pratiṣṭhāvidhivarṇanam
śrīkṛṣṇa uvāca
bhagavañchrotumicchāmi pratiṣṭhāvidhimuttamam |
liṃgasyāpi ca berasya śivena vihitaṃ yathā
||1||भगवञ्छ्रोतुमिच्छामि प्रतिष्ठाविधिमुत्तमम् ।
लिंगस्यापि च बेरस्य शिवेन विहितं यथा
upamanyuruvāca
anātmapratikūle tu divase śuklapakṣake |
śivaśāstroktamārgeṇa kuryālliṃgaṃ pramāṇavat
||2||अनात्मप्रतिकूले तु दिवसे शुक्लपक्षके ।
शिवशास्त्रोक्तमार्गेण कुर्याल्लिंगं प्रमाणवत्
svīkṛtyātha śubhasthānaṃ bhūparīkṣāṃ vidhāya ca |
daśopacārānkurvīta lakṣaṇoddhārapūrvakān
||3||स्वीकृत्याथ शुभस्थानं भूपरीक्षां विधाय च ।
दशोपचारान्कुर्वीत लक्षणोद्धारपूर्वकान्
teṣāṃ daśopacārāṇāṃ pūrvaṃ pūjya 1 vināyakam |
sthānaśuddhyādikaṃ kṛtvāliṃgaṃ snānālayaṃ nayet
||4||तेषां दशोपचाराणां पूर्वं पूज्य १ विनायकम् ।
स्थानशुद्ध्यादिकं कृत्वालिंगं स्नानालयं नयेत्
śalākayā kāṃcanayā 2 kuṃkumādirasāktayā |
lakṣitaṃ lakṣaṇaṃ śilpaśāstreṇa vilikhettataḥ
||5||शलाकया कांचनया २ कुंकुमादिरसाक्तया ।
लक्षितं लक्षणं शिल्पशास्त्रेण विलिखेत्ततः
aṣṭamṛtsalilairvātha pañcamṛtsalilaistathā |
liṅgaṃ piṃḍikayā sārdhaṃ pañcagavyaiśca śodhayet
||6||अष्टमृत्सलिलैर्वाथ पञ्चमृत्सलिलैस्तथा ।
लिङ्गं पिंडिकया सार्धं पञ्चगव्यैश्च शोधयेत्
savedikaṃ samabhyarcya divyādyaṃ tu jalāśayam |
nītvādhivāsayettatra liṃgaṃ piṃḍikayā saha
||7||सवेदिकं समभ्यर्च्य दिव्याद्यं तु जलाशयम् ।
नीत्वाधिवासयेत्तत्र लिंगं पिंडिकया सह
adhivāsālaye śuddhe sarvaśobhāsamanvite |
satoraṇe sāvaraṇe darbhamālāsamāvṛte
||8||अधिवासालये शुद्धे सर्वशोभासमन्विते ।
सतोरणे सावरणे दर्भमालासमावृते
diggajāṣṭakasaṃpanne dikpālāṣṭaghaṭānvite |
aṣṭamaṃgalakairyukte kṛtadikpālakārcite
||9||दिग्गजाष्टकसंपन्ने दिक्पालाष्टघटान्विते ।
अष्टमंगलकैर्युक्ते कृतदिक्पालकार्चिते
tejasaṃ dāravaṃ vāpi kṛtvā padmāsanāṃkitam |
vinyasenmadhyatastatra vipulaṃ pīṭhakālayam
||10||तेजसं दारवं वापि कृत्वा पद्मासनांकितम् ।
विन्यसेन्मध्यतस्तत्र विपुलं पीठकालयम्
dvārapālānsamabhyarcya bhadrādīṃścaturaḥkramāt |
samudraśca vibhadraśca sunaṃdaśca vinaṃdakaḥ
||11||द्वारपालान्समभ्यर्च्य भद्रादींश्चतुरःक्रमात् ।
समुद्रश्च विभद्रश्च सुनंदश्च विनंदकः
snāpayitvā samabhyarcya liṃgaṃ vedikayā saha |
sakūrcābhyāṃ tu vastrābhyāṃ samāveṣṭyaṃ samaṃtataḥ
||12||स्नापयित्वा समभ्यर्च्य लिंगं वेदिकया सह ।
सकूर्चाभ्यां तु वस्त्राभ्यां समावेष्ट्यं समंततः
prāpayya śanakaistoyaṃ pīṭhikopari śāyayet |
prākśiraskamadhaḥsūtraṃ piṃḍikāṃ cāsya paścime
||13||प्रापय्य शनकैस्तोयं पीठिकोपरि शाययेत् ।
प्राक्शिरस्कमधःसूत्रं पिंडिकां चास्य पश्चिमे
sarvamaṃgalasaṃyuktaṃ liṃgaṃ tatrādhivāsayet |
pañcarātraṃ trirātraṃ vāpyekarātramathāpi vā
||14||सर्वमंगलसंयुक्तं लिंगं तत्राधिवासयेत् ।
पञ्चरात्रं त्रिरात्रं वाप्येकरात्रमथापि वा
visṛjya pūjitaṃ tatra śodhayitvā ca pūrvavat |
saṃpūjyotsavamārgeṇa śayanālayamānayet
||15||विसृज्य पूजितं तत्र शोधयित्वा च पूर्ववत् ।
संपूज्योत्सवमार्गेण शयनालयमानयेत्
tatrāpi śayanasthānaṃ kuryānmaṃḍalamadhyataḥ |
śuddhairjalaiḥ snāpayitvā liṃgamabhyarcayetkramāt
||16||तत्रापि शयनस्थानं कुर्यान्मंडलमध्यतः ।
शुद्धैर्जलैः स्नापयित्वा लिंगमभ्यर्चयेत्क्रमात्
aiśānyāṃ padmamālikhya śuddhalipte mahītale |
śivakuṃbhaṃ śodhayitvā tatrāvāhya śivaṃ yajet
||17||ऐशान्यां पद्ममालिख्य शुद्धलिप्ते महीतले ।
शिवकुंभं शोधयित्वा तत्रावाह्य शिवं यजेत्
vedīmadhye sitaṃ padmaṃ parikalpya vidhānataḥ |
tasya paścimataścāpi caṃḍikāpadmamālikhet
||18||वेदीमध्ये सितं पद्मं परिकल्प्य विधानतः ।
तस्य पश्चिमतश्चापि चंडिकापद्ममालिखेत्
kṣaumādyairvāhatairvastraiḥ puṣpairdarbhairathāpi vā |
prakalpya śayanaṃ tasminhemapuṣpaṃ vinikṣipet
||19||क्षौमाद्यैर्वाहतैर्वस्त्रैः पुष्पैर्दर्भैरथापि वा ।
प्रकल्प्य शयनं तस्मिन्हेमपुष्पं विनिक्षिपेत्
tatra liṃgaṃ samānīya sarvamaṃgalaniḥsvanaiḥ |
raktena vastrayugmena sakūrcena samaṃtataḥ
||20||तत्र लिंगं समानीय सर्वमंगलनिःस्वनैः ।
रक्तेन वस्त्रयुग्मेन सकूर्चेन समंततः
saha piṃḍikayāveṣṭya śāyayecca yathā purā |
purastātpadmamālikhya taddaleṣu yathākramam
||21||सह पिंडिकयावेष्ट्य शाययेच्च यथा पुरा ।
पुरस्तात्पद्ममालिख्य तद्दलेषु यथाक्रमम्
vidyeśakalaśānnyasyenmadhye śaivīṃ ca vardhanīm |
parītya padmatritayaṃ juhuyurdvijasattamāḥ
||22||विद्येशकलशान्न्यस्येन्मध्ये शैवीं च वर्धनीम् ।
परीत्य पद्मत्रितयं जुहुयुर्द्विजसत्तमाः
te cāṣṭamūrtayaḥ kalpyāḥ pūrvādiparitaḥ sthitāḥ |
catvāraścātha vā dikṣu svadhyetārassajāpakāḥ
||23||ते चाष्टमूर्तयः कल्प्याः पूर्वादिपरितः स्थिताः ।
चत्वारश्चाथ वा दिक्षु स्वध्येतारस्सजापकाः
juhuyuste viraṃcyādyāścatasro mūrtayaḥ smṛtāḥ |
daiśikaḥ prathamaṃ teṣāmaiśānyāṃ paścime 'tha vā
||24||जुहुयुस्ते विरंच्याद्याश्चतस्रो मूर्तयः स्मृताः ।
दैशिकः प्रथमं तेषामैशान्यां पश्चिमे ऽथ वा
pradhānahomaṃ kurvīta saptadravyairyathākramam |
ācāryātpādamardhaṃ vā juhuyuścāpare dvijāḥ
||25||प्रधानहोमं कुर्वीत सप्तद्रव्यैर्यथाक्रमम् ।
आचार्यात्पादमर्धं वा जुहुयुश्चापरे द्विजाः
pradhānamekamevātra juhuyādatha vā guruḥ |
pūrvaṃ pūrṇāhutiṃ hutvā ghṛtenāṣṭottaraṃ śatam
||26||प्रधानमेकमेवात्र जुहुयादथ वा गुरुः ।
पूर्वं पूर्णाहुतिं हुत्वा घृतेनाष्टोत्तरं शतम्
mūrdhni mūlena liṃgasya śivahastaṃ pravinyaset |
śatamardhaṃ tadardhaṃ vā kramāddravyaiśca saptabhiḥ
||27||मूर्ध्नि मूलेन लिंगस्य शिवहस्तं प्रविन्यसेत् ।
शतमर्धं तदर्धं वा क्रमाद्द्रव्यैश्च सप्तभिः
hutvāhutvā spṛśelliṃgaṃ vedikāṃ ca punaḥ punaḥ |
pūrṇāhutiṃ tato hutvā kramāddadyācca dakṣiṇām
||28||हुत्वाहुत्वा स्पृशेल्लिंगं वेदिकां च पुनः पुनः ।
पूर्णाहुतिं ततो हुत्वा क्रमाद्दद्याच्च दक्षिणाम्
ācāryātpādamardhaṃ vā hotḥṇāṃ sthapaterapi |
tadardhaṃ deyamanyebhyaḥ sadasyebhyaśca śaktitaḥ
||29||आचार्यात्पादमर्धं वा होत्ःणां स्थपतेरपि ।
तदर्धं देयमन्येभ्यः सदस्येभ्यश्च शक्तितः
tataḥ śvabhre vṛṣaṃ haimaṃ kūrcaṃ vāpi niveśya ca |
mṛdaṃbhasā pañcagavyaiḥ punaḥ śuddhajalena ca
||30||ततः श्वभ्रे वृषं हैमं कूर्चं वापि निवेश्य च ।
मृदंभसा पञ्चगव्यैः पुनः शुद्धजलेन च
śodhitāṃ caṃdanāliptāṃ śvabhre brahmaśilāṃ kṣipet |
karanyāsaṃ tataḥ kṛtvā navabhiḥ śaktināmabhiḥ
||31||शोधितां चंदनालिप्तां श्वभ्रे ब्रह्मशिलां क्षिपेत् ।
करन्यासं ततः कृत्वा नवभिः शक्तिनामभिः
haritālādidhātūṃśca bījagaṃdhauṣadhairapi |
śivaśāstroktavidhinā kṣipedbrahmaśilopari
||32||हरितालादिधातूंश्च बीजगंधौषधैरपि ।
शिवशास्त्रोक्तविधिना क्षिपेद्ब्रह्मशिलोपरि
pratiliṃgaṃ tu saṃsthāpya kṣīraṃ vṛkṣasamudbhavam |
sthitaṃ buddhvā tadutsṛjya liṃgaṃ brahmaśilopari
||33||प्रतिलिंगं तु संस्थाप्य क्षीरं वृक्षसमुद्भवम् ।
स्थितं बुद्ध्वा तदुत्सृज्य लिंगं ब्रह्मशिलोपरि
prāgudakpravarāṃ kiṃcitsthāpayenmūlavidyayā |
piṃḍikāṃ cātha saṃyojya śāktaṃ mūlamanusmaran
||34||प्रागुदक्प्रवरां किंचित्स्थापयेन्मूलविद्यया ।
पिंडिकां चाथ संयोज्य शाक्तं मूलमनुस्मरन्
bandhanaṃ baṃdhakadravyaiḥ kṛtvā sthānaṃ viśodhya ca |
dattvā cārghyaṃ ca puṣpāṇi kuryuryavanikāṃ punaḥ
||35||बन्धनं बंधकद्रव्यैः कृत्वा स्थानं विशोध्य च ।
दत्त्वा चार्घ्यं च पुष्पाणि कुर्युर्यवनिकां पुनः
yathāyogyaṃ niṣekādi liṃgasya puratastadā |
ānīya śayanasthānātkalaśānvinyasetkramāt
||36||यथायोग्यं निषेकादि लिंगस्य पुरतस्तदा ।
आनीय शयनस्थानात्कलशान्विन्यसेत्क्रमात्
mahāpūjāmathārabhya saṃpūjya kalaśāndaśa |
śivamaṃtramanusmṛtya śivakuṃbhajalāṃtare
||37||महापूजामथारभ्य संपूज्य कलशान्दश ।
शिवमंत्रमनुस्मृत्य शिवकुंभजलांतरे
aṃguṣṭhānāmikāyogādādāya tamudīrayet |
nyasedīśānabhāgasya madhye liṃgasya maṃtravit
||38||अंगुष्ठानामिकायोगादादाय तमुदीरयेत् ।
न्यसेदीशानभागस्य मध्ये लिंगस्य मंत्रवित्
śaktiṃ nyasettathā vidyāṃ vidyeśāṃśca yathākramam |
liṅgamūle śivajalaistato liṃgaṃ niṣecayet
||39||शक्तिं न्यसेत्तथा विद्यां विद्येशांश्च यथाक्रमम् ।
लिङ्गमूले शिवजलैस्ततो लिंगं निषेचयेत्
vardhanyāṃ piṃḍikāliṃgaṃ vidyeśakalaśaiḥ punaḥ |
abhiṣicyāsanaṃ paścādādhārādyaṃ prakalpayet
||40||वर्धन्यां पिंडिकालिंगं विद्येशकलशैः पुनः ।
अभिषिच्यासनं पश्चादाधाराद्यं प्रकल्पयेत्
kṛtvā pañcakalānyāsaṃ dīptaṃ liṃgamanusmaret |
āvāhayecchivau sākṣātprāñjaliḥ prāgudaṅmukhaḥ
||41||कृत्वा पञ्चकलान्यासं दीप्तं लिंगमनुस्मरेत् ।
आवाहयेच्छिवौ साक्षात्प्राञ्जलिः प्रागुदङ्मुखः
vṛṣādhirājamāruhya vimānaṃ vā nabhastalāt |
alaṃkṛtaṃ sahāyāṃtaṃ devyā devamanusmaran |
sarvābharaṇaśobhāḍhyaṃ sarvamaṃgalanisvanaiḥ
||42||वृषाधिराजमारुह्य विमानं वा नभस्तलात् ।
अलंकृतं सहायांतं देव्या देवमनुस्मरन् ।
सर्वाभरणशोभाढ्यं सर्वमंगलनिस्वनैः
brahmaviṣṇumaheśārkaśakrādyairdevadānavaiḥ |
ānaṃdaklinnasarvāṃgairvinyastāṃjalimastakaiḥ
||43||ब्रह्मविष्णुमहेशार्कशक्राद्यैर्देवदानवैः ।
आनंदक्लिन्नसर्वांगैर्विन्यस्तांजलिमस्तकैः
stuvadbhireva nṛtyadbhirnāmadbhirabhito vṛtam |
tataḥ pañcopacārāṃśca kṛtvā pūjāṃ samāpayet
||44||स्तुवद्भिरेव नृत्यद्भिर्नामद्भिरभितो वृतम् ।
ततः पञ्चोपचारांश्च कृत्वा पूजां समापयेत्
nātaḥ parataraḥ kaścidvidhiḥ pañcopacārakāt |
pratiṣṭhāṃ liṃgavatkuryātpratimāsvapi sarvataḥ
||45||नातः परतरः कश्चिद्विधिः पञ्चोपचारकात् ।
प्रतिष्ठां लिंगवत्कुर्यात्प्रतिमास्वपि सर्वतः
lakṣaṇoddhārasamaye kāryaṃ nayanamocanam |
jalādhivāse śayane śāyayettāntvadhomukhīm
||46||लक्षणोद्धारसमये कार्यं नयनमोचनम् ।
जलाधिवासे शयने शाययेत्तान्त्वधोमुखीम्
kumbhodaśāyitāṃ maṃtrairhṛdi tāṃ sanniyojayet |
kṛtālayāṃ parāmāhuḥ pratiṣṭhāmakṛtālayāt
||47||कुम्भोदशायितां मंत्रैर्हृदि तां सन्नियोजयेत् ।
कृतालयां परामाहुः प्रतिष्ठामकृतालयात्
śaktaḥ kṛtālayaḥ paścātpratiṣṭhāvidhimācaret |
aśaktaścetpratiṣṭhāpya liṃgaṃ beramathāpi vā
||48||शक्तः कृतालयः पश्चात्प्रतिष्ठाविधिमाचरेत् ।
अशक्तश्चेत्प्रतिष्ठाप्य लिंगं बेरमथापि वा
śakteranuguṇaṃ paścātprakurvīta śivālayam |
gṛhārcāṃ ca punarvakṣye pratiṣṭhāvidhimuttamam
||49||शक्तेरनुगुणं पश्चात्प्रकुर्वीत शिवालयम् ।
गृहार्चां च पुनर्वक्ष्ये प्रतिष्ठाविधिमुत्तमम्
kṛtvā kanīyasaṃberaṃ liṃgaṃ vā lakṣaṇānvitam |
ayane cottare prāpte śuklapakśe śubhe dine
||50||कृत्वा कनीयसंबेरं लिंगं वा लक्षणान्वितम् ।
अयने चोत्तरे प्राप्ते शुक्लपक्शे शुभे दिने
devīṃ kṛtvā śubhe deśe tatrābjaṃ pūrvavallikhet |
vikīrya patrapuṣpādyairmadhye kuṃbhaṃ nidhāya ca
||51||देवीं कृत्वा शुभे देशे तत्राब्जं पूर्ववल्लिखेत् ।
विकीर्य पत्रपुष्पाद्यैर्मध्ये कुंभं निधाय च
paritastasya caturaḥ kalaśān dikṣu vinyaset |
pañca brahmāṇi tadbījaisteṣu pañcasu pañcabhiḥ
||52||परितस्तस्य चतुरः कलशान् दिक्षु विन्यसेत् ।
पञ्च ब्रह्माणि तद्बीजैस्तेषु पञ्चसु पञ्चभिः
nyasya saṃpūjya mudrādi darśayitvābhirakṣya ca |
viśodhya liṃgaṃ beraṃ vā mṛttoyādyairyathā purā
||53||न्यस्य संपूज्य मुद्रादि दर्शयित्वाभिरक्ष्य च ।
विशोध्य लिंगं बेरं वा मृत्तोयाद्यैर्यथा पुरा
sthāpayetpuṣpasaṃchannamuttarasthe varāsane |
nidhāya puṣpaṃ śirasi prokṣayetprokṣaṇījalaiḥ
||54||स्थापयेत्पुष्पसंछन्नमुत्तरस्थे वरासने ।
निधाय पुष्पं शिरसि प्रोक्षयेत्प्रोक्षणीजलैः
samabhyarcya punaḥ puṣpairjayaśabdādipūrvakam |
kumbhairīśānavidyāṃtaiḥ snāpayenmūlavidyayā
||55||समभ्यर्च्य पुनः पुष्पैर्जयशब्दादिपूर्वकम् ।
कुम्भैरीशानविद्यांतैः स्नापयेन्मूलविद्यया
tataḥ pañcakalānyāsaṃ kṛtvā pūjāṃ ca pūrvavat |
nityamārādhayettatra devyā devaṃ trilocanam
||56||ततः पञ्चकलान्यासं कृत्वा पूजां च पूर्ववत् ।
नित्यमाराधयेत्तत्र देव्या देवं त्रिलोचनम्
ekamevātha vā kuṃbhaṃ mūrtimantrasamanvitam |
nyasya padmāṃtare sarvaṃ śeṣaṃ pūrvavadācaret
||57||एकमेवाथ वा कुंभं मूर्तिमन्त्रसमन्वितम् ।
न्यस्य पद्मांतरे सर्वं शेषं पूर्ववदाचरेत्
atyaṃtopahataṃ liṃgaṃ viśodhya sthāpayetpunaḥ |
saṃprokṣayedupahatamanāgupahataṃ yajet
||58||अत्यंतोपहतं लिंगं विशोध्य स्थापयेत्पुनः ।
संप्रोक्षयेदुपहतमनागुपहतं यजेत्
liṃgāni bāṇasaṃjñāni sthāpanīyāni vā na vā |
tāni pūrvaṃ śivenaiva saṃskṛtāni yatastataḥ
||59||लिंगानि बाणसंज्ञानि स्थापनीयानि वा न वा ।
तानि पूर्वं शिवेनैव संस्कृतानि यतस्ततः
śeṣāṇi sthāpanīyāni yāni dṛṣṭāni bāṇavat |
svayamudbhūtaliṃge ca divye cārṣe tathaiva ca
||60||शेषाणि स्थापनीयानि यानि दृष्टानि बाणवत् ।
स्वयमुद्भूतलिंगे च दिव्ये चार्षे तथैव च
apīṭhe pīṭhamāveśya kṛtvā saṃprokṣaṇaṃ vidhim |
yajettatra śivaṃ teṣāṃ pratiṣṭhā na vidhīyate
||61||अपीठे पीठमावेश्य कृत्वा संप्रोक्षणं विधिम् ।
यजेत्तत्र शिवं तेषां प्रतिष्ठा न विधीयते
dagdhaṃ ślathaṃ kṣatāṃgaṃ ca kṣipelliṃgaṃ jalāśaye |
saṃdhānayogyaṃ saṃdhāya pratiṣṭhāvidhimācaret
||62||दग्धं श्लथं क्षतांगं च क्षिपेल्लिंगं जलाशये ।
संधानयोग्यं संधाय प्रतिष्ठाविधिमाचरेत्
berādvā vikalālliṃgāddevapūjāpurassaram |
udvāsya hṛdi saṃdhānaṃ tyāgaṃ vā yuktamācaret
||63||बेराद्वा विकलाल्लिंगाद्देवपूजापुरस्सरम् ।
उद्वास्य हृदि संधानं त्यागं वा युक्तमाचरेत्
ekāhapūjāvihatau kuryāddviguṇamarcanam |
dvirātre ca mahāpūjāṃ saṃprokṣaṇamataḥ param
||64||एकाहपूजाविहतौ कुर्याद्द्विगुणमर्चनम् ।
द्विरात्रे च महापूजां संप्रोक्षणमतः परम्
māsādūrdhvamanekāhaṃ pūjā yadi vihanyate |
pratiṣṭhā procyate kaiścitkaiścitsaṃprokṣaṇakramaḥ
||65||मासादूर्ध्वमनेकाहं पूजा यदि विहन्यते ।
प्रतिष्ठा प्रोच्यते कैश्चित्कैश्चित्संप्रोक्षणक्रमः
saṃprokṣaṇe tu liṃgāderdevamudvāsya pūrvavat |
aṣṭapañcakrameṇaiva snāpayitvā mṛdaṃbhasā
||66||संप्रोक्षणे तु लिंगादेर्देवमुद्वास्य पूर्ववत् ।
अष्टपञ्चक्रमेणैव स्नापयित्वा मृदंभसा
gavāṃ rasaiśca saṃsnāpya darbhatoyairviśodhya ca |
prokṣayetprokṣaṇītoyairmūlenāṣṭottaraṃ śatam
||67||गवां रसैश्च संस्नाप्य दर्भतोयैर्विशोध्य च ।
प्रोक्षयेत्प्रोक्षणीतोयैर्मूलेनाष्टोत्तरं शतम्
sapuṣpaṃ sakuśaṃ pāṇiṃ nyasya liṃgasya mastake |
pañcavāraṃ japenmūlamaṣṭottaraśataṃ tataḥ
||68||सपुष्पं सकुशं पाणिं न्यस्य लिंगस्य मस्तके ।
पञ्चवारं जपेन्मूलमष्टोत्तरशतं ततः
tato mūlena mūrdhādipīṭhāṃtaṃ saṃspṛśedapi |
pūjāṃ ca mahatīṃ kuryāddevamāvāhya pūrvavat
||69||ततो मूलेन मूर्धादिपीठांतं संस्पृशेदपि ।
पूजां च महतीं कुर्याद्देवमावाह्य पूर्ववत्
alabdhe sthāpite liṃge śivasthāne jale 'tha vā |
vahnau ravau tathā vyomni bhagavaṃtaṃ śivaṃ yajet
||70||अलब्धे स्थापिते लिंगे शिवस्थाने जले ऽथ वा ।
वह्नौ रवौ तथा व्योम्नि भगवंतं शिवं यजेत्
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe pratiṣṭhāvidhivarṇanaṃ nāma ṣaṭtriṃśo'dhyāyaḥ