Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
iti hemajaṭādhīśo lebhe padamanuttamam .
vivekādhyavasāyena brāhmaṇyamiva gādhijaḥ
||1||anarthākārakāryāsu nāsīcceṣṭāsu khedavān .
bhūyobhūyaḥ prayuktāsu dinamālāsviveśvaraḥ
||2||tataḥprabhṛti so'tiṣṭhatasarvadā vigatajvaraḥ .
samāsame svake kārye jalaughāgra ivācalaḥ
||3||harṣāmarṣavinirmuktaḥ pratyahaṃ kāryamāharan .
udāragambhīravapurjahārāmbunidheḥ śriyam
||4||suṣuptapadadharmiṇyā cittavṛttyā vyarājata .
niṣkampayā prakāśinyā dīpaḥ svaśikhayeva saḥ
||5||na nirghṛṇo dayāvānno na dvandvī nātha matsarī .
na sudhīrnāsudhīrnārthī nānarthī sa babhūva ha
||6||samadarśanayā nityaṃ vṛttyā'cāpaladhīrayā .
antaḥśītalayā reje paripūrṇārṇavenduvat
||7||sarvaṃ cittattvakalanaṃ jagadityavalokya saḥ .
praśāntasukhaduḥkhaśrīstasya pūrṇā matirbabhau
||8||ullasanvikasanpūrṇastiṣṭhangacchanviśansvapan .
abhūtsamasamādhisthaḥ prabuddhaścillayaṃ gataḥ
||9||sa kurvanvigatāsaṅgaṃ rājyaṃ rājīvalocanaḥ .
atiṣṭhadakṣatākāro bhūrivarṣaśatānyatha
||10||saṃniveśamimaṃ dehanāmakaṃ tadanu svayam .
sa jahau tejasākrānto rūpaṃ himakaṇo yathā
||11||viveśa paramādyantakāraṇaṃ kāraṇeśvaram .
prajñayā saritāṃ vāri paripūrṇamivāmbudhim
||12||adhigatavimalaikarūpatejā
vijanadaśāṃ samupetya śāntaśokaḥ .
alamabhavadasau parasvarūpaṃ
ghaṭakhamivāmbarasaṃyutaṃ mahātmā
||13||ityārṣe śrīvāsiṣṭhamahārāmāyaṇe vālmīkīye de0 mokṣopāyeṣūpaśamaprakaraṇe suraghuvṛttānte suraghunirvāṇaṃ nāma ṣaṣṭitamaḥ sargaḥ .. 60 ..