Traditionally attributed to Vālmīki; dialogue of Vasiṣṭha and Rāma
śrīdevyuvāca .
tasmādye vedyavettāro ye vā dharmaṃ paraṃ śritāḥ .
ātivāhikalokāṃste prāpnuvantīha netare
||1||ādhibhautikadehatvaṃ mithyābhramamayātmakam .
kathaṃ satye sthitiṃ yāti cchāyāste kathamātape
||2||līlā viditavedyā no paramaṃ dharmamāśritā .
kevalaṃ tena sā bhartuḥ kalpitaṃ nagaraṃ gatā
||3||prabuddhalīlovāca .
evameṣā prayātā'stu bhartā paśya mamāmbike .
pravṛttaḥ prāṇasaṃtyāge kartavyaṃ kimihādhunā ..
bhāvābhāveṣu bhāvānāṃ kathaṃ niyatirāgatā .
kathaṃ bhūyo'pyaniyatirmṛtijanmādisūcitā
||5||kathaṃ svabhāvasaṃsiddhiḥ kathaṃ sattā padārthagā .
kathamagnyādipūṣṇatvaṃ pṛthvyādau sthiratā katham
||6||himādiṣu kathaṃ śaityaṃ kā sattā kālakhādiṣu .
bhāvābhāvagrahotsargasthūlasūkṣmadṛśaḥ katham
||7||kathamatyantamucchrāyaṃ tṛṇagulmanarādikam .
vastu nāyātyaniṣṭe'pi sthite svocchrāyakāraṇe
||8||śrīdevyuvāca .
mahāpralayasaṃpattau sarvārthāstamaye sati .
anantākāśamāśāntaṃ sadbrahmaivāvatiṣṭhate
||9||taccidrūpatayā tejaḥkaṇo'hamiti cetati .
svapne saṃvidyathā hi tvamākāśagamanādi ca
||10||tejaḥkaṇo'sau sthūlatvamātmanātmani vindati .
asatyameva satyābhaṃ brahmāṇḍaṃ tadidaṃ smṛtam
||11||tatrāntarbrahma tadvetti brahmāyamahamityatha .
manorājyaṃ sa kurute svātmaivaṃ tadidaṃ jagat
||12||tasminprathamataḥ sarge yā yathā yatra saṃvidaḥ .
kacitāstāstathā tatra sthitā adyāpi niścalāḥ
||13||yadyathā sphuritaṃ cittaṃ tattathā hyātmacidbhavet .
svayamevāniyamatastattatsyānneha kiṃcana
||14||na ca nāma nakiṃcittvaṃ yujyate viśvarūpiṇaḥ .
tyaktvā samastasaṃsthānaṃ hema tiṣṭhati vai katham
||15||sargādau svayamevāntaścidyathā kacitātmani .
himāgnyāditayādyāpi sā tathāste svasattayā
||16||tasmātsvasattāsaṃtyāgaḥ sataḥ kartuṃ na yujyate .
yadā cidāste teneyaṃ niyatirna vinaśyati
||17||yadyathā kacitaṃ yatra vyomarūpyapi pārthivam .
sargādau tasya calitumadyayāvanna yujyate
||18||yā yathā citprakacitā pratipakṣavidaṃ vinā .
na sā tataḥ pracalati vedanābhyāsataḥ svayam
||19||jagadādāvanutpannaṃ yaccedamanubhūyate .
tatsaṃvidvyomakacanaṃ svapnastrīsurataṃ yathā
||20||asatyameva satyābhaṃ pratibhānamidaṃ sthitam .
iti svabhāvasaṃpattiriti bhūtānubhūtayaḥ
||21||sargādau yā yathā rūḍhā saṃvitkacanasaṃtatiḥ .
sādyāpyacalitānyena sthitā niyatirucyate
||22||gṛhītavyomasaṃvitticidvyoma vyomatāṃ gatam .
gṛhītakālatāsaṃviccinnabhaḥ kālatāṃ gatam
||23||gṛhītajalasaṃvitticidvyoma vārivatsthitam .
svapne yathā hi puruṣaḥ paśyatyātmani vāritām
||24||svapnacitsaṃvidābhāti bhavatyeṣā yathāsthitā .
ciccamatkāracāturyādasadetatsamūhate
||25||khatvaṃ jalatvamurvītvamagnivāyutvamapyasat .
vettyantaḥ svapnasaṃkalpadhyāneṣviva citiḥ svayam
||26||maraṇānantaraṃ karmaphalānubhavanakramam .
sarvasaṃdehaśāntyarthaṃ mṛtiśreyaskaraṃ śrṛṇu
||27||rūḍhādisarge niyatiryaikadvitricatuḥśatā .
pūrvādiṣvāyuṣaḥ puṃsāṃ tasyā me niyatiṃ śrṛṇu
||28||deśakālakriyādravyaśuddhyaśuddhī svakarmaṇām .
nyūnatve cādhikatve ca nṛṇāṃ kāraṇamāyuṣaḥ
||29||svakarmadharme hrasati hasatyāyurnṛṇāmiha .
vṛddhe vṛddhimupāyāti samameva bhavetsame
||30||bālamṛtyupradairbālo yuvā yauvanamṛtyudaiḥ .
vṛddhamṛtyupradairvṛddhaḥ karmabhirmṛtimṛcchati
||31||yo yathāśāstramārabdhaṃ svadharmanumatiṣṭhati .
bhājanaṃ bhavati śrīmānsa yathāśāstramāyuṣaḥ
||32||evaṃ karmānusāreṇa janturantyāṃ daśāmitaḥ .
bhavantyantaṃ gatavato dṛṅmarmacchedavedanāḥ
||33||prabuddhalīlovāca .
maraṇaṃ me samāsena kathayendusamānane . kiṃ sukhaṃ maraṇaṃ kiṃ vā duḥkhaṃ mṛtvā ca kiṃ bhavet ..
śrīdevyuvāca .
trividhāḥ puruṣāḥ santi dehasyānte mumūrṣavaḥ .
mūrkho'tha dhāraṇābhyāsī yuktimānpuruṣastathā
||35||abhyasya dhāraṇāniṣṭho dehaṃ tyaktvā yathāsukham .
prayāti dhāraṇābhyāsī yuktiyuktastathaiva ca
||36||dhāraṇā yasya nābhyāsaṃ prāptā naiva ca yuktimān .
mūrkhaḥ svamṛtikāle'sau duḥkhametyavaśāśayaḥ
||37||vāsanāveśavaivaśyaṃ bhāvayanviṣayāśayaḥ .
dīnatāṃ paramāmeti parilūnamivāmbujam
||38||aśāstrasaṃskṛtamatirasajjanaparāyaṇaḥ .
mṛtāvanubhavatyantardāhamagnāviva cyutaḥ
||39||yadā ghargharakaṇṭhatvaṃ vairūpyaṃ dṛṣṭivarṇajam .
gacchatyeṣo'vivekātmā tadā bhavati dīnadhīḥ
||40||paramāndhyamanāloko divāpyuditatārakaḥ .
sābhradigmaṇḍalābhogo ghanamecakitāmbaraḥ
||41||marmavyathāvicchuritaḥ prabhramadṛṣṭimaṇḍalaḥ .
ākāśībhūtavasudho vasudhābhūtakhāntaraḥ
||42||parivṛttakakupcakra uhyamāna ivārṇave .
nīyamāna ivākāśe ghananidronmukhāśayaḥ
||43||andhakūpa ivāpannaḥ śilāntariva yojitaḥ .
svayaṃ jaḍībhavadvarṇo vinikṛtta ivāśaye
||44||patatīva nabhomārgāttṛṇāvarta ivārpitaḥ .
rathe druta ivārūḍho him̐mavadgalanonmukhaḥ
||45||vyākurvanniva saṃsāraṃ bāndhavānaspṛśanniva .
bhramitakṣepaṇeneva vātayantra ivāsthitaḥ
||46||bhramito vā bhrama iva kṛṣṭo rasanayeva vā .
bhramanniva jalāvarte śastrayantra ivārpitaḥ
||47||prohyamānastṛṇamiva vahatparjanyamārute .
āruhya vāripūreṇa nipatanniva cārṇave
||48||anantagagane śvabhre cakrāvarte patanniva .
abdhirurvīviparyāsadaśāmanubhavansthitaḥ
||49||patannivānavarataṃ protpatanniva cābhitaḥ .
sūtkārākarṇanodbhrāntapūrṇasarvendriyavraṇaḥ
||50||kramācchayāmalatāṃ yānti tasya sarvākṣasaṃvidaḥ .
yathāstaṃ gacchati ravau mandālokatayā diśaṃ
||51||pūrvāparaṃ na jānāti smṛtistānavamāgatā .
yathā pāścātyasaṃdhyānte naṣṭā dṛṣṭirdigaṣṭake
||52||manaḥ kalpanasāmarthyaṃ tyajatyasya vimohataḥ .
avivekena tenāsau mahāmohe nimajjati
||53||yadaivāmohamādatte nādatte pavanastadā .
natvādatte yadā prāṇānmohamāyātyalaṃ tadā
||54||anyonyapuṣṭatāṃ yātairmohasaṃvedanabhramaiḥ .
jantuḥ pāṣāṇatāmeti sthitamityādisargataḥ
||55||prabuddhalīlovāca .
vyathāṃ vimohaṃ mūrcchāntaṃ bhramaṃ vyādhimacetanam .
kimarthamayamāyāti deho hyaṣṭāṅgavānapi
||56||śrīdevyuvāca .
evaṃ saṃvihitaṃ karma sargādau spandasaṃvidā .
yadyasminsamaye duḥkhaṃ kālenaitāvatedṛśam
||57||syānme ityeva saṃviśya gulmavattatsvabhāvajam .
vetti cittavijṛmbhotthaṃ nānyadatrāsti kāraṇam
||58||yadā vyathāvaśānnāḍyaḥ svasaṃkocavikāsanaiḥ .
gṛhṇantimāruto dehe tadojjhati nijāṃ sthitim
||59||praviṣṭā na viniryānti gatāḥ saṃpraviśanti no .
yadā vātā vināḍītvāttadā spandātsmṛtirbhavet
||60||na viśatyeva vāto na niryāti pavano yadā .
śarīranāḍīvaidhuryānmṛta ityucyate tadā
||61||āgantavyo mayā nāśaḥ kālenaitāvateti yā .
pūrvasaṃviditā saṃvidyāti taccoditā mṛtim
||62||īdṛśena mayehetthaṃ bhāvyamityādi sargajā .
saṃvidvījakalā nāśaṃ na kadācana gacchati
||63||saṃvido vedanaṃ nāma svabhāvo'vyatirekavān .
tasmātsvabhāvasaṃvitternānye maraṇajanmanī
||64||kvacidāvṛtimatsaumyaṃ kvacinnadyāṃ jalaṃ yathā .
kvacitsaumyaṃ kvacijjīvadharmedaṃ cetanaṃ tathā
||65||yathā latāyāḥ parvāṇi dīrghāyā madhyamadhyataḥ .
tathā cetanasattāyā janmāni maraṇāni ca
||66||na jāyate na mriyate cetanaḥ puruṣaḥ kvacit .
svapnasaṃbhramavadbhrāntametatpaśyati kevalam
||67||puruṣaścetanāmātraṃ sa kadā kveva naśyati .
cetanavyatiriktatve vadānyatkiṃ pumānbhavet
||68||ko'dyayāvanmṛtaṃ brūhi cetanaṃ kasya kiṃ katham .
mriyante dehalakṣāṇi cetanaṃ sthitamakṣayam
||69||amariṣyanna vai cittamekasminneva tanmṛte .
abhaviṣyatsarvabhāvamṛtirekamṛtāviha
||70||vāsanāmātravaicitryaṃ yajjīvo'nubhavetsvayam .
tasyaiva jīvamaraṇe nāmanī parikalpite
||71||evaṃ na kaścinmriyate jāyate na ca kaścana .
vāsanāvartagarteṣu jīvo luṭhati kevalam
||72||atyantāsaṃbhavādeva dṛśyasyāsau ca vāsanā .
nāstyeveti vicāreṇa dṛḍhajñātaiva naśyati
||73||anuditamuditaṃ jagatprabandhaṃ
bhavabhayato'bhyasanairvilokya samyak .
alamanuditavāsano hi jīvo
bhavati vimukta itīha satyavastu
||74||ityārṣe śrīvāsiṣṭhamahārāmāyaṇe vālmīkīye utpattiprakaraṇe līlo0 maraṇavicāro nāma catuḥpañcāśaḥ sargaḥ .. 54 ..