kā imā rūpalāvaṇya saubhāgyanidhayaḥ striyaḥ
śivaśarmovāca
kā imā rūpalāvaṇya saubhāgyanidhayaḥ striyaḥ ||
divyālaṃkāradhāriṇyo divyabhogasamanvitāḥ
||1||का इमा रूपलावण्य सौभाग्यनिधयः स्त्रियः ॥
दिव्यालंकारधारिण्यो दिव्यभोगसमन्विताः
gaṇāvūcatuḥ
etā vāravilāsinyo yajñabhājāṃ priyaṃkarāḥ ||
gītajñā nṛtyakuśalā vādyavidyā vicakṣaṇāḥ
||2||एता वारविलासिन्यो यज्ञभाजां प्रियंकराः ॥
गीतज्ञा नृत्यकुशला वाद्यविद्या विचक्षणाः
kāmakelikalābhijñā dyūtavidyāviśāradāḥ ||
rasajñā bhāvavedinyaścaturāścocitoktiṣu
||3||कामकेलिकलाभिज्ञा द्यूतविद्याविशारदाः ॥
रसज्ञा भाववेदिन्यश्चतुराश्चोचितोक्तिषु
nānādeśa viśeṣajñā nānābhāṣā sukovidāḥ ||
saṃketodaṃtanipuṇā naikāsvairacarā mudā
||4||नानादेश विशेषज्ञा नानाभाषा सुकोविदाः ॥
संकेतोदंतनिपुणा नैकास्वैरचरा मुदा
līlānarmasusābhijñāḥ supralāpeṣu paṃḍitāḥ ||
yūnāṃ manāṃsi satataṃ svairhāvai ramayaṃtyamūḥ
||5||लीलानर्मसुसाभिज्ञाः सुप्रलापेषु पंडिताः ॥
यूनां मनांसि सततं स्वैर्हावै रमयंत्यमूः
nirmathyamānātkṣīrodātpūrvamapsarasastvamūḥ ||
niḥsṛtāstrijagajjeturmohanāstramanobhuvaḥ
||6||निर्मथ्यमानात्क्षीरोदात्पूर्वमप्सरसस्त्वमूः ॥
निःसृतास्त्रिजगज्जेतुर्मोहनास्त्रमनोभुवः
urvaśī menakā raṃbhā caṃdralekhā tilottamā ||
vapuṣmatīkāṃtimatī līlāvatyutpalāvatī
||7||उर्वशी मेनका रंभा चंद्रलेखा तिलोत्तमा ॥
वपुष्मतीकांतिमती लीलावत्युत्पलावती
alaṃbuṣā guṇavatī sthūlakeśī kalāvatī ||
kalānidhirguṇanidhiḥ karpūratilakorvarā
||8||अलंबुषा गुणवती स्थूलकेशी कलावती ॥
कलानिधिर्गुणनिधिः कर्पूरतिलकोर्वरा
anaṃgalatikā cāpi tathā madanamohinī ||
cakorākṣī caṃdrakalā tathā munimanoharā
||9||अनंगलतिका चापि तथा मदनमोहिनी ॥
चकोराक्षी चंद्रकला तथा मुनिमनोहरा
grāvadrāvā tapodveṣṭī cārunāsā sukarṇikā ||
dārusaṃjīvinī suśrīḥ kratuśulkā śubhānanā
||10||ग्रावद्रावा तपोद्वेष्टी चारुनासा सुकर्णिका ॥
दारुसंजीविनी सुश्रीः क्रतुशुल्का शुभानना
tapaḥśulkā tīrthaśulkā dānaśulkā himāvatī ||
paṃcāśvamedhikā caiva rājasūyārthinī tathā
||11||तपःशुल्का तीर्थशुल्का दानशुल्का हिमावती ॥
पंचाश्वमेधिका चैव राजसूयार्थिनी तथा
aṣṭāgnihomikā tadvadvājapeyaśatodbhavā ||
ityādyapsarasāṃ śreṣṭhaṃ sahasraṃ ṣaṣṭisaṃmitam
||12||अष्टाग्निहोमिका तद्वद्वाजपेयशतोद्भवा ॥
इत्याद्यप्सरसां श्रेष्ठं सहस्रं षष्टिसंमितम्
etasminnapsaroloke vasaṃtyanyā apistriyaḥ ||
sadā skhalitalāvaṇyāḥ sadāskhalitayauvanāḥ
||13||एतस्मिन्नप्सरोलोके वसंत्यन्या अपिस्त्रियः ॥
सदा स्खलितलावण्याः सदास्खलितयौवनाः
divyāṃbarā divyamālyā divyagaṃdhānulepanāḥ ||
divyabhogaiḥ susaṃpannāḥ svecchāvidhṛtavigrahāḥ
||14||दिव्यांबरा दिव्यमाल्या दिव्यगंधानुलेपनाः ॥
दिव्यभोगैः सुसंपन्नाः स्वेच्छाविधृतविग्रहाः
kṛtvā māsopavāsāni skhalaṃti brahmacaryataḥ ||
sakṛdeva dvikṛtvo vā triḥkṛtvo daivayogataḥ
||15||कृत्वा मासोपवासानि स्खलंति ब्रह्मचर्यतः ॥
सकृदेव द्विकृत्वो वा त्रिःकृत्वो दैवयोगतः
tā imā divyabhoginyo rūpalāvaṇyasaṃpadaḥ ||
nivasaṃtyapsaroloke sarvakāmasamanvitāḥ
||16||ता इमा दिव्यभोगिन्यो रूपलावण्यसंपदः ॥
निवसंत्यप्सरोलोके सर्वकामसमन्विताः
kṛtvā vratāni sāṃgāni kāmikāni vidhānataḥ ||
bhavaṃti svairacāriṇyo devabhogyā ihāgatāḥ
||17||कृत्वा व्रतानि सांगानि कामिकानि विधानतः ॥
भवंति स्वैरचारिण्यो देवभोग्या इहागताः
pativratadhṛtā nāryo balena balinā dhṛtāḥ ||
bhartabuddhyāramaṃtetaṃ(?) kadācittā imā dvija
||18||पतिव्रतधृता नार्यो बलेन बलिना धृताः ॥
भर्तबुद्ध्यारमंतेतं(?) कदाचित्ता इमा द्विज
bhartari proṣite yāśca brahmacaryavratāḥ sadā ||
viplavaṃ te sakṛddaivāttā etā vāmalocanāḥ
||19||भर्तरि प्रोषिते याश्च ब्रह्मचर्यव्रताः सदा ॥
विप्लवं ते सकृद्दैवात्ता एता वामलोचनाः
kusumāni sugaṃdhīni suvāsaṃ caṃdanaṃ tathā ||
sugauraṃ cāpi karpūraṃ susūkṣmāṇyaṃbarāṇi ca
||20||कुसुमानि सुगंधीनि सुवासं चंदनं तथा ॥
सुगौरं चापि कर्पूरं सुसूक्ष्माण्यंबराणि च
parṇāni ṛjutārāṇi jīrṇāni kaṭhināni ca ||
sāgrāṇi svarṇavarṇāni sthūlanīlaśirāṇi ca
||21||पर्णानि ऋजुताराणि जीर्णानि कठिनानि च ॥
साग्राणि स्वर्णवर्णानि स्थूलनीलशिराणि च
suvāsopaskarāḍhyāni nāgavallyā dvijottama ||
śayyāvicitrābharaṇā ratiśālocitāni ca
||22||सुवासोपस्कराढ्यानि नागवल्ल्या द्विजोत्तम ॥
शय्याविचित्राभरणा रतिशालोचितानि च
bahukautukavastūni samarcyadvijadaṃpatī ||
bhogadānamidaṃ kāmyaṃ pratisaṃkramaṇaṃ raveḥ
||23||बहुकौतुकवस्तूनि समर्च्यद्विजदंपती ॥
भोगदानमिदं काम्यं प्रतिसंक्रमणं रवेः
kiṃvā prativyatīpātamekasaṃvatsarāvadhi ||
kodāditi ca maṃtreṇa yā dadyādvaravarṇinī
||24||किंवा प्रतिव्यतीपातमेकसंवत्सरावधि ॥
कोदादिति च मंत्रेण या दद्याद्वरवर्णिनी
kāmarūpadharo devaḥ prīyatāmiti vādinī ||
sā śreṣṭhā'psarasāṃ madhye vasetkalpamihāṃganā
||25||कामरूपधरो देवः प्रीयतामिति वादिनी ॥
सा श्रेष्ठाऽप्सरसां मध्ये वसेत्कल्पमिहांगना
kanyārūpadharākācidyābhuktā kenacitkvacit ||
devarūpeṇa taṃ kālamārabhya brahmacāriṇī
||26||कन्यारूपधराकाचिद्याभुक्ता केनचित्क्वचित् ॥
देवरूपेण तं कालमारभ्य ब्रह्मचारिणी
tadeva vṛttaṃ dhyāyaṃtī nidhanaṃ yāti kālataḥ ||
divyarūpadharā seha jāyate divya bhogabhāk
||27||तदेव वृत्तं ध्यायंती निधनं याति कालतः ॥
दिव्यरूपधरा सेह जायते दिव्य भोगभाक्
nidānamapsarolokasyetiśṛṇvandvijāgraṇīḥ ||
sauraṃ lokamatha prāpya kṣaṇena sa vimānagaḥ
||28||निदानमप्सरोलोकस्येतिशृण्वन्द्विजाग्रणीः ॥
सौरं लोकमथ प्राप्य क्षणेन स विमानगः
yathā kadaṃbakusumaṃ kiṃjalkaiḥ sarvatovṛtam ||
dedīpyamānaṃ hi tathā samaṃtādbhānubhānubhiḥ
||29||यथा कदंबकुसुमं किंजल्कैः सर्वतोवृतम् ॥
देदीप्यमानं हि तथा समंताद्भानुभानुभिः
dūrādraviṃ sa vijñāya dhṛtatāmarasadvayam ||
navabhiryojanānāṃ ca sahasraiḥ saṃmitena ha
||30||दूराद्रविं स विज्ञाय धृततामरसद्वयम् ॥
नवभिर्योजनानां च सहस्रैः संमितेन ह
vicitreṇaikacakreṇa saptasaptiyutena ca ||
anūruṇādhiṣṭhitena puratodhṛtaraśminā
||31||विचित्रेणैकचक्रेण सप्तसप्तियुतेन च ॥
अनूरुणाधिष्ठितेन पुरतोधृतरश्मिना
apsaromunigaṃdharva sarpagrāmaṇi nairṛtaiḥ ||
syaṃdanenātijavinā praṇanāma kṛtāṃjaliḥ
||32||अप्सरोमुनिगंधर्व सर्पग्रामणि नैर्ऋतैः ॥
स्यंदनेनातिजविना प्रणनाम कृतांजलिः
tasya praṇāmaṃdevopi bhrūbhaṃgenānumanya ca ||
atidūraṃ nabhovartma vyaticakrāma sakṣaṇāt
||33||तस्य प्रणामंदेवोपि भ्रूभंगेनानुमन्य च ॥
अतिदूरं नभोवर्त्म व्यतिचक्राम सक्षणात्
prakrāṃte dyumaṇau dūraṃ śivaśarmātiśarmavān ||
provāca bhagavadbhaktau kathaṃ labhyaṃ raveḥ padam
||34||प्रक्रांते द्युमणौ दूरं शिवशर्मातिशर्मवान् ॥
प्रोवाच भगवद्भक्तौ कथं लभ्यं रवेः पदम्
etadicchāmyahaṃ śrotumācakṣāthāṃ mamāgrataḥ ||
satāṃ sāptapadī maitrī tanme maitryā praṇoditau
||35||एतदिच्छाम्यहं श्रोतुमाचक्षाथां ममाग्रतः ॥
सतां साप्तपदी मैत्री तन्मे मैत्र्या प्रणोदितौ
gaṇāvūcatuḥ
śṛṇu dvija mahāprājña tvayyakathyaṃ na kiṃcana ||
satsaṃgādeva sādhūnāṃ satkathā saṃpravartate
||36||शृणु द्विज महाप्राज्ञ त्वय्यकथ्यं न किंचन ॥
सत्संगादेव साधूनां सत्कथा संप्रवर्तते
niyaṃtā sarvabhūtānāṃ ya ekaḥkāraṇaṃ param ||
anāmā gotrarahito rūpādi parivarjitaḥ
||37||नियंता सर्वभूतानां य एकःकारणं परम् ॥
अनामा गोत्ररहितो रूपादि परिवर्जितः
āvirbhāva tirobhāvau yadbhūnartanavartinau ||
sa eva vakti satataṃ sarvātmā vedapūruṣaḥ
||38||आविर्भाव तिरोभावौ यद्भूनर्तनवर्तिनौ ॥
स एव वक्ति सततं सर्वात्मा वेदपूरुषः
yosāvādityapuruṣaḥ sosāvahamiti sphuṭam ||
aṃdhatamaḥ praviśaṃti ye caivānyamupāsate
||39||योसावादित्यपुरुषः सोसावहमिति स्फुटम् ॥
अंधतमः प्रविशंति ये चैवान्यमुपासते
niścitārthāṃ śrutimimāṃ brāhmaṇāso dvijottama ||
tamekamupatiṣṭhaṃte niścityeti punaḥpunaḥ
||40||निश्चितार्थां श्रुतिमिमां ब्राह्मणासो द्विजोत्तम ॥
तमेकमुपतिष्ठंते निश्चित्येति पुनःपुनः
upalabhya ca sāvitrīṃ nopatiṣṭheta yaḥ parām ||
kāle trikālaṃ saptāhātsa patennātra saṃśayaḥ
||41||उपलभ्य च सावित्रीं नोपतिष्ठेत यः पराम् ॥
काले त्रिकालं सप्ताहात्स पतेन्नात्र संशयः
tāvatprātarjapaṃstiṣṭhedyāvadardhodayo raveḥ ||
āsanastho japenmaunī pratyagātārakodayāt
||42||तावत्प्रातर्जपंस्तिष्ठेद्यावदर्धोदयो रवेः ॥
आसनस्थो जपेन्मौनी प्रत्यगातारकोदयात्
sādityāṃ madhyamāṃ saṃdhyāṃ japedādityasaṃmukhaḥ ||
kālalopo na kartavyastataḥ kālaṃ pratīkṣayet
||43||सादित्यां मध्यमां संध्यां जपेदादित्यसंमुखः ॥
काललोपो न कर्तव्यस्ततः कालं प्रतीक्षयेत्
kāle phalaṃtyoṣadhayaḥ kāle puṣpaṃti pādapāḥ ||
varṣaṃti toyadāḥ kāle tasmātkālaṃ na laṃghayet
||44||काले फलंत्योषधयः काले पुष्पंति पादपाः ॥
वर्षंति तोयदाः काले तस्मात्कालं न लंघयेत्
maṃdehadehanāśārthamudayāstamaye raviḥ ||
samīhate dvijotsṛṣṭaṃ maṃtratoyāṃjalitrayam
||45||मंदेहदेहनाशार्थमुदयास्तमये रविः ॥
समीहते द्विजोत्सृष्टं मंत्रतोयांजलित्रयम्
gāyatrīmaṃtratoyāḍhyaṃ dattaṃ yenāṃjalitrayam ||
kāle savitre kiṃ na syāttena dattaṃ jagattrayam
||46||गायत्रीमंत्रतोयाढ्यं दत्तं येनांजलित्रयम् ॥
काले सवित्रे किं न स्यात्तेन दत्तं जगत्त्रयम्
kiṃ kiṃ na savitā sūte kāle samyagupāsitaḥ ||
āyurārogyamaiśvaryaṃ vasūni sapaśūni ca
||47||किं किं न सविता सूते काले सम्यगुपासितः ॥
आयुरारोग्यमैश्वर्यं वसूनि सपशूनि च
mitraputra kalatrāṇi kṣetrāṇi vividhāni ca ||
bhogānaṣṭavidhāṃścāpi svargaṃ cāpyapavargakam
||48||मित्रपुत्र कलत्राणि क्षेत्राणि विविधानि च ॥
भोगानष्टविधांश्चापि स्वर्गं चाप्यपवर्गकम्
aṣṭādaśa suvidyāsu mīmāṃsātigarīyasī ||
tatopi tarkaśāstrāṇi purāṇaṃ tebhya eva ca
||49||अष्टादश सुविद्यासु मीमांसातिगरीयसी ॥
ततोपि तर्कशास्त्राणि पुराणं तेभ्य एव च
tatopi dharmaśāstrāṇi tebhyo gurvī śrutirdvija ||
tatopyupaniṣacchreṣṭhā gāyatrī ca tatodhikā
||50||ततोपि धर्मशास्त्राणि तेभ्यो गुर्वी श्रुतिर्द्विज ॥
ततोप्युपनिषच्छ्रेष्ठा गायत्री च ततोधिका
durlabhā sarvamaṃtreṣu gāyatrī praṇavānvitā ||
na gāyatryādhikaṃ kiṃcittrayīṣu parigīyate
||51||दुर्लभा सर्वमंत्रेषु गायत्री प्रणवान्विता ॥
न गायत्र्याधिकं किंचित्त्रयीषु परिगीयते
na gāyatrī samo maṃtro na kāśī sadṛśī purī ||
na viśveśa samaṃ liṃgaṃ satyaṃsatyaṃ punaḥpunaḥ
||52||न गायत्री समो मंत्रो न काशी सदृशी पुरी ॥
न विश्वेश समं लिंगं सत्यंसत्यं पुनःपुनः
gāyatrī vedajananī gāyatrī brāhmaṇaprasūḥ ||
gātāraṃ trāyate yasmādgāyatrī tena gīyate
||53||गायत्री वेदजननी गायत्री ब्राह्मणप्रसूः ॥
गातारं त्रायते यस्माद्गायत्री तेन गीयते
vācyavācakasaṃbaṃdho gāyatryāḥ saviturdvayoḥ ||
vācyosau savitā sākṣādgāyatrīvācikāparā
||54||वाच्यवाचकसंबंधो गायत्र्याः सवितुर्द्वयोः ॥
वाच्योसौ सविता साक्षाद्गायत्रीवाचिकापरा
prabhāveṇaiva gāyatryāḥ kṣatriyaḥ kauśiko vaśī ||
rājarṣitvaṃ parityajya brahmarṣipadamīyivān
||55||प्रभावेणैव गायत्र्याः क्षत्रियः कौशिको वशी ॥
राजर्षित्वं परित्यज्य ब्रह्मर्षिपदमीयिवान्
sāmarthyaṃ prāpa cātyuccairanyadbhuvanasarjane ||
kiṃ kiṃ na dadyādgāyatrī samyagevamupāsitā
||56||सामर्थ्यं प्राप चात्युच्चैरन्यद्भुवनसर्जने ॥
किं किं न दद्याद्गायत्री सम्यगेवमुपासिता
na brāhmaṇo vedapāṭhānna śāstrapaṭhanādapi ||
devyāstrikālamabhyāsādbāhmaṇaḥ syāddhi nānyathā
||57||न ब्राह्मणो वेदपाठान्न शास्त्रपठनादपि ॥
देव्यास्त्रिकालमभ्यासाद्बाह्मणः स्याद्धि नान्यथा
gāyatryeva paraṃ viṣṇurgāyatryeva paraḥśivaḥ ||
gāyatryeva parobrahmā gāyatryeva trayī tataḥ
||58||गायत्र्येव परं विष्णुर्गायत्र्येव परःशिवः ॥
गायत्र्येव परोब्रह्मा गायत्र्येव त्रयी ततः
devatrayaṃ sa bhagavānaṃśumālī divākaraḥ ||
sarveṣāṃ mahasāṃ rāśiḥ kālakālapravartakaḥ
||59||देवत्रयं स भगवानंशुमाली दिवाकरः ॥
सर्वेषां महसां राशिः कालकालप्रवर्तकः
arkamuddiśya satatamasmallokanivāsinaḥ ||
śrutiṃ hyudāharaṃtīmāṃ sārāsāravivekinaḥ
||60||अर्कमुद्दिश्य सततमस्मल्लोकनिवासिनः ॥
श्रुतिं ह्युदाहरंतीमां सारासारविवेकिनः
eṣo ha devaḥ pradiśonu sarvāḥ pūrvo ha jātaḥ sa u garbhe aṃtaḥ ||
sa eva jātaḥ sa janiṣyamāṇaḥ pratyaṅjānāstiṣṭhati sarvatomukhaḥ
||61||एषो ह देवः प्रदिशोनु सर्वाः पूर्वो ह जातः स उ गर्भे अंतः ॥
स एव जातः स जनिष्यमाणः प्रत्यङ्जानास्तिष्ठति सर्वतोमुखः
sadaivamupatiṣṭheransaurasūktairataṃdritāḥ ||
ye namaṃtyatra te viprā viprā bhāskarasannibhāḥ
||62||सदैवमुपतिष्ठेरन्सौरसूक्तैरतंद्रिताः ॥
ये नमंत्यत्र ते विप्रा विप्रा भास्करसन्निभाः
puṣyārkepyatha hastārke mūlārkepyathavā dvija ||
uttarārke'tha yatkāryaṃ tatphalatyeva nānyathā
||63||पुष्यार्केप्यथ हस्तार्के मूलार्केप्यथवा द्विज ॥
उत्तरार्केऽथ यत्कार्यं तत्फलत्येव नान्यथा
pauṣe māsyarkadivase yaḥ snātvā bhāskarodaye ||
dānahomaṃjapaṃkuryādarcāmarkasya suvrata
||64||पौषे मास्यर्कदिवसे यः स्नात्वा भास्करोदये ॥
दानहोमंजपंकुर्यादर्चामर्कस्य सुव्रत
śraddhāvānekabhaktaśca kāmakrodhavivarjitaḥ ||
sahāpsarobhirdyutimānsa vasedatra bhogavān
||65||श्रद्धावानेकभक्तश्च कामक्रोधविवर्जितः ॥
सहाप्सरोभिर्द्युतिमान्स वसेदत्र भोगवान्
ayane viṣuve cāpi ṣaḍaśītimukheṣu vā ||
viṣṇupadyāṃ ca ye dadyurmahādānāni suvratāḥ
||66||अयने विषुवे चापि षडशीतिमुखेषु वा ॥
विष्णुपद्यां च ये दद्युर्महादानानि सुव्रताः
tilāñjuhvati sājyāṃśca brāhmaṇānbhojayaṃti ca ||
pitṝnuddiśya ca śrāddhaṃ ye kurvaṃti vipaścitaḥ
||67||तिलाञ्जुह्वति साज्यांश्च ब्राह्मणान्भोजयंति च ॥
पितॄनुद्दिश्य च श्राद्धं ये कुर्वंति विपश्चितः
mahāpūjāṃ ca ye kuryurmahāmaṃtrāñjapaṃti ca ||
te'tra vaikartane loke vikartanasamaprabhā
||68||महापूजां च ये कुर्युर्महामंत्राञ्जपंति च ॥
तेऽत्र वैकर्तने लोके विकर्तनसमप्रभा
na daridrā na ca duḥkhārtā na vyādhi paripīḍitāḥ ||
saṃkrameṣvarkabhaktā ye na virūpā na durbhagāḥ
||69||न दरिद्रा न च दुःखार्ता न व्याधि परिपीडिताः ॥
संक्रमेष्वर्कभक्ता ये न विरूपा न दुर्भगाः
saṃkrameṣu na yairdattaṃ na snātaṃ tīrthavāriṣu ||
viśeṣahomo na kṛtaḥ kapilājyāplutaistilaiḥ
||70||संक्रमेषु न यैर्दत्तं न स्नातं तीर्थवारिषु ॥
विशेषहोमो न कृतः कपिलाज्याप्लुतैस्तिलैः
te dṛśyaṃte pratidvāraṃ vihīna nayanānanāḥ ||
dehidehīti jalpaṃto dehinaḥ sapaṭaccarāḥ
||71||ते दृश्यंते प्रतिद्वारं विहीन नयनाननाः ॥
देहिदेहीति जल्पंतो देहिनः सपटच्चराः
samaṃ kṛṣṇalakenāpi yo dadyātkāṃcanaṃ kṛtī ||
sūryagrahe kurukṣetre sa vasedatra puṇyabhāk
||72||समं कृष्णलकेनापि यो दद्यात्कांचनं कृती ॥
सूर्यग्रहे कुरुक्षेत्रे स वसेदत्र पुण्यभाक्
sarvaṃ gaṃgāsamaṃ toyaṃ sarve brahmasamā dvijāḥ ||
sarvaṃ deyaṃ svarṇasamaṃ rāhugraste divākare
||73||सर्वं गंगासमं तोयं सर्वे ब्रह्मसमा द्विजाः ॥
सर्वं देयं स्वर्णसमं राहुग्रस्ते दिवाकरे
dattaṃ japtaṃ hutaṃ snātaṃ yatkiṃcitsadanuṣṭhitam ||
bhānūparāge śrāddhādi taddheturbradhna saṃnidhe
||74||दत्तं जप्तं हुतं स्नातं यत्किंचित्सदनुष्ठितम् ॥
भानूपरागे श्राद्धादि तद्धेतुर्ब्रध्न संनिधे
ravivāre saṃkramaśceduparāgo'thavābhavet ||
tadā yadarjitaṃ puṇyaṃ tadihākṣayamāpyate
||75||रविवारे संक्रमश्चेदुपरागोऽथवाभवेत् ॥
तदा यदर्जितं पुण्यं तदिहाक्षयमाप्यते
bhānuvāro yadā ṣaṣṭhyāṃ saptamyāmatha jāyate ||
tadā yatsukṛtaṃ karma kṛtaṃ tadiha bhujyate
||76||भानुवारो यदा षष्ठ्यां सप्तम्यामथ जायते ॥
तदा यत्सुकृतं कर्म कृतं तदिह भुज्यते
haṃso bhānuḥ sahasrāṃśustapanastāpano ravi ||
vikartano vivasvāṃśca viśvakarmā vibhāvasuḥ
||77||हंसो भानुः सहस्रांशुस्तपनस्तापनो रवि ॥
विकर्तनो विवस्वांश्च विश्वकर्मा विभावसुः
viśvarūpo viśvakartā mārtaṃḍo mihiroṃ'śumān ||
ādityaścoṣṇaguḥ sūryo'ryamā bradhno divākaraḥ
||78||विश्वरूपो विश्वकर्ता मार्तंडो मिहिरोंऽशुमान् ॥
आदित्यश्चोष्णगुः सूर्योऽर्यमा ब्रध्नो दिवाकरः
dvādaśātmā saptahayo bhāskaro haskaraḥ khagaḥ ||
suraḥ prabhākaraḥ śrīmām̐llokacakṣurgraheśvaraḥ
||79||द्वादशात्मा सप्तहयो भास्करो हस्करः खगः ॥
सुरः प्रभाकरः श्रीमाँल्लोकचक्षुर्ग्रहेश्वरः
trilokeśo lokasākṣītamoriḥ śāśvataḥ śuciḥ ||
gabhastihastastīvrāṃśustaraṇiḥ sumahoraṇiḥ
||80||त्रिलोकेशो लोकसाक्षीतमोरिः शाश्वतः शुचिः ॥
गभस्तिहस्तस्तीव्रांशुस्तरणिः सुमहोरणिः
dyumaṇirharidaśvorko bhānumānbhayanāśanaḥ ||
chandośvo vedavedyaśca bhāsvānpūṣā vṛṣākapiḥ
||81||द्युमणिर्हरिदश्वोर्को भानुमान्भयनाशनः ॥
छन्दोश्वो वेदवेद्यश्च भास्वान्पूषा वृषाकपिः
ekacakraratho mitro maṃdehāristamisrahā ||
daityahā pāpahartā ca dharmodharma prakāśakaḥ
||82||एकचक्ररथो मित्रो मंदेहारिस्तमिस्रहा ॥
दैत्यहा पापहर्ता च धर्मोधर्म प्रकाशकः
helikaścitrabhānuśca kalighnastārkṣyavāhanaḥ ||
dikpatiḥ padminīnāthaḥ kuśeśayakaro hariḥ
||83||हेलिकश्चित्रभानुश्च कलिघ्नस्तार्क्ष्यवाहनः ॥
दिक्पतिः पद्मिनीनाथः कुशेशयकरो हरिः
gharmaraśmirdurnirīkṣyaścaṃḍāṃśuḥ kaśyapātmajaḥ ||
ebhiḥ saptatisaṃkhyākaiḥ puṇyaiḥ sūryasya nāmabhiḥ
||84||घर्मरश्मिर्दुर्निरीक्ष्यश्चंडांशुः कश्यपात्मजः ॥
एभिः सप्ततिसंख्याकैः पुण्यैः सूर्यस्य नामभिः
praṇavādi caturthyaṃtairnamaskāra samanvitaiḥ ||
pratyekamuccarannāma dṛṣṭvādṛṣṭvā divākaram
||85||प्रणवादि चतुर्थ्यंतैर्नमस्कार समन्वितैः ॥
प्रत्येकमुच्चरन्नाम दृष्ट्वादृष्ट्वा दिवाकरम्
vigṛhya pāṇiyugmena tāmrapātraṃ sunirmalam ||
jānubhyāmavaniṃ gatvā paripūrya jalena ca
||86||विगृह्य पाणियुग्मेन ताम्रपात्रं सुनिर्मलम् ॥
जानुभ्यामवनिं गत्वा परिपूर्य जलेन च
karavīrādi kusumai raktacaṃdanamiśritaiḥ ||
dūrvāṃkurairakṣataiśca nikṣiptaiḥ pātramadhyataḥ
||87||करवीरादि कुसुमै रक्तचंदनमिश्रितैः ॥
दूर्वांकुरैरक्षतैश्च निक्षिप्तैः पात्रमध्यतः
dadyādarghyamanarghyāya savitre dhyānapūrvakam ||
upamauli samānīya tatpātraṃ nānyadṛṅmanāḥ
||88||दद्यादर्घ्यमनर्घ्याय सवित्रे ध्यानपूर्वकम् ॥
उपमौलि समानीय तत्पात्रं नान्यदृङ्मनाः
pratimaṃtraṃ namaskuryādudayāstamaye ravim ||
anayā nāmasaptatyā mahāmaṃtrarahasyayā
||89||प्रतिमंत्रं नमस्कुर्यादुदयास्तमये रविम् ॥
अनया नामसप्तत्या महामंत्ररहस्यया
evaṃ kurvannaro jātu na daridro na duḥkhabhāk ||
vyādhibhirmucyate ghorairapijanmāṃtarārjitaiḥ
||90||एवं कुर्वन्नरो जातु न दरिद्रो न दुःखभाक् ॥
व्याधिभिर्मुच्यते घोरैरपिजन्मांतरार्जितैः
vinauṣadhairvinā vaidyairvināpathyaparigrahaiḥ ||
kālena nidhanaṃ prāptaḥ sūryaloke mahīyate
||91||विनौषधैर्विना वैद्यैर्विनापथ्यपरिग्रहैः ॥
कालेन निधनं प्राप्तः सूर्यलोके महीयते
ityekadeśaḥ kathito bhānulokasya sattama ||
mahātejonidherasya koviśeṣamavaityaho
||92||इत्येकदेशः कथितो भानुलोकस्य सत्तम ॥
महातेजोनिधेरस्य कोविशेषमवैत्यहो
svakarṇaviṣayīkurvannitipuṇyakathāmimām ||
kṣaṇādālokayāṃcakre maheṃdrasya mahāpurīm
||93||स्वकर्णविषयीकुर्वन्नितिपुण्यकथामिमाम् ॥
क्षणादालोकयांचक्रे महेंद्रस्य महापुरीम्
agastiruvāca
śrutvā saurīṃ kathametāmapsarolokasaṃyutām ||
na daridro bhavetkvāpi nādharmeṣu pravartate
||94||श्रुत्वा सौरीं कथमेतामप्सरोलोकसंयुताम् ॥
न दरिद्रो भवेत्क्वापि नाधर्मेषु प्रवर्तते
brāhmaṇaiḥ satataṃ śrāvyamidamākhyānamuttamam ||
vedapāṭhena yatpuṇyaṃ tatpuṇyaphaladāyakam
||95||ब्राह्मणैः सततं श्राव्यमिदमाख्यानमुत्तमम् ॥
वेदपाठेन यत्पुण्यं तत्पुण्यफलदायकम्
brāhmaṇāḥ kṣatriyā vaiśyāḥ śṛṇvaṃto'dhyāyamuttamam ||
pātakāni visṛjyeha gatiṃ yāsyaṃtyanuttamām
||96||ब्राह्मणाः क्षत्रिया वैश्याः शृण्वंतोऽध्यायमुत्तमम् ॥
पातकानि विसृज्येह गतिं यास्यंत्यनुत्तमाम्
iti śrīskāṃdamahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārdhe apsaraḥsūryalokavarṇanaṃnāmanavamo'dhyāyaḥ || 9 ||