cakrādyāyudhadhāraṇatattanmudrādhāraṇaprakārakathanam
brahmovāca
puṃḍraṃ katividhaṃ kāryaṃ prabrūhi mama keśava ||
puṃḍrāṇāṃ śravaṇe'tīva kautukaṃ mama jāyate
||1||पुंड्रं कतिविधं कार्यं प्रब्रूहि मम केशव ॥
पुंड्राणां श्रवणेऽतीव कौतुकं मम जायते
śrībhagavānuvāca
śṛṇu putra pravakṣyāmi puṃḍraṃ ca trividhaṃ smṛtam ||
tulasīmṛtsnayā sārdhaṃ śrīgopīcaṃdanena ca
||2||शृणु पुत्र प्रवक्ष्यामि पुंड्रं च त्रिविधं स्मृतम् ॥
तुलसीमृत्स्नया सार्धं श्रीगोपीचंदनेन च
haricaṃdanataḥ kāryaṃ puṃḍraṃ tatra vicakṣaṇaiḥ ||
śrīkṛṣṇatulasīmūlamṛdamādāya bhaktimān ||
dhārayedūrdhvapuṃḍrāṇi haristatra prasīdati
||3||हरिचंदनतः कार्यं पुंड्रं तत्र विचक्षणैः ॥
श्रीकृष्णतुलसीमूलमृदमादाय भक्तिमान् ॥
धारयेदूर्ध्वपुंड्राणि हरिस्तत्र प्रसीदति
gopīcaṃdana māhātmyaṃ nibodha gadato mama
||4||गोपीचंदन माहात्म्यं निबोध गदतो मम
yo mṛttikāṃ dvāravatīsamudbhavāṃ kare samādāya lalāṭapaṭṭake ||
karoti nityaṃ nara ūrdhvapuṃḍraṃ kriyāphalaṃ koṭiguṇaṃ tadā bhavet
||5||यो मृत्तिकां द्वारवतीसमुद्भवां करे समादाय ललाटपट्टके ॥
करोति नित्यं नर ऊर्ध्वपुंड्रं क्रियाफलं कोटिगुणं तदा भवेत्
kriyāvihīnaṃ yadi mantrahīnaṃ śraddhāvihīnaṃ yadi kālavarjitam ||
kṛtvā lalāṭe yadi gopicaṃdanaṃ prāpnoti tatkarmaphalaṃ sadā'vyayam
||6||क्रियाविहीनं यदि मन्त्रहीनं श्रद्धाविहीनं यदि कालवर्जितम् ॥
कृत्वा ललाटे यदि गोपिचंदनं प्राप्नोति तत्कर्मफलं सदाऽव्ययम्
gopīcaṃdanasaṃbhavaṃ suruciraṃ puṃḍraṃ lalāṭe dvijo nityaṃ dhārayate yadi pratidinaṃ rātrau divā sarvadā ||
yatpuṇyaṃ kurujāṃgale ravigrahe māgha prayāge tathā tatprāpnoti tato'dhikaṃ mama gṛhe saṃtiṣṭhate devavat
||7||गोपीचंदनसंभवं सुरुचिरं पुंड्रं ललाटे द्विजो नित्यं धारयते यदि प्रतिदिनं रात्रौ दिवा सर्वदा ॥
यत्पुण्यं कुरुजांगले रविग्रहे माघ प्रयागे तथा तत्प्राप्नोति ततोऽधिकं मम गृहे संतिष्ठते देववत्
yasmingṛhe tiṣṭhati gopicaṃdanaṃ bhaktyā lalāṭe manujo bibharti cet ||
tasmingṛhe'haṃ nivasāmi sarvadā śriyānvitaḥ kaṃsanihā caturmukha
||8||यस्मिन्गृहे तिष्ठति गोपिचंदनं भक्त्या ललाटे मनुजो बिभर्ति चेत् ॥
तस्मिन्गृहेऽहं निवसामि सर्वदा श्रियान्वितः कंसनिहा चतुर्मुख
yo dhārayedddvāravatīsamudbhavāṃ mṛtsnāṃ pavitrāṃ kalikalmaṣāpahām ||
nityaṃ lalāṭe mama mantrasaṃyutāṃ yamaṃ na paśyedapi pāpasaṃyutaḥ
||9||यो धारयेद्द्द्वारवतीसमुद्भवां मृत्स्नां पवित्रां कलिकल्मषापहाम् ॥
नित्यं ललाटे मम मन्त्रसंयुतां यमं न पश्येदपि पापसंयुतः
yasyāṃ'takāle suta gopicaṃdanaṃ bāhvorlalāṭe hṛdi mastake ca ||
prayāti loke kamalāpatermama gobālaghātī yadi brahmahā syāt
||10||यस्यांऽतकाले सुत गोपिचंदनं बाह्वोर्ललाटे हृदि मस्तके च ॥
प्रयाति लोके कमलापतेर्मम गोबालघाती यदि ब्रह्महा स्यात्
grahā na pīḍyaṃti na rakṣasāṃ gaṇā yakṣāḥ piśācoragabhūtanāyakāḥ ||
lalāṭapaṭṭe suta gopicaṃdanaṃ saṃtiṣṭhate yasya mama prabhāvāt
||11||ग्रहा न पीड्यंति न रक्षसां गणा यक्षाः पिशाचोरगभूतनायकाः ॥
ललाटपट्टे सुत गोपिचंदनं संतिष्ठते यस्य मम प्रभावात्
ūrdhvapuṃḍramṛjuṃ saumyaṃ lalāṭe yasya dṛśyate ||
sa caṃḍālo'pi śuddhātmā pūjya eva na saṃśayaḥ
||12||ऊर्ध्वपुंड्रमृजुं सौम्यं ललाटे यस्य दृश्यते ॥
स चंडालोऽपि शुद्धात्मा पूज्य एव न संशयः
asnāto yaḥ kriyāḥ kuryādaśuciḥ pāpasaṃyutaḥ ||
gopīcaṃdanasaṃparkātpūto bhavati tatkṣaṇāt
||13||अस्नातो यः क्रियाः कुर्यादशुचिः पापसंयुतः ॥
गोपीचंदनसंपर्कात्पूतो भवति तत्क्षणात्
aśucirvāpyanācāro mahāpāpaṃ samācaret ||
śucireva bhavennityamūrdhvapuṃḍrāṃ'kito naraḥ
||14||अशुचिर्वाप्यनाचारो महापापं समाचरेत् ॥
शुचिरेव भवेन्नित्यमूर्ध्वपुंड्रांऽकितो नरः
matpriyārthaṃ śubhārthaṃ vā rakṣārthaṃ caturānana ||
matpūjāhomake caiva sāyaṃ prātaḥ samāhitaḥ ||
madbhakto dhārayennityamūrdhvapuṃḍraṃ bhavāpaham
||15||मत्प्रियार्थं शुभार्थं वा रक्षार्थं चतुरानन ॥
मत्पूजाहोमके चैव सायं प्रातः समाहितः ॥
मद्भक्तो धारयेन्नित्यमूर्ध्वपुंड्रं भवापहम्
ūrdhvapuṃḍradharo martyo mriyate yadi kutracit ||
śvapāko'pi vimānastho mama loke mahīyate
||16||ऊर्ध्वपुंड्रधरो मर्त्यो म्रियते यदि कुत्रचित् ॥
श्वपाकोऽपि विमानस्थो मम लोके महीयते
ūrdhvapuṃḍradharo martyo yadā yasyānnamaśnute ||
tadā viṃśatkulaṃ tasya narakāduddharāmyaham
||17||ऊर्ध्वपुंड्रधरो मर्त्यो यदा यस्यान्नमश्नुते ॥
तदा विंशत्कुलं तस्य नरकादुद्धराम्यहम्
vīkṣyā''darśe jale vā'pi yo vidadhyātprayatnataḥ ||
ūrdhvapuṇḍraṃ mahābhāga sa yāti paramāṃ gatim
||18||वीक्ष्याऽऽदर्शे जले वाऽपि यो विदध्यात्प्रयत्नतः ॥
ऊर्ध्वपुण्ड्रं महाभाग स याति परमां गतिम्
anāmikā śāṃtidoktā madhyamā''yuṣkarī bhavet ||
aṃguṣṭhaḥ puṣṭidaḥ proktastarjanī mokṣadāyinī
||19||अनामिका शांतिदोक्ता मध्यमाऽऽयुष्करी भवेत् ॥
अंगुष्ठः पुष्टिदः प्रोक्तस्तर्जनी मोक्षदायिनी
gopīcaṃdanakhaṃḍaṃ tu yo dadāti ca vaiṣṇave ||
kulamaṣṭottaraṃ tena tāritaṃ vai bhavecchatam
||20||गोपीचंदनखंडं तु यो ददाति च वैष्णवे ॥
कुलमष्टोत्तरं तेन तारितं वै भवेच्छतम्
yajño dānaṃ tapo homaḥ svādhyāyaḥ pitṛtarpaṇam ||
vyarthaṃ bhavati tatsarvamūrdhvapuṇḍravinākṛtam
||21||यज्ञो दानं तपो होमः स्वाध्यायः पितृतर्पणम् ॥
व्यर्थं भवति तत्सर्वमूर्ध्वपुण्ड्रविनाकृतम्
yaccharīraṃ manuṣyāṇāmūrdhvapuṇḍravinākṛtam ||
tanmukhaṃ naiva paśyāmi śmaśānasadṛśaṃ hi tat
||22||यच्छरीरं मनुष्याणामूर्ध्वपुण्ड्रविनाकृतम् ॥
तन्मुखं नैव पश्यामि श्मशानसदृशं हि तत्
ūrdhvapuṇḍraṃ prakurvīta matsyakūrmādidhāraṇam ||
kuryādviṣṇuprasādārthaṃ mahāviṣṇoratipriyam
||23||ऊर्ध्वपुण्ड्रं प्रकुर्वीत मत्स्यकूर्मादिधारणम् ॥
कुर्याद्विष्णुप्रसादार्थं महाविष्णोरतिप्रियम्
yatpunaḥ kalikāle tu matpurīsaṃbhavāṃ mṛdam ||
matsyakūrmāṃ'kitaṃ cihnaṃ gṛhītvā kurute naraḥ
||24||यत्पुनः कलिकाले तु मत्पुरीसंभवां मृदम् ॥
मत्स्यकूर्मांऽकितं चिह्नं गृहीत्वा कुरुते नरः
dehe tasya praviṣṭaṃ māṃ jānīhi tridaśottama ||
tasya me nāṃtaraṃ kiṃcitkartavyaṃ śreya icchatā
||25||देहे तस्य प्रविष्टं मां जानीहि त्रिदशोत्तम ॥
तस्य मे नांतरं किंचित्कर्तव्यं श्रेय इच्छता
mamāvatāracihnāni dṛśyaṃte yasya vigrahe ||
martyo martyo na vijñeyaḥ sa nūnaṃ māmakī tanuḥ
||26||ममावतारचिह्नानि दृश्यंते यस्य विग्रहे ॥
मर्त्यो मर्त्यो न विज्ञेयः स नूनं मामकी तनुः
pāpaṃ sukṛtarūpaṃ tu jāyate tasya dehinaḥ ||
mamā''yudhāni dṛśyaṃte likhitāni kalau yuge
||27||पापं सुकृतरूपं तु जायते तस्य देहिनः ॥
ममाऽऽयुधानि दृश्यंते लिखितानि कलौ युगे
ubhābhyāmapi cihnābhyāṃ yoṃ'kito matsyamudrayā ||
kūrmayā māmakaṃ tejo vikṣiptaṃ tasya vigrahe
||28||उभाभ्यामपि चिह्नाभ्यां योंऽकितो मत्स्यमुद्रया ॥
कूर्मया मामकं तेजो विक्षिप्तं तस्य विग्रहे
śaṃkha ca padmaṃ ca gadāṃ rathāṃgaṃ matsyaṃ ca kūrmaṃ racitaṃ svadehe ||
karoti nityaṃ sukṛtasya vṛddhiṃ pāpakṣayaṃ janmaśatārjitasya
||29||शंख च पद्मं च गदां रथांगं मत्स्यं च कूर्मं रचितं स्वदेहे ॥
करोति नित्यं सुकृतस्य वृद्धिं पापक्षयं जन्मशतार्जितस्य
nārāyaṇāyudhairnityaṃ cihnito yasya vigrahaḥ ||
pāpakoṭiprayuktasya tasya kiṃ kurute yamaḥ
||30||नारायणायुधैर्नित्यं चिह्नितो यस्य विग्रहः ॥
पापकोटिप्रयुक्तस्य तस्य किं कुरुते यमः
śaṃkhoddhāre ca yatproktaṃ vasatā koṭijanmabhiḥ ||
tatphalaṃ labhate śaṃkhe pratyahaṃ dakṣiṇe bhuje
||31||शंखोद्धारे च यत्प्रोक्तं वसता कोटिजन्मभिः ॥
तत्फलं लभते शंखे प्रत्यहं दक्षिणे भुजे
yatphalaṃ puṣkare proktaṃ puṇḍarīkākṣadarśanāt ||
śaṃkhopari kṛte padme tatphalaṃ koṭisaṃmitam
||32||यत्फलं पुष्करे प्रोक्तं पुण्डरीकाक्षदर्शनात् ॥
शंखोपरि कृते पद्मे तत्फलं कोटिसंमितम्
vāme bhuje gadā yasya likhitā dṛśyate kalau ||
gadādharo gayāpuṇyaṃ pratyahaṃ tasya yacchati
||33||वामे भुजे गदा यस्य लिखिता दृश्यते कलौ ॥
गदाधरो गयापुण्यं प्रत्यहं तस्य यच्छति
yaccānaṃdapure proktaṃ cakrasvāmisamīpataḥ ||
gadācakre ca likhite tatphalaṃ liṃgadarśane
||34||यच्चानंदपुरे प्रोक्तं चक्रस्वामिसमीपतः ॥
गदाचक्रे च लिखिते तत्फलं लिंगदर्शने
mamāyudhāṃ'kitaṃ dehaṃ gopīcandanamṛtsnayā ||
prayāgādiṣu tīrtheṣu sa gatvā kiṃ kariṣyati
||35||ममायुधांऽकितं देहं गोपीचन्दनमृत्स्नया ॥
प्रयागादिषु तीर्थेषु स गत्वा किं करिष्यति
yadāyadā prapaśyeta dehaṃ śaṃkhādicihnitam ||
tadātadā prasannohaṃ pāpaṃ tasya dahāmi vai
||36||यदायदा प्रपश्येत देहं शंखादिचिह्नितम् ॥
तदातदा प्रसन्नोहं पापं तस्य दहामि वै
tiṣṭhate yasya dehe tu ahorātraṃ dine dine ||
śaṃkhacakragadāpadmalikhitaṃ sa madātmakaḥ
||37||तिष्ठते यस्य देहे तु अहोरात्रं दिने दिने ॥
शंखचक्रगदापद्मलिखितं स मदात्मकः
nārāyaṇāyudhairyuktaṃ kṛtvātmānaṃ kalau yuge ||
yatpuṇyaṃ karma kurute merutulyaṃ na saṃśayaḥ
||38||नारायणायुधैर्युक्तं कृत्वात्मानं कलौ युगे ॥
यत्पुण्यं कर्म कुरुते मेरुतुल्यं न संशयः
śaṃkhāyudhāṃ'kito bhaktyā yaḥ śrāddhaṃ kurute suta ||
vidhihīnaṃ tu saṃpūrṇaṃ pitṝṇāṃ dattamakṣayam
||39||शंखायुधांऽकितो भक्त्या यः श्राद्धं कुरुते सुत ॥
विधिहीनं तु संपूर्णं पितॄणां दत्तमक्षयम्
yathā'gnirdahate kāṣṭhaṃ vāyunā preṣito bhṛśam ||
tathā dahyaṃti pāpāni dṛṣṭvā ma āyudhāni vai
||40||यथाऽग्निर्दहते काष्ठं वायुना प्रेषितो भृशम् ॥
तथा दह्यंति पापानि दृष्ट्वा म आयुधानि वै
mama nāmāṃkitāṃ mudrāmaṣṭākṣarasamanvitām ||
śaṃkhādisvāyudhairyuktāṃ svarṇaraupyamayīmapi
||41||मम नामांकितां मुद्रामष्टाक्षरसमन्विताम् ॥
शंखादिस्वायुधैर्युक्तां स्वर्णरौप्यमयीमपि
dhatte bhagavato yastu kalikāle viśeṣataḥ ||
prahrādasya samo jñeyo nānyathā mama vallabhaḥ
||42||धत्ते भगवतो यस्तु कलिकाले विशेषतः ॥
प्रह्रादस्य समो ज्ञेयो नान्यथा मम वल्लभः
yasya nārāyaṇī mudrā dehaṃ śaṃkhādicihnitam ||
dhātrīphalaiḥ kṛtā mālā tulasīkāṣṭhasaṃbhavā
||43||यस्य नारायणी मुद्रा देहं शंखादिचिह्नितम् ॥
धात्रीफलैः कृता माला तुलसीकाष्ठसंभवा
dvādaśākṣaramaṃtrastu niyuktāni kalevare ||
āyudhāni ca viprasya matsamaḥ sa ca vaiṣṇavaḥ
||44||द्वादशाक्षरमंत्रस्तु नियुक्तानि कलेवरे ॥
आयुधानि च विप्रस्य मत्समः स च वैष्णवः
śaṃkhāṃkitatanurvipro bhuṃkte vai yasya veśmani ||
tadannaṃ svayamaśnāmi pitṛbhiḥ saha putraka
||45||शंखांकिततनुर्विप्रो भुंक्ते वै यस्य वेश्मनि ॥
तदन्नं स्वयमश्नामि पितृभिः सह पुत्रक
kṛṣṇāyudhāṃ'kitaṃ dṛṣṭvā sanmānaṃ na karoti yaḥ ||
dvādaśābdārjitaṃ puṇyaṃ bāṣkaleyāya gacchati
||46||कृष्णायुधांऽकितं दृष्ट्वा सन्मानं न करोति यः ॥
द्वादशाब्दार्जितं पुण्यं बाष्कलेयाय गच्छति
kṛṣṇāyudhāṃ'kito yastu śmaśāne mriyate yadi ||
prayāge yā gatiḥ proktā sā gatistasya mānada
||47||कृष्णायुधांऽकितो यस्तु श्मशाने म्रियते यदि ॥
प्रयागे या गतिः प्रोक्ता सा गतिस्तस्य मानद
mamā''yudhaiḥ kalau nityaṃ maṃḍito yasya vigrahaḥ ||
tatrā''śramaṃ prakurvaṃti vibudhā vāsavādayaḥ
||48||ममाऽऽयुधैः कलौ नित्यं मंडितो यस्य विग्रहः ॥
तत्राऽऽश्रमं प्रकुर्वंति विबुधा वासवादयः
yaḥ karoti ca me pūjāṃ mama śastrāṃkito naraḥ ||
aparādhasahasrāṇi nityaṃ tasya harāmyaham
||49||यः करोति च मे पूजां मम शस्त्रांकितो नरः ॥
अपराधसहस्राणि नित्यं तस्य हराम्यहम्
kṛtvā kāṣṭhamayaṃ biṃbaṃ mama śastraiḥ sucihnitam ||
yo vā aṃkayate dehaṃ tatsamo nāsti vaiṣṇavaḥ
||50||कृत्वा काष्ठमयं बिंबं मम शस्त्रैः सुचिह्नितम् ॥
यो वा अंकयते देहं तत्समो नास्ति वैष्णवः
aṣṭākṣarāṃ'kitā mudrā yasya dhātumayī kare ||
śaṃkhapadmādibhiryuktā pūjyate'sau surāsuraiḥ
||51||अष्टाक्षरांऽकिता मुद्रा यस्य धातुमयी करे ॥
शंखपद्मादिभिर्युक्ता पूज्यतेऽसौ सुरासुरैः
dhṛtā nārāyaṇī mudrā prahrādena purā kare ||
vibhīṣaṇena balinā dhruveṇa ca śukena ca ||
māṃdhātrā hyaṃbarīṣeṇa mārkaṃḍeyamukhairdvijaiḥ
||52||धृता नारायणी मुद्रा प्रह्रादेन पुरा करे ॥
विभीषणेन बलिना ध्रुवेण च शुकेन च ॥
मांधात्रा ह्यंबरीषेण मार्कंडेयमुखैर्द्विजैः
śaṃkhādicihnitaiḥ śastrairdehaṃ kṛtvā ca mānada ||
evamārādhya māṃ prāptaṃ samīhitaphalaṃ mahat
||53||शंखादिचिह्नितैः शस्त्रैर्देहं कृत्वा च मानद ॥
एवमाराध्य मां प्राप्तं समीहितफलं महत्
gopīcaṃdanamṛtsnayā likhito yasya vigrahaḥ ||
śaṃkhacakrādipadmāṃ'ko dehe tasya vasāmyaham
||54||गोपीचंदनमृत्स्नया लिखितो यस्य विग्रहः ॥
शंखचक्रादिपद्मांऽको देहे तस्य वसाम्यहम्
sauvarṇaṃ rājataṃ tāmraṃ kāṃsyamāyasameva ca ||
cakraṃ kṛtvā tu medhāvī dhārayīta vicakṣaṇaḥ ||
dvādaśāraṃ tu ṣaṭkoṇaṃ valitrayavibhūṣitam
||55||सौवर्णं राजतं ताम्रं कांस्यमायसमेव च ॥
चक्रं कृत्वा तु मेधावी धारयीत विचक्षणः ॥
द्वादशारं तु षट्कोणं वलित्रयविभूषितम्
evaṃ sudarśanaṃ cakraṃ kārayīta vicakṣaṇaḥ ||
upavītādivaddhāryāḥ śaṃkhacakragadāḥ sadā
||56||एवं सुदर्शनं चक्रं कारयीत विचक्षणः ॥
उपवीतादिवद्धार्याः शंखचक्रगदाः सदा
brāhmaṇaiśca viśeṣeṇa vaiṣṇavaiśca viśeṣataḥ ||
upavītaṃ śikhā yadvaccakraṃ lāṃchana saṃyutam
||57||ब्राह्मणैश्च विशेषेण वैष्णवैश्च विशेषतः ॥
उपवीतं शिखा यद्वच्चक्रं लांछन संयुतम्
cakralāṃchanahīnasya viprasya viphalaṃ bhavet ||
mama cakrāṃ'kito dehaḥ pavitra iti vai śrutiḥ
||58||चक्रलांछनहीनस्य विप्रस्य विफलं भवेत् ॥
मम चक्रांऽकितो देहः पवित्र इति वै श्रुतिः
cakrāṃ'kitāya dātavyaṃ havyaṃ kavyaṃ vicakṣaṇaiḥ ||
mama cakrāṃ'kakavacamabhedyaṃ devadānavaiḥ ||
ajeyaḥ sarvabhūtānāṃ śatrūṇāṃ rakṣasāmapi
||59||चक्रांऽकिताय दातव्यं हव्यं कव्यं विचक्षणैः ॥
मम चक्रांऽककवचमभेद्यं देवदानवैः ॥
अजेयः सर्वभूतानां शत्रूणां रक्षसामपि
mama cakrāṃ'kakavacaṃ śarīre yasya tiṣṭhati ||
nā'śubhaṃ vidyate tasya gṛhaputrādikasya hi
||60||मम चक्रांऽककवचं शरीरे यस्य तिष्ठति ॥
नाऽशुभं विद्यते तस्य गृहपुत्रादिकस्य हि
dakṣiṇe ca bhuje vipro bibhṛyādvai sudarśanam ||
savye ca śaṃkhaṃ bibhṛyāditi vedavido viduḥ
||61||दक्षिणे च भुजे विप्रो बिभृयाद्वै सुदर्शनम् ॥
सव्ये च शंखं बिभृयादिति वेदविदो विदुः
tattanmaṃtreṇa maṃtrajñaḥ pratiṣṭhāpya pṛthakpṛthak
||62||तत्तन्मंत्रेण मंत्रज्ञः प्रतिष्ठाप्य पृथक्पृथक्
lalāṭe ca gadā dhāryā mūrdhni cāpaṃ śarastathā ||
naṃdakaṃ caiva hṛnmadhye śaṃkhacakre bhujadvaye
||63||ललाटे च गदा धार्या मूर्ध्नि चापं शरस्तथा ॥
नंदकं चैव हृन्मध्ये शंखचक्रे भुजद्वये
tasmātsarvaprayatnena cakrādīndhārayetsadā ||
dhāraṇānantaraṃ brūyāttatra caivaṃ dvijottamaḥ
||64||तस्मात्सर्वप्रयत्नेन चक्रादीन्धारयेत्सदा ॥
धारणानन्तरं ब्रूयात्तत्र चैवं द्विजोत्तमः
putramitrakalatrādiryaḥ kaścinmatparigrahaḥ ||
saha dehena sarvo'sau viṣṇuprītyai mayā'rpitaḥ
||65||पुत्रमित्रकलत्रादिर्यः कश्चिन्मत्परिग्रहः ॥
सह देहेन सर्वोऽसौ विष्णुप्रीत्यै मयाऽर्पितः
paścātsvadharmamāsthāya tiṣṭhedājīvanaṃ mama ||
bhaktyā cāvyabhicāriṇyā sarvadā''ptamanorathaḥ
||66||पश्चात्स्वधर्ममास्थाय तिष्ठेदाजीवनं मम ॥
भक्त्या चाव्यभिचारिण्या सर्वदाऽऽप्तमनोरथः
śaṃkhacakrāṃkitaṃ dṛṣṭvā ye niṃdaṃti narādhamāḥ ||
avalokya mukhaṃ teṣāmādityamavalokayet ||
śrīkṛṣṇanāma coccārya śuddho bhavati nānyathā
||67||शंखचक्रांकितं दृष्ट्वा ये निंदंति नराधमाः ॥
अवलोक्य मुखं तेषामादित्यमवलोकयेत् ॥
श्रीकृष्णनाम चोच्चार्य शुद्धो भवति नान्यथा
iti śrīskāṃde mahāpurāṇa ekāśātisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde gopīcandanādiśaṃkha cakrādyāyudhadhāraṇatattanmudrādhāraṇaprakārakathanaṃnāma tṛtīyo'dhyāyaḥ || 3 ||