kasminkṣetre hi deveśa mārgaśīrṣo'dhikaḥ smṛtaḥ
brahmovāca
kasminkṣetre hi deveśa mārgaśīrṣo'dhikaḥ smṛtaḥ ||
kiṃ phalaṃ ca bhavettasminnetatsarvaṃ vada prabho
||1||कस्मिन्क्षेत्रे हि देवेश मार्गशीर्षोऽधिकः स्मृतः ॥
किं फलं च भवेत्तस्मिन्नेतत्सर्वं वद प्रभो
śrībhagavānuvāca
madhureti suvikhyātamasti kṣetraṃ paraṃ mama ||
suramyā ca praśastā ca janmabhūmiḥ priyā mama
||2||मधुरेति सुविख्यातमस्ति क्षेत्रं परं मम ॥
सुरम्या च प्रशस्ता च जन्मभूमिः प्रिया मम
padepade tīrthaphalaṃ madhurāyāṃ caturmukha ||
yatrayatra naraḥ snāto mucyate ghorakilbiṣāt
||3||पदेपदे तीर्थफलं मधुरायां चतुर्मुख ॥
यत्रयत्र नरः स्नातो मुच्यते घोरकिल्बिषात्
sarvadharmavihīnānāṃ puruṣāṇāṃ durātmanām ||
narakārtiharā putra madhurā pāpanāśinī
||4||सर्वधर्मविहीनानां पुरुषाणां दुरात्मनाम् ॥
नरकार्तिहरा पुत्र मधुरा पापनाशिनी
kṛtaghnaśca surāpaśca cauro bhagnavratastathā ||
madhurāṃ prāpya manujo mucyate ghorapātakāt
||5||कृतघ्नश्च सुरापश्च चौरो भग्नव्रतस्तथा ॥
मधुरां प्राप्य मनुजो मुच्यते घोरपातकात्
sūryaudaye tamo naśyedyathā vajrabhayānnagāḥ ||
tārkṣyaṃ dṛṣṭvā yathā sarpā meghā vātahatā yathā
||6||सूर्यौदये तमो नश्येद्यथा वज्रभयान्नगाः ॥
तार्क्ष्यं दृष्ट्वा यथा सर्पा मेघा वातहता यथा
tattvajñānādyathā duḥkhaṃ hariṃ dṛṣṭvā yathā gajāḥ ||
tathā pāpāni naśyaṃti mathurādarśanātsuta
||7||तत्त्वज्ञानाद्यथा दुःखं हरिं दृष्ट्वा यथा गजाः ॥
तथा पापानि नश्यंति मथुरादर्शनात्सुत
śraddhayā bhaktiyuktastu dṛṣṭvā madhupurīṃ naraḥ ||
brahmahā'pi viśudhyeta kiṃ punastvanyapātakī
||8||श्रद्धया भक्तियुक्तस्तु दृष्ट्वा मधुपुरीं नरः ॥
ब्रह्महाऽपि विशुध्येत किं पुनस्त्वन्यपातकी
mathurāṃ snātukāmasya gacchatastu padepade ||
nirāśāni vrajaṃtyeva pāpāni ca śarīrataḥ
||9||मथुरां स्नातुकामस्य गच्छतस्तु पदेपदे ॥
निराशानि व्रजंत्येव पापानि च शरीरतः
anuṣaṃgeṇa gacchaṃti vāṇijyenā'pi sevayā ||
madhurāsnānamātreṇa divaṃ yāṃti gatāṃhasaḥ
||10||अनुषंगेण गच्छंति वाणिज्येनाऽपि सेवया ॥
मधुरास्नानमात्रेण दिवं यांति गतांहसः
nāmā'pi gṛhṇatāmasyāḥ sadā muktirna saṃśayaḥ ||
sadā kṛtayugaṃ tatra sadā caivottarāyaṇam
||11||नामाऽपि गृह्णतामस्याः सदा मुक्तिर्न संशयः ॥
सदा कृतयुगं तत्र सदा चैवोत्तरायणम्
yaḥ śṛṇoti caturvaktra mādhuraṃ mama maṃdiram ||
anyenoccārite sadyaḥ so'pi pāpātpramucyate
||12||यः शृणोति चतुर्वक्त्र माधुरं मम मंदिरम् ॥
अन्येनोच्चारिते सद्यः सोऽपि पापात्प्रमुच्यते
trirātramapi ye tatra vasaṃti manujāḥ suta ||
teṣāṃ punaṃti sahṛṣṭāḥ spṛṣṭāścaraṇareṇavaḥ
||13||त्रिरात्रमपि ये तत्र वसंति मनुजाः सुत ॥
तेषां पुनंति सहृष्टाः स्पृष्टाश्चरणरेणवः
yathā tṛṇasamūhaṃ tu jvalayaṃti sphuliṃgakāḥ ||
tathā mahāṃti pāpāni dahate mathurā purī
||14||यथा तृणसमूहं तु ज्वलयंति स्फुलिंगकाः ॥
तथा महांति पापानि दहते मथुरा पुरी
snānena sarvatīrthānāṃ yaḥ syātsukṛtasaṃcayaḥ ||
tato'dhikataraṃ proktā mathurā sarvamaṃḍale
||15||स्नानेन सर्वतीर्थानां यः स्यात्सुकृतसंचयः ॥
ततोऽधिकतरं प्रोक्ता मथुरा सर्वमंडले
caturṇāmapi vedānāṃ puṇyamadhyayanācca yat ||
tatpuṇyaṃ jāyate tatra mathurāṃ smaratāṃ nṛṇām
||16||चतुर्णामपि वेदानां पुण्यमध्ययनाच्च यत् ॥
तत्पुण्यं जायते तत्र मथुरां स्मरतां नृणाम्
anyatra hi kṛtaṃ pāpaṃ tīrthamāsādya naśyati ||
tīrtheṣu yatkṛtaṃ pāpaṃ vajralepo bhaviṣyati
||17||अन्यत्र हि कृतं पापं तीर्थमासाद्य नश्यति ॥
तीर्थेषु यत्कृतं पापं वज्रलेपो भविष्यति
mathurāyāṃ kṛtaṃ pāpaṃ mathurāyāṃ praṇaśyati ||
dharmārthakāmamokṣākhyaṃ sthitvā tatra labhennaraḥ
||18||मथुरायां कृतं पापं मथुरायां प्रणश्यति ॥
धर्मार्थकाममोक्षाख्यं स्थित्वा तत्र लभेन्नरः
anyatra daśabhirvarṣaiḥ prārabdhaṃ bhujyate hi yat ||
kilviṣaṃ ca caturvaktra māthure daśabhirdinaiḥ
||19||अन्यत्र दशभिर्वर्षैः प्रारब्धं भुज्यते हि यत् ॥
किल्विषं च चतुर्वक्त्र माथुरे दशभिर्दिनैः
divi naiva na pātāle nāṃtarikṣe na mānuṣe ||
samaṃ tu mathurāyāṃ hi priyaṃ mama sadaiva hi
||20||दिवि नैव न पाताले नांतरिक्षे न मानुषे ॥
समं तु मथुरायां हि प्रियं मम सदैव हि
sarveṣāmeva tīrthānāṃ māthuraṃ paramaṃ mahat ||
bālakrīḍanarūpāṇi kṛtāni saha gopakaiḥ
||21||सर्वेषामेव तीर्थानां माथुरं परमं महत् ॥
बालक्रीडनरूपाणि कृतानि सह गोपकैः
triṃśadvarṣasahasrāṇi triṃśadvarṣaśatāni ca ||
yatphalaṃ bhārate varṣe tatphalaṃ mathurāṃ smaran
||22||त्रिंशद्वर्षसहस्राणि त्रिंशद्वर्षशतानि च ॥
यत्फलं भारते वर्षे तत्फलं मथुरां स्मरन्
sannihatyāṃ tu yatpuṇyaṃ rāhugraste divākare ||
tatodhikaṃ labhetputra mathurāyāṃ dinedine
||23||सन्निहत्यां तु यत्पुण्यं राहुग्रस्ते दिवाकरे ॥
ततोधिकं लभेत्पुत्र मथुरायां दिनेदिने
pūrṇe varṣasahasre tu tīrtharāje tu yatphalam ||
tatphalaṃ labhate putra sahomāse madhoḥ pure
||24||पूर्णे वर्षसहस्रे तु तीर्थराजे तु यत्फलम् ॥
तत्फलं लभते पुत्र सहोमासे मधोः पुरे
pūrṇe varṣasahasre tu vārāṇasyāṃ ca yatphalam ||
tatphalaṃ labhate putra mathurāyāṃ saho dine
||25||पूर्णे वर्षसहस्रे तु वाराणस्यां च यत्फलम् ॥
तत्फलं लभते पुत्र मथुरायां सहो दिने
godāvarīdvārakayornaro yaḥ kṣetre kurūṇāṃ kṣitidāyako yaḥ ||
ṣaṇmāsakātsādhayate gayāyāṃ samaṃ bhavenno dinamekamāthuram
||26||गोदावरीद्वारकयोर्नरो यः क्षेत्रे कुरूणां क्षितिदायको यः ॥
षण्मासकात्साधयते गयायां समं भवेन्नो दिनमेकमाथुरम्
na dvārakā kāśikāṃcī na māyā gadādharo yasya samaṃ na tīrtham ||
saṃtarpitā yadyamunājalena vāṃchaṃti no vai pitaraḥ piṃḍadānam
||27||न द्वारका काशिकांची न माया गदाधरो यस्य समं न तीर्थम् ॥
संतर्पिता यद्यमुनाजलेन वांछंति नो वै पितरः पिंडदानम्
mathurāyāṃ prakurvaṃti purīsādhāraṇīdṛśam ||
ye narāste'pi vijñeyāḥ pāparāśibhiranvitāḥ
||28||मथुरायां प्रकुर्वंति पुरीसाधारणीदृशम् ॥
ये नरास्तेऽपि विज्ञेयाः पापराशिभिरन्विताः
na dṛṣṭā mathurā yena didṛkṣā yasya jāyate ||
yatra tatra mṛtasyā'pi māthure janma jāyate
||29||न दृष्टा मथुरा येन दिदृक्षा यस्य जायते ॥
यत्र तत्र मृतस्याऽपि माथुरे जन्म जायते
bhūme rajāṃsi gaṇayetkālenā'pi caturmukha ||
māthure yāni tīrthāni teṣāṃ saṃkhyā na vidyate
||30||भूमे रजांसि गणयेत्कालेनाऽपि चतुर्मुख ॥
माथुरे यानि तीर्थानि तेषां संख्या न विद्यते
kuru bhoḥ kuru bho vāsaṃ mathurākhyāṃ purīṃ prati ||
vasāmi satataṃ tasyāṃ gopakanyābhirāvṛtaḥ
||31||कुरु भोः कुरु भो वासं मथुराख्यां पुरीं प्रति ॥
वसामि सततं तस्यां गोपकन्याभिरावृतः
rere saṃsāramagnāśca śiṣyā me śṛṇutā'pare ||
yadīcchatha sukhaṃ sāṃdraṃ vāsaṃ kuruta matpurīm
||32||रेरे संसारमग्नाश्च शिष्या मे शृणुताऽपरे ॥
यदीच्छथ सुखं सांद्रं वासं कुरुत मत्पुरीम्
aho loko mahānaṃdo netrayukto na paśyati ||
māthure vidyamāne'pi saṃsṛtiṃ bhajate sadā
||33||अहो लोको महानंदो नेत्रयुक्तो न पश्यति ॥
माथुरे विद्यमानेऽपि संसृतिं भजते सदा
mānuṣīṃ yonimatulāṃ labdhvā bhāgyasya yogataḥ ||
vṛthaivāyurgataṃ teṣāṃ na dṛṣṭā mathurāpurī
||34||मानुषीं योनिमतुलां लब्ध्वा भाग्यस्य योगतः ॥
वृथैवायुर्गतं तेषां न दृष्टा मथुरापुरी
aho mateḥ sudaurbalyamaho bhāgyasya durvidhiḥ ||
aho mohasya mahimā mathurā naiva sevyate
||35||अहो मतेः सुदौर्बल्यमहो भाग्यस्य दुर्विधिः ॥
अहो मोहस्य महिमा मथुरा नैव सेव्यते
mathurāṃ tu parityajya yo'nyatra kurute matim ||
mūḍho bhramati saṃsāre mohito mama māyayā
||36||मथुरां तु परित्यज्य योऽन्यत्र कुरुते मतिम् ॥
मूढो भ्रमति संसारे मोहितो मम मायया
mathurāmapi saṃprāpya yo'nyatra kurute spṛhām ||
durbuddhestasya kiṃ jñānaṃ so'jñānena vijṛṃbhitaḥ
||37||मथुरामपि संप्राप्य योऽन्यत्र कुरुते स्पृहाम् ॥
दुर्बुद्धेस्तस्य किं ज्ञानं सोऽज्ञानेन विजृंभितः
mātrā pitrā parityaktā ye tyaktā nijabaṃdhubhiḥ ||
yeṣāṃ kvāpi gatirnāsti teṣāṃ mama purī gatiḥ
||38||मात्रा पित्रा परित्यक्ता ये त्यक्ता निजबंधुभिः ॥
येषां क्वापि गतिर्नास्ति तेषां मम पुरी गतिः
pāparāśibhirākrāṃtā ye dāridrya parājitāḥ ||
yeṣāṃ kvāpi gatirnāsti teṣāṃ mama purī gatiḥ
||39||पापराशिभिराक्रांता ये दारिद्र्य पराजिताः ॥
येषां क्वापि गतिर्नास्ति तेषां मम पुरी गतिः
sārātsārataraṃ sthānaṃ guhyādguhyataraṃ param ||
gatimanveṣamāṇānāṃ mathurā paramā gatiḥ
||40||सारात्सारतरं स्थानं गुह्याद्गुह्यतरं परम् ॥
गतिमन्वेषमाणानां मथुरा परमा गतिः
na tatpuṇyairna taddānairna tapobhirna tu stavaiḥ ||
na labhyaṃ vividhairyogairlabhyaṃ madanubhāvataḥ
||41||न तत्पुण्यैर्न तद्दानैर्न तपोभिर्न तु स्तवैः ॥
न लभ्यं विविधैर्योगैर्लभ्यं मदनुभावतः
mayi yeṣāṃ sthirā bhaktirbhūyasī yeṣu matkṛpā ||
teṣāmeva hi dhanyānāṃ mathurāyāṃ bhavedgatiḥ
||42||मयि येषां स्थिरा भक्तिर्भूयसी येषु मत्कृपा ॥
तेषामेव हि धन्यानां मथुरायां भवेद्गतिः
yā gatiryogayuktasya brahmajñasya manīṣiṇaḥ ||
sā gatistyajataḥ prāṇānmathurāyāṃ narasya ca
||43||या गतिर्योगयुक्तस्य ब्रह्मज्ञस्य मनीषिणः ॥
सा गतिस्त्यजतः प्राणान्मथुरायां नरस्य च
kāśyādipuryo yadi saṃti loke tāsāṃ tu madhye mathuraiva dhanyā ||
yā janmamauṃjīvratamuktidānairnṛṇāṃ caturdhā vidadhāti muktim
||44||काश्यादिपुर्यो यदि संति लोके तासां तु मध्ये मथुरैव धन्या ॥
या जन्ममौंजीव्रतमुक्तिदानैर्नृणां चतुर्धा विदधाति मुक्तिम्
na yogairyā gatirlabhyā manvaṃtaraśatairapi ||
anyatra helayā sā'tra labhyate matprasādataḥ
||45||न योगैर्या गतिर्लभ्या मन्वंतरशतैरपि ॥
अन्यत्र हेलया साऽत्र लभ्यते मत्प्रसादतः
na pāpebhyo bhayaṃ yatra na bhayaṃ yatra vai yamāt ||
na garbhavāsabhīryatra tatkṣetraṃ ko na saṃśrayet
||46||न पापेभ्यो भयं यत्र न भयं यत्र वै यमात् ॥
न गर्भवासभीर्यत्र तत्क्षेत्रं को न संश्रयेत्
mathurāyāṃ ca yatpuṇyaṃ tatpuṇyasya phalaṃ śṛṇu ||
mathurāyāṃ samāsādya mathurāyāṃ mṛtā hi ye
||47||मथुरायां च यत्पुण्यं तत्पुण्यस्य फलं शृणु ॥
मथुरायां समासाद्य मथुरायां मृता हि ये
api kīṭapataṃgādyā jāyaṃte te caturbhujāḥ ||
kūlātpataṃti ye vṛkṣāste'pi yāṃti parāṃ gatim
||48||अपि कीटपतंगाद्या जायंते ते चतुर्भुजाः ॥
कूलात्पतंति ये वृक्षास्तेऽपि यांति परां गतिम्
mūkā jaḍāṃdhabadhirāstaponiyamavarjitāḥ ||
kālenaiva mṛtā ye ca mama lokaṃ vrajaṃti te
||49||मूका जडांधबधिरास्तपोनियमवर्जिताः ॥
कालेनैव मृता ये च मम लोकं व्रजंति ते
sarpadaṣṭāḥ paśuhatāḥ pāvakāṃbuvināśitāḥ ||
labdhā'pamṛtyavo ye ca māthure mama lokagāḥ
||50||सर्पदष्टाः पशुहताः पावकांबुविनाशिताः ॥
लब्धाऽपमृत्यवो ये च माथुरे मम लोकगाः
satyaṃ satyaṃ muniśreṣṭha bruve śapathapūrvakam ||
sarvā'bhīṣṭapradaṃ nānyanmathurāyāḥ samaṃ kvacit
||61||सत्यं सत्यं मुनिश्रेष्ठ ब्रुवे शपथपूर्वकम् ॥
सर्वाऽभीष्टप्रदं नान्यन्मथुरायाः समं क्वचित्
trivargadā kāmināṃ yā mumukṣūṇāṃ ca muktidā ||
bhaktīcchorbhaktidā kastāṃ mathurāṃ nā''śrayedbudhaḥ
||52||त्रिवर्गदा कामिनां या मुमुक्षूणां च मुक्तिदा ॥
भक्तीच्छोर्भक्तिदा कस्तां मथुरां नाऽऽश्रयेद्बुधः
etādṛśī madhupurī karttavyā mārgaśīrṣake ||
tadabhāve puṣkaraṃ hi kartavyaṃ vidhipūrvakam
||53||एतादृशी मधुपुरी कर्त्तव्या मार्गशीर्षके ॥
तदभावे पुष्करं हि कर्तव्यं विधिपूर्वकम्
jyeṣṭhaṃ hi brahmaṇaḥ kuṇḍaṃ madhyaṃ kuṇḍaṃ ca vaiṣṇavam ||
kaniṣṭhaṃ rudradaivatyamiti jānīhi buddhiman
||54||ज्येष्ठं हि ब्रह्मणः कुण्डं मध्यं कुण्डं च वैष्णवम् ॥
कनिष्ठं रुद्रदैवत्यमिति जानीहि बुद्धिमन्
eṣu snānaṃ ca dānaṃ ca śrāddhaṃ ca vidhipūrvakam ||
pūjā ca mahatī kāryā mama prītikarā suta
||55||एषु स्नानं च दानं च श्राद्धं च विधिपूर्वकम् ॥
पूजा च महती कार्या मम प्रीतिकरा सुत
pūrṇā yā tu bhavetputra sahomāse mama priyā ||
tasyāṃ yatkriyate puṇyaṃ mama prītikaraṃ bhavet
||56||पूर्णा या तु भवेत्पुत्र सहोमासे मम प्रिया ॥
तस्यां यत्क्रियते पुण्यं मम प्रीतिकरं भवेत्
godānamannadānaṃ ca hemadānaṃ ca putraka ||
dharādānaṃ ca kartavyaṃ pūrṇāyāṃ vidhipūrvakam
||57||गोदानमन्नदानं च हेमदानं च पुत्रक ॥
धरादानं च कर्तव्यं पूर्णायां विधिपूर्वकम्
sahomāse hi pūrṇāyāṃ sadmadānaṃ ca kārayet ||
yatkiṃcitkriyate pūrṇaṃ tadakṣayyaphalaṃ bhavet
||58||सहोमासे हि पूर्णायां सद्मदानं च कारयेत् ॥
यत्किंचित्क्रियते पूर्णं तदक्षय्यफलं भवेत्
brahmabhojyaṃ hi kartavyaṃ yathāvibhavasārataḥ ||
pūrṇāyāmeva kartavya utsavo vratapūrttaye
||59||ब्रह्मभोज्यं हि कर्तव्यं यथाविभवसारतः ॥
पूर्णायामेव कर्तव्य उत्सवो व्रतपूर्त्तये
yādṛśī mathurā putra sahomāse mama priyā ||
na tathā tīrtharājādyāstadabhāve ca puṣkaram
||60||यादृशी मथुरा पुत्र सहोमासे मम प्रिया ॥
न तथा तीर्थराजाद्यास्तदभावे च पुष्करम्
puṣkare mathurāyāṃ vai pūrṇā kāryā vicakṣaṇaiḥ ||
yatra kutrāpi vā kāryā vidhiyuktā ca pūrṇimā
||61||पुष्करे मथुरायां वै पूर्णा कार्या विचक्षणैः ॥
यत्र कुत्रापि वा कार्या विधियुक्ता च पूर्णिमा
snānaṃ dānaṃ tathā pūjāṃ pūrṇāyāṃ na karoti yaḥ ||
ṣaṣṭivarṣasahasrāṇi pacyate rauravādiṣu
||62||स्नानं दानं तथा पूजां पूर्णायां न करोति यः ॥
षष्टिवर्षसहस्राणि पच्यते रौरवादिषु
tasmātsarvaprayatnena mānyā pūrṇā vicakṣaṇaiḥ ||
mārgaśīrṣeṇa saṃyuktā anaṃtaphaladāyinī
||63||तस्मात्सर्वप्रयत्नेन मान्या पूर्णा विचक्षणैः ॥
मार्गशीर्षेण संयुक्ता अनंतफलदायिनी
yathā te kathitaṃ vatsa mārgaśīrṣaṃ mama priyam ||
karoti yo naro bhaktyā tasya puṇyaphalaṃ śṛṇu
||64||यथा ते कथितं वत्स मार्गशीर्षं मम प्रियम् ॥
करोति यो नरो भक्त्या तस्य पुण्यफलं शृणु
tīrthāyuteṣu yatpuṇyaṃ yatpuṇyaṃ vratakoṭibhiḥ ||
sarvayajñeṣu yatpuṇyaṃ tatpuṇyaṃ samavāpnuyāt
||65||तीर्थायुतेषु यत्पुण्यं यत्पुण्यं व्रतकोटिभिः ॥
सर्वयज्ञेषु यत्पुण्यं तत्पुण्यं समवाप्नुयात्
aputro labhate putraṃ nirdhano dhanameva ca ||
vidyārthī ca tathā vidyāṃ rūpārthī rūpamāpnuyāt
||66||अपुत्रो लभते पुत्रं निर्धनो धनमेव च ॥
विद्यार्थी च तथा विद्यां रूपार्थी रूपमाप्नुयात्
brāhmaṇo brahmavarcasvī kṣatriyo vijayī bhavet ||
vaiśyo nidhipatitvaṃ ca śūdraḥ śuddhyeta pātakāt
||67||ब्राह्मणो ब्रह्मवर्चस्वी क्षत्रियो विजयी भवेत् ॥
वैश्यो निधिपतित्वं च शूद्रः शुद्ध्येत पातकात्
yaddurlabhaṃ ca duṣprāpyaṃ triṣu lokeṣu mānada ||
tatsarvaṃ prāpnuyānmartyaḥ sahomāse na saṃśayaḥ
||68||यद्दुर्लभं च दुष्प्राप्यं त्रिषु लोकेषु मानद ॥
तत्सर्वं प्राप्नुयान्मर्त्यः सहोमासे न संशयः
yadyapyeteṣu kāmeṣu saktā ye mānavāḥ suta ||
tuṣṭā hyaṃte caturvaktra na kāmārhā mahābhuja
||69||यद्यप्येतेषु कामेषु सक्ता ये मानवाः सुत ॥
तुष्टा ह्यंते चतुर्वक्त्र न कामार्हा महाभुज
sudurlabhā hi sadbhaktirmama vaśyakarī śubhā ||
sā vai saṃprāpyate putra sahomāse śrute tathā
||70||सुदुर्लभा हि सद्भक्तिर्मम वश्यकरी शुभा ॥
सा वै संप्राप्यते पुत्र सहोमासे श्रुते तथा
mama prītikaraṃ māsaṃ sarvadā mama vallabham ||
sarvaṃ saṃprāpyate'muṣmānmatprasādāccaturmukha
||71||मम प्रीतिकरं मासं सर्वदा मम वल्लभम् ॥
सर्वं संप्राप्यतेऽमुष्मान्मत्प्रसादाच्चतुर्मुख
iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe brahmaviṣṇusaṃvāde mārgaśīrṣamāsamāhātmye mathurāmāhātmyavarṇanaṃnāma saptadaśo'dhyāyaḥ || 17 ||
iti śrīskāṃde mahāpurāṇe dvitīye vaiṣṇavakhaṇḍe paṃcamaṃ śrīmārgaśīrṣamāsamāhātmyaṃ saṃpūrṇam || ( 2-5) || śrīkṛṣṇārpaṇamastu