stotraṃ vakṣyāmi te kṛṣṇa pañcāvaraṇamārgataḥ
upamanyuruvāca
stotraṃ vakṣyāmi te kṛṣṇa pañcāvaraṇamārgataḥ |
yogeśvaramidaṃ puṇyaṃ karma yena samāpyate
||1||स्तोत्रं वक्ष्यामि ते कृष्ण पञ्चावरणमार्गतः ।
योगेश्वरमिदं पुण्यं कर्म येन समाप्यते
jaya jaya jagadekanātha śaṃbho prakṛtimanohara nityacitsvabhāva |
atigatakaluṣaprapañcavācāmapi manasāṃ padavīmatītatattvam
||2||जय जय जगदेकनाथ शंभो प्रकृतिमनोहर नित्यचित्स्वभाव ।
अतिगतकलुषप्रपञ्चवाचामपि मनसां पदवीमतीततत्त्वम्
svabhāvanirmalābhoga jaya sundaraceṣṭita |
svātmatulyamahāśakte jaya śuddhaguṇārṇava
||3||स्वभावनिर्मलाभोग जय सुन्दरचेष्टित ।
स्वात्मतुल्यमहाशक्ते जय शुद्धगुणार्णव
anantakāṃtisaṃpanna jayāsadṛśavigraha |
atarkyamahimādhāra jayānākulamaṃgala
||4||अनन्तकांतिसंपन्न जयासदृशविग्रह ।
अतर्क्यमहिमाधार जयानाकुलमंगल
niraṃjana nirādhāra jaya niṣkāraṇodaya |
nirantaraparānanda jaya nirvṛtikāraṇa
||5||निरंजन निराधार जय निष्कारणोदय ।
निरन्तरपरानन्द जय निर्वृतिकारण
jayātiparamaiśvarya jayātikaruṇāspada |
jaya svataṃtrasarvasva jayāsadṛśavaibhava
||6||जयातिपरमैश्वर्य जयातिकरुणास्पद ।
जय स्वतंत्रसर्वस्व जयासदृशवैभव
jayāvṛtamahāviśva jayānāvṛta kenacit |
jayottara samastasya jayātyantaniruttara
||7||जयावृतमहाविश्व जयानावृत केनचित् ।
जयोत्तर समस्तस्य जयात्यन्तनिरुत्तर
jayādbhuta jayākṣudra jayākṣata jayāvyaya |
jayāmeya jayāmāya jayābhāva jayāmala
||8||जयाद्भुत जयाक्षुद्र जयाक्षत जयाव्यय ।
जयामेय जयामाय जयाभाव जयामल
mahābhuja mahāsāra mahāguṇa mahākatha |
mahābala mahāmāya mahārasa mahāratha
||9||महाभुज महासार महागुण महाकथ ।
महाबल महामाय महारस महारथ
namaḥ paramadevāya namaḥ paramahetave |
namaśśivāya śāṃtāya namaśśivatarāya te
||10||नमः परमदेवाय नमः परमहेतवे ।
नमश्शिवाय शांताय नमश्शिवतराय ते
tvadadhīnamidaṃ kṛtsnaṃ jagaddhi sasurāsuram
||11||त्वदधीनमिदं कृत्स्नं जगद्धि ससुरासुरम्
atastvadvihitāmājñāṃ kṣamate ko 'tivartitum
||12||अतस्त्वद्विहितामाज्ञां क्षमते को ऽतिवर्तितुम्
ayaṃ punarjano nityaṃ bhavadekasamāśrayaḥ |
bhavānato 'nugṛhyāsmai prārthitaṃ saṃprayacchatu
||13||अयं पुनर्जनो नित्यं भवदेकसमाश्रयः ।
भवानतो ऽनुगृह्यास्मै प्रार्थितं संप्रयच्छतु
jayāṃbike jaganmātarjaya sarvajaganmayi |
jayānavadhikaiśvarye jayānupamavigrahe
||14||जयांबिके जगन्मातर्जय सर्वजगन्मयि ।
जयानवधिकैश्वर्ये जयानुपमविग्रहे
jaya vāṅmanasātīte jayāciddhvāṃtabhaṃjike |
jaya janmajarāhīne jaya kālottarottare
||15||जय वाङ्मनसातीते जयाचिद्ध्वांतभंजिके ।
जय जन्मजराहीने जय कालोत्तरोत्तरे
jayānekavidhānasthe jaya viśveśvarapriye |
jaya viśvasurārādhye jaya viśvavijṛṃbhiṇi
||16||जयानेकविधानस्थे जय विश्वेश्वरप्रिये ।
जय विश्वसुराराध्ये जय विश्वविजृंभिणि
jaya maṃgaladivyāṃgi jaya maṃgaladīpike |
jaya maṃgalacāritre jaya maṃgaladāyini
||17||जय मंगलदिव्यांगि जय मंगलदीपिके ।
जय मंगलचारित्रे जय मंगलदायिनि
namaḥ paramakalyāṇaguṇasaṃcayamūrtaye |
tvattaḥ khalu samutpannaṃ jagattvayyeva līyate
||18||नमः परमकल्याणगुणसंचयमूर्तये ।
त्वत्तः खलु समुत्पन्नं जगत्त्वय्येव लीयते
tvadvinātaḥ phalaṃ dātumīśvaropi na śaknuyāt |
janmaprabhṛti deveśi janoyaṃ tvadupāśritaḥ
||19||त्वद्विनातः फलं दातुमीश्वरोपि न शक्नुयात् ।
जन्मप्रभृति देवेशि जनोयं त्वदुपाश्रितः
ato 'sya tava bhaktasya nirvartaya manoratham |
pañcavaktro daśabhujaḥ śuddhasphaṭikasannibhaḥ
||20||अतो ऽस्य तव भक्तस्य निर्वर्तय मनोरथम् ।
पञ्चवक्त्रो दशभुजः शुद्धस्फटिकसन्निभः
varṇabrahmakalādeho devassakalaniṣkalaḥ |
śivabhaktisamārūḍhaḥ śāṃtyatītassadāśivaḥ |
bhaktyā mayārcito mahyaṃ prārthitaṃ śaṃ prayacchatu
||21||वर्णब्रह्मकलादेहो देवस्सकलनिष्कलः ।
शिवभक्तिसमारूढः शांत्यतीतस्सदाशिवः ।
भक्त्या मयार्चितो मह्यं प्रार्थितं शं प्रयच्छतु
sadāśivāṃkamārūḍhā śaktiricchā śivāhvayā |
jananī sarvalokānāṃ prayacchatu manoratham
||22||सदाशिवांकमारूढा शक्तिरिच्छा शिवाह्वया ।
जननी सर्वलोकानां प्रयच्छतु मनोरथम्
śivayordayitā putrau devau heraṃbaṣaṇmukhau |
śivānubhāvau sarvajñau śivajñānāmṛtāśinau
||23||शिवयोर्दयिता पुत्रौ देवौ हेरंबषण्मुखौ ।
शिवानुभावौ सर्वज्ञौ शिवज्ञानामृताशिनौ
tṛptau parasparaṃ snigdhau śivābhyāṃ nityasatkṛtau |
satkṛtau ca sadā devau brahmādyaistridaśairapi
||24||तृप्तौ परस्परं स्निग्धौ शिवाभ्यां नित्यसत्कृतौ ।
सत्कृतौ च सदा देवौ ब्रह्माद्यैस्त्रिदशैरपि
sarvalokaparitrāṇaṃ kartumabhyuditau sadā |
svecchāvatāraṃ kurvaṃtau svāṃśabhedairanekaśaḥ
||25||सर्वलोकपरित्राणं कर्तुमभ्युदितौ सदा ।
स्वेच्छावतारं कुर्वंतौ स्वांशभेदैरनेकशः
tāvimau śivayoḥ pārśve nityamitthaṃ mayārcitau |
tayorājñāṃ puraskṛtya prārthitaṃ me prayacchatām
||26||ताविमौ शिवयोः पार्श्वे नित्यमित्थं मयार्चितौ ।
तयोराज्ञां पुरस्कृत्य प्रार्थितं मे प्रयच्छताम्
śuddhasphaṭikasaṃkāśamīśānākhyaṃ sadāśivam |
mūrdhābhimāninī mūrtiḥ śivasya paramātmanaḥ
||27||शुद्धस्फटिकसंकाशमीशानाख्यं सदाशिवम् ।
मूर्धाभिमानिनी मूर्तिः शिवस्य परमात्मनः
śivārcanarataṃ śāṃtaṃ śāṃtyatītaṃ makhāsthitam |
pañcākṣarāṃtimaṃ bījaṃ kalābhiḥ pañcabhiryutam
||28||शिवार्चनरतं शांतं शांत्यतीतं मखास्थितम् ।
पञ्चाक्षरांतिमं बीजं कलाभिः पञ्चभिर्युतम्
prathamāvaraṇe pūrvaṃ śaktyā saha samarcitam |
pavitraṃ paramaṃ brahma prārthitaṃ me prayacchatu
||29||प्रथमावरणे पूर्वं शक्त्या सह समर्चितम् ।
पवित्रं परमं ब्रह्म प्रार्थितं मे प्रयच्छतु
bālasūryapratīkāśaṃ puruṣākhyaṃ purātanam |
pūrvavaktrābhimānaṃ ca śivasya parameṣṭhinaḥ
||30||बालसूर्यप्रतीकाशं पुरुषाख्यं पुरातनम् ।
पूर्ववक्त्राभिमानं च शिवस्य परमेष्ठिनः
śāṃtyātmakaṃ marutsaṃsthaṃ śambhoḥ pādārcane ratam |
prathamaṃ śivabījeṣu kalāsu ca catuṣkalam
||31||शांत्यात्मकं मरुत्संस्थं शम्भोः पादार्चने रतम् ।
प्रथमं शिवबीजेषु कलासु च चतुष्कलम्
pūrvabhāge mayā bhaktyā śaktyā saha samarcitam |
pavitraṃ paramaṃ brahma prārthitaṃ me prayacchatu
||32||पूर्वभागे मया भक्त्या शक्त्या सह समर्चितम् ।
पवित्रं परमं ब्रह्म प्रार्थितं मे प्रयच्छतु
añjanādipratīkāśamaghoraṃ ghoravigraham |
devasya dakṣiṇaṃ vaktraṃ devadevapadārcakam
||33||अञ्जनादिप्रतीकाशमघोरं घोरविग्रहम् ।
देवस्य दक्षिणं वक्त्रं देवदेवपदार्चकम्
vidyāpādaṃ samārūḍhaṃ vahnimaṇḍalamadhyagam |
dvitīyaṃ śivabījeṣu kalāsvaṣṭakalānvitam
||34||विद्यापादं समारूढं वह्निमण्डलमध्यगम् ।
द्वितीयं शिवबीजेषु कलास्वष्टकलान्वितम्
śaṃbhordakṣiṇadigbhāge śaktyā saha samarcitam |
pavitraṃ madhyamaṃ brahma prārthitaṃ me prayacchatu
||35||शंभोर्दक्षिणदिग्भागे शक्त्या सह समर्चितम् ।
पवित्रं मध्यमं ब्रह्म प्रार्थितं मे प्रयच्छतु
kuṃkumakṣodasaṃkāśaṃ vāmākhyaṃ varaveṣadhṛk |
vaktramuttaramīśasya pratiṣṭhāyāṃ pratiṣṭhitam
||36||कुंकुमक्षोदसंकाशं वामाख्यं वरवेषधृक् ।
वक्त्रमुत्तरमीशस्य प्रतिष्ठायां प्रतिष्ठितम्
vārimaṃḍalamadhyasthaṃ mahādevārcane ratam |
turīyaṃ śivabījeṣu trayodaśakalānvitam
||37||वारिमंडलमध्यस्थं महादेवार्चने रतम् ।
तुरीयं शिवबीजेषु त्रयोदशकलान्वितम्
devasyottaradigbhāge śaktyā saha samarcitam |
pavitraṃ paramaṃ brahma prārthitaṃ me prayacchatu
||38||देवस्योत्तरदिग्भागे शक्त्या सह समर्चितम् ।
पवित्रं परमं ब्रह्म प्रार्थितं मे प्रयच्छतु
śaṃkhakuṃdeṃdudhavalaṃ saṃdhyākhyaṃ saumyalakṣaṇam |
śivasya paścimaṃ vaktraṃ śivapādārcane ratam
||39||शंखकुंदेंदुधवलं संध्याख्यं सौम्यलक्षणम् ।
शिवस्य पश्चिमं वक्त्रं शिवपादार्चने रतम्
nivṛttipadaniṣṭhaṃ ca pṛthivyāṃ samavasthitam |
tṛtīyaṃ śivabījeṣu kalābhiścāṣṭabhiryutam
||40||निवृत्तिपदनिष्ठं च पृथिव्यां समवस्थितम् ।
तृतीयं शिवबीजेषु कलाभिश्चाष्टभिर्युतम्
devasya paścime bhāge śaktyā saha samarcitam |
pavitraṃ paramaṃ brahma prārthitaṃ me prayacchatu
||41||देवस्य पश्चिमे भागे शक्त्या सह समर्चितम् ।
पवित्रं परमं ब्रह्म प्रार्थितं मे प्रयच्छतु
śivasya tu śivāyāśca hṛnmūrtiśivabhāvite |
tayorājñāṃ puraskṛtya te me kāmaṃ prayacchatām
||42||शिवस्य तु शिवायाश्च हृन्मूर्तिशिवभाविते ।
तयोराज्ञां पुरस्कृत्य ते मे कामं प्रयच्छताम्
śivasya ca śivāyāśca śikhāmūrtiśivāśrite |
satkṛtya śivayorājñāṃ te me kāmaṃ prayacchatām
||43||शिवस्य च शिवायाश्च शिखामूर्तिशिवाश्रिते ।
सत्कृत्य शिवयोराज्ञां ते मे कामं प्रयच्छताम्
śivasya ca śivāyāśca varmaṇā śivabhāvite |
satkṛtya śivayorājñāṃ te me kāmaṃ prayacchatām
||44||शिवस्य च शिवायाश्च वर्मणा शिवभाविते ।
सत्कृत्य शिवयोराज्ञां ते मे कामं प्रयच्छताम्
śivasya ca śivāyāśca netramūrtiśivāśrite |
satkṛtya śivayorājñāṃ te me kāmaṃ prayacchatām
||45||शिवस्य च शिवायाश्च नेत्रमूर्तिशिवाश्रिते ।
सत्कृत्य शिवयोराज्ञां ते मे कामं प्रयच्छताम्
astramūrtī ca śivayornityamarcanatatpare |
satkṛtya śivayorājñāṃ te me kāmaṃ prayacchatām
||46||अस्त्रमूर्ती च शिवयोर्नित्यमर्चनतत्परे ।
सत्कृत्य शिवयोराज्ञां ते मे कामं प्रयच्छताम्
vāmau jyeṣṭhastathā rudraḥ kālo vikaraṇastathā |
balo vikaraṇaścaiva balapramathanaḥ paraḥ
||47||वामौ ज्येष्ठस्तथा रुद्रः कालो विकरणस्तथा ।
बलो विकरणश्चैव बलप्रमथनः परः
sarvabhūtasya damanastādṛśāścāṣṭaśaktayaḥ |
prārthitaṃ me prayacchaṃtu śivayoreva śāsanāt
||48||सर्वभूतस्य दमनस्तादृशाश्चाष्टशक्तयः ।
प्रार्थितं मे प्रयच्छंतु शिवयोरेव शासनात्
athānaṃtaśca sūkṣmaśca śivaścāpyekanetrakaḥ |
eka rudrākhyamartiśca śrīkaṇṭhaśca śikhaṃḍakaḥ
||49||अथानंतश्च सूक्ष्मश्च शिवश्चाप्येकनेत्रकः ।
एक रुद्राख्यमर्तिश्च श्रीकण्ठश्च शिखंडकः
tathāṣṭau śaktayasteṣāṃ dvitīyāvaraṇe 'rcitāḥ |
te me kāmaṃ prayacchaṃtu śivayoreva śāsanāt
||50||तथाष्टौ शक्तयस्तेषां द्वितीयावरणे ऽर्चिताः ।
ते मे कामं प्रयच्छंतु शिवयोरेव शासनात्
bhavādyā mūrtayaścāṣṭau tāsāmapi ca śaktayaḥ |
mahādevādayaścānye tathaikādaśamūrtayaḥ
||51||भवाद्या मूर्तयश्चाष्टौ तासामपि च शक्तयः ।
महादेवादयश्चान्ये तथैकादशमूर्तयः
śaktibhissahitāssarve tṛtīyāvaraṇe sthitāḥ |
satkṛtya śivayorājñāṃ diśaṃtu phalamīpsitam
||52||शक्तिभिस्सहितास्सर्वे तृतीयावरणे स्थिताः ।
सत्कृत्य शिवयोराज्ञां दिशंतु फलमीप्सितम्
vṛkṣarājo mahātejā mahāmeghasamasvanaḥ |
merumaṃdarakailāsahimādriśikharopamaḥ
||53||वृक्षराजो महातेजा महामेघसमस्वनः ।
मेरुमंदरकैलासहिमाद्रिशिखरोपमः
sitābhraśikharākāraḥ kakudā pariśobhitaḥ |
mahābhogīṃdrakalpena vālena ca virājitaḥ
||54||सिताभ्रशिखराकारः ककुदा परिशोभितः ।
महाभोगींद्रकल्पेन वालेन च विराजितः
raktāsyaśṛṃgacaraṇau raktaprāyavilocanaḥ |
pīvaronnatasarvāṃgassucārugamanojjvalaḥ
||55||रक्तास्यशृंगचरणौ रक्तप्रायविलोचनः ।
पीवरोन्नतसर्वांगस्सुचारुगमनोज्ज्वलः
praśastalakṣaṇaḥ śrīmānprajvalanmaṇibhūṣaṇaḥ |
śivapriyaḥ śivāsaktaḥ śivayordhvajavāhanaḥ
||56||प्रशस्तलक्षणः श्रीमान्प्रज्वलन्मणिभूषणः ।
शिवप्रियः शिवासक्तः शिवयोर्ध्वजवाहनः
tathā taccaraṇanyāsapāvitāparavigrahaḥ |
gorājapuruṣaḥ śrīmāñchrīmacchūlavarāyudhaḥ |
tayorājñāṃ puraskṛtya sa me kāmaṃ prayacchatu
||57||तथा तच्चरणन्यासपावितापरविग्रहः ।
गोराजपुरुषः श्रीमाञ्छ्रीमच्छूलवरायुधः ।
तयोराज्ञां पुरस्कृत्य स मे कामं प्रयच्छतु
nandīśvaro mahātejā nagendratanayātmajaḥ |
sanārāyaṇakairdevairnityamabhyarcya vaṃditaḥ
||58||नन्दीश्वरो महातेजा नगेन्द्रतनयात्मजः ।
सनारायणकैर्देवैर्नित्यमभ्यर्च्य वंदितः
śarvasyāṃtaḥpuradvāri sārdhaṃ parijanaiḥ sthitaḥ |
sarveśvarasamaprakhyassarvāsuravimardanaḥ
||59||शर्वस्यांतःपुरद्वारि सार्धं परिजनैः स्थितः ।
सर्वेश्वरसमप्रख्यस्सर्वासुरविमर्दनः
sarveṣāṃ śivadharmāṇāmadhyakṣatve 'bhiṣecitaḥ |
śivapriyaśśivāsaktaśśrīmacchūlavarāyudhaḥ
||60||सर्वेषां शिवधर्माणामध्यक्षत्वे ऽभिषेचितः ।
शिवप्रियश्शिवासक्तश्श्रीमच्छूलवरायुधः
śivāśriteṣu saṃsaktastvanuraktaśca tairapi |
satkṛtya śivayorājñāṃ sa me kāmaṃ prayacchatu
||61||शिवाश्रितेषु संसक्तस्त्वनुरक्तश्च तैरपि ।
सत्कृत्य शिवयोराज्ञां स मे कामं प्रयच्छतु
mahākālo mahābāhurmahādeva ivāparaḥ |
mahādevāśritānāṃ 1 tu nityamevābhirakṣatu
||62||महाकालो महाबाहुर्महादेव इवापरः ।
महादेवाश्रितानां १ तु नित्यमेवाभिरक्षतु
śivapriyaḥ śivāsaktaśśivayorarcakassadā |
satkṛtya śivayorājñāṃ sa me diśatu kāṃkṣitam
||63||शिवप्रियः शिवासक्तश्शिवयोरर्चकस्सदा ।
सत्कृत्य शिवयोराज्ञां स मे दिशतु कांक्षितम्
sarvaśāstrārthatattvajñaḥ śāstā viṣnoḥ parā tanuḥ |
mahāmohātmatanayo madhumāṃsāsavapriyaḥ |
tayorājñāṃ puraskṛtya sa me kāmaṃ prayacchatu
||64||सर्वशास्त्रार्थतत्त्वज्ञः शास्ता विष्नोः परा तनुः ।
महामोहात्मतनयो मधुमांसासवप्रियः ।
तयोराज्ञां पुरस्कृत्य स मे कामं प्रयच्छतु
brahmāṇī caiva māheśī kaumārī vaiṣṇavī tathā |
vārāhī caiva māheṃdrī cāmuṃḍā caṃḍavikramā
||65||ब्रह्माणी चैव माहेशी कौमारी वैष्णवी तथा ।
वाराही चैव माहेंद्री चामुंडा चंडविक्रमा
etā vai mātaraḥ sapta sarvalokasya mātaraḥ |
prārthitaṃ me prayacchaṃtu parameśvaraśāsanāt
||66||एता वै मातरः सप्त सर्वलोकस्य मातरः ।
प्रार्थितं मे प्रयच्छंतु परमेश्वरशासनात्
mattamātaṃgavadano gaṃgomāśaṃkarātmajaḥ |
ākāśadeho digbāhussomasūryāgnilocanaḥ
||67||मत्तमातंगवदनो गंगोमाशंकरात्मजः ।
आकाशदेहो दिग्बाहुस्सोमसूर्याग्निलोचनः
airāvatādibhirdivyairdiggajairnityamarcitaḥ |
śivajñānamadodbhinnarstridaśānāmavighnakṛt
||68||ऐरावतादिभिर्दिव्यैर्दिग्गजैर्नित्यमर्चितः ।
शिवज्ञानमदोद्भिन्नर्स्त्रिदशानामविघ्नकृत्
vighnakṛccāsurādīnāṃ vighneśaḥ śivabhāvitaḥ |
satkṛtya śivayorājñāṃ sa me diśatu kāṃkṣitam
||69||विघ्नकृच्चासुरादीनां विघ्नेशः शिवभावितः ।
सत्कृत्य शिवयोराज्ञां स मे दिशतु कांक्षितम्
ṣaṇmukhaśśivasambhūtaḥ śaktivajradharaḥ prabhuḥ |
agneśca tanayo devo hyaparṇātanayaḥ punaḥ
||70||षण्मुखश्शिवसम्भूतः शक्तिवज्रधरः प्रभुः ।
अग्नेश्च तनयो देवो ह्यपर्णातनयः पुनः
gaṃgāyāśca gaṇāṃbāyāḥ kṛttikānāṃ tathaiva ca |
viśākhena ca śākhena naigameyena cāvṛtaḥ
||71||गंगायाश्च गणांबायाः कृत्तिकानां तथैव च ।
विशाखेन च शाखेन नैगमेयेन चावृतः
iṃdrajiccaṃdrasenānīstārakāsurajittathā |
śailānāṃ merumukhyānāṃ vedhakaśca svatejasā
||72||इंद्रजिच्चंद्रसेनानीस्तारकासुरजित्तथा ।
शैलानां मेरुमुख्यानां वेधकश्च स्वतेजसा
taptacāmīkaraprakhyaḥ śatapatradalekṣaṇaḥ |
kumārassukumārāṇāṃ rūpodāharaṇaṃ mahat
||73||तप्तचामीकरप्रख्यः शतपत्रदलेक्षणः ।
कुमारस्सुकुमाराणां रूपोदाहरणं महत्
śivapriyaḥ śivāsaktaḥ śivapadārcakassadā |
satkṛtya śivayorājñāṃ sa me diśatu kāṃkṣitam
||74||शिवप्रियः शिवासक्तः शिवपदार्चकस्सदा ।
सत्कृत्य शिवयोराज्ञां स मे दिशतु कांक्षितम्
jyeṣṭhā variṣṭhā varadā śivayoryajaneratā |
tayorājñāṃ puraskṛtya sā me diśatu kāṃkṣitam
||75||ज्येष्ठा वरिष्ठा वरदा शिवयोर्यजनेरता ।
तयोराज्ञां पुरस्कृत्य सा मे दिशतु कांक्षितम्
trailokyavaṃditā sākṣādulkākārā gaṇāṃbikā |
jagatsṛṣṭivivṛddhyarthaṃ brahmaṇā 'bhyarthitā śivāt
||76||त्रैलोक्यवंदिता साक्षादुल्काकारा गणांबिका ।
जगत्सृष्टिविवृद्ध्यर्थं ब्रह्मणा ऽभ्यर्थिता शिवात्
śivāyāḥ pravibhaktāyā bhruvorantaranissṛtāḥ |
dakṣāyaṇī satī menā tathā haimavatī hyumā
||77||शिवायाः प्रविभक्ताया भ्रुवोरन्तरनिस्सृताः ।
दक्षायणी सती मेना तथा हैमवती ह्युमा
kauśikyāścaiva jananī bhadrakālyāstathaiva ca |
aparṇāyāśca jananī pāṭalāyāstathaiva ca
||78||कौशिक्याश्चैव जननी भद्रकाल्यास्तथैव च ।
अपर्णायाश्च जननी पाटलायास्तथैव च
śivārcanaratā nityaṃ rudrāṇī rudravallabhā |
satkṛṭya śivayorājñāṃ sā me diśatu kāṃkṣitam
||79||शिवार्चनरता नित्यं रुद्राणी रुद्रवल्लभा ।
सत्कृट्य शिवयोराज्ञां सा मे दिशतु कांक्षितम्
caṃḍaḥ sarvagaṇeśānaḥ śaṃbhorvadanasaṃbhavaḥ |
satkṛtya śivayorājñāṃ sa me diśatu kāṃkṣitam
||80||चंडः सर्वगणेशानः शंभोर्वदनसंभवः ।
सत्कृत्य शिवयोराज्ञां स मे दिशतु कांक्षितम्
piṃgalo gaṇapaḥ śrīmāñchivāsaktaḥ śivapriyaḥ |
ājñayā śivayoreva sa me kāmaṃ prayacchatu
||81||पिंगलो गणपः श्रीमाञ्छिवासक्तः शिवप्रियः ।
आज्ञया शिवयोरेव स मे कामं प्रयच्छतु
bhṛṃgīśo nāma gaṇapaḥ śivarādhanatatparaḥ |
sambandhasāmānyavivakṣayā karmaṇi paṣṭhī prayacchatu sa me kāmaṃ patyurājñā puraḥsaram
||82||भृंगीशो नाम गणपः शिवराधनतत्परः ।
सम्बन्धसामान्यविवक्षया कर्मणि पष्ठी प्रयच्छतु स मे कामं पत्युराज्ञा पुरःसरम्
vīrabhadro mahātejā himakuṃdeṃdusannibhaḥ |
bhadrakālīpriyo nityaṃ mātḥṇāṃ cābhirakṣitā
||83||वीरभद्रो महातेजा हिमकुंदेंदुसन्निभः ।
भद्रकालीप्रियो नित्यं मात्ःणां चाभिरक्षिता
yajñasya ca śirohartā dakṣasya ca durātmanaḥ |
upeṃdreṃdrayamādīnāṃ devānāmaṃgatakṣakaḥ
||84||यज्ञस्य च शिरोहर्ता दक्षस्य च दुरात्मनः ।
उपेंद्रेंद्रयमादीनां देवानामंगतक्षकः
śivasyānucaraḥ śrīmāñchivaśāsanapālakaḥ |
śivayoḥ śāsanādeva sa me diśatu kāṃkṣitam
||85||शिवस्यानुचरः श्रीमाञ्छिवशासनपालकः ।
शिवयोः शासनादेव स मे दिशतु कांक्षितम्
sarasvatī maheśasya vāksarojasamudbhavā |
śivayoḥ pūjane saktā sa me diśatu kāṃkṣitam
||86||सरस्वती महेशस्य वाक्सरोजसमुद्भवा ।
शिवयोः पूजने सक्ता स मे दिशतु कांक्षितम्
viṣṇorvakṣaḥsthitā lakṣmīḥ śivayoḥ pūjane ratā |
śivayoḥ śāsanādeva sā me diśatu kāṃkṣitam
||87||विष्णोर्वक्षःस्थिता लक्ष्मीः शिवयोः पूजने रता ।
शिवयोः शासनादेव सा मे दिशतु कांक्षितम्
mahāmoṭī mahādevyāḥ pādapūjāparāyaṇā |
tasyā eva niyogena sā me diśatu kāṃkṣitam
||88||महामोटी महादेव्याः पादपूजापरायणा ।
तस्या एव नियोगेन सा मे दिशतु कांक्षितम्
kauśikī siṃhamārūḍhā pārvatyāḥ paramā sutā |
viṣṇornidrāmahāmāyā mahāmahiṣamardinī
||89||कौशिकी सिंहमारूढा पार्वत्याः परमा सुता ।
विष्णोर्निद्रामहामाया महामहिषमर्दिनी
niśaṃbhaśuṃbhasaṃhatrī madhumāṃsāsavapriyā |
satkṛtya śāsanaṃ mātussā me diśatu kāṃkṣitam
||90||निशंभशुंभसंहत्री मधुमांसासवप्रिया ।
सत्कृत्य शासनं मातुस्सा मे दिशतु कांक्षितम्
rudrā rudrasamaprakhyāḥ prathamāḥ prathitaujasaḥ |
bhūtākhyāśca mahāvīryā mahādevasamaprabhāḥ
||91||रुद्रा रुद्रसमप्रख्याः प्रथमाः प्रथितौजसः ।
भूताख्याश्च महावीर्या महादेवसमप्रभाः
nityamuktā nirupamā nirdvandvā nirupaplavāḥ |
saśaktayassānucarāssarvalokanamaskṛtāḥ
||92||नित्यमुक्ता निरुपमा निर्द्वन्द्वा निरुपप्लवाः ।
सशक्तयस्सानुचरास्सर्वलोकनमस्कृताः
sarveṣāmeva lokānāṃ sṛṣṭisaṃharaṇakṣamāḥ |
parasparānuraktāśca parasparamanuvratāḥ
||93||सर्वेषामेव लोकानां सृष्टिसंहरणक्षमाः ।
परस्परानुरक्ताश्च परस्परमनुव्रताः
parasparamatisnigdhāḥ parasparanamaskṛtāḥ |
śivapriyatamā nityaṃ śivalakṣaṇalakṣitāḥ
||94||परस्परमतिस्निग्धाः परस्परनमस्कृताः ।
शिवप्रियतमा नित्यं शिवलक्षणलक्षिताः
saumyādhārāstathā miśrāścāṃtarāladvayātmikāḥ |
virūpāśca surūpāśca nānārūpadharāstathā
||95||सौम्याधारास्तथा मिश्राश्चांतरालद्वयात्मिकाः ।
विरूपाश्च सुरूपाश्च नानारूपधरास्तथा
satkṛtya śivayorājñāṃ te me kāmaṃ diśaṃtu vai |
devyā priyasakhīvargo devīlakṣaṇalakṣitaḥ
||96||सत्कृत्य शिवयोराज्ञां ते मे कामं दिशंतु वै ।
देव्या प्रियसखीवर्गो देवीलक्षणलक्षितः
sahito rudrakanyābhiḥ śaktibhiścāpyanekaśaḥ |
tṛtīyāvaraṇe śaṃbhorbhaktyā nityaṃ samarcitaḥ
||97||सहितो रुद्रकन्याभिः शक्तिभिश्चाप्यनेकशः ।
तृतीयावरणे शंभोर्भक्त्या नित्यं समर्चितः
satkṛtya śivayorājñāṃ sa me diśatu maṃgalam |
divākaro maheśasya mūrtirdīptisumaṃḍalaḥ
||98||सत्कृत्य शिवयोराज्ञां स मे दिशतु मंगलम् ।
दिवाकरो महेशस्य मूर्तिर्दीप्तिसुमंडलः
nirguṇo guṇasaṃkīrṇastathaiva guṇakevalaḥ |
avikārātmakaścādya ekassāmānyavikriyaḥ
||99||निर्गुणो गुणसंकीर्णस्तथैव गुणकेवलः ।
अविकारात्मकश्चाद्य एकस्सामान्यविक्रियः
asādhāraṇakarmā ca sṛṣṭisthitilayakramāt |
evaṃ tridhā caturdhā ca vibhaktāḥ pañcadhā punaḥ
||100||असाधारणकर्मा च सृष्टिस्थितिलयक्रमात् ।
एवं त्रिधा चतुर्धा च विभक्ताः पञ्चधा पुनः
caturthāvaraṇe śaṃbhoḥ pūjitaścānugaiḥ saha |
śivapriyaḥ śivāsaktaḥ śivapādārcane rataḥ
||101||चतुर्थावरणे शंभोः पूजितश्चानुगैः सह ।
शिवप्रियः शिवासक्तः शिवपादार्चने रतः
satkṛtya śivayorājñāṃ sa me diśatu maṃgalam |
divākaraṣaḍaṃgāni dīptādyāścāṣṭaśaktayaḥ
||102||सत्कृत्य शिवयोराज्ञां स मे दिशतु मंगलम् ।
दिवाकरषडंगानि दीप्ताद्याश्चाष्टशक्तयः
ādityo bhāskaro bhānū raviścetyanupūrvaśaḥ |
arko brahmā tathā rudro viṣnuścādityamūrtayaḥ
||103||आदित्यो भास्करो भानू रविश्चेत्यनुपूर्वशः ।
अर्को ब्रह्मा तथा रुद्रो विष्नुश्चादित्यमूर्तयः
vistarāsutarābodhinyāpyāyinyaparāḥ punaḥ |
uṣā prabhā tathā prājñā saṃdhyā cetyapi śaktayaḥ
||104||विस्तरासुतराबोधिन्याप्यायिन्यपराः पुनः ।
उषा प्रभा तथा प्राज्ञा संध्या चेत्यपि शक्तयः
somādiketuparyaṃtā grahāśca śivabhāvitāḥ |
śivayorājñayānunnā maṃgalaṃ pradiśaṃtu me
||105||सोमादिकेतुपर्यंता ग्रहाश्च शिवभाविताः ।
शिवयोराज्ञयानुन्ना मंगलं प्रदिशंतु मे
athavā dvādaśādityāstathā dvādaśa śaktayaḥ |
ṛṣayo devagaṃdharvāḥ pannagāpsarasāṃ gaṇāḥ
||106||अथवा द्वादशादित्यास्तथा द्वादश शक्तयः ।
ऋषयो देवगंधर्वाः पन्नगाप्सरसां गणाः
grāmaṇyaśca tathā yakṣā rākṣasāścāsurāstathā |
saptasaptagaṇāścaite saptacchaṃdomayā hayāḥ
||107||ग्रामण्यश्च तथा यक्षा राक्षसाश्चासुरास्तथा ।
सप्तसप्तगणाश्चैते सप्तच्छंदोमया हयाः
vālakhilyā dayaścaiva sarve śivapadārcakāḥ |
satkṛtyaśivayorājñāṃ maṃgalaṃ pradiśaṃtu me
||108||वालखिल्या दयश्चैव सर्वे शिवपदार्चकाः ।
सत्कृत्यशिवयोराज्ञां मंगलं प्रदिशंतु मे
brahmātha devadevasya mūrtirbhūmaṇḍalādhipaḥ |
catuḥṣaṣṭiguṇaiśvaryo buddhitattve pratiṣṭhitaḥ
||109||ब्रह्माथ देवदेवस्य मूर्तिर्भूमण्डलाधिपः ।
चतुःषष्टिगुणैश्वर्यो बुद्धितत्त्वे प्रतिष्ठितः
nirguṇo guṇasaṃkīrṇastathaiva guṇakevalaḥ |
avikārātmako devastatassādhāraṇaḥ puraḥ
||110||निर्गुणो गुणसंकीर्णस्तथैव गुणकेवलः ।
अविकारात्मको देवस्ततस्साधारणः पुरः
asādhāraṇakarmā ca sṛṣṭisthitilayakramāt |
bhuvaṃ tridhā caturdhā ca vibhaktaḥ pañcadhā punaḥ
||111||असाधारणकर्मा च सृष्टिस्थितिलयक्रमात् ।
भुवं त्रिधा चतुर्धा च विभक्तः पञ्चधा पुनः
caturthāvaraṇe śaṃbho pūjitaśca sahānugaiḥ |
śivapriyaḥ śivāsaktaśśivapādārcane rataḥ
||112||चतुर्थावरणे शंभो पूजितश्च सहानुगैः ।
शिवप्रियः शिवासक्तश्शिवपादार्चने रतः
satkṛtya śivayorājñāṃ sa me diśatu maṃgalam |
hiraṇyagarbho lokeśo virāṭkālaśca pūruṣaḥ
||113||सत्कृत्य शिवयोराज्ञां स मे दिशतु मंगलम् ।
हिरण्यगर्भो लोकेशो विराट्कालश्च पूरुषः
sanatkumāraḥ sanakaḥ sanaṃdaśca sanātanaḥ |
prajānāṃ patayaścaiva dakṣādyā brahmasūnavaḥ
||114||सनत्कुमारः सनकः सनंदश्च सनातनः ।
प्रजानां पतयश्चैव दक्षाद्या ब्रह्मसूनवः
ekādaśa sapatnīkā dharmassaṃkalpa eva ca |
śivārcanaratāścaite śivabhaktiparāyaṇāḥ
||115||एकादश सपत्नीका धर्मस्संकल्प एव च ।
शिवार्चनरताश्चैते शिवभक्तिपरायणाः
śivājñāvaśagāssarve diśaṃtu mama maṃgalam |
catvāraśca tathā vedāssetihāsapurāṇakāḥ
||116||शिवाज्ञावशगास्सर्वे दिशंतु मम मंगलम् ।
चत्वारश्च तथा वेदास्सेतिहासपुराणकाः
dharmaśāstrāṇi vidyābhirvaidikībhissamanvitāḥ |
parasparaviruddhārthāḥ śivaprakṛtipādakāḥ
||117||धर्मशास्त्राणि विद्याभिर्वैदिकीभिस्समन्विताः ।
परस्परविरुद्धार्थाः शिवप्रकृतिपादकाः
satkṛtya śivayorājñāṃ maṃgalaṃ pradiśaṃtu me |
atha rudro mahādevaḥ śaṃbhormūrtirgarīyasī
||118||सत्कृत्य शिवयोराज्ञां मंगलं प्रदिशंतु मे ।
अथ रुद्रो महादेवः शंभोर्मूर्तिर्गरीयसी
vāhneyamaṇḍalādhīśaḥ pauruṣaiśvaryavānprabhuḥ |
śivābhimānasaṃpanno nirguṇastriguṇātmakaḥ
||119||वाह्नेयमण्डलाधीशः पौरुषैश्वर्यवान्प्रभुः ।
शिवाभिमानसंपन्नो निर्गुणस्त्रिगुणात्मकः
kevalaṃ sāttvikaścāpi rājasaścaiva tāmasaḥ |
avikārarataḥ pūrvaṃ tatastu samavikriyaḥ
||120||केवलं सात्त्विकश्चापि राजसश्चैव तामसः ।
अविकाररतः पूर्वं ततस्तु समविक्रियः
asādhāraṇakarmā ca sṛṣṭyādikaraṇātpṛthak |
brahmaṇopi śiraśchettā janakastasya tatsutaḥ
||121||असाधारणकर्मा च सृष्ट्यादिकरणात्पृथक् ।
ब्रह्मणोपि शिरश्छेत्ता जनकस्तस्य तत्सुतः
janakastanayaścāpi viṣṇorapi niyāmakaḥ |
bodhakaśca tayornityamanugrahakaraḥ prabhuḥ
||122||जनकस्तनयश्चापि विष्णोरपि नियामकः ।
बोधकश्च तयोर्नित्यमनुग्रहकरः प्रभुः
aṃḍasyāṃtarbahirvartī rudro lokadvayādhipaḥ |
śivapriyaḥ śivāsaktaḥ śivapādārcane rataḥ
||123||अंडस्यांतर्बहिर्वर्ती रुद्रो लोकद्वयाधिपः ।
शिवप्रियः शिवासक्तः शिवपादार्चने रतः
śivasyājñāṃ puraskṛtya sa me diśatu maṃgalam |
tasya brahma ṣaḍaṃgāni vidyeśāṃtaṃ tathāṣṭakam
||124||शिवस्याज्ञां पुरस्कृत्य स मे दिशतु मंगलम् ।
तस्य ब्रह्म षडंगानि विद्येशांतं तथाष्टकम्
catvāro mūrtibhedāśca śivapūrvāḥ śivārcakāḥ |
śivo bhavo haraścaiva mṛḍaścaiva tathāparaḥ |
śivasyājñāṃ puraskṛtya maṃgalaṃ pradiśaṃtu me
||125||चत्वारो मूर्तिभेदाश्च शिवपूर्वाः शिवार्चकाः ।
शिवो भवो हरश्चैव मृडश्चैव तथापरः ।
शिवस्याज्ञां पुरस्कृत्य मंगलं प्रदिशंतु मे
atha viṣṇurmaheśasya śivasyaiva parā tanuḥ |
vāritattvādhipaḥ sākṣādavyaktapadasaṃsthitaḥ
||126||अथ विष्णुर्महेशस्य शिवस्यैव परा तनुः ।
वारितत्त्वाधिपः साक्षादव्यक्तपदसंस्थितः
nirguṇassattvabahulastathaiva guṇakevalaḥ |
avikārābhimānī ca trisādhāraṇavikriyaḥ
||127||निर्गुणस्सत्त्वबहुलस्तथैव गुणकेवलः ।
अविकाराभिमानी च त्रिसाधारणविक्रियः
asādhāraṇakarmā ca sṛṣṭyādikaraṇātpṛthak |
dakṣiṇāṃgabhavenāpi spardhamānaḥ svayaṃbhuvā
||128||असाधारणकर्मा च सृष्ट्यादिकरणात्पृथक् ।
दक्षिणांगभवेनापि स्पर्धमानः स्वयंभुवा
ādyena brahmaṇā sākṣātsṛṣṭaḥ sraṣṭā ca tasya tu |
aṃḍasyāṃtarbahirvartī viṣṇurlokadvayādhipaḥ
||129||आद्येन ब्रह्मणा साक्षात्सृष्टः स्रष्टा च तस्य तु ।
अंडस्यांतर्बहिर्वर्ती विष्णुर्लोकद्वयाधिपः
asurāṃtakaraścakrī śakrasyāpi tathānujaḥ |
prādurbhūtaśca daśadhā bhṛguśāpacchalādiha
||130||असुरांतकरश्चक्री शक्रस्यापि तथानुजः ।
प्रादुर्भूतश्च दशधा भृगुशापच्छलादिह
bhūbhāranigrahārthāya svecchayāvātarakṣitau |
aprameyabalo māyī māyayā mohayañjagat
||131||भूभारनिग्रहार्थाय स्वेच्छयावातरक्षितौ ।
अप्रमेयबलो मायी मायया मोहयञ्जगत्
mūrtiṃ kṛtvā mahāviṣṇuṃ sadāśiṣṇumathāpi vā |
vaiṣṇavaiḥ pūjito nityaṃ mūrtitrayamayāsane
||132||मूर्तिं कृत्वा महाविष्णुं सदाशिष्णुमथापि वा ।
वैष्णवैः पूजितो नित्यं मूर्तित्रयमयासने
śivapriyaḥ śivāsaktaḥ śivapādārcane rataḥ |
śivasyājñāṃ puraskṛtya sa me diśatu maṃgalam
||133||शिवप्रियः शिवासक्तः शिवपादार्चने रतः ।
शिवस्याज्ञां पुरस्कृत्य स मे दिशतु मंगलम्
vāsudevo 'niruddhaśca pradyumnaśca tataḥ paraḥ |
saṃkarṣaṇassamākhyātāścatasro mūrtayo hareḥ
||134||वासुदेवो ऽनिरुद्धश्च प्रद्युम्नश्च ततः परः ।
संकर्षणस्समाख्याताश्चतस्रो मूर्तयो हरेः
matsyaḥ kūrmo varāhaśca nārasiṃho 'tha vāmanaḥ |
rāmatrayaṃ tathā kṛṣṇo viṣṇusturagavaktrakaḥ
||135||मत्स्यः कूर्मो वराहश्च नारसिंहो ऽथ वामनः ।
रामत्रयं तथा कृष्णो विष्णुस्तुरगवक्त्रकः
cakraṃ nārāyaṇasyāstraṃ pāṃcajanyaṃ ca śārṅgakam |
satkṛtya śivayorājñāṃ maṃgalaṃ pradiśaṃtu me
||136||चक्रं नारायणस्यास्त्रं पांचजन्यं च शार्ङ्गकम् ।
सत्कृत्य शिवयोराज्ञां मंगलं प्रदिशंतु मे
prabhā sarasvatī gaurī lakṣmīśca śivabhāvitā |
śivayoḥ śāsanādetā maṃgalaṃ pradiśaṃtu me
||137||प्रभा सरस्वती गौरी लक्ष्मीश्च शिवभाविता ।
शिवयोः शासनादेता मंगलं प्रदिशंतु मे
indro 'gniśca yamaścaiva nirṛtirvaruṇastathā |
vāyuḥ somaḥ kuberaśca tatheśānastriśūladhṛk
||138||इन्द्रो ऽग्निश्च यमश्चैव निरृतिर्वरुणस्तथा ।
वायुः सोमः कुबेरश्च तथेशानस्त्रिशूलधृक्
sarve śivārcanaratāḥ śivasadbhāvabhāvitāḥ |
satkṛtya śivayorājñāṃ maṃgalaṃ pradiśaṃtu me
||139||सर्वे शिवार्चनरताः शिवसद्भावभाविताः ।
सत्कृत्य शिवयोराज्ञां मंगलं प्रदिशंतु मे
triśūlamatha vajraṃ ca tathā paraśusāyakau |
khaḍgapāśāṃkuśāścaiva pinākaścāyudhottamaḥ
||140||त्रिशूलमथ वज्रं च तथा परशुसायकौ ।
खड्गपाशांकुशाश्चैव पिनाकश्चायुधोत्तमः
divyāyudhāni devasya devyāścaitāni nityaśaḥ |
satkṛtya śivayorājñāṃ rakṣāṃ kurvaṃtu me sadā
||141||दिव्यायुधानि देवस्य देव्याश्चैतानि नित्यशः ।
सत्कृत्य शिवयोराज्ञां रक्षां कुर्वंतु मे सदा
vṛṣarūpadharo devaḥ saurabheyo mahābalaḥ |
vaḍavākhyānalaspardhāṃ pañcagomātṛbhirvṛtaḥ
||142||वृषरूपधरो देवः सौरभेयो महाबलः ।
वडवाख्यानलस्पर्धां पञ्चगोमातृभिर्वृतः
vāhanatvamanuprāptastapasā parameśayoḥ |
tayorājñāṃ puraskṛtya sa me kāmaṃ prayacchatu
||143||वाहनत्वमनुप्राप्तस्तपसा परमेशयोः ।
तयोराज्ञां पुरस्कृत्य स मे कामं प्रयच्छतु
naṃdā sunaṃdā surabhiḥ suśīlā sumanāstathā |
pañcagomātarastvetāśśivaloke vyavasthitāḥ
||144||नंदा सुनंदा सुरभिः सुशीला सुमनास्तथा ।
पञ्चगोमातरस्त्वेताश्शिवलोके व्यवस्थिताः
śivabhaktiparā nityaṃ śivārcanaparāyaṇāḥ |
śivayoḥ śāsanādeva diśaṃtu mama vāṃchitam
||145||शिवभक्तिपरा नित्यं शिवार्चनपरायणाः ।
शिवयोः शासनादेव दिशंतु मम वांछितम्
kṣetrapālo mahātejā nīla jīmūtasannibhaḥ |
daṃṣṭrākarālavadanaḥ sphuradraktādharojjvalaḥ
||146||क्षेत्रपालो महातेजा नील जीमूतसन्निभः ।
दंष्ट्राकरालवदनः स्फुरद्रक्ताधरोज्ज्वलः
raktordhvamūrdhajaḥ śrīmānbhrukuṭīkuṭilekṣaṇaḥ |
raktavṛttatrinayanaḥ śaśipannagabhūṣaṇaḥ
||147||रक्तोर्ध्वमूर्धजः श्रीमान्भ्रुकुटीकुटिलेक्षणः ।
रक्तवृत्तत्रिनयनः शशिपन्नगभूषणः
nagnastriśūlapāśāsikapālodyatapāṇikaḥ |
bhairavo bhairavaiḥ siddhairyoginībhiśca saṃvṛtaḥ
||148||नग्नस्त्रिशूलपाशासिकपालोद्यतपाणिकः ।
भैरवो भैरवैः सिद्धैर्योगिनीभिश्च संवृतः
kṣetrekṣetre samāsīnaḥ sthito yo rakṣakassatām |
śivapraṇāmaparamaḥ śivasadbhāvabhāvitaḥ
||149||क्षेत्रेक्षेत्रे समासीनः स्थितो यो रक्षकस्सताम् ।
शिवप्रणामपरमः शिवसद्भावभावितः
śivaśritānviśeṣeṇa rakṣanputrānivaurasān |
satkṛtya śivayorājñāṃ sa me diśatu maṅgalam
||150||शिवश्रितान्विशेषेण रक्षन्पुत्रानिवौरसान् ।
सत्कृत्य शिवयोराज्ञां स मे दिशतु मङ्गलम्
tālajaṅghādayastasya prathamāvaraṇercitāḥ |
satkṛtya śivayorājñāṃ catvāraḥ samavantu mām
||151||तालजङ्घादयस्तस्य प्रथमावरणेर्चिताः ।
सत्कृत्य शिवयोराज्ञां चत्वारः समवन्तु माम्
bhairavādyāśca ye cānye samaṃtāttasya veṣṭitāḥ |
te 'pi māmanugṛhṇaṃtu śivaśāsanagauravāt
||152||भैरवाद्याश्च ये चान्ये समंतात्तस्य वेष्टिताः ।
ते ऽपि मामनुगृह्णंतु शिवशासनगौरवात्
nāradādyāśca munayo divyā devaiśca pūjitāḥ |
sādhyā māgāśca ye devā janalokanivāsinaḥ
||153||नारदाद्याश्च मुनयो दिव्या देवैश्च पूजिताः ।
साध्या मागाश्च ये देवा जनलोकनिवासिनः
vinivṛttādhikārāśca maharlokanivāsinaḥ |
saptarṣayastathānye vai vaimānikaguṇaissaha
||154||विनिवृत्ताधिकाराश्च महर्लोकनिवासिनः ।
सप्तर्षयस्तथान्ये वै वैमानिकगुणैस्सह
sarve śivārcanaratāḥ śivājñāvaśavartinaḥ |
śivayorājñayā mahyaṃ diśaṃtu mama kāṃkṣitam 1
||155||सर्वे शिवार्चनरताः शिवाज्ञावशवर्तिनः ।
शिवयोराज्ञया मह्यं दिशंतु मम कांक्षितम् १
gaṃdharvādyāḥ piśācāṃtāścatasro devayonayaḥ |
siddhā vidyādharādyāśca ye 'pi cānye nabhaścarāḥ
||156||गंधर्वाद्याः पिशाचांताश्चतस्रो देवयोनयः ।
सिद्धा विद्याधराद्याश्च ये ऽपि चान्ये नभश्चराः
asurā rākṣasāścaiva pātālatalavāsinaḥ |
anaṃtādyāśca nāgendrā vainateyādayo dvijāḥ
||157||असुरा राक्षसाश्चैव पातालतलवासिनः ।
अनंताद्याश्च नागेन्द्रा वैनतेयादयो द्विजाः
kūṣmāṃḍāḥ pretavetālā grahā bhūtagaṇāḥ pare |
ḍākinyaścāpi yoginyaḥ śākinyaścāpi tādṛśāḥ
||158||कूष्मांडाः प्रेतवेताला ग्रहा भूतगणाः परे ।
डाकिन्यश्चापि योगिन्यः शाकिन्यश्चापि तादृशाः
kṣetrārāmagṛhādīni tīrthānyāyatanāni ca |
dvīpāḥ samudrā nadyaśca nadāścānye sarāṃsi ca
||159||क्षेत्रारामगृहादीनि तीर्थान्यायतनानि च ।
द्वीपाः समुद्रा नद्यश्च नदाश्चान्ये सरांसि च
girayaśca sumervādyāḥ kananāni samaṃtataḥ |
paśavaḥ pakṣiṇo vṛkṣāḥ kṛmikīṭādayo mṛgāḥ
||160||गिरयश्च सुमेर्वाद्याः कननानि समंततः ।
पशवः पक्षिणो वृक्षाः कृमिकीटादयो मृगाः
bhuvanānyapi sarvāṇi bhuvanānāmadhīśvaraḥ |
aṇḍānyāvaraṇaissārdhaṃ māsāśca daśa diggajāḥ
||161||भुवनान्यपि सर्वाणि भुवनानामधीश्वरः ।
अण्डान्यावरणैस्सार्धं मासाश्च दश दिग्गजाः
varṇāḥ padāni maṃtrāśca tattvānyapi sahādhipaiḥ |
brahmāṃḍadhārakā rudrā rudrāścānye saśaktikāḥ
||162||वर्णाः पदानि मंत्राश्च तत्त्वान्यपि सहाधिपैः ।
ब्रह्मांडधारका रुद्रा रुद्राश्चान्ये सशक्तिकाः
yacca kiṃcijjagatyasmindṛṣṭaṃ cānumitaṃ śrutam |
sarve kāmaṃ prayacchantu śivayoreva śāsanāt
||163||यच्च किंचिज्जगत्यस्मिन्दृष्टं चानुमितं श्रुतम् ।
सर्वे कामं प्रयच्छन्तु शिवयोरेव शासनात्
atha vidyā parā śaivī paśupāśavimocinī |
pañcārthasaṃjñitā divyā paśuvidyābahiṣkṛtā
||164||अथ विद्या परा शैवी पशुपाशविमोचिनी ।
पञ्चार्थसंज्ञिता दिव्या पशुविद्याबहिष्कृता
śāstraṃ ca śivadharmākhyaṃ dharmākhyaṃ ca taduttaram |
śaivākhyaṃ śivadharmākhyaṃ purāṇaṃ śrutisaṃmitam
||165||शास्त्रं च शिवधर्माख्यं धर्माख्यं च तदुत्तरम् ।
शैवाख्यं शिवधर्माख्यं पुराणं श्रुतिसंमितम्
śaivāgamāśca ye cānye kāmikādyāścaturvidhāḥ |
śivābhyāmaviśeṣeṇa satkṛtyeha samarcitāḥ
||166||शैवागमाश्च ये चान्ये कामिकाद्याश्चतुर्विधाः ।
शिवाभ्यामविशेषेण सत्कृत्येह समर्चिताः
tābhyāmeva samājñātā mamābhipretasiddhaye |
karmedamanumanyaṃtāṃ saphalaṃ sādhvanuṣṭhitam
||167||ताभ्यामेव समाज्ञाता ममाभिप्रेतसिद्धये ।
कर्मेदमनुमन्यंतां सफलं साध्वनुष्ठितम्
śvetādyā nakulīśāṃtāḥ saśiṣyāścāpi deśikāḥ |
tatsaṃtatīyā guravo viśeṣādguravo mama
||168||श्वेताद्या नकुलीशांताः सशिष्याश्चापि देशिकाः ।
तत्संततीया गुरवो विशेषाद्गुरवो मम
śaivā māheśvarāścaiva jñānakarmaparāyaṇāḥ |
karmedamanumanyaṃtāṃ saphalaṃ sādhvanuṣṭhitam
||169||शैवा माहेश्वराश्चैव ज्ञानकर्मपरायणाः ।
कर्मेदमनुमन्यंतां सफलं साध्वनुष्ठितम्
laukikā brāhmaṇāssarve kṣatriyāśca viśaḥ kramāt |
vedavedāṃgatattvajñāḥ sarvaśāstraviśāradāḥ
||170||लौकिका ब्राह्मणास्सर्वे क्षत्रियाश्च विशः क्रमात् ।
वेदवेदांगतत्त्वज्ञाः सर्वशास्त्रविशारदाः
sāṃkhyā vaiśeṣikāścaiva yaugā naiyāyikā narāḥ |
saurā brahmāstathā raudrā vaiṣṇavāścāpare narāḥ
||171||सांख्या वैशेषिकाश्चैव यौगा नैयायिका नराः ।
सौरा ब्रह्मास्तथा रौद्रा वैष्णवाश्चापरे नराः
śiṣṭāḥ sarve viśiṣṭā ca śivaśāsanayaṃtritāḥ |
karmedamanumanyaṃtāṃ mamābhipretasādhakam
||172||शिष्टाः सर्वे विशिष्टा च शिवशासनयंत्रिताः ।
कर्मेदमनुमन्यंतां ममाभिप्रेतसाधकम्
śaivāḥ siddhāṃtamārgasthāḥ śaivāḥ pāśupatāstathā |
śaivā mahāvratadharāḥ śaivāḥ kāpālikāḥ pare
||173||शैवाः सिद्धांतमार्गस्थाः शैवाः पाशुपतास्तथा ।
शैवा महाव्रतधराः शैवाः कापालिकाः परे
śivājñāpālakāḥ pūjyā mamāpi śivaśāsanāt |
sarve mamānugṛhṇaṃtu śaṃsaṃtu saphalakriyām
||174||शिवाज्ञापालकाः पूज्या ममापि शिवशासनात् ।
सर्वे ममानुगृह्णंतु शंसंतु सफलक्रियाम्
dakṣiṇajñānaniṣṭhāśca dakṣiṇottaramārgagāḥ |
avirodhena vartaṃtāṃ maṃtraśreyo 'rthino mama
||175||दक्षिणज्ञाननिष्ठाश्च दक्षिणोत्तरमार्गगाः ।
अविरोधेन वर्तंतां मंत्रश्रेयो ऽर्थिनो मम
nāstikāśca śaṭhāścaiva kṛtaghnāścaiva tāmasāḥ |
pāṣaṃḍāścātipāpāśca vartaṃtāṃ dūrato mama
||176||नास्तिकाश्च शठाश्चैव कृतघ्नाश्चैव तामसाः ।
पाषंडाश्चातिपापाश्च वर्तंतां दूरतो मम
bahubhiḥ kiṃ stutairatra ye 'pi ke 'picidāstikāḥ |
sarve māmanugṛhṇaṃtu saṃtaḥ śaṃsaṃtu maṃgalam
||177||बहुभिः किं स्तुतैरत्र ये ऽपि के ऽपिचिदास्तिकाः ।
सर्वे मामनुगृह्णंतु संतः शंसंतु मंगलम्
namaśśivāya sāṃbāya sasutāyādihetave |
pañcāvaraṇarūpeṇa prapañcenāvṛtāya te
||178||नमश्शिवाय सांबाय ससुतायादिहेतवे ।
पञ्चावरणरूपेण प्रपञ्चेनावृताय ते
ityuktvā daṃḍavadbhūmau praṇipatya śivaṃ śivām |
japetpañcākṣarīṃ vidyāmaṣṭottaraśatāvarām
||179||इत्युक्त्वा दंडवद्भूमौ प्रणिपत्य शिवं शिवाम् ।
जपेत्पञ्चाक्षरीं विद्यामष्टोत्तरशतावराम्
tathaiva śaktividyāṃ ca japitvā tatsamarpaṇam |
kṛtvā taṃ kṣamayitveśaṃ pūjāśeṣaṃ samāpayet
||180||तथैव शक्तिविद्यां च जपित्वा तत्समर्पणम् ।
कृत्वा तं क्षमयित्वेशं पूजाशेषं समापयेत्
etatpuṇyatamaṃ stotraṃ śivayorhṛdayaṃgamam |
sarvābhīṣṭapradaṃ sākṣādbhuktimuktyaikasādhanam
||181||एतत्पुण्यतमं स्तोत्रं शिवयोर्हृदयंगमम् ।
सर्वाभीष्टप्रदं साक्षाद्भुक्तिमुक्त्यैकसाधनम्
ya idaṃ kīrtayennityaṃ śṛṇuyādvā samāhitaḥ |
sa vidhūyāśu pāpāni śivasāyujyamāpnuyāt
||182||य इदं कीर्तयेन्नित्यं शृणुयाद्वा समाहितः ।
स विधूयाशु पापानि शिवसायुज्यमाप्नुयात्
goghnaścaiva kṛtaghnaśca vīrahā bhrūṇahāpi vā |
śaraṇāgataghātī ca mitraviśraṃbhaghātakaḥ
||183||गोघ्नश्चैव कृतघ्नश्च वीरहा भ्रूणहापि वा ।
शरणागतघाती च मित्रविश्रंभघातकः
duṣṭapāpasamācāro mātṛhā pitṛhāpi vā |
stavenānena japtena tattatpāpātpramucyate
||184||दुष्टपापसमाचारो मातृहा पितृहापि वा ।
स्तवेनानेन जप्तेन तत्तत्पापात्प्रमुच्यते
duḥsvapnādimahānarthasūcakeṣu bhayeṣu ca |
yadi saṃkīrtayedetanna tato nārthabhāgbhavet
||185||दुःस्वप्नादिमहानर्थसूचकेषु भयेषु च ।
यदि संकीर्तयेदेतन्न ततो नार्थभाग्भवेत्
āyurārogyamaiśvaryaṃ yaccānyadapi vāñchitam |
stotrasyāsya jape tiṣṭhaṃstatsarvaṃ labhate naraḥ
||186||आयुरारोग्यमैश्वर्यं यच्चान्यदपि वाञ्छितम् ।
स्तोत्रस्यास्य जपे तिष्ठंस्तत्सर्वं लभते नरः
asaṃpūjya śivastotraṃ japātphalamudāhṛtam |
saṃpūjya ca jape tasya phalaṃ vaktuṃ na śakyate
||187||असंपूज्य शिवस्तोत्रं जपात्फलमुदाहृतम् ।
संपूज्य च जपे तस्य फलं वक्तुं न शक्यते
āstāmiyaṃ phalāvāptirasminsaṃkīrtite sati |
sārdhamaṃbikayā devaḥ śrutyaivaṃ divi tiṣṭhati
||188||आस्तामियं फलावाप्तिरस्मिन्संकीर्तिते सति ।
सार्धमंबिकया देवः श्रुत्यैवं दिवि तिष्ठति
tasmānnabhasi saṃpūjya devaṃ devaṃ sahomayā |
kṛtāṃjalipuṭastiṣṭhaṃstotrametadudīrayet
||189||तस्मान्नभसि संपूज्य देवं देवं सहोमया ।
कृतांजलिपुटस्तिष्ठंस्तोत्रमेतदुदीरयेत्
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śivamahāstotravarṇanaṃ nāmaikatriṃśo 'dhyāyaḥ