अध्यायः ६६
ब्रह्मोवाच:
गुडिवामण्डपं यान्तं ये पश्यन्ति रथे स्थितम् । कृष्णं बलं सुभद्रां च ते यान्ति भवनं हरेः
॥१॥ये पश्यन्ति तदा कृष्णं सप्ताहं मण्डपे स्थितम् । हलिनं च सुभद्रां च विष्णुलोकं व्रजन्ति ते
॥२॥मुनय ऊचुः:
केन सा निर्मिता यात्रा दक्षिणस्यां जगत्पते । यात्राफलं च किं तत्र प्राप्यते ब्रूहि मानवैः
॥३॥किमर्थं सरसस् तीरे राज्ञस् तस्य जगत्पते । पवित्रे विजने देशे गत्वा तत्र च मण्डपे
॥४॥कृष्णः सङ्कर्षणश् चैव सुभद्रा च रथेन ते । स्वस्थानं सम्परित्यज्य सप्तरात्रं वसन्ति वै
॥५॥ब्रह्मोवाच:
इन्द्रद्युम्नेन भो विप्राः पुरा वै प्रार्थितो हरिः । सप्ताहं सरसस् तीरे मम यात्रा भवत्व् इति
॥६॥गुडिवा नाम देवेश भुक्तिमुक्तिफलप्रदा । तस्मै किल वरं चासौ ददौ स पुरुषोत्तमः
॥७॥श्रीभगवान् उवाच:
सप्ताहं सरसस् तीरे तव राजन् भविष्यति । गुडिवा नाम यात्रा मे सर्वकामफलप्रदा
॥८॥ये मां तत्रार्चयिष्यन्ति श्रद्धया मण्डपे स्थितम् । सङ्कर्षणं सुभद्रां च विधिवत् सुसमाहिताः
॥९॥ब्राह्मणाः क्षत्रिया वैश्याः स्त्रियः शूद्राश् च वै नृप । पुष्पैर् गन्धैस् तथा धूपैर् दीपैर् नैवेद्यकैर् वरैः
॥१०॥उपहारैर् बहुविधैः प्रणिपातैः प्रदक्षिणैः । जयशब्दैस् तथा स्तोत्रैर् गीतैर् वाद्यैर् मनोहरैः
॥११॥न तेषां दुर्लभं किञ्चित् फलं यस्य यद् ईप्सितम् । भविष्यति नृपश्रेष्ठ मत्प्रसादाद् असंशयम्
॥१२॥ब्रह्मोवाच:
एवम् उक्त्वा तु तं देवस् तत्रैवान्तरधीयत । स तु राजवरः श्रीमान् कृतकृत्योऽभवत् तदा
॥१३॥तस्मात् सर्वप्रयत्नेन गुडिवायां द्विजोत्तमाः । सर्वकामप्रदं देवं पश्येत् तं पुरुषोत्तमम्
॥१४॥अपुत्रो लभते पुत्रान् निर्धनो लभते धनम् । रोगाच् च मुच्यते रोगी कन्या प्राप्नोति सत्पतिम्
॥१५॥आयुः कीर्तिं यशो मेधां बलं विद्यां धृतिं पशून् । नरः सन्ततिम् आप्नोति रूपयौवनसम्पदम्
॥१६॥यान् यान् समीहते भोगान् दृष्ट्वा तं पुरुषोत्तमम् । नरो वाप्य् अथवा नारी तांस् तान् प्राप्नोत्य् असंशयम्
॥१७॥यात्रां कृत्वा गुडिवाख्यां विधिवत् सुसमाहितः । आषाढस्य सिते पक्षे नरो योषिद् अथापि वा
॥१८॥दृष्ट्वा कृष्णं च रामं च सुभद्रां च द्विजोत्तमाः । दशपञ्चाश्वमेधानां फलं प्राप्नोति चाधिकम्
॥१९॥सप्तावरान् सप्त परान् वंशान् उद्धृत्य चात्मनः । कामगेन विमानेन सर्वरत्नैर् अलङ्कृतः
॥२०॥गन्धर्वैर् अप्सरोभिश् च सेव्यमानो यथोत्तरैः । रूपवान् सुभगः शूरो नरो विष्णुपुरं व्रजेत्
॥२१॥तत्र भुक्त्वा वरान् भोगान् यावद् आभूतसम्प्लवम् । सर्वकामसमृद्धात्मा जरामरणवर्जितः
॥२२॥पुण्यक्षयाद् इहागत्य चतुर्वेदी द्विजो भवेत् । वैष्णवं योगम् आस्थाय ततो मोक्षम् अवाप्नुयात्
॥२३॥स्रोतः तथा उपयोगनियमः:SARIT. Based on the SARIT digital edition, edited by Peter Schreiner and Renate Söhnen; base e-text: the Tübingen Purāṇa Project; TEI editing and conversion: Richard Mahoney. Copyright 2014–2018 SARIT. Converted from IAST to Devanāgarī and segmented into chapter, stanza, and prose items for this reader. Creative Commons Attribution-ShareAlike 3.0 Unported (CC BY-SA 3.0).