjara̍tīṃ mū̱rkhāṃ ta̍jjagha̱nyāma̍nu̱stara̍ṇīṃ kuru̱te traya̍strṛśaccai̱vāsya̱ trīṇi̍ ca śa̱tāni̱ sāmuṣmi̍3ṛllo̱ke bha̍vati̱ vāge̱va sa̍hasrata̱mī tasmā̱d 25 varo̱ deya̱ḥ sā hi vara̍ḥ sa̱hasra̍masya̱ sā da̱ttā bha̍vati̱ tasmā̱dvaro̱ na pra̍ti̱gṛhya̱ḥ sā hi vara̍ḥ sa̱hasra̍masya̱ prati̍gṛhītaṃ bhavatī̱yaṃ vara̱ iti̍ brūyā̱dathā̱nyāṃ brū̍yādi̱yaṃ mameti̱ tathā̎sya̱ tathsa̱hasra̱mapra̍tigṛhītaṃ bhavatyubhayata e̱nī syā̱ttadā̍huranyata e̱nī syā̎thsa̱hasra̍ṃ pa̱rastā̱deta̱miti̱ yaiva vara̍ḥ 26 kalyā̱ṇī rū̱pasa̍mṛddhā̱ sā syā̱thsā hi vara̱ḥ samṛ̍ddhyai̱ tāmutta̍re̱ṇāgnī̎dhraṃ paryā̱ṇīyā̍hava̱nīya̱syānte̎ droṇakala̱śamava̍ ghrāpaye̱dā ji̍ghra ka̱laśa̍ṃ mahyu̱rudhā̍rā̱ paya̍sva̱tyā tvā̍ viśa̱ntvinda̍vaḥ samu̱drami̍va̱ sindha̍va̱ḥ sā mā̍ sa̱hasra̱ ā bha̍ja pra̱jayā̍ pa̱śubhi̍ḥ sa̱ha puna̱rmā’ vi̍śatādra̱yiriti̍ pra̱jayai̱vaina̍ṃ pa̱śubhī̍ ra̱yyā sa 27 ma̍rdhayati pra̱jāvā̎npaśu̱mānra̍yi̱mānbha̍vati̱ ya e̱vaṃ veda̱ tayā̍ sa̱hāgnī̎dhraṃ pa̱retya̍ pu̱rastā̎tpra̱tīcyā̱ṃ tiṣṭha̍ntyāṃ juhuyādu̱bhā ji̍gyathu̱rna parā̍ jayethe̱ na parā̍ jigye kata̱raśca̱naino̎ḥ | indra̍śca viṣṇo̱ yadapa̍spṛdhethāṃ tre̱dhā sa̱hasra̱ṃ vi tadai̍rayethā̱miti̍ tredhāvibha̱ktaṃ vai tri̍rā̱tre sa̱hasrṛ̍ sāha̱srīme̱vainā̎ṃ karoti sa̱hasra̍syai̱vainā̱ṃ mātrā̎ṃ 28 karoti rū̱pāṇi̍ juhoti rū̱paire̱vainṛ̱ sama̍rdhayati̱ tasyā̍ upo̱tthāya̱ karṇa̱mā ja̍pe̱diḍe̱ rante’di̍te̱ sara̍svati̱ priye̱ preya̍si̱ mahi̱ viśru̍tye̱tāni̍ te aghniye̱ nāmā̍ni su̱kṛta̍ṃ mā de̱veṣu̍ brūtā̱diti̍ de̱vebhya̍ e̱vaina̱mā ve̍daya̱tyanve̍naṃ de̱vā bu̍dhyante ||7.1.6||
e̱tade̱tasyā̎ṃ vī̱rya̍masya tri̱bhiśca̍ da̱ttā sa̍hasrata̱mī tasmā̍de̱va vara̱ḥ saṃ mātrā̱mekā̱nna ca̍tvārṛ̱śacca̍ ||7.1.6||
29 sa̱ha̱sra̱ta̱myā̍ vai yaja̍mānaḥ suva̱rgaṃ lo̱kame̍ti̱ sainṛ̍ suva̱rgaṃ lo̱kaṃ ga̍mayati̱ sā mā̍ suva̱rgaṃ lo̱kaṃ ga̍ma̱yetyā̍ha suva̱rgame̱vaina̍ṃ lo̱kaṃ ga̍mayati̱ sā mā̱ jyoti̍ṣmantaṃ lo̱kaṃ ga̍ma̱yetyā̍ha̱ jyoti̍ṣmantame̱vaina̍ṃ lo̱kaṃ ga̍mayati̱ sā mā̱ sarvā̱npuṇyā̎3ṛllo̱kānga̍ma̱yetyā̍ha̱ sarvā̍ne̱vaina̱ṃ puṇyā̎3ṛ llo̱kānga̍mayati̱ sā 30 mā̎ prati̱ṣṭhāṃ ga̍maya pra̱jayā̍ pa̱śubhi̍ḥ sa̱ha puna̱rmā vi̍śatādra̱yiriti̍ pra̱jayai̱vaina̍ṃ pa̱śubhī̍ ra̱yyāṃ prati̍ṣṭhāpayati pra̱jāvā̎npaśu̱mānra̍yi̱mānbha̍vati̱ ya e̱vaṃ veda̱ tāma̱gnīdhe̍ vā bra̱hmaṇe̍ vā̱ hotre̍ vodgā̱tre vā̎dhva̱ryave̍ vā dadyāthsa̱hasra̍masya̱ sā da̱ttā bha̍vati sa̱hasra̍masya̱ prati̍gṛhītaṃ bhavati̱ yastāmavi̍dvān 31 pratigṛ̱hṇāti̱ tāṃ prati̍ gṛhṇīyā̱dekā̍si̱ na sa̱hasra̱mekā̎ṃ tvā bhū̱tāṃ prati̍ gṛhṇāmi̱ na sa̱hasra̱mekā̍ mā bhū̱tā vi̍śa̱ mā sa̱hasra̱mityekā̍me̱vainā̎ṃ bhū̱tāṃ prati̍ gṛhṇāti̱ na sa̱hasra̱ṃ ya e̱vaṃ veda̍ syo̱nāsi̍ su̱ṣadā̍ su̱śevā̎ syo̱nā mā vi̍śa su̱ṣadā̱ mā vi̍śa su̱śevā̱ mā vi̱śe 32 tyā̍ha syo̱naivainṛ̍ su̱ṣadā̍ su̱śevā̍ bhū̱tāvi̍śati̱ nainṛ̍ hinasti brahmavā̱dino̍ vadanti sa̱hasrṛ̍ sahasrata̱myanve̱tī 3 sa̍hasrata̱mṛ sa̱hasrā 3 miti̱ yatprācī̍muthsṛ̱jethsa̱hasrṛ̍ sahasrata̱myanvi̍yā̱ttathsa̱hasra̍maprajñā̱trṛ su̍va̱rgaṃ lo̱kaṃ na pra jā̍nīyātpra̱tīcī̱muthsṛ̍jati̱ tṛ sa̱hasra̱manu̍ pa̱ryāva̍rtate̱ sā pra̍jāna̱tī su̍va̱rgaṃ lo̱kame̍ti̱ yaja̍mānama̱bhyuthsṛ̍jati kṣi̱pre sa̱hasra̱ṃ pra jā̍yata utta̱mā nī̱yate̎ pratha̱mā de̱vānga̍cchati ||7.1.7||
lo̱kānga̍mayati̱ sā’vi̍dvānthsu̱śevā̱ mā’vi̍śa̱ yaja̍māna̱ndvāda̍śa ca ||7.1.7||
33 atri̍radadā̱daurvā̍ya pra̱jāṃ pu̱trakā̍māya̱ sa ri̍ricā̱no̍’manyata̱ nirvī̎ryaḥ śithi̱lo yā̱tayā̍mā̱ sa e̱taṃ ca̍tūrā̱trama̍paśya̱ttamāha̍ra̱ttenā̍yajata̱ tato̱ vai tasya̍ ca̱tvāro̍ vī̱rā ājā̍yanta̱ suho̍tā̱ sū̎dgātā̱ sva̍dhvaryu̱ḥ susa̍bheyo̱ ya e̱vaṃ vi̱dvāgśca̍tūrā̱treṇa̱ yaja̍ta̱ āsya̍ ca̱tvāro̍ vī̱rā jā̍yante̱ suho̍tā̱ sū̎dgātā̱ sva̍dhvaryu̱ḥ susa̍bheyo̱ ye ca̍turvṛ̱śāḥ pava̍mānā brahmavarca̱saṃ tad 34 ya u̱dyanta̱ḥ stomā̱ḥ śrīḥ sātrigg̍ śra̱ddhāde̍va̱ṃ yaja̍mānaṃ ca̱tvāri̍ vī̱ryā̍ṇi̱ nopā̍nama̱nteja̍ indri̱yaṃ bra̍hmavarca̱sama̱nnādyṛ̱ sa e̱tāgśca̱tura̱ścatu̍ṣṭomā̱nthsomā̍napaśya̱ttānāha̍ra̱ttaira̍yajata̱ teja̍ e̱va pra̍tha̱menāvā̍ruṃdheṃdri̱yaṃ dvi̱tīye̍na brahmavarca̱saṃ tṛ̱tīye̍nā̱nnādya̍ṃ catu̱rthena̱ ya e̱vaṃ vi̱dvāgśca̱tura̱ścatu̍ṣṭomā̱nthsomā̍nā̱hara̍ti̱ tairyaja̍te̱ teja̍ e̱va pra̍tha̱menāva̍ ruṃdha iṃdri̱yaṃ dvi̱tīye̍na brahmavarca̱saṃ tṛ̱tīye̍nā̱nnādya̍ṃ catu̱rthena̱ yāme̱vātri̱ṟṛddhi̱mārdhno̱ttāme̱va yaja̍māna ṛdhnoti ||7.1.8||
tatteja̍ e̱vāṣṭāda̍śa ca ||7.1.8||
35 ja̱mada̍gni̱ḥ puṣṭi̍kāmaścatūrā̱treṇā̍yajata̱ sa e̱tānpoṣṛ̍ apuṣya̱ttasmā̎tpali̱tau jāma̍dagniyau̱ na saṃ jā̍nāte e̱tāne̱va poṣā̎npuṣyati̱ ya e̱vaṃ vi̱dvāgśca̍tūrā̱treṇa̱ yaja̍te puroḍā̱śinya̍ upa̱sado̍ bhavanti pa̱śavo̱ vai pu̍ro̱ḍāśa̍ḥ pa̱śūne̱vāva̍ ru̱ṃdhe’nna̱ṃ vai pu̍ro̱ḍāśo’nna̍me̱vāva̍ ruṃdhe’nnā̱daḥ pa̍śu̱mānbha̍vati̱ ya e̱vaṃ vi̱dvāgśca̍tūrā̱treṇa̱ yaja̍te ||7.1.9||
ja̱mada̍gnira̱ṣṭā ca̍tvārṛśat ||7.1.9||
36 sa̱ṃva̱thsa̱ro vā i̱dameka̍ āsī̱thso̍’kāmayata̱rtūnthsṛ̍je̱yeti̱ sa e̱taṃ pa̍ñcarā̱trama̍paśya̱ttamāha̍ra̱ttenā̍yajata̱ tato̱ vai sa ṛ̱tūna̍sṛjata̱ ya e̱vaṃ vi̱dvānpa̍ñcarā̱treṇa̱ yaja̍te̱ praiva jā̍yate̱ ta ṛ̱tava̍ḥ sṛ̱ṣṭā na vyāva̍rtanta̱ ta e̱taṃ pa̍ñcarā̱trama̍paśya̱ntamāha̍ra̱ntenā̍yajanta̱ tato̱ vai te vyāva̍rtanta̱ 37 ya e̱vaṃ vi̱dvānpa̍ñcarā̱treṇa̱ yaja̍te̱ vi pā̱pmanā̱ bhrātṛ̍vye̱ṇāva̍rtate̱ sārva̍seniḥ śauce̱yo̍’kāmayata paśu̱mānthsyā̱miti̱ sa e̱taṃ pa̍ñcarā̱tramāha̍ra̱ttenā̍yajata̱ tato̱ vai sa sa̱hasra̍ṃ pa̱śūnprāpno̱dya e̱vaṃ vi̱dvānpa̍ñcarā̱treṇa̱ yaja̍te̱ pra sa̱hasra̍ṃ pa̱śūnā̎pnoti baba̱raḥ prāvā̍haṇirakāmayata vā̱caḥ pra̍vadi̱tā syā̱miti̱ sa e̱taṃ pa̍ñcarā̱tramā 38 ‘ha̍ra̱ttenā̍yajata̱ tato̱ vai sa vā̱caḥ pra̍vadi̱tābha̍va̱dya e̱vaṃ vi̱dvānpa̍ñcarā̱treṇa̱ yaja̍te pravadi̱taiva vā̱co bha̍va̱tyatho̍ enaṃ vā̱caspati̱rityā̍hu̱ranā̎ptaścatūrā̱tro’ti̍riktaḥ ṣaḍrā̱tro’tha̱ vā e̱ṣa sa̍ṃ pra̱ti ya̱jño yatpa̍ñcarā̱tro ya e̱vaṃ vi̱dvānpa̍ñcarā̱treṇa̱ yaja̍te saṃ pra̱tye̍va ya̱jñena̍ yajate pañcarā̱tro bha̍vati̱ pañca̱ vā ṛ̱tava̍ḥ saṃvathsa̱ra 39 ṛ̱tuṣve̱va sa̍ṃvathsa̱re prati̍ tiṣṭha̱tyatho̱ pañcā̎kṣarā pa̱ṅktiḥ pāṅkto̍ ya̱jño ya̱jñame̱vāva̍ ruṃdhe tri̱vṛda̍gniṣṭo̱mo bha̍vati̱ teja̍ e̱vāva̍ ruṃdhe pañcada̱śo bha̍vatīndri̱yame̱vāva̍ ruṃdhe saptada̱śo bha̍vatya̱nnādya̱syāva̍ruddhyā̱ atho̱ praiva tena̍ jāyate pañcavṛ̱śo̎’gniṣṭo̱mo bha̍vati pra̱jāpa̍te̱rāptyai̍ mahāvra̱tavā̍na̱nnādya̱syāva̍ruddhyai viśva̱jithsarva̍pṛṣṭho’tirā̱tro bha̍vati̱ sarva̍syā̱bhiji̍tyai ||7.1.10||
te vyāva̍rtanta pravadi̱tā syā̱miti̱ sa e̱taṃ pa̍ñcarā̱tramā sa̍ṃvathsa̱ro̍’bhiji̍tyai ||7.1.10||
40 de̱vasya̍ tvā savi̱tuḥ pra̍sa̱ve̎’śvino̎rbā̱hubhyā̎ṃ pū̱ṣṇo hastā̎bhyā̱mā da̍da i̱māma̍gṛbhṇanraśa̱nāmṛ̱tasya̱ pūrva̱ āyu̍ṣi vi̱dathe̍ṣu ka̱vyā | tayā̍ de̱vāḥ su̱tamā ba̍bhūvurṛ̱tasya̱ sāma̎nthsa̱ramā̱rapa̍ntī || a̱bhi̱dhā a̍si̱ bhuva̍namasi ya̱ntāsi̍ dha̱rtāsi̱ so̎’gniṃ vai̎śvāna̱rṛ sapra̍tha saṃ gaccha̱ svāhā̍kṛtaḥ pṛthi̱vyāṃ ya̱ntā rāḍya̱ntāsi̱ yama̍no dha̱rtāsi̍ dha̱ruṇa̍ḥ kṛ̱ṣyai tvā̱ kṣemā̍ya tvā ra̱yyai tvā̱ poṣā̍ya tvā pṛthi̱vyai tvā̱ntari̍kṣāya tvā di̱ve tvā̍ sa̱te tvāsa̍te tvā̱dbhyastvauṣa̍dhībhyastvā̱ viśve̎bhyastvā bhū̱tebhya̍ḥ ||7.1.11||
dha̱ruṇa̱ḥ pañca̍vṛśatiśca ||7.1.11||
41 vi̱bhūrmā̱trā pra̱bhūḥ pi̱trāśvo̍’si̱ hayo̱’syatyo̍’si̱ naro̱’syarvā̍si̱ sapti̍rasi vā̱jya̍si̱ vṛṣā̍si nṛ̱maṇā̍ asi̱ yayu̱rnāmā̎syādi̱tyānā̱ṃ patvānvi̍hya̱gnaye̱ svāhā̱ svāhe̎ndrā̱gnibhyā̱g̱ svāhā̎ pra̱jāpa̍taye̱ svāhā̱ viśve̎bhyo de̱vebhya̱ḥ svāhā̱ sarvā̎bhyo de̱vatā̎bhya i̱ha dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ svāhe̱ha rama̍ti̱ḥ svāhā̱ bhūra̍si bhu̱ve tvā̱ bhavyā̍ya tvā bhaviṣya̱te tvā̱ viśve̎bhyastvā bhū̱tebhyo̱ devā̍ āśāpālā e̱taṃ de̱vebhyo’śva̱ṃ medhā̍ya̱ prokṣi̍taṃ gopāyata ||7.1.12||
ranti̱ḥ svāhā̱ dvāvṛ̍śatiśca ||7.1.12||
42 āya̍nāya̱ svāhā̱ prāya̍ṇāya̱ svāho̎ddrā̱vāya̱ svāhoddru̍tāya̱ svāhā̍ śūkā̱rāya̱ svāhā̱ śūkṛ̍tāya̱ svāhā̱ palā̍yitāya̱ svāhā̱palā̍yitāya̱ svāhā̱valga̍te̱ svāhā̍ parā̱valga̍te̱ svāhā̍ya̱te svāhā̎ praya̱te svāhā̱ sarva̍smai̱ svāhā̎ ||7.1.13||
āya̍nā̱yotta̍ramā̱palā̍yitāya̱ ṣaḍvṛ̍śatiḥ ||7.1.13||
43 a̱gnaye̱ svāhā̱ somā̍ya̱ svāhā̍ vā̱yave̱ svāhā̱pāṃ modā̍ya̱ svāhā̍ savi̱tre svāhā̱ sara̍svatyai̱ svāhendrā̍ya̱ svāhā̱ bṛha̱spata̍ye̱ svāhā̍ mi̱trāya̱ svāhā̱ varu̍ṇāya̱ svāhā̱ sarva̍smai̱ svāhā̎ ||7.1.14||
a̱gnaye̍ vā̱yave̱’pāṃ modā̱yendrā̍ya̱ trayo̍vṛśatiḥ ||7.1.14||
44 pṛ̱thi̱vyai svāhā̱ntari̍kṣāya̱ svāhā̍ di̱ve svāhā̱ sūryā̍ya̱ svāhā̍ ca̱ndrama̍se̱ svāhā̱ nakṣa̍trebhya̱ḥ svāhā̱ prācyai̍ di̱śe svāhā̱ dakṣi̍ṇāyai di̱śe svāhā̎ pra̱tīcyai̍ di̱śe svāhodī̎cyai di̱śe svāho̱rdhvāyai̍ di̱śe svāhā̍ di̱gbhyaḥ svāhā̍vāntaradi̱śābhya̱ḥ svāhā̱ samā̎bhya̱ḥ svāhā̍ śa̱radbhya̱ḥ svāhā̍horā̱trebhya̱ḥ svāhā̎rdhamā̱sebhya̱ḥ svāhā̱ māse̎bhya̱ḥ svāha̱rtubhya̱ḥ svāhā̍ saṃvathsa̱rāya̱ svāhā̱ sarva̍smai̱ svāhā̎ ||7.1.15||
pṛ̱thi̱vyai sūryā̍ya̱ nakṣa̍trebhya̱ḥ prācyai̍ sa̱pta ca̍tvārṛśat ||7.1.15||
45 a̱gnaye̱ svāhā̱ somā̍ya̱ svāhā̍ savi̱tre svāhā̱ sara̍svatyai̱ svāhā̍ pū̱ṣṇe svāhā̱ bṛha̱spata̍ye̱ svāhā̱pāṃ modā̍ya̱ svāhā̍ vā̱yave̱ svāhā̍ mi̱trāya̱ svāhā̱ varu̍ṇāya̱ svāhā̱ sarva̍smai̱ svāhā̎ ||7.1.16||
a̱gnaye̍ savi̱tre pū̱ṣṇe̍’pāṃ modā̍ya vā̱yave̱ trayo̍vṛśatiḥ ||7.1.16||
46 pṛ̱thi̱vyai svāhā̱ntari̍kṣāya̱ svāhā̍ di̱ve svāhā̱gnaye̱ svāhā̱ somā̍ya̱ svāhā̱ sūryā̍ya̱ svāhā̍ ca̱ndrama̍se̱ svāhāhne̱ svāhā̱ rātri̍yai̱ svāha̱rjave̱ svāhā̍ sā̱dhave̱ svāhā̍ sukṣi̱tyai svāhā̎ kṣu̱dhe svāhā̍śiti̱mne svāhā̱ rogā̍ya̱ svāhā̍ hi̱māya̱ svāhā̍ śī̱tāya̱ svāhā̍ta̱pāya̱ svāhāra̍ṇyāya̱ svāhā̍ suva̱rgāya̱ svāhā̍ lo̱kāya̱ svāhā̱ sarva̍smai̱ svāhā̎ ||7.1.17||
pṛ̱thi̱vyā a̱gnaye’hne̱ rātri̍yai̱ catu̍ścatvārṛśat ||7.1.17||
47 bhuvo̍ de̱vānā̱ṃ karma̍ṇā̱pasa̱rtasya̍ pa̱thyā̍si̱ vasu̍bhirde̱vebhi̍rde̱vata̍yā gāya̱treṇa̍ tvā̱ chaṃda̍sā yunajmi vasa̱ntena̍ tva̱rtunā̍ ha̱viṣā̍ dīkṣayāmi ru̱drebhi̍rde̱vebhi̍rde̱vata̍yā̱ traiṣṭu̍bhena tvā̱ chaṃda̍sā yunajmi grī̱ṣmeṇa̍ tva̱rtunā̍ ha̱viṣā̍ dīkṣayāmyādi̱tyebhi̍rde̱vebhi̍rde̱vata̍yā̱ jāga̍tena tvā̱ chaṃda̍sā yunajmi va̱ṟṣābhi̍stva̱rtunā̍ ha̱viṣā̍ dīkṣayāmi̱ viśve̍bhirde̱vebhi̍rde̱vata̱yānu̍ṣṭubhena tvā̱ chaṃda̍sā yunajmi 48 śa̱radā̎ tva̱rtunā̍ ha̱viṣā̍ dīkṣayā̱myaṃgi̍robhirde̱vebhi̍rde̱vata̍yā̱ pāṅkte̍na tvā̱ chaṃda̍sā yunajmi hemantaśiśi̱rābhyā̎ṃ tva̱rtunā̍ ha̱viṣā̍ dīkṣayā̱myāhaṃ dī̱kṣāma̍ruhamṛ̱tasya̱ patnī̎ṃ gāya̱treṇa̱ chaṃda̍sā̱ brahma̍ṇā ca̱rtṛ sa̱tye̍’dhṛ sa̱tyamṛ̱te̍’dhām || ma̱hī mū̱ṣu su̱trāmā̍ṇami̱ha dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ svāhe̱ha rama̍ti̱ḥ svāhā̎ ||7.1.18||
ānu̍ṣṭebhena tvā̱ chanda̍sā yuna̱jmyekā̱nna pa̍ñcā̱śacca̍ ||7.1.18||
49 ī̱ṃkā̱rāya̱ svāheṃkṛ̍tāya̱ svāhā̱ kranda̍te̱ svāhā̍va̱kranda̍te̱ svāhā̱ protha̍te̱ svāhā̎ pra̱protha̍te̱ svāhā̍ ga̱ndhāya̱ svāhā̎ ghrā̱tāya̱ svāhā̎ prā̱ṇāya̱ svāhā̎ vyā̱nāya̱ svāhā̍’pā̱nāya̱ svāhā̍ saṃdī̱yamā̍nāya̱ svāhā̱ saṃdi̍tāya̱ svāhā̍ vicṛ̱tyamā̍nāya̱ svāhā̱ vicṛ̍ttāya̱ svāhā̍ palāyi̱ṣyamā̍ṇāya̱ svāhā̱ palā̍yitāya̱ svāho̍para2ṛsya̱ te svāhopa̍ratāya̱ svāhā̍ nivekṣya̱te svāhā̍ nivi̱śamā̍nāya̱ svāhā̱ nivi̍ṣṭāya̱ svāhā̍ niṣathsya̱ te svāhā̍ ni̱ṣīda̍te̱ svāhā̱ niṣa̍ṇṇāya̱ svāhā̍ 50 ‘siṣya̱te svāhāsī̍nāya̱ svāhā̍si̱tāya̱ svāhā̍ nipathsya̱te svāhā̍ ni̱padya̍mānāya̱ svāhā̱ nipa̍nnāya̱ svāhā̍ śayiṣya̱te svāhā̱ śayā̍nāya̱ svāhā̍ śayi̱tāya̱ svāhā̍ saṃ mīliṣya̱te svāhā̍ sa̱ṃ mīla̍te̱ svāhā̱ saṃ mī̍litāya̱ svāhā̎ svapsya̱te svāhā̎ svapa̱te svāhā̍ su̱ptāya̱ svāhā̎ prabhothsya̱te svāhā̎ pra̱budhya̍mānāya̱ svāhā̱ prabu̍ddhāya̱ svāhā̍ jāgariṣya̱te svāhā̱ jāgra̍te̱ svāhā̍ jāgari̱tāya̱ svāhā̱ śuśrū̍ṣamāṇāya̱ svāhā̍ śaṛṇva̱te svāhā̎ śru̱tāya̱ svāhā̍ vīkṣiṣya̱te svāhā̱ 51 vīkṣa̍māṇāya̱ svāhā̱ vīkṣi̍tāya̱ svāhā̍ sṛhāsya̱te svāhā̍ sa̱ṃjihā̍nāya̱ svāho̱jjihā̍nāya̱ svāhā̍ vivarthsya̱te svāhā̍ vi̱varta̍mānāya̱ svāhā̱ vivṛ̍ttāya̱ svāho̎tthāsya̱te svāho̱ttiṣṭha̍te̱ svāhotthi̍tāya̱ svāhā̍ vidhaviṣya̱te svāhā̍ vidhūnvā̱nāya̱ svāhā̱ vidhū̍tāya̱ svāho̎tkra2ṛsya̱te svāho̱tkrāma̍te̱ svāhotkrā̎ntāya̱ svāhā̍ caṃkramiṣya̱te svāhā̍ caṃkra̱myamā̍ṇāya̱ svāhā̍ caṃkrami̱tāya̱ svāhā̍ kaṇḍūyiṣya̱te svāhā̍ kaṇḍū̱yamā̍nāya̱ svāhā̍ kaṇḍūyi̱tāya̱ svāhā̍ nikaṣiṣya̱te svāhā̍ ni̱kaṣa̍māṇāya̱ svāhā̱ nika̍ṣitāya̱ svāhā̱ yadatti̱ tasmai̱ svāhā̱ yatpiba̍ti̱ tasmai̱ svāhā̱ yanmeha̍ti̱ tasmai̱ svāhā̱ yacchakṛ̍tka̱roti̱ tasmai̱ svāhā̱ reta̍se̱ svāhā̎ pra̱jābhya̱ḥ svāhā̎ pra̱jana̍nāya̱ svāhā̱ sarva̍smai̱ svāhā̎ ||7.1.19||
niṣa̍ṇṇāya̱ svāhā̍ vīkṣiṣya̱te svāhā̍ ni̱kaṣa̍māṇāya̱ svāhā̍ sa̱ptavṛ̍śatiśca ||7.1.19||
52 a̱gnaye̱ svāhā̍ vā̱yave̱ svāhā̱ sūryā̍ya̱ svāha̱rtama̍syṛ̱tasya̱rtama̍si sa̱tyama̍si sa̱tyasya̍ sa̱tyama̍syṛ̱tasya̱ panthā̍ asi de̱vānā̎ṃ chā̱yāmṛta̍sya̱ nāma̱ tathsa̱tyaṃ yattvaṃ pra̱jāpa̍ti̱rasyadhi̱ yada̍sminvā̱jinī̍va̱ śubha̱ḥ spardha̍nte̱ diva̱ḥ sūrye̍ṇa̱ viśo̱’po vṛ̍ṇā̱naḥ pa̍vate ka̱vyanpa̱śuṃ na go̱pā irya̱ḥ pari̍jmā ||7.1.20||
a̱gnaye̍ vā̱yave̱ sūryā̍yā̱’ṣṭā ca̍tvārṛśat ||7.1.20||