gārhasthyaṃ bibhratī bharturekāmratalavāsinaḥ
naṃdikeśvara uvāca
gārhasthyaṃ bibhratī bharturekāmratalavāsinaḥ ||
pakvānnapānaissā tatra paryyatarpayata prajāḥ
||1||गार्हस्थ्यं बिभ्रती भर्तुरेकाम्रतलवासिनः ॥
पक्वान्नपानैस्सा तत्र पर्य्यतर्पयत प्रजाः
jātu saṃdhyānusaṃdhānamukulīkṛtalocanam ||
baddhāṃjalipuṭaṃ devamadrākṣīdadrinaṃdinī
||2||जातु संध्यानुसंधानमुकुलीकृतलोचनम् ॥
बद्धांजलिपुटं देवमद्राक्षीदद्रिनंदिनी
dhyāyate nūnamadhunā kāpi saubhāgyaśālinī ||
kriyate yanmayi prema tanmanye vacanaṃ mahat
||3||ध्यायते नूनमधुना कापि सौभाग्यशालिनी ॥
क्रियते यन्मयि प्रेम तन्मन्ये वचनं महत्
kathaṃ vijñāyate puṃsāṃ kuṭilā mānasī sthitiḥ ||
mithyopacārāddakṣeṇa vaṃcitāsmyamunā bhṛśam
||4||कथं विज्ञायते पुंसां कुटिला मानसी स्थितिः ॥
मिथ्योपचाराद्दक्षेण वंचितास्म्यमुना भृशम्
mayi dākṣiṇyamevāsya manye manasi cedrahaḥ ||
janaḥ saubhāgyavānyasmādbhavati snehabhājanam
||5||मयि दाक्षिण्यमेवास्य मन्ये मनसि चेद्रहः ॥
जनः सौभाग्यवान्यस्माद्भवति स्नेहभाजनम्
adyaprabhṛti te dāsastapobhiḥ krīta ityapi ||
mugdheṃduśekhareṇāsmi vipralabdhā smarāriṇā
||6||अद्यप्रभृति ते दासस्तपोभिः क्रीत इत्यपि ॥
मुग्धेंदुशेखरेणास्मि विप्रलब्धा स्मरारिणा
asamānānurāgeṣu nārīṇāṃ mūḍhacetasām ||
saubhāgyagarvo lokeṣu parihāsāya kevalam
||7||असमानानुरागेषु नारीणां मूढचेतसाम् ॥
सौभाग्यगर्वो लोकेषु परिहासाय केवलम्
iti praṇayaroṣeṇa devyāḥ kaluṣacetasaḥ ||
havyavāhātapālīḍhamivānanamalakṣyata
||8||इति प्रणयरोषेण देव्याः कलुषचेतसः ॥
हव्यवाहातपालीढमिवाननमलक्ष्यत
vāṣpavāriplave tasyā ātāmre ca vilocane ||
nīlotpale jalāpūrṇe iva bhūmnā virejatuḥ
||9||वाष्पवारिप्लवे तस्या आताम्रे च विलोचने ॥
नीलोत्पले जलापूर्णे इव भूम्ना विरेजतुः
yattasyādhīnatilakaṃ bhruvoryugamabhajyata ||
dvedhākṛtamivādarśi manmathasya śarāsanam
||10||यत्तस्याधीनतिलकं भ्रुवोर्युगमभज्यत ॥
द्वेधाकृतमिवादर्शि मन्मथस्य शरासनम्
aṃtarmanyubhareṇāsyāḥ kaṃpate smādharacchadaḥ ||
muhuḥ pravālasthāyīva raktāśokasya pallavaḥ
||11||अंतर्मन्युभरेणास्याः कंपते स्माधरच्छदः ॥
मुहुः प्रवालस्थायीव रक्ताशोकस्य पल्लवः
atīva rajyamāne tatpārvatyā gaṃḍamaṃḍalam ||
śāṇāvagharṣamāṇikyadarpaṇapratimaṃ babhau
||12||अतीव रज्यमाने तत्पार्वत्या गंडमंडलम् ॥
शाणावघर्षमाणिक्यदर्पणप्रतिमं बभौ
aṃtarvepadhutau tasyāścakaṃpāte payodharau ||
padmakośāvivāṃtaḥstha caṃcarīkapracālitau
||13||अंतर्वेपधुतौ तस्याश्चकंपाते पयोधरौ ॥
पद्मकोशाविवांतःस्थ चंचरीकप्रचालितौ
aciṃtayacca saṃbhūya saubhāgyābhāvato nanu ||
mamāyamanyastrīciṃtāṃ kurute caṃdrabhūṣaṇaḥ
||14||अचिंतयच्च संभूय सौभाग्याभावतो ननु ॥
ममायमन्यस्त्रीचिंतां कुरुते चंद्रभूषणः
tadaiṣā kvāpi yāsyāmi kimatrāstyekayā mama ||
tapasyate ca saubhāgyamarjanīyaṃ mayādhunā
||15||तदैषा क्वापि यास्यामि किमत्रास्त्येकया मम ॥
तपस्यते च सौभाग्यमर्जनीयं मयाधुना
nimīlitākṣiṇyevāsya gaṃtavyaṃ nibhṛtaṃ mayā ||
na cenmāṃ vārayatyeṣa kaṃṭhādupari bhāṣitaiḥ
||16||निमीलिताक्षिण्येवास्य गंतव्यं निभृतं मया ॥
न चेन्मां वारयत्येष कंठादुपरि भाषितैः
vatsau tu vardhayatyeva gaṃgeyamativatsalā ||
devastu na smaratyeva māmanyastrīparāyaṇaḥ
||17||वत्सौ तु वर्धयत्येव गंगेयमतिवत्सला ॥
देवस्तु न स्मरत्येव मामन्यस्त्रीपरायणः
iti niścitya devasya pārśvādāśu nivṛttya sā ||
anirdiśya diśaṃ kāṃcidyātuṃ vyagrā pracakrame
||18||इति निश्चित्य देवस्य पार्श्वादाशु निवृत्त्य सा ॥
अनिर्दिश्य दिशं कांचिद्यातुं व्यग्रा प्रचक्रमे
calāvatī mālyavatī mālinī vijayā jayā ||
vāritā api saṃraṃbhātsvāminīmanvayuḥ svayam
||19||चलावती माल्यवती मालिनी विजया जया ॥
वारिता अपि संरंभात्स्वामिनीमन्वयुः स्वयम्
tatra sāpi girīnpuṇyānvanāni nagarāṇi ca ||
sarāṃsi saritaścaiṣā vicacāra samaṃtataḥ
||20||तत्र सापि गिरीन्पुण्यान्वनानि नगराणि च ॥
सरांसि सरितश्चैषा विचचार समंततः
bhramaṃtī sahyapādeṣu drāviḍākhye sunīvṛti ||
tīrtvā śaktyāpagāṃ devī vijayāṃ samabhāṣata
||21||भ्रमंती सह्यपादेषु द्राविडाख्ये सुनीवृति ॥
तीर्त्वा शक्त्यापगां देवी विजयां समभाषत
dṛśyo'yaṃ nātidūreṇa purastātsakalāruṇaḥ ||
śṛṃgaissaṃlakṣyate'ṣṭābhirnūnaṃ māhātmyavāngiriḥ
||22||दृश्योऽयं नातिदूरेण पुरस्तात्सकलारुणः ॥
शृंगैस्संलक्ष्यतेऽष्टाभिर्नूनं माहात्म्यवान्गिरिः
upatyakāsu caitasya dṛśyaṃte tāpasāśramāḥ ||
atīva pāvanāḥ śāṃtāḥ puṇyāraṇyamanoharāḥ
||23||उपत्यकासु चैतस्य दृश्यंते तापसाश्रमाः ॥
अतीव पावनाः शांताः पुण्यारण्यमनोहराः
gatvā nirūpayāmastānimānpuṇyāśramānvayam ||
prasīdatitarāṃ ceta eṣāṃ saṃdarśanena me
||24||गत्वा निरूपयामस्तानिमान्पुण्याश्रमान्वयम् ॥
प्रसीदतितरां चेत एषां संदर्शनेन मे
evamāhrādayatyāli krameṇa girinaṃdinī ||
tasyādrerjagmuṣī pārśvamapaśyatkaṃcidāśramam
||25||एवमाह्रादयत्यालि क्रमेण गिरिनंदिनी ॥
तस्याद्रेर्जग्मुषी पार्श्वमपश्यत्कंचिदाश्रमम्
lūtāstaṃtūnnayaṃtyatra kumbhīrāḥ śaivalānyapi ||
śiśūnpuṣṇaṃti nīvāraiḥ sapharānbhūrimāyavaḥ
||26||लूतास्तंतून्नयंत्यत्र कुम्भीराः शैवलान्यपि ॥
शिशून्पुष्णंति नीवारैः सफरान्भूरिमायवः
haraṃtyavakarānvālaiścamarāḥ sphītaromabhiḥ ||
samīkurvaṃti codbhūtairviṣāṇairyatra sairibhāḥ
||27||हरंत्यवकरान्वालैश्चमराः स्फीतरोमभिः ॥
समीकुर्वंति चोद्भूतैर्विषाणैर्यत्र सैरिभाः
vānarāḥ phalapuṣpāṇi madhupatrāṇi bhallukāḥ ||
kroḍāḥ snānīyamṛtsnāṃ ca yatrarṣibhyo nayaṃtyaho
||28||वानराः फलपुष्पाणि मधुपत्राणि भल्लुकाः ॥
क्रोडाः स्नानीयमृत्स्नां च यत्रर्षिभ्यो नयंत्यहो
kākolūkaiḥ śukaśyenairmṛgavyāghrairharidvipaiḥ ||
kalāpisarpairyatrāsumārjāraiḥ sauhṛdaṃ śritam
||29||काकोलूकैः शुकश्येनैर्मृगव्याघ्रैर्हरिद्विपैः ॥
कलापिसर्पैर्यत्रासुमार्जारैः सौहृदं श्रितम्
hūyamānapurāḍāśadravyasaurabhyahāriṇī ||
yatra drumāṃtarālebhyo dhūmyā niryāti pāvanī
||30||हूयमानपुराडाशद्रव्यसौरभ्यहारिणी ॥
यत्र द्रुमांतरालेभ्यो धूम्या निर्याति पावनी
paṭhaṃti śatarudrīyaṃ yatra vāyasavairiṇaḥ ||
gṛṇaṃti kākāḥ stotrāṇi sāma gāyaṃti sārikāḥ
||31||पठंति शतरुद्रीयं यत्र वायसवैरिणः ॥
गृणंति काकाः स्तोत्राणि साम गायंति सारिकाः
śākaśāliṣu śārdūlāścaraṃti ca tathaiva gāḥ ||
siṃcaṃti puṣkarāṃbhobhiḥ kuṃbhinī yatra pādapān
||32||शाकशालिषु शार्दूलाश्चरंति च तथैव गाः ॥
सिंचंति पुष्करांभोभिः कुंभिनी यत्र पादपान्
kvacicca śobhane deśe puṇye puṇyamanohare ||
dadarśa sā tapasyantaṃ yaṃ kaṃciddṛṣisattamam
||33||क्वचिच्च शोभने देशे पुण्ये पुण्यमनोहरे ॥
ददर्श सा तपस्यन्तं यं कंचिद्दृषिसत्तमम्
adhastātsaptaparṇasya citravyāghratvagāsane ||
baddhavīrāsanaṃ samyakpāvane kuśaviṣṭare
||34||अधस्तात्सप्तपर्णस्य चित्रव्याघ्रत्वगासने ॥
बद्धवीरासनं सम्यक्पावने कुशविष्टरे
śāliśūkāruṇābhābhirjaṭābhirbhasmapāṃḍuram ||
acaṃcalābhirvidyudbhiriva śāradavāridam
||35||शालिशूकारुणाभाभिर्जटाभिर्भस्मपांडुरम् ॥
अचंचलाभिर्विद्युद्भिरिव शारदवारिदम्
nāsāgraniścaladṛśaṃ samaprasphuritādharam ||
āvarttayantaṃ rudrākṣamālikāmagrapāṇinā
||36||नासाग्रनिश्चलदृशं समप्रस्फुरिताधरम् ॥
आवर्त्तयन्तं रुद्राक्षमालिकामग्रपाणिना
pratyagranirṇejanato hyaṃtyaśyānadaśāṃcale ||
vasānaṃ valkalayuge saṃdhyābhre bhūbhṛtāṃ yathā
||37||प्रत्यग्रनिर्णेजनतो ह्यंत्यश्यानदशांचले ॥
वसानं वल्कलयुगे संध्याभ्रे भूभृतां यथा
ṣaḍvargahiṃsrabaṃdhāya sthāpitāṃ vāgurāmiva ||
upavītatrayīmārādurogartasya bibhratam ||
kṛtocitopacārā sā tamaprākṣīttapodhanam
||38||षड्वर्गहिंस्रबंधाय स्थापितां वागुरामिव ॥
उपवीतत्रयीमारादुरोगर्तस्य बिभ्रतम् ॥
कृतोचितोपचारा सा तमप्राक्षीत्तपोधनम्
pārvatyuvāca
kastvaṃ ko'yaṃ girivaro yatra tvaṃ kuruṣe tapaḥ
||39||कस्त्वं कोऽयं गिरिवरो यत्र त्वं कुरुषे तपः
sa cāhāruṇaśailo'yaṃ puṇyakṣetreṣu pūjitaḥ ||
gautamo'haṃ munirmuktyai tapasārādhaye śivam
||40||स चाहारुणशैलोऽयं पुण्यक्षेत्रेषु पूजितः ॥
गौतमोऽहं मुनिर्मुक्त्यै तपसाराधये शिवम्
ityuktvā vijayādīnāṃ mukhenaināmumāṃ vidan ||
praṇamya bhaktyā bahuśo nītavānuṭajaṃ nijam
||41||इत्युक्त्वा विजयादीनां मुखेनैनामुमां विदन् ॥
प्रणम्य भक्त्या बहुशो नीतवानुटजं निजम्
kandamūlaphalādyaiśca kṛtātithyāmimāṃ muniḥ ||
jaganmaṃgalamūlāya tapase cānvamanyata
||42||कन्दमूलफलाद्यैश्च कृतातिथ्यामिमां मुनिः ॥
जगन्मंगलमूलाय तपसे चान्वमन्यत
jyotiḥstambhasya saṃbhūtimārabhyānukrameṇa saḥ ||
jagāda cāsyai śoṇādrermahimānamaśeṣataḥ
||43||ज्योतिःस्तम्भस्य संभूतिमारभ्यानुक्रमेण सः ॥
जगाद चास्यै शोणाद्रेर्महिमानमशेषतः
śoṇādreḥ pūrvadigbhāge sthalīśvaramiti sthalam ||
yatra saṃnihitaḥ śaṃbhurjyotirliṃgātmatāṃ gataḥ
||44||शोणाद्रेः पूर्वदिग्भागे स्थलीश्वरमिति स्थलम् ॥
यत्र संनिहितः शंभुर्ज्योतिर्लिंगात्मतां गतः
vaikuṇṭhaparameṣṭhyādi gīrvāṇa nibiḍīkṛte ||
na tatra me tapaḥ kartumavyākṣepeṇa śakyate
||45||वैकुण्ठपरमेष्ठ्यादि गीर्वाण निबिडीकृते ॥
न तत्र मे तपः कर्तुमव्याक्षेपेण शक्यते
ayaṃ śoṇagireḥ pādaḥ pravālācalanāmavān ||
puṇyāraṇyoparuddhatvādrahasyatvaṃ vigāhate
||46||अयं शोणगिरेः पादः प्रवालाचलनामवान् ॥
पुण्यारण्योपरुद्धत्वाद्रहस्यत्वं विगाहते
tata evāhamatraiva pratiṣṭhāpya trilocanam ||
ārādhaye yathāśakti tapobhiḥ kalpitātmabhiḥ
||47||तत एवाहमत्रैव प्रतिष्ठाप्य त्रिलोचनम् ॥
आराधये यथाशक्ति तपोभिः कल्पितात्मभिः
mamāśramasamīpe'sminpuṇyakṣetramidaṃ mahat ||
kriyatāmāśramo devyā karttavyaṃ hi tapaściram
||48||ममाश्रमसमीपेऽस्मिन्पुण्यक्षेत्रमिदं महत् ॥
क्रियतामाश्रमो देव्या कर्त्तव्यं हि तपश्चिरम्
munerevamanujñānātkṛtāśramaparigrahā ||
udayuṃkta tapaḥ karttuṃ sumahatparvatātmajā
||49||मुनेरेवमनुज्ञानात्कृताश्रमपरिग्रहा ॥
उदयुंक्त तपः कर्त्तुं सुमहत्पर्वतात्मजा
āśramaṃ rakṣituṃ satyavatīṃ kānanavāsinīm ||
śubhagāṃ dhuṃdhumāriṃ ca prāgādyāśāsvatiṣṭhipat
||50||आश्रमं रक्षितुं सत्यवतीं काननवासिनीम् ॥
शुभगां धुंधुमारिं च प्रागाद्याशास्वतिष्ठिपत्
tapovanasya sarvasya rakṣārthaṃ sā samādiśat ||
durgāmanargalasphūrtimājñānirvāhaṇakṣamām
||51||तपोवनस्य सर्वस्य रक्षार्थं सा समादिशत् ॥
दुर्गामनर्गलस्फूर्तिमाज्ञानिर्वाहणक्षमाम्
anaṃtaraṃ sā dhammillaṃ maṃdāraprasavocitam ||
jaṭābharatvaṃ tapase gamayāmāsa pārvatī
||52||अनंतरं सा धम्मिल्लं मंदारप्रसवोचितम् ॥
जटाभरत्वं तपसे गमयामास पार्वती
haṃsacihnadaśaṃ hitvā dukūlaṃ mihakālaghu ||
paruṣaṃ sukumārāṃgī paridhattesma valkalam
||53||हंसचिह्नदशं हित्वा दुकूलं मिहकालघु ॥
परुषं सुकुमारांगी परिधत्तेस्म वल्कलम्
api prasūnāvacayanissahāṃgulipallavā ||
alāvīdatitīkṣṇāgrāṇyavikāraṃ kuśāni sā
||54||अपि प्रसूनावचयनिस्सहांगुलिपल्लवा ॥
अलावीदतितीक्ष्णाग्राण्यविकारं कुशानि सा
vajrasūcinirbharāṃgairavacchinnāni kaṃṭakaiḥ ||
śirīṣamṛdvī śāṃḍilyapallavānyuccikāya yā
||55||वज्रसूचिनिर्भरांगैरवच्छिन्नानि कंटकैः ॥
शिरीषमृद्वी शांडिल्यपल्लवान्युच्चिकाय या
pāvanyāṃ kamalānadyāṃ prātarvihitamajjanā ||
arcayāmāsa raktābjairyathāvidhi vibhākaram
||56||पावन्यां कमलानद्यां प्रातर्विहितमज्जना ॥
अर्चयामास रक्ताब्जैर्यथाविधि विभाकरम्
darbhākṣatatilonmiśrairgaurī śrīnadivāribhiḥ ||
devī nirvartayāmāsa devarṣipitṛtarpaṇam
||57||दर्भाक्षततिलोन्मिश्रैर्गौरी श्रीनदिवारिभिः ॥
देवी निर्वर्तयामास देवर्षिपितृतर्पणम्
vālukāmaṃḍale sūryamāvāhyābhyarcya paṃkajaiḥ ||
kṛtapradakṣiṇā gaurī praṇanāma sahasraśaḥ
||58||वालुकामंडले सूर्यमावाह्याभ्यर्च्य पंकजैः ॥
कृतप्रदक्षिणा गौरी प्रणनाम सहस्रशः
svayameva pratiṣṭhāpya liṃgaṃ kimapi śaṃkaram ||
āgamoktena vidhinā pūjayāmāsa pārvatī
||59||स्वयमेव प्रतिष्ठाप्य लिंगं किमपि शंकरम् ॥
आगमोक्तेन विधिना पूजयामास पार्वती
āsanena ca mūrtyā ca mūlenāṃgaiśca sā ravim ||
daṃḍipiṃgalamukhyāṃśca śaktīrdīptādikā api
||60||आसनेन च मूर्त्या च मूलेनांगैश्च सा रविम् ॥
दंडिपिंगलमुख्यांश्च शक्तीर्दीप्तादिका अपि
tattaddikṣu ca somādīngrahāndhenvādimudrayā ||
tejaścaṃḍe cārcayitvā nirmālyaṃ ca nyavedayat
||61||तत्तद्दिक्षु च सोमादीन्ग्रहान्धेन्वादिमुद्रया ॥
तेजश्चंडे चार्चयित्वा निर्माल्यं च न्यवेदयत्
argheṇātīva śuddhena saṃprokṣya ca samaṃtataḥ ||
dvāravāstu samabhyarcya nyāsānapi cakāra sā
||62||अर्घेणातीव शुद्धेन संप्रोक्ष्य च समंततः ॥
द्वारवास्तु समभ्यर्च्य न्यासानपि चकार सा
bhūtaśuddhiṃ vidhāyānvagaṃtaryāgaṃ cakāra sā ||
hṛdi padmāsane cārcya jñānadharmādikānkramāt
||63||भूतशुद्धिं विधायान्वगंतर्यागं चकार सा ॥
हृदि पद्मासने चार्च्य ज्ञानधर्मादिकान्क्रमात्
śaktīrdaleṣu vāmādīrdalāgre sūryavedhasau ||
kesarāgre somaviṣṇū karṇikāgre'gnidhūrjaṭī
||64||शक्तीर्दलेषु वामादीर्दलाग्रे सूर्यवेधसौ ॥
केसराग्रे सोमविष्णू कर्णिकाग्रेऽग्निधूर्जटी
tadūrdhve śakticakraṃ ca vinyastabrahmapaṃcakā ||
aṃgairdattvā ca pādyādīnupacaryābhiṣicya sā
||65||तदूर्ध्वे शक्तिचक्रं च विन्यस्तब्रह्मपंचका ॥
अंगैर्दत्त्वा च पाद्यादीनुपचर्याभिषिच्य सा
prādāccaṃdanapuṣpādi dhūpadīpapradāyinī ||
bhūyopi paṃcabrahmāṇi ṣaḍaṃgānyapyapūjayat
||66||प्रादाच्चंदनपुष्पादि धूपदीपप्रदायिनी ॥
भूयोपि पंचब्रह्माणि षडंगान्यप्यपूजयत्
tattaddikṣu ca śakrādīnvajrādīṃśca vidhānataḥ ||
kṛtvā sarvopacārāṃśca vitatārāṣṭapuṣpikām
||67||तत्तद्दिक्षु च शक्रादीन्वज्रादींश्च विधानतः ॥
कृत्वा सर्वोपचारांश्च वितताराष्टपुष्पिकाम्
paṃcavaktrāṇi cābhyarcya kṛtacaṃḍeśvarārcanā ||
pradakṣiṇā praṇāmādyairnityaṃ śivamapūjayat
||68||पंचवक्त्राणि चाभ्यर्च्य कृतचंडेश्वरार्चना ॥
प्रदक्षिणा प्रणामाद्यैर्नित्यं शिवमपूजयत्
śivāgamoktavidhinā dravyaiḥ saubhāgyadāyibhiḥ ||
sā juhāva ca pūjāṃte praṇīte jātavedasi
||69||शिवागमोक्तविधिना द्रव्यैः सौभाग्यदायिभिः ॥
सा जुहाव च पूजांते प्रणीते जातवेदसि
parikalpitopacārā ca kaṃdamūlaphalādikaiḥ ||
svayaṃ kṛtopacāreyamatithīnabhyapūjayat
||70||परिकल्पितोपचारा च कंदमूलफलादिकैः ॥
स्वयं कृतोपचारेयमतिथीनभ्यपूजयत्
aṃguṣṭhāgreṇa tiṣṭhaṃtī grīṣye paṃcāgnimadhyataḥ ||
hrade ca śiśire caṃdrapīyūṣāpyāyitā'bhavat
||71||अंगुष्ठाग्रेण तिष्ठंती ग्रीष्ये पंचाग्निमध्यतः ॥
ह्रदे च शिशिरे चंद्रपीयूषाप्यायिताऽभवत्
varṣarātrīṣu dhārābhiḥ saha vāridharā punaḥ ||
saudāminīva dadṛśe tamasi stimitā kṛtiḥ
||72||वर्षरात्रीषु धाराभिः सह वारिधरा पुनः ॥
सौदामिनीव ददृशे तमसि स्तिमिता कृतिः
pāṇipādena padmāni mukhena ca kalānidhim ||
pradarśayatyanāyāsānninye sā haimanīrniśāḥ
||73||पाणिपादेन पद्मानि मुखेन च कलानिधिम् ॥
प्रदर्शयत्यनायासान्निन्ये सा हैमनीर्निशाः
nīvārabījadānena sā mṛgānapyapoṣayat ||
ajñātahiṃsābhibhavānāśramopāṃtavartinaḥ
||74||नीवारबीजदानेन सा मृगानप्यपोषयत् ॥
अज्ञातहिंसाभिभवानाश्रमोपांतवर्तिनः
kṛtālavālasalilaiḥ suvālākalaśāhṛtaiḥ ||
vātsalyādvarddhayāmāsa pūrṇānāśramapādapān
||75||कृतालवालसलिलैः सुवालाकलशाहृतैः ॥
वात्सल्याद्वर्द्धयामास पूर्णानाश्रमपादपान्
pradakṣiṇāṃ kṛtavatī śoṇaśailaṃ girīṃdrajā ||
sā manorathasaṃsiddhyai nityaṃ saha sakhījanaiḥ
||76||प्रदक्षिणां कृतवती शोणशैलं गिरींद्रजा ॥
सा मनोरथसंसिद्ध्यै नित्यं सह सखीजनैः
paṃcākṣarī jajāpaiṣā śivastotrāṇyudairayat ||
dadhyau ca devaṃ manasā śoṇaparvatarūpiṇam
||77||पंचाक्षरी जजापैषा शिवस्तोत्राण्युदैरयत् ॥
दध्यौ च देवं मनसा शोणपर्वतरूपिणम्
anudinamaruṇācaleśvaraṃ sā praṇatavatī vihitapradakṣiṇādyaiḥ ||
śivanigamavidhānavedinī sā vyaracayadadrisutā ciraṃ tapasyām
||78||अनुदिनमरुणाचलेश्वरं सा प्रणतवती विहितप्रदक्षिणाद्यैः ॥
शिवनिगमविधानवेदिनी सा व्यरचयदद्रिसुता चिरं तपस्याम्
iti śrīskāṃde mahāpurāṇa ekāśītisāhasryāṃ sahitāyāṃ prathame māheśvarakhaṇḍe'ruṇācalamāhātmya uttarārdhe pārvatīkṛtāruṇācaleśvaraparicaraṇavarṇanaṃnāmā'ṣṭādaśo'dhyāyaḥ || 18 ||