nāradapraśnottarakathanam
' ||
nārada uvāca ||
tato'haṃ dharmavarmāṇaṃ procya tiṣṭheddhanaṃ tvayi ||
kṛtyakāle grahīṣyāmītyāgamaṃ raivataṃ girim
||1||ऽ ॥
नारद उवाच ॥
ततोऽहं धर्मवर्माणं प्रोच्य तिष्ठेद्धनं त्वयि ॥
कृत्यकाले ग्रहीष्यामीत्यागमं रैवतं गिरिम्
āsaṃ pramuditaścāhaṃ paśyaṃstaṃ girisattamam ||
āhvayānaṃ narānsādhūnbhūmerbhujamivocchritam
||2||आसं प्रमुदितश्चाहं पश्यंस्तं गिरिसत्तमम् ॥
आह्वयानं नरान्साधून्भूमेर्भुजमिवोच्छ्रितम्
yasminnānāvidhā vṛkṣāḥ prakāśaṃte samaṃtataḥ ||
sādhuṃ gṛhapatiṃ prāpya putrabhāryādayo yathā
||3||यस्मिन्नानाविधा वृक्षाः प्रकाशंते समंततः ॥
साधुं गृहपतिं प्राप्य पुत्रभार्यादयो यथा
muditā yatra saṃtṛptā vāśaṃte kokilādayaḥ ||
sadgurorjñānasaṃpannā yathā śiṣyagaṇā bhuvi
||4||मुदिता यत्र संतृप्ता वाशंते कोकिलादयः ॥
सद्गुरोर्ज्ञानसंपन्ना यथा शिष्यगणा भुवि
yatra taptvā tapo martyā yathepsitamavāpnuyuḥ ||
śrīmahādevamāsādya bhakto yadvanmanoratham
||5||यत्र तप्त्वा तपो मर्त्या यथेप्सितमवाप्नुयुः ॥
श्रीमहादेवमासाद्य भक्तो यद्वन्मनोरथम्
tasyāhaṃ ca gireḥ pārtha samāsādya mahāśilām ||
śītasaurabhyamaṃdena prīṇīto'ciṃtayaṃ hṛdi
||6||तस्याहं च गिरेः पार्थ समासाद्य महाशिलाम् ॥
शीतसौरभ्यमंदेन प्रीणीतोऽचिंतयं हृदि
tāvanmayā sthānamāptaṃ yadatīva sudurlabham ||
idānīṃ brāhmaṇārthe'haṃ kurve tāvadupakramam
||7||तावन्मया स्थानमाप्तं यदतीव सुदुर्लभम् ॥
इदानीं ब्राह्मणार्थेऽहं कुर्वे तावदुपक्रमम्
brāhmaṇāśca vilokya me ye hi pātratamā matāḥ ||
tathā hi cātra śrūyaṃte vacāṃsi śrutivādinām
||8||ब्राह्मणाश्च विलोक्य मे ये हि पात्रतमा मताः ॥
तथा हि चात्र श्रूयंते वचांसि श्रुतिवादिनाम्
na jalottaraṇe śaktā yadvannauḥ karṇavarjitā ||
tadvacchreṣṭho'pyanācāro vipro noddharaṇakṣamaḥ
||9||न जलोत्तरणे शक्ता यद्वन्नौः कर्णवर्जिता ॥
तद्वच्छ्रेष्ठोऽप्यनाचारो विप्रो नोद्धरणक्षमः
brāhmaṇo hyanadhīyānastṛṇāgniriva śāmyati ||
tasmai havyaṃ na dātavyaṃ na hi bhasmani hūyate
||10||ब्राह्मणो ह्यनधीयानस्तृणाग्निरिव शाम्यति ॥
तस्मै हव्यं न दातव्यं न हि भस्मनि हूयते
dānapātramatikramya yadapātre pradīyate ||
taddattaṃ gāmatikramya gardabhasya gavāhnikam
||11||दानपात्रमतिक्रम्य यदपात्रे प्रदीयते ॥
तद्दत्तं गामतिक्रम्य गर्दभस्य गवाह्निकम्
ūṣare vāpitaṃ bījaṃ bhinnabhāṃḍe ca goduham ||
bhasmanīva hutaṃ havyaṃ mūrkhe dānamaśāśvatam
||12||ऊषरे वापितं बीजं भिन्नभांडे च गोदुहम् ॥
भस्मनीव हुतं हव्यं मूर्खे दानमशाश्वतम्
vidhihīne tathā'pātre yo dadāti pratigraham ||
na kevalaṃ hi tadyāti śeṣaṃ puṇyaṃ praṇaśyati
||13||विधिहीने तथाऽपात्रे यो ददाति प्रतिग्रहम् ॥
न केवलं हि तद्याति शेषं पुण्यं प्रणश्यति
bhūrāptā gaustathā bhogāḥ suvarṇaṃ dehameva ca ||
aśvaścakṣustathā vāso ghṛtaṃ tejastilāḥ prajāḥ
||14||भूराप्ता गौस्तथा भोगाः सुवर्णं देहमेव च ॥
अश्वश्चक्षुस्तथा वासो घृतं तेजस्तिलाः प्रजाः
ghnaṃti tasmādavidvāṃstu bibhiyācca pratigrahāt ||
svalpaka kenāpyavidvāṃstu paṃke gauriva sīdati
||15||घ्नंति तस्मादविद्वांस्तु बिभियाच्च प्रतिग्रहात् ॥
स्वल्पक केनाप्यविद्वांस्तु पंके गौरिव सीदति
tasmādye gūḍhatapaso gūḍhasvādhyāyasādhakāḥ ||
svadāraniratāḥ śāṃtāsteṣu dattaṃ sadā'kṣayam
||16||तस्माद्ये गूढतपसो गूढस्वाध्यायसाधकाः ॥
स्वदारनिरताः शांतास्तेषु दत्तं सदाऽक्षयम्
deśe kāla upāyena dravyaṃ śraddhāsamanvitam ||
pātre pradīyate yattatsakalaṃ dharmalakṣaṇam
||17||देशे काल उपायेन द्रव्यं श्रद्धासमन्वितम् ॥
पात्रे प्रदीयते यत्तत्सकलं धर्मलक्षणम्
na vidyayā kevalayā tapasā vāpi pātratā ||
yatra vṛttimime cobhe tadvi pātraṃ pracakṣate
||18||न विद्यया केवलया तपसा वापि पात्रता ॥
यत्र वृत्तिमिमे चोभे तद्वि पात्रं प्रचक्षते
teṣāṃ trayāṇāṃ madhye ca vidyā mukhyo mahāguṇaḥ ||
vidyāṃ vināṃdhavadviprāścakṣuṣmaṃto hi te matāḥ
||19||तेषां त्रयाणां मध्ये च विद्या मुख्यो महागुणः ॥
विद्यां विनांधवद्विप्राश्चक्षुष्मंतो हि ते मताः
tasmāccakṣuṣmato vidvāndeśe deśe parīkṣayet ||
praśrānye mama vakṣyaṃti tebhyo dāsyāmyahaṃ tataḥ
||20||तस्माच्चक्षुष्मतो विद्वान्देशे देशे परीक्षयेत् ॥
प्रश्रान्ये मम वक्ष्यंति तेभ्यो दास्याम्यहं ततः
iti saṃciṃtya manasā tasmāddeśātsamutthitaḥ ||
āśrameṣu maharṣīṇāṃ vicarāmyasmi phālguna
||21||इति संचिंत्य मनसा तस्माद्देशात्समुत्थितः ॥
आश्रमेषु महर्षीणां विचराम्यस्मि फाल्गुन
imāñchlokāngāyamānaḥ praśrarūpāñchṛṇuṣva tān ||
mātṛkāṃ ko vijānāti katidhā kīdṛśākṣarām
||22||इमाञ्छ्लोकान्गायमानः प्रश्ररूपाञ्छृणुष्व तान् ॥
मातृकां को विजानाति कतिधा कीदृशाक्षराम्
paṃcapaṃcādbhutaṃ gehaṃ ko vijānāti vā dvijaḥ ||
bahurūpāṃ striyaṃ kartumekarūpāṃ ca vetti kaḥ
||23||पंचपंचाद्भुतं गेहं को विजानाति वा द्विजः ॥
बहुरूपां स्त्रियं कर्तुमेकरूपां च वेत्ति कः
ko vā citrakathābaṃdhaṃ vetti saṃsāragocaraḥ ||
ko vārṇavamahāgrāhaṃ vetti vidyāparāyaṇaḥ
||24||को वा चित्रकथाबंधं वेत्ति संसारगोचरः ॥
को वार्णवमहाग्राहं वेत्ति विद्यापरायणः
ko vāṣṭavidhaṃ brāhmaṇyaṃ vetti brāhmaṇasattamaḥ ||
yugānāṃ ca caturṇāṃ vā ko mūladivasānvadet
||25||को वाष्टविधं ब्राह्मण्यं वेत्ति ब्राह्मणसत्तमः ॥
युगानां च चतुर्णां वा को मूलदिवसान्वदेत्
caturdaśamanūnāṃ vā mūlavāsaraṃ vetti kaḥ ||
kasmiṃścaiva dine prāpa pūrvaṃ vā bhāskaro ratham
||26||चतुर्दशमनूनां वा मूलवासरं वेत्ति कः ॥
कस्मिंश्चैव दिने प्राप पूर्वं वा भास्करो रथम्
udvejayati bhūtāni kṛṣṇāhiriva vetti kaḥ ||
ko vāsminghorasaṃsāre dakṣadakṣatamo bhavet
||27||उद्वेजयति भूतानि कृष्णाहिरिव वेत्ति कः ॥
को वास्मिन्घोरसंसारे दक्षदक्षतमो भवेत्
paṃthānāvapi dvau kaścidvetti vakti ca brāhmaṇaḥ ||
iti me dvādaśa praśrānye vidurbrāhmaṇottamāḥ
||28||पंथानावपि द्वौ कश्चिद्वेत्ति वक्ति च ब्राह्मणः ॥
इति मे द्वादश प्रश्रान्ये विदुर्ब्राह्मणोत्तमाः
te me pūjyatamāsteṣāmahāmārādhakaściram ||
ityahaṃ gāyamāno vai bhramitaḥ sakalāṃ mahīm
||29||ते मे पूज्यतमास्तेषामहामाराधकश्चिरम् ॥
इत्यहं गायमानो वै भ्रमितः सकलां महीम्
te cāhurduḥkhadāḥ khyātāḥ praśrāste kurmahe namaḥ ||
ityahaṃ sakalāṃ pṛthvīṃ viciṃtyālabdhabrāhmaṇaḥ
||30||ते चाहुर्दुःखदाः ख्याताः प्रश्रास्ते कुर्महे नमः ॥
इत्यहं सकलां पृथ्वीं विचिंत्यालब्धब्राह्मणः
himādriśikharāsīno bhūyaściṃtāmavāptavān ||
sarve vilokitā viprāḥ kimataḥ kartumutsahe
||31||हिमाद्रिशिखरासीनो भूयश्चिंतामवाप्तवान् ॥
सर्वे विलोकिता विप्राः किमतः कर्तुमुत्सहे
tato me ciṃtayānasya punarjātā matistviyam ||
adyāpi na gataścāhaṃ kalāpagrāmamuttamam
||32||ततो मे चिंतयानस्य पुनर्जाता मतिस्त्वियम् ॥
अद्यापि न गतश्चाहं कलापग्राममुत्तमम्
yasminviprāḥ saṃvasaṃti mūrtānīva tapāṃsi ca ||
caturāśītisāhasrāḥ śrutādhyayanaśālinaḥ
||33||यस्मिन्विप्राः संवसंति मूर्तानीव तपांसि च ॥
चतुराशीतिसाहस्राः श्रुताध्ययनशालिनः
sthāne tasmingamiṣyāmītyuktvāhaṃ calitastadā ||
khecaro himamākramya paraṃ pāraṃ gatastataḥ
||34||स्थाने तस्मिन्गमिष्यामीत्युक्त्वाहं चलितस्तदा ॥
खेचरो हिममाक्रम्य परं पारं गतस्ततः
adrākṣaṃ puṇyabhūmisthaṃ grāmaratnamahaṃ mahat ||
śatayojanavistīrṇaṃ nānāvṛkṣasamākulam
||35||अद्राक्षं पुण्यभूमिस्थं ग्रामरत्नमहं महत् ॥
शतयोजनविस्तीर्णं नानावृक्षसमाकुलम्
yatra puṇyavatāṃ saṃti śataśaḥ pravarāśramāḥ ||
sarveṣāmapi jīvānāṃ yatrānyonyaṃ na duṣṭatā
||36||यत्र पुण्यवतां संति शतशः प्रवराश्रमाः ॥
सर्वेषामपि जीवानां यत्रान्योन्यं न दुष्टता
yajñabhājāṃ munīnāṃ yadupakārakaraṃ sadā ||
satāṃ dharmavatāṃ yadvadupakāro na śāmyati
||37||यज्ञभाजां मुनीनां यदुपकारकरं सदा ॥
सतां धर्मवतां यद्वदुपकारो न शाम्यति
munīnāṃ yatra paramaṃ sthānaṃ cāpyavināśakṛt ||
svāhāsvadhāvaṣaṭkāra hantakāro na naśyati
||38||मुनीनां यत्र परमं स्थानं चाप्यविनाशकृत् ॥
स्वाहास्वधावषट्कार हन्तकारो न नश्यति
yatra kṛtayugastārthaṃ bījaṃ pārthāvaśiṣyate ||
sūryasya somavaṃśasya brāhmaṇānāṃ tathaiva ca
||39||यत्र कृतयुगस्तार्थं बीजं पार्थावशिष्यते ॥
सूर्यस्य सोमवंशस्य ब्राह्मणानां तथैव च
sthānakaṃ tatsamāsādya praviṣṭo'haṃ dvijāśramān ||
tatra te vividhānvādānvivadaṃte dvijottamāḥ
||40||स्थानकं तत्समासाद्य प्रविष्टोऽहं द्विजाश्रमान् ॥
तत्र ते विविधान्वादान्विवदंते द्विजोत्तमाः
parasparaṃ ciṃtayānā vedā mūrtidharā yathā ||
tatra medhāvinaḥ kecidarthamanyaiḥ prapūritam
||41||परस्परं चिंतयाना वेदा मूर्तिधरा यथा ॥
तत्र मेधाविनः केचिदर्थमन्यैः प्रपूरितम्
vicikṣipurmahātmāno nabhogatamivāmiṣam ||
tatrā'haṃ karamudyamya prāvocaṃ pūryatāṃ dvijāḥ
||42||विचिक्षिपुर्महात्मानो नभोगतमिवामिषम् ॥
तत्राऽहं करमुद्यम्य प्रावोचं पूर्यतां द्विजाः
kākārāvaiḥ kimatairvo yadyasti jñānaśālitā ||
vyākurudhvaṃ tataḥ praśrānmama durviṣahānbahūn
||43||काकारावैः किमतैर्वो यद्यस्ति ज्ञानशालिता ॥
व्याकुरुध्वं ततः प्रश्रान्मम दुर्विषहान्बहून्
brāhmaṇā ūcuḥ
vada brāhmaṇa praśrānsvāñchrutvā''dhāsyāmahe vayam ||
paramo hyeṣa no lābhaḥ praśnānpṛcchati yadbhavān
||44||वद ब्राह्मण प्रश्रान्स्वाञ्छ्रुत्वाऽऽधास्यामहे वयम् ॥
परमो ह्येष नो लाभः प्रश्नान्पृच्छति यद्भवान्
ahaṃ pūrvikayā te vai nyaṣedhaṃta parasparam ||
ahaṃ pūrvamahaṃ pūrvamiti vīrā yathā raṇe
||45||अहं पूर्विकया ते वै न्यषेधंत परस्परम् ॥
अहं पूर्वमहं पूर्वमिति वीरा यथा रणे
tatastānabravaṃ praśrānahaṃ dvādaśa pūrvakān ||
śrutvā te māmavocaṃta līlāyaṃto munīśvarāḥ
||46||ततस्तानब्रवं प्रश्रानहं द्वादश पूर्वकान् ॥
श्रुत्वा ते मामवोचंत लीलायंतो मुनीश्वराः
kiṃ te dvija bālapraśnairamībhiḥ svalpakairapi ||
asmākaṃ yannihīnaṃ tvaṃ manyase sa bravītvamūn
||47||किं ते द्विज बालप्रश्नैरमीभिः स्वल्पकैरपि ॥
अस्माकं यन्निहीनं त्वं मन्यसे स ब्रवीत्वमून्
tatotivismitaścāhaṃ manyamānaḥ kṛtārthatām ||
teṣāṃ nihīnaṃ saṃciṃtya prāvocaṃ prabravītvayam
||48||ततोतिविस्मितश्चाहं मन्यमानः कृतार्थताम् ॥
तेषां निहीनं संचिंत्य प्रावोचं प्रब्रवीत्वयम्
tataḥ sutanunāmā sa bālo'bālo'bhyuvāca mām ||
mama maṃdāyate vāṇī praśnaiḥ svalpaistava dvija ||
tathāpi vacmi māṃ yasmānnihīnaṃ manyate bhavān
||49||ततः सुतनुनामा स बालोऽबालोऽभ्युवाच माम् ॥
मम मंदायते वाणी प्रश्नैः स्वल्पैस्तव द्विज ॥
तथापि वच्मि मां यस्मान्निहीनं मन्यते भवान्
sutanuruvāca
akṣarāstu dvipaṃcāśanmātṛkāyāḥ prakīrtitāḥ
||50||अक्षरास्तु द्विपंचाशन्मातृकायाः प्रकीर्तिताः
oṃkāraḥ prathamastatra caturdaśa svarāstathā ||
sparśāścaiva trayastriṃśadanusvārastathaiva ca
||51||ॐकारः प्रथमस्तत्र चतुर्दश स्वरास्तथा ॥
स्पर्शाश्चैव त्रयस्त्रिंशदनुस्वारस्तथैव च
visarjjanīyaśca paro jihvāmūlīya eva ca ||
upadhmānīya evāpi dvipaṃcāśadamī smṛtāḥ
||52||विसर्ज्जनीयश्च परो जिह्वामूलीय एव च ॥
उपध्मानीय एवापि द्विपंचाशदमी स्मृताः
iti te kathitā saṃkhyā arthaṃ caiṣāṃ śrṛṇu dvija ||
asminnarthe cetihāsaṃ tava vakṣyāmi yaḥ purā
||53||इति ते कथिता संख्या अर्थं चैषां श्रृणु द्विज ॥
अस्मिन्नर्थे चेतिहासं तव वक्ष्यामि यः पुरा
mithilāyāṃ pravṛtto'bhūdbrāhmaṇasya niveśane ||
mithilāyāṃ purā puryāṃ brāhmaṇaḥ kauthumābhidhaḥ
||54||मिथिलायां प्रवृत्तोऽभूद्ब्राह्मणस्य निवेशने ॥
मिथिलायां पुरा पुर्यां ब्राह्मणः कौथुमाभिधः
yena vidyāḥ prapaṭhitā vartaṃte bhuvi yā dvija ||
ekatriṃśatsahasrāṇi varṣāṇāṃ sa kṛtādaraḥ
||55||येन विद्याः प्रपठिता वर्तंते भुवि या द्विज ॥
एकत्रिंशत्सहस्राणि वर्षाणां स कृतादरः
kṣaṇamapyanavacchinnaṃ paṭhitvā gehavānabhūt ||
tataḥ kenāpi kālena kauthumasyābhavatsutaḥ
||56||क्षणमप्यनवच्छिन्नं पठित्वा गेहवानभूत् ॥
ततः केनापि कालेन कौथुमस्याभवत्सुतः
jaḍavadvarttamānaḥ sa mātṛkāṃ pratyapadyata ||
paṭhitvā mātṛkāmanyannādhyeti sa kathaṃcana
||57||जडवद्वर्त्तमानः स मातृकां प्रत्यपद्यत ॥
पठित्वा मातृकामन्यन्नाध्येति स कथंचन
tataḥ pitā khinnarūpī jaḍaṃ taṃ samabhāṣata ||
adhīṣva putrakādhīṣva tava dāsyāmi modakān
||58||ततः पिता खिन्नरूपी जडं तं समभाषत ॥
अधीष्व पुत्रकाधीष्व तव दास्यामि मोदकान्
athānyasmai pradāsyāmi karṇāvutpāṭayāmi te
||59||अथान्यस्मै प्रदास्यामि कर्णावुत्पाटयामि ते
putra uvāca
tāta kiṃ modakārthāya paṭhyate lobhahetave ||
paṭhanaṃnāma yatpuṃsāṃ parāmārthaṃ hi tatsmṛtam
||60||तात किं मोदकार्थाय पठ्यते लोभहेतवे ॥
पठनंनाम यत्पुंसां परामार्थं हि तत्स्मृतम्
kauthuma uvāca
evaṃ te vadamānasya āyurbhavatu brahmaṇaḥ ||
sādhvī buddhiriyaṃ te'stu kuto nādhyeṣyataḥ param
||61||एवं ते वदमानस्य आयुर्भवतु ब्रह्मणः ॥
साध्वी बुद्धिरियं तेऽस्तु कुतो नाध्येष्यतः परम्
putra uvāca
tāta sarvaṃ parijñeyaṃ jñānamatraiva vai yataḥ ||
tataḥ paraṃ kaṃṭhaśoṣaḥ kimarthaṃ kriyate vada
||62||तात सर्वं परिज्ञेयं ज्ञानमत्रैव वै यतः ॥
ततः परं कंठशोषः किमर्थं क्रियते वद
pitovāca
vicitraṃ bhāṣase bāla jñāto'trārthaśca kastvayā ||
brūhi brūhi punarvatsa śrotumicchāmi te giram
||63||विचित्रं भाषसे बाल ज्ञातोऽत्रार्थश्च कस्त्वया ॥
ब्रूहि ब्रूहि पुनर्वत्स श्रोतुमिच्छामि ते गिरम्
putra uvāca
ekatriṃśatsahasrāṇi paṭhitvāpi tvayā pitaḥ ||
nānātarkānbhrāṃtireva saṃdhitā manasi svake
||64||एकत्रिंशत्सहस्राणि पठित्वापि त्वया पितः ॥
नानातर्कान्भ्रांतिरेव संधिता मनसि स्वके
ayamayaṃ cāyamiti dharmo yo darśanoditaḥ ||
teṣu vātāyate cetastava tannāśayāmi te
||65||अयमयं चायमिति धर्मो यो दर्शनोदितः ॥
तेषु वातायते चेतस्तव तन्नाशयामि ते
upadeśaṃ paṭhasyeva naivārthajño'si tattvataḥ ||
pāṭhamātrā hi ye viprā dvipadāḥ paśavo hi te
||66||उपदेशं पठस्येव नैवार्थज्ञोऽसि तत्त्वतः ॥
पाठमात्रा हि ये विप्रा द्विपदाः पशवो हि ते
tatte bravīmi tadvākyaṃ mohamārtaṃḍamadbhutam
||67||तत्ते ब्रवीमि तद्वाक्यं मोहमार्तंडमद्भुतम्
akāraḥ kathito brahmā ukāro viṣṇurucyate ||
makāraśca smṛto rudrastrayaścaite guṇāḥ smṛtāḥ
||68||अकारः कथितो ब्रह्मा उकारो विष्णुरुच्यते ॥
मकारश्च स्मृतो रुद्रस्त्रयश्चैते गुणाः स्मृताः
ardhamātrā ca yā mūrdhni paramaḥ sa sadāśivaḥ ||
evamoṃkāramāhātmyaṃ śrutireṣā sanātanī
||69||अर्धमात्रा च या मूर्ध्नि परमः स सदाशिवः ॥
एवमोंकारमाहात्म्यं श्रुतिरेषा सनातनी
oṃkārasya ca māhātmyaṃ yāthātmyena na śakyate ||
varṣāṇāmayutenāpi graṃthakoṭibhireva vā
||70||ॐकारस्य च माहात्म्यं याथात्म्येन न शक्यते ॥
वर्षाणामयुतेनापि ग्रंथकोटिभिरेव वा
punaryatsārasarvasvaṃ proktaṃ tacchrūyatāṃ param ||
aḥkārāṃtā akārādyā manavaste caturdaśa
||71||पुनर्यत्सारसर्वस्वं प्रोक्तं तच्छ्रूयतां परम् ॥
अःकारांता अकाराद्या मनवस्ते चतुर्दश
svāyaṃbhuvaśca svārocirauttamo raivatastathā ||
tāmasaścākṣuṣaḥ ṣaṣṭhastathā vaivasvato'dhunā
||72||स्वायंभुवश्च स्वारोचिरौत्तमो रैवतस्तथा ॥
तामसश्चाक्षुषः षष्ठस्तथा वैवस्वतोऽधुना
sāvarṇirbrahmasāvarṇī rudrasāvarṇireva ca ||
dakṣasāvarṇirevāpi dharmasāvarṇireva ca
||73||सावर्णिर्ब्रह्मसावर्णी रुद्रसावर्णिरेव च ॥
दक्षसावर्णिरेवापि धर्मसावर्णिरेव च
raucyo bhautyastathā cāpi manavo'mī caturdaśa ||
śvetaḥ pāṃḍustathā raktastāmraḥ pītaśca kāpilaḥ
||74||रौच्यो भौत्यस्तथा चापि मनवोऽमी चतुर्दश ॥
श्वेतः पांडुस्तथा रक्तस्ताम्रः पीतश्च कापिलः
kṛṣṇaḥ śyāmastathā dhūmraḥ supiśaṃgaḥ piśaṃgakaḥ ||
trivarṇaḥ śabalo varṇaiḥ karkaṃdhura iti kramāt
||75||कृष्णः श्यामस्तथा धूम्रः सुपिशंगः पिशंगकः ॥
त्रिवर्णः शबलो वर्णैः कर्कंधुर इति क्रमात्
vaivasvataḥ kṣakāraśca tāta kṛṣṇaḥ pradṛśyate ||
kakārādya hakārāṃtāstrayastriṃśacca devatāḥ
||76||वैवस्वतः क्षकारश्च तात कृष्णः प्रदृश्यते ॥
ककाराद्य हकारांतास्त्रयस्त्रिंशच्च देवताः
kakārādyāṣṭhakārāṃtā ādityā dvādaśa smṛtāḥ ||
dhātā mitro'ryamā śakro varuṇāścāṃśureva ca
||77||ककाराद्याष्ठकारांता आदित्या द्वादश स्मृताः ॥
धाता मित्रोऽर्यमा शक्रो वरुणाश्चांशुरेव च
bhago vivasvānpūṣā ca savitā daśamastathā ||
ekādaśastathā tvaṣṭā viṣṇurdvādaśa ucyate
||78||भगो विवस्वान्पूषा च सविता दशमस्तथा ॥
एकादशस्तथा त्वष्टा विष्णुर्द्वादश उच्यते
jaghanyajaḥ sa sarveṣāmādityānāṃ guṇādhikaḥ ||
ḍakārādyā bakārāṃtā rudrāścaikādaśaiva tu
||79||जघन्यजः स सर्वेषामादित्यानां गुणाधिकः ॥
डकाराद्या बकारांता रुद्राश्चैकादशैव तु
kapālī piṃgalo bhīmo virupākṣo vilohitaḥ ||
ajakaḥ śāsanaḥ śāstā śaṃbhuścaṇḍo bhavastathā
||80||कपाली पिंगलो भीमो विरुपाक्षो विलोहितः ॥
अजकः शासनः शास्ता शंभुश्चण्डो भवस्तथा
bhakārādyāḥ ṣakārāṃtā aṣṭau hi vasavo matāḥ ||
dhruvo ghoraśca somaśca āpaścaiva nalo'nilaḥ
||81||भकाराद्याः षकारांता अष्टौ हि वसवो मताः ॥
ध्रुवो घोरश्च सोमश्च आपश्चैव नलोऽनिलः
pratyūṣaśca prabhāsaśca aṣṭau te vasavaḥ smṛtāḥ ||
sau haścetyaśvinau khyātau trayastriṃśadime smṛtāḥ
||82||प्रत्यूषश्च प्रभासश्च अष्टौ ते वसवः स्मृताः ॥
सौ हश्चेत्यश्विनौ ख्यातौ त्रयस्त्रिंशदिमे स्मृताः
anusvāro visargaśca jihvāmūlīya eva ca ||
upadhmānīya ityete jarāyujāstathāṃḍajāḥ
||83||अनुस्वारो विसर्गश्च जिह्वामूलीय एव च ॥
उपध्मानीय इत्येते जरायुजास्तथांडजाः
svedajāścodbhijāśceti tata jīvāḥ prakīrtitāḥ ||
bhāvārthaḥ kathitaścāyaṃ tattvārthaṃ śrṛṇu sāṃpratam
||84||स्वेदजाश्चोद्भिजाश्चेति तत जीवाः प्रकीर्तिताः ॥
भावार्थः कथितश्चायं तत्त्वार्थं श्रृणु सांप्रतम्
ye pumāṃsastvamūndevānsamāśritya kriyāparāḥ ||
ardhamātrātmake nitye pade līnāsta eva hi
||85||ये पुमांसस्त्वमून्देवान्समाश्रित्य क्रियापराः ॥
अर्धमात्रात्मके नित्ये पदे लीनास्त एव हि
caturṇāṃ jīvayonīnāṃ tadaiva parimucyate ||
yadābhūnmanasā vācā karmaṇā ca yajetsurān
||86||चतुर्णां जीवयोनीनां तदैव परिमुच्यते ॥
यदाभून्मनसा वाचा कर्मणा च यजेत्सुरान्
yasmiñchāstre tvamī devā mānitā naiva pāpibhiḥ ||
tacchāstraṃ hi na maṃtavyaṃ yadi brahmā svayaṃ vadet
||87||यस्मिञ्छास्त्रे त्वमी देवा मानिता नैव पापिभिः ॥
तच्छास्त्रं हि न मंतव्यं यदि ब्रह्मा स्वयं वदेत्
amī ca devāḥ sarvatra śraute mārge pratiṣṭhitāḥ ||
pāṣaṇḍaśāstre sarvatra niṣiddhāḥ pāpakarmabhiḥ
||88||अमी च देवाः सर्वत्र श्रौते मार्गे प्रतिष्ठिताः ॥
पाषण्डशास्त्रे सर्वत्र निषिद्धाः पापकर्मभिः
tadamūnye vyatikramya tapo dānamatho japam ||
prakurvaṃti durātmāno vepate marutaḥ pathi
||89||तदमून्ये व्यतिक्रम्य तपो दानमथो जपम् ॥
प्रकुर्वंति दुरात्मानो वेपते मरुतः पथि
aho mohasya māhātmyaṃ paśyatāvijitātmanām ||
paṭhaṃti mātṛkāṃ pāpā manyaṃte na surāniha
||90||अहो मोहस्य माहात्म्यं पश्यताविजितात्मनाम् ॥
पठंति मातृकां पापा मन्यंते न सुरानिह
sutanuruvāca
iti tasya vacaḥ śrutvā pitābhūdativismitaḥ ||
papraccha ca bahūnpraśrānsopyavādīttathātathā
||91||इति तस्य वचः श्रुत्वा पिताभूदतिविस्मितः ॥
पप्रच्छ च बहून्प्रश्रान्सोप्यवादीत्तथातथा
mayāpi tava prokto'yaṃ mātṛkāpraśra uttamaḥ ||
dvitīyaṃ śrṛṇu taṃ praśnaṃ paṃcapaṃcādbhutaṃ gṛham
||92||मयापि तव प्रोक्तोऽयं मातृकाप्रश्र उत्तमः ॥
द्वितीयं श्रृणु तं प्रश्नं पंचपंचाद्भुतं गृहम्
paṃcabhūtāni pañcaiva karmajñāneṃdriyāṇi ca ||
paṃca paṃcāpi viṣayā manobuddhyahameva ca
||93||पंचभूतानि पञ्चैव कर्मज्ञानेंद्रियाणि च ॥
पंच पंचापि विषया मनोबुद्ध्यहमेव च
prakṛtiḥ puruṣaścaiva pañcaviṃśaḥ sadāśivaḥ ||
pañcapañcabhiretataistu niṣpannaṃ gṛhamucyate
||94||प्रकृतिः पुरुषश्चैव पञ्चविंशः सदाशिवः ॥
पञ्चपञ्चभिरेततैस्तु निष्पन्नं गृहमुच्यते
dehametadidaṃ veda tattvato yātyasau śivam ||
bahurūpāṃ striyaṃ prāhurbuddhiṃ vedāṃtavādinaḥ
||95||देहमेतदिदं वेद तत्त्वतो यात्यसौ शिवम् ॥
बहुरूपां स्त्रियं प्राहुर्बुद्धिं वेदांतवादिनः
sā hi nānārthabhajanānnānārūpaṃ prapadyate ||
dharmasyaikasya saṃyogādbahudhāpyekikaiva sā
||96||सा हि नानार्थभजनान्नानारूपं प्रपद्यते ॥
धर्मस्यैकस्य संयोगाद्बहुधाप्येकिकैव सा
iti yo vede tattvārthaṃ nāsau narakamāpnuyāt ||
munibhiryaśca na proktaṃ yanna manyeta daivatān
||97||इति यो वेदे तत्त्वार्थं नासौ नरकमाप्नुयात् ॥
मुनिभिर्यश्च न प्रोक्तं यन्न मन्येत दैवतान्
vacanaṃ tadbudhāḥ prahurbaṃdhaṃ citrakathaṃ tviti ||
yacca kāmānvitaṃ vākyaṃ paṃcamaṃ vāpyataḥ śruṇu
||98||वचनं तद्बुधाः प्रहुर्बंधं चित्रकथं त्विति ॥
यच्च कामान्वितं वाक्यं पंचमं वाप्यतः श्रुणु
eko lobho mahāngrāho lobhātpāpaṃ pravartate ||
lobhātkrodhaḥ prabhavati lobhātkāmaḥ pravartate
||99||एको लोभो महान्ग्राहो लोभात्पापं प्रवर्तते ॥
लोभात्क्रोधः प्रभवति लोभात्कामः प्रवर्तते
lobhānmohaśca māyā ca mānaḥ stambhaḥ pareṣsutā ||
avidyā'prajñatā caiva sarvaṃ lobhātpravartate
||100||लोभान्मोहश्च माया च मानः स्तम्भः परेष्सुता ॥
अविद्याऽप्रज्ञता चैव सर्वं लोभात्प्रवर्तते
haraṇaṃ paravittānāṃ paradārābhimarśanam ||
sāhasānāṃ ca sarveṣāmakāryāṇaāṃ kriyāstathā
||101||हरणं परवित्तानां परदाराभिमर्शनम् ॥
साहसानां च सर्वेषामकार्याणआं क्रियास्तथा
sa lobhaḥ saha mohena vijetavyo jitātmanā ||
dambho drohaśca niṃdā ca paiśunyaṃ matsarastathā
||102||स लोभः सह मोहेन विजेतव्यो जितात्मना ॥
दम्भो द्रोहश्च निंदा च पैशुन्यं मत्सरस्तथा
bhavantyetāni sarvāṇi lubdhānāmakṛtātmanām ||
sumahāṃ tyapi sāstrāṇi dhārayaṃti bahuśrutāḥ
||103||भवन्त्येतानि सर्वाणि लुब्धानामकृतात्मनाम् ॥
सुमहां त्यपि सास्त्राणि धारयंति बहुश्रुताः
chettāraḥ saṃśayānāṃ ca lobhagrastā vrajaṃtyadhaḥ ||
lobhakrodhaprasaktāśca śiṣṭācārabahiṣkṛtāḥ
||104||छेत्तारः संशयानां च लोभग्रस्ता व्रजंत्यधः ॥
लोभक्रोधप्रसक्ताश्च शिष्टाचारबहिष्कृताः
antaḥkṣurā vāṅmadhurāḥ kūpāśdhannāstṛṇauriva ||
kurvate ye bahūnmārgāṃstāṃstānhetubalanvitāḥ
||105||अन्तःक्षुरा वाङ्मधुराः कूपाश्धन्नास्तृणौरिव ॥
कुर्वते ये बहून्मार्गांस्तांस्तान्हेतुबलन्विताः
sarvamārgaṃ viluṃmapaṃti lobhājjātiṣu niṣṭhurāḥ ||
dharmāvataṃsakāḥ kṣudrā muṣṇaṃti dhvajino jagat
||106||सर्वमार्गं विलुंमपंति लोभाज्जातिषु निष्ठुराः ॥
धर्मावतंसकाः क्षुद्रा मुष्णंति ध्वजिनो जगत्
ete'tipāpino jñeyā nityaṃ lobhasamanvitāḥ ||
janako yuvanāśvaśca vṛṣādarbhiḥ prasenajit
||107||एतेऽतिपापिनो ज्ञेया नित्यं लोभसमन्विताः ॥
जनको युवनाश्वश्च वृषादर्भिः प्रसेनजित्
lobhakṣayāddivaṃ prāptāstathaivānye janādhipāḥ ||
tasmāttyajaṃti ye lobhaṃ te'tikrāmaṃti sāgaram
||108||लोभक्षयाद्दिवं प्राप्तास्तथैवान्ये जनाधिपाः ॥
तस्मात्त्यजंति ये लोभं तेऽतिक्रामंति सागरम्
saṃsārākhyamato'naye ye grāhagrastā na saṃśayaḥ ||
atha brāhmaṇabhedāṃstvamaṣṭo viprāvadhāraya
||109||संसाराख्यमतोऽनये ये ग्राहग्रस्ता न संशयः ॥
अथ ब्राह्मणभेदांस्त्वमष्टो विप्रावधारय
mātraśca brāhmaṇaścaiva śrotriyaśca tataḥ param ||
anūcānastathā bhrūṇa ṛṣikalpa ṛṣirmuniḥ
||110||मात्रश्च ब्राह्मणश्चैव श्रोत्रियश्च ततः परम् ॥
अनूचानस्तथा भ्रूण ऋषिकल्प ऋषिर्मुनिः
ete hyaṣṭau samuddiṣṭā brāhmaṇāḥ prathamaṃ śrutau ||
teṣāṃ paraḥ paraḥ śreṣṭho vidyāvṛttaviśeṣataḥ
||111||एते ह्यष्टौ समुद्दिष्टा ब्राह्मणाः प्रथमं श्रुतौ ॥
तेषां परः परः श्रेष्ठो विद्यावृत्तविशेषतः
brāhmaṇānāṃ kule jāto jātimātro yadā bhavet ||
anupetaḥ kriyāhīno mātra ityabhidhīyate
||112||ब्राह्मणानां कुले जातो जातिमात्रो यदा भवेत् ॥
अनुपेतः क्रियाहीनो मात्र इत्यभिधीयते
ekoddeśyamatikramya vedasyācāravānṛjuḥ ||
sa brāhmaṇa iti prokto nibhṛtaḥ satyavāgghṛṇī
||113||एकोद्देश्यमतिक्रम्य वेदस्याचारवानृजुः ॥
स ब्राह्मण इति प्रोक्तो निभृतः सत्यवाग्घृणी
ekāṃ śākhāṃ sakalpāṃ ca ṣaḍbhiraṃgairadhītya ca ||
ṣaṭkarmanirato vipraḥ śrotriyonāma dharmavit
||114||एकां शाखां सकल्पां च षड्भिरंगैरधीत्य च ॥
षट्कर्मनिरतो विप्रः श्रोत्रियोनाम धर्मवित्
vedavedāṃgatattvajñaḥ śuddhātmā pāpavarjitaḥ ||
śreṣṭhaḥ śrotriyavānprājñaḥ so'nūcāna iti smṛtaḥ
||115||वेदवेदांगतत्त्वज्ञः शुद्धात्मा पापवर्जितः ॥
श्रेष्ठः श्रोत्रियवान्प्राज्ञः सोऽनूचान इति स्मृतः
anūcānaguṇopeto yajñasvādhyāyayaṃtritaḥ ||
bhrūṇa ityucyate śiṣṭaiḥ śeṣabhojī jiteṃdriyaḥ
||116||अनूचानगुणोपेतो यज्ञस्वाध्याययंत्रितः ॥
भ्रूण इत्युच्यते शिष्टैः शेषभोजी जितेंद्रियः
vaidikaṃ laukikaṃ caiva sarvajñānamavāpya yaḥ ||
āśramastho vaśī nityamṛṣikalpa iti smṛtaḥ
||117||वैदिकं लौकिकं चैव सर्वज्ञानमवाप्य यः ॥
आश्रमस्थो वशी नित्यमृषिकल्प इति स्मृतः
ūrdhvaretā bhavatyagryo niyatāśī nasaṃśa yī ||
śāpānugrahayoḥ śaktaḥ satyasaṃdho bhavedṛṣiḥ
||118||ऊर्ध्वरेता भवत्यग्र्यो नियताशी नसंश यी ॥
शापानुग्रहयोः शक्तः सत्यसंधो भवेदृषिः
nivṛttaḥ sarvatattvajñaḥ kāmakrodhavivarjitaḥ ||
dhyānasthāniṣkriyo dāṃtastulyamṛtkāṃcano muniḥ
||119||निवृत्तः सर्वतत्त्वज्ञः कामक्रोधविवर्जितः ॥
ध्यानस्थानिष्क्रियो दांतस्तुल्यमृत्कांचनो मुनिः
evamanvayavidyābhyāṃ vṛttena ca samucchritāḥ ||
triśuklānāma vipreṃdrāḥ pūjyante savanādiṣu
||120||एवमन्वयविद्याभ्यां वृत्तेन च समुच्छ्रिताः ॥
त्रिशुक्लानाम विप्रेंद्राः पूज्यन्ते सवनादिषु
ityevaṃvidhavipratvamuktaṃ śrṛṇu yugādayaḥ ||
navamī kārtike śuklā kṛtādiḥ parikīrtitā
||121||इत्येवंविधविप्रत्वमुक्तं श्रृणु युगादयः ॥
नवमी कार्तिके शुक्ला कृतादिः परिकीर्तिता
vaiśākhasya tṛtīyā yā śuklā tretādirucyate ||
māghe pañcadaśīnāma dvāparādiḥ smṛtā budhaiḥ
||122||वैशाखस्य तृतीया या शुक्ला त्रेतादिरुच्यते ॥
माघे पञ्चदशीनाम द्वापरादिः स्मृता बुधैः
trayodaśī nabhasye ca kṛṣṇā sā hi kaleḥ smṛtā ||
yugādayaḥ smṛtā hyetā dattasyākṣayakārakāḥ
||123||त्रयोदशी नभस्ये च कृष्णा सा हि कलेः स्मृता ॥
युगादयः स्मृता ह्येता दत्तस्याक्षयकारकाः
etāścatasrastithayo yugādyā dattaṃ hutaṃ cākṣayamāśu vidyāt ||
yugeyuge varṣaśatena dānaṃ yugādikāle divasena tatphalam
||124||एताश्चतस्रस्तिथयो युगाद्या दत्तं हुतं चाक्षयमाशु विद्यात् ॥
युगेयुगे वर्षशतेन दानं युगादिकाले दिवसेन तत्फलम्
yugādyāḥ kathitā hyetā manvādyāḥ śrṛṇu sāṃpratam ||
aśvayukchuklanavamī dvādaśī kārtike tathā
||125||युगाद्याः कथिता ह्येता मन्वाद्याः श्रृणु सांप्रतम् ॥
अश्वयुक्छुक्लनवमी द्वादशी कार्तिके तथा
tṛtīyā caitramāsasya tathā bhādrapadasya ca ||
phālgunasya tvamāvāsyā pauṣasyaikādaśī tathā
||126||तृतीया चैत्रमासस्य तथा भाद्रपदस्य च ॥
फाल्गुनस्य त्वमावास्या पौषस्यैकादशी तथा
āṣāḍhasyāpi daśamī māghamāsasya saptamī ||
śrāvaṇasyāṣṭamī kṛṣṇā tathāṣāḍhī ca pūrṇimā
||127||आषाढस्यापि दशमी माघमासस्य सप्तमी ॥
श्रावणस्याष्टमी कृष्णा तथाषाढी च पूर्णिमा
kārtikī phālgunī caitrī jyeṣṭhe pañcadaśī sitā ||
manvaṃtarādayaścaitā dattasyākṣayakārakāḥ
||128||कार्तिकी फाल्गुनी चैत्री ज्येष्ठे पञ्चदशी सिता ॥
मन्वंतरादयश्चैता दत्तस्याक्षयकारकाः
yasyāṃ tithau rathaṃ pūrvaṃ prāpa devo divākaraḥ ||
sā tithiḥ kathitā viprairmāghe yā rathasaptamī
||129||यस्यां तिथौ रथं पूर्वं प्राप देवो दिवाकरः ॥
सा तिथिः कथिता विप्रैर्माघे या रथसप्तमी
tasyāṃ dattaṃ hutaṃ ceṣṭaṃ sarvamevākṣayaṃ matam ||
sarvadāridryaśamanaṃ bhāskaraprītaye matam
||130||तस्यां दत्तं हुतं चेष्टं सर्वमेवाक्षयं मतम् ॥
सर्वदारिद्र्यशमनं भास्करप्रीतये मतम्
nityodvejakamāhuryaṃ budhāstaṃ śrṛṇu tattvataḥ ||
yaśca yācaniko nityaṃ na sa svargasya bhājanam
||131||नित्योद्वेजकमाहुर्यं बुधास्तं श्रृणु तत्त्वतः ॥
यश्च याचनिको नित्यं न स स्वर्गस्य भाजनम्
udvejayati bhūtāni yathā caurāstathaiva saḥ ||
narakaṃ yāti pāpātmā nityodvegakarastvasau
||132||उद्वेजयति भूतानि यथा चौरास्तथैव सः ॥
नरकं याति पापात्मा नित्योद्वेगकरस्त्वसौ
ihopapattirmama kena karmaṇā kva ca prayātavyamito mayeti ||
vicārya caivaṃ pratikārakārī budhaiḥ sa cokto dvija dakṣadakṣaḥ
||133||इहोपपत्तिर्मम केन कर्मणा क्व च प्रयातव्यमितो मयेति ॥
विचार्य चैवं प्रतिकारकारी बुधैः स चोक्तो द्विज दक्षदक्षः
māsairaṣṭabhirahnā ca pūrveṇa vayasāyuṣā ||
tatkarma puruṣaḥ kuryādyenāṃte sukhamedhate
||134||मासैरष्टभिरह्ना च पूर्वेण वयसायुषा ॥
तत्कर्म पुरुषः कुर्याद्येनांते सुखमेधते
arcirdhūmaśca mārgau dvāvāhurvedāṃtavādinaḥ ||
arciṣā yāti mokṣaṃ ca dhūmenāvartate punaḥ
||135||अर्चिर्धूमश्च मार्गौ द्वावाहुर्वेदांतवादिनः ॥
अर्चिषा याति मोक्षं च धूमेनावर्तते पुनः
yajñairāsādyate dhūmo naiṣkarmyeṇārcirāpyate ||
etayoraparo mārgaḥ pākhaṃḍa iti kīrtyate
||136||यज्ञैरासाद्यते धूमो नैष्कर्म्येणार्चिराप्यते ॥
एतयोरपरो मार्गः पाखंड इति कीर्त्यते
yo devānmanyate naiva dharmāṃśca manusūcitān ||
naitau sa yāti paṃthānau tattvārtho'yaṃ nirūpitaḥ
||137||यो देवान्मन्यते नैव धर्मांश्च मनुसूचितान् ॥
नैतौ स याति पंथानौ तत्त्वार्थोऽयं निरूपितः
ite te kīrtitāḥ praśrāḥ śaktyā brāhmaṇasattama ||
sādhu vā'sādhu vā brūhī khyāpayātmānameva ca
||138||इते ते कीर्तिताः प्रश्राः शक्त्या ब्राह्मणसत्तम ॥
साधु वाऽसाधु वा ब्रूही ख्यापयात्मानमेव च
iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kalāpagrāmavāsisutanubrāhmaṇena nāradapraśnottarakathanaṃnāma paṃcamo'dhyāyaḥ || 5 ||