Traditionally attributed to Vālmīki; dialogue of Vasiṣṭha and Rāma
rājovāca .
asti tāvadayaṃ deśo nānāvananadīyutaḥ .
vasudhāmaṇḍalasyāsya sahodara ivānujaḥ
||1||asmiṃścāyamahaṃ rājā paurābhimatavṛttimān .
indraḥ svarga ivāsyāṃ tu sabhāyāṃ madhyasaṃsthita
||2||yāvadabhyāgato dūrātkaścicchāmbarikastvayam .
rasātalādabhyudito māyī maya iva svayam
||3||anena bhramitādyeha picchikā tejasorjitā .
kalpāntapavanābhreṇa śakracāpalatā yathā
||4||ālokyaitāmahaṃ lolāmasyāśvasya puraḥ sthitaḥ .
pṛṣṭhamārūḍhavāneka ātmanā bhrāntamānasaḥ
||5||tato'driṃ pralayakṣubdhaṃ puṣkarāvartako yathā .
tathā calantaṃ calitaḥ svaśvamārūḍhavānaham
||6||gantuṃ pravṛtto mṛgayāmeko'hamatiraṃhasā .
urvarāmiva nirbhartuḥ kallolaḥ pralayāmbudheḥ
||7||tenānilavilolena dūraṃ nīto'smi vājinā .
yogābhyāsajaḍenājño mugdhasya manasā yathā
||8||akiṃcanamanaḥśūnyaṃ strīcittamiva nirbharam .
tataḥ pralayanirdagdhajagadāspadabhīṣaṇam
||9||niṣpakṣikṣāranīhāraṃ nirvṛkṣamajalaṃ mahat .
saṃprāpto'hamaparyantamaraṇyaṃ śrāntavāhanaḥ
||10||taddvitīyamivākāśaṃ tathāṣṭamamivāmbudhim .
pañcamaṃ sāgaramiva saṃśuṣkaṃ śūnyakoṭaram
||11||jñasyeva vitataṃ ceto mūrkhasyeva ruṣā'javam .
adṛṣṭajanasaṃsargamajātatṛṇapallavam
||12||araṇyamidamāsādya matirme khedamāgatā .
lalanevaitya dāridryaṃ nirannaphalabāndhavam
||13||kacanmarumarīcyambupuraḥplutakakummukham .
āsūryāstaṃ dinaṃ tatra prakrāntaṃ sīdatā mayā
||14||tadaraṇyaṃ mayātītamatikṛcchreṇa khedinā .
vivekineva saṃsāro madhyaśūnyatatākṛti
||15||yadetenātivāhyāhaṃ prāptavāñjaṅgalaṃ kramāt .
astādrisānuṃ khinnāśvaḥ śūnyabhrāntyevabhāskaraḥ
||16||jambūkadambaprāyeṣu kalālāpāḥ patatriṇaḥ .
yatra sphuranti khaṇḍeṣu pānthānāmiva bāndhavāḥ
||17||yatra śaṣpaśikhāśreṇyo dṛśyante viralāḥ sthale .
kadarthalakṣmyā jihmasya hṛdīvānandavṛttayaḥ
||18||pūrvādaraṇyādarasāttaddhi kiṃcitsukhāvaham .
atyantaduḥkhānmaraṇādvaraṃ vyādhirhi jantuṣu
||19||tatra jambīrakhaṇḍasya talaṃ saṃprāptavānaham .
mārkaṇḍeya ivāgendramekārṇavavihārataḥ
||20||ālambitā mayā tatra skandhasaṃsargiṇī latā .
nīlā jaladamāleva tāpataptena bhūbhṛtā
||21||mayi pralambamāne'syāṃ prayātaḥ sa turaṅgamaḥ .
gaṅgāvalambini nare yathā duṣkṛtasaṃcayaḥ
||22||ciraṃ dīrghādhvagaḥ khinnastatra viśrāntavānaham .
bhānurastācalotsaṅge tale kalpataroriva
||23||yāvatsamastasaṃsāravyavahārabharaiḥ samam .
ravirviśramaṇāyeva niviṣṭo'stācalāṅgaṇe
||24||śanaiḥ śyāmikayā graste samaste bhuvanodare .
rātrisaṃvyavahāreṣu saṃpravṛtteṣu jaṅgale
||25||ahaṃ tarutṛṇe tasminpelave khaṇḍakoṭare .
nilīnaściralīnāsyaḥ svanīḍe vihago yathā
||26||viṣadaṣṭavivekasya kīnāśasya galatsmṛteḥ .
vikrītasyeva dīnasya magnasyevāndhakūpake
||27||tatra kalpasamā rātrirmohamagnasya me gatā .
ekārṇavohyamānasya mārkaṇḍeyamuneriva
||28||na snātavānnārcitavānna tadā bhuktavānaham .
kevalaṃ me gatā rātriḥ sāpadāṃ dhuri tiṣṭhataḥ
||29||vinidrasya vidhairyasya sphurataḥ saha pallavaiḥ .
samaṃ duṣṭātidairghyeṇa sā vyatīyāya śarvarī
||30||tatastimiralekhāsu saha tārendukairavaiḥ .
mayīvāpādyamānāsu mlānatāmalamānane
||31||śāmyantīṣu ca vetālakṣveḍāsu javajaṅgale .
sahaśītārtimaddantapaṅktiṭāṅkārasītkataiḥ
||32||māmevārtivinirmagnaṃ hasantīmiva dṛṣṭavān .
ahaṃ pūrvāṃ diśaṃ prāptamadhupānāruṇāmiva
||33||kṣaṇādajña iva jñānaṃ daridra iva kāñcanam .
dṛṣṭavānahamarkaṃ khe vāraṇārohaṇonmukham
||34||utthāyāstaraṇaṃ vastraṃ tattadāsphoṭitaṃ mayā .
hasticarmadvareṇeva saṃdhyānṛtyānurāgiṇā
||35||pravṛttastāmahaṃ sphārāṃ vihartuṃ jaṅgalasthalīm .
kālo jagatkuṭīṃ kalpadagdhabhūtagaṇāmiva
||36||na kiṃcidṛśyate tatra bhūtaṃ jaraṭhajaṅgale .
abhijāto guṇalavo yathā mūrkhaśarīrake
||37||kevalaṃ vigatāśaṅkaṃ khaṇḍabhramaṇacañcalam .
cīcīkūcītivacanā viharanti vihaṅgamāḥ
||38||athāṣṭabhāgamāpanne vyomno divasanāyake .
śuṣkāvaśyāyaleśāsu snātāsviva latāsu ca
||39||dṛṣṭā mayā prabhramatā dārikaudanadhāriṇī .
gṛhītāmṛtasatkumbhā dānaveneva mādhavī
||40||tarattārakanetrāṃ tāṃ śyāmāmadhavalāmbarām .
ahamabhyāgatastatra śarvarīmiva candramāḥ
||41||mahyamodanamāśvetadbāle balavadāpadi .
dehidīnārtiharaṇātsphāratāṃ yānti saṃpadaḥ
||42||kṣudantarmahatīyaṃ me bāle vṛddhimupeyuṣī .
kṛṣṇasarpā prasūteva koṭarasthā jaradrume
||43||yāccayāpi tayā mahyamitthaṃ dattaṃ na kiṃcana .
yatnaprārthanayā lakṣmyā yathā duṣkṛtine dhanam
||44||kevalaṃ cirakālena mayātyantānugāminā .
khaṇḍātkhaṇḍaṃ nipatati cchāyābhūte puraḥsthite
||45||tayoktaṃ hārakeyūriṃścaṇḍālīṃ viddhi māmiti .
rākṣasīmiva sukrūrā puruṣāśvagajāśanām
||46||rājanyārcanamātreṇa matto nāpnoṣi bhojanam .
grāmyādanabhijātehātsaujanyamiva sundaram
||47||ityuktavatyā gacchantyā khelayā ca padepade .
kuñjakeṣu nimajjantyā līlāvanatayoditam
||48||dadāmi bhojanamidaṃ bhartā bhavasi cenmama .
loko nopakarotyarthaiḥ sāmānyaḥ snigdhatāṃ vinā
||49||vāhayatyatra me dāntānkedāre pulkasaḥ pitā .
śmaśāna iva vetālaḥ kṣudhito dhūlidhūsaraḥ
||50||tasyedamannaṃ bhavati bhartṛtve dīyate sthite .
prāṇairapi hi saṃpūjyā vallabhāḥ puruṣā yataḥ
||51||athoktā sā mayā bhartā bhavāmi tava suvrate .
kenāpadi vicāryante varṇadharmakulakramāḥ
||52||tatastayaudanādardhaṃ mahyamekaṃ samarpitam .
mādhavyevāmṛtādardhamindrāyārtimahatpurā
||53||jambūphalarasaḥ pītaḥ sa bhuktaḥ pakkaṇaudanaḥ .
viśrāntaṃ ca mayā tatra mohāpahṛtacetasā
||54||māṃ tatrārkamivāpūrya sā prāvṛṭ śyāmalā gatā .
hastena samupādāya prāṇaṃ bahiriva sthitam
||55||durākṛtiṃ durārambhamāsasāda bhayapradam .
pitaraṃ pīvarākāramavīcimiva yātanā
||56||tayā madanuṣaṅgiṇyā svārthastasmai niveditaḥ .
mātaṅgāya bhramaryeva niḥsvanenālilagnayā
||57||ayaṃ mama bhavedbhartā tāta he tava rocatām .
sa tasyā bāḍhamityuktvā dinānte samupasthite
||58||mumoca dāntāvābaddhau kṛtāntaḥ kiṅkarāviva .
nīhārābhrakaḍārāsu dikṣu proddhūlitāsu ca .
vetālabandhanāttasmāddinānte calitā vayam
||59||kṣaṇena pakkaṇaṃ prāptāḥ saṃdhyāyāṃ dīrghajaṅgalāt .
śmaśānādiva vetālāḥ śmaśānamitaranmahat
||60||vikartitavibhāgasthakapikukkuṭavāyasam .
raktasiktorvarābhāgaprabhramanmakṣikāgaṇam
||61||śoṣārthaṃ prasṛtārdrāntratantrījālapatatkhagam .
niṣkuṭasthitajambīrakhaṇḍalagnakhagadhvani
||62||śuṣyadguruvasāpiṇḍapūrṇālindalasatkhagam .
dṛṣṭiprasṛtaraktāktacarmasravadasṛglavam
||63||bālahastasthitakravyapiṇḍakvaṇitamakṣikam .
jarjarādhiṣṭhacaṇḍālatarjitāraṭitārbhakam
||64||tatpraviṣṭā vayaṃ kīrṇaśirāntra bhīmapakkaṇam .
mṛtabhūtaṃ jagatkalpe kṛtāntānucarā iva
||65||saṃbhramopahitānalpakadalīdalapīṭhake .
ahamāsthitavāṃstatra nave śvaśuramandire
||66||śvaśrvā me kekarākṣyā tu tenāsṛglavacakṣuṣā .
jāmātāyamiti proktaṃ tayā tadabhinanditam
||67||atha viśramya caṇḍālabhojanānyajināsane .
saṃcitānyupabhuktāni duṣkṛtānīva bhūriśaḥ
||68||anantaduḥkhabījāni na manojñatarāṇyapi .
tāni praṇayavākyāni śrutānyasubhagānyalam
||69||nirabhrāmbaranakṣatre kasmiṃściddivase tataḥ .
taistairārambhasaṃrambhaistairvastravibhavārpaṇaiḥ
||70||dattāpyanena sā mahyaṃ kumārī bhayadāyinī .
sukṛṣṇā kṛṣṇavarṇena duṣkṛteneva yātanā
||71||sarabhasamabhito vineduratra
prasṛtamahāmadirāsavāḥ śvapākāḥ .
hatapaṭupaṭahā vilāsavantaḥ
svayamiva duṣkṛtarāśayo mahāntaḥ
||72||ityārṣe śrīvāsiṣṭhamahārāmāyaṇe mo0 utpattiprakaraṇe indrajālopākhyāne cāṇḍālīvivāho nāma ṣaḍuttaraśatatamaḥ sargaḥ .. 106 ..