Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
etasminnantare rājā parivṛttākṣitārakaḥ .
babhūvaikatanuprāṇaśeṣaḥ śuṣkasitādharaḥ
||1||jīrṇaparṇasavarṇābhaḥ kṣīṇapāṇḍumukhacchaviḥ .
bhṛṅgadhvanitasacchāyaśvāsakūjāvikūṇitaḥ
||2||mahāmaraṇamūrcchāndhakūpe nipatitāśayaḥ .
antarnilīnaniḥśeṣanetrādīndriyavṛttimān
||3||citranyasta ivākāramātradṛśyo vicetanaḥ .
niḥspandasarvāvayavaḥ samutkīrṇa ivopale
||4||bahunātra kimuktena tanudeśena taṃ jahau .
prāṇaḥ pipatiṣuṃ vṛkṣaṃ svaṃ pakṣīvāntarikṣagaḥ
||5||te taṃ dadṛśaturbāle divyadṛṣṭī nabhogatam .
jīvaṃ prāṇamayī saṃvidgandhaleśamivānile
||6||sā jīvasaṃvidgagane vātena militā satī .
khe dūraṃ gantumārebhe vāsanānuvidhāyinī
||7||tāmevānusasārātha strīdvayaṃ jīvasaṃvidam .
bhramarīyugalaṃ vātalagnāṃ gandhakalāmiva
||8||tato muhūrtamātreṇa śānte maraṇamūrcchane .
ambare bubudhe saṃvidgandhalekhena vāyunā
||9||apaśyatpuruṣānyāmyānnīyamānaṃ ca tairvapuḥ .
bandhupiṇḍapradānena śarīraṃ jātamātmanaḥ
||10||mārge karmaphalollāsamatidūratare sthitam .
vaivasvatapuraṃ prāpa jantubhiḥ pariveṣṭitam
||11||prāptaṃ vaivasvatapuramādideśa tato yamaḥ .
asya karmāṇyaśubhrāṇi naiva santi kadācana
||12||nityamevāvadātānāṃ kartāyaṃ śubhakarmaṇām .
bhagavatyāḥ sarasvatyā vareṇāyaṃ vivardhitaḥ
||13||prāktano'sya śavībhūto deho'sti kusumāmbare .
praviśatveṣa taṃ gatvā tyajyatāmiti cetasā
||14||tatastyakto nabhomārge yantropala iva cyutaḥ .
atha jīvakalā līlā jñaptiśceti trayaṃ nabhaḥ
||15||pupluve jīvalekhā tu rūpiṇyau te na paśyati .
tāmevānusarantyau te samullaṅghya nabhastalam
||16||lokāntarāṇyatītyāśu vinirgatya jagadgṛhāt .
dvitīyaṃ jagadāsādya bhūmaṇḍalamupetya ca
||17||te dve saṃkalparūpiṇyau saṃgate jīvalekhayā .
padmarājapuraṃ prāpya līlāntaḥpuramaṇḍapam
||18||kṣaṇādviviśatuḥ svairaṃ vātalekhā yathāmbujam .
sūryabhāso yathāmbhojaṃ surabhiḥ pavanaṃ yathā
||19||śrīrāma uvāca .
brahmanprāptaḥ kathamasau śavasya nikaṭaṃ gṛham .
kathaṃ tena parijñāto mārgo mṛtaśarīriṇā
||20||śrīvasiṣṭha uvāca .
tasya svavāsanāntaḥsthaśavasya kila rāghava .
tatsarvaṃ hṛdgataṃ kasmānnāsau prāpnoti tadgṛham
||21||bhrāntimātramasaṃkhyeyaṃ jagajjīvakaṇodare .
vaṭadhānātarumiva sthitaṃ ko vā na paśyati
||22||yathā jīvadvapurbījamaṅkuraṃ hṛdi paśyati .
svabhāvabhūtaṃ cidaṇustrailokyanicayaṃ tathā
||23||naro yathaikadeśastho dūradeśāntarasthitam .
saṃpaśyati nidhānaṃ svaṃ manasānārataṃ sadā
||24||tathā svavāsanāntasthamabhīṣṭaṃ paripaśyati .
jīvo jātiśatāḍhyo'pi bhrame parigato'pi san
||25||śrīrāma uvāca .
bhagavanpiṇḍadānādivāsanārahitākṛtiḥ .
kīdṛksaṃpadyate jīvaḥ piṇḍo yasmai na dīyate
||26||śrīvasiṣṭha uvāca .
piṇḍo'tha dīyate māvā piṇḍo datto mayeti cit .
vāsanā hṛdi saṃrūḍhā tatpiṇḍaphalabhāṅgaraḥ
||27||yaccittaṃ tanmayo janturbhavatītyanubhūtayaḥ .
sadeheṣu videheṣu na bhavatyanyathā kvacit
||28||sapiṇḍosmīti saṃvittyā niṣpiṇḍopi sapiṇḍavān
niṣpiṇḍosmīti saṃvittyā sapiṇḍopi napiṇḍavān
||29||yathābhāvanameteṣāṃ padārthānāṃ hi satyatā .
bhāvanā ca padārthebhyaḥ kāraṇebhya udeti hi
||30||yathā vāsanayā jantorviṣamapyamṛtāyate .
asatyaḥ satyatāmeti padārtho bhāvanāttathā
||31||kāraṇena vinodeti na kadācana kasyacit .
bhāvanā kācidapi no iti niścayavānbhava
||32||kāraṇena vinā kāryamā mahāpralayaṃ kvacit .
na dṛṣṭaṃ na śrutaṃ kiṃcitsvayaṃ tvekodayādṛte
||33||cideva vāsanā saiva dhatte svapna ivārthatām .
kāryakāraṇatāṃ yāti saivāgatyeva tiṣṭhati
||34||śrīrāma uvāca .
dharmo nāsti mametyeva yaḥ preto vāsanānvitaḥ .
tasya cetsuhṛdā bhūridharmaḥ kṛtvā samarpitaḥ
||35||tattadātra sa kiṃ dharmo naṣṭaḥ syāduta vā na vā .
satyārthā vāpyasatyārthā bhāvanā kiṃ balādhikā
||36||śrīvasiṣṭha uvāca .
deśakālakriyādravyasaṃpattyodeti bhāvanā .
yatraivābhyuditā sā syātsa dvayoradhiko jayī
||37||dharmadātuḥ pravṛttā cedvāsanā tattayā kramāt .
āpūryate pretamatirna cetpretadhiyāśubhā
||38||evaṃ parasparajayājjayatyatrātivīyevān .
tasmācchubhena yatnena śubhābhyāsamudāharet
||39||śrīrāma uvāca .
deśakālādinā brahmanvāsanā samudeti cet .
tanmahākalpasargādau deśakālādayaḥ kutaḥ
||40||kāraṇe samudetīdaṃ taistadā sahakāribhiḥ .
sahakārikāraṇānāmabhāve vāsanā kutaḥ
||41||śrīvasiṣṭha uvāca .
evametanmahābāho satyātmanna kadācana .
mahāpralayasargādau deśakālau na kaucana
||42||sahakārikāraṇānāmabhāve sati dṛśyadhīḥ .
neyamasti na cotpannā na ca sphurati kācana
||43||dṛśyasyāsaṃbhavādeva kiṃcidyaddṛśyate tvidam .
tadbrahmaiva svacidrūpaṃ sthitamitthamanāmayam
||44||etaccāgre yuktiśataiḥ kathayiṣyāma eva te .
etadarthaṃ prayatno'yaṃ vartamānakathāṃ śrṛṇu
||45||evaṃ dadṛśatuḥ prāpte mandiraṃ sundarodaram .
kīrṇaṃ puṣpopahāreṇa vasantamiva śītalam
||46||praśāntācārasaṃrambharājadhānyā samanvitam .
mandārakundamālyādiśavaṃ tatra samaṃ sthitam
||47||mandārakundasragdāmavṛtāmvarabṛhacchavam .
śavaśayyāśiraḥsthāgryapūrṇakumbhādimaṅgalam
||48||anivṛttagṛhadvāragavākṣakaṭhinārgalam .
praśāmyaddīpakālokaśyāmalāmalabhittikam .
gṛhaikadeśasaṃsuptamukhaśvāsasamīkṛtam
||49||saṃpūrṇacandrasakalodayakāntikāntaṃ
saundaryanirjitapurandaramandirarddhi .
vairiñcapadmamukulāntaracāruśobhaṃ
niḥśabdamandamiva nirmalamindukāntam
||50||ityārṣe śrīvāsiṣṭhamahārāmāyaṇe vālmīkīye utpattipra0 līlo0 maraṇaśayanānantarapretavyavasthā nāma ṣaṭpañcāśaḥ sargaḥ .. 56 ..