śrutvoṃkārakathāmetāṃ mahāpātakanāśinīm
agastya uvāca
śrutvoṃkārakathāmetāṃ mahāpātakanāśinīm ||
na tṛptosmi viśākhātha brūhi traiviṣṭapīṃ kathām
||1||श्रुत्वोंकारकथामेतां महापातकनाशिनीम् ॥
न तृप्तोस्मि विशाखाथ ब्रूहि त्रैविष्टपीं कथाम्
kathaṃ ca kathitā devyai devadevena ṣaṇmukha ||
āvirbhūtirmahābuddhe puṇyā trailocanī parā
||2||कथं च कथिता देव्यै देवदेवेन षण्मुख ॥
आविर्भूतिर्महाबुद्धे पुण्या त्रैलोचनी परा
skaṃda uvāca
ākarṇaya mune vacmi kathāṃ śramanivāriṇīm ||
yathā devena kathitāṃ triviṣṭapasamudbhavām
||3||आकर्णय मुने वच्मि कथां श्रमनिवारिणीम् ॥
यथा देवेन कथितां त्रिविष्टपसमुद्भवाम्
virajākhyaṃ hi tatpīṭhaṃ tatra liṃgaṃ triviṣṭapam ||
tatpīṭhadarśanādeva virajā jāyate naraḥ
||4||विरजाख्यं हि तत्पीठं तत्र लिंगं त्रिविष्टपम् ॥
तत्पीठदर्शनादेव विरजा जायते नरः
tisrastu saṃgatāstatra srotasvinyo ghaṭodbhava ||
tisraḥ kalmaṣahāriṇyo dakṣiṇe hi trilocanāt
||5||तिस्रस्तु संगतास्तत्र स्रोतस्विन्यो घटोद्भव ॥
तिस्रः कल्मषहारिण्यो दक्षिणे हि त्रिलोचनात्
srotomūrtidharāḥ sākṣālliṃgasnapanahetave ||
sarasvatyatha kāliṃdī narmadā cātiśarmadā
||6||स्रोतोमूर्तिधराः साक्षाल्लिंगस्नपनहेतवे ॥
सरस्वत्यथ कालिंदी नर्मदा चातिशर्मदा
tisropi hi trisaṃdhyaṃ tāḥ saritaḥ kuṃbhapāṇayaḥ ||
snapayaṃti mahādhāma liṃgaṃ traiviṣṭapaṃ mahat
||7||तिस्रोपि हि त्रिसंध्यं ताः सरितः कुंभपाणयः ॥
स्नपयंति महाधाम लिंगं त्रैविष्टपं महत्
liṃgāni paritastābhiḥ svanāmnāsthāpi tānyapi ||
teṣāṃ saṃdarśanātpuṃsāṃ tāsāṃ snānaphalaṃ bhavet
||8||लिंगानि परितस्ताभिः स्वनाम्नास्थापि तान्यपि ॥
तेषां संदर्शनात्पुंसां तासां स्नानफलं भवेत्
sarasvatīśvaraṃ liṃgaṃ dakṣiṇena triviṣṭapāt ||
sārasvataṃ padaṃ dadyāddṛṣṭaṃ spṛṣṭaṃ ca jāḍyahṛt
||9||सरस्वतीश्वरं लिंगं दक्षिणेन त्रिविष्टपात् ॥
सारस्वतं पदं दद्याद्दृष्टं स्पृष्टं च जाड्यहृत्
yamuneśaṃ pratīcyāṃ ca narairbhaktyā samarcitam ||
api kilbiṣavadbhiśca yamalokanivāraṇam
||10||यमुनेशं प्रतीच्यां च नरैर्भक्त्या समर्चितम् ॥
अपि किल्बिषवद्भिश्च यमलोकनिवारणम्
dṛṣṭaṃ trilocanātprācyāṃ narmadeśaṃ suśarmadam ||
talliṃgārcanato nṛṇāṃ garbhavāso niṣidhyate
||11||दृष्टं त्रिलोचनात्प्राच्यां नर्मदेशं सुशर्मदम् ॥
तल्लिंगार्चनतो नृणां गर्भवासो निषिध्यते
snātvā pilipilā tīrthe triviṣṭapasamīpataḥ ||
dṛṣṭvā trilocanaṃ liṃgaṃ kiṃ bhūyaḥ pariśocati
||12||स्नात्वा पिलिपिला तीर्थे त्रिविष्टपसमीपतः ॥
दृष्ट्वा त्रिलोचनं लिंगं किं भूयः परिशोचति
triviṣṭapasya liṃgasya smaraṇādapi mānavaḥ ||
triviṣṭapa patirbhūyānnātra kāryā vicāraṇā
||13||त्रिविष्टपस्य लिंगस्य स्मरणादपि मानवः ॥
त्रिविष्टप पतिर्भूयान्नात्र कार्या विचारणा
triviṣṭapasya draṣṭāraḥ sraṣṭāraḥ syurna saṃśayaḥ ||
kṛtakṛtyāsta evātra ta evātra mahādhiyaḥ
||14||त्रिविष्टपस्य द्रष्टारः स्रष्टारः स्युर्न संशयः ॥
कृतकृत्यास्त एवात्र त एवात्र महाधियः
ānaṃdakānane liṃgaṃ praṇataṃ yaistriviṣṭapam ||
trilocanasya nāmāpi yaiḥ śrutaṃ śuddhabuddhibhiḥ
||15||आनंदकानने लिंगं प्रणतं यैस्त्रिविष्टपम् ॥
त्रिलोचनस्य नामापि यैः श्रुतं शुद्धबुद्धिभिः
saptajanmārjitātpāpātte pūtā nātra saṃśayaḥ ||
pṛthivyāṃ yāni liṃgāni teṣu dṛṣṭeṣu yatphalam
||16||सप्तजन्मार्जितात्पापात्ते पूता नात्र संशयः ॥
पृथिव्यां यानि लिंगानि तेषु दृष्टेषु यत्फलम्
tatsyātriviṣṭape dṛṣṭe kāśyāṃ manye tatodhikam ||
kāśyāṃ triviṣṭape dṛṣṭe dṛṣṭaṃ sarvaṃ triviṣṭapam
||17||तत्स्यात्रिविष्टपे दृष्टे काश्यां मन्ये ततोधिकम् ॥
काश्यां त्रिविष्टपे दृष्टे दृष्टं सर्वं त्रिविष्टपम्
kṣaṇānnirdhūta pāposau na punargarbhabhāgbhaveta ||
sa snātaḥ sarvatīrtheṣu sarvāvabhṛthavānsa ca
||18||क्षणान्निर्धूत पापोसौ न पुनर्गर्भभाग्भवेत ॥
स स्नातः सर्वतीर्थेषु सर्वावभृथवान्स च
yo vai pilipilā tīrthe snātvottaravahāṃbhasi ||
sarittrayaṃ mahāpuṇyaṃ yatra sākṣādvasetsadā
||19||यो वै पिलिपिला तीर्थे स्नात्वोत्तरवहांभसि ॥
सरित्त्रयं महापुण्यं यत्र साक्षाद्वसेत्सदा
tatra śrāddhādikaṃ kṛtvā gayāyāṃ kiṃ kariṣyati ||
snātvā pilipilā tīrthe kṛtvā vai piṃḍapātanam
||20||तत्र श्राद्धादिकं कृत्वा गयायां किं करिष्यति ॥
स्नात्वा पिलिपिला तीर्थे कृत्वा वै पिंडपातनम्
dṛṣṭvā triviṣṭapaṃ liṃgaṃ koṭitīrthaphalaṃ labhet ||
yadanyatrārjitaṃ pāpaṃ tatkāśī darśanādvrajet
||21||दृष्ट्वा त्रिविष्टपं लिंगं कोटितीर्थफलं लभेत् ॥
यदन्यत्रार्जितं पापं तत्काशी दर्शनाद्व्रजेत्
kāśyāṃ tu yatkṛtaṃ pāpaṃ tatpaiśācapadapradam ||
pramādātpātakaṃ kṛtvā śaṃbhorānaṃdakānane
||22||काश्यां तु यत्कृतं पापं तत्पैशाचपदप्रदम् ॥
प्रमादात्पातकं कृत्वा शंभोरानंदकानने
dṛṣṭvā triviṣṭapaṃ liṃgaṃ tatpāpamapi hāsyati ||
sarvasminnapi bhūpṛṣṭhe śreṣṭhamānaṃdakānanam
||23||दृष्ट्वा त्रिविष्टपं लिंगं तत्पापमपि हास्यति ॥
सर्वस्मिन्नपि भूपृष्ठे श्रेष्ठमानंदकाननम्
tatrāpi sarvatīrthāni tatopyoṃkārabhūmikā ||
oṃkārādapi salliṃgānmokṣavartma prakāśakāt
||24||तत्रापि सर्वतीर्थानि ततोप्योंकारभूमिका ॥
ओंकारादपि सल्लिंगान्मोक्षवर्त्म प्रकाशकात्
atiśreṣṭhataraṃ liṃgaṃ śreyorūpaṃ trilocanam
||25||अतिश्रेष्ठतरं लिंगं श्रेयोरूपं त्रिलोचनम्
tejasviṣu yathā bhānurdṛśyeṣu ca yathā śaśī ||
tathā liṃgeṣu sarveṣu paraṃ liṃgaṃ trilocanam
||26||तेजस्विषु यथा भानुर्दृश्येषु च यथा शशी ॥
तथा लिंगेषु सर्वेषु परं लिंगं त्रिलोचनम्
trilocanārcakānāṃ sā padavī na davīyasī ||
paraṃ nirvāṇapadmāyā mahāsaukhyaikaśevadheḥ
||27||त्रिलोचनार्चकानां सा पदवी न दवीयसी ॥
परं निर्वाणपद्माया महासौख्यैकशेवधेः
sakṛttrilocanārcāto yacchreyaḥ samupārjyate ||
na tadā janmasaṃpūṃjya liṃgānyanyāni labhyate
||28||सकृत्त्रिलोचनार्चातो यच्छ्रेयः समुपार्ज्यते ॥
न तदा जन्मसंपूंज्य लिंगान्यन्यानि लभ्यते
kāśyāṃ trilocanaṃ liṃgaṃ yercayaṃti mahādhiyaḥ ||
tercyāstribhuvanaukobhirmamaprītimabhīpsubhiḥ
||29||काश्यां त्रिलोचनं लिंगं येर्चयंति महाधियः ॥
तेर्च्यास्त्रिभुवनौकोभिर्ममप्रीतिमभीप्सुभिः
kṛtvāpi sarvasaṃnyāsaṃ kṛtvā pāśupatavratam ||
niyamebhyaḥ skhalitvāpi kuto bibhyati mānavāḥ
||30||कृत्वापि सर्वसंन्यासं कृत्वा पाशुपतव्रतम् ॥
नियमेभ्यः स्खलित्वापि कुतो बिभ्यति मानवाः
vidyamāne mahāliṃge mahāpāpaughahāriṇi ||
triviṣṭape puṇyarāśau mokṣanikṣepasadmani
||31||विद्यमाने महालिंगे महापापौघहारिणि ॥
त्रिविष्टपे पुण्यराशौ मोक्षनिक्षेपसद्मनि
samabhyarcya mahāliṃgaṃ sakṛdeva trilocanam ||
' mucyate kaluṣaiḥ sarvairapijanmaśatārjitaiḥ
||32||समभ्यर्च्य महालिंगं सकृदेव त्रिलोचनम् ॥
ऽ मुच्यते कलुषैः सर्वैरपिजन्मशतार्जितैः
brahmahāpi surāpo vā steyī vā gurutalpagaḥ ||
tatsaṃyogyapi vā varṣaṃ mahāpāpī prakīrtitaḥ
||33||ब्रह्महापि सुरापो वा स्तेयी वा गुरुतल्पगः ॥
तत्संयोग्यपि वा वर्षं महापापी प्रकीर्तितः
paradārarataścāpi parahiṃsā ratopi vā ||
parāpavādaśīlopi tathā visraṃbhaghātakaḥ ||
kṛtaghnopi bhrūṇahāpi vṛṣalīpatireva vā ||
mātāpitṛgurutyāgī vahnido garadopi vā
||35||परदाररतश्चापि परहिंसा रतोपि वा ॥
परापवादशीलोपि तथा विस्रंभघातकः ॥
कृतघ्नोपि भ्रूणहापि वृषलीपतिरेव वा ॥
मातापितृगुरुत्यागी वह्निदो गरदोपि वा
goghnaḥ strīghnopi śūdraghnaḥ kanyādūṣayitāpi ca ||
krūro vā piśuno vāpi nijadharmaparāṅmukhaḥ
||36||गोघ्नः स्त्रीघ्नोपि शूद्रघ्नः कन्यादूषयितापि च ॥
क्रूरो वा पिशुनो वापि निजधर्मपराङ्मुखः
niṃdako nāstiko vāpi kūṭasākṣyapravādakaḥ ||
abhakṣyabhakṣako vāpi tathā'vikreya vikrayī
||37||निंदको नास्तिको वापि कूटसाक्ष्यप्रवादकः ॥
अभक्ष्यभक्षको वापि तथाऽविक्रेय विक्रयी
ityādi pāpaśīlopi muktvaikaṃ śivaniṃdakama ||
pāpānniṣkṛtimāpnoti natvā liṃgaṃ trilocanam
||38||इत्यादि पापशीलोपि मुक्त्वैकं शिवनिंदकम ॥
पापान्निष्कृतिमाप्नोति नत्वा लिंगं त्रिलोचनम्
śivaniṃdārato mūḍhaḥ śivaśāstraviniṃdakaḥ ||
tasya no niṣkṛtirdṛṣṭā kvāpi śāstrepi kenacit
||39||शिवनिंदारतो मूढः शिवशास्त्रविनिंदकः ॥
तस्य नो निष्कृतिर्दृष्टा क्वापि शास्त्रेपि केनचित्
ātmaghātī sa vijñeyaḥ sadā trailokyaghātakaḥ ||
śivaniṃdāṃ vidhatte yaḥ sa nābhāṣyo'dhamādhamaḥ
||40||आत्मघाती स विज्ञेयः सदा त्रैलोक्यघातकः ॥
शिवनिंदां विधत्ते यः स नाभाष्योऽधमाधमः
śivaniṃdāratā ye ca śivabhaktajaneṣvapi ||
te yāṃti narake ghore yāvaccaṃdradivākarau
||41||शिवनिंदारता ये च शिवभक्तजनेष्वपि ॥
ते यांति नरके घोरे यावच्चंद्रदिवाकरौ
śaivāḥ pūjyāḥ prayatnena kāśyā mokṣamabhīpsubhiḥ ||
teṣvarciteṣvapi śivaḥ prīto bhavatyasaṃśayaḥ
||42||शैवाः पूज्याः प्रयत्नेन काश्या मोक्षमभीप्सुभिः ॥
तेष्वर्चितेष्वपि शिवः प्रीतो भवत्यसंशयः
sarveṣāmiha pāpānāṃ prāyaścittacikīrṣayā ||
niḥśaṃkaireva vaktavyaṃ pramāṇajñairidaṃ vacaḥ
||43||सर्वेषामिह पापानां प्रायश्चित्तचिकीर्षया ॥
निःशंकैरेव वक्तव्यं प्रमाणज्ञैरिदं वचः
puraścaraṇakāmaścedbhītosi yadi pāpataḥ ||
manyase yadi naḥ satyaṃ vākyaśāstrapramāṇataḥ
||44||पुरश्चरणकामश्चेद्भीतोसि यदि पापतः ॥
मन्यसे यदि नः सत्यं वाक्यशास्त्रप्रमाणतः
tataḥ sarvaṃ parityajya kṛtvā manasi niścayam ||
ānaṃdakānanaṃ yāhi yatra viśveśvaraḥ svayam
||45||ततः सर्वं परित्यज्य कृत्वा मनसि निश्चयम् ॥
आनंदकाननं याहि यत्र विश्वेश्वरः स्वयम्
yatra kṣetrapraviṣṭānāṃ narāṇāṃ niścitātmanām ||
na bādhate'ghanicayaḥ prāpyeta ca parovṛṣaḥ
||46||यत्र क्षेत्रप्रविष्टानां नराणां निश्चितात्मनाम् ॥
न बाधतेऽघनिचयः प्राप्येत च परोवृषः
tatrādyāpi mahātīrthaṃ trisrotasyatinirmale ||
puṇye pilipilānāmni trisaritparisevite
||47||तत्राद्यापि महातीर्थं त्रिस्रोतस्यतिनिर्मले ॥
पुण्ये पिलिपिलानाम्नि त्रिसरित्परिसेविते
trilocanākṣivikṣepa parikṣipta mahainasi ||
snātvā gṛhyoktavidhinā tarpaṇīyānpratarpya ca
||48||त्रिलोचनाक्षिविक्षेप परिक्षिप्त महैनसि ॥
स्नात्वा गृह्योक्तविधिना तर्पणीयान्प्रतर्प्य च
dattvā deyaṃ yathāśakti vittaśāṭhyavivarjitaḥ ||
dṛṣṭvā triviṣṭapaṃ liṃgaṃ samabhyarcyātibhaktitaḥ
||49||दत्त्वा देयं यथाशक्ति वित्तशाठ्यविवर्जितः ॥
दृष्ट्वा त्रिविष्टपं लिंगं समभ्यर्च्यातिभक्तितः
gaṃdhādyairvividhairmālyaiḥ paṃcāmṛtapuraḥsaraiḥ ||
dhūpairdīpaiḥ sanaivedyairvāsobhirbahubhūṣaṇaiḥ
||50||गंधाद्यैर्विविधैर्माल्यैः पंचामृतपुरःसरैः ॥
धूपैर्दीपैः सनैवेद्यैर्वासोभिर्बहुभूषणैः
pūjopakaraṇairdravyairghaṃṭādarpaṇacāmaraiḥ ||
citradhvajapatākābhirnṛtyavādyasugāyanaiḥ
||51||पूजोपकरणैर्द्रव्यैर्घंटादर्पणचामरैः ॥
चित्रध्वजपताकाभिर्नृत्यवाद्यसुगायनैः
japaiḥ pradakṣiṇābhiśca namaskārairmudāyutaiḥ ||
paricārakasaṃtoṣaiḥ kṛtveti paripūjanam
||52||जपैः प्रदक्षिणाभिश्च नमस्कारैर्मुदायुतैः ॥
परिचारकसंतोषैः कृत्वेति परिपूजनम्
brāhmaṇānvācayetpaścānniṣpāpohamiti bruvan ||
evaṃ kurvannaraḥ prājño nirenā jāyate kṣaṇāt
||53||ब्राह्मणान्वाचयेत्पश्चान्निष्पापोहमिति ब्रुवन् ॥
एवं कुर्वन्नरः प्राज्ञो निरेना जायते क्षणात्
tataḥ paṃcanade snātvā maṇikarṇī hrade tataḥ ||
tato viśveśamabhyarcya prāpnoti sukṛtaṃ mahat
||54||ततः पंचनदे स्नात्वा मणिकर्णी ह्रदे ततः ॥
ततो विश्वेशमभ्यर्च्य प्राप्नोति सुकृतं महत्
prāyaścittamidaṃ proktaṃ mahāpāpaviśodhanam ||
nāstike na pravaktavyaṃ kāśīmāhātmya niṃdake
||55||प्रायश्चित्तमिदं प्रोक्तं महापापविशोधनम् ॥
नास्तिके न प्रवक्तव्यं काशीमाहात्म्य निंदके
dadacca dravyalobhena prāyaścittamidaṃ śubham ||
dātā narakamāpnoti satyaṃsatyaṃ ghaṭodbhava
||55||ददच्च द्रव्यलोभेन प्रायश्चित्तमिदं शुभम् ॥
दाता नरकमाप्नोति सत्यंसत्यं घटोद्भव
kṣamāṃ pradakṣiṇīkṛnya yatphalaṃ samyagāpyate ||
pradoṣe tatphalaṃ kāśyāṃ saptakṛtvastrilocane
||57||क्षमां प्रदक्षिणीकृन्य यत्फलं सम्यगाप्यते ॥
प्रदोषे तत्फलं काश्यां सप्तकृत्वस्त्रिलोचने
bhujaṃgamekhalaṃ liṃgaṃ kāśyāṃ dṛṣṭvā triviṣṭapam ||
janmāṃtarepi muktaḥ syādanyatra maraṇe sati
||58||भुजंगमेखलं लिंगं काश्यां दृष्ट्वा त्रिविष्टपम् ॥
जन्मांतरेपि मुक्तः स्यादन्यत्र मरणे सति
anyatra sarvaliṃgeṣu puṇyakālo viśiṣyate ||
triviṣṭape puṇyakālaḥ sadā rātridivaṃ nṛṇām
||59||अन्यत्र सर्वलिंगेषु पुण्यकालो विशिष्यते ॥
त्रिविष्टपे पुण्यकालः सदा रात्रिदिवं नृणाम्
liṃgānyoṃkāramukhyāni sarvapāpaprakṛṃtyalam ||
paraṃ trailocanī śaktiḥ kācidanyaiva pārvati
||60||लिंगान्योंकारमुख्यानि सर्वपापप्रकृंत्यलम् ॥
परं त्रैलोचनी शक्तिः काचिदन्यैव पार्वति
yataḥ sarveṣu liṃgeṣu liṃgametadanuttamam ||
tatkāraṇaṃ śṛṇva parṇe karṇe kuru vadāmyaham
||61||यतः सर्वेषु लिंगेषु लिंगमेतदनुत्तमम् ॥
तत्कारणं शृण्व पर्णे कर्णे कुरु वदाम्यहम्
purā me yogayuktasya liṃgametadbhuvastalāt ||
udbhidya saptapātālaṃ niragātpurato mahat
||62||पुरा मे योगयुक्तस्य लिंगमेतद्भुवस्तलात् ॥
उद्भिद्य सप्तपातालं निरगात्पुरतो महत्
asmim̐llige purā gauri suguptaṃ tiṣṭhatā mayā ||
tubhyaṃ netratrayaṃ dattaṃ niraikṣiṣṭhāstathottamam
||63||अस्मिँल्लिगे पुरा गौरि सुगुप्तं तिष्ठता मया ॥
तुभ्यं नेत्रत्रयं दत्तं निरैक्षिष्ठास्तथोत्तमम्
tadā prabhṛti deveśi liṃgametattrilocanama ||
viṣṭapatritayāṃtasthairgīyate jñānadṛṣṭidam
||54||तदा प्रभृति देवेशि लिंगमेतत्त्रिलोचनम ॥
विष्टपत्रितयांतस्थैर्गीयते ज्ञानदृष्टिदम्
trilocanasya ye bhaktāstepi sarve trilocanāḥ ||
mama pāriṣadāste tu jīvanmuktā'sta eva hi
||65||त्रिलोचनस्य ये भक्तास्तेपि सर्वे त्रिलोचनाः ॥
मम पारिषदास्ते तु जीवन्मुक्ताऽस्त एव हि
trilocanasya liṃgasya mahimānaṃ na kaścana ||
samyagvetti maheśāni mayaiva parigopitam
||66||त्रिलोचनस्य लिंगस्य महिमानं न कश्चन ॥
सम्यग्वेत्ति महेशानि मयैव परिगोपितम्
śuklarādhatṛtīyāyāṃ snātvā pailipile hrade ||
upoṣaṇaparā bhaktyā rātrau jāgaraṇānvitāḥ
||67||शुक्लराधतृतीयायां स्नात्वा पैलिपिले ह्रदे ॥
उपोषणपरा भक्त्या रात्रौ जागरणान्विताः
trilocanaṃ pūjayitvā prātaḥ snātvāpi tatra vai ||
punarliṃgaṃ samabhyarcya dattvā dharmaghaṭānapi
||68||त्रिलोचनं पूजयित्वा प्रातः स्नात्वापि तत्र वै ॥
पुनर्लिंगं समभ्यर्च्य दत्त्वा धर्मघटानपि
sānnānsadakṣiṇāndevi pitṝnuddiśya harṣitāḥ ||
vidhāya pāraṇaṃ paścācchivabhaktajanaiḥ saha
||69||सान्नान्सदक्षिणान्देवि पितॄनुद्दिश्य हर्षिताः ॥
विधाय पारणं पश्चाच्छिवभक्तजनैः सह
visṛjya pārthivaṃ dehaṃ tena puṇyena noditāḥ ||
bhavaṃti devi niyataṃ gaṇā mama purogamāḥ
||70||विसृज्य पार्थिवं देहं तेन पुण्येन नोदिताः ॥
भवंति देवि नियतं गणा मम पुरोगमाः
tāvaddhamaṃti saṃsāre devā martyā mahoragāḥ ||
gauri yāvanna paśyaṃti kāśyāṃ liṃgaṃ trilocanam
||71||तावद्धमंति संसारे देवा मर्त्या महोरगाः ॥
गौरि यावन्न पश्यंति काश्यां लिंगं त्रिलोचनम्
sakṛttriviṣṭapaṃ dṛṣṭvā snātvā pailipile hrade ||
na jātuḥ mātustanapo jāyate jaṃturatra hi
||72||सकृत्त्रिविष्टपं दृष्ट्वा स्नात्वा पैलिपिले ह्रदे ॥
न जातुः मातुस्तनपो जायते जंतुरत्र हि
pratimāsaṃ sadāṣṭamyāṃ caturdaśyāṃ ca bhāmini ||
āyāṃti sarvatīrthāni draṣṭuṃ devaṃ triviṣṭapam
||73||प्रतिमासं सदाष्टम्यां चतुर्दश्यां च भामिनि ॥
आयांति सर्वतीर्थानि द्रष्टुं देवं त्रिविष्टपम्
triviṣṭapāddakṣiṇataḥ snātaḥ pailipileṃ'bhasi ||
tatra saṃdhyāmupāsyaikāṃ rājasūyaphalaṃ labhet
||74||त्रिविष्टपाद्दक्षिणतः स्नातः पैलिपिलेंऽभसि ॥
तत्र संध्यामुपास्यैकां राजसूयफलं लभेत्
pādodakākhyastatraiva kūpaḥ pāpavināśakaḥ ||
prāśya tasyodakaṃ martyo na martyo jāyate punaḥ
||75||पादोदकाख्यस्तत्रैव कूपः पापविनाशकः ॥
प्राश्य तस्योदकं मर्त्यो न मर्त्यो जायते पुनः
tasya liṃgasya pārśve tu saṃti liṃgānyanekaśaḥ ||
kaivalyadāni tānyatra darśanātsparśanādapi
||76||तस्य लिंगस्य पार्श्वे तु संति लिंगान्यनेकशः ॥
कैवल्यदानि तान्यत्र दर्शनात्स्पर्शनादपि
tatra śāṃtanavaṃ liṃgaṃ gaṃgātīre pratiṣṭhitam ||
taddṛṣṭvā śāṃtimāpnoti naraḥ saṃsāratāpitaḥ
||77||तत्र शांतनवं लिंगं गंगातीरे प्रतिष्ठितम् ॥
तद्दृष्ट्वा शांतिमाप्नोति नरः संसारतापितः
taddakṣiṇe mahāliṃgaṃ mune bhīṣmeśa saṃjñitam ||
kaliḥ kālaśca kāmaśca bādhaṃte na tadīkṣaṇāt
||78||तद्दक्षिणे महालिंगं मुने भीष्मेश संज्ञितम् ॥
कलिः कालश्च कामश्च बाधंते न तदीक्षणात्
tatpratīcyāṃ mahāliṃgaṃ droṇeśa iti kīrtitam ||
yalliṃgapūjanāddroṇo jyotīrūpaṃ punardadhau
||79||तत्प्रतीच्यां महालिंगं द्रोणेश इति कीर्तितम् ॥
यल्लिंगपूजनाद्द्रोणो ज्योतीरूपं पुनर्दधौ
aśvatthāmeśvaraṃ liṃgaṃ tadagre cātipuṇyadam ||
yadarcanavaśāddrauṇirna bibhetyapi kālataḥ
||80||अश्वत्थामेश्वरं लिंगं तदग्रे चातिपुण्यदम् ॥
यदर्चनवशाद्द्रौणिर्न बिभेत्यपि कालतः
droṇeśādvāyu digbhāge vālakhilyeśvaraṃ param ||
talliṃgaṃ śraddhayā dṛṣṭvā sarvakratuphalaṃ labhet
||81||द्रोणेशाद्वायु दिग्भागे वालखिल्येश्वरं परम् ॥
तल्लिंगं श्रद्धया दृष्ट्वा सर्वक्रतुफलं लभेत्
tadvāme liṃgamālokya vālmīkeśvarasaṃjñitam ||
tasya saṃdarśanādeva viśoko jāyate naraḥ
||82||तद्वामे लिंगमालोक्य वाल्मीकेश्वरसंज्ञितम् ॥
तस्य संदर्शनादेव विशोको जायते नरः
anyaccātraiva yadvṛttaṃ tadbravīmi ghaṭodbhava ||
triviṣṭapasya māhātmyaṃ devyai devena bhāṣitam
||83||अन्यच्चात्रैव यद्वृत्तं तद्ब्रवीमि घटोद्भव ॥
त्रिविष्टपस्य माहात्म्यं देव्यै देवेन भाषितम्
iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe paṃcasaptatitamo'dhyāyaḥ || 75 ||