vivāhā brāhma daivārṣāḥ prājāpatyāsurau tathā
skaṃda uvāca
vivāhā brāhma daivārṣāḥ prājāpatyāsurau tathā ||
gāṃdharvo rākṣasaścāpi paiśāco'ṣṭama ucyate
||1||विवाहा ब्राह्म दैवार्षाः प्राजापत्यासुरौ तथा ॥
गांधर्वो राक्षसश्चापि पैशाचोऽष्टम उच्यते
sa brāhmo varamāhūya yatra kanyā svalaṃkṛtā ||
dīyate tatsutaḥ pūyātpuruṣānekaviṃśatim
||2||स ब्राह्मो वरमाहूय यत्र कन्या स्वलंकृता ॥
दीयते तत्सुतः पूयात्पुरुषानेकविंशतिम्
yajñasthāyartvije daivastajjaḥpāti caturdaśa ||
varādādāya godvaṃdvamārṣastajjaḥ punāti ṣaṭ
||3||यज्ञस्थायर्त्विजे दैवस्तज्जःपाति चतुर्दश ॥
वरादादाय गोद्वंद्वमार्षस्तज्जः पुनाति षट्
sahobhau caratāṃ dharmamityuktvā dīyaterthine ||
yatra kanyā prājāpatyastajjo vaṃśānpunāti ṣaṭ
||4||सहोभौ चरतां धर्ममित्युक्त्वा दीयतेर्थिने ॥
यत्र कन्या प्राजापत्यस्तज्जो वंशान्पुनाति षट्
catvāra ete viprāṇāṃ dharmyāḥ pāṇigrahāḥ smṛtāḥ ||
āsuraḥ krayaṇāddravyairgāṃdharvonyonya maitrataḥ
||5||चत्वार एते विप्राणां धर्म्याः पाणिग्रहाः स्मृताः ॥
आसुरः क्रयणाद्द्रव्यैर्गांधर्वोन्योन्य मैत्रतः
prasahyakanyāharaṇādrākṣaso niṃditaḥ satām ||
chalena kanyāharaṇātpaiśāco garhito'ṣṭamaḥ
||6||प्रसह्यकन्याहरणाद्राक्षसो निंदितः सताम् ॥
छलेन कन्याहरणात्पैशाचो गर्हितोऽष्टमः
prāyaḥ kṣatraviśoruktā gāṃdharvāsurarākṣasāḥ ||
aṣṭamastveṣa pāpiṣṭhaḥ pāpiṣṭhānāṃ ca saṃbhavet
||7||प्रायः क्षत्रविशोरुक्ता गांधर्वासुरराक्षसाः ॥
अष्टमस्त्वेष पापिष्ठः पापिष्ठानां च संभवेत्
savarṇayā karo grāhyo dhāryaḥ kṣatriyayā śaraḥ ||
pratodo vaiśyayā dhāryo vāsoṃtaḥ pajjayā tathā
||8||सवर्णया करो ग्राह्यो धार्यः क्षत्रियया शरः ॥
प्रतोदो वैश्यया धार्यो वासोंतः पज्जया तथा
asavarṇastveṣa vidhiḥ smṛto dṛṣṭaśca vedane ||
savarṇābhistu sarvābhiḥ pāṇirgrāhyastvayaṃ vidhiḥ
||9||असवर्णस्त्वेष विधिः स्मृतो दृष्टश्च वेदने ॥
सवर्णाभिस्तु सर्वाभिः पाणिर्ग्राह्यस्त्वयं विधिः
dharmyairvivāhairjāyaṃte dharmyā eva śatāyuṣaḥ ||
adharmyairdharmarahitā maṃdabhāgyadhanāyuṣaḥ
||10||धर्म्यैर्विवाहैर्जायंते धर्म्या एव शतायुषः ॥
अधर्म्यैर्धर्मरहिता मंदभाग्यधनायुषः
ṛtukālābhigamanaṃ dharmoyaṃ gṛhiṇaḥ paraḥ ||
strīṇāṃ varamanusmṛtya yathākāmyathavā bhavet
||11||ऋतुकालाभिगमनं धर्मोयं गृहिणः परः ॥
स्त्रीणां वरमनुस्मृत्य यथाकाम्यथवा भवेत्
divābhigamanaṃ puṃsāmanāyuṣyaṃ paraṃ matam ||
śrāddhāhaḥ sarvaparvāṇi yatnāttyājyāni dhīmatā
||12||दिवाभिगमनं पुंसामनायुष्यं परं मतम् ॥
श्राद्धाहः सर्वपर्वाणि यत्नात्त्याज्यानि धीमता
tatra gacchanstriyaṃ mohāddharmātpracyavate parāt
||13||तत्र गच्छन्स्त्रियं मोहाद्धर्मात्प्रच्यवते परात्
ṛtukālābhigāmī yaḥ svadāranirataśca yaḥ ||
sa sadā brahmacārī ca vijñeyaḥ sadgṛhāśramī
||14||ऋतुकालाभिगामी यः स्वदारनिरतश्च यः ॥
स सदा ब्रह्मचारी च विज्ञेयः सद्गृहाश्रमी
ṛtuḥ ṣoḍaśayāminyaścatasrastā sugarhitāḥ ||
putrāstāsvapi yā yugmā ayugmāḥ kanyakā prajāḥ
||15||ऋतुः षोडशयामिन्यश्चतस्रस्ता सुगर्हिताः ॥
पुत्रास्तास्वपि या युग्मा अयुग्माः कन्यका प्रजाः
tyaktvā caṃdramasaṃ duḥsthaṃ maghāṃ pauṣṇaṃ vihāya ca ||
śuciḥ sannirviśetpatnīṃ punnāmarkṣe viśeṣataḥ ||
śuciṃ putraṃ prasūyeta puruṣārthaprasādhakam
||16||त्यक्त्वा चंद्रमसं दुःस्थं मघां पौष्णं विहाय च ॥
शुचिः सन्निर्विशेत्पत्नीं पुन्नामर्क्षे विशेषतः ॥
शुचिं पुत्रं प्रसूयेत पुरुषार्थप्रसाधकम्
ārṣe vivāhe godvaṃdvaṃ yaduktaṃ tanna śasyate ||
śulkamaṇvapi kanyāyāḥ kanyā vikrayapāpakṛt
||17||आर्षे विवाहे गोद्वंद्वं यदुक्तं तन्न शस्यते ॥
शुल्कमण्वपि कन्यायाः कन्या विक्रयपापकृत्
apatyavikrayī kalpaṃ vasedviṭkṛmibhojane ||
ato nāṇvapi kanyāyā upajīvetpitā dhanam
||18||अपत्यविक्रयी कल्पं वसेद्विट्कृमिभोजने ॥
अतो नाण्वपि कन्याया उपजीवेत्पिता धनम्
strīdhanānyupajīvaṃti ye mohādiha bāṃdhavāḥ ||
na kevalaṃ nirayagāsteṣāmapi hi pūrvajāḥ
||19||स्त्रीधनान्युपजीवंति ये मोहादिह बांधवाः ॥
न केवलं निरयगास्तेषामपि हि पूर्वजाः
patyā tuṣyati yatra strī tuṣyedyatra striyā patiḥ ||
tatra tuṣṭā mahālakṣmīrnivaseddānavā'riṇā
||20||पत्या तुष्यति यत्र स्त्री तुष्येद्यत्र स्त्रिया पतिः ॥
तत्र तुष्टा महालक्ष्मीर्निवसेद्दानवाऽरिणा
vāṇijyaṃ nṛpateḥ sevā vedānadhyāpanaṃ tathā ||
kuvivāhaḥ kriyālopaḥ kule patanahetavaḥ
||21||वाणिज्यं नृपतेः सेवा वेदानध्यापनं तथा ॥
कुविवाहः क्रियालोपः कुले पतनहेतवः
kuryādvaivāhike vahnau gṛhyakarmānvahaṃ gṛhī ||
paṃcayajñakriyāṃ cāpi paktiṃ dainaṃdinīmapi
||22||कुर्याद्वैवाहिके वह्नौ गृह्यकर्मान्वहं गृही ॥
पंचयज्ञक्रियां चापि पक्तिं दैनंदिनीमपि
gṛhasthāśramiṇaḥ paṃca sūnā karma dine dine ||
kaṃḍanī peṣaṇī cullī hyudakuṃbhastu mārjanī
||23||गृहस्थाश्रमिणः पंच सूना कर्म दिने दिने ॥
कंडनी पेषणी चुल्ली ह्युदकुंभस्तु मार्जनी
tāsāṃ ca paṃcasūnānāṃ nirākaraṇahetavaḥ ||
kratavaḥ paṃca nirdiṣṭā gṛhi śreyobhivardhanāḥ
||24||तासां च पंचसूनानां निराकरणहेतवः ॥
क्रतवः पंच निर्दिष्टा गृहि श्रेयोभिवर्धनाः
pāṭhanaṃ brahmayajñaḥ syāttarpaṇaṃ ca pitṛ kratuḥ ||
homo daivo balirbhauto'tithyarcā nṛkratuḥ kramāt
||25||पाठनं ब्रह्मयज्ञः स्यात्तर्पणं च पितृ क्रतुः ॥
होमो दैवो बलिर्भौतोऽतिथ्यर्चा नृक्रतुः क्रमात्
pitṛprītiṃ prakurvāṇaḥ kurvīta śrāddhamanvaham ||
annodakapayomūlaiḥ phalairvāpi gṛhāśramī
||26||पितृप्रीतिं प्रकुर्वाणः कुर्वीत श्राद्धमन्वहम् ॥
अन्नोदकपयोमूलैः फलैर्वापि गृहाश्रमी
godānena ca yatpuṇyaṃ pātrāya vidhipūrvakam ||
satkṛtya bhikṣave bhikṣāṃ dattvā tatphalamāpnuyāt
||27||गोदानेन च यत्पुण्यं पात्राय विधिपूर्वकम् ॥
सत्कृत्य भिक्षवे भिक्षां दत्त्वा तत्फलमाप्नुयात्
tapovidyāsamiddīpte hutaṃ viprāsya pāvake ||
tārayedvighnasaṃghebhyaḥ pāpābdherapi dustarāt
||28||तपोविद्यासमिद्दीप्ते हुतं विप्रास्य पावके ॥
तारयेद्विघ्नसंघेभ्यः पापाब्धेरपि दुस्तरात्
anarcito'tithirgehādbhagnāśo yasya gacchati ||
ājanmasaṃcitātpuṇyātkṣaṇātsa hi bahirbhavet
||29||अनर्चितोऽतिथिर्गेहाद्भग्नाशो यस्य गच्छति ॥
आजन्मसंचितात्पुण्यात्क्षणात्स हि बहिर्भवेत्
sāṃtvapūrvāṇi vākyāni śayyārthe bhūstṛṇodake ||
etānyapi pradeyāni sadābhyāgata tuṣṭaye
||30||सांत्वपूर्वाणि वाक्यानि शय्यार्थे भूस्तृणोदके ॥
एतान्यपि प्रदेयानि सदाभ्यागत तुष्टये
gṛhasthaḥ parapākādī pretya tatpaśutāṃ vrajet ||
śreyaḥ parānnapuṣṭasya gṛhṇīyādannado yataḥ
||31||गृहस्थः परपाकादी प्रेत्य तत्पशुतां व्रजेत् ॥
श्रेयः परान्नपुष्टस्य गृह्णीयादन्नदो यतः
ādityoḍho'tithiḥ sāyaṃ satkartavyaḥ prayatnataḥ ||
asatkṛtonyato gacchanduṣkṛtaṃ bhūri yacchati
||32||आदित्योढोऽतिथिः सायं सत्कर्तव्यः प्रयत्नतः ॥
असत्कृतोन्यतो गच्छन्दुष्कृतं भूरि यच्छति
bhuṃjāno'tithiśeṣānnamihāyurdhanabhāgbhavet ||
praṇodyātithimannāśī kilbiṣī ca gṛhāśramī
||33||भुंजानोऽतिथिशेषान्नमिहायुर्धनभाग्भवेत् ॥
प्रणोद्यातिथिमन्नाशी किल्बिषी च गृहाश्रमी
vaiśvadevāṃta saṃprāptaḥ sūryoḍho vātithiḥ smṛtaḥ ||
na pūrvakāla āyāto na ca dṛṣṭacaraḥ kvacit
||34||वैश्वदेवांत संप्राप्तः सूर्योढो वातिथिः स्मृतः ॥
न पूर्वकाल आयातो न च दृष्टचरः क्वचित्
balipātrakare vipre yadyanyotithirāgataḥ ||
adattvā taṃ baliṃ tasmai yathāśaktyānnamarpayet
||35||बलिपात्रकरे विप्रे यद्यन्योतिथिरागतः ॥
अदत्त्वा तं बलिं तस्मै यथाशक्त्यान्नमर्पयेत्
kumārāśca svavāsinyo garbhiṇyo'tirujānvitāḥ ||
atitherāditopyete bhojyā nātra vicāraṇā
||36||कुमाराश्च स्ववासिन्यो गर्भिण्योऽतिरुजान्विताः ॥
अतिथेरादितोप्येते भोज्या नात्र विचारणा
pitṛdevamanuṣyebhyo dattvāśnātyamṛtaṃ gṛhī ||
svārthaṃ pacannaghaṃ bhuṃkte kevalaṃ svodaraṃbhariḥ
||37||पितृदेवमनुष्येभ्यो दत्त्वाश्नात्यमृतं गृही ॥
स्वार्थं पचन्नघं भुंक्ते केवलं स्वोदरंभरिः
mādhyāhnikaṃ vaiśvadevaṃ gṛhasthaḥ svayamācaret ||
patnī sāyaṃ baliṃ dadyātsiddhānnairmaṃtravarjitam
||38||माध्याह्निकं वैश्वदेवं गृहस्थः स्वयमाचरेत् ॥
पत्नी सायं बलिं दद्यात्सिद्धान्नैर्मंत्रवर्जितम्
etatsāyaṃtanaṃ nāma vaiśvadevaṃ gṛhāśrame ||
sāyaṃprātarbhavedeva vaiśvadevaṃ prayatnataḥ
||39||एतत्सायंतनं नाम वैश्वदेवं गृहाश्रमे ॥
सायंप्रातर्भवेदेव वैश्वदेवं प्रयत्नतः
vaiśvadevena ye hīnā ātithyena vivarjitāḥ ||
sarve te vṛṣalā jñeyāḥ prāptavedā api dvijāḥ
||40||वैश्वदेवेन ये हीना आतिथ्येन विवर्जिताः ॥
सर्वे ते वृषला ज्ञेयाः प्राप्तवेदा अपि द्विजाः
akṛtvā vaiśvadevaṃ tu bhuṃjate ye dvijādhamāḥ ||
iha lokennahīnāḥ syuḥ kākayoniṃ vrajaṃtyatha
||41||अकृत्वा वैश्वदेवं तु भुंजते ये द्विजाधमाः ॥
इह लोकेन्नहीनाः स्युः काकयोनिं व्रजंत्यथ
vedoditaṃ svakaṃ karma nityaṃ kuryādataṃdritaḥ ||
taddhi kurvanyathāśakti prāpnuyātsadgatiṃ parām
||42||वेदोदितं स्वकं कर्म नित्यं कुर्यादतंद्रितः ॥
तद्धि कुर्वन्यथाशक्ति प्राप्नुयात्सद्गतिं पराम्
ṣaṣṭhyaṣṭamyorvasetpāpaṃ taile māṃse sadaiva hi ||
paṃcadaśyāṃ caturdaśyāṃ tathaiva ca bhagekṣure
||43||षष्ठ्यष्टम्योर्वसेत्पापं तैले मांसे सदैव हि ॥
पंचदश्यां चतुर्दश्यां तथैव च भगेक्षुरे
udayaṃ taṃ na cekṣeta nāstaṃ yaṃtaṃ na madhyagam ||
na rāhuṇopasṛṣṭaṃ ca nāṃbusaṃsthaṃ divākaram
||44||उदयं तं न चेक्षेत नास्तं यंतं न मध्यगम् ॥
न राहुणोपसृष्टं च नांबुसंस्थं दिवाकरम्
na vīkṣetātmamanorūpamāśudhāvenna varṣati ||
nollaṃghayedvatsataṃtrīṃ na nagno jalamāviśet
||45||न वीक्षेतात्ममनोरूपमाशुधावेन्न वर्षति ॥
नोल्लंघयेद्वत्सतंत्रीं न नग्नो जलमाविशेत्
devatāyatanaṃ vipraṃ dhenuṃ madhumṛdaṃ ghṛtam ||
jātivṛddhaṃ vayovṛddhaṃ vidyāvṛddhaṃ tapasvinam
||46||देवतायतनं विप्रं धेनुं मधुमृदं घृतम् ॥
जातिवृद्धं वयोवृद्धं विद्यावृद्धं तपस्विनम्
aśvatthaṃ caityavṛkṣaṃ ca guruṃ jalabhṛtaṃ ghaṭam ||
siddhānnaṃ dadhisiddhārthaṃ gacchankuryātpradakṣiṇam
||47||अश्वत्थं चैत्यवृक्षं च गुरुं जलभृतं घटम् ॥
सिद्धान्नं दधिसिद्धार्थं गच्छन्कुर्यात्प्रदक्षिणम्
rajasvalāṃ na seveta nāśnīyātsaha bhāryayā ||
ekavāsā na bhuṃjīta na bhuṃjītotkaṭāsane
||48||रजस्वलां न सेवेत नाश्नीयात्सह भार्यया ॥
एकवासा न भुंजीत न भुंजीतोत्कटासने
nāśnaṃtīṃ strīṃ samīkṣeta tejaskāmo dvijottamaḥ ||
asaṃtarpya pitṝndevānnādyādannaṃ navaṃ kvacit
||49||नाश्नंतीं स्त्रीं समीक्षेत तेजस्कामो द्विजोत्तमः ॥
असंतर्प्य पितॄन्देवान्नाद्यादन्नं नवं क्वचित्
pakvānnaṃ cāpi no māṃsaṃ dīrghakālaṃ jijīviṣuḥ ||
na mūtraṃ govraje kuryānna valmīke na bhasmani
||50||पक्वान्नं चापि नो मांसं दीर्घकालं जिजीविषुः ॥
न मूत्रं गोव्रजे कुर्यान्न वल्मीके न भस्मनि
na garteṣu sasatveṣu na tiṣṭhanna vrajannapi ||
goviprasūryavāyvagni caṃdrarkṣāṃbu gurūnapi
||51||न गर्तेषु ससत्वेषु न तिष्ठन्न व्रजन्नपि ॥
गोविप्रसूर्यवाय्वग्नि चंद्रर्क्षांबु गुरूनपि
abhipaśyanna kurvīta malamūtravisarjanam ||
tiraskṛtyāvaniṃ loṣṭakāṣṭhaparṇatṛṇādibhiḥ
||52||अभिपश्यन्न कुर्वीत मलमूत्रविसर्जनम् ॥
तिरस्कृत्यावनिं लोष्टकाष्ठपर्णतृणादिभिः
prāvṛtya vāsasā mauliṃ maunī viṇmūtramutsṛjet ||
yathāsukhamukho rātrau dinecchāyāṃdhakārayoḥ
||53||प्रावृत्य वाससा मौलिं मौनी विण्मूत्रमुत्सृजेत् ॥
यथासुखमुखो रात्रौ दिनेच्छायांधकारयोः
bhītiṣu prāṇabādhāyāṃ kuryānmalavisarjanam ||
mukhenopadhamennāgniṃ nagnāṃ nekṣeta yoṣitam
||54||भीतिषु प्राणबाधायां कुर्यान्मलविसर्जनम् ॥
मुखेनोपधमेन्नाग्निं नग्नां नेक्षेत योषितम्
nāṃghrī pratāpayedagnau na vastvaśuci nikṣipet ||
prāṇihiṃsāṃ na kurvīta nāśnīyātsam̐dhyayordvayoḥ
||55||नांघ्री प्रतापयेदग्नौ न वस्त्वशुचि निक्षिपेत् ॥
प्राणिहिंसां न कुर्वीत नाश्नीयात्सँध्ययोर्द्वयोः
na saṃviśeta saṃdhyāyāṃ pratyaksaumyaśirā api ||
viṇmūtraṣṭhīvanaṃ nāpsu kuryāddīrghajijīviṣuḥ
||56||न संविशेत संध्यायां प्रत्यक्सौम्यशिरा अपि ॥
विण्मूत्रष्ठीवनं नाप्सु कुर्याद्दीर्घजिजीविषुः
nācakṣīta dhayaṃtīṃ gāṃ neṃdracāpaṃ pradarśayet ||
naikaḥ supyātkvacicchūnye na śayānaṃ prabodhayet
||57||नाचक्षीत धयंतीं गां नेंद्रचापं प्रदर्शयेत् ॥
नैकः सुप्यात्क्वचिच्छून्ये न शयानं प्रबोधयेत्
paṃthānaṃ naikalo yāyānna vāryaṃjalinā pibet ||
na divodbhūta sāraṃ ca bhakṣayeddadhino niśi
||58||पंथानं नैकलो यायान्न वार्यंजलिना पिबेत् ॥
न दिवोद्भूत सारं च भक्षयेद्दधिनो निशि
strīdharmiṇyā nābhivadennādyādātṛpti rātriṣu ||
tauryatrika priyo na syātkāṃsye pādau na dhāvayet
||59||स्त्रीधर्मिण्या नाभिवदेन्नाद्यादातृप्ति रात्रिषु ॥
तौर्यत्रिक प्रियो न स्यात्कांस्ये पादौ न धावयेत्
śrāddhaṃ kṛtvā para śrāddhe yo'śnīyājjñānavarjitaḥ ||
dātuḥ śrāddhaphalaṃ nāsti bhoktā kilbiṣabhugbhavet
||60||श्राद्धं कृत्वा पर श्राद्धे योऽश्नीयाज्ज्ञानवर्जितः ॥
दातुः श्राद्धफलं नास्ति भोक्ता किल्बिषभुग्भवेत्
na dhārayedanyabhuktaṃ vāsaśco pānahāvapi ||
na bhinna bhājaneśnīyānnāsītāgnyādi dūṣite
||61||न धारयेदन्यभुक्तं वासश्चो पानहावपि ॥
न भिन्न भाजनेश्नीयान्नासीताग्न्यादि दूषिते
ārohaṇaṃ gavāṃ pṛṣṭhe pretadhūmaṃ sarittaram ||
bālātapaṃ divāsvāpaṃ dyajeddīrghaṃ jijīviṣuḥ
||62||आरोहणं गवां पृष्ठे प्रेतधूमं सरित्तरम् ॥
बालातपं दिवास्वापं द्यजेद्दीर्घं जिजीविषुः
snātvā na mārjayedgātraṃ visṛjenna śikhāṃ pathi ||
hastau śiro na dhunuyānnākarṣedāsanaṃ padā
||63||स्नात्वा न मार्जयेद्गात्रं विसृजेन्न शिखां पथि ॥
हस्तौ शिरो न धुनुयान्नाकर्षेदासनं पदा
notpāṭayellomanakhaṃ daśanena kadācana ||
karajaiḥ karajacchedaṃ tṛṇacchedaṃ vivarjayet
||64||नोत्पाटयेल्लोमनखं दशनेन कदाचन ॥
करजैः करजच्छेदं तृणच्छेदं विवर्जयेत्
śubhāyana yadāyatyāṃ tyajettatkarma yatnataḥ ||
advāreṇa na gaṃtavyaṃ svaveśmaparaveśmanoḥ
||65||शुभायन यदायत्यां त्यजेत्तत्कर्म यत्नतः ॥
अद्वारेण न गंतव्यं स्ववेश्मपरवेश्मनोः
krīḍennākṣaiḥ sahāsīta na dharmaghnairna rogibhiḥ ||
na śayīta kvacinnagnaḥ pāṇau bhuṃjīta naiva ca
||66||क्रीडेन्नाक्षैः सहासीत न धर्मघ्नैर्न रोगिभिः ॥
न शयीत क्वचिन्नग्नः पाणौ भुंजीत नैव च
ārdrapādakarāsyośnandīrghakālaṃ ca jīvati ||
saṃviśennārdracaraṇo nocchiṣṭaḥ kvacidāvrajet
||67||आर्द्रपादकरास्योश्नन्दीर्घकालं च जीवति ॥
संविशेन्नार्द्रचरणो नोच्छिष्टः क्वचिदाव्रजेत्
śayanastho na cāśnīyānnapibenna japeddvijaḥ ||
sopānatkaścanācāmenna tiṣṭhandhārayā pibet
||68||शयनस्थो न चाश्नीयान्नपिबेन्न जपेद्द्विजः ॥
सोपानत्कश्चनाचामेन्न तिष्ठन्धारया पिबेत्
sarvaṃ tilamayaṃ nādyātsāyaṃ śarmābhilāṣukaḥ ||
na nirīkṣeta viṇmūtre nocchiṣṭaḥ saṃspṛśecchiraḥ
||69||सर्वं तिलमयं नाद्यात्सायं शर्माभिलाषुकः ॥
न निरीक्षेत विण्मूत्रे नोच्छिष्टः संस्पृशेच्छिरः
nādhitiṣṭhettuṣāṃgāra bhasmakeśakapālikāḥ ||
patitaiḥ saha saṃvāsaḥ patanāyaiva jāyate
||70||नाधितिष्ठेत्तुषांगार भस्मकेशकपालिकाः ॥
पतितैः सह संवासः पतनायैव जायते
śrāvayedvaidikaṃ maṃtraṃ na śūdrāya kadācana ||
brāhmaṇyāddhīyate vipraḥ śūdro dharmācca hīyate
||71||श्रावयेद्वैदिकं मंत्रं न शूद्राय कदाचन ॥
ब्राह्मण्याद्धीयते विप्रः शूद्रो धर्माच्च हीयते
dharmopadeśaḥ śūdrāṇāṃ svaśreyaḥ pratighātayet ||
dvijaśuśrūṣaṇaṃ dharmaḥ śūdrāṇāṃ hi paro mataḥ
||72||धर्मोपदेशः शूद्राणां स्वश्रेयः प्रतिघातयेत् ॥
द्विजशुश्रूषणं धर्मः शूद्राणां हि परो मतः
kaṃḍūyanaṃ hi śirasaḥ pāṇibhyāṃ na śubhaṃ matam ||
ātāḍanaṃ karābhyāṃ ca krośanaṃ keśaluṃcanam
||73||कंडूयनं हि शिरसः पाणिभ्यां न शुभं मतम् ॥
आताडनं कराभ्यां च क्रोशनं केशलुंचनम्
aśāstravartino bhūpāllubdhātkṛtvā pratigraham ||
brāhmaṇaḥ sānvayo yāti narakānekaviṃśatim
||74||अशास्त्रवर्तिनो भूपाल्लुब्धात्कृत्वा प्रतिग्रहम् ॥
ब्राह्मणः सान्वयो याति नरकानेकविंशतिम्
akālavidyutstanite varṣartau pāṃsuvarṣaṇe ||
mahāvātadhvanau rātrāvanadhyāyāḥ prakīrtitāḥ
||75||अकालविद्युत्स्तनिते वर्षर्तौ पांसुवर्षणे ॥
महावातध्वनौ रात्रावनध्यायाः प्रकीर्तिताः
ulkāpāte ca bhūkaṃpe digdāhe madhyarātriṣu ||
saṃdhyayorvṛṣalopāṃte rājñorāhośca sūtake
||76||उल्कापाते च भूकंपे दिग्दाहे मध्यरात्रिषु ॥
संध्ययोर्वृषलोपांते राज्ञोराहोश्च सूतके
darśāṣṭakāsu bhūtāyāṃ śrāddhikaṃ pratigṛhya ca ||
pratipadyapi pūrṇāyāṃ gajoṣṭrābhyāṃ kṛtāṃtare
||77||दर्शाष्टकासु भूतायां श्राद्धिकं प्रतिगृह्य च ॥
प्रतिपद्यपि पूर्णायां गजोष्ट्राभ्यां कृतांतरे
kharoṣṭrakroṣṭra virute samavāye rudatyapi ||
upākarmaṇi cotsarge nāvimārge tarau jale
||78||खरोष्ट्रक्रोष्ट्र विरुते समवाये रुदत्यपि ॥
उपाकर्मणि चोत्सर्गे नाविमार्गे तरौ जले
āraṇyakamadhītyāpi bāṇasāmnorapi dhvanau ||
anadhyāyeṣu caiteṣu nādhīyīta dvijaḥ kvacit
||79||आरण्यकमधीत्यापि बाणसाम्नोरपि ध्वनौ ॥
अनध्यायेषु चैतेषु नाधीयीत द्विजः क्वचित्
kṛtāṃtarāyo na paṭhedbhekākhu śvāhi babhrubhiḥ ||
bhūtāṣṭamyoḥ paṃcadaśyorbrahmacārī sadā bhavet
||80||कृतांतरायो न पठेद्भेकाखु श्वाहि बभ्रुभिः ॥
भूताष्टम्योः पंचदश्योर्ब्रह्मचारी सदा भवेत्
anāyuṣyakaraṃ caiva paradāropasarpaṇam ||
tasmāttaddūratastyājyaṃ vairiṇāṃ copasevanam
||81||अनायुष्यकरं चैव परदारोपसर्पणम् ॥
तस्मात्तद्दूरतस्त्याज्यं वैरिणां चोपसेवनम्
pūrvarddhibhiḥ parityaktamātmānaṃ nāvamānayet ||
sadodyamavatāṃ yasmācchriyo vidyā na durlabhāḥ
||82||पूर्वर्द्धिभिः परित्यक्तमात्मानं नावमानयेत् ॥
सदोद्यमवतां यस्माच्छ्रियो विद्या न दुर्लभाः
satyaṃ brūyātpriyaṃ brūyānnabrūyātsatyamapriyam ||
priyaṃ ca nānṛtaṃ brūyādeṣa dharmo ghaṭodbhava
||83||सत्यं ब्रूयात्प्रियं ब्रूयान्नब्रूयात्सत्यमप्रियम् ॥
प्रियं च नानृतं ब्रूयादेष धर्मो घटोद्भव
bhadrameva vadennityaṃ bhadrameva viciṃtayet ||
bhadraireveha saṃsargo nābhadraiśca kadācana
||84||भद्रमेव वदेन्नित्यं भद्रमेव विचिंतयेत् ॥
भद्रैरेवेह संसर्गो नाभद्रैश्च कदाचन
rūpavittakulairhīnānsudhīrnādhikṣipennarān ||
puppavaṃtau na cekṣeta tvaśucirjyotiṣāṃ gaṇam
||85||रूपवित्तकुलैर्हीनान्सुधीर्नाधिक्षिपेन्नरान् ॥
पुप्पवंतौ न चेक्षेत त्वशुचिर्ज्योतिषां गणम्
vācovegaṃ manovegaṃ jihvāvegaṃ ca varjayet ||
utkoca dyūta dautyārta dravyaṃ dūrātparityajet
||86||वाचोवेगं मनोवेगं जिह्वावेगं च वर्जयेत् ॥
उत्कोच द्यूत दौत्यार्त द्रव्यं दूरात्परित्यजेत्
gobrāhmaṇāgnīnucchiṣṭa pāṇinā naiva saṃspṛśet ||
na spṛśedanimitte nakhāni svāni tvanāturaḥ
||87||गोब्राह्मणाग्नीनुच्छिष्ट पाणिना नैव संस्पृशेत् ॥
न स्पृशेदनिमित्ते नखानि स्वानि त्वनातुरः
guhyajānyapi lomāni tatsparśādaśucirbhavet ||
pādadhautodakaṃ mūtramucchiṣṭānnodakāni ca
||88||गुह्यजान्यपि लोमानि तत्स्पर्शादशुचिर्भवेत् ॥
पादधौतोदकं मूत्रमुच्छिष्टान्नोदकानि च
niṣṭhīvanaṃ ca śleṣmāṇaṃ gṛhāddūraṃ vinikṣipet ||
aharniśaṃ śruterjāpyācchaucācāraniṣevaṇāt ||
adrohavatyā buddhyā ca pūrvaṃ janma smareddvijaḥ
||89||निष्ठीवनं च श्लेष्माणं गृहाद्दूरं विनिक्षिपेत् ॥
अहर्निशं श्रुतेर्जाप्याच्छौचाचारनिषेवणात् ॥
अद्रोहवत्या बुद्ध्या च पूर्वं जन्म स्मरेद्द्विजः
vṛddhānprayatnādvaṃdeta dadyātteṣāṃ svamāsanam ||
vinamradhamanistasmādanuyāyāttataśca tān
||90||वृद्धान्प्रयत्नाद्वंदेत दद्यात्तेषां स्वमासनम् ॥
विनम्रधमनिस्तस्मादनुयायात्ततश्च तान्
śruti bhūdeva devānāṃ nṛpa sādhu tapasvinām ||
pativratānāṃ nārīṇāṃ niṃdāṃ kuryānna karhicit
||91||श्रुति भूदेव देवानां नृप साधु तपस्विनाम् ॥
पतिव्रतानां नारीणां निंदां कुर्यान्न कर्हिचित्
na manuṣyastutiṃ kuryānnātmānamapamānayet ||
abhyudyataṃ na praṇudetparamarmāṇi noccaret
||92||न मनुष्यस्तुतिं कुर्यान्नात्मानमपमानयेत् ॥
अभ्युद्यतं न प्रणुदेत्परमर्माणि नोच्चरेत्
adharmādedhate pūrvaṃ vidveṣṭṝnapi saṃjayet ||
sarvatobhadramāpyāpi tato naśyecca sānvayaḥ
||93||अधर्मादेधते पूर्वं विद्वेष्टॄनपि संजयेत् ॥
सर्वतोभद्रमाप्यापि ततो नश्येच्च सान्वयः
uddhṛtya paṃca mṛtpiṃḍānsnāyātparajalāśaye ||
anuddhṛtya ca tatkarturenasaḥ syātturīyabhāk
||94||उद्धृत्य पंच मृत्पिंडान्स्नायात्परजलाशये ॥
अनुद्धृत्य च तत्कर्तुरेनसः स्यात्तुरीयभाक्
śraddhayā pātramāsādya yatkiṃciddīyate vasu ||
deśe kāle ca vidhinā tadānaṃtyāya kalpate
||95||श्रद्धया पात्रमासाद्य यत्किंचिद्दीयते वसु ॥
देशे काले च विधिना तदानंत्याय कल्पते
bhūprado maṃḍalādhīśaḥ sarvatrasukhinonnadāḥ ||
toyadātā sadā tṛpto rūpavānrūpyado bhavet
||96||भूप्रदो मंडलाधीशः सर्वत्रसुखिनोन्नदाः ॥
तोयदाता सदा तृप्तो रूपवान्रूप्यदो भवेत्
pradīpado nirmalākṣo godātā'ryamalokabhāk ||
svarṇadātā ca dīrghāyustiladaḥ syāttu suprajāḥ
||97||प्रदीपदो निर्मलाक्षो गोदाताऽर्यमलोकभाक् ॥
स्वर्णदाता च दीर्घायुस्तिलदः स्यात्तु सुप्रजाः
veśmado 'tyuccasaudheśo vastradaścaṃdralo kabhāk ||
hayaprado divyayāno lakṣmīvānvṛṣabhapradaḥ
||98||वेश्मदो ऽत्युच्चसौधेशो वस्त्रदश्चंद्रलो कभाक् ॥
हयप्रदो दिव्ययानो लक्ष्मीवान्वृषभप्रदः
subhāryaḥ śibikā dātā suparyaṃka pradopi ca ||
dhānyaiḥ samṛddhimānnityamabhayaprada īśitā
||99||सुभार्यः शिबिका दाता सुपर्यंक प्रदोपि च ॥
धान्यैः समृद्धिमान्नित्यमभयप्रद ईशिता
brahmado brahmalokejyo brahmadaḥ sarvado mataḥ ||
upāyenāpi yo brahma dāpayetsopi tatsamaḥ
||100||ब्रह्मदो ब्रह्मलोकेज्यो ब्रह्मदः सर्वदो मतः ॥
उपायेनापि यो ब्रह्म दापयेत्सोपि तत्समः
śraddhayā pratigṛhṇāti śraddhayā yaḥ prayacchati ||
svargiṇau tāvubhau syātāṃ patato'śraddhayātyadhaḥ
||1||श्रद्धया प्रतिगृह्णाति श्रद्धया यः प्रयच्छति ॥
स्वर्गिणौ तावुभौ स्यातां पततोऽश्रद्धयात्यधः
anṛtena kṣaredyajñastapo vismayataḥ kṣaret ||
kṣaretkīrtanatodānamāyurviprāpavādataḥ
||2||अनृतेन क्षरेद्यज्ञस्तपो विस्मयतः क्षरेत् ॥
क्षरेत्कीर्तनतोदानमायुर्विप्रापवादतः
gaṃdhapuṣpakuśāñchayyāṃ śākaṃ māṃsaṃ payo dadhi ||
maṇi matsya gṛhaṃ dhānyaṃ grāhyametadupasthitam
||3||गंधपुष्पकुशाञ्छय्यां शाकं मांसं पयो दधि ॥
मणि मत्स्य गृहं धान्यं ग्राह्यमेतदुपस्थितम्
madhūdakaṃ phalaṃ mūlamedhāṃsyabhayadakṣiṇā ||
abhyudyatāni grāhyāṇi tvetānyapinikṛṣṭataḥ
||4||मधूदकं फलं मूलमेधांस्यभयदक्षिणा ॥
अभ्युद्यतानि ग्राह्याणि त्वेतान्यपिनिकृष्टतः
dāsa nāpita gopāla kulamitrārdhasīriṇaḥ ||
bhojyānnāḥ śūdravargemī tathātmavinivedakaḥ
||5||दास नापित गोपाल कुलमित्रार्धसीरिणः ॥
भोज्यान्नाः शूद्रवर्गेमी तथात्मविनिवेदकः
itthamānṛṇyamāsādya devarṣipitṛjādṛṇāt ||
mādhyasthyamāśrayedgehe sute viṣvagvisṛjya ca
||6||इत्थमानृण्यमासाद्य देवर्षिपितृजादृणात् ॥
माध्यस्थ्यमाश्रयेद्गेहे सुते विष्वग्विसृज्य च
gehepi jñānamabhyasyetkāśīṃ vātha samāśrayet ||
samyagjñānena vā muktiḥ kiṃvā viśveśaveśmani
||7||गेहेपि ज्ञानमभ्यस्येत्काशीं वाथ समाश्रयेत् ॥
सम्यग्ज्ञानेन वा मुक्तिः किंवा विश्वेशवेश्मनि
samyagjñānaṃ bhavetpuṃsāṃ kuta ekena janmanā ||
vārāṇasyāṃ dhruvā muktiḥ śarīratyāgamātrataḥ
||8||सम्यग्ज्ञानं भवेत्पुंसां कुत एकेन जन्मना ॥
वाराणस्यां ध्रुवा मुक्तिः शरीरत्यागमात्रतः
adya śvo vā paraśvo vā kālādvātha paraḥśatāt ||
satvaro gatvaro dehaḥ kāśyāṃ cedamṛtī bhavet
||9||अद्य श्वो वा परश्वो वा कालाद्वाथ परःशतात् ॥
सत्वरो गत्वरो देहः काश्यां चेदमृती भवेत्
sā ca vārāṇasī labhyā sadācāravatā sadā ||
manasāpi sadācāramato vidvānna laṃghayet
||110||सा च वाराणसी लभ्या सदाचारवता सदा ॥
मनसापि सदाचारमतो विद्वान्न लंघयेत्
ākarṇyeti tatogastyaḥ punaḥ prāha ṣaḍānanam ||
punaḥ kāśīṃ samācakṣva sadācāreṇa yāpyate
||11||आकर्ण्येति ततोगस्त्यः पुनः प्राह षडाननम् ॥
पुनः काशीं समाचक्ष्व सदाचारेण याप्यते
kāni kāni ca liṃgāni skaṃda jñānapradāni ca ||
vārāṇasyāṃ paribrūhi tāni me paripṛcchataḥ
||12||कानि कानि च लिंगानि स्कंद ज्ञानप्रदानि च ॥
वाराणस्यां परिब्रूहि तानि मे परिपृच्छतः
vinā kāśīṃ na me prītirvinākāśīṃ na me ratiḥ ||
citraputrakavaccāsmi vinā kāśī ṣaḍānana
||13||विना काशीं न मे प्रीतिर्विनाकाशीं न मे रतिः ॥
चित्रपुत्रकवच्चास्मि विना काशी षडानन
na nidrāmi na jāgarmi nāśnāmi na pibāmyapaḥ ||
kāśīṃ dvyakṣarapīyūṣaṃ pibāmi hi ca kevalam
||14||न निद्रामि न जागर्मि नाश्नामि न पिबाम्यपः ॥
काशीं द्व्यक्षरपीयूषं पिबामि हि च केवलम्
iti śrutvā vacaḥ skaṃdo maitrāvaruṇibhāṣitam ||
avimuktasya māhātmyaṃ vaktuṃ samupacakrame
||115||इति श्रुत्वा वचः स्कंदो मैत्रावरुणिभाषितम् ॥
अविमुक्तस्य माहात्म्यं वक्तुं समुपचक्रमे
iti śrī skāṃde mahāpurāṇa ekāśītisāhasryāṃ saṃhitāyāṃ kāśīkhaṃḍe pūrvārddhe sadācāravarṇanaṃ nāmāṣṭatriṃśo'dhyāyaḥ || 38 ||