kalādharakāṃtiśālivṛttāṃtavarṇanam
kalādhara uvāca
kāṃbojeṣu hayo bhūtvā kāṃtiśālī suhṛnmama ||
ayāsīdaupavāhyatvaṃ bhavato rājapuṃgava
||1||कांबोजेषु हयो भूत्वा कांतिशाली सुहृन्मम ॥
अयासीदौपवाह्यत्वं भवतो राजपुंगव
ahaṃ ca gaṃdhamṛgatāṃ gataḥ svāṃgaprasūtinā ||
sugaṃdhinā madenāsya saṃcāraṃ cācaraṃ gireḥ
||2||अहं च गंधमृगतां गतः स्वांगप्रसूतिना ॥
सुगंधिना मदेनास्य संचारं चाचरं गिरेः
dharmātmanmṛgayāvyājādāgatena tvayādhunā ||
āvāṃ śoṇādrināthasya prāpitau hi pradakṣiṇām
||3||धर्मात्मन्मृगयाव्याजादागतेन त्वयाधुना ॥
आवां शोणाद्रिनाथस्य प्रापितौ हि प्रदक्षिणाम्
vāhārohaṇadoṣeṇa tavāsīdīdṛśī daśā ||
pādapracārapuṇyena prāptaṃ nau prāktanaṃ padam
||4||वाहारोहणदोषेण तवासीदीदृशी दशा ॥
पादप्रचारपुण्येन प्राप्तं नौ प्राक्तनं पदम्
rājeṃdra tava saṃbaṃdhādasmāttiryaktvabaṃdhanāt ||
muktāvāvāṃ svakaṃ dhāma prāptau svastyastu te sadā
||5||राजेंद्र तव संबंधादस्मात्तिर्यक्त्वबंधनात् ॥
मुक्तावावां स्वकं धाम प्राप्तौ स्वस्त्यस्तु ते सदा
ityudīrya nijaṃ dhāma yiyāsaṃtaṃ kalādharam ||
kāṃtiśālinaṃ ca rājā jagāda racitāṃjaliḥ
||6||इत्युदीर्य निजं धाम यियासंतं कलाधरम् ॥
कांतिशालिनं च राजा जगाद रचितांजलिः
evaṃ yuvāṃ śoṇaśailaśaṃkarasya prabhāvataḥ ||
śāpārṇavaṃ samuttīrṇau kathaṃ me punarucchrayaḥ
||7||एवं युवां शोणशैलशंकरस्य प्रभावतः ॥
शापार्णवं समुत्तीर्णौ कथं मे पुनरुच्छ्रयः
bhrāmyatīva mama svāṃtamādhāya tadavekṣaṇam ||
niryāṃtīva mama prāṇāstatra daivaṃ balottaram
||8||भ्राम्यतीव मम स्वांतमाधाय तदवेक्षणम् ॥
निर्यांतीव मम प्राणास्तत्र दैवं बलोत्तरम्
kalādharakāṃtiśālināvūcatuḥ
avadhāraya nistāraṃ kathayāva tavāsyadam ||
samāhitena manasā nirdhūtanikhilādhinā
||9||अवधारय निस्तारं कथयाव तवास्यदम् ॥
समाहितेन मनसा निर्धूतनिखिलाधिना
jagatsargasthitidhvaṃsavidhānānugraheśvare ||
aruṇādrīśvare cittaṃ nidhehi karuṇānidhau
||10||जगत्सर्गस्थितिध्वंसविधानानुग्रहेश्वरे ॥
अरुणाद्रीश्वरे चित्तं निधेहि करुणानिधौ
pratyakṣitaṃ tvayedānīmasya devasya vaibhavam ||
tiraścorāvayoretadīdṛśatvaṃ vitanvataḥ
||11||प्रत्यक्षितं त्वयेदानीमस्य देवस्य वैभवम् ॥
तिरश्चोरावयोरेतदीदृशत्वं वितन्वतः
kuru pradakṣiṇāṃ pādacārī mṛgamadādṛtaiḥ ||
kalhāraiḥ pūjayeśānaṃ devaṃ mṛgamadapriyam
||12||कुरु प्रदक्षिणां पादचारी मृगमदादृतैः ॥
कल्हारैः पूजयेशानं देवं मृगमदप्रियम्
yāvatī tava saṃpattistāvatīmakhilāṃ vibho ||
prākāragopurāgāranavīkārāya kalpaya
||13||यावती तव संपत्तिस्तावतीमखिलां विभो ॥
प्राकारगोपुरागारनवीकाराय कल्पय
acirādeva siddhiste bhaviṣyati garīyasī ||
manumāṃdhātṛnābhāgabhagīrathavadādhikā
||14||अचिरादेव सिद्धिस्ते भविष्यति गरीयसी ॥
मनुमांधातृनाभागभगीरथवदाधिका
naṃdikeśvara uvāca
itthaṃ niśamya ca tayornijameva dhāma vidyābhṛtoḥ sapadi saṃśrutayornarendraḥ ||
niḥsaṃśayena manasā niratastadānīṃ bhaktiṃ babaṃdha bhagavatyaruṇādrināthe
||15||इत्थं निशम्य च तयोर्निजमेव धाम विद्याभृतोः सपदि संश्रुतयोर्नरेन्द्रः ॥
निःसंशयेन मनसा निरतस्तदानीं भक्तिं बबंध भगवत्यरुणाद्रिनाथे
iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe kalādharakāṃtiśālivṛttāṃtavarṇanaṃnāma trayoviṃśatitamo'dhyāyaḥ || 23 ||