śrīvarāhamaṃtrārādhanavidhyādivarṇanam
atha śrīvarāhamaṃtrārādhanavidhiḥ ||
śrīsūta uvāca ||
śṛṇudhvaṃ munayaḥ sarve kathāṃ puṇyāṃ purātanīm ||
vaivasvateṃ'tare pūrvaṃ kṛte puṇyatame yuge
||1||अथ श्रीवराहमंत्राराधनविधिः ॥
श्रीसूत उवाच ॥
शृणुध्वं मुनयः सर्वे कथां पुण्यां पुरातनीम् ॥
वैवस्वतेंऽतरे पूर्वं कृते पुण्यतमे युगे
nārāyaṇādrau deveśaṃ nivasantaṃ kṣamāpatim ||
varāharūpiṇaṃ devaṃ dharaṇī sakhibhirvṛtā
||2||नारायणाद्रौ देवेशं निवसन्तं क्षमापतिम् ॥
वराहरूपिणं देवं धरणी सखिभिर्वृता
praṇamya paripapraccha raktapadmāyatekṣaṇam
||3||प्रणम्य परिपप्रच्छ रक्तपद्मायतेक्षणम्
dharaṇyuvāca
ārādhyaḥ kena maṃtreṇa bhavānprīto bhaviṣyati ||
taṃ me vada tvaṃ deveśa yaḥ priyo bhavataḥ sadā
||4||आराध्यः केन मंत्रेण भवान्प्रीतो भविष्यति ॥
तं मे वद त्वं देवेश यः प्रियो भवतः सदा
japatāṃ sarvasaṃpattikārakaṃ putrapautradam ||
sārvabhaumatvadaṃ caiva kāmināṃ kāmadaṃ sadā
||5||जपतां सर्वसंपत्तिकारकं पुत्रपौत्रदम् ॥
सार्वभौमत्वदं चैव कामिनां कामदं सदा
ante yastvatpadaprāptiṃ dadāti niyamātmanām ||
evaṃbhūtaṃ vada prītyā mayi vārāha mānada
||6||अन्ते यस्त्वत्पदप्राप्तिं ददाति नियमात्मनाम् ॥
एवंभूतं वद प्रीत्या मयि वाराह मानद
śrīsūta uvāca
iti pṛṣṭastayā bhūmyā prāha prītismitānanaḥ
||7||इति पृष्टस्तया भूम्या प्राह प्रीतिस्मिताननः
śrīvarāha uvāca
śṛṇu devi paraṃ guhyaṃ sadyaḥ saṃpattikārakam ||
bhūmidaṃ putradaṃ gopyamaprakāśyaṃ kadācana
||8||शृणु देवि परं गुह्यं सद्यः संपत्तिकारकम् ॥
भूमिदं पुत्रदं गोप्यमप्रकाश्यं कदाचन
kiṃ ca śuśrūṣave vācyaṃ bhaktāya niyatātmane
||9||किं च शुश्रूषवे वाच्यं भक्ताय नियतात्मने
oṃ namaḥ śrīvarāhāya dharaṇyuddharaṇāya ca ||
vahnijāyāsamāyuktaḥ sadā japyo mumukṣubhiḥ
||10||ॐ नमः श्रीवराहाय धरण्युद्धरणाय च ॥
वह्निजायासमायुक्तः सदा जप्यो मुमुक्षुभिः
ayaṃ maṃtro dharādevi sarvasiddhipradāyakaḥ ||
ṛṣiḥ saṃkarṣaṇaḥ prokto devatā tvahameva hi
||11||अयं मंत्रो धरादेवि सर्वसिद्धिप्रदायकः ॥
ऋषिः संकर्षणः प्रोक्तो देवता त्वहमेव हि
chandaḥ paṃktiḥ samākhyātā śrībījaṃ samudāhṛtam ||
caturlakṣaṃ japenmaṃtraṃ sadgurorlabdhatanmanuḥ
||12||छन्दः पंक्तिः समाख्याता श्रीबीजं समुदाहृतम् ॥
चतुर्लक्षं जपेन्मंत्रं सद्गुरोर्लब्धतन्मनुः
juhuyātpāyasānnaṃ vai kṣaudrasarpiḥsamanvitam ||
atha dhyānaṃ pravakṣyāmi manaḥśuddhipradāyakam
||13||जुहुयात्पायसान्नं वै क्षौद्रसर्पिःसमन्वितम् ॥
अथ ध्यानं प्रवक्ष्यामि मनःशुद्धिप्रदायकम्
śuddhisphaṭikaśailābhaṃ raktapadmadalekṣaṇam ||
varāhavadanaṃ saumyaṃ caturbāhuṃ kirīṭinam
||14||शुद्धिस्फटिकशैलाभं रक्तपद्मदलेक्षणम् ॥
वराहवदनं सौम्यं चतुर्बाहुं किरीटिनम्
śrīvatsavakṣasaṃ cakraśaṃkhābhayakarāṃbujam ||
vāmorusthitayā yuktaṃ tvayā māṃ sāgarāṃbare
||15||श्रीवत्सवक्षसं चक्रशंखाभयकरांबुजम् ॥
वामोरुस्थितया युक्तं त्वया मां सागरांबरे
raktapītāṃbaradharaṃ raktābharaṇabhūṣitam ||
śrī kūrmapṛṣṭhamadhyasthaśeṣamūrtyabjasaṃsthitam
||16||रक्तपीतांबरधरं रक्ताभरणभूषितम् ॥
श्री कूर्मपृष्ठमध्यस्थशेषमूर्त्यब्जसंस्थितम्
evaṃ dhyātvā japenmaṃtraṃ sadā cāṣṭottaraṃ śatam ||
sarvānkāmānavāpnoti mokṣaṃ cānte vrajeddhruvam
||17||एवं ध्यात्वा जपेन्मंत्रं सदा चाष्टोत्तरं शतम् ॥
सर्वान्कामानवाप्नोति मोक्षं चान्ते व्रजेद्ध्रुवम्
proktaṃ mayā te dharaṇi yatpṛṣṭo'haṃ tvayā'male ||
ataḥ kiṃ te vyavasitaṃ brūhi tadvimalānane
||18||प्रोक्तं मया ते धरणि यत्पृष्टोऽहं त्वयाऽमले ॥
अतः किं ते व्यवसितं ब्रूहि तद्विमलानने
atha śrīvarāhamaṃtreṇa dharmādīnāṃ svābhīṣṭasiddhivarṇanam ||
śrīsūta uvāca ||
etacchrutvā tato bhūmiḥ papraccha punareva tam ||
kenaivānuṣṭhitaṃ deva purā prāptaṃ phalaṃ ca kim
||19||अथ श्रीवराहमंत्रेण धर्मादीनां स्वाभीष्टसिद्धिवर्णनम् ॥
श्रीसूत उवाच ॥
एतच्छ्रुत्वा ततो भूमिः पप्रच्छ पुनरेव तम् ॥
केनैवानुष्ठितं देव पुरा प्राप्तं फलं च किम्
iti pṛṣṭaḥ punardevaḥ śrīvarāho'bravīdidam ||
purā kṛtayuge devi dharmo nāma manurmahān
||20||इति पृष्टः पुनर्देवः श्रीवराहोऽब्रवीदिदम् ॥
पुरा कृतयुगे देवि धर्मो नाम मनुर्महान्
brahmaṇo'muṃ manuṃ labdhvā japtvāsmindharaṇīdhare ||
māṃ ca dṛṣṭvā varaṃ labdhvā prāpto'bhūnmāmakaṃ padam
||21||ब्रह्मणोऽमुं मनुं लब्ध्वा जप्त्वास्मिन्धरणीधरे ॥
मां च दृष्ट्वा वरं लब्ध्वा प्राप्तोऽभून्मामकं पदम्
iṃdro durvāsasaḥ śāpātpurā bhraṣṭastriviṣṭapāt ||
aneneṣṭvā'tra māṃ devi punaḥ prāptastriviṣṭapam
||22||इंद्रो दुर्वाससः शापात्पुरा भ्रष्टस्त्रिविष्टपात् ॥
अनेनेष्ट्वाऽत्र मां देवि पुनः प्राप्तस्त्रिविष्टपम्
anye'pi munayo bhūme japtvā prāptāḥ parāṃ gatim ||
anaṃtaḥ pannagādhīśo hyamuṃ labdhvātha kaśyapāt
||23||अन्येऽपि मुनयो भूमे जप्त्वा प्राप्ताः परां गतिम् ॥
अनंतः पन्नगाधीशो ह्यमुं लब्ध्वाथ कश्यपात्
śvetadvīpe japitvaiva babhūva dharaṇīdharaḥ ||
tasmājjapyaḥ sadā ceha manuṣyaiśca dharārthibhiḥ
||24||श्वेतद्वीपे जपित्वैव बभूव धरणीधरः ॥
तस्माज्जप्यः सदा चेह मनुष्यैश्च धरार्थिभिः
śrīsūta uvāca
etacchrutvātha suprītā punaḥ prāha dharādharam
||25||एतच्छ्रुत्वाथ सुप्रीता पुनः प्राह धराधरम्
dharaṇyuvāca
veṃkaṭākhye mahāśaile śrīnivāso jagatpatiḥ ||
kadā hyāyāti deveśaḥ śrībhūmisahito'malaḥ
||26||वेंकटाख्ये महाशैले श्रीनिवासो जगत्पतिः ॥
कदा ह्यायाति देवेशः श्रीभूमिसहितोऽमलः
kathaṃ kalpāntarasthāyī bhaviṣyati janārdanaḥ ||
etadbrūhi varāhātmanmahatkautahalaṃ mama
||27||कथं कल्पान्तरस्थायी भविष्यति जनार्दनः ॥
एतद्ब्रूहि वराहात्मन्महत्कौतहलं मम
iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāde śrīvarāhamaṃtrārādhanavidhyādivarṇanaṃnāma dvitīyo'dhyāyaḥ || 2 ||