ājñāhīnaṃ kriyāhīnaṃ śraddhāhīnaṃ varānane
īśvara uvāca
ājñāhīnaṃ kriyāhīnaṃ śraddhāhīnaṃ varānane |
ājñārthaṃ dakṣiṇāhīnaṃ sadā japtaṃ ca niṣphalam
||1||आज्ञाहीनं क्रियाहीनं श्रद्धाहीनं वरानने ।
आज्ञार्थं दक्षिणाहीनं सदा जप्तं च निष्फलम्
ājñāsiddhaṃ kriyāsiddhaṃ śraddhāsiddhaṃ mamātmakam |
evaṃ ceddakṣiṇāyuktaṃ maṃtrasiddhirmahatphalam
||2||आज्ञासिद्धं क्रियासिद्धं श्रद्धासिद्धं ममात्मकम् ।
एवं चेद्दक्षिणायुक्तं मंत्रसिद्धिर्महत्फलम्
upagamya guruṃ vipramācāryaṃ tattvavedinam |
jāpitaṃ sadguṇopetaṃ dhyānayogaparāyaṇam
||3||उपगम्य गुरुं विप्रमाचार्यं तत्त्ववेदिनम् ।
जापितं सद्गुणोपेतं ध्यानयोगपरायणम्
toṣayettaṃ prayatnena bhāvaśuddhisamanvitaḥ |
vācā ca manasā caiva kāyena draviṇena ca
||4||तोषयेत्तं प्रयत्नेन भावशुद्धिसमन्वितः ।
वाचा च मनसा चैव कायेन द्रविणेन च
ācāryaṃ pūjayedvipraḥ sarvadātiprayatnataḥ |
hastyaśvaratharatnāni kṣetrāṇi ca gṛhāṇi ca
||5||आचार्यं पूजयेद्विप्रः सर्वदातिप्रयत्नतः ।
हस्त्यश्वरथरत्नानि क्षेत्राणि च गृहाणि च
bhūṣaṇāni ca vāsāṃsi dhānyāni ca dhanāni ca |
etāni gurave dadyādbhaktyā ca vibhave sati
||6||भूषणानि च वासांसि धान्यानि च धनानि च ।
एतानि गुरवे दद्याद्भक्त्या च विभवे सति
vittaśāṭhyaṃ na kurvīta yadīcchetsiddhimātmanaḥ |
paścānnivedya svātmānaṃ gurave saparicchadam
||7||वित्तशाठ्यं न कुर्वीत यदीच्छेत्सिद्धिमात्मनः ।
पश्चान्निवेद्य स्वात्मानं गुरवे सपरिच्छदम्
evaṃ saṃpūjya vidhivadyathāśaktitvavaṃcayan |
ādadīta gurormaṃtraṃ jñānaṃ caiva krameṇa tu
||8||एवं संपूज्य विधिवद्यथाशक्तित्ववंचयन् ।
आददीत गुरोर्मंत्रं ज्ञानं चैव क्रमेण तु
evaṃ tuṣṭo guruḥ śiṣyaṃ pūjakaṃ vatsaroṣitam |
śuśrūṣumanahaṃkāraṃ snātaṃ śucimupoṣitam
||9||एवं तुष्टो गुरुः शिष्यं पूजकं वत्सरोषितम् ।
शुश्रूषुमनहंकारं स्नातं शुचिमुपोषितम्
snāpayitvā viśuddhyarthaṃ pūrṇakuṃbhaghṛtena vai |
jalena mantraśuddhena puṇyadravyayutena ca
||10||स्नापयित्वा विशुद्ध्यर्थं पूर्णकुंभघृतेन वै ।
जलेन मन्त्रशुद्धेन पुण्यद्रव्ययुतेन च
alaṃkṛtya suveṣaṃ ca gaṃdhasragvastrabhūṣaṇaiḥ |
puṇyāhaṃ vācayitvā ca brāhmaṇānabhipūjya ca
||11||अलंकृत्य सुवेषं च गंधस्रग्वस्त्रभूषणैः ।
पुण्याहं वाचयित्वा च ब्राह्मणानभिपूज्य च
samudratīre nadyāṃ ca goṣṭhe devālaye 'pi vā |
śucau deśe gṛhe vāpi kāle siddhikare tithau
||12||समुद्रतीरे नद्यां च गोष्ठे देवालये ऽपि वा ।
शुचौ देशे गृहे वापि काले सिद्धिकरे तिथौ
nakṣatre śubhayoge ca sarvadoṣavivarjite |
anugṛhya tato dadyājjñānaṃ mama yathāvidhi
||13||नक्षत्रे शुभयोगे च सर्वदोषविवर्जिते ।
अनुगृह्य ततो दद्याज्ज्ञानं मम यथाविधि
svareṇoccārayetsamyagekāṃte 'tiprasannadhīḥ |
uccāryoccārayitvā tamāvayormaṃtramuttamam
||14||स्वरेणोच्चारयेत्सम्यगेकांते ऽतिप्रसन्नधीः ।
उच्चार्योच्चारयित्वा तमावयोर्मंत्रमुत्तमम्
śivaṃ cāstu śubhaṃ cāstu śobhano 'stu priyo 'stviti |
evaṃ dadyādgururmaṃtramājñāṃ caiva tataḥ param
||15||शिवं चास्तु शुभं चास्तु शोभनो ऽस्तु प्रियो ऽस्त्विति ।
एवं दद्याद्गुरुर्मंत्रमाज्ञां चैव ततः परम्
evaṃ labdhvā gurormaṃtramājñāṃ caiva samāhitaḥ |
saṃkalpya ca japennityaṃ puraścaraṇapūrvakam
||16||एवं लब्ध्वा गुरोर्मंत्रमाज्ञां चैव समाहितः ।
संकल्प्य च जपेन्नित्यं पुरश्चरणपूर्वकम्
yāvajjīvaṃ japennityamaṣṭottarasahasrakam |
ananyastatparo bhūtvā sa yāti paramāṃ gatim
||17||यावज्जीवं जपेन्नित्यमष्टोत्तरसहस्रकम् ।
अनन्यस्तत्परो भूत्वा स याति परमां गतिम्
japedakṣaralakṣaṃ vai caturguṇitamādarāt |
naktāśī saṃyamī yassa pauraścaraṇikaḥ smṛtaḥ
||18||जपेदक्षरलक्षं वै चतुर्गुणितमादरात् ।
नक्ताशी संयमी यस्स पौरश्चरणिकः स्मृतः
yaḥ puraścaraṇaṃ kṛtvā nityajāpī bhavetpunaḥ |
tasya nāsti samo loke sa siddhaḥ siddhado bhavet
||19||यः पुरश्चरणं कृत्वा नित्यजापी भवेत्पुनः ।
तस्य नास्ति समो लोके स सिद्धः सिद्धदो भवेत्
snānaṃ kṛtvā śucau deśe baddhvā ruciramānasam |
tvayā māṃ hṛdi saṃciṃtya saṃciṃtya svaguruṃ tataḥ
||20||स्नानं कृत्वा शुचौ देशे बद्ध्वा रुचिरमानसम् ।
त्वया मां हृदि संचिंत्य संचिंत्य स्वगुरुं ततः
udaṅmukhaḥ prāṅmukho vā maunī caikāgramānasaḥ |
viśodhya pañcatattvāni dahanaplāvanādibhiḥ
||21||उदङ्मुखः प्राङ्मुखो वा मौनी चैकाग्रमानसः ।
विशोध्य पञ्चतत्त्वानि दहनप्लावनादिभिः
mantranyāsādikaṃ kṛtvā saphalīkṛtavigrahaḥ |
āvayorvigrahau dhyāyanprāṇāpānau niyamya ca
||22||मन्त्रन्यासादिकं कृत्वा सफलीकृतविग्रहः ।
आवयोर्विग्रहौ ध्यायन्प्राणापानौ नियम्य च
vidyāsthānaṃ svakaṃ rūpamṛṣiñchando 'dhidaivatam |
bījaṃ śaktiṃ tathā vākyaṃ smṛtvā pañcākṣarīṃ japet
||23||विद्यास्थानं स्वकं रूपमृषिञ्छन्दो ऽधिदैवतम् ।
बीजं शक्तिं तथा वाक्यं स्मृत्वा पञ्चाक्षरीं जपेत्
uttamaṃ mānasaṃ jāpyamupāṃśuṃ caivamadhyamam |
adhamaṃ vācikaṃ prāhurāgamārthaviśāradāḥ
||24||उत्तमं मानसं जाप्यमुपांशुं चैवमध्यमम् ।
अधमं वाचिकं प्राहुरागमार्थविशारदाः
uttamaṃ rudradaivatyaṃ madhyamaṃ viṣṇudaivatam |
adhamaṃ brahmadaivatyamityāhuranupūrvaśaḥ
||25||उत्तमं रुद्रदैवत्यं मध्यमं विष्णुदैवतम् ।
अधमं ब्रह्मदैवत्यमित्याहुरनुपूर्वशः
yaduccanīcasvaritaiḥspaṣṭāspaṣṭapadākṣaraiḥ |
maṃtramuccārayedvācā vāciko 'yaṃ japassmṛtaḥ
||26||यदुच्चनीचस्वरितैःस्पष्टास्पष्टपदाक्षरैः ।
मंत्रमुच्चारयेद्वाचा वाचिको ऽयं जपस्स्मृतः
jihvāmātraparispaṃdādīṣaduccārito 'pi vā |
aparairaśrutaḥ kiṃcicchruto vopāṃśurucyate
||27||जिह्वामात्रपरिस्पंदादीषदुच्चारितो ऽपि वा ।
अपरैरश्रुतः किंचिच्छ्रुतो वोपांशुरुच्यते
dhiyā yadakṣaraśreṇyā varṇādvarṇaṃ padātpadam |
śabdārthaciṃtanaṃ bhūyaḥ kathyate mānaso japaḥ
||28||धिया यदक्षरश्रेण्या वर्णाद्वर्णं पदात्पदम् ।
शब्दार्थचिंतनं भूयः कथ्यते मानसो जपः
vācikastveka eva syādupāṃśuḥ śatamucyate |
sāhasraṃ mānasaḥ proktaḥ sagarbhastu śatādhikaḥ
||29||वाचिकस्त्वेक एव स्यादुपांशुः शतमुच्यते ।
साहस्रं मानसः प्रोक्तः सगर्भस्तु शताधिकः
prāṇāyāmasamāyuktassagarbho japa ucyate |
ādyaṃtayoragarbho 'pi prāṇāyāmaḥ praśasyate
||30||प्राणायामसमायुक्तस्सगर्भो जप उच्यते ।
आद्यंतयोरगर्भो ऽपि प्राणायामः प्रशस्यते
catvāriṃśatsamāvṛttīḥ prāṇānāyamya saṃsmaret |
maṃtraṃ maṃtrārthaviddhīmānaśaktaḥ śaktito japet
||31||चत्वारिंशत्समावृत्तीः प्राणानायम्य संस्मरेत् ।
मंत्रं मंत्रार्थविद्धीमानशक्तः शक्तितो जपेत्
pañcakaṃ trikamekaṃ vā prāṇāyāmaṃ samācaret |
agarbhaṃ vā sagarbhaṃ vā sagarbhastatra śasyate
||32||पञ्चकं त्रिकमेकं वा प्राणायामं समाचरेत् ।
अगर्भं वा सगर्भं वा सगर्भस्तत्र शस्यते
sagarbhādapi sāhasraṃ sadhyāno japa ucyate |
eṣu pañcavidheṣvekaḥ kartavyaḥ śaktito japaḥ
||33||सगर्भादपि साहस्रं सध्यानो जप उच्यते ।
एषु पञ्चविधेष्वेकः कर्तव्यः शक्तितो जपः
aṅgulyā japasaṃkhyānamekamevamudāhṛtam |
rekhayāṣṭaguṇaṃ vidyātputrajīvairdaśādhikam
||34||अङ्गुल्या जपसंख्यानमेकमेवमुदाहृतम् ।
रेखयाष्टगुणं विद्यात्पुत्रजीवैर्दशाधिकम्
śataṃ syācchaṃkhamaṇibhiḥ pravālaistu sahasrakam |
sphaṭikairdaśasāhasraṃ mauktikairlakṣamucyate
||35||शतं स्याच्छंखमणिभिः प्रवालैस्तु सहस्रकम् ।
स्फटिकैर्दशसाहस्रं मौक्तिकैर्लक्षमुच्यते
padmākṣairdaśalakṣantu sauvarṇaiḥ koṭirucyate |
kuśagraṃthyā ca rudrākṣairanaṃtaguṇitaṃ bhavet
||36||पद्माक्षैर्दशलक्षन्तु सौवर्णैः कोटिरुच्यते ।
कुशग्रंथ्या च रुद्राक्षैरनंतगुणितं भवेत्
triṃśadakṣaiḥ kṛtā mālā dhanadā japakarmaṇi |
saptaviṃśatisaṃkhyātairakṣaiḥ puṣṭipradā bhavet
||37||त्रिंशदक्षैः कृता माला धनदा जपकर्मणि ।
सप्तविंशतिसंख्यातैरक्षैः पुष्टिप्रदा भवेत्
pañcaviṃśatisaṃkhyātaiḥ kṛtā muktiṃ prayacchati |
akṣaistu pañcadaśabhirabhicāraphalapradā |
38 aṃguṣṭhaṃ mokṣadaṃ vidyāttarjanīṃ śatrunāśinīm |
madhyamāṃ dhanadāṃ śāṃtiṃ karotyeṣā hyanāmikā
||39||पञ्चविंशतिसंख्यातैः कृता मुक्तिं प्रयच्छति ।
अक्षैस्तु पञ्चदशभिरभिचारफलप्रदा ।
३८ अंगुष्ठं मोक्षदं विद्यात्तर्जनीं शत्रुनाशिनीम् ।
मध्यमां धनदां शांतिं करोत्येषा ह्यनामिका
aṣṭottaraśataṃ mālā tatra syāduttamottamā |
śatasaṃkhyottamā mālā pañcāśadbhistu madhyamā
||40||अष्टोत्तरशतं माला तत्र स्यादुत्तमोत्तमा ।
शतसंख्योत्तमा माला पञ्चाशद्भिस्तु मध्यमा
catuḥ pañcāśadakṣaistu hṛcchreṣṭhā hi prakīrtitā |
ityevaṃ mālayā kuryājjapaṃ kasmai na darśayet
||41||चतुः पञ्चाशदक्षैस्तु हृच्छ्रेष्ठा हि प्रकीर्तिता ।
इत्येवं मालया कुर्याज्जपं कस्मै न दर्शयेत्
kaniṣṭhā kṣariṇī proktā japakarmaṇi śobhanā |
aṃguṣṭhena japejjapyamanyairaṃgulibhissaha
||42||कनिष्ठा क्षरिणी प्रोक्ता जपकर्मणि शोभना ।
अंगुष्ठेन जपेज्जप्यमन्यैरंगुलिभिस्सह
aṃguṣṭhena vinā japyaṃ kṛtaṃ tadaphalaṃ yataḥ |
gṛhe japaṃ samaṃ vidyādgoṣṭhe śataguṇaṃ viduḥ
||43||अंगुष्ठेन विना जप्यं कृतं तदफलं यतः ।
गृहे जपं समं विद्याद्गोष्ठे शतगुणं विदुः
puṇyāraṇye tathārāme sahasraguṇamucyate |
ayutaṃ parvate puṇye nadyāṃ lakṣamudāhṛtam
||44||पुण्यारण्ये तथारामे सहस्रगुणमुच्यते ।
अयुतं पर्वते पुण्ये नद्यां लक्षमुदाहृतम्
koṭiṃ devālaye prāhuranantaṃ mama sannidhau |
sūryasyāgnerguroriṃdordīpasya ca jalasya ca
||45||कोटिं देवालये प्राहुरनन्तं मम सन्निधौ ।
सूर्यस्याग्नेर्गुरोरिंदोर्दीपस्य च जलस्य च
viprāṇāṃ ca gavāṃ caiva sannidhau śasyate japaḥ |
tatpūrvābhimukhaṃ vaśyaṃ dakṣiṇaṃ cābhicārikam
||46||विप्राणां च गवां चैव सन्निधौ शस्यते जपः ।
तत्पूर्वाभिमुखं वश्यं दक्षिणं चाभिचारिकम्
paścimaṃ dhanadaṃ vidyādauttaraṃ śātidaṃ bhavet |
sūryāgnivipradevānāṃ gurūṇāmapi sannidhau
||47||पश्चिमं धनदं विद्यादौत्तरं शातिदं भवेत् ।
सूर्याग्निविप्रदेवानां गुरूणामपि सन्निधौ
anyeṣāṃ ca prasaktānāṃ mantraṃ na vimukho japet |
uṣṇīṣī kuṃcukī namro muktakeśo galāvṛtaḥ
||48||अन्येषां च प्रसक्तानां मन्त्रं न विमुखो जपेत् ।
उष्णीषी कुंचुकी नम्रो मुक्तकेशो गलावृतः
apavitrakaro 'śuddho vilapanna japetkvacit |
krodhaṃ madaṃ kṣutaṃ trīṇi niṣṭhīvanavijṛṃbhaṇe
||49||अपवित्रकरो ऽशुद्धो विलपन्न जपेत्क्वचित् ।
क्रोधं मदं क्षुतं त्रीणि निष्ठीवनविजृंभणे
darśanaṃ ca śvanīcānāṃ varjayejjapakarmaṇi |
ācametsaṃbhave teṣāṃ smaredvā māṃ tvayā saha
||50||दर्शनं च श्वनीचानां वर्जयेज्जपकर्मणि ।
आचमेत्संभवे तेषां स्मरेद्वा मां त्वया सह
jyotīṃṣi ca prapaśyedvā kuryādvā prāṇasaṃyamam |
anāsanaḥ śayāne vā gacchannutthita eva vā
||51||ज्योतींषि च प्रपश्येद्वा कुर्याद्वा प्राणसंयमम् ।
अनासनः शयाने वा गच्छन्नुत्थित एव वा
rathyāyāmaśive sthāne na japettimirāntare |
prasārya na japetpādau kukkuṭāsana eva vā
||52||रथ्यायामशिवे स्थाने न जपेत्तिमिरान्तरे ।
प्रसार्य न जपेत्पादौ कुक्कुटासन एव वा
yānaśayyādhirūḍho vā ciṃtāvyākulito 'tha vā |
śaktaścetsarvamevaitadaśaktaḥ śaktito japet
||53||यानशय्याधिरूढो वा चिंताव्याकुलितो ऽथ वा ।
शक्तश्चेत्सर्वमेवैतदशक्तः शक्तितो जपेत्
kimatra bahunoktena samāsena vacaḥ śṛṇu |
sadācāro japañchuddhaṃ dhyāyanbhadraṃ samaśnute
||54||किमत्र बहुनोक्तेन समासेन वचः शृणु ।
सदाचारो जपञ्छुद्धं ध्यायन्भद्रं समश्नुते
ācāraḥ paramo dharma ācāraḥ paramaṃ dhanaṃ |
ācāraḥ paramā vidyā ācāraḥ paramā gatiḥ
||55||आचारः परमो धर्म आचारः परमं धनं ।
आचारः परमा विद्या आचारः परमा गतिः
ācārahīnaḥ puruṣo loke bhavati niṃditaḥ |
paratra ca sukhī na syāttasmādācāravānbhavet
||56||आचारहीनः पुरुषो लोके भवति निंदितः ।
परत्र च सुखी न स्यात्तस्मादाचारवान्भवेत्
yasya yadvihitaṃ karma vede śāstre ca vaidikaiḥ |
tasya tena samācāraḥ sadācāro na cetaraḥ
||57||यस्य यद्विहितं कर्म वेदे शास्त्रे च वैदिकैः ।
तस्य तेन समाचारः सदाचारो न चेतरः
sadbhirācaritatvācca sadācāraḥ sa ucyate |
sadācārasya tasyāhurāstikyaṃ mūlakāraṇam
||58||सद्भिराचरितत्वाच्च सदाचारः स उच्यते ।
सदाचारस्य तस्याहुरास्तिक्यं मूलकारणम्
āstikaścetpramādādyaiḥ sadācārādavicyutaḥ |
na duṣyati naro nityaṃ tasmādāstikatāṃ vrajet
||59||आस्तिकश्चेत्प्रमादाद्यैः सदाचारादविच्युतः ।
न दुष्यति नरो नित्यं तस्मादास्तिकतां व्रजेत्
yathehāsti sukhaṃ duḥkhaṃ sukṛtairduṣkṛtairapi |
tathā paratra cāstīti matirāstikyamucyate
||60||यथेहास्ति सुखं दुःखं सुकृतैर्दुष्कृतैरपि ।
तथा परत्र चास्तीति मतिरास्तिक्यमुच्यते
rahasyamanyadvakṣyāmi gopanīyamidaṃ priye |
na vācyaṃ yasya kasyāpi nāstikasyātha vā paśoḥ
||61||रहस्यमन्यद्वक्ष्यामि गोपनीयमिदं प्रिये ।
न वाच्यं यस्य कस्यापि नास्तिकस्याथ वा पशोः
sadācāravihīnasya patitasyāntyajasya ca |
pañcākṣarātparaṃ nāsti paritrāṇaṃ kalau yuge
||62||सदाचारविहीनस्य पतितस्यान्त्यजस्य च ।
पञ्चाक्षरात्परं नास्ति परित्राणं कलौ युगे
gacchatastiṣṭhato vāpi svecchayā karma kurvataḥ |
aśucervā śucervāpi mantro 'yanna ca niṣphalaḥ
||63||गच्छतस्तिष्ठतो वापि स्वेच्छया कर्म कुर्वतः ।
अशुचेर्वा शुचेर्वापि मन्त्रो ऽयन्न च निष्फलः
anācāravatāṃ puṃsāmaviśuddhaṣaḍadhvanām |
anādiṣṭo 'pi guruṇā mantro 'yaṃ na ca niṣphalaḥ
||64||अनाचारवतां पुंसामविशुद्धषडध्वनाम् ।
अनादिष्टो ऽपि गुरुणा मन्त्रो ऽयं न च निष्फलः
antyajasyāpi mūrkhasya mūḍhasya patitasya ca |
nirmaryādasya nīcasya maṃtro 'yaṃ na ca niṣphalaḥ
||65||अन्त्यजस्यापि मूर्खस्य मूढस्य पतितस्य च ।
निर्मर्यादस्य नीचस्य मंत्रो ऽयं न च निष्फलः
sarvāvasthāṃ gatasyāpi mayi bhaktimataḥ param |
sidhyatyeva na saṃdeho nāparasya tu kasyacit
||66||सर्वावस्थां गतस्यापि मयि भक्तिमतः परम् ।
सिध्यत्येव न संदेहो नापरस्य तु कस्यचित्
na lagnatithinakṣatravārayogādayaḥ priye |
asyātyaṃtamavekṣyāḥ syurnaiṣa saptassadoditaḥ
||67||न लग्नतिथिनक्षत्रवारयोगादयः प्रिये ।
अस्यात्यंतमवेक्ष्याः स्युर्नैष सप्तस्सदोदितः
na kadācinna kasyāpi ripureṣa mahāmanuḥ |
susiddho vāpi siddho vā sādhyo vāpi bhaviṣyati
||68||न कदाचिन्न कस्यापि रिपुरेष महामनुः ।
सुसिद्धो वापि सिद्धो वा साध्यो वापि भविष्यति
siddhena guruṇādiṣṭassusiddha iti kathyate |
asiddhenāpi vā dattassiddhasādhyastu kevalaḥ
||69||सिद्धेन गुरुणादिष्टस्सुसिद्ध इति कथ्यते ।
असिद्धेनापि वा दत्तस्सिद्धसाध्यस्तु केवलः
asādhitassādhito vā sidhyatvena na saṃśayaḥ |
śraddhātiśayayuktasya mayi maṃtre tathā gurau
||70||असाधितस्साधितो वा सिध्यत्वेन न संशयः ।
श्रद्धातिशययुक्तस्य मयि मंत्रे तथा गुरौ
tasmānmaṃtrāntarāṃstyaktvā sāpāyān 1 dhikārataḥ |
āśrametparamāṃ vidyāṃ sākṣātpañcākṣarīṃ budhaḥ
||71||तस्मान्मंत्रान्तरांस्त्यक्त्वा सापायान् १ धिकारतः ।
आश्रमेत्परमां विद्यां साक्षात्पञ्चाक्षरीं बुधः
maṃtrāntareṣu siddheṣu maṃtra eṣa na sidhyati |
siddhe tvasminmahāmaṃtre te ca siddhā bhavaṃtyuta
||72||मंत्रान्तरेषु सिद्धेषु मंत्र एष न सिध्यति ।
सिद्धे त्वस्मिन्महामंत्रे ते च सिद्धा भवंत्युत
yathā deveṣvalabdho 'smi labdheṣvapi maheśvari |
mayi labdhe tu te labdhā maṃtreṣveṣu samo vidhiḥ
||73||यथा देवेष्वलब्धो ऽस्मि लब्धेष्वपि महेश्वरि ।
मयि लब्धे तु ते लब्धा मंत्रेष्वेषु समो विधिः
ye doṣāssarvamaṃtrāṇāṃ na te 'sminsaṃbhavaṃtyapi |
asya maṃtrasya jātyādīnanapekṣya pravartanāt
||74||ये दोषास्सर्वमंत्राणां न ते ऽस्मिन्संभवंत्यपि ।
अस्य मंत्रस्य जात्यादीननपेक्ष्य प्रवर्तनात्
tathāpi naiva kṣudreṣu phaleṣu prati yogiṣu |
sahasā viniyuṃjīta tasmādeṣa mahābalaḥ
||75||तथापि नैव क्षुद्रेषु फलेषु प्रति योगिषु ।
सहसा विनियुंजीत तस्मादेष महाबलः
upamanyuruvāca
evaṃ sākṣānmahādevyai mahādevena śūlinā |
hitā ya jagatāmuktaḥ pañcākṣaravidhiryathā
||76||एवं साक्षान्महादेव्यै महादेवेन शूलिना ।
हिता य जगतामुक्तः पञ्चाक्षरविधिर्यथा
ya idaṃ kīrtayedbhaktyā śṛṇuyādvā samāhitaḥ |
sarvapāpavinirmuktaḥ prayāti paramāṃ gatim
||77||य इदं कीर्तयेद्भक्त्या शृणुयाद्वा समाहितः ।
सर्वपापविनिर्मुक्तः प्रयाति परमां गतिम्
iti śrīśivamahāpurāṇe saptamyāṃ vāyavīyasaṃhitāyāmuttarakhaṃḍe pañcākṣaramahimavarṇanaṃ nāma caturdaśodhyāyaḥ