tato gacchennṛpaśreṣṭha caṃdrodbhedamanuttamam
pulastya uvāca
tato gacchennṛpaśreṣṭha caṃdrodbhedamanuttamam ||
tīrthaṃ pāpaharaṃ nṛṇāṃ niśānāthena nirmitam
||1||ततो गच्छेन्नृपश्रेष्ठ चंद्रोद्भेदमनुत्तमम् ॥
तीर्थं पापहरं नृणां निशानाथेन निर्मितम्
pratijñātaṃ yadā rājangrahaṇe caṃdrasūryayoḥ ||
rāhuṇā kṛtavaireṇa cchinne śirasi viṣṇunā
||2||प्रतिज्ञातं यदा राजन्ग्रहणे चंद्रसूर्ययोः ॥
राहुणा कृतवैरेण च्छिन्ने शिरसि विष्णुना
tadā bhayānvitaścandro matvā daityaṃ durāsadam ||
pīyūṣabhakṣaṇodyuktaṃ tataścārbudamabhyagāt
||3||तदा भयान्वितश्चन्द्रो मत्वा दैत्यं दुरासदम् ॥
पीयूषभक्षणोद्युक्तं ततश्चार्बुदमभ्यगात्
tatra bhittvā gireḥ śṛṃge kṛtvā vivaramuttamam ||
praviṣṭastasya madhye tu tapastepe suduścaram
||4||तत्र भित्त्वा गिरेः शृंगे कृत्वा विवरमुत्तमम् ॥
प्रविष्टस्तस्य मध्ये तु तपस्तेपे सुदुश्चरम्
tataḥ kālena mahatā tuṣṭastasya maheśvaraḥ ||
abravīdvṛṇu bhadraṃ te varaṃ yatte hṛdisthitam
||5||ततः कालेन महता तुष्टस्तस्य महेश्वरः ॥
अब्रवीद्वृणु भद्रं ते वरं यत्ते हृदिस्थितम्
caṃdra uvāca
pratijñātaṃ suraśreṣṭha rāhuṇā grahaṇaṃ mama ||
balavāneṣa durdharṣaḥ prakṛtyā siṃhikāsutaḥ
||6||प्रतिज्ञातं सुरश्रेष्ठ राहुणा ग्रहणं मम ॥
बलवानेष दुर्धर्षः प्रकृत्या सिंहिकासुतः
sāṃprataṃ bhakṣitaṃ tena pīyūṣaṃ surasattama ||
ahaṃ madhye dhṛtaścāpi rāhuṇā'sau durāsadaḥ
||7||सांप्रतं भक्षितं तेन पीयूषं सुरसत्तम ॥
अहं मध्ये धृतश्चापि राहुणाऽसौ दुरासदः
pīyamāne'mṛte deva devaiḥ pūrvaṃ parājitaiḥ ||
daivataṃ rūpamāsthāya dānavo'sau samāgataḥ
||8||पीयमानेऽमृते देव देवैः पूर्वं पराजितैः ॥
दैवतं रूपमास्थाय दानवोऽसौ समागतः
apibaccāmṛtaṃ rāhustenāsya mṛtyuvarjitam ||
amṛtaṃ cākṣayaṃ jātaṃ śiro devabhayapradam
||9||अपिबच्चामृतं राहुस्तेनास्य मृत्युवर्जितम् ॥
अमृतं चाक्षयं जातं शिरो देवभयप्रदम्
tato devaiḥ kṛtaṃ sāma grahamadhye pratiṣṭhitaḥ ||
pratijñāte grahe'smākaṃ tato me bhayamāviśat
||10||ततो देवैः कृतं साम ग्रहमध्ये प्रतिष्ठितः ॥
प्रतिज्ञाते ग्रहेऽस्माकं ततो मे भयमाविशत्
bhayāttasya suraśreṣṭha bhittvā śṛṃgaṃ gireridam ||
kṛtaṃ śvabhramagādhaṃ ca tapo'rthaṃ surasattama ||
tasmādatra prasādaṃ me kuru kāmaniṣūdana
||11||भयात्तस्य सुरश्रेष्ठ भित्त्वा शृंगं गिरेरिदम् ॥
कृतं श्वभ्रमगाधं च तपोऽर्थं सुरसत्तम ॥
तस्मादत्र प्रसादं मे कुरु कामनिषूदन
bhagavānuvāca
avadhyaḥ sarvadevānāmajeyaḥ sa mahābalaḥ ||
kariṣyati grahaṃ nūnaṃ rāhuḥ kopaparāyaṇaḥ ||
paraṃ tava niśānātha kariṣye'haṃ pratikriyām
||12||अवध्यः सर्वदेवानामजेयः स महाबलः ॥
करिष्यति ग्रहं नूनं राहुः कोपपरायणः ॥
परं तव निशानाथ करिष्येऽहं प्रतिक्रियाम्
grahaṇe tava saṃprāpte snānadānādikāḥ kriyāḥ ||
kariṣyaṃti janā loke samyakchreyaḥsamanvitāḥ
||13||ग्रहणे तव संप्राप्ते स्नानदानादिकाः क्रियाः ॥
करिष्यंति जना लोके सम्यक्छ्रेयःसमन्विताः
tābhistava na saṃtāpaḥ svalpo'pyevaṃ bhaviṣyati ||
akṣayaṃ sukṛtaṃ teṣāṃ kṛtaṃ karma bhaviṣyati
||14||ताभिस्तव न संतापः स्वल्पोऽप्येवं भविष्यति ॥
अक्षयं सुकृतं तेषां कृतं कर्म भविष्यति
grahaṇe tava saṃjāte mama vākyādasaṃśayam ||
etadbhinnaṃ tvayā yasmāttapo'rthaṃ śikharaṃ gireḥ ||
candrodbhedamiti khyātaṃ tīrthaṃ loke bhaviṣyati
||15||ग्रहणे तव संजाते मम वाक्यादसंशयम् ॥
एतद्भिन्नं त्वया यस्मात्तपोऽर्थं शिखरं गिरेः ॥
चन्द्रोद्भेदमिति ख्यातं तीर्थं लोके भविष्यति
grahaṇe tava saṃprāpte yo'tra snānaṃ kariṣyati ||
na tasya punarevātra janma loke bhaviṣyati
||16||ग्रहणे तव संप्राप्ते योऽत्र स्नानं करिष्यति ॥
न तस्य पुनरेवात्र जन्म लोके भविष्यति
yo vā somadine snānaṃ darśanaṃ tatra cācaret ||
tava loke dhruvaṃ vāsastasya caṃdra bhaviṣyati
||17||यो वा सोमदिने स्नानं दर्शनं तत्र चाचरेत् ॥
तव लोके ध्रुवं वासस्तस्य चंद्र भविष्यति
evamuktvā sa bhagavāṃstataścāṃtardadhe haraḥ ||
candro'pi prayayau hṛṣṭaḥ svasthānaṃ nṛpasattama
||18||एवमुक्त्वा स भगवांस्ततश्चांतर्दधे हरः ॥
चन्द्रोऽपि प्रययौ हृष्टः स्वस्थानं नृपसत्तम
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe candrodbhedatīrthamāhātmyavarṇanaṃnāmaikapaṃcāśattamo'dhyāyaḥ || 51 ||