śivasamāgamavarṇanam
brahmovāca
iti saṃbhāṣamāṇe tu maharṣau muni sevite ||
vijahau girijā śaṃkāṃ śivabhaktavadhāśritām
||1||इति संभाषमाणे तु महर्षौ मुनि सेविते ॥
विजहौ गिरिजा शंकां शिवभक्तवधाश्रिताम्
athāṃtarikṣādudabhūdvāṇī karṇamanoharā ||
mā gamaḥ śailakanye tvaṃ pāpanipkṛtikāraṇāt
||2||अथांतरिक्षादुदभूद्वाणी कर्णमनोहरा ॥
मा गमः शैलकन्ये त्वं पापनिप्कृतिकारणात्
gaṃgā ca yamunā siṃdhurgodāpi ca sarasvatī ||
narmadā sā ca kāverī śoṇaḥ śoṇanadī ca sā
||3||गंगा च यमुना सिंधुर्गोदापि च सरस्वती ॥
नर्मदा सा च कावेरी शोणः शोणनदी च सा
atraiva nava tīrthāni saṃbhavaṃtu śilātale ||
tvatkhaḍgadārite devi kuru tatrāghamarṣaṇam
||4||अत्रैव नव तीर्थानि संभवंतु शिलातले ॥
त्वत्खड्गदारिते देवि कुरु तत्राघमर्षणम्
asminnāśviyuje māsi jyeṣṭhānakṣatra āgate ||
nimajya khaḍgatīrthe tvaṃ saliṃgā māsamāvasa
||5||अस्मिन्नाश्वियुजे मासि ज्येष्ठानक्षत्र आगते ॥
निमज्य खड्गतीर्थे त्वं सलिंगा मासमावस
nivartya sāvanaṃ māsamatra dikpālasaṃmitam ||
tataḥ pāṇisthitaṃ liṃgaṃ labdhvā pāpaviśodhanam
||6||निवर्त्य सावनं मासमत्र दिक्पालसंमितम् ॥
ततः पाणिस्थितं लिंगं लब्ध्वा पापविशोधनम्
pratiṣṭhāpaya tīrthāgre lokānugrahakāraṇāt ||
uttīrya tīrthavarye'sminsnātvā liṃge'rcite śive
||7||प्रतिष्ठापय तीर्थाग्रे लोकानुग्रहकारणात् ॥
उत्तीर्य तीर्थवर्येऽस्मिन्स्नात्वा लिंगेऽर्चिते शिवे
tāpatrayopaśāṃtiśca trailokyasya na saṃśayaḥ ||
sarvapāpaharaṃ liṃgaṃ sthāvaraṃ tīrthasannidhau
||8||तापत्रयोपशांतिश्च त्रैलोक्यस्य न संशयः ॥
सर्वपापहरं लिंगं स्थावरं तीर्थसन्निधौ
sthāpaya sthirayā bhaktyā sadālokahitāya ca ||
nakṣatre vaiśvadaivatye devakyāḥ saṃgamācara
||9||स्थापय स्थिरया भक्त्या सदालोकहिताय च ॥
नक्षत्रे वैश्वदैवत्ये देवक्याः संगमाचर
mahotsavasamāyuktaṃ yāvaddaśadināvadhi ||
kṛtvā cāvabhṛthaṃ puṇyanakṣatre vahnidaivate
||10||महोत्सवसमायुक्तं यावद्दशदिनावधि ॥
कृत्वा चावभृथं पुण्यनक्षत्रे वह्निदैवते
sāyamabhyarcya vidhivacchoṇācalavapurmama ||
tataste darśayiṣyāmi taijasaṃ rūpamātmanaḥ
||11||सायमभ्यर्च्य विधिवच्छोणाचलवपुर्मम ॥
ततस्ते दर्शयिष्यामि तैजसं रूपमात्मनः
etatkṛtaṃ te lokānāṃ rakṣāyai saṃbhaviṣyati ||
iti tadvacanaṃ śrutvā maharṣivacanaṃ ca sā
||12||एतत्कृतं ते लोकानां रक्षायै संभविष्यति ॥
इति तद्वचनं श्रुत्वा महर्षिवचनं च सा
ubhayaṃ kartumārebhe tapasā śailakanyakā ||
khaṅgena dārayāmāsa śilātalamanākulā
||13||उभयं कर्तुमारेभे तपसा शैलकन्यका ॥
खङ्गेन दारयामास शिलातलमनाकुला
udajṛṃbhata tīrthānāṃ navakaṃ tatra tatkṣaṇāt ||
tasya kaṇṭhasthitaṃ ligaṃ dhyāyantī parvatātmajā
||14||उदजृंभत तीर्थानां नवकं तत्र तत्क्षणात् ॥
तस्य कण्ठस्थितं लिगं ध्यायन्ती पर्वतात्मजा
tīrthe mamajja tasminsā munīnāmabhyanujñayā ||
tīrthānāṃ navakaṃ tatra saṃjātaṃ sphaṭikaprabham
||15||तीर्थे ममज्ज तस्मिन्सा मुनीनामभ्यनुज्ञया ॥
तीर्थानां नवकं तत्र संजातं स्फटिकप्रभम्
aṃtarvasatitaḥ kāṃtyā mecakīkṛtamaṃjasā ||
vasaṃtyāṃ śailakanyāyāṃ tīrthe triṃśaddinaṃ tvatha
||16||अंतर्वसतितः कांत्या मेचकीकृतमंजसा ॥
वसंत्यां शैलकन्यायां तीर्थे त्रिंशद्दिनं त्वथ
śambhorvirahasaṃtaptaṃ manaścaṃcalatāṃ yayau ||
tatra śriyā sarojāni cakṣuṣotpalakānanam
||17||शम्भोर्विरहसंतप्तं मनश्चंचलतां ययौ ॥
तत्र श्रिया सरोजानि चक्षुषोत्पलकाननम्
maṃdasmitena kumudaṃ sasarja salilasya sā ||
devyāstenodavāsena lokāstu nirupadravāḥ
||18||मंदस्मितेन कुमुदं ससर्ज सलिलस्य सा ॥
देव्यास्तेनोदवासेन लोकास्तु निरुपद्रवाः
kṛtārthāssahasā jātāstattatkālaphalānvitāḥ ||
māsāṃte sā samuttīrya kṛtvā devyutsavaṃ tathā
||19||कृतार्थास्सहसा जातास्तत्तत्कालफलान्विताः ॥
मासांते सा समुत्तीर्य कृत्वा देव्युत्सवं तथा
kārtike māsi nakṣatre kṛttikākhye niśodaye ||
pūjayitvā tapaḥsiddhairupacārairbahūdayaiḥ
||20||कार्तिके मासि नक्षत्रे कृत्तिकाख्ये निशोदये ॥
पूजयित्वा तपःसिद्धैरुपचारैर्बहूदयैः
aruṇādrimayaṃ liṃgaṃ tuṣṭāva jagadaṃbikā ||
namaste viśvarūpāya śoṇācalavapurbhṛte
||21||अरुणाद्रिमयं लिंगं तुष्टाव जगदंबिका ॥
नमस्ते विश्वरूपाय शोणाचलवपुर्भृते
tejomayādriliṃgāya sarvapātatakanāśine ||
brahmaṇā viṣṇunā ca tvaṃ duṣparicchedyavaibhavaḥ
||22||तेजोमयाद्रिलिंगाय सर्वपाततकनाशिने ॥
ब्रह्मणा विष्णुना च त्वं दुष्परिच्छेद्यवैभवः
agnirūpo'pi sañchāṃto lokānugrahaklṛptaye ||
śaktyā ca tattvasaṃghātakaraḥ kālānalākṛtiḥ
||23||अग्निरूपोऽपि सञ्छांतो लोकानुग्रहक्लृप्तये ॥
शक्त्या च तत्त्वसंघातकरः कालानलाकृतिः
adriśreṣṭhāruṇādrīśa rūpalāvaṇyavāridhe ||
vicitrarūpametatte vedavedyasurārcitam
||24||अद्रिश्रेष्ठारुणाद्रीश रूपलावण्यवारिधे ॥
विचित्ररूपमेतत्ते वेदवेद्यसुरार्चितम्
tejasāṃ deva sarveṣāṃ bījabhūtaṃ nigadyase ||
divyaṃ hi paramaṃ tejastava deva maheśvara
||25||तेजसां देव सर्वेषां बीजभूतं निगद्यसे ॥
दिव्यं हि परमं तेजस्तव देव महेश्वर
yatpurā brahmaṇā dṛṣṭaṃ viṣṇunā ca vicinvatā ||
adya pūtāsmi deveśa tava saṃdarśanādaham
||26||यत्पुरा ब्रह्मणा दृष्टं विष्णुना च विचिन्वता ॥
अद्य पूतास्मि देवेश तव संदर्शनादहम्
tejo darśaya me divyaṃ sarvadoṣaharaṃ param ||
prārthayaṃtyāṃ tadā devyāmaruṇādrimayaḥ śivaḥ
||27||तेजो दर्शय मे दिव्यं सर्वदोषहरं परम् ॥
प्रार्थयंत्यां तदा देव्यामरुणाद्रिमयः शिवः
āvirbabhūva tejobhirāpūrya bhuvanāṃtaram ||
koṭisūryodayaprakhyaṃ tulyaṃ pūrṇeṃdukoṭibhiḥ
||28||आविर्बभूव तेजोभिरापूर्य भुवनांतरम् ॥
कोटिसूर्योदयप्रख्यं तुल्यं पूर्णेंदुकोटिभिः
kālāgnikoṭisaṃkāśaṃ tejaḥ paramadṛśyata ||
praṇamya parayā bhaktyā munibhiḥ sārdhamaṃbikā
||29||कालाग्निकोटिसंकाशं तेजः परमदृश्यत ॥
प्रणम्य परया भक्त्या मुनिभिः सार्धमंबिका
vismayākrāṃtahṛdayā nanaṃda nalinekṣaṇā ||
atha tejonidhestasmādaruṇādriḥ samutthitaḥ
||30||विस्मयाक्रांतहृदया ननंद नलिनेक्षणा ॥
अथ तेजोनिधेस्तस्मादरुणाद्रिः समुत्थितः
hiraṇmayo'bravīdvācaṃ puruṣaḥ kalakandharaḥ ||
prasanno'smi tapobhiste sthāneṣu mama kalpitaiḥ
||31||हिरण्मयोऽब्रवीद्वाचं पुरुषः कलकन्धरः ॥
प्रसन्नोऽस्मि तपोभिस्ते स्थानेषु मम कल्पितैः
tejomayamidaṃ rūpamīkṣitaṃ ca tvayādhunā ||
kāraṇairbahubhirlokānrakṣethāstvaṃ jaganmayi
||32||तेजोमयमिदं रूपमीक्षितं च त्वयाधुना ॥
कारणैर्बहुभिर्लोकान्रक्षेथास्त्वं जगन्मयि
tapāṃsi kuruṣe bhūmau kimanyatprārthitaṃ tava ||
mallocanatviṣā tedya tamorāśiḥ samutthitaḥ
||33||तपांसि कुरुषे भूमौ किमन्यत्प्रार्थितं तव ॥
मल्लोचनत्विषा तेद्य तमोराशिः समुत्थितः
aśeṣo hi praśāṃto'bhūttejaso'sya nirīkṣaṇāt ||
ayaṃ tu mahiṣo duṣṭo madbhaktiṃ liṃgapūjakaḥ
||34||अशेषो हि प्रशांतोऽभूत्तेजसोऽस्य निरीक्षणात् ॥
अयं तु महिषो दुष्टो मद्भक्तिं लिंगपूजकः
jagrāha sahasā hyetattasya liṃgaṃ gale sthitam ||
anena bhakṣitaṃ tacca nāstikasyopadeśataḥ
||35||जग्राह सहसा ह्येतत्तस्य लिंगं गले स्थितम् ॥
अनेन भक्षितं तच्च नास्तिकस्योपदेशतः
akaronmayyaviśvāsaṃ liṃgarūpe gale sthite ||
krameṇa sopi saṃprāpto munijanma manoharam
||36||अकरोन्मय्यविश्वासं लिंगरूपे गले स्थिते ॥
क्रमेण सोपि संप्राप्तो मुनिजन्म मनोहरम्
māmevābhyarcayandhyāyangaṇanāthatvamāvasan ||
pūrvajanmani bhakto'yaṃ mahiṣopi tvayā hataḥ
||37||मामेवाभ्यर्चयन्ध्यायन्गणनाथत्वमावसन् ॥
पूर्वजन्मनि भक्तोऽयं महिषोपि त्वया हतः
ciraṃ malliṃgadhṛgyasmātsiddhirasyāpi devyataḥ ||
śivaliṃgeṣvaviśvāsaḥ śivabhaktāvamānanam
||38||चिरं मल्लिंगधृग्यस्मात्सिद्धिरस्यापि देव्यतः ॥
शिवलिंगेष्वविश्वासः शिवभक्तावमाननम्
na karttavyaṃ sadā bhaktaistasmādvai muktikāṃkṣibhiḥ ||
dīkṣayā rahitaṃ ligaṃ yena saṃdhāryate balāt
||39||न कर्त्तव्यं सदा भक्तैस्तस्माद्वै मुक्तिकांक्षिभिः ॥
दीक्षया रहितं लिगं येन संधार्यते बलात्
na tādṛśaṃ phalaṃ datte vajravattaṃ nihaṃti ca ||
na doṣastatra kiṃcitte śoṇācalanirīkṣaṇāt
||40||न तादृशं फलं दत्ते वज्रवत्तं निहंति च ॥
न दोषस्तत्र किंचित्ते शोणाचलनिरीक्षणात्
saphalā nayanāvāptiḥ sarvadoṣavināśanāt ||
tvatputrastanyadānena dhātryopakṛtamātmaje
||41||सफला नयनावाप्तिः सर्वदोषविनाशनात् ॥
त्वत्पुत्रस्तन्यदानेन धात्र्योपकृतमात्मजे
tvāmapītakucāṃ cakre vatsalāṃ bhaktarakṣiṇīm ||
nakṣatre kṛttikākhye'tra tava sannidhilobhataḥ
||42||त्वामपीतकुचां चक्रे वत्सलां भक्तरक्षिणीम् ॥
नक्षत्रे कृत्तिकाख्येऽत्र तव सन्निधिलोभतः
prāyaścittābhidhānena bhavāpītakucābhidhā ||
pūjāśeṣaṃ samādhāya bhaktānugrahahetave
||43||प्रायश्चित्ताभिधानेन भवापीतकुचाभिधा ॥
पूजाशेषं समाधाय भक्तानुग्रहहेतवे
bhaja māṃ karuṇāmūrtirapītakucanāyikā ||
iti devasya vacanamākarṇyātyaṃtaśītalam
||44||भज मां करुणामूर्तिरपीतकुचनायिका ॥
इति देवस्य वचनमाकर्ण्यात्यंतशीतलम्
praṇamya prārthitavatī provāca ca tamaṃbikā ||
devadeva prasādena tvayānugrahaśālinā
||45||प्रणम्य प्रार्थितवती प्रोवाच च तमंबिका ॥
देवदेव प्रसादेन त्वयानुग्रहशालिना
etatte darśitaṃ tejo dṛṣṭaṃ devaiśca mānavaiḥ ||
pratyakṣaṃ kṛttikāmāsi madvratāṃtamahotsave
||46||एतत्ते दर्शितं तेजो दृष्टं देवैश्च मानवैः ॥
प्रत्यक्षं कृत्तिकामासि मद्व्रतांतमहोत्सवे
nakṣatre kṛttikākhye'smiṃstejaste dṛśyatāṃ param ||
tadvīkṣitamidaṃ tejaḥ paramaṃ prativatsaram
||47||नक्षत्रे कृत्तिकाख्येऽस्मिंस्तेजस्ते दृश्यतां परम् ॥
तद्वीक्षितमिदं तेजः परमं प्रतिवत्सरम्
dṛṣṭvā samastairduritairmucyatāṃ sarvajaṃtavaḥ ||
tatheti devadevena proce'thāṃtardadhe girau
||48||दृष्ट्वा समस्तैर्दुरितैर्मुच्यतां सर्वजंतवः ॥
तथेति देवदेवेन प्रोचेऽथांतर्दधे गिरौ
pradakṣiṇaṃ cakārainaṃ sakhībhiḥ sā tatoṃ'bikā ||
ghanaśyāmalayā kāṃtyā parito jṛṃbhamāṇayā
||49||प्रदक्षिणं चकारैनं सखीभिः सा ततोंऽबिका ॥
घनश्यामलया कांत्या परितो जृंभमाणया
aruṇādrimayaṃ liṃgaṃ cakre marakataprabham ||
maṃdaṃ carantī jātābhiḥ prabhābhiḥ pādapadmayoḥ
||50||अरुणाद्रिमयं लिंगं चक्रे मरकतप्रभम् ॥
मंदं चरन्ती जाताभिः प्रभाभिः पादपद्मयोः
tastāra parito bhūmiṃ padmapatraiḥ sapallavaiḥ ||
praphullakanakāṃbhojanīlotpaladalotkaraiḥ
||51||तस्तार परितो भूमिं पद्मपत्रैः सपल्लवैः ॥
प्रफुल्लकनकांभोजनीलोत्पलदलोत्करैः
arcayantīva śoṇādrimabhito dṛṣṭikāṃtibhiḥ ||
indrādilokapālānāmaṃganābhirniṣevitā
||52||अर्चयन्तीव शोणाद्रिमभितो दृष्टिकांतिभिः ॥
इन्द्रादिलोकपालानामंगनाभिर्निषेविता
prasāditā mātṛgaṇairgaṃdhadānavibhūṣaṇaiḥ ||
chatracāmarabhṛṃgāratālavṛntaphalācikāḥ
||53||प्रसादिता मातृगणैर्गंधदानविभूषणैः ॥
छत्रचामरभृंगारतालवृन्तफलाचिकाः
vahantībhiḥ surastrībhirvṛtā munivadhūyutā ||
pradakṣiṇaṃ cakārainamaruṇādriṃ svayaṃprabham
||54||वहन्तीभिः सुरस्त्रीभिर्वृता मुनिवधूयुता ॥
प्रदक्षिणं चकारैनमरुणाद्रिं स्वयंप्रभम्
kāṃkṣantī śivasāyujyaṃ vivāhāgnimivādrijā ||
tasyāṃ pradakṣiṇaṃ bhaktyā kurvāṇāyāṃ padepade
||55||कांक्षन्ती शिवसायुज्यं विवाहाग्निमिवाद्रिजा ॥
तस्यां प्रदक्षिणं भक्त्या कुर्वाणायां पदेपदे
preṣitā śaṃbhunā devāḥ parivavruḥ sureśvarāḥ ||
sarasvatīsamaṃ dhātrā viṣṇunā ca samaṃ ramā
||56||प्रेषिता शंभुना देवाः परिवव्रुः सुरेश्वराः ॥
सरस्वतीसमं धात्रा विष्णुना च समं रमा
sarvadikpālakāṃtābhiḥ sametā śailabālikā ||
nirundhatīva devendraṃ salilairvaradānataḥ
||57||सर्वदिक्पालकांताभिः समेता शैलबालिका ॥
निरुन्धतीव देवेन्द्रं सलिलैर्वरदानतः
adrināthasvarūpasya śītatvamiva kurvatī ||
tapasyayā'vinābhāvāddevasyeva kṛtasmṛtiḥ
||58||अद्रिनाथस्वरूपस्य शीतत्वमिव कुर्वती ॥
तपस्ययाऽविनाभावाद्देवस्येव कृतस्मृतिः
duṣkarasyodavāsasya bodhayantīva sādhutām ||
ṛṣīṇāṃ devamānānāmupadeṣṭumiva kramāt
||59||दुष्करस्योदवासस्य बोधयन्तीव साधुताम् ॥
ऋषीणां देवमानानामुपदेष्टुमिव क्रमात्
krīḍāmiva purābhyastāṃ tapasāpi ca saṃgatā ||
ātmānaṃ virahottaptāmātmasthaṃ tādṛśa śivam
||60||क्रीडामिव पुराभ्यस्तां तपसापि च संगता ॥
आत्मानं विरहोत्तप्तामात्मस्थं तादृश शिवम्
saṃciṃtya cobhayoḥ kartuṃ śītalatvaṃ jale sthitā ||
tīrthānāmiva sarveṣāmudbhūtānāṃ śilātale
||61||संचिंत्य चोभयोः कर्तुं शीतलत्वं जले स्थिता ॥
तीर्थानामिव सर्वेषामुद्भूतानां शिलातले
ādhikyamatha lokasya vaktukāmā svayaṃ sthitā ||
duritaghnaṃ ca paṃcāgnimarthāvāsaṃ suduṣkaram
||62||आधिक्यमथ लोकस्य वक्तुकामा स्वयं स्थिता ॥
दुरितघ्नं च पंचाग्निमर्थावासं सुदुष्करम्
adhigamya tapastasya śāṃtiṃ kartumiva sthitā ||
mahiṣāsurakaṃṭhottharaktadhārāpariplutam
||63||अधिगम्य तपस्तस्य शांतिं कर्तुमिव स्थिता ॥
महिषासुरकंठोत्थरक्तधारापरिप्लुतम्
kṣālayaṃtīva liṃgaṃ tadamalaistīrthavāribhiḥ ||
aruṇākhyaṃ puraṃ ramyaṃ nirmitaṃ viśvakarmaṇā
||64||क्षालयंतीव लिंगं तदमलैस्तीर्थवारिभिः ॥
अरुणाख्यं पुरं रम्यं निर्मितं विश्वकर्मणा
apītakucanātheśaśoṇādrīśvaratuṣṭaye ||
śṛṃgeṣu yasya saudheṣu vasantyo vārayoṣitaḥ
||65||अपीतकुचनाथेशशोणाद्रीश्वरतुष्टये ॥
शृंगेषु यस्य सौधेषु वसन्त्यो वारयोषितः
adhaḥkṛtābhrataḍito jigīṣaṃtīva cāmarīḥ ||
yattuṃgasaudhaśṛṃgāgre gāyaṃtīrvārayoṣitaḥ
||66||अधःकृताभ्रतडितो जिगीषंतीव चामरीः ॥
यत्तुंगसौधशृंगाग्रे गायंतीर्वारयोषितः
siddhacāraṇagaṃdharvavidyādharavirājitam ||
aṣṭāpadarathākrāṃtamaṣṭavīthivirājitam
||67||सिद्धचारणगंधर्वविद्याधरविराजितम् ॥
अष्टापदरथाक्रांतमष्टवीथिविराजितम्
aṣṭāpadapathākāramaṣṭadikpālapūjitam ||
aṣṭasiddhiyutaiḥ siddhairaṣṭamūrtipadāśrayaiḥ
||68||अष्टापदपथाकारमष्टदिक्पालपूजितम् ॥
अष्टसिद्धियुतैः सिद्धैरष्टमूर्तिपदाश्रयैः
aṣṭāṃgabhaktiyuktaistairyuktamaṣṭāṃgabuddhibhiḥ ||
cāturvarṇyaguṇopetamupavarṇaṃ pariṣkṛtam
||69||अष्टांगभक्तियुक्तैस्तैर्युक्तमष्टांगबुद्धिभिः ॥
चातुर्वर्ण्यगुणोपेतमुपवर्णं परिष्कृतम्
lasatsuvarṇaduvarṇaśālāmālāsamāsthitam ||
śaṃkhaduṃdubhinissāṇamṛdaṃgamurajādibhiḥ
||70||लसत्सुवर्णदुवर्णशालामालासमास्थितम् ॥
शंखदुंदुभिनिस्साणमृदंगमुरजादिभिः
vīṇāveṇumukhaistālaiḥ sālāpairuparaṃjitam ||
brahmaghoṣaninādena maharṣīṇāṃ śivātmanām
||71||वीणावेणुमुखैस्तालैः सालापैरुपरंजितम् ॥
ब्रह्मघोषनिनादेन महर्षीणां शिवात्मनाम्
sevitavyaṃ dine divyasamadarśavṛṣadhvajam ||
navaratnaprabhājālairnavagrahasamodayaiḥ
||72||सेवितव्यं दिने दिव्यसमदर्शवृषध्वजम् ॥
नवरत्नप्रभाजालैर्नवग्रहसमोदयैः
niśādivasayorevaṃ darśayanniva sarvadā ||
viṣṇuḥ sthitaśca taṃ prītyā siṣeve purato vibhum
||73||निशादिवसयोरेवं दर्शयन्निव सर्वदा ॥
विष्णुः स्थितश्च तं प्रीत्या सिषेवे पुरतो विभुम्
śakraḥ suragaṇaiḥ sārdhaṃ sahasrākṣaḥ samāyayau ||
papāta divyagaṃdhāḍhyā puṣpavṛṣṭiḥ samaṃtataḥ
||74||शक्रः सुरगणैः सार्धं सहस्राक्षः समाययौ ॥
पपात दिव्यगंधाढ्या पुष्पवृष्टिः समंततः
vyomagaṃgājalotsaṃgaśītalo marudāvavau ||
atīva saurabhāmodavāsitākhiladiṅmukhaḥ
||75||व्योमगंगाजलोत्संगशीतलो मरुदाववौ ॥
अतीव सौरभामोदवासिताखिलदिङ्मुखः
kanakāṃkitaśṛṃgāgraparidhūtavanāvaliḥ ||
darpasaṃbhramasaṃnaddho nanāda vṛṣabho muhuḥ
||76||कनकांकितशृंगाग्रपरिधूतवनावलिः ॥
दर्पसंभ्रमसंनद्धो ननाद वृषभो मुहुः
vasaṃtapramukhāḥ sarve saharṣamṛtavaḥ puraḥ ||
asevaṃta priyakaraiḥ puṣpaiḥ svayamathocitaiḥ
||77||वसंतप्रमुखाः सर्वे सहर्षमृतवः पुरः ॥
असेवंत प्रियकरैः पुष्पैः स्वयमथोचितैः
gaṇaiśca vividhākārāḥ siddhāśca paramarṣayaḥ ||
surāśca kutukopetāḥ samāgacchandidṛkṣavaḥ
||78||गणैश्च विविधाकाराः सिद्धाश्च परमर्षयः ॥
सुराश्च कुतुकोपेताः समागच्छन्दिदृक्षवः
kuṃkumakṣodasaṃmiśrakarpūrarajasānvitaḥ ||
caryāmuṣṭimahāsāraḥ samakīryata sarvataḥ
||79||कुंकुमक्षोदसंमिश्रकर्पूररजसान्वितः ॥
चर्यामुष्टिमहासारः समकीर्यत सर्वतः
atha mṛdaṃgakamardalajhallarīpaṭahaduṃdubhitālasamanvitaiḥ ||
jalajakīcakakāhalanisvanaiḥ surakṛtairbhuvana samapūrayan
||80||अथ मृदंगकमर्दलझल्लरीपटहदुंदुभितालसमन्वितैः ॥
जलजकीचककाहलनिस्वनैः सुरकृतैर्भुवन समपूरयन्
suravadhūjananṛttaniraṃtarollulitatuṃbarugāyanagītibhiḥ ||
abhivṛto munidevagaṇānvito vṛṣagataḥ samadarśi vṛṣadhvajaḥ
||81||सुरवधूजननृत्तनिरंतरोल्लुलिततुंबरुगायनगीतिभिः ॥
अभिवृतो मुनिदेवगणान्वितो वृषगतः समदर्शि वृषध्वजः
sarasametya śivaḥ karuṇānidhirnatamukhīmapi tāmapalajjayā ||
lalitamaṃkamanaṃgaripuḥ śivāṃ dhṛtimahānadhiropya jaharṣa saḥ
||82||सरसमेत्य शिवः करुणानिधिर्नतमुखीमपि तामपलज्जया ॥
ललितमंकमनंगरिपुः शिवां धृतिमहानधिरोप्य जहर्ष सः
lalitayā nijayā priyayānvitaḥ suramunīṃdrasamājasamāvṛtaḥ ||
lalitamapsarasāṃ muhurādarānnaṭanamaikṣata gītisamanvitam
||83||ललितया निजया प्रिययान्वितः सुरमुनींद्रसमाजसमावृतः ॥
ललितमप्सरसां मुहुरादरान्नटनमैक्षत गीतिसमन्वितम्
atha śivaḥ surarājasamarpitāñchubhapaṭīramukhānilasaurabhān ||
himagiriprahitāṃśca samagrahīnmṛgamadaiḥ saha gaṃdhasamuccayān
||84||अथ शिवः सुरराजसमर्पिताञ्छुभपटीरमुखानिलसौरभान् ॥
हिमगिरिप्रहितांश्च समग्रहीन्मृगमदैः सह गंधसमुच्चयान्
samanulepitahārasumaṃḍitāvabhigatau sitatāṃ samalaṃkṛtau ||
svayamapītakucākucakuḍmalāvaraṇaraṃbhaṇacañcalasatkarau
||85||समनुलेपितहारसुमंडितावभिगतौ सिततां समलंकृतौ ॥
स्वयमपीतकुचाकुचकुड्मलावरणरंभणचञ्चलसत्करौ
kaṭhinatuṃgaghanastanakorakasthagitamaṃgalagaṃdhamanoharām ||
girisutāmadhigamya śivaḥ svayaṃ virahatāpamaśeṣamapākarot
||86||कठिनतुंगघनस्तनकोरकस्थगितमंगलगंधमनोहराम् ॥
गिरिसुतामधिगम्य शिवः स्वयं विरहतापमशेषमपाकरोत्
atha vinodaśatairupalakṣitāṃ nijaviyogajatāpa kṛśānvitām ||
aruṇaśailapatiḥ svayamadrijāṃ varamabhīpsitamarthaya cetyaśāt
||87||अथ विनोदशतैरुपलक्षितां निजवियोगजताप कृशान्विताम् ॥
अरुणशैलपतिः स्वयमद्रिजां वरमभीप्सितमर्थय चेत्यशात्
sakutukaṃ praṇipatya nagātmajā puraripuṃ bhuvanatrayaguptaye ||
imamayācata śoṇagirīśvaraṃ varamudāramanugrahasaṃmudam
||88||सकुतुकं प्रणिपत्य नगात्मजा पुररिपुं भुवनत्रयगुप्तये ॥
इममयाचत शोणगिरीश्वरं वरमुदारमनुग्रहसंमुदम्
iti śrīskāṃde mahāpurāṇa ekāśītisāhasryāṃ saṃhitāyāṃ prathame māhaśvarakhaṇḍe'ruṇācalamāhātmye pūrvārdhe devyāḥ śivasamāgamavarṇanaṃnāma dvādaśo'dhyāyaḥ || 12 ||