jīvite girijāputre devyā dṛṣṭe prajeśvara
nārada uvāca
jīvite girijāputre devyā dṛṣṭe prajeśvara |
tataḥ kimabhavattatra kṛpayā tadvadādhunā
||1||जीविते गिरिजापुत्रे देव्या दृष्टे प्रजेश्वर ।
ततः किमभवत्तत्र कृपया तद्वदाधुना
brahmovāca
jīvite girijāputre devyā dṛṣṭe munīśvara |
yajjātaṃ tacchṛṇuṣvādya vacmi te mahadutsavam
||2||जीविते गिरिजापुत्रे देव्या दृष्टे मुनीश्वर ।
यज्जातं तच्छृणुष्वाद्य वच्मि ते महदुत्सवम्
jīvitassa śivāputro nirvyagro vikṛto mune |
abhiṣiktastadā devairgaṇādhyakṣairgajānanaḥ
||3||जीवितस्स शिवापुत्रो निर्व्यग्रो विकृतो मुने ।
अभिषिक्तस्तदा देवैर्गणाध्यक्षैर्गजाननः
dṛṣṭvā svatanayaṃ devī śivā harṣasamanvitā |
gṛhītvā bālakaṃ dorbhyāṃ pramudā pariṣasvaje
||4||दृष्ट्वा स्वतनयं देवी शिवा हर्षसमन्विता ।
गृहीत्वा बालकं दोर्भ्यां प्रमुदा परिषस्वजे
vastrāṇi vividhānīha nānālaṃkaraṇāni ca |
dadau prītyā gaṇeśāya svaputrāya mudāṃbikā
||5||वस्त्राणि विविधानीह नानालंकरणानि च ।
ददौ प्रीत्या गणेशाय स्वपुत्राय मुदांबिका
pūjayitvā tayā devyā siddhibhiścāpyanekaśaḥ |
kareṇa sparśitassotha sarvaduḥkhahareṇa vai
||6||पूजयित्वा तया देव्या सिद्धिभिश्चाप्यनेकशः ।
करेण स्पर्शितस्सोथ सर्वदुःखहरेण वै
pūjayitvā sutaṃ devī mukhamācumbya śāṃkarī |
varāndadau tadā prītyā jātastvaṃ duḥkhito'dhunā
||7||पूजयित्वा सुतं देवी मुखमाचुम्ब्य शांकरी ।
वरान्ददौ तदा प्रीत्या जातस्त्वं दुःखितोऽधुना
dhanyosi kṛtakṛtyosi pūrvapūjyo bhavādhunā |
sarveṣāmamarāṇāṃ vai sarvadā duḥkhavarjitaḥ
||8||धन्योसि कृतकृत्योसि पूर्वपूज्यो भवाधुना ।
सर्वेषाममराणां वै सर्वदा दुःखवर्जितः
ānane tava sindūraṃ dṛśyate sāṃprataṃ yadi |
tasmāttvaṃ pūjanīyosi sindūreṇa sadā naraiḥ
||9||आनने तव सिन्दूरं दृश्यते सांप्रतं यदि ।
तस्मात्त्वं पूजनीयोसि सिन्दूरेण सदा नरैः
puṣpairvā candanairvāpi gandhenaiva śubhena ca |
naivedye suramyeṇa nīrājena vidhānataḥ
||10||पुष्पैर्वा चन्दनैर्वापि गन्धेनैव शुभेन च ।
नैवेद्ये सुरम्येण नीराजेन विधानतः
tāṃmbūlairatha dānaiśca tathā prakramaṇairapi |
namaskāravidhānena pūjāṃ yaste vidhāsyati
||11||तांम्बूलैरथ दानैश्च तथा प्रक्रमणैरपि ।
नमस्कारविधानेन पूजां यस्ते विधास्यति
tasya vai sakalā siddhirbhaviṣyati na saṃśayaḥ |
vighnānyanekarūpāṇi kṣayaṃ yāsyaṃtyasaṃśayam
||12||तस्य वै सकला सिद्धिर्भविष्यति न संशयः ।
विघ्नान्यनेकरूपाणि क्षयं यास्यंत्यसंशयम्
brahmovāca
ityuktvā ca tadā devī svaputraṃ taṃ maheśvaro |
nānāvastubhirutkṛṣṭaṃ punarapyarcayattathā
||13||इत्युक्त्वा च तदा देवी स्वपुत्रं तं महेश्वरो ।
नानावस्तुभिरुत्कृष्टं पुनरप्यर्चयत्तथा
tatassvāsthyaṃ ca devānāṃ gaṇānāṃ ca viśeṣataḥ |
girijākṛpayā vipra jātaṃ tatkṣaṇamātrataḥ
||14||ततस्स्वास्थ्यं च देवानां गणानां च विशेषतः ।
गिरिजाकृपया विप्र जातं तत्क्षणमात्रतः
etasmiṃśca kṣaṇe devā vāsavādyāḥ śivaṃ mudā |
stutvā prasādya taṃ devaṃ bhaktā ninyuḥ śivāṃtikam
||15||एतस्मिंश्च क्षणे देवा वासवाद्याः शिवं मुदा ।
स्तुत्वा प्रसाद्य तं देवं भक्ता निन्युः शिवांतिकम्
saṃsādya giriśaṃ paścādutsaṃge sannyaveśayan |
bālakaṃ taṃ maheśānyāstrijagatsukhahetave
||16||संसाद्य गिरिशं पश्चादुत्संगे सन्न्यवेशयन् ।
बालकं तं महेशान्यास्त्रिजगत्सुखहेतवे
śivopi tasya śirasi dattvā svakarapaṃkajam |
uvāca vacanaṃ devān putro'yamiti me'paraḥ
||17||शिवोपि तस्य शिरसि दत्त्वा स्वकरपंकजम् ।
उवाच वचनं देवान् पुत्रोऽयमिति मेऽपरः
gaṇeśopi tadotthāya namaskṛtya śivāya vai |
pārvatyai ca namaskṛtya mahyaṃ vai viṣṇave tathā
||18||गणेशोपि तदोत्थाय नमस्कृत्य शिवाय वै ।
पार्वत्यै च नमस्कृत्य मह्यं वै विष्णवे तथा
nārādādyānṛṣīnsarvānsatvāsthāya puro'bravīt |
kṣaṃtavyaścāparādho me mānaścaivedṛśo nṛṇām
||19||नारादाद्यानृषीन्सर्वान्सत्वास्थाय पुरोऽब्रवीत् ।
क्षंतव्यश्चापराधो मे मानश्चैवेदृशो नृणाम्
ahaṃ ca śaṃkaraścaiva viṣṇuścaite trayassurāḥ |
pratyūcuryugapatprītyā dadato varamuttamam
||20||अहं च शंकरश्चैव विष्णुश्चैते त्रयस्सुराः ।
प्रत्यूचुर्युगपत्प्रीत्या ददतो वरमुत्तमम्
trayo vayaṃ suravarā yathāpūjyā jagattraye |
tathāyaṃ gaṇanāthaśca sakalaiḥ pratipūjyatām
||21||त्रयो वयं सुरवरा यथापूज्या जगत्त्रये ।
तथायं गणनाथश्च सकलैः प्रतिपूज्यताम्
vayaṃ ca prākṛtāścāyaṃ prākṛtaḥ pūjya eva ca |
gaṇeśo vighnahartā hi sarvakāmaphalapradaḥ
||22||वयं च प्राकृताश्चायं प्राकृतः पूज्य एव च ।
गणेशो विघ्नहर्ता हि सर्वकामफलप्रदः
etatpūjāṃ purā kṛtvā paścātpūjyā vayaṃ naraiḥ |
vayaṃ ca pūjitāssarve nāyaṃ cāpūjito yadā
||23||एतत्पूजां पुरा कृत्वा पश्चात्पूज्या वयं नरैः ।
वयं च पूजितास्सर्वे नायं चापूजितो यदा
asminnapūjite devāḥ parapūjākṛtā yadi |
tadā tatphalahāniḥ syānnātra kāryā vicāraṇā
||24||अस्मिन्नपूजिते देवाः परपूजाकृता यदि ।
तदा तत्फलहानिः स्यान्नात्र कार्या विचारणा
brahmovāca
ityuktvā sa gaṇeśāno nānāvastubhirādarāt |
śivena pūjitaḥ pūrvaṃ viṣṇunānu prapūjitaḥ
||25||इत्युक्त्वा स गणेशानो नानावस्तुभिरादरात् ।
शिवेन पूजितः पूर्वं विष्णुनानु प्रपूजितः
brahmaṇā ca mayā tatra pārvatyā ca prapūjitaḥ |
sarvairdevairgaṇaiścaiva pūjitaḥ parayā mudā
||26||ब्रह्मणा च मया तत्र पार्वत्या च प्रपूजितः ।
सर्वैर्देवैर्गणैश्चैव पूजितः परया मुदा
savairmilitvā tatraiva brahmaviṣṇuharādibhiḥ |
sagaṇeśaśśivātuṣṭyai sarvādhyakṣo niveditaḥ
||27||सवैर्मिलित्वा तत्रैव ब्रह्मविष्णुहरादिभिः ।
सगणेशश्शिवातुष्ट्यै सर्वाध्यक्षो निवेदितः
punaścaiva śivenāsmai suprasannena cetasā |
sarvadā sukhadā loke varā dattā hyanekaśaḥ
||28||पुनश्चैव शिवेनास्मै सुप्रसन्नेन चेतसा ।
सर्वदा सुखदा लोके वरा दत्ता ह्यनेकशः
śiva uvāca
he girīndrasutāputra saṃtuṣṭohaṃ na saṃśayaḥ |
mayi tuṣṭe jagattuṣṭaṃ viruddhaḥ kopi no bhavet
||29||हे गिरीन्द्रसुतापुत्र संतुष्टोहं न संशयः ।
मयि तुष्टे जगत्तुष्टं विरुद्धः कोपि नो भवेत्
bālarūpopi yasmāttvaṃ mahāvikramakārakaḥ |
śaktiputrassutejasvī tasmādbhava sadā sukhī
||30||बालरूपोपि यस्मात्त्वं महाविक्रमकारकः ।
शक्तिपुत्रस्सुतेजस्वी तस्माद्भव सदा सुखी
tvannāma vighnahaṃtṛtve śreṣṭhaṃ caiva bhavatviti |
mama sarvagaṇādhyakṣaḥ saṃpūjyastvaṃ bhavādhunā
||31||त्वन्नाम विघ्नहंतृत्वे श्रेष्ठं चैव भवत्विति ।
मम सर्वगणाध्यक्षः संपूज्यस्त्वं भवाधुना
evamuktvā śaṃkareṇa pūjāvidhiranekaśaḥ |
āśiṣaścāpyanekā hi kṛtāstasmiṃstu tatkṣaṇāt
||32||एवमुक्त्वा शंकरेण पूजाविधिरनेकशः ।
आशिषश्चाप्यनेका हि कृतास्तस्मिंस्तु तत्क्षणात्
tato devagaṇāścaiva gīta vādyaṃ ca nṛtyakam |
mudā te kārayāmāsustathaivapsarasāṃ gaṇāḥ
||33||ततो देवगणाश्चैव गीत वाद्यं च नृत्यकम् ।
मुदा ते कारयामासुस्तथैवप्सरसां गणाः
punaścaiva varo dattassuprasannena śaṃbhunā |
tasmai ca gaṇanāthāya śivenaiva mahātmanā
||34||पुनश्चैव वरो दत्तस्सुप्रसन्नेन शंभुना ।
तस्मै च गणनाथाय शिवेनैव महात्मना
caturthyāṃ tvaṃ samutpanno bhādre māsi gaṇeśvara |
asite ca tathā pakṣe caṃdrasyodayane śubhe
||35||चतुर्थ्यां त्वं समुत्पन्नो भाद्रे मासि गणेश्वर ।
असिते च तथा पक्षे चंद्रस्योदयने शुभे
prathame ca tathā yāme girijāyāssucetasaḥ |
āvirbabhūva te rūpaṃ yasmātte vratamuttamam
||36||प्रथमे च तथा यामे गिरिजायास्सुचेतसः ।
आविर्बभूव ते रूपं यस्मात्ते व्रतमुत्तमम्
tasmāttaddinamārabhya tasyāmeva tithau mudā |
vrataṃ kāryaṃ viśeṣeṇa sarvasiddhyai suśobhanam
||37||तस्मात्तद्दिनमारभ्य तस्यामेव तिथौ मुदा ।
व्रतं कार्यं विशेषेण सर्वसिद्ध्यै सुशोभनम्
yāvatpunassamāyāti varṣānte ca caturthikā |
tāvadvrataṃ ca kartavyaṃ tava caiva mamājñayā
||38||यावत्पुनस्समायाति वर्षान्ते च चतुर्थिका ।
तावद्व्रतं च कर्तव्यं तव चैव ममाज्ञया
saṃsāre sukhamicchanti ye'tulaṃ cāpyanekaśaḥ |
tvāṃ pūjayantu te bhaktyā caturthyāṃ vidhipūrvakam
||39||संसारे सुखमिच्छन्ति येऽतुलं चाप्यनेकशः ।
त्वां पूजयन्तु ते भक्त्या चतुर्थ्यां विधिपूर्वकम्
mārgaśīrṣe tathā māse ramā yā vai caturthikā |
prātaḥsnānaṃ tadā kṛtvā vrataṃ viprānnivedayeta
||40||मार्गशीर्षे तथा मासे रमा या वै चतुर्थिका ।
प्रातःस्नानं तदा कृत्वा व्रतं विप्रान्निवेदयेत
dūrvābhiḥ pūjanaṃ kāryamupavāsastathāvidhaḥ |
rātreśca prahare jāte snātvā saṃpūjayennaraḥ
||41||दूर्वाभिः पूजनं कार्यमुपवासस्तथाविधः ।
रात्रेश्च प्रहरे जाते स्नात्वा संपूजयेन्नरः
mūrtiṃ dhātumayīṃ kṛtvā pravālasaṃbhavāṃ tathā |
śvetārkasaṃbhavāṃ cāpi mārddikāṃ nirmitāṃ tathā
||42||मूर्तिं धातुमयीं कृत्वा प्रवालसंभवां तथा ।
श्वेतार्कसंभवां चापि मार्द्दिकां निर्मितां तथा
pratiṣṭhāpya tadā tatra pūjayetprayataḥ pumān |
gaṃdhairnānāvidhairdivyaiścandanaiḥ puṣpakairiha
||43||प्रतिष्ठाप्य तदा तत्र पूजयेत्प्रयतः पुमान् ।
गंधैर्नानाविधैर्दिव्यैश्चन्दनैः पुष्पकैरिह
vitastimātrā dūrvā ca vyaṃgā vai mūlavarjitā |
īdṛśānāṃ tadbalānāṃ śatenaikottareṇa ha
||44||वितस्तिमात्रा दूर्वा च व्यंगा वै मूलवर्जिता ।
ईदृशानां तद्बलानां शतेनैकोत्तरेण ह
ekaviṃśatikenaiva pūjayetpratimāṃ sthitām |
dhūpairdīpaiśca naivedyairvividhairgaṇanāyakam
||45||एकविंशतिकेनैव पूजयेत्प्रतिमां स्थिताम् ।
धूपैर्दीपैश्च नैवेद्यैर्विविधैर्गणनायकम्
tāmbūlādyarghasaddravyaiḥ praṇipatya stavaistathā |
tvāṃ tatra pūjayitvetthaṃ bālacaṃdraṃ ca pūjayet
||46||ताम्बूलाद्यर्घसद्द्रव्यैः प्रणिपत्य स्तवैस्तथा ।
त्वां तत्र पूजयित्वेत्थं बालचंद्रं च पूजयेत्
paścādviprāṃśca saṃpūjya bhojayenmadhurairmudā |
svayaṃ caiva tato bhuṃjyānmadhuraṃ lavaṇaṃ vinā
||47||पश्चाद्विप्रांश्च संपूज्य भोजयेन्मधुरैर्मुदा ।
स्वयं चैव ततो भुंज्यान्मधुरं लवणं विना
visarjayettataḥ paścānniyamaṃ sarvamātmanaḥ |
gaṇeśasmaraṇaṃ kuryyātsaṃpūrṇaṃ syādvrataṃ śubham
||48||विसर्जयेत्ततः पश्चान्नियमं सर्वमात्मनः ।
गणेशस्मरणं कुर्य्यात्संपूर्णं स्याद्व्रतं शुभम्
evaṃ vratena saṃpūrṇe varṣe jāte narastadā |
udyāpanavidhiṃ kuryādvratasampūrttihetave
||49||एवं व्रतेन संपूर्णे वर्षे जाते नरस्तदा ।
उद्यापनविधिं कुर्याद्व्रतसम्पूर्त्तिहेतवे
dvādaśa brāhmaṇāstatra bhojanīyā madājñayā |
kuṃbhamekaṃ ca saṃsthāpya pūjyā mūrtistvadīyikā
||50||द्वादश ब्राह्मणास्तत्र भोजनीया मदाज्ञया ।
कुंभमेकं च संस्थाप्य पूज्या मूर्तिस्त्वदीयिका
sthaṇḍileṣṭapalaṃ kṛtvā tadā vedavidhānataḥ |
homaścaivātra kartavyo vittaśāṭhyavivarjitaiḥ
||51||स्थण्डिलेष्टपलं कृत्वा तदा वेदविधानतः ।
होमश्चैवात्र कर्तव्यो वित्तशाठ्यविवर्जितैः
strīdvayaṃ ca tathā cātra baṭukadvayamādarāt |
bhojayetpūjayitvā vai mūrtyagre vidhipūrvakam
||52||स्त्रीद्वयं च तथा चात्र बटुकद्वयमादरात् ।
भोजयेत्पूजयित्वा वै मूर्त्यग्रे विधिपूर्वकम्
niśi jāgaraṇaṃ kāryaṃ punaḥ prātaḥ prapūjayet |
visarjanaṃ tataścaiva punarāgamanāya ca
||53||निशि जागरणं कार्यं पुनः प्रातः प्रपूजयेत् ।
विसर्जनं ततश्चैव पुनरागमनाय च
bālakāccāśiṣo grāhyāssvastivācanameva ca |
puṣpāṃjaliṃ pradadyācca vratasaṃpūrṇa hetave
||54||बालकाच्चाशिषो ग्राह्यास्स्वस्तिवाचनमेव च ।
पुष्पांजलिं प्रदद्याच्च व्रतसंपूर्ण हेतवे
namaskārāṃstataḥ kṛtvā nānākāryaṃ prakalpayet |
evaṃ vrataṃ kṛtaṃ yena tasyepsitaphalaṃ bhavet
||55||नमस्कारांस्ततः कृत्वा नानाकार्यं प्रकल्पयेत् ।
एवं व्रतं कृतं येन तस्येप्सितफलं भवेत्
yo nityaṃ śraddhayā sārddhaṃ pūjāṃ caiva sva śaktitaḥ |
kuryyāttava gaṇeśāna sarvakāmaphalāptaye
||56||यो नित्यं श्रद्धया सार्द्धं पूजां चैव स्व शक्तितः ।
कुर्य्यात्तव गणेशान सर्वकामफलाप्तये
sindūraiścandanaiścaiva taṃḍulaiḥ ketakaistathā |
upacārairanekaiśca pūjayettvāṃ gaṇe śvaram
||57||सिन्दूरैश्चन्दनैश्चैव तंडुलैः केतकैस्तथा ।
उपचारैरनेकैश्च पूजयेत्त्वां गणे श्वरम्
evaṃ tvāṃ pūjayeyurye bhaktyā nānopacārataḥ |
teṣāṃ siddhirbhavennityaṃ vighnanāśo bhavediha
||58||एवं त्वां पूजयेयुर्ये भक्त्या नानोपचारतः ।
तेषां सिद्धिर्भवेन्नित्यं विघ्ननाशो भवेदिह
sarvairvarṇaiḥ prakarttavyā strībhiścaiva viśeṣataḥ |
udayābhimukhaiścaiva rājabhiśca viśeṣataḥ
||59||सर्वैर्वर्णैः प्रकर्त्तव्या स्त्रीभिश्चैव विशेषतः ।
उदयाभिमुखैश्चैव राजभिश्च विशेषतः
yaṃ yaṃ kāmayate yo vai taṃtamāpnoti niścitam |
ataḥ kāmayamānena tena sevyassadā bhavān
||60||यं यं कामयते यो वै तंतमाप्नोति निश्चितम् ।
अतः कामयमानेन तेन सेव्यस्सदा भवान्
brahmovāca
śivenaiva tadā proktaṃ gaṇeśāya mahātmane |
tadānīṃ daivataiścaiva sarvaiśca ṛṣisattamaiḥ
||61||शिवेनैव तदा प्रोक्तं गणेशाय महात्मने ।
तदानीं दैवतैश्चैव सर्वैश्च ऋषिसत्तमैः
tathetyuktvā tu taissarvairgaṇaiśśaṃbhupriyairmune |
pūjito hi gaṇādhīśo vidhinā parameṇa saḥ
||62||तथेत्युक्त्वा तु तैस्सर्वैर्गणैश्शंभुप्रियैर्मुने ।
पूजितो हि गणाधीशो विधिना परमेण सः
tataścaiva gaṇāssarve praṇemuste gaṇeśvaram |
samānarcurviśeṣeṇa nānāvastubhirādarāt
||63||ततश्चैव गणास्सर्वे प्रणेमुस्ते गणेश्वरम् ।
समानर्चुर्विशेषेण नानावस्तुभिरादरात्
girijāyāssamutpanno yaśca harṣo munīśvara |
caturbhirvadanairvai tamavarṇyaṃ ca kathaṃ bruve
||64||गिरिजायास्समुत्पन्नो यश्च हर्षो मुनीश्वर ।
चतुर्भिर्वदनैर्वै तमवर्ण्यं च कथं ब्रुवे
devaduṃdubhayo nedurnanṛtuścāpsarogaṇāḥ |
jagurgaṃdharvamukhyāśca puṣpavarṣaṃ papāta ha
||65||देवदुंदुभयो नेदुर्ननृतुश्चाप्सरोगणाः ।
जगुर्गंधर्वमुख्याश्च पुष्पवर्षं पपात ह
jagatsvāsthyaṃ tadā prāpa gaṇādhīśe pratiṣṭhite |
mahotsavo mahānāsītsarvaṃ duḥkhaṃ kṣayaṃ gaṇam
||66||जगत्स्वास्थ्यं तदा प्राप गणाधीशे प्रतिष्ठिते ।
महोत्सवो महानासीत्सर्वं दुःखं क्षयं गणम्
śivāśivau ca modetāṃ viśeṣeṇāti nārada |
āsītsumaṃgalaṃ bhūri sarvatra sukhadāyakam
||67||शिवाशिवौ च मोदेतां विशेषेणाति नारद ।
आसीत्सुमंगलं भूरि सर्वत्र सुखदायकम्
tato devagaṇāḥ sarve ṛṣīṇāṃ ca gaṇāstathā |
samāgatāśca ye tatra jagmuste tu śivājñayā
||68||ततो देवगणाः सर्वे ऋषीणां च गणास्तथा ।
समागताश्च ये तत्र जग्मुस्ते तु शिवाज्ञया
praśaṃsaṃtaśśivā tatra gaṇeśaṃ ca punaḥ punaḥ |
śivaṃ caiva tathā stutvā kīdṛśaṃ yuddhameva ca
||69||प्रशंसंतश्शिवा तत्र गणेशं च पुनः पुनः ।
शिवं चैव तथा स्तुत्वा कीदृशं युद्धमेव च
yadā sā girijā devī kopahīnā babhūva ha |
śivo'pi girijāṃ tatra pūrvavatsaṃprapadya tām
||70||यदा सा गिरिजा देवी कोपहीना बभूव ह ।
शिवोऽपि गिरिजां तत्र पूर्ववत्संप्रपद्य ताम्
cakāra vividhaṃ saukhyaṃ lokānāṃ hitakāmyayā |
svātmārāmo'pi paramo bhaktakāryodyataḥ sadā
||71||चकार विविधं सौख्यं लोकानां हितकाम्यया ।
स्वात्मारामोऽपि परमो भक्तकार्योद्यतः सदा
viṣṇuśca śivamāpṛcchya brahmāhaṃ taṃ tathaiva hi |
āgacchāva svadhāmaṃ ca śivau saṃsevya bhaktitaḥ
||72||विष्णुश्च शिवमापृच्छ्य ब्रह्माहं तं तथैव हि ।
आगच्छाव स्वधामं च शिवौ संसेव्य भक्तितः
nārada tvaṃ ca bhagavansaṃgīya śivayoryaśaḥ |
āgamo bhavanaṃ svaṃ ca śivau pṛṣṭvā munīśvara
||73||नारद त्वं च भगवन्संगीय शिवयोर्यशः ।
आगमो भवनं स्वं च शिवौ पृष्ट्वा मुनीश्वर
etatte sarvamākhyātaṃ mayā vai śivayoryaśaḥ |
bhavatpṛṣṭena vighneśa yaśassaṃmiśramādarāt
||74||एतत्ते सर्वमाख्यातं मया वै शिवयोर्यशः ।
भवत्पृष्टेन विघ्नेश यशस्संमिश्रमादरात्
idaṃ sumaṃgalākhyānaṃ yaḥ śṛṇoti susaṃyataḥ |
sarvamaṃgala saṃyuktassa bhavenmaṃgalālayaḥ
||75||इदं सुमंगलाख्यानं यः शृणोति सुसंयतः ।
सर्वमंगल संयुक्तस्स भवेन्मंगलालयः
aputro labhate putraṃ nirdhano labhate dhanam |
bhāyārthī labhate bhāryāṃ prajārthī labhate prajām
||76||अपुत्रो लभते पुत्रं निर्धनो लभते धनम् ।
भायार्थी लभते भार्यां प्रजार्थी लभते प्रजाम्
ārogyaṃ labhate rogī saubhāgyaṃ durbhago labhet |
naṣṭaputraṃ naṣṭadhanaṃ proṣitā ca patiṃ labhet
||77||आरोग्यं लभते रोगी सौभाग्यं दुर्भगो लभेत् ।
नष्टपुत्रं नष्टधनं प्रोषिता च पतिं लभेत्
śokāviṣṭaśśokahīnassa bhavennātra saṃśayaḥ |
idaṃ gāṇeśamākhyānaṃ yasya gehe ca tiṣṭhati
||78||शोकाविष्टश्शोकहीनस्स भवेन्नात्र संशयः ।
इदं गाणेशमाख्यानं यस्य गेहे च तिष्ठति
sadā maṃgalasaṃyuktassa bhavennātra saṃśayaḥ |
yātrākāle ca puṇyāhe yaśśṛṇoti samāhitaḥ |
sarvābhīṣṭaṃ sa labhate śrīgaṇeśaprasādataḥ
||79||सदा मंगलसंयुक्तस्स भवेन्नात्र संशयः ।
यात्राकाले च पुण्याहे यश्शृणोति समाहितः ।
सर्वाभीष्टं स लभते श्रीगणेशप्रसादतः
iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe gaṇeśagaṇādhipapadavīvarṇanaṃ nāmāṣṭādaśo'dhyāyaḥ || 18 ||