adhyāyaḥ 120
brahmovāca:
dhānyatīrtham iti khyātaṃ sarvakāmapradaṃ nṛṇām . subhikṣaṃ kṣemadaṃ puṃsāṃ sarvāpadvinivāraṇam
||1||धान्यतीर्थम् इति ख्यातं सर्वकामप्रदं नृणाम् । सुभिक्षं क्षेमदं पुंसां सर्वापद्विनिवारणम्
oṣadhyaḥ somarājānaṃ patiṃ prāpya mudānvitāḥ . ūcuḥ sarvasya lokasya gaṅgāyāś cepsitaṃ vacaḥ
||2||ओषध्यः सोमराजानं पतिं प्राप्य मुदान्विताः । ऊचुः सर्वस्य लोकस्य गङ्गायाश् चेप्सितं वचः
oṣadhya ūcuḥ:
vaidikī puṇyagāthāsti yāṃ vai vedavido viduḥ . bhūmiṃ sasyavatīṃ kaścin mātaraṃ mātṛsammitām
||3||वैदिकी पुण्यगाथास्ति यां वै वेदविदो विदुः । भूमिं सस्यवतीं कश्चिन् मातरं मातृसम्मिताम्
gaṅgāsamīpe yo dadyāt sarvakāmān avāpnuyāt . bhūmiṃ sasyavatīṃ gāś ca oṣadhīś ca mudānvitaḥ
||4||गङ्गासमीपे यो दद्यात् सर्वकामान् अवाप्नुयात् । भूमिं सस्यवतीं गाश् च ओषधीश् च मुदान्वितः
viṣṇubrahmeśarūpāya yo dadyād bhaktimān naraḥ . sarvaṃ tad akṣayaṃ vidyāt sarvakāmān avāpnuyāt
||5||विष्णुब्रह्मेशरूपाय यो दद्याद् भक्तिमान् नरः । सर्वं तद् अक्षयं विद्यात् सर्वकामान् अवाप्नुयात्
oṣadhyaḥ somarājanyāḥ somaś cāpy oṣadhīpatiḥ . iti jñātvā brahmavida oṣadhīr yaḥ pradāsyati
||6||ओषध्यः सोमराजन्याः सोमश् चाप्य् ओषधीपतिः । इति ज्ञात्वा ब्रह्मविद ओषधीर् यः प्रदास्यति
sarvān kāmān avāpnoti brahmaloke mahīyate . tā eva somarājanyāḥ prītāḥ procuḥ punaḥ punaḥ
||7||सर्वान् कामान् अवाप्नोति ब्रह्मलोके महीयते । ता एव सोमराजन्याः प्रीताः प्रोचुः पुनः पुनः
oṣadhya ūcuḥ:
yo'smān dadāti gaṅgāyāṃ taṃ rājan pārayāmasi . tvam uttamaś cauṣadhīśa tvadadhīnaṃ carācaram
||8||योऽस्मान् ददाति गङ्गायां तं राजन् पारयामसि । त्वम् उत्तमश् चौषधीश त्वदधीनं चराचरम्
oṣadhayaḥ saṃvadante somena saha rājñā . yo'smān dadāti viprebhyas taṃ rājan pārayāmasi
||9||ओषधयः संवदन्ते सोमेन सह राज्ञा । योऽस्मान् ददाति विप्रेभ्यस् तं राजन् पारयामसि
vayaṃ ca brahmarūpiṇyaḥ prāṇarūpiṇya eva ca . yo'smān dadāti viprebhyas taṃ rājan pārayāmasi
||10||वयं च ब्रह्मरूपिण्यः प्राणरूपिण्य एव च । योऽस्मान् ददाति विप्रेभ्यस् तं राजन् पारयामसि
asmān dadāti yo nityaṃ brāhmaṇebhyo jitavrataḥ . upāstir asti sāsmākaṃ taṃ rājan pārayāmasi
||11||अस्मान् ददाति यो नित्यं ब्राह्मणेभ्यो जितव्रतः । उपास्तिर् अस्ति सास्माकं तं राजन् पारयामसि
sthāvaraṃ jaṅgamaṃ kiñcid asmābhir vyāpṛtaṃ jagat . yo'smān dadāti viprebhyas taṃ rājan pārayāmasi
||12||स्थावरं जङ्गमं किञ्चिद् अस्माभिर् व्यापृतं जगत् । योऽस्मान् ददाति विप्रेभ्यस् तं राजन् पारयामसि
havyaṃ kavyaṃ yad amṛtaṃ yat kiñcid upabhujyate . tadgarīyaś ca yo dadyāt taṃ rājan pārayāmasi
||13||हव्यं कव्यं यद् अमृतं यत् किञ्चिद् उपभुज्यते । तद्गरीयश् च यो दद्यात् तं राजन् पारयामसि
ity etāṃ vaidikīṃ gāthāṃ yaḥ śṛṇoti smareta vā . paṭhate bhaktim āpannas taṃ rājan pārayāmasi
||14||इत्य् एतां वैदिकीं गाथां यः शृणोति स्मरेत वा । पठते भक्तिम् आपन्नस् तं राजन् पारयामसि
brahmovāca:
yatraiṣā paṭhitā gāthā somena saha rājñā . gaṅgātīre cauṣadhībhir dhānyatīrthaṃ tad ucyate
||15||यत्रैषा पठिता गाथा सोमेन सह राज्ञा । गङ्गातीरे चौषधीभिर् धान्यतीर्थं तद् उच्यते
tataḥ prabhṛti tat tīrtham auṣadhyaṃ saumyam eva ca . amṛtaṃ vedagāthaṃ ca mātṛtīrthaṃ tathaiva ca
||16||ततः प्रभृति तत् तीर्थम् औषध्यं सौम्यम् एव च । अमृतं वेदगाथं च मातृतीर्थं तथैव च
eṣu snānaṃ japo homo dānaṃ ca pitṛtarpaṇam . annadānaṃ tu yaḥ kuryāt tad ānantyāya kalpate
||17||एषु स्नानं जपो होमो दानं च पितृतर्पणम् । अन्नदानं तु यः कुर्यात् तद् आनन्त्याय कल्पते
ṣaṭśatādhikasāhasraṃ tīrthānāṃ tīrayor dvayoḥ . sarvapāpanihantṝṇāṃ sarvasampadvivardhanam
||18||षट्शताधिकसाहस्रं तीर्थानां तीरयोर् द्वयोः । सर्वपापनिहन्तॄणां सर्वसम्पद्विवर्धनम्
Source and reuse:SARIT. Based on the SARIT digital edition, edited by Peter Schreiner and Renate Söhnen; base e-text: the Tübingen Purāṇa Project; TEI editing and conversion: Richard Mahoney. Copyright 2014–2018 SARIT. Converted from IAST to Devanāgarī and segmented into chapter, stanza, and prose items for this reader. Creative Commons Attribution-ShareAlike 3.0 Unported (CC BY-SA 3.0).