adhyāyaḥ 102
brahmovāca:
sāvitrī caiva gāyatrī śraddhā medhā sarasvatī . etāni pañca tīrthāni puṇyāni munayo viduḥ
||1||सावित्री चैव गायत्री श्रद्धा मेधा सरस्वती । एतानि पञ्च तीर्थानि पुण्यानि मुनयो विदुः
tatra snātvā tu pītvā tu mucyate sarvakalmaṣāt . sāvitrī caiva gāyatrī śraddhā medhā sarasvatī
||2||तत्र स्नात्वा तु पीत्वा तु मुच्यते सर्वकल्मषात् । सावित्री चैव गायत्री श्रद्धा मेधा सरस्वती
etā mama sutā jyeṣṭhā dharmasaṃsthānahetavaḥ . sarvāsām uttamāṃ kāñcin nirmame lokasundarīm
||3||एता मम सुता ज्येष्ठा धर्मसंस्थानहेतवः । सर्वासाम् उत्तमां काञ्चिन् निर्ममे लोकसुन्दरीम्
tāṃ dṛṣṭvā vikṛtā buddhir mamāsīn munisattama . gṛhyamāṇā mayā bālā sā māṃ dṛṣṭvā palāyitā
||4||तां दृष्ट्वा विकृता बुद्धिर् ममासीन् मुनिसत्तम । गृह्यमाणा मया बाला सा मां दृष्ट्वा पलायिता
mṛgībhūtā tu sā bālā mṛgo'ham abhavaṃ tadā . mṛgavyādho'bhavac chambhur dharmasaṃrakṣaṇāya ca
||5||मृगीभूता तु सा बाला मृगोऽहम् अभवं तदा । मृगव्याधोऽभवच् छम्भुर् धर्मसंरक्षणाय च
tā madbhītāḥ pañca sutā gaṅgām īyur mahānadīm . tato maheśvaraḥ prāyād dharmasaṃrakṣaṇāya saḥ
||6||ता मद्भीताः पञ्च सुता गङ्गाम् ईयुर् महानदीम् । ततो महेश्वरः प्रायाद् धर्मसंरक्षणाय सः
dhanur gṛhītvā saśaram īśo'pi mṛgarūpiṇam . mām uvāca vadhiṣye tvāṃ mṛgavyādhas tadā haraḥ
||7||धनुर् गृहीत्वा सशरम् ईशोऽपि मृगरूपिणम् । माम् उवाच वधिष्ये त्वां मृगव्याधस् तदा हरः
tatkarmaṇo nivṛtto'haṃ prādāṃ kanyāṃ vivasvate . sāvitryādyāḥ pañca sutā nadīrūpeṇa saṅgatāḥ
||8||तत्कर्मणो निवृत्तोऽहं प्रादां कन्यां विवस्वते । सावित्र्याद्याः पञ्च सुता नदीरूपेण सङ्गताः
tā āgatāḥ punaś cāpi svargaṃ lokaṃ mamāntikam . yatra tāḥ saṅgatā devyā pañca tīrthāni nārada
||9||ता आगताः पुनश् चापि स्वर्गं लोकं ममान्तिकम् । यत्र ताः सङ्गता देव्या पञ्च तीर्थानि नारद
saṅgatāni ca puṇyāni pañca nadyaḥ sarasvatī . teṣu snānaṃ tathā dānaṃ yat kiñcit kurute naraḥ
||10||सङ्गतानि च पुण्यानि पञ्च नद्यः सरस्वती । तेषु स्नानं तथा दानं यत् किञ्चित् कुरुते नरः
sarvakāmapradaṃ tat syān naiṣkarmyān muktidaṃ smṛtam . tatrābhavan mṛgavyādhaṃ tīrthaṃ sarvārthadaṃ nṛṇām . svargamokṣaphalaṃ cānyad brahmatīrthaphalaṃ smṛtam
||11||सर्वकामप्रदं तत् स्यान् नैष्कर्म्यान् मुक्तिदं स्मृतम् । तत्राभवन् मृगव्याधं तीर्थं सर्वार्थदं नृणाम् । स्वर्गमोक्षफलं चान्यद् ब्रह्मतीर्थफलं स्मृतम्
Source and reuse:SARIT. Based on the SARIT digital edition, edited by Peter Schreiner and Renate Söhnen; base e-text: the Tübingen Purāṇa Project; TEI editing and conversion: Richard Mahoney. Copyright 2014–2018 SARIT. Converted from IAST to Devanāgarī and segmented into chapter, stanza, and prose items for this reader. Creative Commons Attribution-ShareAlike 3.0 Unported (CC BY-SA 3.0).