adhyāyaḥ 77
brahmovāca:
tryambakaś ca iti prāha gautamaṃ munibhir vṛtam
||1||त्र्यम्बकश् च इति प्राह गौतमं मुनिभिर् वृतम्
śiva uvāca:
dvihastamātre tīrthāni sambhaviṣyanti gautama . sarvatrāhaṃ sannihitaḥ sarvakāmapradas tathā
||2||द्विहस्तमात्रे तीर्थानि सम्भविष्यन्ति गौतम । सर्वत्राहं सन्निहितः सर्वकामप्रदस् तथा
brahmovāca:
gaṅgādvāre prayāge ca tathā sāgarasaṅgame . eteṣu puṇyadā puṃsāṃ muktidā sā bhagīrathī
||3||गङ्गाद्वारे प्रयागे च तथा सागरसङ्गमे । एतेषु पुण्यदा पुंसां मुक्तिदा सा भगीरथी
narmadā tu saricchreṣṭhā parvate'marakaṇṭake . yamunā saṅgatā tatra prabhāse tu sarasvatī
||4||नर्मदा तु सरिच्छ्रेष्ठा पर्वतेऽमरकण्टके । यमुना सङ्गता तत्र प्रभासे तु सरस्वती
kṛṣṇā bhīmarathī caiva tuṅgabhadrā tu nārada . tisṛṇāṃ saṅgamo yatra tat tīrthaṃ muktidaṃ nṛṇām
||5||कृष्णा भीमरथी चैव तुङ्गभद्रा तु नारद । तिसृणां सङ्गमो यत्र तत् तीर्थं मुक्तिदं नृणाम्
payouṣṇī saṅgatā yatra tatratyā tac ca muktidam . iyaṃ tu gautamī vatsa yatra kvāpi mamājñayā
||6||पयोउष्णी सङ्गता यत्र तत्रत्या तच् च मुक्तिदम् । इयं तु गौतमी वत्स यत्र क्वापि ममाज्ञया
sarveṣāṃ sarvadā nṝṇāṃ snānān muktiṃ pradāsyati . kiñcitkāle puṇyatamaṃ kiñcittīrthaṃ surāgame
||7||सर्वेषां सर्वदा नॄणां स्नानान् मुक्तिं प्रदास्यति । किञ्चित्काले पुण्यतमं किञ्चित्तीर्थं सुरागमे
sarveṣāṃ sarvadā tīrthaṃ gautamī nātra saṃśayaḥ . tisraḥ koṭyo'rdhakoṭī ca yojanānāṃ śatadvaye
||8||सर्वेषां सर्वदा तीर्थं गौतमी नात्र संशयः । तिस्रः कोट्योऽर्धकोटी च योजनानां शतद्वये
tīrthāni muniśārdūla sambhaviṣyanti gautama . iyaṃ māheśvarī gaṅgā gautamī vaiṣṇavīti ca
||9||तीर्थानि मुनिशार्दूल सम्भविष्यन्ति गौतम । इयं माहेश्वरी गङ्गा गौतमी वैष्णवीति च
brāhmī godāvarī nandā sunandā kāmadāyinī . brahmatejaḥsamānītā sarvapāpapraṇāśanī
||10||ब्राह्मी गोदावरी नन्दा सुनन्दा कामदायिनी । ब्रह्मतेजःसमानीता सर्वपापप्रणाशनी
smaraṇād eva pāpaughahantrī mama sadā priyā . pañcānām api bhūtānām āpaḥ śreṣṭhatvam āgatāḥ
||11||स्मरणाद् एव पापौघहन्त्री मम सदा प्रिया । पञ्चानाम् अपि भूतानाम् आपः श्रेष्ठत्वम् आगताः
tatrāpi tīrthabhūtās tu tasmād āpaḥ parāḥ smṛtāḥ . tāsāṃ bhāgīrathī śreṣṭhā tābhyo'pi gautamī tathā
||12||तत्रापि तीर्थभूतास् तु तस्माद् आपः पराः स्मृताः । तासां भागीरथी श्रेष्ठा ताभ्योऽपि गौतमी तथा
ānītā sajaṭā gaṅgā asyā nānyac chubhāvaham . svarge bhuvi tale vāpi tīrthaṃ sarvārthadaṃ mune
||13||आनीता सजटा गङ्गा अस्या नान्यच् छुभावहम् । स्वर्गे भुवि तले वापि तीर्थं सर्वार्थदं मुने
brahmovāca:
ity etat kathitaṃ putra gautamāya mahātmane . sākṣād dhareṇa tuṣṭena mayā tava niveditam
||14||इत्य् एतत् कथितं पुत्र गौतमाय महात्मने । साक्षाद् धरेण तुष्टेन मया तव निवेदितम्
evaṃ sā gautamī gaṅgā sarvebhyo'py adhikā matā . tatsvarūpaṃ ca kathitaṃ kuto'nyā śravaṇaspṛhā
||15||एवं सा गौतमी गङ्गा सर्वेभ्योऽप्य् अधिका मता । तत्स्वरूपं च कथितं कुतोऽन्या श्रवणस्पृहा
Source and reuse:SARIT. Based on the SARIT digital edition, edited by Peter Schreiner and Renate Söhnen; base e-text: the Tübingen Purāṇa Project; TEI editing and conversion: Richard Mahoney. Copyright 2014–2018 SARIT. Converted from IAST to Devanāgarī and segmented into chapter, stanza, and prose items for this reader. Creative Commons Attribution-ShareAlike 3.0 Unported (CC BY-SA 3.0).