śivadaśāvatāravarṇanam
śṛṇvatho giriśasyādyāvatārān daśasaṃkhyakān |
mahākalamukhān bhaktyopāsanākāṇḍasevitān
||1||शृण्वथो गिरिशस्याद्यावतारान् दशसंख्यकान् ।
महाकलमुखान् भक्त्योपासनाकाण्डसेवितान्
tatrādyo hi mahākālo bhuktimuktipradassatām |
śaktistatra mahākālī bhaktepsitaphalapradā
||2||तत्राद्यो हि महाकालो भुक्तिमुक्तिप्रदस्सताम् ।
शक्तिस्तत्र महाकाली भक्तेप्सितफलप्रदा
tāranāmā dvitīyaśca tārā śaktistathaiva sā |
bhuktimuktipradau cobhau svasevakasukhapradau
||3||तारनामा द्वितीयश्च तारा शक्तिस्तथैव सा ।
भुक्तिमुक्तिप्रदौ चोभौ स्वसेवकसुखप्रदौ
bhuvaneśo hi bālāhvastṛtīyaḥ parikīrtitaḥ |
bhuvaneśī śivā tatra bālāhvā sukhadā satām
||4||भुवनेशो हि बालाह्वस्तृतीयः परिकीर्तितः ।
भुवनेशी शिवा तत्र बालाह्वा सुखदा सताम्
śrīvidyeśaḥ ṣoḍaśāhvaḥ śrīrvidyā ṣoḍaśī śivā |
caturtho bhakta sukhado bhuktimuktiphalapradaḥ
||5||श्रीविद्येशः षोडशाह्वः श्रीर्विद्या षोडशी शिवा ।
चतुर्थो भक्त सुखदो भुक्तिमुक्तिफलप्रदः
pañcamo bhairavaḥ khyātaḥ sarvadā bhaktakāmadaḥ |
bhairavī girijā tatra sadupāsakakāmadā
||6||पञ्चमो भैरवः ख्यातः सर्वदा भक्तकामदः ।
भैरवी गिरिजा तत्र सदुपासककामदा
chinnamastakanāmāsau śivaḥ ṣaṣṭhaḥ prakīrtitaḥ |
bhaktakāmapradā caiva girijā chinnamastakā
||7||छिन्नमस्तकनामासौ शिवः षष्ठः प्रकीर्तितः ।
भक्तकामप्रदा चैव गिरिजा छिन्नमस्तका
dhūmavān saptamaḥ śambhussarvakāmaphalapradaḥ |
dhūmavatī śivā tatra sadupāsakakāmadā
||8||धूमवान् सप्तमः शम्भुस्सर्वकामफलप्रदः ।
धूमवती शिवा तत्र सदुपासककामदा
śivāvatāraḥ sukhado hyaṣṭamo bagalāmukhaḥ |
śaktistatra mahānandā vikhyātā bagalāmukhī
||9||शिवावतारः सुखदो ह्यष्टमो बगलामुखः ।
शक्तिस्तत्र महानन्दा विख्याता बगलामुखी
śivāvatāro mātaṅgo navamaḥ parikīrtitaḥ |
mātaṃgī tatra śarvāṇī sarvakāmaphalapradā
||10||शिवावतारो मातङ्गो नवमः परिकीर्तितः ।
मातंगी तत्र शर्वाणी सर्वकामफलप्रदा
daśamaḥ kamalaḥ śambhurbhuktimuktiphalapradaḥ |
kamalā girijā tatra svabhaktaparipālinī
||11||दशमः कमलः शम्भुर्भुक्तिमुक्तिफलप्रदः ।
कमला गिरिजा तत्र स्वभक्तपरिपालिनी
ete daśamitāḥ śaivā avatārāssukhapradāḥ |
bhuktimuktipradāścaiva bhaktānāṃ sarvadāssatām
||12||एते दशमिताः शैवा अवतारास्सुखप्रदाः ।
भुक्तिमुक्तिप्रदाश्चैव भक्तानां सर्वदास्सताम्
ete daśāvatārā hi śaṃkarasya mahātmanaḥ |
nānāsukhapradā nityaṃ sevatāṃ nirvikārataḥ |
etaddaśāvatārāṇāṃ māhātmyaṃ varṇitaṃ mune |
sarvakāmapradaṃ jñeyaṃ taṃtraśāstrādigarbhitam
||14||एते दशावतारा हि शंकरस्य महात्मनः ।
नानासुखप्रदा नित्यं सेवतां निर्विकारतः ।
एतद्दशावताराणां माहात्म्यं वर्णितं मुने ।
सर्वकामप्रदं ज्ञेयं तंत्रशास्त्रादिगर्भितम्
etāsāmādiśaktīnāmadbhuto mahimā mune |
sarvakāmaprado jñeyastatraṃśāstrādigarbhitaḥ
||15||एतासामादिशक्तीनामद्भुतो महिमा मुने ।
सर्वकामप्रदो ज्ञेयस्तत्रंशास्त्रादिगर्भितः
śatrumāraṇakāryyādau tattacchaktiḥ parā matā |
khala daṇḍakarī nityambrahmatejovivarddhinī
||16||शत्रुमारणकार्य्यादौ तत्तच्छक्तिः परा मता ।
खल दण्डकरी नित्यम्ब्रह्मतेजोविवर्द्धिनी
ityuktāste mayā brahmannavatārā maheśituḥ |
saśaktikā daśamitā mahākālamukhāśśubhāḥ
||17||इत्युक्तास्ते मया ब्रह्मन्नवतारा महेशितुः ।
सशक्तिका दशमिता महाकालमुखाश्शुभाः
śaivaparvasu sarveṣu yo'dhīte bhaktitatparaḥ |
etadākhyānamamalaṃ sotiśambhupriyo bhavet
||18||शैवपर्वसु सर्वेषु योऽधीते भक्तितत्परः ।
एतदाख्यानममलं सोतिशम्भुप्रियो भवेत्
brahmaṇo brahmavarcasvī kṣatriyo vijayī bhaveta |
dhanādhipo hi vaiśyaḥ syācchūdraḥ sukhamavāpnuyāt
||19||ब्रह्मणो ब्रह्मवर्चस्वी क्षत्रियो विजयी भवेत ।
धनाधिपो हि वैश्यः स्याच्छूद्रः सुखमवाप्नुयात्
śāṃkarā nijadharmasthāḥ śṛṇvantaścaritantvidam |
sukhinaḥ syurviśeṣeṇa śivabhaktā bhavantu ca
||20||शांकरा निजधर्मस्थाः शृण्वन्तश्चरितन्त्विदम् ।
सुखिनः स्युर्विशेषेण शिवभक्ता भवन्तु च
iti śrīśivamahāpurāṇe tṛtīyāyāṃ śatarudrasaṃhitāyāṃ śivadaśāvatāravarṇanaṃ nāma saptadaśo'dhyāyaḥ ||17|