आमुष्मिककर्मविधिवर्णनम्
उपमन्युरुवाच
अतः परं प्रवक्ष्यामि केवलामुष्मिकं विधिम् ।
नैतेन सदृशं किंचित्कर्मास्ति भुवनत्रये
॥१॥पुण्यातिशयसंयुक्तः सर्वैर्देवैरनुष्ठितः ।
ब्रह्मणा विष्णुना चैव रुद्रेण च विशेषतः
॥२॥इंद्रादिलोकपारैश्च सूर्याद्यैर्नवभिर्ग्रहैः ।
विश्वामित्रवसिष्ठाद्यैर्ब्रह्मविद्भिर्महर्षिभिः
॥३॥श्वेतागस्त्यदधीचाद्यैरस्माभिश्च शिवाश्रितैः ।
नंदीश्वरमहाकालभृंगीशाद्यैर्गणेश्वरैः
॥४॥पातालवासिभिर्दैत्यैः शेषाद्यैश्च महोरगैः ।
सिद्धैर्यक्षैश्च गंधर्वै रक्षोभूतपिशाचकैः
॥५॥स्वंस्वं पदमनुप्राप्तं सर्वैरयमनुष्ठितः ।
अनेन विधिना सर्वे देवा देवत्वमागताः
॥६॥ब्रह्मा ब्रह्मत्वमापन्नो विष्णुर्विष्णुत्वमागतः ।
रुद्रो रुद्रत्वमापन्न इंद्रश्चेन्द्रत्वमागतः
॥७॥गणेशश्च गणेशत्वमनेन विधिना गतः ।
सितचंदनतोयेन लिंगं स्नाप्य शिवं शिवाम् ।
श्वेतैर्विकसितैः पद्मैः संपूज्य प्रणिपत्य च
॥८॥तत्र पद्मासनं रम्यं कृत्वा लक्षणसंयुतम् ।
विभवे सति हेमाद्यै रत्नाद्यैर्वा स्वशक्तितः
॥९॥मध्ये केसरजालास्य स्थाप्य लिंगं कनीयसम् ।
अंगुष्ठप्रतिमं रम्यं सर्वगन्धमयं शुभम्
॥१०॥दक्षिणे स्थापयित्वा तु बिल्वपत्रैः समर्चयेत् ।
अगुरुं दक्षिणे पार्श्वे पश्चिमे तु मनःशिलाम्
॥११॥उत्तरे चंदनं दद्याद्धरितालं तु पूर्वतः ।
सुगन्धैः कुसुमै रम्यैर्विचित्रैश्चापि पूजयेत्
॥१२॥धूपं कृष्णागुरुं दद्यात्सर्वतश्च सगुग्गुलम् ।
वासांसि चातिसूक्ष्माणि विकाशानि निवेदयेत्
॥१३॥पायसं घृतसंमिश्रं घृतदीपांश्च दापयेत् ।
सर्वं निवेद्य मन्त्रेण ततो गच्छेत्प्रदक्षिणाम्
॥१४॥प्रणम्य भक्त्या देवेशं स्तुत्वा चान्ते क्षमापयेत् ।
सर्वोपहारसंमिश्रं ततो लिंगं निवेदयेत्
॥१५॥शिवाय शिवमन्त्रेण दक्षिणामूर्तिमाश्रितः ।
एवं यो ऽर्चयते नित्यं पञ्चगन्धमयं शुभम्
॥१६॥सर्वपापविनिर्मुक्तः शिवलोके महीयते ।
एतद्व्रतोत्तमं गुह्यं शिवलिंगमहाव्रतम्
॥१७॥भक्तस्य ते समाख्यातं न देयं यस्य कस्यचित् ।
देयं च शिवभक्तेभ्यः शिवेन कथितं पुरा
॥१८॥इति श्रीशिवमहापुराणे सप्तम्यां वायवीयसंहितायामुत्तरखण्डे आमुष्मिककर्मविधिवर्णनं नाम त्रयस्त्रिंशोऽध्यायः