tato gacchennṛpaśreṣṭha devaṃ koṭīśvaraṃ param
pulastya uvāca
tato gacchennṛpaśreṣṭha devaṃ koṭīśvaraṃ param ||
yaṃ dṛṣṭvā mānavaḥ samyakparāṃ siddhimavāpnuyāt
||1||ततो गच्छेन्नृपश्रेष्ठ देवं कोटीश्वरं परम् ॥
यं दृष्ट्वा मानवः सम्यक्परां सिद्धिमवाप्नुयात्
śṛṇu tatrābhavatpūrvaṃ yadāścaryaṃ mahīpate ||
dakṣiṇasyā munivarāḥ koṭisaṃkhyāpramāṇataḥ
||2||शृणु तत्राभवत्पूर्वं यदाश्चर्यं महीपते ॥
दक्षिणस्या मुनिवराः कोटिसंख्याप्रमाणतः
anyo'nyaṃ spardhayā sarve helayā'rbudamāgatāḥ ||
ahaṃ pūrvamahaṃ pūrvaṃ prapaśyāmyacaleśvaram
||3||अन्योऽन्यं स्पर्धया सर्वे हेलयाऽर्बुदमागताः ॥
अहं पूर्वमहं पूर्वं प्रपश्याम्यचलेश्वरम्
āgamiṣyati yaḥ paścādbrāhmaṇaḥ śvā bhaviṣyati ||
pāpīyānbhaktirahitaḥ śraddhāhīno bhaviṣyati
||4||आगमिष्यति यः पश्चाद्ब्राह्मणः श्वा भविष्यति ॥
पापीयान्भक्तिरहितः श्रद्धाहीनो भविष्यति
ityevaṃ spardhamānāste helayā'rbudamāgatāḥ ||
tataḥ sarve yatātmānaḥ samyagvrataparāyaṇāḥ
||5||इत्येवं स्पर्धमानास्ते हेलयाऽर्बुदमागताः ॥
ततः सर्वे यतात्मानः सम्यग्व्रतपरायणाः
śāṃtāstapasvinaḥ sarve vedavidyāviśāradāḥ ||
teṣāmīhitamājñāya samyakkāmaniṣūdanaḥ
||6||शांतास्तपस्विनः सर्वे वेदविद्याविशारदाः ॥
तेषामीहितमाज्ञाय सम्यक्कामनिषूदनः
kṛpayā parayāviṣṭo bhaktibhāvānmaheśvaraḥ ||
koṭiṃ kṛtvā''tmaliṃgānāṃ tasminsthāne vyavasthitaḥ
||7||कृपया परयाविष्टो भक्तिभावान्महेश्वरः ॥
कोटिं कृत्वाऽऽत्मलिंगानां तस्मिन्स्थाने व्यवस्थितः
ekasminneva kāle tu sarvairdṛṣṭo maheśvaraḥ ||
munibhiśca nṛpaśreṣṭha koṭisaṃkhyaiḥ pṛthakpṛthak
||8||एकस्मिन्नेव काले तु सर्वैर्दृष्टो महेश्वरः ॥
मुनिभिश्च नृपश्रेष्ठ कोटिसंख्यैः पृथक्पृथक्
atha te munayaḥ sarve samaṃ dṛṣṭvā maheśvaram ||
vismayotphullanayanā sādhusādhviti cābruvan
||9||अथ ते मुनयः सर्वे समं दृष्ट्वा महेश्वरम् ॥
विस्मयोत्फुल्लनयना साधुसाध्विति चाब्रुवन्
bhaktiyuktā dvijāḥ sarve'stuvaṃste vaidikaiḥ stavaiḥ ||
teṣāṃ tuṣṭastataḥ śaṃbhurvākyametaduvāca ha
||10||भक्तियुक्ता द्विजाः सर्वेऽस्तुवंस्ते वैदिकैः स्तवैः ॥
तेषां तुष्टस्ततः शंभुर्वाक्यमेतदुवाच ह
śrīmahādeva uvāca
tuṣṭo'haṃ munayaḥ sarve śraddhayā parayā hi vaḥ ||
varaṃ vai vriyatāṃ śīghraṃ sarvaiścaiva pṛthakpṛthak
||11||तुष्टोऽहं मुनयः सर्वे श्रद्धया परया हि वः ॥
वरं वै व्रियतां शीघ्रं सर्वैश्चैव पृथक्पृथक्
ṛṣaya ūcuḥ
eṣa eva varo'smākaṃ sarveṣāṃ hṛdi varttitaḥ ||
yugapaddarśanāddeva jāyatāṃ phalamuttamam
||12||एष एव वरोऽस्माकं सर्वेषां हृदि वर्त्तितः ॥
युगपद्दर्शनाद्देव जायतां फलमुत्तमम्
śrīmahādeva uvāca
na vṛthā darśanaṃ me syādviśeṣādbrāhmaṇasya ca ||
darśanaṃ ye kariṣyaṃti teṣāṃ ca tīrthajaṃ phalam
||13||न वृथा दर्शनं मे स्याद्विशेषाद्ब्राह्मणस्य च ॥
दर्शनं ये करिष्यंति तेषां च तीर्थजं फलम्
munaya ūcuḥ
avaśyaṃ yadi dātavyo varo'smākaṃ maheśvara ||
ekaṃ koṭimayaṃ liṃgaṃ kriyatāṃ vṛṣabhadhvaja
||14||अवश्यं यदि दातव्यो वरोऽस्माकं महेश्वर ॥
एकं कोटिमयं लिंगं क्रियतां वृषभध्वज
yasmindṛṣṭe phalaṃ nṛṇāṃ jāyate koṭiliṃgajam ||
evameṣa varo'smākaṃ dīyatāṃ vṛṣabhadhvaja
||15||यस्मिन्दृष्टे फलं नृणां जायते कोटिलिंगजम् ॥
एवमेष वरोऽस्माकं दीयतां वृषभध्वज
pulastya uvāca
evaṃ saprārthamānānāṃ munīnāṃ bhāvitātmanām ||
nirbhidya parvataśreṣṭhaṃ sahasā liṃgamudgatam
||16||एवं सप्रार्थमानानां मुनीनां भावितात्मनाम् ॥
निर्भिद्य पर्वतश्रेष्ठं सहसा लिंगमुद्गतम्
etasminneva kāle tu vāguvācāśarīriṇī ||
kṛpayā parayā sarvāṃstānṛṣīnvasudhādhipa
||17||एतस्मिन्नेव काले तु वागुवाचाशरीरिणी ॥
कृपया परया सर्वांस्तानृषीन्वसुधाधिप
vāguvāca
koṭīśvarākhyaṃ me liṃgaṃ loke khyātiṃ gamiṣyati ||
māghakṛṣṇacaturddaśyāṃ yaścainaṃ pūjayiṣyati
||18||कोटीश्वराख्यं मे लिंगं लोके ख्यातिं गमिष्यति ॥
माघकृष्णचतुर्द्दश्यां यश्चैनं पूजयिष्यति
sarvaṃ koṭiguṇaṃ tasya phalaṃ viprā bhaviṣyati ||
dākṣiṇātyo naro yastu śrāddhamatra kariṣyati
||19||सर्वं कोटिगुणं तस्य फलं विप्रा भविष्यति ॥
दाक्षिणात्यो नरो यस्तु श्राद्धमत्र करिष्यति
phalaṃ koṭiguṇaṃ tasya gayāśrāddhasamaṃ bhavet ||
tasmādviśeṣataḥ pūjyaṃ mama liṃgaṃ ca mānavaiḥ
||20||फलं कोटिगुणं तस्य गयाश्राद्धसमं भवेत् ॥
तस्माद्विशेषतः पूज्यं मम लिंगं च मानवैः
pulastya uvāca
evamuktvā tu sā vāṇī virarāma mahīpate ||
tataste munayaḥ sarve gaṃdhadhūpānulepanaiḥ
||21||एवमुक्त्वा तु सा वाणी विरराम महीपते ॥
ततस्ते मुनयः सर्वे गंधधूपानुलेपनैः
talliṃgaṃ pūjayāmāsuḥ śraddhayā parayā nṛpa ||
pūjayitvā gatāḥ siddhiṃ sarve liṃgaprasādataḥ
||22||तल्लिंगं पूजयामासुः श्रद्धया परया नृप ॥
पूजयित्वा गताः सिद्धिं सर्वे लिंगप्रसादतः
iti śrīskānde mahāpurāṇa ekāśītisāhasryāṃ saṃhitāyāṃ saptame prabhātakhaṇḍe tṛtīye'rbudakhaṇḍe koṭīśvaramāhātmyavarṇanaṃnāmaikādaśo'dhyāyaḥ || 11 ||