viṣṇuharimāhātmyavarṇanam
ayodhyāmāhātmyaṃ prārabhyate
jayati parāśarasūnuḥ satyavatīhṛdayanaṃdano vyāsaḥ ||
yasyāsyakamalagalitaṃ vāṅmayamamṛtaṃ jagatpibati
||1||जयति पराशरसूनुः सत्यवतीहृदयनंदनो व्यासः ॥
यस्यास्यकमलगलितं वाङ्मयममृतं जगत्पिबति
nārāyaṇaṃ namaskṛtya naraṃ caiva narottamam ||
devīṃ sarasvatīṃ caiva tato jayamudīrayet
||2||नारायणं नमस्कृत्य नरं चैव नरोत्तमम् ॥
देवीं सरस्वतीं चैव ततो जयमुदीरयेत्
vyāsa uvāca
himavadvāsinaḥ sarve munayo vedapāragāḥ ||
trikālajñā mahātmāno naimiṣāraṇyavāsinaḥ
||3||हिमवद्वासिनः सर्वे मुनयो वेदपारगाः ॥
त्रिकालज्ञा महात्मानो नैमिषारण्यवासिनः
ye'rbudāraṇyaniratā daṇḍakāraṇyavāsinaḥ ||
mahendrādriratā ye vai ye ca vindhyanivāsinaḥ
||4||येऽर्बुदारण्यनिरता दण्डकारण्यवासिनः ॥
महेन्द्राद्रिरता ये वै ये च विन्ध्यनिवासिनः
jaṃbūvanaratā ye ca ye godāvarivāsinaḥ ||
vārāṇasīśritā ye ca mathurāvāsinastathā
||5||जंबूवनरता ये च ये गोदावरिवासिनः ॥
वाराणसीश्रिता ये च मथुरावासिनस्तथा
ujjayinyāṃ ratā ye ca prathamāśramavāsinaḥ ||
dvārāvatīśritā ye ca badaryyāśrayiṇastathā
||6||उज्जयिन्यां रता ये च प्रथमाश्रमवासिनः ॥
द्वारावतीश्रिता ये च बदर्य्याश्रयिणस्तथा
māyāpurīśritā ye ca ye ca kāntīnivāsinaḥ ||
ete cānye ca munayaḥ saśiṣyā bahavo'malāḥ
||7||मायापुरीश्रिता ये च ये च कान्तीनिवासिनः ॥
एते चान्ये च मुनयः सशिष्या बहवोऽमलाः
kurukṣetre mahākṣetre satre dvādaśavārṣike ||
vartamāne ca rāmasya kṣitīśasya mahātmanaḥ ||
samāgatāḥ samāhūtāḥ sarve te munayo'malāḥ
||8||कुरुक्षेत्रे महाक्षेत्रे सत्रे द्वादशवार्षिके ॥
वर्तमाने च रामस्य क्षितीशस्य महात्मनः ॥
समागताः समाहूताः सर्वे ते मुनयोऽमलाः
sarve te śuddhamanaso vedavedāṃgapāragāḥ ||
tatra snātvā yathānyāyaṃ kṛtvā karma japādikam
||9||सर्वे ते शुद्धमनसो वेदवेदांगपारगाः ॥
तत्र स्नात्वा यथान्यायं कृत्वा कर्म जपादिकम्
bhāradvājaṃ puraskṛtya vedavedāṃgapāragam ||
āsaneṣu vicitreṣu bṛṣyādiṣu hyanukramāt
||10||भारद्वाजं पुरस्कृत्य वेदवेदांगपारगम् ॥
आसनेषु विचित्रेषु बृष्यादिषु ह्यनुक्रमात्
upaviṣṭāḥ kathāścakrurnānātīrthāśritāstadā ||
karmāṃtareṣu satrasya sukhāsīnāḥ parasparam
||11||उपविष्टाः कथाश्चक्रुर्नानातीर्थाश्रितास्तदा ॥
कर्मांतरेषु सत्रस्य सुखासीनाः परस्परम्
kathāṃteṣu tatasteṣāṃ munīnāṃ bhāvitātmanām ||
ājagāma mahātejāstatra sūto mahāmatiḥ
||12||कथांतेषु ततस्तेषां मुनीनां भावितात्मनाम् ॥
आजगाम महातेजास्तत्र सूतो महामतिः
vyāsaśiṣyaḥ purāṇajño samaḥ harṣaṇasaṃjñakaḥ ||
tānpraṇamya yathānyāyaṃ munīnupaviveśa saḥ ||
upaviṣṭo yathānyāyaṃ munīnāṃ vacanena saḥ
||13||व्यासशिष्यः पुराणज्ञो समः हर्षणसंज्ञकः ॥
तान्प्रणम्य यथान्यायं मुनीनुपविवेश सः ॥
उपविष्टो यथान्यायं मुनीनां वचनेन सः
vyāsaśiṣyaṃ munivaraṃ sūtaṃ vai romaharṣaṇam ||
taṃ papracchurmunivarā bhāradvājādayo'malāḥ
||14||व्यासशिष्यं मुनिवरं सूतं वै रोमहर्षणम् ॥
तं पप्रच्छुर्मुनिवरा भारद्वाजादयोऽमलाः
ṛṣaya ūcuḥ
tvattaḥ śrutā mahābhāga nānātīrthāśritāḥ kathāḥ ||
sarahasyāni sarvāṇi purāṇāni mahāmate
||15||त्वत्तः श्रुता महाभाग नानातीर्थाश्रिताः कथाः ॥
सरहस्यानि सर्वाणि पुराणानि महामते
sāṃprataṃ śrotumicchāmaḥ sarahasyaṃ sanātanam ||
ayodhyāyā mahāpuryā mahimānaṃ guṇojjvalam
||16||सांप्रतं श्रोतुमिच्छामः सरहस्यं सनातनम् ॥
अयोध्याया महापुर्या महिमानं गुणोज्ज्वलम्
kīdṛśī sā sadā medhyā'yodhyā viṣṇupriyāpurī ||
ādyā sā gīyate vede purīṇāṃ muktidāyikā
||17||कीदृशी सा सदा मेध्याऽयोध्या विष्णुप्रियापुरी ॥
आद्या सा गीयते वेदे पुरीणां मुक्तिदायिका
saṃsthānaṃ kīdṛśaṃ tasyāstasyāṃ ke ca mahībhujaḥ ||
kāni tīrthāni puṇyāni māhātmyaṃ teṣu kīdṛśam
||18||संस्थानं कीदृशं तस्यास्तस्यां के च महीभुजः ॥
कानि तीर्थानि पुण्यानि माहात्म्यं तेषु कीदृशम्
ayodhyāsevanānnṛṇāṃ phalaṃ syātsūta kīdṛśam ||
kiṃ caritraṃ sūta tasyāḥ kā nadyaḥ ke ca saṃgamāḥ
||19||अयोध्यासेवनान्नृणां फलं स्यात्सूत कीदृशम् ॥
किं चरित्रं सूत तस्याः का नद्यः के च संगमाः
tatra snānena kiṃ puṇyaṃ dānena ca mahāmate ||
tatsarvaṃ śrotumicchāmastvattaḥ sūta guṇādhika
||20||तत्र स्नानेन किं पुण्यं दानेन च महामते ॥
तत्सर्वं श्रोतुमिच्छामस्त्वत्तः सूत गुणाधिक
etatsarvaṃ krameṇaiva tathyaṃ tvaṃ vettha sāṃpratam ||
ayodhyāyā mahāpuryyā māhātmyaṃ vaktumarhasi
||21||एतत्सर्वं क्रमेणैव तथ्यं त्वं वेत्थ सांप्रतम् ॥
अयोध्याया महापुर्य्या माहात्म्यं वक्तुमर्हसि
sūta uvāca
vyāsaprasādājjānāmi purāṇāni tapodhanāḥ ||
setihāsāni sarvāṇi sarahasyāni tattvataḥ
||22||व्यासप्रसादाज्जानामि पुराणानि तपोधनाः ॥
सेतिहासानि सर्वाणि सरहस्यानि तत्त्वतः
taṃ praṇamya pravakṣyāmi māhātmyaṃ bhavadagrataḥ ||
ayodhyāyā mahāpuryā yathāvatsarahasyakam
||23||तं प्रणम्य प्रवक्ष्यामि माहात्म्यं भवदग्रतः ॥
अयोध्याया महापुर्या यथावत्सरहस्यकम्
vidyāvantaṃ vipulamatidaṃ vedavedāṃgavedyaṃ śreṣṭhaṃ śāntaṃ śamitaviṣayaṃ śuddhatejoviśālam ||
vedavyāsaṃ satatavinataṃ viśvavedyaikayoniṃ pārāśaryyaṃ paramapuruṣaṃ sarvadā'haṃ namāmi
||24||विद्यावन्तं विपुलमतिदं वेदवेदांगवेद्यं श्रेष्ठं शान्तं शमितविषयं शुद्धतेजोविशालम् ॥
वेदव्यासं सततविनतं विश्ववेद्यैकयोनिं पाराशर्य्यं परमपुरुषं सर्वदाऽहं नमामि
oṃ namo bhagavate tasmai vyāsāyāmitatejase ||
yasya prasādājjānāmi hyayodhyāmahimāmaham
||25||ॐ नमो भगवते तस्मै व्यासायामिततेजसे ॥
यस्य प्रसादाज्जानामि ह्ययोध्यामहिमामहम्
śṛṇvantu munayaḥ sarve sāvadhānāḥ saśiṣyakāḥ ||
māhātmyaṃ kathayiṣyāmi ayodhyāyā mahodayam
||26||शृण्वन्तु मुनयः सर्वे सावधानाः सशिष्यकाः ॥
माहात्म्यं कथयिष्यामि अयोध्याया महोदयम्
udīritamagastyāya skandenāśrāvi nāradāt ||
agastyena purā proktaṃ kṛṣṇadvaipāyanāya tat
||27||उदीरितमगस्त्याय स्कन्देनाश्रावि नारदात् ॥
अगस्त्येन पुरा प्रोक्तं कृष्णद्वैपायनाय तत्
kṛṣṇadvaipāyanāccaitanmayā prāptaṃ tapodhanāḥ ||
tadahaṃ vacmi yuṣmabhyaṃ śrotukāmebhya ādarāt
||28||कृष्णद्वैपायनाच्चैतन्मया प्राप्तं तपोधनाः ॥
तदहं वच्मि युष्मभ्यं श्रोतुकामेभ्य आदरात्
namāmi paramātmānaṃ rāmaṃ rājīvalocanam ||
atasīkusumaśyāmaṃ rāvaṇāṃtakamavyayam
||29||नमामि परमात्मानं रामं राजीवलोचनम् ॥
अतसीकुसुमश्यामं रावणांतकमव्ययम्
ayodhyā sā parā medhyā purī duṣkṛtidurllabhā ||
kasya sevyā ca nā'yodhyā yasyāṃ sākṣāddhariḥ svayam
||30||अयोध्या सा परा मेध्या पुरी दुष्कृतिदुर्ल्लभा ॥
कस्य सेव्या च नाऽयोध्या यस्यां साक्षाद्धरिः स्वयम्
sarayūtīramāsādya divyā paramaśobhanā ||
amarāvatīnibhā prāyaḥ śritā bahutapodhanaiḥ
||31||सरयूतीरमासाद्य दिव्या परमशोभना ॥
अमरावतीनिभा प्रायः श्रिता बहुतपोधनैः
hastyaśvarathapattyāḍhyā saṃpaduccā ca saṃsthitā ||
prākārāḍhyapratolībhistoraṇaiḥ kāṃcanaprabhaiḥ
||32||हस्त्यश्वरथपत्त्याढ्या संपदुच्चा च संस्थिता ॥
प्राकाराढ्यप्रतोलीभिस्तोरणैः कांचनप्रभैः
sānūpaveṣaiḥ sarvatra suvibhaktacatuṣṭayā ||
anekabhūmiprāsādā bahubhittisuvikriyā
||33||सानूपवेषैः सर्वत्र सुविभक्तचतुष्टया ॥
अनेकभूमिप्रासादा बहुभित्तिसुविक्रिया
padmotphullaśubhodābhirvāpībhirupaśobhitā ||
devatāyatanairdivyairvedaghoṣaiśca maṇḍitā
||34||पद्मोत्फुल्लशुभोदाभिर्वापीभिरुपशोभिता ॥
देवतायतनैर्दिव्यैर्वेदघोषैश्च मण्डिता
vīṇāveṇumṛdaṃgādiśabdairutkṛṣṭatāṃ gatā|
śālaistālairnālikeraiḥ panasāmalakaistathā
||35||वीणावेणुमृदंगादिशब्दैरुत्कृष्टतां गता।
शालैस्तालैर्नालिकेरैः पनसामलकैस्तथा
tathaivāmrakapitthādyairaśokairupaśobhitā ||
ārāmairvividhairyuktā sarvartuphalapādapaiḥ
||36||तथैवाम्रकपित्थाद्यैरशोकैरुपशोभिता ॥
आरामैर्विविधैर्युक्ता सर्वर्तुफलपादपैः
mālatījātibakulapāṭalīnāgacaṃpakaiḥ ||
karavīraiḥ karṇikāraiḥ ketakībhiralaṃkṛtā
||37||मालतीजातिबकुलपाटलीनागचंपकैः ॥
करवीरैः कर्णिकारैः केतकीभिरलंकृता
nimbajaṃvīrakadalīmātuliṃgamahāphalaiḥ ||
lasaccaṃdanagaṃdhāḍhyairnāgarairupaśobhitā
||38||निम्बजंवीरकदलीमातुलिंगमहाफलैः ॥
लसच्चंदनगंधाढ्यैर्नागरैरुपशोभिता
devatulyaprabhāyuktairnṛpaputraiśca saṃyutā ||
surūpābhirvarastrībhirdevastrībhirivāvṛtā
||39||देवतुल्यप्रभायुक्तैर्नृपपुत्रैश्च संयुता ॥
सुरूपाभिर्वरस्त्रीभिर्देवस्त्रीभिरिवावृता
śreṣṭhaiḥ satkavibhiryuktā bṛhaspatisamairdvijaiḥ ||
vaṇigjanaistathā pauraiḥ kalpavṛkṣairivāvṛtā
||40||श्रेष्ठैः सत्कविभिर्युक्ता बृहस्पतिसमैर्द्विजैः ॥
वणिग्जनैस्तथा पौरैः कल्पवृक्षैरिवावृता
aśvairuccaiḥśravastulyairdaṃtibhirdiggajairiva ||
iti nānāvidhairbhāvairupetendrapurī samā
||41||अश्वैरुच्चैःश्रवस्तुल्यैर्दंतिभिर्दिग्गजैरिव ॥
इति नानाविधैर्भावैरुपेतेन्द्रपुरी समा
yasyāṃ jātā mahīpālāḥ sūryavaṃśasamudbhavāḥ ||
ikṣvākupramukhāḥ sarve prajāpālanatatparāḥ
||42||यस्यां जाता महीपालाः सूर्यवंशसमुद्भवाः ॥
इक्ष्वाकुप्रमुखाः सर्वे प्रजापालनतत्पराः
yasyāstīre puṇyatoyā kūjadbhṛṃgavihaṃgamā ||
sarayūrnāma taṭinī mānasaprabhavollasā
||43||यस्यास्तीरे पुण्यतोया कूजद्भृंगविहंगमा ॥
सरयूर्नाम तटिनी मानसप्रभवोल्लसा
dharmadravaparītā sā ghargharottamasaṃgamā ||
munīśvarāśritataṭā jāgarti jagaducchritā
||44||धर्मद्रवपरीता सा घर्घरोत्तमसंगमा ॥
मुनीश्वराश्रिततटा जागर्ति जगदुच्छ्रिता
dakṣiṇāccaraṇāṃguṣṭhānniḥsṛtā jāhnavī hareḥ ||
vāmāṃguṣṭhānmunivarāḥ sarayūrnirgatā śubhā
||45||दक्षिणाच्चरणांगुष्ठान्निःसृता जाह्नवी हरेः ॥
वामांगुष्ठान्मुनिवराः सरयूर्निर्गता शुभा
tasmādime puṇyatame nadyau devanamaskṛte ||
etayoḥ snānamātreṇa brahmahatyāṃ vyapohati
||46||तस्मादिमे पुण्यतमे नद्यौ देवनमस्कृते ॥
एतयोः स्नानमात्रेण ब्रह्महत्यां व्यपोहति
tāmayodhyāmatha prāpto'gastyaḥ kumbhodbhavo muniḥ ||
yātrārthaṃ tīrthamāhātmyaṃ jñātvā skandaprasādataḥ
||47||तामयोध्यामथ प्राप्तोऽगस्त्यः कुम्भोद्भवो मुनिः ॥
यात्रार्थं तीर्थमाहात्म्यं ज्ञात्वा स्कन्दप्रसादतः
āgatya tu itaḥ so'pi kṛ'tvā yātrāṃ krameṇa ca ||
yathoktena vidhānena snātvā saṃtarpya tānpitṝn
||48||आगत्य तु इतः सोऽपि कृऽत्वा यात्रां क्रमेण च ॥
यथोक्तेन विधानेन स्नात्वा संतर्प्य तान्पितॄन्
pūjayitvā yathānyāyaṃ devatāḥ sakalā api ||
sarvāṇyapi ca tīrthāni namaskṛtya yathāvidhi
||49||पूजयित्वा यथान्यायं देवताः सकला अपि ॥
सर्वाण्यपि च तीर्थानि नमस्कृत्य यथाविधि
kṛtakṛtyorjjitānandastīrthamāhātmyadarśanāt ||
abhūdagastyo rūpeṇa pulakāṃ citavigrahaḥ
||50||कृतकृत्योर्ज्जितानन्दस्तीर्थमाहात्म्यदर्शनात् ॥
अभूदगस्त्यो रूपेण पुलकां चितविग्रहः
sa trirātraṃ sthitastatra yātrāṃ kṛtvā yathāvidhi ||
stuvannayodhyāmāhātmyaṃ pratasthe munisattamaḥ
||51||स त्रिरात्रं स्थितस्तत्र यात्रां कृत्वा यथाविधि ॥
स्तुवन्नयोध्यामाहात्म्यं प्रतस्थे मुनिसत्तमः
tamāyāṃtaṃ vilokyāśu bahulānandasundaram ||
kṛṣṇadvaipāyano vyāsaḥ papracchānaṃdakāraṇam
||52||तमायांतं विलोक्याशु बहुलानन्दसुन्दरम् ॥
कृष्णद्वैपायनो व्यासः पप्रच्छानंदकारणम्
vyāsa uvāca
kutaḥ samāgato brahmansāṃprataṃ munisattamaḥ ||
paramānaṃdasaṃdohaḥ samabhūtsāṃprataṃ tava
||53||कुतः समागतो ब्रह्मन्सांप्रतं मुनिसत्तमः ॥
परमानंदसंदोहः समभूत्सांप्रतं तव
kasmādānaṃdapoṣo'bhūttava brahmanvadasva me ||
mamāpi bhavadānaṃdātpramodo hṛdi jāyate
||54||कस्मादानंदपोषोऽभूत्तव ब्रह्मन्वदस्व मे ॥
ममापि भवदानंदात्प्रमोदो हृदि जायते
agastya uvāca
aho mahadathāścaryyaṃ vismayo munisattama ||
dṛṣṭvā prabhāvaṃ me'dyābhūdayodhyāyāstapodhana
||55||अहो महदथाश्चर्य्यं विस्मयो मुनिसत्तम ॥
दृष्ट्वा प्रभावं मेऽद्याभूदयोध्यायास्तपोधन
tasmādānaṃdasaṃdohaḥ samabhūnmama sāṃpratam ||
tacchrutvāgastyavacanaṃ vyāsaḥ provāca taṃ munim
||56||तस्मादानंदसंदोहः समभून्मम सांप्रतम् ॥
तच्छ्रुत्वागस्त्यवचनं व्यासः प्रोवाच तं मुनिम्
vyāsa uvāca
bhagavanbrūhi tattvena vistarātsarahasyakam ||
ayodhyāyā mahāpuryā mahimānaṃ guṇādhikam
||57||भगवन्ब्रूहि तत्त्वेन विस्तरात्सरहस्यकम् ॥
अयोध्याया महापुर्या महिमानं गुणाधिकम्
kaḥ kramastīrthayātrāyāḥ kāni tīrthāni ko vidhiḥ ||
ki phalaṃ snānatastatra dānasya ca mahāmune ||
etatsarvaṃ samācakṣva vistarādvadatāṃ vara
||58||कः क्रमस्तीर्थयात्रायाः कानि तीर्थानि को विधिः ॥
कि फलं स्नानतस्तत्र दानस्य च महामुने ॥
एतत्सर्वं समाचक्ष्व विस्तराद्वदतां वर
agastya uvāca
aho dhanyatamā buddhistava jātā tapodhana ||
dṛśyate yena pṛcchā te hyayodhyāmahimāśritā
||59||अहो धन्यतमा बुद्धिस्तव जाता तपोधन ॥
दृश्यते येन पृच्छा ते ह्ययोध्यामहिमाश्रिता
akāro brahma ca proktaṃ yakāro viṣṇurucyate ||
dhakāro rudrarūpaśca ayodhyānāma rājate
||60||अकारो ब्रह्म च प्रोक्तं यकारो विष्णुरुच्यते ॥
धकारो रुद्ररूपश्च अयोध्यानाम राजते
sarvopapātakairyuktairbrahmahatyādipātakaiḥ ||
nāyodhyā śakyate yasmāttāmayodhyāṃ tato viduḥ
||61||सर्वोपपातकैर्युक्तैर्ब्रह्महत्यादिपातकैः ॥
नायोध्या शक्यते यस्मात्तामयोध्यां ततो विदुः
viṣṇorādyā purī yeyaṃ kṣitiṃ na spṛśati dvija ||
viṣṇoḥ sudarśane cakre sthitā puṇyakarī kṣitau
||62||विष्णोराद्या पुरी येयं क्षितिं न स्पृशति द्विज ॥
विष्णोः सुदर्शने चक्रे स्थिता पुण्यकरी क्षितौ
kena varṇayituṃ śakyo mahimā'syāstapodhana ||
yatra sākṣātsvayaṃ devo viṣṇurvasati sādaraḥ
||63||केन वर्णयितुं शक्यो महिमाऽस्यास्तपोधन ॥
यत्र साक्षात्स्वयं देवो विष्णुर्वसति सादरः
sahasradhārāmārabhya yojanaṃ pūrvato diśi ||
pratīci diśi tathaiva yojanaṃ samatovadhiḥ
||64||सहस्रधारामारभ्य योजनं पूर्वतो दिशि ॥
प्रतीचि दिशि तथैव योजनं समतोवधिः
dakṣiṇottarabhāge tu sarayūtamasāvadhiḥ ||
etatkṣetrasya saṃsthānaṃ harerantargṛhaṃ sthitam ||
matsyākṛtiriyaṃ vipra purī viṣṇorudīritā
||65||दक्षिणोत्तरभागे तु सरयूतमसावधिः ॥
एतत्क्षेत्रस्य संस्थानं हरेरन्तर्गृहं स्थितम् ॥
मत्स्याकृतिरियं विप्र पुरी विष्णोरुदीरिता
paścime tasya mūrddhā tu gopratārāsitā dvija
||66||पश्चिमे तस्य मूर्द्धा तु गोप्रतारासिता द्विज
pūrvataḥ pṛṣṭhabhāgo hi dakṣiṇottaramadhyamaḥ ||
tasyāṃ puryyāṃ mahābhāga nāmnā viṣṇurhariḥ svayam ||
pūrvaṃdṛṣṭaprabhāvo'sau prādhānyena vasatyapi
||67||पूर्वतः पृष्ठभागो हि दक्षिणोत्तरमध्यमः ॥
तस्यां पुर्य्यां महाभाग नाम्ना विष्णुर्हरिः स्वयम् ॥
पूर्वंदृष्टप्रभावोऽसौ प्राधान्येन वसत्यपि
vyāsa uvāca
bhagavankiṃ prabhāvo'sau yo'yaṃ viṣṇuharistvayā ||
kīrtito muniśārdūla prasiddhiṃ gatavānkatham ||
etatsarvaṃ samācakṣva vistareṇa mamāgrataḥ
||68||भगवन्किं प्रभावोऽसौ योऽयं विष्णुहरिस्त्वया ॥
कीर्तितो मुनिशार्दूल प्रसिद्धिं गतवान्कथम् ॥
एतत्सर्वं समाचक्ष्व विस्तरेण ममाग्रतः
agastya uvāca
viṣṇuśarmeti vikhyātaḥ purābhūdbrāhmaṇottamaḥ ||
vedavedāṃgatattvajño dharmakarmasamāśritaḥ
||69||विष्णुशर्मेति विख्यातः पुराभूद्ब्राह्मणोत्तमः ॥
वेदवेदांगतत्त्वज्ञो धर्मकर्मसमाश्रितः
yogadhyānarato nityaṃ viṣṇubhaktiparāyaṇaḥ ||
sa kadācittīrthayātrāṃ kurvanvaiṣṇavasattamaḥ ||
ayodhyāmāgato viṣṇurviṣṇuḥsākṣādvasediti
||70||योगध्यानरतो नित्यं विष्णुभक्तिपरायणः ॥
स कदाचित्तीर्थयात्रां कुर्वन्वैष्णवसत्तमः ॥
अयोध्यामागतो विष्णुर्विष्णुःसाक्षाद्वसेदिति
ciṃtayanmanasā vīrastapaḥ kartuṃ samudyataḥ ||
sa vai tatra tapastepe śākamūlaphalāśanaḥ
||71||चिंतयन्मनसा वीरस्तपः कर्तुं समुद्यतः ॥
स वै तत्र तपस्तेपे शाकमूलफलाशनः
grīṣme paṃcāgnimadhyastho hyatapatsa mahātapāḥ ||
vārṣike ca nirālambo hemante ca sarovare
||72||ग्रीष्मे पंचाग्निमध्यस्थो ह्यतपत्स महातपाः ॥
वार्षिके च निरालम्बो हेमन्ते च सरोवरे
snātvā yathoktavidhinā kṛtvā viṣṇostathārcanam ||
vaśīkṛtyendriyagrāmaṃ viśuddhenāṃtarātmanā
||73||स्नात्वा यथोक्तविधिना कृत्वा विष्णोस्तथार्चनम् ॥
वशीकृत्येन्द्रियग्रामं विशुद्धेनांतरात्मना
mano viṣṇau samāveśya vidhāya prāṇasaṃyamam ||
oṃkāroccāraṇāddhīmānhṛdi padmaṃ vikāsayan
||74||मनो विष्णौ समावेश्य विधाय प्राणसंयमम् ॥
ॐकारोच्चारणाद्धीमान्हृदि पद्मं विकासयन्
tanmadhye ravisomāgnimaṇḍalāni yathāvidhi ||
kalpayitvā hariṃ mūrtaṃ yasmindeśe sanātanam
||75||तन्मध्ये रविसोमाग्निमण्डलानि यथाविधि ॥
कल्पयित्वा हरिं मूर्तं यस्मिन्देशे सनातनम्
pītāṃbaradharaṃ viṣṇuṃ śaṃkhacakragadādharam ||
taṃ ca puṣpaiḥ samabhyarcya manastasminniveśya ca
||76||पीतांबरधरं विष्णुं शंखचक्रगदाधरम् ॥
तं च पुष्पैः समभ्यर्च्य मनस्तस्मिन्निवेश्य च
brahmarūpaṃ hariṃ dhyāyañjapanvai dvādaśākṣaram ||
vāyubhakṣaḥ sthitastatra viprastrīnvatsarānvasan
||77||ब्रह्मरूपं हरिं ध्यायञ्जपन्वै द्वादशाक्षरम् ॥
वायुभक्षः स्थितस्तत्र विप्रस्त्रीन्वत्सरान्वसन्
tato dvijavaro dhyātvā stutiṃ cakre harerimām ||
praṇipatya jagannāthaṃ carācaraguruṃ harim ||
viṣṇuśarmātha tuṣṭāva nārāyaṇamataṃdritaḥ
||78||ततो द्विजवरो ध्यात्वा स्तुतिं चक्रे हरेरिमाम् ॥
प्रणिपत्य जगन्नाथं चराचरगुरुं हरिम् ॥
विष्णुशर्माथ तुष्टाव नारायणमतंद्रितः
viṣṇuśarmmovāca
prasīda bhagavanviṣṇo prasīda puruṣottama ||
prasīda devadeveśa prasīda kamalekṣaṇa
||79||प्रसीद भगवन्विष्णो प्रसीद पुरुषोत्तम ॥
प्रसीद देवदेवेश प्रसीद कमलेक्षण
jaya kṛṣṇa jayāciṃtya jaya viṣṇo jayāvyaya ||
jaya yajñapate nātha jaya viṣṇo pate vibho
||80||जय कृष्ण जयाचिंत्य जय विष्णो जयाव्यय ॥
जय यज्ञपते नाथ जय विष्णो पते विभो
jaya pāpaharānaṃta jaya janmajvarāpaha ||
namaḥ kamalanābhāya namaḥ kamalamāline
||81||जय पापहरानंत जय जन्मज्वरापह ॥
नमः कमलनाभाय नमः कमलमालिने
namaḥ sarveśa bhūteśa namaḥ kaiṭabhasūdana ||
namastrailokyanāthāya jaganmūla jagatpate
||82||नमः सर्वेश भूतेश नमः कैटभसूदन ॥
नमस्त्रैलोक्यनाथाय जगन्मूल जगत्पते
namo devādhidevāya namo nārāyaṇāya vai ||
namaḥ kṛṣṇāya rāmāya namaścakrāyudhāya ca
||83||नमो देवाधिदेवाय नमो नारायणाय वै ॥
नमः कृष्णाय रामाय नमश्चक्रायुधाय च
tvaṃ mātā sarvalokānāṃ tvameva jagataḥ pitā ||
bhayārttānāṃ suhṛnmitraṃ tvaṃ pitā tvaṃ pitāmahaḥ
||84||त्वं माता सर्वलोकानां त्वमेव जगतः पिता ॥
भयार्त्तानां सुहृन्मित्रं त्वं पिता त्वं पितामहः
tvaṃ havistvaṃ vaṣaṭkārastvaṃ prabhustvaṃ hutāśanaḥ ||
karaṇaṃ kāraṇaṃ karttā tvameva parameśvaraḥ
||85||त्वं हविस्त्वं वषट्कारस्त्वं प्रभुस्त्वं हुताशनः ॥
करणं कारणं कर्त्ता त्वमेव परमेश्वरः
śaṃkhacakragadāpāṇe māṃ samuddhara mādhava
||86||शंखचक्रगदापाणे मां समुद्धर माधव
prasīda maṃdaradhara prasīda madhusūdana ||
prasīda kamalākānta prasīda bhuvanādhipa
||87||प्रसीद मंदरधर प्रसीद मधुसूदन ॥
प्रसीद कमलाकान्त प्रसीद भुवनाधिप
agastya uvāca
ityevaṃ stuvatastasya manobhaktyā mahātmanaḥ ||
āvirbabhūva viśvātmā viṣṇurgaruḍavāhanaḥ
||88||इत्येवं स्तुवतस्तस्य मनोभक्त्या महात्मनः ॥
आविर्बभूव विश्वात्मा विष्णुर्गरुडवाहनः
śaṃkhacakragadāpāṇiḥ pītāṃbaradharo'cyutaḥ ||
uvāca sa prasannātmā viṣṇuśarmāṇamavyayaḥ
||89||शंखचक्रगदापाणिः पीतांबरधरोऽच्युतः ॥
उवाच स प्रसन्नात्मा विष्णुशर्माणमव्ययः
śrībhagavānuvāca
tuṣṭo'smi bhavato vatsa mahatā tapasā'dhunā ||
stotreṇānena sumate naṣṭapāpo'si sāṃpratam
||90||तुष्टोऽस्मि भवतो वत्स महता तपसाऽधुना ॥
स्तोत्रेणानेन सुमते नष्टपापोऽसि सांप्रतम्
varaṃ varaya viprendra varado'haṃ tavāgrataḥ ||
nā'taptatapasā draṣṭuṃ śakyaḥ kenāpyahaṃ dvija
||91||वरं वरय विप्रेन्द्र वरदोऽहं तवाग्रतः ॥
नाऽतप्ततपसा द्रष्टुं शक्यः केनाप्यहं द्विज
viṣṇuśarmmovāca
kṛtakṛtyo'smi deveśa sāṃprataṃ tava darśanāt ||
tvadbhaktimacalāmekāṃ mama dehi jagatpate
||92||कृतकृत्योऽस्मि देवेश सांप्रतं तव दर्शनात् ॥
त्वद्भक्तिमचलामेकां मम देहि जगत्पते
śrībhagavānuvāca
bhaktirastvacalā me vai vaiṣṇavī muktidāyinī ||
atraivāstvacalā me vai jāhnavī muktidāyinī
||93||भक्तिरस्त्वचला मे वै वैष्णवी मुक्तिदायिनी ॥
अत्रैवास्त्वचला मे वै जाह्नवी मुक्तिदायिनी
idaṃ sthānaṃ mahābhāga tvannāmnā khyātimeṣyati
||94||इदं स्थानं महाभाग त्वन्नाम्ना ख्यातिमेष्यति
agastya uvāca
ityuktvā devadeveśaścakreṇotkhāya tatsthalam ||
jalaṃ prakaṭayāmāsa gāṃgaṃ pātālamaṃḍalāt
||95||इत्युक्त्वा देवदेवेशश्चक्रेणोत्खाय तत्स्थलम् ॥
जलं प्रकटयामास गांगं पातालमंडलात्
jalena tena bhagavānpavitreṇa dayāṃbudhiḥ ||
nīrajastu bhūmitalaṃ kṣaṇāccakre kṛpāvaśāt
||96||जलेन तेन भगवान्पवित्रेण दयांबुधिः ॥
नीरजस्तु भूमितलं क्षणाच्चक्रे कृपावशात्
cakratīrthamiti khyātaṃ tataḥ prabhṛti taddvija ||
jātaṃ trailokyavikhyātamaghaughadhvaṃsakṛcchubham
||97||चक्रतीर्थमिति ख्यातं ततः प्रभृति तद्द्विज ॥
जातं त्रैलोक्यविख्यातमघौघध्वंसकृच्छुभम्
tatra snānena dānena viṣṇulokaṃ vrajennaraḥ
||98||तत्र स्नानेन दानेन विष्णुलोकं व्रजेन्नरः
tataḥ sa bhagavānbhūyo viṣṇuśarmāṇamacyutaḥ ||
kṛpayā parayā yukta uvāca dvijavatsalaḥ
||99||ततः स भगवान्भूयो विष्णुशर्माणमच्युतः ॥
कृपया परया युक्त उवाच द्विजवत्सलः
śrībhagavānuvāca
tvannāmapūrvikā vipra manmūrtiriha tiṣṭhatu ||
viṣṇuharīti vikhyātā bhaktānāṃ muktidāyinī
||100||त्वन्नामपूर्विका विप्र मन्मूर्तिरिह तिष्ठतु ॥
विष्णुहरीति विख्याता भक्तानां मुक्तिदायिनी
agastya uvāca
iti śrutvā vaco vipro vāsudevasya buddhimān ||
svanāmapūrvikāṃ mūrtiṃ sthāpayāmāsa cakriṇaḥ
||101||इति श्रुत्वा वचो विप्रो वासुदेवस्य बुद्धिमान् ॥
स्वनामपूर्विकां मूर्तिं स्थापयामास चक्रिणः
tataḥ prabhati vipreśa śaṃkhacakragadādharaḥ ||
pītavāsāścaturbāhurnāmnā viṣṇuhariḥ sthitaḥ
||102||ततः प्रभति विप्रेश शंखचक्रगदाधरः ॥
पीतवासाश्चतुर्बाहुर्नाम्ना विष्णुहरिः स्थितः
kārtike śuklapakṣasya prārabhya daśamī tithim ||
pūrṇimāmavadhiṃ kṛtvā yātrā sāṃvatsarī bhavet
||103||कार्तिके शुक्लपक्षस्य प्रारभ्य दशमी तिथिम् ॥
पूर्णिमामवधिं कृत्वा यात्रा सांवत्सरी भवेत्
cakratīrthe naraḥ snātvā sarvapāpaiḥ pramucyate ||
bahuvarṣasahasrāṇi svargaloke mahīyate
||104||चक्रतीर्थे नरः स्नात्वा सर्वपापैः प्रमुच्यते ॥
बहुवर्षसहस्राणि स्वर्गलोके महीयते
pitṝnuddiśya yastatra piṃḍānnirvāpayiṣyati ||
tṛptāstu pitaro yānti viṣṇulokaṃ na saṃśayaḥ
||105||पितॄनुद्दिश्य यस्तत्र पिंडान्निर्वापयिष्यति ॥
तृप्तास्तु पितरो यान्ति विष्णुलोकं न संशयः
cakratīrthe naraḥ snātvā dṛṣṭvā viṣṇuhariṃ vibhum ||
sarvapāpakṣayaṃ prāpya nākapṛṣṭhe mahīyate
||106||चक्रतीर्थे नरः स्नात्वा दृष्ट्वा विष्णुहरिं विभुम् ॥
सर्वपापक्षयं प्राप्य नाकपृष्ठे महीयते
svaśaktyā tatra dānāni dattvā niṣkalmaṣo naraḥ ||
viṣṇuloke vaseddhīmānyāvadindrāścaturdaśa
||107||स्वशक्त्या तत्र दानानि दत्त्वा निष्कल्मषो नरः ॥
विष्णुलोके वसेद्धीमान्यावदिन्द्राश्चतुर्दश
anyadāpi narastatra cakratīthe jiteṃdriyaḥ ||
dṛṣṭvā sakṛddhariṃ devaṃ sarvapāpaiḥ pramucyate
||108||अन्यदापि नरस्तत्र चक्रतीथे जितेंद्रियः ॥
दृष्ट्वा सकृद्धरिं देवं सर्वपापैः प्रमुच्यते
iti sakalaguṇābdhirdhyeyamūrtiścidātmā haririha paramūrtyā tasthivānmuktihetoḥ ||
tamiha bahulabhaktyā cakratīrthābhiṣekī vasati sukṛtimūrttiryo'rcayedviṣṇuloke
||109||इति सकलगुणाब्धिर्ध्येयमूर्तिश्चिदात्मा हरिरिह परमूर्त्या तस्थिवान्मुक्तिहेतोः ॥
तमिह बहुलभक्त्या चक्रतीर्थाभिषेकी वसति सुकृतिमूर्त्तिर्योऽर्चयेद्विष्णुलोके
iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṃḍe'yodhyāmāhātmye viṣṇuharimāhātmyavarṇanaṃnāma prathamo'dhyāyaḥ || 1 ||