vyāsapūjanaprakāraḥ
śaunaka uvāca
ācāryyapūjanaṃ brūhi sūta vyāsaguro'dhunā |
granthasya śravaṇānte hi kiṃ kartavyaṃ tadapyaho
||1||आचार्य्यपूजनं ब्रूहि सूत व्यासगुरोऽधुना ।
ग्रन्थस्य श्रवणान्ते हि किं कर्तव्यं तदप्यहो
sūta uvāca
pūjayedvidhivadbhaktyācāryyaṃ śrutvā kathāṃ parām |
granthānte vidhivaddadyādācāryyāya prasannadhīḥ
||2||पूजयेद्विधिवद्भक्त्याचार्य्यं श्रुत्वा कथां पराम् ।
ग्रन्थान्ते विधिवद्दद्यादाचार्य्याय प्रसन्नधीः
tato vaktāramānamya saṃpūjya ca yathāvidhi |
bhūṣaṇairhastakarṇānāṃ vastraissaumyādibhissudhīḥ
||3||ततो वक्तारमानम्य संपूज्य च यथाविधि ।
भूषणैर्हस्तकर्णानां वस्त्रैस्सौम्यादिभिस्सुधीः
śivapūjāsamāptau tu dadyāddhenuṃ savatsikām |
kṛtvāsanaṃ suvarṇasya palamānasya sāmbaram
||4||शिवपूजासमाप्तौ तु दद्याद्धेनुं सवत्सिकाम् ।
कृत्वासनं सुवर्णस्य पलमानस्य साम्बरम्
tatrāsthāpya śubhaṃ graṃthaṃ likhitaṃ lalitākṣaraiḥ |
ācāryāya sudhīrdadyānmuktaḥ syādbhavabandhanaiḥ
||5||तत्रास्थाप्य शुभं ग्रंथं लिखितं ललिताक्षरैः ।
आचार्याय सुधीर्दद्यान्मुक्तः स्याद्भवबन्धनैः
grāmo gajo hayaścāpi yathāśaktyaparāṇi ca |
mune sarvāṇi deyāni vācakāya mahātmane
||6||ग्रामो गजो हयश्चापि यथाशक्त्यपराणि च ।
मुने सर्वाणि देयानि वाचकाय महात्मने
vidhānasahitaṃ samyakchataṃ hi saphalaṃ smṛtam |
purāṇaṃ śaunakamune satyamevoditaṃ mayā
||7||विधानसहितं सम्यक्छतं हि सफलं स्मृतम् ।
पुराणं शौनकमुने सत्यमेवोदितं मया
tasmādvidhānaduktaṃ tu śṛṇuyādbhaktito mune |
purāṇaṃ nigamārthāḍhyaṃ puṇyadaṃ hṛdayaṃ śruteḥ
||8||तस्माद्विधानदुक्तं तु शृणुयाद्भक्तितो मुने ।
पुराणं निगमार्थाढ्यं पुण्यदं हृदयं श्रुतेः
iti śrīśivamahāpurāṇe pañcamyāmumāsaṃhitātāyāṃ vyāsapūjanaprakāro nāma tricatvāriṃśo'dhyāyaḥ || 43 ||