satyasaṃdheśvaramāhātmyavarṇanam
sūta uvāca
evaṃ tasya tapasthasya putryā saha dvijottamāḥ ||
ājagmurbrāhmaṇāḥ sarve camatkārapurodbhavāḥ
||1||एवं तस्य तपस्थस्य पुत्र्या सह द्विजोत्तमाः ॥
आजग्मुर्ब्राह्मणाः सर्वे चमत्कारपुरोद्भवाः
brāhmaṇā ūcuḥ
sandeheṣu ca sarveṣu vivādeṣu viśeṣataḥ ||
abhāvātpārthivendrasya saṃjātaśca parābhavaḥ
||2||सन्देहेषु च सर्वेषु विवादेषु विशेषतः ॥
अभावात्पार्थिवेन्द्रस्य संजातश्च पराभवः
tataśca dvijavaryaiḥ sa saṃnyastaḥ pṛthivīpatiḥ ||
pṛṣṭaśca prārthitaścaiva nijarājyasya rakṣaṇe ||
anyasmindivase prāha kṛtāṃjalipuṭaḥ sthitaḥ
||3||ततश्च द्विजवर्यैः स संन्यस्तः पृथिवीपतिः ॥
पृष्टश्च प्रार्थितश्चैव निजराज्यस्य रक्षणे ॥
अन्यस्मिन्दिवसे प्राह कृतांजलिपुटः स्थितः
rājovāca
anarho'haṃ dvijaśreṣṭhāḥ saṃdehaṃ hartumeva vaḥ ||
rakṣāṃ kartuṃ viśeṣeṇa tyaktaśastro'smi cādhunā
||4||अनर्होऽहं द्विजश्रेष्ठाः संदेहं हर्तुमेव वः ॥
रक्षां कर्तुं विशेषेण त्यक्तशस्त्रोऽस्मि चाधुना
brāhmaṇā ūcuḥ
sarve vayaṃ mahārāja bhūpasyāpyadhikā yataḥ ||
ahaṃkāreṇa darpeṇa nijaṃ sthānaṃ samāśritāḥ
||5||सर्वे वयं महाराज भूपस्याप्यधिका यतः ॥
अहंकारेण दर्पेण निजं स्थानं समाश्रिताः
na kasyacinmahārāja kadāpi ca kathaṃcana ||
vartanāyāśca sandehaḥ sthānakṛtye'pi saṃsthitaḥ
||6||न कस्यचिन्महाराज कदापि च कथंचन ॥
वर्तनायाश्च सन्देहः स्थानकृत्येऽपि संस्थितः
asaṃkhyātā kṛtā vṛttiḥ purā'smākaṃ mahātmanā ||
tataḥ sā vṛddhimānītā tatparaiḥ pārthivottamaiḥ
||7||असंख्याता कृता वृत्तिः पुराऽस्माकं महात्मना ॥
ततः सा वृद्धिमानीता तत्परैः पार्थिवोत्तमैः
tvayā caiva viśeṣeṇa yāvadrājā bṛhadbalaḥ ||
ānartaviṣaye rājā yo yaḥ syātsa prayacchati
||8||त्वया चैव विशेषेण यावद्राजा बृहद्बलः ॥
आनर्तविषये राजा यो यः स्यात्स प्रयच्छति
sarvāṃ vṛttiṃ gṛhasthānāṃ yathāyogyaṃ prayatnataḥ ||
tavāgre kiṃ vayaṃ brūmastvaṃ vetsi sakalaṃ yataḥ
||9||सर्वां वृत्तिं गृहस्थानां यथायोग्यं प्रयत्नतः ॥
तवाग्रे किं वयं ब्रूमस्त्वं वेत्सि सकलं यतः
yathā vṛttiḥ purā dattā yathā saṃrakṣitā tvayā ||
tasmāccintaya rājendra sthānaṃ vartanasaṃbhavam ||
upāyaṃ yena maryādā vṛttistasmātsukhena tu
||10||यथा वृत्तिः पुरा दत्ता यथा संरक्षिता त्वया ॥
तस्माच्चिन्तय राजेन्द्र स्थानं वर्तनसंभवम् ॥
उपायं येन मर्यादा वृत्तिस्तस्मात्सुखेन तु
tataḥ sa suciraṃ dhyātvā gartātīrthasamudbhavān ||
ākāryopamanyuvaṃśasya saṃbhavānvedapāragān
||11||ततः स सुचिरं ध्यात्वा गर्तातीर्थसमुद्भवान् ॥
आकार्योपमन्युवंशस्य संभवान्वेदपारगान्
praṇipātaṃ prakṛtvātha tataḥ provāca sādaram ||
madīyasthāna saṃsthānāṃ brāhmaṇānāṃ viśeṣataḥ
||12||प्रणिपातं प्रकृत्वाथ ततः प्रोवाच सादरम् ॥
मदीयस्थान संस्थानां ब्राह्मणानां विशेषतः
sarvakṛtyāni kāryāṇi bhṛtyavadvinayānvitaiḥ ||
nityaṃ rakṣā vidhātavyā yuṣmadīyaṃ vacokhilam
||13||सर्वकृत्यानि कार्याणि भृत्यवद्विनयान्वितैः ॥
नित्यं रक्षा विधातव्या युष्मदीयं वचोखिलम्
ete saṃpālayiṣyanti maryādākāramuttamam ||
sandeheṣu ca sarveṣu vivādeṣu viśeṣataḥ
||14||एते संपालयिष्यन्ति मर्यादाकारमुत्तमम् ॥
सन्देहेषु च सर्वेषु विवादेषु विशेषतः
rājakāryeṣu cānyeṣu ete dāsyanti nirṇayam ||
yuṣmadīyaṃ vacaḥ śrutvā śubhaṃ vā yadi vā'śubham
||15||राजकार्येषु चान्येषु एते दास्यन्ति निर्णयम् ॥
युष्मदीयं वचः श्रुत्वा शुभं वा यदि वाऽशुभम्
ete pālyāḥ prasādena puṣṭiṃ neyāśca śaktitaḥ ||
īrṣyāṃ sarvāṃ parityajya madīyasthānavṛddhaye
||16||एते पाल्याः प्रसादेन पुष्टिं नेयाश्च शक्तितः ॥
ईर्ष्यां सर्वां परित्यज्य मदीयस्थानवृद्धये
bāḍhamityeva taiḥ proktaḥ sa rājā brāhmaṇottamān ||
camatkāpurodbhūtānbhūyaḥ provāca sādaram
||17||बाढमित्येव तैः प्रोक्तः स राजा ब्राह्मणोत्तमान् ॥
चमत्कापुरोद्भूतान्भूयः प्रोवाच सादरम्
yuṣmākaṃ vartanārthāya sarvakṛtyeṣu sarvadā ||
ete viprā mayā dattā gartātīrthasamudbhavāḥ
||18||युष्माकं वर्तनार्थाय सर्वकृत्येषु सर्वदा ॥
एते विप्रा मया दत्ता गर्तातीर्थसमुद्भवाः
eteṣāṃ vacanātsarvaṃ yuṣmadīyaṃ prajāyatām ||
pratiṣṭhā jāyate nūnaṃ cātuścaraṇasūcitā
||19||एतेषां वचनात्सर्वं युष्मदीयं प्रजायताम् ॥
प्रतिष्ठा जायते नूनं चातुश्चरणसूचिता
nānyathā brāhmaṇaśreṣṭhāḥ svalpaṃ vā yadi vā bahu ||
proktaṃ lakṣamitairanyairyuṣmadīyapurodbhavaiḥ
||20||नान्यथा ब्राह्मणश्रेष्ठाः स्वल्पं वा यदि वा बहु ॥
प्रोक्तं लक्षमितैरन्यैर्युष्मदीयपुरोद्भवैः
sūta uvāca
tataste brāhmaṇā hṛṣṭāstānādāya dvijottamān ||
teṣāṃ matena cakruśca sarvakṛtyāni sarvadā
||21||ततस्ते ब्राह्मणा हृष्टास्तानादाय द्विजोत्तमान् ॥
तेषां मतेन चक्रुश्च सर्वकृत्यानि सर्वदा
tatastatra pure jātā maryādā dharmavarddhinī ||
sarvakṛtyeṣu sarveṣāṃ tathā vṛddhiḥ purasya ca
||22||ततस्तत्र पुरे जाता मर्यादा धर्मवर्द्धिनी ॥
सर्वकृत्येषु सर्वेषां तथा वृद्धिः पुरस्य च
te'pi teṣāṃ prasādena garttātīrthabhavā dvijāḥ ||
parāṃ vibhūtimāsthāya modante sukhasaṃyutāḥ
||23||तेऽपि तेषां प्रसादेन गर्त्तातीर्थभवा द्विजाः ॥
परां विभूतिमास्थाय मोदन्ते सुखसंयुताः
kasyacittvatha kālasya sa rājā tatpurottamam ||
samabhyetya dvijānsarvāṃstataḥ provāca sādaram
||24||कस्यचित्त्वथ कालस्य स राजा तत्पुरोत्तमम् ॥
समभ्येत्य द्विजान्सर्वांस्ततः प्रोवाच सादरम्
yuṣmadīyaprasādena kṣetre'tra sumahattapaḥ ||
kṛtaṃ svargaṃ prayāsyāmi sāṃprataṃ tu dvijottamāḥ
||25||युष्मदीयप्रसादेन क्षेत्रेऽत्र सुमहत्तपः ॥
कृतं स्वर्गं प्रयास्यामि सांप्रतं तु द्विजोत्तमाः
nāsmākamanvaye kaścitsāṃprataṃ vartate nṛpaḥ ||
tasyāhaṃ liṃgametadvai darśayāmi dvijottamāḥ
||26||नास्माकमन्वये कश्चित्सांप्रतं वर्तते नृपः ॥
तस्याहं लिंगमेतद्वै दर्शयामि द्विजोत्तमाः
pūjārthaṃ cāpi vṛttyarthaṃ bhogārthaṃ ca viśeṣataḥ ||
tasmādyuṣmābhirevāsya pūjā kāryā prayatnataḥ ||
rathayātrā viśeṣeṇa dayāṃ kṛtvā mamopari
||27||पूजार्थं चापि वृत्त्यर्थं भोगार्थं च विशेषतः ॥
तस्माद्युष्माभिरेवास्य पूजा कार्या प्रयत्नतः ॥
रथयात्रा विशेषेण दयां कृत्वा ममोपरि
brāhmaṇā ūcuḥ
sapta viṃśatiliṃgāni yatheṣṭāni mahītale ||
camatkārasutānāṃ ca pūjyaṃte sarvadaiva tu
||28||सप्त विंशतिलिंगानि यथेष्टानि महीतले ॥
चमत्कारसुतानां च पूज्यंते सर्वदैव तु
aṣṭāviṃśatimaṃ tadvadetalliṃgaṃ tavodbhavam ||
sarvadā pūjayiṣyāmo niścinto bhava pārthiva
||29||अष्टाविंशतिमं तद्वदेतल्लिंगं तवोद्भवम् ॥
सर्वदा पूजयिष्यामो निश्चिन्तो भव पार्थिव
asya yātrāṃ kariṣyāmaḥ kārtike māsi sarvadā ||
balipūjopahārāṃśca gītavādyāni śaktitaḥ
||30||अस्य यात्रां करिष्यामः कार्तिके मासि सर्वदा ॥
बलिपूजोपहारांश्च गीतवाद्यानि शक्तितः
evamuktaḥ sa tairhṛṣṭo gatvātmīyaṃ tadāśramam ||
snāpayitvātha talliṃgaṃ pūjāṃ cakre prabhaktitaḥ
||31||एवमुक्तः स तैर्हृष्टो गत्वात्मीयं तदाश्रमम् ॥
स्नापयित्वाथ तल्लिंगं पूजां चक्रे प्रभक्तितः
sūta uvāca
evaṃ samarpitaṃ liṃgaṃ tena taddharasaṃbhavam ||
sarveṣāṃ brāhmaṇeṃdrāṇāṃ vaṃśocchede sthite dvijāḥ
||32||एवं समर्पितं लिंगं तेन तद्धरसंभवम् ॥
सर्वेषां ब्राह्मणेंद्राणां वंशोच्छेदे स्थिते द्विजाः
sakalaṃ kārtikaṃ martyo yastacchraddhāsamanvitaḥ ||
snāpayetpūjayeccāpi sa nūnaṃ muktimāpnuyāt
||33||सकलं कार्तिकं मर्त्यो यस्तच्छ्रद्धासमन्वितः ॥
स्नापयेत्पूजयेच्चापि स नूनं मुक्तिमाप्नुयात्
somasya divase prāpte varṣaṃ yāvatkṛtakṣaṇaḥ ||
tasya pūjāṃ karotyevaṃ snāpayitvā vidhānataḥ ||
so'pi muktiṃ vrajenmartya etattātānmayā śrutam
||34||सोमस्य दिवसे प्राप्ते वर्षं यावत्कृतक्षणः ॥
तस्य पूजां करोत्येवं स्नापयित्वा विधानतः ॥
सोऽपि मुक्तिं व्रजेन्मर्त्य एतत्तातान्मया श्रुतम्
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye satyasaṃdheśvaramāhātmyavarṇanaṃnāma ṣaḍviṃśatyadhikaśatatamo'dhyāyaḥ || 126 ||