Kṛṣṇayajuḥ Taittirīyasaṃhitā — Caturtha kāṇḍa, prapāṭhaka 7 (30 anuvākāḥ)
Kṛṣṇayajuḥ Taittirīyasaṃhitā — Caturtha kāṇḍa, prapāṭhaka 7
Section titled “Kṛṣṇayajuḥ Taittirīyasaṃhitā — Caturtha kāṇḍa, prapāṭhaka 7”caturthakāṇḍe saptamaḥ praśnaḥ 7
Anuvākāḥ
Section titled “Anuvākāḥ”1 agnā̍viṣṇū sa̱joṣa̍se̱mā va̍rdhantu vā̱ṃ gira̍ḥ | dyu̱mnairvāje̍bhi̱rā ga̍tam || vāja̍śca me prasa̱vaśca̍ me̱ praya̍tiśca me̱ prasi̍tiśca me dhī̱tiśca̍ me̱ kratu̍śca me̱ svara̍śca me̱ śloka̍śca me śrā̱vaśca̍ me̱ śruti̍śca me̱ jyoti̍śca me̱ suva̍śca me prā̱ṇaśca̍ me’pā̱na 2 śca̍ me vyā̱naśca̱ me’su̍śca me ci̱ttaṃ ca̍ ma̱ ādhī̍taṃ ca me̱ vākca̍ me̱ mana̍śca me̱ cakṣu̍śca me̱ śrotra̍ṃ ca me̱ dakṣa̍śca me̱ bala̍ṃ ca ma̱ oja̍śca me̱ saha̍śca ma̱ āyu̍śca me ja̱rā ca̍ ma ā̱tmā ca̍ me ta̱nūśca̍ me̱ śarma̍ ca me̱ varma̍ ca̱ me’ṅgā̍ni ca me̱’sthāni̍ ca me̱ parṛ̍ṣi ca me̱ śarī̍rāṇi ca me ||4.7.1||
a̱pā̱nasta̱nūśca̍ me̱’ṣṭāda̍śa ca ||4.7.1||
3 jyaiṣṭhya̍ṃ ca ma̱ ādhi̍patyaṃ ca me ma̱nyuśca̍ me̱ bhāma̍śca̱ me’ma̍śca̱ me’ṃbha̍śca me je̱mā ca̍ me mahi̱mā ca̍ me vari̱mā ca̍ me prathi̱mā ca̍ me va̱rṣmā ca̍ me drāghu̱yā ca̍ me vṛ̱ddhaṃ ca̍ me̱ vṛddhi̍śca me sa̱tyaṃ ca̍ me śra̱ddhā ca̍ me̱ jaga̍cca 4 me̱ dhana̍ṃ ca me̱ vaśa̍śca me̱ tviṣi̍śca me krī̱ḍā ca̍ me̱ moda̍śca me jā̱taṃ ca̍ me jani̱ṣyamā̍ṇaṃ ca me sū̱ktaṃ ca̍ me sukṛ̱taṃ ca̍ me vi̱ttaṃ ca̍ me̱ vedya̍ṃ ca me bhū̱taṃ ca̍ me bhavi̱ṣyacca̍ me su̱gaṃ ca̍ me su̱patha̍ṃ ca ma ṛ̱ddhaṃ ca̍ ma̱ ṛddhi̍śca me klṛ̱ptaṃ ca̍ me̱ klṛpti̍śca me ma̱tiśca̍ me suma̱tiśca̍ me ||4.7.2||
jaga̱ccardhi̱ścatu̍rdaśa ca ||4.7.2||
5 śaṃ ca̍ me̱ maya̍śca me pri̱yaṃ ca̍ me’nukā̱maśca̍ me̱ kāma̍śca me saumana̱saśca̍ me bha̱draṃ ca̍ me̱ śreya̍śca me̱ vasya̍śca me̱ yaśa̍śca me̱ bhaga̍śca me̱ dravi̍ṇaṃ ca me ya̱ntā ca̍ me dha̱rtā ca̍ me̱ kṣema̍śca me̱ dhṛti̍śca me̱ viśva̍ṃ ca 6 me̱ maha̍śca me sa̱ṃvicca̍ me̱ jñātra̍ṃ ca me̱ sūśca̍ me pra̱sūśca̍ me̱ sīra̍ṃ ca me la̱yaśca̍ ma ṛ̱taṃ ca̍ me̱’mṛta̍ṃ ca me’ya̱kṣmaṃ ca̱ me’nā̍mayacca me jī̱vātu̍śca me dīrghāyu̱tvaṃ ca̍ me’nami̱traṃ ca̱ me’bha̍yaṃ ca me su̱gaṃ ca̍ me̱ śaya̍naṃ ca me sū̱ṣā ca̍ me su̱dina̍ṃ ca me ||4.7.3||
viśva̍ṃ ca̱ śaya̍nama̱ṣṭau ca̍ ||4.7.3||
7 ūrkca̍ me sū̱nṛtā̍ ca me̱ paya̍śca me̱ rasa̍śca me ghṛ̱taṃ ca̍ me̱ madhu̍ ca me̱ sagdhi̍śca me̱ sapī̍tiśca me kṛ̱ṣiśca̍ me̱ vṛṣṭi̍śca me̱ jaitra̍ṃ ca ma̱ audbhi̍dyaṃ ca me ra̱yiśca̍ me̱ rāya̍śca me pu̱ṣṭaṃ ca̍ me̱ puṣṭi̍śca me vi̱bhu ca̍ 8 me pra̱bhu ca̍ me ba̱hu ca̍ me̱ bhūya̍śca me pū̱rṇaṃ ca̍ me pū̱rṇata̍raṃ ca̱ me’kṣi̍tiśca me̱ kūya̍vāśca̱ me’nna̍ṃ ca̱ me’kṣu̍cca me vrī̱haya̍śca me̱ yavā̎śca me̱ māṣā̎śca me̱ tilā̎śca me mu̱dgāśca̍ me kha̱lvā̎śca me go̱dhūmā̎śca me ma̱surā̎śca me pri̱yaṅga̍vaśca̱ me’ṇa̍vaśca me śyā̱mākā̎śca me nī̱vārā̎śca me ||4.7.4||
vi̱bhu ca̍ ma̱surā̱ścatu̍rdaśa ca ||4.7.4||
9 aśmā̍ ca me̱ mṛtti̍kā ca me gi̱raya̍śca me̱ parva̍tāśca me̱ sika̍tāśca me̱ vana̱spata̍yaśca me̱ hira̍ṇyaṃ ca̱ me’ya̍śca me̱ sīsa̍ṃ ca me̱ trapu̍śca me śyā̱maṃ ca̍ me lo̱haṃ ca̍ me̱’gniśca̍ ma̱ āpa̍śca me vī̱rudha̍śca ma̱ oṣa̍dhayaśca me kṛṣṭapa̱cyaṃ ca̍ 10 me’kṛṣṭapa̱cyaṃ ca̍ me grā̱myāśca̍ me pa̱śava̍ āra̱ṇyāśca̍ ya̱jñena̍ kalpantāṃ vi̱ttaṃ ca̍ me̱ vitti̍śca me bhū̱taṃ ca̍ me̱ bhūti̍śca me̱ vasu̍ ca me vasa̱tiśca̍ me̱ karma̍ ca me̱ śakti̍śca̱ me’rtha̍śca ma̱ ema̍śca ma̱ iti̍śca me̱ gati̍śca me ||4.7.5||
kṛ̱ṣṭa̱pa̱cyañcā̱’ṣṭā ca̍tvārṛśacca ||4.7.5||
11 a̱gniśca̍ ma̱ indra̍śca me̱ soma̍śca ma̱ indra̍śca me savi̱tā ca̍ ma̱ indra̍śca me̱ sara̍svatī ca ma̱ indra̍śca me pū̱ṣā ca̍ ma̱ indra̍śca me̱ bṛha̱spati̍śca ma̱ indra̍śca me mi̱traśca̍ ma̱ indra̍śca me̱ varu̍ṇaśca ma̱ indra̍śca me̱ tvaṣṭā̍ ca 12 ma̱ indra̍śca me dhā̱tā ca̍ ma̱ indra̍śca me̱ viṣṇu̍śca ma̱ indra̍śca me̱’śvinau̍ ca ma̱ indra̍śca me ma̱ruta̍śca ma̱ indra̍śca me̱ viśve̍ ca me de̱vā indra̍śca me pṛthi̱vī ca̍ ma̱ indra̍śca me̱’ntari̍kṣaṃ ca ma̱ indra̍śca me̱ dyauśca̍ ma̱ indra̍śca me̱ diśa̍śca ma̱ indra̍śca me mū̱rdhā ca̍ ma̱ indra̍śca me pra̱jāpa̍tiśca ma̱ indra̍śca me ||4.7.6||
tvaṣṭā̍ ca̱ dyauśca̍ ma̱ eka̍ vṛśatiśca ||4.7.6||
13 a̱ṛ̱śuśca̍ me ra̱śmiśca̱ me’dā̎bhyaśca̱ me’dhi̍patiśca ma upṛ̱śuśca̍ me’ntaryā̱maśca̍ ma aindravāya̱vaśca̍ me maitrāvaru̱ṇaśca̍ ma āśvi̱naśca̍ me pratipra̱sthāna̍śca me śu̱kraśca̍ me ma̱nthī ca̍ ma āgraya̱ṇaśca̍ me vaiśvade̱vaśca̍ me dhru̱vaśca̍ me vaiśvāna̱raśca̍ ma ṛtugra̱hāśca̍ 14 me’tigrā̱hyā̎śca ma aindrā̱gnaśca̍ me vaiśvade̱vaśca̍ me marutva̱tīyā̎śca me māhe̱ndraśca̍ ma ādi̱tyaśca̍ me sāvi̱traśca̍ me sārasva̱taśca̍ me pau̱ṣṇaśca̍ me pātnīva̱taśca̍ me hāriyoja̱naśca̍ me ||4.7.7||
ṛ̱tu̱gra̱hāśca̱ catu̍strṛśacca ||4.7.7||
15 i̱dhmaśca̍ me ba̱ṟhiśca̍ me̱ vedi̍śca me̱ dhiṣṇi̍yāśca me̱ sruca̍śca me cama̱sāśca̍ me̱ grāvā̍ṇaśca me̱ svara̍vaśca ma upara̱vāśca̍ me’dhi̱ṣava̍ṇe ca me droṇakala̱śaśca̍ me vāya̱vyā̍ni ca me pūta̱bhṛcca̍ ma ādhava̱nīya̍śca ma̱ āgnī̎dhraṃ ca me havi̱rdhāna̍ṃ ca me gṛ̱hāśca̍ me̱ sada̍śca me puro̱ḍāśā̎śca me paca̱tāśca̍ me’vabhṛ̱thaśca̍ me svagākā̱raśca̍ me ||4.7.8||
gṛ̱hāśca̱ ṣoḍa̍śa ca ||4.7.8||
16 a̱gniśca̍ me gha̱rmaśca̍ me̱’rkaśca̍ me̱ sūrya̍śca me prā̱ṇaśca̍ me’śvame̱dhaśca̍ me pṛthi̱vī ca̱ me’di̍tiśca me̱ diti̍śca me̱ dyauśca̍ me̱ śakva̍rīra̱ṅgula̍yo̱ diśa̍śca me ya̱jñena̍ kalpantā̱mṛkca̍ me̱ sāma̍ ca me̱ stoma̍śca me̱ yaju̍śca me dī̱kṣā ca̍ me̱ tapa̍śca ma ṛ̱tuśca̍ me vra̱taṃ ca̍ me’horā̱trayo̎rvṛ̱ṣṭyā bṛ̍hadrathanta̱re ca̍ me ya̱jñena̍ kalpetām ||4.7.9||
dī̱kṣā’ṣṭāda̍śa ca ||4.7.9||
17 garbhā̎śca me va̱thsāśca̍ me̱ tryavi̍śca me trya̱vī ca̍ me ditya̱vāṭ ca̍ me dityau̱hī ca̍ me̱ pañcā̍viśca me pañcā̱vī ca̍ me triva̱thsaśca̍ me triva̱thsā ca̍ me turya̱vāṭ ca̍ me turyau̱hī ca̍ me paṣṭha̱vāṭ ca̍ me paṣṭhau̱hī ca̍ ma u̱kṣā ca̍ me va̱śā ca̍ ma ṛṣa̱bhaśca̍ 18 me ve̱hacca̍ me’na̱ḍvāñca̍ me dhe̱nuśca̍ ma̱ āyu̍rya̱jñena̍ kalpatāṃ prā̱ṇo ya̱jñena̍ kalpatāmapā̱no ya̱jñena̍ kalpatāṃ vyā̱no ya̱jñena̍ kalpatā̱ṃ cakṣu̍rya̱jñena̍ kalpatā̱g̱ śrotra̍ṃ ya̱jñena̍ kalpatā̱ṃ mano̍ ya̱jñena̍ kalpatā̱ṃ vāgya̱jñena̍ kalpatāmā̱tmā ya̱jñena̍ kalpatāṃ ya̱jño ya̱jñena̍ kalpatām ||4.7.10||
ṛ̱ṣa̱bhaśca̍ catvārṛ̱śacca̍ ||4.7.10||
19 ekā̍ ca me ti̱sraśca̍ me̱ pañca̍ ca me sa̱pta ca̍ me̱ nava̍ ca ma̱ ekā̍daśa ca me̱ trayo̍daśa ca me̱ pañca̍daśa ca me sa̱ptada̍śa ca me̱ nava̍daśa ca ma̱ eka̍vṛśatiśca me̱ trayo̍vṛśatiśca me̱ pañca̍vṛśatiśca me sa̱ptavṛ̍śatiśca me̱ nava̍vṛśatiśca ma̱ eka̍trṛśacca me̱ traya̍strṛśacca 20 me̱ cata̍sraśca me̱’ṣṭau ca̍ me̱ dvāda̍śa ca me̱ ṣoḍa̍śa ca me vṛśa̱tiśca̍ me̱ catu̍rvṛśatiśca me̱’ṣṭāvṛ̍śatiśca me̱ dvātrṛ̍śacca me̱ ṣaṭtrṛ̍śacca me catvārṛ̱śacca̍ me̱ catu̍ścatvārṛśacca me̱’ṣṭāca̍tvārṛśacca me̱ vāja̍śca prasa̱vaścā̍pi̱jaśca̱ kratu̍śca̱ suva̍śca mū̱rdhā ca̱ vyaśni̍yaścāntyāya̱naścāntya̍śca bhauva̱naśca̱ bhuva̍na̱ścādhi̍patiśca ||4.7.11||
traya̍strṛśacca̱ vyaśñi̍ya̱ ekā̍daśa ca ||4.7.11||
21 vājo̍ naḥ sa̱pta pra̱diśa̱ścata̍sro vā parā̱vata̍ḥ | vājo̍ no̱ viśvai̎rde̱vairdhana̍sātāvi̱hāva̍tu || viśve̍ a̱dya ma̱ruto̱ viśva̍ ū̱tī viśve̍ bhavantva̱gnaya̱ḥ sami̍ddhāḥ | viśve̍ no de̱vā ava̱sāga̍mantu̱ viśva̍mastu̱ dravi̍ṇa̱ṃ vājo̍ a̱sme || vāja̍sya prasa̱vaṃ de̍vā̱ rathai̎ryātā hira̱ṇyayai̎ḥ | a̱gnirindro̱ bṛha̱spati̍rma̱ruta̱ḥ soma̍pītaye || vāje̍vāje’vata vājino no̱ dhane̍ṣu 22 viprā amṛtā ṛtajñāḥ | a̱sya madhva̍ḥ pibata mā̱daya̍dhvaṃ tṛ̱ptā yā̍ta pa̱thibhi̍rdeva̱yānai̎ḥ || vāja̍ḥ pu̱rastā̍du̱ta ma̍dhya̱to no̱ vājo̍ de̱vṛ ṛ̱tubhi̍ḥ kalpayāti | vāja̍sya̱ hi pra̍sa̱vo nanna̍mīti̱ viśvā̱ āśā̱ vāja̍patirbhaveyam || paya̍ḥ pṛthi̱vyāṃ paya̱ oṣa̍dhīṣu̱ payo̍ di̱vya̍ntari̍kṣe̱ payo̍ dhām | paya̍svatīḥ pra̱diśa̍ḥ santu̱ mahya̎m || saṃmā̍ sṛjāmi̱ paya̍sā ghṛ̱tena̱ saṃ mā̍ sṛjāmya̱pa 23 oṣa̍dhībhiḥ | so̍’haṃ vājṛ̍ saneyamagne || nakto̱ṣāsā̱ sama̍nasā̱ virū̍pe dhā̱paye̍te̱ śiśu̱mekṛ̍ samī̱cī | dyāvā̱ kṣāmā̍ ru̱kmo a̱ntarvi bhā̍ti de̱vā a̱gniṃ dhā̍rayandraviṇo̱dāḥ || sa̱mu̱dro̍’si̱ nabha̍svānā̱rdradā̍nuḥ śa̱ṃbhūrma̍yo̱bhūra̱bhi mā̍ vāhi̱ svāhā̍ māru̱to̍si ma̱rutā̎ṃ ga̱ṇaḥ śa̱ṃbhūrma̍yo̱bhūra̱bhi mā̍ vāhi̱ svāhā̍va̱syura̍si̱ duva̍svāñcha̱ṃbhūrma̍yo̱bhūra̱bhi mā̍ vāhi̱ svāhā̎ ||4.7.12||
dhane̎ṣva̱po duva̍śvāñcha̱ṃbhūrmayo̱bhūra̱bhi mā̱ dve ca̍ ||4.7.12||
24 a̱gniṃ yu̍najmi̱ śava̍sā ghṛ̱tena̍ di̱vyṛ su̍pa̱rṇaṃ vaya̍sā bṛ̱hanta̎m | tena̍ va̱yaṃ pa̍tema bra̱dhnasya̍ vi̱ṣṭapṛ̱ suvo̱ ruhā̍ṇā̱ adhi̱ nāka̍ utta̱me || i̱mau te̍ pa̱kṣāva̱jarau̍ pata̱triṇo̱ yābhyṛ̱ rakṣāg̍syapa̱ha2ṛsya̍gne | tābhyā̎ṃ patema su̱kṛtā̍mu lo̱kaṃ yatrarṣa̍yaḥ prathama̱jā ye pu̍rā̱ṇāḥ || cida̍si samu̱drayo̍ni̱rindu̱rdakṣa̍ḥ śye̱na ṛ̱tāvā̎ | hira̍ṇyapakṣaḥ śaku̱no bhu̍ra̱ṇyurma̱hānthsa̱dhasthe̎ dhru̱va 25 ā niṣa̍ttaḥ || nama̍ste astu̱ mā mā̍ hṛsī̱rviśva̍sya mū̱rdhannadhi̍ tiṣṭhasi śri̱taḥ | sa̱mu̱dre te̱ hṛda̍yama̱ntarāyu̱rdyāvā̍pṛthi̱vī bhuva̍ne̱ṣvarpi̍te || u̱dno da̍ttoda̱dhiṃ bhi̍nta di̱vaḥ pa̱rjanyā̍da̱ntari̍kṣāt pṛthi̱vyāstato̍ no̱ vṛṣṭyā̍vata | di̱vo mū̱rdhāsi̍ pṛthi̱vyā nābhi̱rūrga̱pāmoṣa̍dhīnām | vi̱śvāyu̱ḥ śarma̍ sa̱prathā̱ nama̍spa̱the || yenarṣa̍ya̱stapa̍sā sa̱ttra 26 māsa̱tendhā̍nā a̱gnṛ suva̍rā̱bhara̍ntaḥ | tasmi̍nna̱haṃ ni da̍dhe̱ nāke̍ a̱gnime̱taṃ yamā̱hurmana̍vaḥ stī̱rṇaba̍rhiṣam || taṃ patnī̍bhi̱ranu̍ gacchema devāḥ pu̱trairbhrātṛ̍bhiru̱ta vā̱ hira̍ṇyaiḥ | nāka̍ṃ gṛhṇā̱nāḥ su̍kṛ̱tasya̍ lo̱ke tṛ̱tīye̍ pṛ̱ṣṭhe adhi̍ roca̱ne di̱vaḥ || ā vā̱co madhya̍maruhadbhura̱ṇyura̱yama̱gniḥ satpa̍ti̱śceki̍tānaḥ | pṛ̱ṣṭhe pṛ̍thi̱vyā nihi̍to̱ davi̍dyutadadhaspa̱daṃ kṛ̍ṇute̱ 27 ye pṛ̍ta̱nyava̍ḥ || a̱yama̱gnirvī̱rata̍mo vayo̱dhāḥ sa̍ha̱sriyo̍ dīpyatā̱mapra̍yucchan | vi̱bhrāja̍mānaḥ sari̱rasya̱ madhya̱ upa̱ pra yā̍ta di̱vyāni̱ dhāma̍ || saṃ pra cya̍vadhva̱manu̱ saṃ pra yā̱tāgne̍ pa̱tho de̍va̱yānā̎n kṛṇudhvam | a̱sminthsa̱dhasthe̱ adhyutta̍rasmi̱nviśve̍ devā̱ yaja̍mānaśca sīdata || yenā̍ sa̱hasra̱ṃ vaha̍si̱ yenā̎gne sarvaveda̱sam | tene̱maṃ ya̱jñaṃ no̍ vaha deva̱yāno̱ ya 28 u̍tta̱maḥ || udbu̍dhyasvāgne̱ prati̍ jāgṛhye̍namiṣṭāpū̱rte sṛ sṛ̍jethāma̱yaṃ ca̍ | puna̍ḥ kṛ̱ṇva2ṛstvā̍ pi̱tara̱ṃ yuvā̍nama̱nvātṛ̍sī̱ttvayi̱ tantu̍me̱tam || a̱yaṃ te̱ yoni̍rṛ̱tviyo̱ yato̍ jā̱to aro̍cathāḥ | taṃ jā̱nanna̍gna̱ ā ro̱hāthā̍ no vardhayā ra̱yim ||4.7.13||
dhṛ̱vassa̱traṃ kṛ̍ṇute̱ yassa̱ptatrṛ̍śacca ||4.7.13||
29 mamā̎gne̱ varco̍ viha̱veṣva̍stu va̱yaṃ tvendhā̍nāsta̱nuva̍ṃ puṣema | mahya̍ṃ namantāṃ pra̱diśa̱ścata̍sra̱stvayādhya̍kṣeṇa̱ pṛta̍nā jayema || mama̍ de̱vā vi̍ha̱ve sa̍ntu̱ sarva̱ indrā̍vanto ma̱ruto̱ viṣṇu̍ra̱gniḥ | mamā̱ntari̍kṣamu̱ru go̱pama̍stu̱ mahya̱ṃ vāta̍ḥ pavatā̱ṃ kāme̍ a̱smin || mayi̍ de̱vā dravi̍ṇa̱mā ya̍jantā̱ṃ mayyā̱śīra̍stu̱ mayi̍ de̱vahū̍tiḥ | daivyā̱ hotā̍rā vaniṣanta̱ 30 pūrveri̍ṣṭāḥ syāma ta̱nuvā̍ su̱vīrā̎ḥ || mahya̍ṃ yajantu̱ mama̱ yāni̍ ha̱vyākū̍tiḥ sa̱tyā mana̍so me astu | eno̱ mā ni gā̎ṃ kata̱macca̱nā’haṃ viśve̍ devāso̱ adhi̍ vocatā me || devī̎ḥ ṣaḍurvīru̱ruṇa̍ḥ kṛṇota̱ viśve̍ devāsa i̱ha vī̍rayadhvam | mā hā̎smahi pra̱jayā̱ mā ta̱nūbhi̱rmā ra̍dhāma dviṣa̱te so̍ma rājan || a̱gnirma̱nyuṃ pra̍tinu̱danpu̱rastā̱ 31 dada̍bdho go̱pāḥ pari̍ pāhina̱stvam | pra̱tyañco̍ yantu ni̱guta̱ḥ puna̱ste̍’maiṣā̎ṃ ci̱ttaṃ pra̱budhā̱ vi ne̍śat || dhā̱tā dhā̍tṛ̱ṇāṃ bhuva̍nasya̱ yaspati̍rde̱vṛ sa̍vi̱tāra̍mabhimāti̱ṣāham̎ | i̱maṃ ya̱jñama̱śvino̱bhā bṛha̱spati̍rde̱vāḥ pā̎ntu̱ yaja̍mānaṃ nya̱rthāt || u̱ru̱vyacā̍ no mahi̱ṣaḥ śarma̍ yṛsada̱smin have̍ puruhū̱taḥ pu̍ru̱kṣu | sa na̍ḥ pra̱jāyai̍ haryaśva mṛḍa̱yendra̱ mā 32 no̍ rīriṣo̱ mā parā̍dāḥ || ye na̍ḥ sa̱patnā̱ apa̱ te bha̍vantvindrā̱gnibhyā̱mava̍ bādhāma he̱ tān | vasa̍vo ru̱drā ā̍di̱tyā u̍pari̱spṛśa̍ṃ mo̱graṃ cettā̍ramadhirā̱jama̍kran || a̱rvāñca̱mindra̍ma̱muto̍ havāmahe̱ yo go̱jiddha̍na̱jida̍śva̱jidyaḥ | i̱maṃ no̍ ya̱jñaṃ vi̍ha̱ve ju̍ṣasvā̱sya ku̍rmo harivo me̱ dina̍ṃ tvā ||4.7.14||
va̱ni̱ṣa̱nta̱ pu̱rastā̱nmā trica̍tvārṛśacca ||4.7.14||
33 a̱gnerma̍nve pratha̱masya̱ prace̍taso̱ yaṃ pāñca̍janyaṃ ba̱hava̍ḥ sami̱ndhate̎ | viśva̍syāṃ vi̱śi pra̍viviśi̱vṛ sa̍mīmahe̱ sa no̍ muñca̱tvṛha̍saḥ || yasye̱daṃ prā̱ṇanni̍mi̱ṣadyadeja̍ti̱ yasya̍ jā̱taṃ jana̍mānaṃ ca̱ keva̍lam | staumya̱gniṃ nā̍thi̱to jo̍havīmi̱ sa no̍ muñca̱tvṛha̍saḥ || indra̍sya manye pratha̱masya̱ prace̍taso vṛtra̱ghnaḥ stomā̱ upa̱ māmu̱pāgu̍ḥ | yo dā̱śuṣa̍ḥ su̱kṛto̱ hava̱mupa̱ gantā̱ 34 sa no̍ muñca̱tvṛha̍saḥ || yaḥ sa̍ṃgrā̱maṃ naya̍ti̱ saṃ va̱śī yu̱dhe yaḥ pu̱ṣṭāni̍ sṛsṛ̱jati̍ tra̱yāṇi̍ | staumīndra̍ṃ nāthi̱to jo̍havīmi̱ sa no̍ muñca̱tvṛha̍saḥ || ma̱nve vā̎ṃ mitrāvaruṇā̱ tasya̍ vittṛ̱ satyau̍jasā dṛhaṇā̱ yaṃ nu̱dethe̎ | yā rājā̍nṛ sa̱ratha̍ṃ yā̱tha u̍grā̱ tā no̍ muñcata̱māga̍saḥ || yo vṛ̱ ratha̍ ṛ̱jura̍śmiḥ sa̱tyadha̍rmā̱ mithu̱ścara̍ntamupa̱yāti̍ dū̱ṣayan̍ | staumi̍ 35 mi̱trāvaru̍ṇā nāthi̱to jo̍havīmi̱ tau no̍ muñcata̱māga̍saḥ || vā̱yoḥ sa̍vi̱turvi̱dathā̍ni manmahe̱ yāvā̎tma̱nvadbi̍bhṛ̱to yau ca̱ rakṣa̍taḥ | yau viśva̍sya pari̱ bhū ba̍bhū̱vatu̱stau no̍ muñcata̱māga̍saḥ || upa̱ śreṣṭhā̍ na ā̱śiṣo̍ de̱vayo̱rdharme̍ asthiran | staumi̍ vā̱yṛ sa̍vi̱tāra̍ṃ nāthi̱to jo̍havīmi̱ tau no̍ muñcata̱māga̍saḥ || ra̱thīta̍mau rathī̱nāma̍hva ū̱taye̱ śubha̱ṃ gami̍ṣṭhau su̱yame̍bhi̱raśvai̎ḥ | yayo̎ 36 rvāṃ devau de̱veṣvani̍śita̱moja̱stau no̍ muñcata̱māga̍saḥ || yadayā̍taṃ vaha̱tṛ sū̱ryāyā̎strica̱kreṇa̍ sṛ̱sada̍mi̱cchamā̍nau | staumi̍ de̱vāva̱śvinau̍ nāthi̱to jo̍havīmi̱ tau no̍ muñcata̱māga̍saḥ || ma̱rutā̎ṃ manve̱ adhi̍ no bruvantu̱ premāṃ vāca̱ṃ viśvā̍mavantu̱ viśve̎ | ā̱śūn hu̍ve su̱yamā̍nū̱taye̱ te no̍ muñca̱ntvena̍saḥ || ti̱gmamāyu̍dhaṃ vīḍi̱tṛ saha̍svaddi̱vyṛ śardha̱ḥ 37 pṛta̍nāsu ji̱ṣṇu | staumi̍ de̱vānma̱ruto̍ nāthi̱to jo̍havīmi̱ te no̍ muñca̱ntvena̍saḥ || de̱vānā̎ṃ manve̱ adhi̍ no bruvantu̱ premāṃ vāca̱ṃ viśvā̍mavantu̱ viśve̎ | ā̱śūn hu̍ve su̱yamā̍nū̱taye̱ te no̍ muñca̱ntvena̍saḥ || yadi̱daṃ mā̍bhi̱śoca̍ti̱ pauru̍ṣeyeṇa̱ daivye̍na | staumi̱ viśvā̎nde̱vānnā̍thi̱to jo̍havīmi̱ te no̍ muñca̱ntvena̍saḥ || anu̍ no̱’dyānu̍mati̱ra 38 nvida̍numate̱ tvaṃ vai̎śvāna̱ro na̍ ū̱tyā pṛ̱ṣṭo di̱vi | ye apra̍thetā̱mami̍tebhi̱rojo̍bhi̱rye pra̍ti̱ṣṭhe abha̍vatā̱ṃ vasū̍nām | staumi̱ dyāvā̍pṛthi̱vī nā̍thi̱to jo̍havīmi̱ te no̍ muñcata̱mṛha̍saḥ || urvī̍rodasī̱ vari̍vaḥ kṛṇota̱ṃ kṣetra̍sya patnī̱ adhi̍ no brūyātam | staumi̱ dyāvā̍pṛthi̱vī nā̍thi̱to jo̍havīmi̱ te no̍ muñcata̱mṛha̍saḥ || yatte̍ va̱yaṃ pu̍ruṣa̱trā ya̍vi̱ṣṭhāvi̍dvṛsaścakṛ̱mā kacca̱nā 39 ‘ga̍ḥ | kṛ̱dhī sva̍smṛ adi̍te̱ranā̍gā̱vyenṛ̍si śiśratho̱ viṣva̍gagne || yathā̍ha̱ tadva̍savo gau̱rya̍ṃ citpa̱di ṣi̱tāmamu̍ñcatā yajatrāḥ | e̱vā tvama̱smat pra mu̍ñcā̱ vyṛha̱ḥ prātā̎ryagne prata̱rāṃna̱ āyu̍ḥ ||4.7.15||
gantā̍ dū̱ṣaya̱nthstaumi̱ yayo̱ḥ śardho’nu̍mati̱ranu̍ ca̱na catu̍strṛśacca ||4.7.15||