āmuṣmikakarmavidhivarṇanam
upamanyuruvāca
ataḥ paraṃ pravakṣyāmi kevalāmuṣmikaṃ vidhim |
naitena sadṛśaṃ kiṃcitkarmāsti bhuvanatraye
||1||अतः परं प्रवक्ष्यामि केवलामुष्मिकं विधिम् ।
नैतेन सदृशं किंचित्कर्मास्ति भुवनत्रये
puṇyātiśayasaṃyuktaḥ sarvairdevairanuṣṭhitaḥ |
brahmaṇā viṣṇunā caiva rudreṇa ca viśeṣataḥ
||2||पुण्यातिशयसंयुक्तः सर्वैर्देवैरनुष्ठितः ।
ब्रह्मणा विष्णुना चैव रुद्रेण च विशेषतः
iṃdrādilokapāraiśca sūryādyairnavabhirgrahaiḥ |
viśvāmitravasiṣṭhādyairbrahmavidbhirmaharṣibhiḥ
||3||इंद्रादिलोकपारैश्च सूर्याद्यैर्नवभिर्ग्रहैः ।
विश्वामित्रवसिष्ठाद्यैर्ब्रह्मविद्भिर्महर्षिभिः
śvetāgastyadadhīcādyairasmābhiśca śivāśritaiḥ |
naṃdīśvaramahākālabhṛṃgīśādyairgaṇeśvaraiḥ
||4||श्वेतागस्त्यदधीचाद्यैरस्माभिश्च शिवाश्रितैः ।
नंदीश्वरमहाकालभृंगीशाद्यैर्गणेश्वरैः
pātālavāsibhirdaityaiḥ śeṣādyaiśca mahoragaiḥ |
siddhairyakṣaiśca gaṃdharvai rakṣobhūtapiśācakaiḥ
||5||पातालवासिभिर्दैत्यैः शेषाद्यैश्च महोरगैः ।
सिद्धैर्यक्षैश्च गंधर्वै रक्षोभूतपिशाचकैः
svaṃsvaṃ padamanuprāptaṃ sarvairayamanuṣṭhitaḥ |
anena vidhinā sarve devā devatvamāgatāḥ
||6||स्वंस्वं पदमनुप्राप्तं सर्वैरयमनुष्ठितः ।
अनेन विधिना सर्वे देवा देवत्वमागताः
brahmā brahmatvamāpanno viṣṇurviṣṇutvamāgataḥ |
rudro rudratvamāpanna iṃdraścendratvamāgataḥ
||7||ब्रह्मा ब्रह्मत्वमापन्नो विष्णुर्विष्णुत्वमागतः ।
रुद्रो रुद्रत्वमापन्न इंद्रश्चेन्द्रत्वमागतः
gaṇeśaśca gaṇeśatvamanena vidhinā gataḥ |
sitacaṃdanatoyena liṃgaṃ snāpya śivaṃ śivām |
śvetairvikasitaiḥ padmaiḥ saṃpūjya praṇipatya ca
||8||गणेशश्च गणेशत्वमनेन विधिना गतः ।
सितचंदनतोयेन लिंगं स्नाप्य शिवं शिवाम् ।
श्वेतैर्विकसितैः पद्मैः संपूज्य प्रणिपत्य च
tatra padmāsanaṃ ramyaṃ kṛtvā lakṣaṇasaṃyutam |
vibhave sati hemādyai ratnādyairvā svaśaktitaḥ
||9||तत्र पद्मासनं रम्यं कृत्वा लक्षणसंयुतम् ।
विभवे सति हेमाद्यै रत्नाद्यैर्वा स्वशक्तितः
madhye kesarajālāsya sthāpya liṃgaṃ kanīyasam |
aṃguṣṭhapratimaṃ ramyaṃ sarvagandhamayaṃ śubham
||10||मध्ये केसरजालास्य स्थाप्य लिंगं कनीयसम् ।
अंगुष्ठप्रतिमं रम्यं सर्वगन्धमयं शुभम्
dakṣiṇe sthāpayitvā tu bilvapatraiḥ samarcayet |
aguruṃ dakṣiṇe pārśve paścime tu manaḥśilām
||11||दक्षिणे स्थापयित्वा तु बिल्वपत्रैः समर्चयेत् ।
अगुरुं दक्षिणे पार्श्वे पश्चिमे तु मनःशिलाम्
uttare caṃdanaṃ dadyāddharitālaṃ tu pūrvataḥ |
sugandhaiḥ kusumai ramyairvicitraiścāpi pūjayet
||12||उत्तरे चंदनं दद्याद्धरितालं तु पूर्वतः ।
सुगन्धैः कुसुमै रम्यैर्विचित्रैश्चापि पूजयेत्
dhūpaṃ kṛṣṇāguruṃ dadyātsarvataśca saguggulam |
vāsāṃsi cātisūkṣmāṇi vikāśāni nivedayet
||13||धूपं कृष्णागुरुं दद्यात्सर्वतश्च सगुग्गुलम् ।
वासांसि चातिसूक्ष्माणि विकाशानि निवेदयेत्
pāyasaṃ ghṛtasaṃmiśraṃ ghṛtadīpāṃśca dāpayet |
sarvaṃ nivedya mantreṇa tato gacchetpradakṣiṇām
||14||पायसं घृतसंमिश्रं घृतदीपांश्च दापयेत् ।
सर्वं निवेद्य मन्त्रेण ततो गच्छेत्प्रदक्षिणाम्
praṇamya bhaktyā deveśaṃ stutvā cānte kṣamāpayet |
sarvopahārasaṃmiśraṃ tato liṃgaṃ nivedayet
||15||प्रणम्य भक्त्या देवेशं स्तुत्वा चान्ते क्षमापयेत् ।
सर्वोपहारसंमिश्रं ततो लिंगं निवेदयेत्
śivāya śivamantreṇa dakṣiṇāmūrtimāśritaḥ |
evaṃ yo 'rcayate nityaṃ pañcagandhamayaṃ śubham
||16||शिवाय शिवमन्त्रेण दक्षिणामूर्तिमाश्रितः ।
एवं यो ऽर्चयते नित्यं पञ्चगन्धमयं शुभम्
sarvapāpavinirmuktaḥ śivaloke mahīyate |
etadvratottamaṃ guhyaṃ śivaliṃgamahāvratam
||17||सर्वपापविनिर्मुक्तः शिवलोके महीयते ।
एतद्व्रतोत्तमं गुह्यं शिवलिंगमहाव्रतम्
bhaktasya te samākhyātaṃ na deyaṃ yasya kasyacit |
deyaṃ ca śivabhaktebhyaḥ śivena kathitaṃ purā
||18||भक्तस्य ते समाख्यातं न देयं यस्य कस्यचित् ।
देयं च शिवभक्तेभ्यः शिवेन कथितं पुरा
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe āmuṣmikakarmavidhivarṇanaṃ nāma trayastriṃśo'dhyāyaḥ