ityukte nāradaḥ so'tha yathāśāstraṃ vicārya vai
jaiminiruvāca
ityukte nāradaḥ so'tha yathāśāstraṃ vicārya vai ||
ālekhya kramaśaḥ patre rājñe tasmai nyavedayat
||1||इत्युक्ते नारदः सोऽथ यथाशास्त्रं विचार्य वै ॥
आलेख्य क्रमशः पत्रे राज्ञे तस्मै न्यवेदयत्
rājāpi patraṃ tacchutvā so'vadhārya punaḥpunaḥ ||
pradadau padmanidhaye likhitānyatra yāni vai
||2||राजापि पत्रं तच्छुत्वा सोऽवधार्य पुनःपुनः ॥
प्रददौ पद्मनिधये लिखितान्यत्र यानि वै
saṃpādaya padmanidhe śālāṃ svarṇamayīṃ kuru ||
brahmaṇaḥ sadanaṃ divyaṃ brahmarṣīṇāṃ ca nirmalam
||3||संपादय पद्मनिधे शालां स्वर्णमयीं कुरु ॥
ब्रह्मणः सदनं दिव्यं ब्रह्मर्षीणां च निर्मलम्
iṃdrādīnāṃ surāṇāṃ ca siddhānāṃ martyavāsinām ||
munīṃdrāṇāṃ nivāsāya rājñāṃ pātālavāsinām
||4||इंद्रादीनां सुराणां च सिद्धानां मर्त्यवासिनाम् ॥
मुनींद्राणां निवासाय राज्ञां पातालवासिनाम्
tathā ca nāgarājānāṃ nidhe trailokyavāsinām ||
yathāyogyāsanairyuktaṃ gṛhaṃ gṛhamataṃdritaḥ
||5||तथा च नागराजानां निधे त्रैलोक्यवासिनाम् ॥
यथायोग्यासनैर्युक्तं गृहं गृहमतंद्रितः
kārayāśu nidhe dravyasaṃbhāraṃ yāvadeva tu ||
viśvakarmāpi ca tava sāhāyyaṃ racayiṣyati
||6||कारयाशु निधे द्रव्यसंभारं यावदेव तु ॥
विश्वकर्मापि च तव साहाय्यं रचयिष्यति
ityādiśaṃtaṃ sa muniriṃdradyumnamuvāca vai ||
saṃbhārānpṛthagetaddhi karttavyaṃ vyavadhānataḥ
||7||इत्यादिशंतं स मुनिरिंद्रद्युम्नमुवाच वै ॥
संभारान्पृथगेतद्धि कर्त्तव्यं व्यवधानतः
svarṇaiḥ sughaṭitaṃ sādhurathatrayamalaṃkṛtam ||
dukūlaratnamālādyairbahumūlyairdṛḍhaṃ mahat
||8||स्वर्णैः सुघटितं साधुरथत्रयमलंकृतम् ॥
दुकूलरत्नमालाद्यैर्बहुमूल्यैर्दृढं महत्
śrīvāsudevasya ratho garuḍadhvajacihnitaḥ ||
padmadhvajaḥ subhadrāyā rathamūrddhani dhāryatām
||9||श्रीवासुदेवस्य रथो गरुडध्वजचिह्नितः ॥
पद्मध्वजः सुभद्राया रथमूर्द्धनि धार्यताम्
rathaḥ ṣoḍaśacakrastu viṣṇoḥ kāryaḥ prayatnataḥ ||
caturdaśa balasyaiva subhadrāyāstu dvādaśa
||10||रथः षोडशचक्रस्तु विष्णोः कार्यः प्रयत्नतः ॥
चतुर्दश बलस्यैव सुभद्रायास्तु द्वादश
hastaṣoḍaśavistāro rathaścakradharasya tu ||
caturdaśa balasyaiva subhadrāyāstu dvādaśa
||11||हस्तषोडशविस्तारो रथश्चक्रधरस्य तु ॥
चतुर्दश बलस्यैव सुभद्रायास्तु द्वादश
āsanaṃ jagatāṃ bhūyaḥ svayaṃ svāsanavigrahaḥ ||
tadyāne jagatāṃ nāśastato yānaṃ na vidyate
||12||आसनं जगतां भूयः स्वयं स्वासनविग्रहः ॥
तद्याने जगतां नाशस्ततो यानं न विद्यते
paśyeccarācaraṃ viśvaṃ jñānādaśa(tha?) sunirmale ||
sthito hastatale nityaṃ nirmalastasya darpaṇaḥ
||13||पश्येच्चराचरं विश्वं ज्ञानादश(थ?) सुनिर्मले ॥
स्थितो हस्ततले नित्यं निर्मलस्तस्य दर्पणः
talasthatvādasau tālaḥ sadā tenāṃkitaḥ prabhuḥ ||
tataḥ sa eva śeṣasya balabhadrāvatāriṇaḥ
||14||तलस्थत्वादसौ तालः सदा तेनांकितः प्रभुः ॥
ततः स एव शेषस्य बलभद्रावतारिणः
athavā sīriṇaḥ kāryaṃ sīrameva dhvajottamam ||
dhvajaḥ sunirmalaḥ kāryastasmāttāladhvajo mataḥ
||15||अथवा सीरिणः कार्यं सीरमेव ध्वजोत्तमम् ॥
ध्वजः सुनिर्मलः कार्यस्तस्मात्तालध्वजो मतः
na vāsitavyo devo'sāvapratiṣṭhe rathe nṛpa ||
prāsāde maṃḍape vāpi pure tanniṣphalaṃ bhavet
||16||न वासितव्यो देवोऽसावप्रतिष्ठे रथे नृप ॥
प्रासादे मंडपे वापि पुरे तन्निष्फलं भवेत्
tasmātpratiṣṭhā prathamaṃ hareḥ kāryā rathasya vai ||
saṃbhāraḥ kriyatāṃ tasya hyanuṣṭheyā mayā tu sā
||17||तस्मात्प्रतिष्ठा प्रथमं हरेः कार्या रथस्य वै ॥
संभारः क्रियतां तस्य ह्यनुष्ठेया मया तु सा
ityājñāṃ matpiturlabdhvā śīghramāyāmyahaṃ nṛpa ||
tasya tadvacanaṃ śrutvā ghaṭitaṃ syaṃdanatrayam
||18||इत्याज्ञां मत्पितुर्लब्ध्वा शीघ्रमायाम्यहं नृप ॥
तस्य तद्वचनं श्रुत्वा घटितं स्यंदनत्रयम्
nidhisaṃpāditairdravyairekāhnādviśvakarmaṇā ||
svakṣaṃ sucakraṃ sustaṃbhaṃ suvistīrṇaṃ sutoraṇam
||19||निधिसंपादितैर्द्रव्यैरेकाह्नाद्विश्वकर्मणा ॥
स्वक्षं सुचक्रं सुस्तंभं सुविस्तीर्णं सुतोरणम्
sudhvajaṃ supatākaṃ ca nānācitramanoharam ||
vicitrabaṃdhamithunaputtalīvalayānvitam
||20||सुध्वजं सुपताकं च नानाचित्रमनोहरम् ॥
विचित्रबंधमिथुनपुत्तलीवलयान्वितम्
arddhahāṭakanirvyūḍhaṃ sākṣādravirathopamam ||
meghagaṃbhīranirghoṣaṃ dṛṣṭvā karṣaguṇairyutam ||
vātaraṃhohayairyuktaṃ śatasaṃkhyaiḥ sitaprabhaiḥ
||21||अर्द्धहाटकनिर्व्यूढं साक्षाद्रविरथोपमम् ॥
मेघगंभीरनिर्घोषं दृष्ट्वा कर्षगुणैर्युतम् ॥
वातरंहोहयैर्युक्तं शतसंख्यैः सितप्रभैः
yathāśāstravidhānena nāradena pratiṣṭhitam ||
sulagne sumuhūrte ca sutithau jyotiṣodite
||22||यथाशास्त्रविधानेन नारदेन प्रतिष्ठितम् ॥
सुलग्ने सुमुहूर्ते च सुतिथौ ज्योतिषोदिते
munaya ūcuḥ
bhagavañjaimine brūhi sarvajñosi mato hi naḥ
||23||भगवञ्जैमिने ब्रूहि सर्वज्ञोसि मतो हि नः
vidhinā kena hi rathaḥ pratiṣṭhāpyo harerayam ||
yathāvadvada no yena jānīmo vidhivistaram
||24||विधिना केन हि रथः प्रतिष्ठाप्यो हरेरयम् ॥
यथावद्वद नो येन जानीमो विधिविस्तरम्
jaiminiruvāca
yathā pratiṣṭhitaṃ tena nāradena mahātmanā ||
tadvo vadiṣyāmi vidhiṃ yathā dṛṣṭaṃ purā mayā
||25||यथा प्रतिष्ठितं तेन नारदेन महात्मना ॥
तद्वो वदिष्यामि विधिं यथा दृष्टं पुरा मया
rathasyeśānadigbhāge śālāṃ kṛtvā suśobhanām ||
tanmadhye maṇḍapaṃ kṛtvā vediṃ tatra sunirmalām
||26||रथस्येशानदिग्भागे शालां कृत्वा सुशोभनाम् ॥
तन्मध्ये मण्डपं कृत्वा वेदिं तत्र सुनिर्मलाम्
caturasrā caturhastamitāṃ hastocchritāṃ dvijāḥ ||
pratiṣṭhāpūrvadivase rātrāvuttarataḥ śubhe
||27||चतुरस्रा चतुर्हस्तमितां हस्तोच्छ्रितां द्विजाः ॥
प्रतिष्ठापूर्वदिवसे रात्रावुत्तरतः शुभे
muhūrte svasti vācyātha kārayedaṃkurārpaṇam ||
dvātriṃśaddevatābhyaśca baliṃ dattvā yathāvidhi
||28||मुहूर्ते स्वस्ति वाच्याथ कारयेदंकुरार्पणम् ॥
द्वात्रिंशद्देवताभ्यश्च बलिं दत्त्वा यथाविधि
prātastato vedikāyāṃ madhye maṇḍalamālikhet ||
padmaṃ vā svastikaṃ vāpi kumbhaṃ tatra nidhāpayet
||29||प्रातस्ततो वेदिकायां मध्ये मण्डलमालिखेत् ॥
पद्मं वा स्वस्तिकं वापि कुम्भं तत्र निधापयेत्
pañcadrumakaṣāyaṃ ca tanmadhye pūrayetsudhīḥ ||
gaṃgādipuṇyatoyāni pallavānsa samṛttikāḥ
||30||पञ्चद्रुमकषायं च तन्मध्ये पूरयेत्सुधीः ॥
गंगादिपुण्यतोयानि पल्लवान्स समृत्तिकाः
sarvagaṃdhānpañcaratnasarvauṣadhigaṇaṃ tathā ||
pūrayitvā vidhānena ācāryaḥ prāṅmukhaḥ śuciḥ
||31||सर्वगंधान्पञ्चरत्नसर्वौषधिगणं तथा ॥
पूरयित्वा विधानेन आचार्यः प्राङ्मुखः शुचिः
viṣṇuṃ smaranpaṃcagavyaṃ paścādapi prapūrayet ||
dukūlaveṣṭitaṃ kaṇṭhe mālyairgaṃdhaiḥ suśobhanaiḥ
||32||विष्णुं स्मरन्पंचगव्यं पश्चादपि प्रपूरयेत् ॥
दुकूलवेष्टितं कण्ठे माल्यैर्गंधैः सुशोभनैः
phalapallavasaṃyuktaṃ kṛtakautukamaṃgalam ||
pūrayettatra deveśaṃ narasiṃhamanāmayam
||33||फलपल्लवसंयुक्तं कृतकौतुकमंगलम् ॥
पूरयेत्तत्र देवेशं नरसिंहमनामयम्
maṃtrarājenavidhivadupacāraistathāṃtaraiḥ ||
prārthayitvā prasādāya tasminnāvāhya taṃ harim
||34||मंत्रराजेनविधिवदुपचारैस्तथांतरैः ॥
प्रार्थयित्वा प्रसादाय तस्मिन्नावाह्य तं हरिम्
bāhyopacārairvividhaiḥ pūjayedvidhivaddvijāḥ ||
vāyavyāṃ tasya kumbhasya samidājyacaruṃ tathā
||35||बाह्योपचारैर्विविधैः पूजयेद्विधिवद्द्विजाः ॥
वायव्यां तस्य कुम्भस्य समिदाज्यचरुं तथा
aṣṭottarasahasraṃ ca juhuyādvidhivadguruḥ ||
saṃpātānprāpayettatra kumbhamadhye tadantataḥ
||36||अष्टोत्तरसहस्रं च जुहुयाद्विधिवद्गुरुः ॥
संपातान्प्रापयेत्तत्र कुम्भमध्ये तदन्ततः
rathaṃ suśobhanaṃ kṛtvā patākāgaṃdhamālyakaiḥ ||
sarvāṃgaṃ secayettasya gaṃdhacandanavāribhiḥ
||37||रथं सुशोभनं कृत्वा पताकागंधमाल्यकैः ॥
सर्वांगं सेचयेत्तस्य गंधचन्दनवारिभिः
dhūpayetkālāguruṇā śaṃkhakāhālanisvanaiḥ ||
dhvaje tasya nṛsiṃhasya pratiṣṭhāpya samīraṇam
||38||धूपयेत्कालागुरुणा शंखकाहालनिस्वनैः ॥
ध्वजे तस्य नृसिंहस्य प्रतिष्ठाप्य समीरणम्
pūjayitvā vidhānena raktasraggaṃdhamālyakaiḥ ||
imaṃ maṃtraṃ samuccārya suparṇaṃ prārthayettataḥ
||39||पूजयित्वा विधानेन रक्तस्रग्गंधमाल्यकैः ॥
इमं मंत्रं समुच्चार्य सुपर्णं प्रार्थयेत्ततः
yo viśvaprāṇahetustanurapi ca hareryānaketusvarūpoyaṃ saṃcityaiva sadyaḥ svayamuragavadhūvargagarbhāḥ pataṃti ||
caṃcaccaṇḍorutuṃḍatruṭita phaṇivasāraktapaṃkāṃkitāsyaṃ vande chandomayaṃ taṃ khagapatimamalaṃ svarṇavarṇaṃ suparṇam
||40||यो विश्वप्राणहेतुस्तनुरपि च हरेर्यानकेतुस्वरूपोयं संचित्यैव सद्यः स्वयमुरगवधूवर्गगर्भाः पतंति ॥
चंचच्चण्डोरुतुंडत्रुटित फणिवसारक्तपंकांकितास्यं वन्दे छन्दोमयं तं खगपतिममलं स्वर्णवर्णं सुपर्णम्
brahmaghoṣaiḥ śaṃkhanādairnānāvādyasuvistaraiḥ ||
rathamūrdhni sthāpayettaṃ cārusūktaṃ samuccaran
||41||ब्रह्मघोषैः शंखनादैर्नानावाद्यसुविस्तरैः ॥
रथमूर्ध्नि स्थापयेत्तं चारुसूक्तं समुच्चरन्
tasyopariṣṭāttaṃ kumbhaṃ samaṃtātplāvayanratham ||
triruccaranmaṃtrarājaṃ secayedbrahmaṇā saha
||42||तस्योपरिष्टात्तं कुम्भं समंतात्प्लावयन्रथम् ॥
त्रिरुच्चरन्मंत्रराजं सेचयेद्ब्रह्मणा सह
tataḥ pūrṇāhutiṃ dattvā brahmaṇe dakṣiṇāṃ dadet ||
ācāryaṃ dakṣiṇāṃ dadyādyena tuṣyati tadguruḥ
||43||ततः पूर्णाहुतिं दत्त्वा ब्रह्मणे दक्षिणां ददेत् ॥
आचार्यं दक्षिणां दद्याद्येन तुष्यति तद्गुरुः
brāhmaṇānbhojayedante pāyasairmadhusarpiṣā ||
dvādaśākṣaramaṃtreṇa balabhadrasya kārayet
||44||ब्राह्मणान्भोजयेदन्ते पायसैर्मधुसर्पिषा ॥
द्वादशाक्षरमंत्रेण बलभद्रस्य कारयेत्
lāṃgalaṃ ca paviravanmaṃtraḥ syāllāṃgaladhvaje ||
athavā dviṣaḍvarṇopi mūlamantraḥ prakīrtitaḥ
||45||लांगलं च पविरवन्मंत्रः स्याल्लांगलध्वजे ॥
अथवा द्विषड्वर्णोपि मूलमन्त्रः प्रकीर्तितः
lakṣmīsūktena bhadrāyāḥ pratiṣṭhāpyo rathastathā ||
nābhihradānmurārestvaṃ brahmāṃḍāvalirūpadhṛk
||46||लक्ष्मीसूक्तेन भद्रायाः प्रतिष्ठाप्यो रथस्तथा ॥
नाभिह्रदान्मुरारेस्त्वं ब्रह्मांडावलिरूपधृक्
āsanaṃ caturāsyasya śriyo vāsa sthiro bhava ||
ima mantraṃ samuccārya dhvajapadmaṃ samucchrayet
||47||आसनं चतुरास्यस्य श्रियो वास स्थिरो भव ॥
इम मन्त्रं समुच्चार्य ध्वजपद्मं समुच्छ्रयेत्
iyānviśeṣo haviṣā trayāṇāṃ ca pṛthakpṛthak ||
paṃcapaṃcabhirhotavyamekaikaṃ tu vibhāgaśaḥ
||48||इयान्विशेषो हविषा त्रयाणां च पृथक्पृथक् ॥
पंचपंचभिर्होतव्यमेकैकं तु विभागशः
itthaṃ rathānpratiṣṭhāpya suvarṇaṃ gāṃ ca vastrakam ||
dhānyaṃ ca dakṣiṇāṃ dadyātsamyagdevasya bhaktitaḥ
||49||इत्थं रथान्प्रतिष्ठाप्य सुवर्णं गां च वस्त्रकम् ॥
धान्यं च दक्षिणां दद्यात्सम्यग्देवस्य भक्तितः
evaṃ pratiṣṭhite tatra syaṃdane'tha subhūṣite ||
āropya devaṃ vidhivadbrahmaghoṣapuraḥsaram
||50||एवं प्रतिष्ठिते तत्र स्यंदनेऽथ सुभूषिते ॥
आरोप्य देवं विधिवद्ब्रह्मघोषपुरःसरम्
jayamaṃgalaśabdaiśca nānāvādyapuraḥsaraiḥ ||
cāmarāṃdolanairdhūpaiḥ puṣpavṛṣṭibhireva ca
||51||जयमंगलशब्दैश्च नानावाद्यपुरःसरैः ॥
चामरांदोलनैर्धूपैः पुष्पवृष्टिभिरेव च
brāhmaṇaiḥ kṣatriyairvaiśyairnīyate sma rathaṃ prati ||
hayaiḥ sulakṣaṇairdāṃtairbalīvardairathāpi vā
||52||ब्राह्मणैः क्षत्रियैर्वैश्यैर्नीयते स्म रथं प्रति ॥
हयैः सुलक्षणैर्दांतैर्बलीवर्दैरथापि वा
puruṣairviṣṇubhaktairvā netavyā hyapramādataḥ ||
prīṇayitvā janaṃ sarvaṃ bhakṣyabhojyādilepanaiḥ
||53||पुरुषैर्विष्णुभक्तैर्वा नेतव्या ह्यप्रमादतः ॥
प्रीणयित्वा जनं सर्वं भक्ष्यभोज्यादिलेपनैः
rathasyopari devebhyo balimantreṇa bho dvijāḥ ||
baliṃ gṛhṇantu bho devā ādityā vasavastathā
||54||रथस्योपरि देवेभ्यो बलिमन्त्रेण भो द्विजाः ॥
बलिं गृह्णन्तु भो देवा आदित्या वसवस्तथा
marutaścāśvinau rudrāḥ suparṇāḥ pannagā grahāḥ ||
asurā yātudhānāśca rathasthāścaiva devatāḥ
||55||मरुतश्चाश्विनौ रुद्राः सुपर्णाः पन्नगा ग्रहाः ॥
असुरा यातुधानाश्च रथस्थाश्चैव देवताः
dikpālā lokapālāśca ye ca vighnavināyakāḥ ||
jagataḥ svasti kurvaṃtu divyā maharṣayastathā
||56||दिक्पाला लोकपालाश्च ये च विघ्नविनायकाः ॥
जगतः स्वस्ति कुर्वंतु दिव्या महर्षयस्तथा
avighnamācaraṃtvete mā saṃtu paripaṃthinaḥ ||
saumyā bhavaṃtu tṛptāśca daityā bhūtagaṇāstathā
||57||अविघ्नमाचरंत्वेते मा संतु परिपंथिनः ॥
सौम्या भवंतु तृप्ताश्च दैत्या भूतगणास्तथा
tatastu nīyate devaḥ samabhūmau samuccaran ||
maṃtraṃ vaiṣṇavagāyatrīṃ viṣṇoḥ sūktaṃ pavitrakam
||58||ततस्तु नीयते देवः समभूमौ समुच्चरन् ॥
मंत्रं वैष्णवगायत्रीं विष्णोः सूक्तं पवित्रकम्
vāmadevyaiḥ pavitraiśca mānastokyai rathaṃtaraiḥ ||
tataḥ puṇyāhaghoṣeṇa kṛtavāditraniḥsvanam
||59||वामदेव्यैः पवित्रैश्च मानस्तोक्यै रथंतरैः ॥
ततः पुण्याहघोषेण कृतवादित्रनिःस्वनम्
śanaiḥ śanairatho neyo rathaḥ snehāttu cakriṇaḥ ||
tatrotpātānpravakṣyāmi rathetra dvijasattamāḥ
||60||शनैः शनैरथो नेयो रथः स्नेहात्तु चक्रिणः ॥
तत्रोत्पातान्प्रवक्ष्यामि रथेत्र द्विजसत्तमाः
īṣābhaṃge dvijabhayaṃ bhagne'kṣe kṣatriyakṣayaḥ ||
tulābhaṃge vaiśyanāśaḥ śamyā śūdrabhayaṃ bhavet
||61||ईषाभंगे द्विजभयं भग्नेऽक्षे क्षत्रियक्षयः ॥
तुलाभंगे वैश्यनाशः शम्या शूद्रभयं भवेत्
dhurābhaṃge tvanāvṛṣṭiḥ pīṭhabhaṃge prajābhayam ||
paracakrāgamaṃ vidyāccakrabhaṃge rathasya tu
||62||धुराभंगे त्वनावृष्टिः पीठभंगे प्रजाभयम् ॥
परचक्रागमं विद्याच्चक्रभंगे रथस्य तु
dhvajasya patane viprā nṛpo'nyo jāyate dhuvam ||
pratimābhaṃgatāyāṃ tu rājño maraṇamādiśet
||63||ध्वजस्य पतने विप्रा नृपोऽन्यो जायते धुवम् ॥
प्रतिमाभंगतायां तु राज्ञो मरणमादिशेत्
paryaste tu rathe viprāḥ sarvajānapadakṣayaḥ ||
utpanneṣvevamādyeṣu utpāteṣvaśubheṣu ca
||64||पर्यस्ते तु रथे विप्राः सर्वजानपदक्षयः ॥
उत्पन्नेष्वेवमाद्येषु उत्पातेष्वशुभेषु च
balikarma punaḥ kuryācchāṃtihomaṃ tathaiva ca ||
brāhmaṇānbhojayedbhūyo dadyādvānnāni caiva hi
||65||बलिकर्म पुनः कुर्याच्छांतिहोमं तथैव च ॥
ब्राह्मणान्भोजयेद्भूयो दद्याद्वान्नानि चैव हि
pūrvottare ca digbhāge rathasyāgniṃ prakalpayeta ||
samidbhirghṛtamadhvājyamūlāgrābhiśca homayet
||66||पूर्वोत्तरे च दिग्भागे रथस्याग्निं प्रकल्पयेत ॥
समिद्भिर्घृतमध्वाज्यमूलाग्राभिश्च होमयेत्
pālāśābhirdvijaśreṣṭhā maṃtrarājena dīkṣitaḥ ||
somāyāgnaye prajābhyaḥ prajānāṃ pataye tathā
||67||पालाशाभिर्द्विजश्रेष्ठा मंत्रराजेन दीक्षितः ॥
सोमायाग्नये प्रजाभ्यः प्रजानां पतये तथा
grahebhyaśca brahmaṇe ca dikpālebhyastadaṃtataḥ ||
yatra yatra rathe doṣāstatra tatra ca dīkṣitaḥ
||68||ग्रहेभ्यश्च ब्रह्मणे च दिक्पालेभ्यस्तदंततः ॥
यत्र यत्र रथे दोषास्तत्र तत्र च दीक्षितः
juhuyātpratiṣṭhāmaṃtreṇa viśeṣaḥ sarvato bhavet ||
brāhmaṇaiḥ sahitaḥ kuryāddhomāṃte śāṃtivācanam
||69||जुहुयात्प्रतिष्ठामंत्रेण विशेषः सर्वतो भवेत् ॥
ब्राह्मणैः सहितः कुर्याद्धोमांते शांतिवाचनम्
svasti bhavatu viprebhyaḥ svastirājñe'stu nityaśaḥ ||
gobhyaḥ svasti prajābhyastu jagataḥ śāṃtirastu vai
||70||स्वस्ति भवतु विप्रेभ्यः स्वस्तिराज्ञेऽस्तु नित्यशः ॥
गोभ्यः स्वस्ति प्रजाभ्यस्तु जगतः शांतिरस्तु वै
svastyastu dvipade nityaṃ śāṃtirastu catuṣpade ||
śaṃ prajābhyastathaivāstu śaṃ tathātmani cāstu naḥ
||71||स्वस्त्यस्तु द्विपदे नित्यं शांतिरस्तु चतुष्पदे ॥
शं प्रजाभ्यस्तथैवास्तु शं तथात्मनि चास्तु नः
śāṃtirastu ca devasya bhūrbhuvaḥ svaḥ śivaṃ tathā ||
śāṃtirastu śivaṃ cāstu sarvataḥ svastirastu naḥ
||72||शांतिरस्तु च देवस्य भूर्भुवः स्वः शिवं तथा ॥
शांतिरस्तु शिवं चास्तु सर्वतः स्वस्तिरस्तु नः
tvaṃ deva jagataḥ sraṣṭā poṣṭā caiva tvameva hi ||
prajāḥ pālaya deveśa śāṃtiṃ kuru jagatpate
||73||त्वं देव जगतः स्रष्टा पोष्टा चैव त्वमेव हि ॥
प्रजाः पालय देवेश शांतिं कुरु जगत्पते
yātrākāraṇabhūtasya puruṣasya ca bhūpate ||
duṣṭāngrahāṃstu vijñāya grahaśāṃtiṃ samācaret
||74||यात्राकारणभूतस्य पुरुषस्य च भूपते ॥
दुष्टान्ग्रहांस्तु विज्ञाय ग्रहशांतिं समाचरेत्
iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye pañcaviṃśo'dhyāyaḥ || 25 ||