suvarṇamukharīprabhāvapraśaṃsā
atha suvarṇamukharīṃ prati śakrādistutiḥ ||
bharadvāja uvāca ||
tadā divyavimānasthāḥ śakramukhyā divaukasaḥ ||
agastyamanuyāntīṃ tāmanujagmurmahāpagām
||1||अथ सुवर्णमुखरीं प्रति शक्रादिस्तुतिः ॥
भरद्वाज उवाच ॥
तदा दिव्यविमानस्थाः शक्रमुख्या दिवौकसः ॥
अगस्त्यमनुयान्तीं तामनुजग्मुर्महापगाम्
navāvatārāṃ tāṃ divyāṃ sarve ca munipuṃgavāḥ ||
kṛtāñjalipuṭāḥ stotrairanuyātāḥ siṣevire
||2||नवावतारां तां दिव्यां सर्वे च मुनिपुंगवाः ॥
कृताञ्जलिपुटाः स्तोत्रैरनुयाताः सिषेविरे
siddhacāraṇagandharvāḥ saṃbhṛtāśca sahasraśa ||
tāṃ nadīṃ taṃ munīndraṃ ca praśaśaṃsuḥ śubhaiḥstavaiḥ
||3||सिद्धचारणगन्धर्वाः संभृताश्च सहस्रश ॥
तां नदीं तं मुनीन्द्रं च प्रशशंसुः शुभैःस्तवैः
sudhopamānamamalaṃ diṣṭyā labdhamidaṃ jalam ||
ityautsukyarasāyattā nanandurdharaṇījanāḥ
||4||सुधोपमानममलं दिष्ट्या लब्धमिदं जलम् ॥
इत्यौत्सुक्यरसायत्ता ननन्दुर्धरणीजनाः
tadā nideśāddevasya padmayoneḥ samīraṇaḥ ||
śṛṇvatāṃ sarvadevānāmidaṃ vacanamabravīt
||5||तदा निदेशाद्देवस्य पद्मयोनेः समीरणः ॥
शृण्वतां सर्वदेवानामिदं वचनमब्रवीत्
atha vāyukathitasuvarṇamukharīnāmaniṣpattiḥ ||
vāyuruvāca ||
suvarṇamiva lokānāṃ bhāgadheyādiyaṃ nadī ||
nītā bhuvamagastyena mukharīkṛtadiṅmukhā
||6||अथ वायुकथितसुवर्णमुखरीनामनिष्पत्तिः ॥
वायुरुवाच ॥
सुवर्णमिव लोकानां भागधेयादियं नदी ॥
नीता भुवमगस्त्येन मुखरीकृतदिङ्मुखा
tasmādyāsyati vikhyātiṃ sarvalokābhinanditām ||
suvarṇamukharī nāmnā dhāmni kaivalyasaṃpadaḥ
||7||तस्माद्यास्यति विख्यातिं सर्वलोकाभिनन्दिताम् ॥
सुवर्णमुखरी नाम्ना धाम्नि कैवल्यसंपदः
eṣā suvarṇamukharī saritsu sakalāsvapi ||
viśiṣṭā sevanīyā ca brahmaṇo vacanaṃ tvidam
||8||एषा सुवर्णमुखरी सरित्सु सकलास्वपि ॥
विशिष्टा सेवनीया च ब्रह्मणो वचनं त्विदम्
athāgastyakṛtasvānītasuvarṇamukharīmahimānuvarṇanam ||
bharadvāja uvāca ||
śrutvetthaṃ pavanenoktaṃ vacanaṃ kumbhasambhavaḥ ||
tutoṣa vismayākrāntaḥ svāntaḥpulakitāṃgakaḥ
||9||अथागस्त्यकृतस्वानीतसुवर्णमुखरीमहिमानुवर्णनम् ॥
भरद्वाज उवाच ॥
श्रुत्वेत्थं पवनेनोक्तं वचनं कुम्भसम्भवः ॥
तुतोष विस्मयाक्रान्तः स्वान्तःपुलकितांगकः
evameṣā divyanadī snānapānādikalpanaiḥ ||
saukhyāvahā manuṣyāṇāṃ pratiṣṭhāmagamadbhuvi
||10||एवमेषा दिव्यनदी स्नानपानादिकल्पनैः ॥
सौख्यावहा मनुष्याणां प्रतिष्ठामगमद्भुवि
ājñayā padmagarbhasya taṭinyākāśavāhinī ||
suvarṇamukharīnāmnā punātyātmaikasaṃśrayān
||11||आज्ञया पद्मगर्भस्य तटिन्याकाशवाहिनी ॥
सुवर्णमुखरीनाम्ना पुनात्यात्मैकसंश्रयान्
bahūngirīndrānvanamaṇḍalaṃ ca deśānanekānsarariduttameyam ||
kramādatikramya niṣevyamāṇā mahānadībhirgirisaṃbhavābhiḥ
||12||बहून्गिरीन्द्रान्वनमण्डलं च देशाननेकान्सररिदुत्तमेयम् ॥
क्रमादतिक्रम्य निषेव्यमाणा महानदीभिर्गिरिसंभवाभिः
rogāhatānāmadhikāturāṇāmanāmayaikapratipādakāni ||
antarbahiḥ saṃbhṛtabhūritāpanivāraṇāni priyakāraṇāni
||13||रोगाहतानामधिकातुराणामनामयैकप्रतिपादकानि ॥
अन्तर्बहिः संभृतभूरितापनिवारणानि प्रियकारणानि
vihāraloladviradaprakāṇḍaśuṇḍāmahāghātarayotthitena ||
puṣpopahāraṃ pṛṣatotkareṇa harṣāddadātīva divākarasya
||14||विहारलोलद्विरदप्रकाण्डशुण्डामहाघातरयोत्थितेन ॥
पुष्पोपहारं पृषतोत्करेण हर्षाद्ददातीव दिवाकरस्य
saugaṃdhikāmbhoruhakairavāṇāṃ saurabhyasaṃvāsitadiṅmukhānām ||
dvirephabhāgyaikaniketanānāmādhārabhūtānpratinirmalāni
||15||सौगंधिकाम्भोरुहकैरवाणां सौरभ्यसंवासितदिङ्मुखानाम् ॥
द्विरेफभाग्यैकनिकेतनानामाधारभूतान्प्रतिनिर्मलानि
līlāvagāhotsukanākanārīsīmantasindūrarajo'ruṇāni ||
tatkeśapāśacyutapārijātaprasūnagandhairadhivāsitāni
||16||लीलावगाहोत्सुकनाकनारीसीमन्तसिन्दूररजोऽरुणानि ॥
तत्केशपाशच्युतपारिजातप्रसूनगन्धैरधिवासितानि
sā bibhratī saṃbhṛtamaṃgalāni svādūnyapaṃkānyatinirmalāni ||
sudhopamānāni surendrasūnoḥ payāṃsi pāpapratighātukāni
||17||सा बिभ्रती संभृतमंगलानि स्वादून्यपंकान्यतिनिर्मलानि ॥
सुधोपमानानि सुरेन्द्रसूनोः पयांसि पापप्रतिघातुकानि
agastyaśailātsamavāptajanmā nītā bhuvaṃ kumbhasamudbhavena ||
praśastatīrthaughavirājamānā samāyayau dakṣiṇavārirāśim
||18||अगस्त्यशैलात्समवाप्तजन्मा नीता भुवं कुम्भसमुद्भवेन ॥
प्रशस्ततीर्थौघविराजमाना समाययौ दक्षिणवारिराशिम्
śīkarākṣatavinyāsai ratnadīpārpaṇairapi ||
pratyudyayustāmambhodhervīcayo'bhimukhāgatāḥ
||19||शीकराक्षतविन्यासै रत्नदीपार्पणैरपि ॥
प्रत्युद्ययुस्तामम्भोधेर्वीचयोऽभिमुखागताः
taraṃgahastairāliṃgya saṃbhāvyaināṃ samāgatām ||
cakāra saritāṃ nāthaḥ priyamāghoṣabhāṣaṇaiḥ
||20||तरंगहस्तैरालिंग्य संभाव्यैनां समागताम् ॥
चकार सरितां नाथः प्रियमाघोषभाषणैः
prāptāyāmanukūlāyāṃ tadā tasyāmapāṃnidheḥ ||
prahṛṣṭena taraṃgeṇa jīvanaṃ vavṛdhetarām
||21||प्राप्तायामनुकूलायां तदा तस्यामपांनिधेः ॥
प्रहृष्टेन तरंगेण जीवनं ववृधेतराम्
itthaṃ saṃsṛjya saritamagastyastāmudanvatā ||
stutvā yayau samāmantrya kṛtakṛtyo yadṛcchayā
||22||इत्थं संसृज्य सरितमगस्त्यस्तामुदन्वता ॥
स्तुत्वा ययौ समामन्त्र्य कृतकृत्यो यदृच्छया
arjuna uvāca
tvayaiṣa kathito brahmanmahānadyāḥ samudbhavaḥ ||
asyāḥ prabhāvaṃ bhagavannidānīṃ śrotumutsahe
||23||त्वयैष कथितो ब्रह्मन्महानद्याः समुद्भवः ॥
अस्याः प्रभावं भगवन्निदानीं श्रोतुमुत्सहे
atha bharadvājavarṇitasuvarṇamukharīmāhātmyam ||
bharadvāja uvāca ||
aho nivarhaṇaṃ sarvaśreyasāmekakāraṇam ||
śṛṇu māhātmyamasyāste kathayiṣyāmi pāṇḍava
||24||अथ भरद्वाजवर्णितसुवर्णमुखरीमाहात्म्यम् ॥
भरद्वाज उवाच ॥
अहो निवर्हणं सर्वश्रेयसामेककारणम् ॥
शृणु माहात्म्यमस्यास्ते कथयिष्यामि पाण्डव
pāścāttyaṃ janma saṃprāpya jñānināṃ karmaṇaḥ kṣaye ||
suvarṇamukharīsnānaṃ siddhyedbrahmatvakāraṇam
||25||पाश्चात्त्यं जन्म संप्राप्य ज्ञानिनां कर्मणः क्षये ॥
सुवर्णमुखरीस्नानं सिद्ध्येद्ब्रह्मत्वकारणम्
etāṃ suvarṇamukharīṃ yojanānāṃ śatairapi ||
smṛtvā manuṣyaḥ pāpebhyo mucyate nātra saṃśayaḥ
||26||एतां सुवर्णमुखरीं योजनानां शतैरपि ॥
स्मृत्वा मनुष्यः पापेभ्यो मुच्यते नात्र संशयः
niḥkṣiptamasthi jantūnāṃ suvarṇamukharījale ||
sopānatāṃ samāyāti brahmalokādhirohaṇe
||27||निःक्षिप्तमस्थि जन्तूनां सुवर्णमुखरीजले ॥
सोपानतां समायाति ब्रह्मलोकाधिरोहणे
smarantaḥ svarṇamukharīṃ yatra kutrāpi mānavāḥ ||
toyāntareṣu snātvāpi labhante phalamuttamam
||28||स्मरन्तः स्वर्णमुखरीं यत्र कुत्रापि मानवाः ॥
तोयान्तरेषु स्नात्वापि लभन्ते फलमुत्तमम्
tāvadevābhibhūyante narāḥ pātakakoṭibhiḥ ||
suvarṇamukharīsnānaṃ yāvattallabhyate śubham
||29||तावदेवाभिभूयन्ते नराः पातककोटिभिः ॥
सुवर्णमुखरीस्नानं यावत्तल्लभ्यते शुभम्
divyāntarikṣabhaumāni tīrthāni nijasiddhaye ||
smarantyaharahaḥ prātaḥ suvarṇamukharīṃ nadīm
||30||दिव्यान्तरिक्षभौमानि तीर्थानि निजसिद्धये ॥
स्मरन्त्यहरहः प्रातः सुवर्णमुखरीं नदीम्
agastyācalasaṃbhūtā dakṣiṇodadhigāminī ||
pāpāni svarṇamukharī smaraṇādeva nāśayet
||31||अगस्त्याचलसंभूता दक्षिणोदधिगामिनी ॥
पापानि स्वर्णमुखरी स्मरणादेव नाशयेत्
suvarṇamukharīsnānalolupenāntarātmanā ||
vāñchaṃti martyatāmeva devāḥ śakrapurogamāḥ
||32||सुवर्णमुखरीस्नानलोलुपेनान्तरात्मना ॥
वाञ्छंति मर्त्यतामेव देवाः शक्रपुरोगमाः
suvarṇamukharītoyapuṣṭasasyānnabhojinaḥ ||
na lipyante mahāpāpairdurbhojanaśatodbhavaiḥ
||43||सुवर्णमुखरीतोयपुष्टसस्यान्नभोजिनः ॥
न लिप्यन्ते महापापैर्दुर्भोजनशतोद्भवैः
api niṣkamitaṃ pītaṃ suvarṇamukharījalam ||
nāśayedadritulyāni hyāśu pāpāni dehinām
||34||अपि निष्कमितं पीतं सुवर्णमुखरीजलम् ॥
नाशयेदद्रितुल्यानि ह्याशु पापानि देहिनाम्
prāpyā'pi mānuṣaṃ janma suvaṇamukharījale ||
ye vā snānaṃ na kurvanti teṣāṃ janma nirarthakam
||35||प्राप्याऽपि मानुषं जन्म सुवणमुखरीजले ॥
ये वा स्नानं न कुर्वन्ति तेषां जन्म निरर्थकम्
suvarṇamukharīsnānaṃ yadekaṃ vidhinā kṛtam ||
jāhnavīsnānakoṭīnāṃ samaṃ bhavati parvasu
||36||सुवर्णमुखरीस्नानं यदेकं विधिना कृतम् ॥
जाह्नवीस्नानकोटीनां समं भवति पर्वसु
goviṃda iva deveṣu nakṣatreṣviva candramāḥ ||
nareṣviva mahīpālo bhūruheṣviva kalpakaḥ
||37||गोविंद इव देवेषु नक्षत्रेष्विव चन्द्रमाः ॥
नरेष्विव महीपालो भूरुहेष्विव कल्पकः
mahābhūteṣviva viyanmāyevākhilaśaktiṣu ||
gāyatrīva ca mantreṣu vajraṃ devāyudheṣviva
||38||महाभूतेष्विव वियन्मायेवाखिलशक्तिषु ॥
गायत्रीव च मन्त्रेषु वज्रं देवायुधेष्विव
tattveṣvivātmanastattvaṃ rudrādhyāyo yajuṣṣviva ||
ananta iva nāgeṣu himācala ivādriṣu
||39||तत्त्वेष्विवात्मनस्तत्त्वं रुद्राध्यायो यजुष्ष्विव ॥
अनन्त इव नागेषु हिमाचल इवाद्रिषु
potrikṣetramiva kṣetreṣvindriyeṣviva mānasam ||
nadīṣvapi ca sarvāsu suvarṇamukharī varā
||40||पोत्रिक्षेत्रमिव क्षेत्रेष्विन्द्रियेष्विव मानसम् ॥
नदीष्वपि च सर्वासु सुवर्णमुखरी वरा
nityaṃ smarennamaskuryātkīrtayenmanasārcayet ||
śuddhikṣema śivāpekṣī suvarṇamukharīṃ śubhām
||41||नित्यं स्मरेन्नमस्कुर्यात्कीर्तयेन्मनसार्चयेत् ॥
शुद्धिक्षेम शिवापेक्षी सुवर्णमुखरीं शुभाम्
agastyācalasaṃbhūtāṃ dakṣiṇodadhigāminīm ||
samastapāpahantrīṃ tvāṃ suvarṇamukharīṃ śraye
||42||अगस्त्याचलसंभूतां दक्षिणोदधिगामिनीम् ॥
समस्तपापहन्त्रीं त्वां सुवर्णमुखरीं श्रये
mahāpātakavipluṣṭaṃ gātraṃ mama tavodakaiḥ ||
kṣālayāmi jagaddhātri śreyasā yojayasva mām
||43||महापातकविप्लुष्टं गात्रं मम तवोदकैः ॥
क्षालयामि जगद्धात्रि श्रेयसा योजयस्व माम्
iti sūktadvayaṃ samyaguccārya niyato naraḥ ||
suvarṇamukharītoye snātvā śuddhaḥ pramodate
||44||इति सूक्तद्वयं सम्यगुच्चार्य नियतो नरः ॥
सुवर्णमुखरीतोये स्नात्वा शुद्धः प्रमोदते
brahmaṇā nirmitā pūrvamagastyena samāhṛtā ||
svayaṃ mandākinī mūrtā suvarṇamukharī varā
||45||ब्रह्मणा निर्मिता पूर्वमगस्त्येन समाहृता ॥
स्वयं मन्दाकिनी मूर्ता सुवर्णमुखरी वरा
evaṃprabhāvā divyeyaṃ kīrtanīyā śubhārthibhiḥ ||
manasā bhaktiyuktena snātavyā śubhakāṃkṣibhiḥ
||46||एवंप्रभावा दिव्येयं कीर्तनीया शुभार्थिभिः ॥
मनसा भक्तियुक्तेन स्नातव्या शुभकांक्षिभिः
somasūryoparāgeṣu snānadānādikaṃ kṛtam ||
syādameyaphalaṃ pārtha suvarṇamukharītaṭe
||47||सोमसूर्योपरागेषु स्नानदानादिकं कृतम् ॥
स्यादमेयफलं पार्थ सुवर्णमुखरीतटे
saṃkrāntāvayane puṇye vyatīpāte'tha vāsare ||
suvarṇamukharīsnānaṃ kulakoṭiṃ samuddharet
||48||संक्रान्तावयने पुण्ये व्यतीपातेऽथ वासरे ॥
सुवर्णमुखरीस्नानं कुलकोटिं समुद्धरेत्
janmarkṣe janmadivase suvarṇamukharījale ||
snātvā vidhivadāpnoti kṣemārogyasukhaśriyaḥ
||49||जन्मर्क्षे जन्मदिवसे सुवर्णमुखरीजले ॥
स्नात्वा विधिवदाप्नोति क्षेमारोग्यसुखश्रियः
duḥsvapnavighnajaṃ bhūtagrahaduḥsthānajaṃ tathā ||
suvarṇamukharītoye snātvā tarati kilbiṣam
||50||दुःस्वप्नविघ्नजं भूतग्रहदुःस्थानजं तथा ॥
सुवर्णमुखरीतोये स्नात्वा तरति किल्बिषम्
suvarṇamukharītīre gopādapramitāṃ bhuvam ||
dattvā sarvamahīdānādyatphalaṃ tadavāpnuyāt
||51||सुवर्णमुखरीतीरे गोपादप्रमितां भुवम् ॥
दत्त्वा सर्वमहीदानाद्यत्फलं तदवाप्नुयात्
dhenuṃ savastrālaṃkārāṃ suvarṇamukharītaṭe ||
dattvā viprāya vidhivadyāti brahma sanātanam
||52||धेनुं सवस्त्रालंकारां सुवर्णमुखरीतटे ॥
दत्त्वा विप्राय विधिवद्याति ब्रह्म सनातनम्
puṇyakāleṣu dānāni vidheyānyakhilānyapi ||
ihāmutra phalaprāptyai suvarṇamukharītaṭe
||53||पुण्यकालेषु दानानि विधेयान्यखिलान्यपि ॥
इहामुत्र फलप्राप्त्यै सुवर्णमुखरीतटे
japo homastapo dānaṃ pitṛkarma surārcanam ||
kṛtaṃ bhavecchataguṇaṃ suvarṇamukharītaṭe
||54||जपो होमस्तपो दानं पितृकर्म सुरार्चनम् ॥
कृतं भवेच्छतगुणं सुवर्णमुखरीतटे
anyatte kathayiṣyāmi vidheyaṃ vratamuttamam ||
suvarṇamukharītīre prativarṣaṃ sukhārthibhiḥ
||55||अन्यत्ते कथयिष्यामि विधेयं व्रतमुत्तमम् ॥
सुवर्णमुखरीतीरे प्रतिवर्षं सुखार्थिभिः
meghakāle ravikaraistirodhānamupāgataḥ ||
yadodeti muniḥ śrīmānmitrāvaruṇanandanaḥ
||56||मेघकाले रविकरैस्तिरोधानमुपागतः ॥
यदोदेति मुनिः श्रीमान्मित्रावरुणनन्दनः
tasmindine ye niyatāḥ snānamasyāṃ prakurvate ||
taiḥ kalpaṃ ca surāvāse sthīyate kurunandana
||57||तस्मिन्दिने ये नियताः स्नानमस्यां प्रकुर्वते ॥
तैः कल्पं च सुरावासे स्थीयते कुरुनन्दन
tadāgastyasya yadrūpaṃ suvarṇena vinirmitam ||
vidhinā dadate pārtha te yāṃti brahma śāśvatam
||58||तदागस्त्यस्य यद्रूपं सुवर्णेन विनिर्मितम् ॥
विधिना ददते पार्थ ते यांति ब्रह्म शाश्वतम्
arjuna uvāca
vidhinā kena kartavyaṃ vratametanmahāmune ||
tanmamācakṣva sakalaṃ jijñāsostu mahātmanaḥ
||59||विधिना केन कर्तव्यं व्रतमेतन्महामुने ॥
तन्ममाचक्ष्व सकलं जिज्ञासोस्तु महात्मनः
athāgastyapratimādānavidhiḥ ||
bharadvāja uvāca ||
agastyasyodayadinaṃ jñātvā niyatamānasaḥ ||
svaśaktyā kārayedrūpaṃ tasya hemnā mahāmuneḥ
||60||अथागस्त्यप्रतिमादानविधिः ॥
भरद्वाज उवाच ॥
अगस्त्यस्योदयदिनं ज्ञात्वा नियतमानसः ॥
स्वशक्त्या कारयेद्रूपं तस्य हेम्ना महामुनेः
suvarṇabhāsvaracchāyaṃ jaṭābandhamanoharam ||
dadhānaṃ karapadmābhyāmakṣamālāṃ kamaṇḍalum
||61||सुवर्णभास्वरच्छायं जटाबन्धमनोहरम् ॥
दधानं करपद्माभ्यामक्षमालां कमण्डलुम्
vasānaṃ mṛdulaṃ valkaṃ mṛgacarmottarīyakam ||
saumyaṃ bhasmāṃkaruciraṃ rudrākṣakṛtabhūṣaṇam
||62||वसानं मृदुलं वल्कं मृगचर्मोत्तरीयकम् ॥
सौम्यं भस्मांकरुचिरं रुद्राक्षकृतभूषणम्
evaṃ vidhāya tadrūpaṃ snātvā niyatamānasaḥ ||
ācāryaṃ gandhapuṣpādyairalaṅkṛtya yathāvidhi
||63||एवं विधाय तद्रूपं स्नात्वा नियतमानसः ॥
आचार्यं गन्धपुष्पाद्यैरलङ्कृत्य यथाविधि
śāleyataṇḍulānāṃ tāmāḍhakasyopari sthitām ||
vastradvayasamāyuktāṃ pratimāṃ pratipūjayet
||64||शालेयतण्डुलानां तामाढकस्योपरि स्थिताम् ॥
वस्त्रद्वयसमायुक्तां प्रतिमां प्रतिपूजयेत्
vindhyasaṃstambhano vārdhiculakīkṛtipeśalaḥ ||
brahmādisarvadevānāṃ tejasā suprakāśitaḥ
||65||विन्ध्यसंस्तम्भनो वार्धिचुलकीकृतिपेशलः ॥
ब्रह्मादिसर्वदेवानां तेजसा सुप्रकाशितः
agastyaḥ kumbhasaṃbhūto devāsuranamaskṛtaḥ ||
prītimāpnotu mahatīṃ dānenānena me prabhuḥ
||66||अगस्त्यः कुम्भसंभूतो देवासुरनमस्कृतः ॥
प्रीतिमाप्नोतु महतीं दानेनानेन मे प्रभुः
imaṃ mantraṃ samuccārya dhārāpūrvaṃ sadakṣiṇam ||
dattvā vimuktaḥ pāpebhyo yāti brahma sanātanam
||67||इमं मन्त्रं समुच्चार्य धारापूर्वं सदक्षिणम् ॥
दत्त्वा विमुक्तः पापेभ्यो याति ब्रह्म सनातनम्
janmāntarakṛtairnūnamiha janmakṛtairapi ||
mahāpāpopapāpaughairmucyate nātra saṃśayaḥ
||68||जन्मान्तरकृतैर्नूनमिह जन्मकृतैरपि ॥
महापापोपपापौघैर्मुच्यते नात्र संशयः
brahmādyāḥ sakalā devāḥ sanakādyā maharṣayaḥ ||
carācarāṇi bhūtāni prītiṃ yāṃti na saṃśayaḥ
||69||ब्रह्माद्याः सकला देवाः सनकाद्या महर्षयः ॥
चराचराणि भूतानि प्रीतिं यांति न संशयः
kṛtvā vratamidaṃ puṇyamagastyasya ca sanmuneḥ ||
prītyarthaṃ bhojayedviprānyathāśakti sadakṣiṇam
||70||कृत्वा व्रतमिदं पुण्यमगस्त्यस्य च सन्मुनेः ॥
प्रीत्यर्थं भोजयेद्विप्रान्यथाशक्ति सदक्षिणम्
tasminkarmaṇi cāśakto yathāśakti mahīsurān ||
svarṇadhānyādidānena toṣayedbhaktisaṃyutaḥ
||71||तस्मिन्कर्मणि चाशक्तो यथाशक्ति महीसुरान् ॥
स्वर्णधान्यादिदानेन तोषयेद्भक्तिसंयुतः
tithiṃ na vitathīkuryāttāṃ yatnena samācaret ||
yatkiñcidapi cāvaśyaṃ karma kuryācca pūruṣaḥ
||72||तिथिं न वितथीकुर्यात्तां यत्नेन समाचरेत् ॥
यत्किञ्चिदपि चावश्यं कर्म कुर्याच्च पूरुषः
mahāmuneragastyasya paripakvaṃ tapaḥphalam ||
nadī suvarṇamukharī kīrtanīyā surāsuraiḥ
||73||महामुनेरगस्त्यस्य परिपक्वं तपःफलम् ॥
नदी सुवर्णमुखरी कीर्तनीया सुरासुरैः
evaṃ te kathitaḥ samyaṅmahānadyāḥ samudbhavaḥ ||
prabhāvaśca tadācakṣva yadbhūyaḥ śrotumicchasi
||74||एवं ते कथितः सम्यङ्महानद्याः समुद्भवः ॥
प्रभावश्च तदाचक्ष्व यद्भूयः श्रोतुमिच्छसि
iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe veṃkaṭācalamāhātmye suvarṇamukharīprabhāvapraśaṃsānāma trayastriṃśo'dhyāyaḥ || 33 ||