gautamāśramatīrthamāhātmyavarṇanam
pulastya uvāca
tato gacchennṛpaśreṣṭha supūrṇaṃ gautamāśramam ||
yatra pūrvaṃ tapastaptaṃ gautamena mahātmanā
||1||ततो गच्छेन्नृपश्रेष्ठ सुपूर्णं गौतमाश्रमम् ॥
यत्र पूर्वं तपस्तप्तं गौतमेन महात्मना
purā''sīdgautamo nāma muniḥ paramadhārmikaḥ ||
sa bhaktyā''rādhayāmāsa devadevaṃ maheśvaram
||2||पुराऽऽसीद्गौतमो नाम मुनिः परमधार्मिकः ॥
स भक्त्याऽऽराधयामास देवदेवं महेश्वरम्
bhaktyā''rādhayamānasya nirbhidya dharaṇītalam ||
samuttasthau mahalliṃgaṃ paraṃ māheśvaraṃ nṛpa
||3||भक्त्याऽऽराधयमानस्य निर्भिद्य धरणीतलम् ॥
समुत्तस्थौ महल्लिंगं परं माहेश्वरं नृप
etasminneva kāle tu vāguvācāśarīriṇī ||
pūjayaitanmahalliṃgaṃ tvadbhaktyā samupasthitam ||
varaṃ varaya bhadraṃ te yatte manasi vartate
||4||एतस्मिन्नेव काले तु वागुवाचाशरीरिणी ॥
पूजयैतन्महल्लिंगं त्वद्भक्त्या समुपस्थितम् ॥
वरं वरय भद्रं ते यत्ते मनसि वर्तते
gautama uvāca
atrāśramapade deva tvayā śambho jagatpate ||
sadā kāryaṃ hi sānnidhyaṃ yadi tuṣṭo mama prabho
||5||अत्राश्रमपदे देव त्वया शम्भो जगत्पते ॥
सदा कार्यं हि सान्निध्यं यदि तुष्टो मम प्रभो
yastvāṃ paśyati sadbhaktyā brahmalokaṃ sa gacchatu
||6||यस्त्वां पश्यति सद्भक्त्या ब्रह्मलोकं स गच्छतु
ākāśavāṇyuvāca
māghamāse caturddaśyāṃ yo'tra māṃ vīkṣayiṣyati ||
kṛṣṇāyāṃ brāhmaṇaśreṣṭha sa yāsyati parāṃ gatim
||7||माघमासे चतुर्द्दश्यां योऽत्र मां वीक्षयिष्यति ॥
कृष्णायां ब्राह्मणश्रेष्ठ स यास्यति परां गतिम्
evamuktvā tato vāṇī virarāma mahīpate ||
tatrāsti kuṇḍamaparaṃ pavitraṃ jalapūritam ||
tatra snāto naraḥ sadyaḥ kulaṃ tārayate'khilam
||8||एवमुक्त्वा ततो वाणी विरराम महीपते ॥
तत्रास्ति कुण्डमपरं पवित्रं जलपूरितम् ॥
तत्र स्नातो नरः सद्यः कुलं तारयतेऽखिलम्
yastatra kurute śrāddhaṃ viśeṣādindusaṃkṣaye ||
gayāśrāddhaphalaṃ tasya sakalaṃ jāyate dhruvam
||9||यस्तत्र कुरुते श्राद्धं विशेषादिन्दुसंक्षये ॥
गयाश्राद्धफलं तस्य सकलं जायते ध्रुवम्
tatra dānaṃ praśaṃsaṃti tilānāṃ munipuṃgavāḥ ||
tilasaṃkhyāni varṣāṇi dānātsvarge vasennṛpa
||10||तत्र दानं प्रशंसंति तिलानां मुनिपुंगवाः ॥
तिलसंख्यानि वर्षाणि दानात्स्वर्गे वसेन्नृप
arbude gautamī yātrā siṃhasthe ca bṛhaspatau ||
amāyāṃ somavāreṇa dviṣaḍgodāvarīphalam
||11||अर्बुदे गौतमी यात्रा सिंहस्थे च बृहस्पतौ ॥
अमायां सोमवारेण द्विषड्गोदावरीफलम्
ṣaṣṭivarṣasahasrāṇi bhāgīrathyavagāhane ||
sakṛdgodāvarīsnānātsiṃhasthe ca bṛhaspatau
||12||षष्टिवर्षसहस्राणि भागीरथ्यवगाहने ॥
सकृद्गोदावरीस्नानात्सिंहस्थे च बृहस्पतौ
iti śrīskānde mahāpurāṇa ekāśātisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe gautamāśramatīrthamāhātmyavarṇanaṃnāma saptacatvāriṃśo'dhyāyaḥ || 47 ||