atha vṛtte vivāhe tu bhavasyāmitatejasaḥ
sanatkumāra uvāca
atha vṛtte vivāhe tu bhavasyāmitatejasaḥ |
praharṣamatulaṃ gatvā devāḥ sahapitāmahāḥ |
tuṣṭuvurvāgbhiriṣṭābhiḥ praṇamanto maheśvaram
||1||अथ वृत्ते विवाहे तु भवस्यामिततेजसः ।
प्रहर्षमतुलं गत्वा देवाः सहपितामहाः ।
तुष्टुवुर्वाग्भिरिष्टाभिः प्रणमन्तो महेश्वरम्
namaḥ parvataliṅgāya parvateśāya vai namaḥ |
namaḥ pavanavegāya virūpāyājitāya ca
||2||नमः पर्वतलिङ्गाय पर्वतेशाय वै नमः ।
नमः पवनवेगाय विरूपायाजिताय च
namaḥ kleśavināśāya dātre ca śubhasampadām |
namo nīlaśikhaṇḍāya ambikāpataye namaḥ
||3||नमः क्लेशविनाशाय दात्रे च शुभसम्पदाम् ।
नमो नीलशिखण्डाय अम्बिकापतये नमः
namaḥ pavanarūpāya śatarūpāya vai namaḥ |
namo bhairavarūpāya virūpanayanāya ca
||4||नमः पवनरूपाय शतरूपाय वै नमः ।
नमो भैरवरूपाय विरूपनयनाय च
namaḥ sahasranetrāya sahasracaraṇāya ca |
namo vedarahasyāya vedāṅgāya namo namaḥ
||5||नमः सहस्रनेत्राय सहस्रचरणाय च ।
नमो वेदरहस्याय वेदाङ्गाय नमो नमः
viṣṭambhanāya śakrasya bāhorvedāṅkurāya ca |
carācarādhipataye śamanāya namo namaḥ
||6||विष्टम्भनाय शक्रस्य बाहोर्वेदाङ्कुराय च ।
चराचराधिपतये शमनाय नमो नमः
salileśayaliṅgāya yugāntāyataliṅgine |
namaḥ kapālamālāya kapālasragmiṇe namaḥ
||7||सलिलेशयलिङ्गाय युगान्तायतलिङ्गिने ।
नमः कपालमालाय कपालस्रग्मिणे नमः
namaḥ kapālahastāya daṃṣṭriṇe gadine namaḥ |
namastrailokyavāhāya saptalokarathāya ca
||8||नमः कपालहस्ताय दंष्ट्रिणे गदिने नमः ।
नमस्त्रैलोक्यवाहाय सप्तलोकरथाय च
namaḥ khaṭvāṅgahastāya pramathārtiharāya ca |
namo yajñaśirohartre kṛṣṇakeśāpahāriṇe
||9||नमः खट्वाङ्गहस्ताय प्रमथार्तिहराय च ।
नमो यज्ञशिरोहर्त्रे कृष्णकेशापहारिणे
bhaganetranipātāya pūṣṇo dantaharāya ca |
namaḥ pinākaśūlāsikhaḍgamudgaradhāriṇe
||10||भगनेत्रनिपाताय पूष्णो दन्तहराय च ।
नमः पिनाकशूलासिखड्गमुद्गरधारिणे
namo'stu kālakālāya tṛtīyanayanāya ca |
antakāntakṛte caiva namaḥ parvatavāsine
||11||नमोऽस्तु कालकालाय तृतीयनयनाय च ।
अन्तकान्तकृते चैव नमः पर्वतवासिने
suvarṇaretase caiva sarpakuṇḍaladhāriṇe |
vāḍvaleryoganāśāya yogināṃ gurave namaḥ
||12||सुवर्णरेतसे चैव सर्पकुण्डलधारिणे ।
वाड्वलेर्योगनाशाय योगिनां गुरवे नमः
śaśāṅkādityanetrāya lalāṭanayanāya ca |
namaḥ śmaśānarataye śmaśānavaradāya ca
||13||शशाङ्कादित्यनेत्राय ललाटनयनाय च ।
नमः श्मशानरतये श्मशानवरदाय च
namo daivatanāthāya tryambakāya namo namaḥ |
aśanīśatahāsāya brahmaṇyāyājitāya ca
||14||नमो दैवतनाथाय त्र्यम्बकाय नमो नमः ।
अशनीशतहासाय ब्रह्मण्यायाजिताय च
gṛhasthasādhave nityaṃ jaṭine brahmacāriṇe |
namo muṇḍārdhamuṇḍāya paśūnāṃ pataye namaḥ
||15||गृहस्थसाधवे नित्यं जटिने ब्रह्मचारिणे ।
नमो मुण्डार्धमुण्डाय पशूनां पतये नमः
salile tapyamānāya yogaiśvaryapradāya ca |
namaḥ śāntāya dāntāya pralayotpattikāriṇe
||16||सलिले तप्यमानाय योगैश्वर्यप्रदाय च ।
नमः शान्ताय दान्ताय प्रलयोत्पत्तिकारिणे
namo'nugrahakartre ca sthitikartre namo namaḥ |
namo rudrāya vasave ādityāyāśvine namaḥ
||17||नमोऽनुग्रहकर्त्रे च स्थितिकर्त्रे नमो नमः ।
नमो रुद्राय वसवे आदित्यायाश्विने नमः
namaḥ pitre'tha sādhyāya viśvedevāya vai namaḥ |
namaḥ śarvāya sarvāya ugrāya varadāya ca
||18||नमः पित्रेऽथ साध्याय विश्वेदेवाय वै नमः ।
नमः शर्वाय सर्वाय उग्राय वरदाय च
namo bhīmāya senānye paśūnāṃ pataye namaḥ |
śucaye rerihāṇāya sadyojātāya vai namaḥ
||19||नमो भीमाय सेनान्ये पशूनां पतये नमः ।
शुचये रेरिहाणाय सद्योजाताय वै नमः
mahādevāya citrāya namaścitrarathāya ca |
pradhānāya prameyāya kāryāya karaṇāya ca
||20||महादेवाय चित्राय नमश्चित्ररथाय च ।
प्रधानाय प्रमेयाय कार्याय करणाय च
puruṣāya namaste'stu puruṣecchākarāya ca |
namaḥ puruṣasaṃyogapradhānaguṇakāriṇe
||21||पुरुषाय नमस्तेऽस्तु पुरुषेच्छाकराय च ।
नमः पुरुषसंयोगप्रधानगुणकारिणे
pravartakāya prakṛteḥ puruṣasya ca sarvaśaḥ |
kṛtākṛtasya saṃvettre phalasaṃyogadāya ca
||22||प्रवर्तकाय प्रकृतेः पुरुषस्य च सर्वशः ।
कृताकृतस्य संवेत्त्रे फलसंयोगदाय च
kālajñāya ca sarvatra namo niyamakāriṇe |
namo vaiṣamyakartre ca guṇānāṃ vṛttidāya ca
||23||कालज्ञाय च सर्वत्र नमो नियमकारिणे ।
नमो वैषम्यकर्त्रे च गुणानां वृत्तिदाय च
namaste devadeveśa namaste bhūtabhāvana |
śivaḥ saumyaḥ sukho draṣṭuṃ bhava somo hi naḥ prabho
||24||नमस्ते देवदेवेश नमस्ते भूतभावन ।
शिवः सौम्यः सुखो द्रष्टुं भव सोमो हि नः प्रभो
sanatkumāra uvāca
evaṃ sa bhagavāndevo jagatpatirumāpatiḥ |
stūyamānaḥ suraiḥ sarvairamarānidamabravīt
||25||एवं स भगवान्देवो जगत्पतिरुमापतिः ।
स्तूयमानः सुरैः सर्वैरमरानिदमब्रवीत्
draṣṭuṃ sukhaśca saumyaśca devānāmasmi bho surāḥ |
varaṃ brūta yatheṣṭaṃ ca dātāsmi vadatānaghāḥ
||26||द्रष्टुं सुखश्च सौम्यश्च देवानामस्मि भो सुराः ।
वरं ब्रूत यथेष्टं च दातास्मि वदतानघाः
tataste praṇatāḥ sarve ūcuḥ sabrahmakāḥ surāḥ |
tavaiva bhagavanhaste vara eṣo'vatiṣṭhatām |
yadā kāryaṃ tadā nastvaṃ dāsyase varamīpsitam
||27||ततस्ते प्रणताः सर्वे ऊचुः सब्रह्मकाः सुराः ।
तवैव भगवन्हस्ते वर एषोऽवतिष्ठताम् ।
यदा कार्यं तदा नस्त्वं दास्यसे वरमीप्सितम्
evamastviti tānuktvā visṛjya ca surānharaḥ |
lokāṃśca pramathaiḥ sārdhaṃ viveśa bhavanaṃ tataḥ
||28||एवमस्त्विति तानुक्त्वा विसृज्य च सुरान्हरः ।
लोकांश्च प्रमथैः सार्धं विवेश भवनं ततः
yastu harotsavamadbhutametaṃ gāyati daivataviprasamakṣam |
so'pratirūpagaṇeśasamāno dehaviparyayametya sukhī syāt
||29||यस्तु हरोत्सवमद्भुतमेतं गायति दैवतविप्रसमक्षम् ।
सोऽप्रतिरूपगणेशसमानो देहविपर्ययमेत्य सुखी स्यात्
sanatkumāra uvāca
pārāśarya stavaṃ hīdaṃ śṛṇuyādyaḥ paṭheta vā |
sa svargalokago devaiḥ pūjyate'mararāḍiva
||30||पाराशर्य स्तवं हीदं शृणुयाद्यः पठेत वा ।
स स्वर्गलोकगो देवैः पूज्यतेऽमरराडिव
iti skandapurāṇe caturdaśamo'dhyāyaḥ ||