adhyāyaḥ 199
vyāsa uvāca:
bhīṣmakaḥ kuṇḍine rājā vidarbhaviṣaye'bhavat . rukmiṇī tasya duhitā rukmī caiva suto dvijāḥ
||1||भीष्मकः कुण्डिने राजा विदर्भविषयेऽभवत् । रुक्मिणी तस्य दुहिता रुक्मी चैव सुतो द्विजाः
rukmiṇīṃ cakame kṛṣṇaḥ sā ca taṃ cāruhāsinī . na dadau yācate caināṃ rukmī dveṣeṇa cakriṇe
||2||रुक्मिणीं चकमे कृष्णः सा च तं चारुहासिनी । न ददौ याचते चैनां रुक्मी द्वेषेण चक्रिणे
dadau sa śiśupālāya jarāsandhapracoditaḥ . bhīṣmako rukmiṇā sārdhaṃ rukmiṇīm uruvikramaḥ
||3||ददौ स शिशुपालाय जरासन्धप्रचोदितः । भीष्मको रुक्मिणा सार्धं रुक्मिणीम् उरुविक्रमः
vivāhārthaṃ tataḥ sarve jarāsandhamukhā nṛpāḥ . bhīṣmakasya puraṃ jagmuḥ śiśupālaś ca kuṇḍinam
||4||विवाहार्थं ततः सर्वे जरासन्धमुखा नृपाः । भीष्मकस्य पुरं जग्मुः शिशुपालश् च कुण्डिनम्
kṛṣṇo'pi balabhadrādyair yadubhiḥ parivāritaḥ . prayayau kuṇḍinaṃ draṣṭuṃ vivāhaṃ caidyabhūpateḥ
||5||कृष्णोऽपि बलभद्राद्यैर् यदुभिः परिवारितः । प्रययौ कुण्डिनं द्रष्टुं विवाहं चैद्यभूपतेः
śvobhāvini vivāhe tu tāṃ kanyāṃ hṛtavān hariḥ . vipakṣabhāvam āsādya rāmādyeṣv eva bandhuṣu
||6||श्वोभाविनि विवाहे तु तां कन्यां हृतवान् हरिः । विपक्षभावम् आसाद्य रामाद्येष्व् एव बन्धुषु
tataś ca pauṇḍrakaḥ śrīmān dantavaktro vidūrathaḥ . śiśupālo jarāsandhaḥ śālvādyāś ca mahībhṛtaḥ
||7||ततश् च पौण्ड्रकः श्रीमान् दन्तवक्त्रो विदूरथः । शिशुपालो जरासन्धः शाल्वाद्याश् च महीभृतः
kupitās te hariṃ hantuṃ cakrur udyogam uttamam . nirjitāś ca samāgamya rāmādyair yadupuṅgavaiḥ
||8||कुपितास् ते हरिं हन्तुं चक्रुर् उद्योगम् उत्तमम् । निर्जिताश् च समागम्य रामाद्यैर् यदुपुङ्गवैः
kuṇḍinaṃ na pravekṣyāmi ahatvā yudhi keśavam . kṛtvā pratijñāṃ rukmī ca hantuṃ kṛṣṇam abhidrutaḥ
||9||कुण्डिनं न प्रवेक्ष्यामि अहत्वा युधि केशवम् । कृत्वा प्रतिज्ञां रुक्मी च हन्तुं कृष्णम् अभिद्रुतः
hatvā balaṃ sa nāgāśvapattisyandanasaṅkulam . nirjitaḥ pātitaś corvyāṃ līlayaiva sa cakriṇā
||10||हत्वा बलं स नागाश्वपत्तिस्यन्दनसङ्कुलम् । निर्जितः पातितश् चोर्व्यां लीलयैव स चक्रिणा
nirjitya rukmiṇaṃ samyag upayeme sa rukmiṇīm . rākṣasena vidhānena samprāpto madhusūdanaḥ
||11||निर्जित्य रुक्मिणं सम्यग् उपयेमे स रुक्मिणीम् । राक्षसेन विधानेन सम्प्राप्तो मधुसूदनः
tasyāṃ jajñe ca pradyumno madanāṃśaḥ sa vīryavān . jahāra śambaro yaṃ vai yo jaghāna ca śambaram
||12||तस्यां जज्ञे च प्रद्युम्नो मदनांशः स वीर्यवान् । जहार शम्बरो यं वै यो जघान च शम्बरम्
Source and reuse:SARIT. Based on the SARIT digital edition, edited by Peter Schreiner and Renate Söhnen; base e-text: the Tübingen Purāṇa Project; TEI editing and conversion: Richard Mahoney. Copyright 2014–2018 SARIT. Converted from IAST to Devanāgarī and segmented into chapter, stanza, and prose items for this reader. Creative Commons Attribution-ShareAlike 3.0 Unported (CC BY-SA 3.0).