viśvāmitrasamudbhūtaṃ kuṇḍaṃ tatrāparaṃ śubham
sūta uvāca
viśvāmitrasamudbhūtaṃ kuṇḍaṃ tatrāparaṃ śubham ||
saṃtiṣṭhate dvijaśreṣṭhāḥ sarvakāmapradāyakam
||1||विश्वामित्रसमुद्भूतं कुण्डं तत्रापरं शुभम् ॥
संतिष्ठते द्विजश्रेष्ठाः सर्वकामप्रदायकम्
tatra caitratṛtīyāyāṃ kṛte snāne bhavennaraḥ ||
divyarūpadharaḥ sākṣātkāmo'nyo dvijasattamāḥ
||2||तत्र चैत्रतृतीयायां कृते स्नाने भवेन्नरः ॥
दिव्यरूपधरः साक्षात्कामोऽन्यो द्विजसत्तमाः
nārī vā śraddhayopetā tatra snātvā prajāvatī ||
bhavetsaubhāgyasaṃyuktā spṛhaṇīyatamā kṣitau
||3||नारी वा श्रद्धयोपेता तत्र स्नात्वा प्रजावती ॥
भवेत्सौभाग्यसंयुक्ता स्पृहणीयतमा क्षितौ
ṛṣaya ūcuḥ
tīrthaṃ tasya munestatra kasminkāle vyavasthitam ||
nirmalaṃ kena niḥśeṣaṃ vada tvaṃ sūtanaṃdana
||4||तीर्थं तस्य मुनेस्तत्र कस्मिन्काले व्यवस्थितम् ॥
निर्मलं केन निःशेषं वद त्वं सूतनंदन
sūta uvāca
tatrāsti nirjharaḥ pūrvaṃ sāmānyo dvijasattamāḥ ||
avadhūto dharāpṛṣṭhe māhātmyena vyavasthitaḥ
||5||तत्रास्ति निर्झरः पूर्वं सामान्यो द्विजसत्तमाः ॥
अवधूतो धरापृष्ठे माहात्म्येन व्यवस्थितः
yatra devanadī gaṃgā svayameva vyavasthitā ||
yasyāṃ snātaḥ pumānsadyaḥ sarvapāpaiḥ pramucyate
||6||यत्र देवनदी गंगा स्वयमेव व्यवस्थिता ॥
यस्यां स्नातः पुमान्सद्यः सर्वपापैः प्रमुच्यते
yastatra kurute śrāddhaṃ pitṝnuddiśya bhāvitaḥ ||
tadakṣayaṃ bhavecchrāddhaṃ pitṝṇāṃ tṛptikārakam
||7||यस्तत्र कुरुते श्राद्धं पितॄनुद्दिश्य भावितः ॥
तदक्षयं भवेच्छ्राद्धं पितॄणां तृप्तिकारकम्
yatkiṃciddīyata dānaṃ tasmiṃstīrthavare dvijāḥ ||
hutajapyādikaṃ caiva tadanaṃtaphalaṃ bhavet
||8||यत्किंचिद्दीयत दानं तस्मिंस्तीर्थवरे द्विजाः ॥
हुतजप्यादिकं चैव तदनंतफलं भवेत्
kasyacittvatha kālasya mṛgī vyādhaśarāhatā ||
praviṣṭā salile tasmiṃstatra pañcatvamāgatā
||9||कस्यचित्त्वथ कालस्य मृगी व्याधशराहता ॥
प्रविष्टा सलिले तस्मिंस्तत्र पञ्चत्वमागता
caitraśuklatṛtīyāyāṃ madhyāhne dvijasattamāḥ ||
nakṣatre yamadaivatye mārtaṃḍasya ca vāsare
||10||चैत्रशुक्लतृतीयायां मध्याह्ने द्विजसत्तमाः ॥
नक्षत्रे यमदैवत्ये मार्तंडस्य च वासरे
atha tattoyamāhātmyānmenakānāma sā'bhavat ||
apsarāstridaśeṃdrasya samaṃtāccāruhāsinī
||11||अथ तत्तोयमाहात्म्यान्मेनकानाम साऽभवत् ॥
अप्सरास्त्रिदशेंद्रस्य समंताच्चारुहासिनी
smaramāṇā'tha sā tasya prabhāvaṃ varavarṇinī ||
tīrthamāgatya sadbhaktyā snānaṃ tatra samācarat ||
caitraśuklatṛtīyāyāṃ yāmarkṣe sūryavāsare
||12||स्मरमाणाऽथ सा तस्य प्रभावं वरवर्णिनी ॥
तीर्थमागत्य सद्भक्त्या स्नानं तत्र समाचरत् ॥
चैत्रशुक्लतृतीयायां यामर्क्षे सूर्यवासरे
ekadā divase tasminbhramamāṇo munīśvaraḥ ||
viśvāmitra iti khyātastatrāyātastapo'nvitaḥ
||13||एकदा दिवसे तस्मिन्भ्रममाणो मुनीश्वरः ॥
विश्वामित्र इति ख्यातस्तत्रायातस्तपोऽन्वितः
sā'pi svargātsamāyātā devatādarśanārthataḥ ||
pūjayitvātha taṃ devaṃ prasthitā tridivaṃ prati
||14||साऽपि स्वर्गात्समायाता देवतादर्शनार्थतः ॥
पूजयित्वाथ तं देवं प्रस्थिता त्रिदिवं प्रति
sā dṛṣṭvā taṃ muniṃ tatra bhramamāṇamitastataḥ ||
yauvanasthaṃ surūpāḍhyaṃ paṃcabāṇamivāparam
||15||सा दृष्ट्वा तं मुनिं तत्र भ्रममाणमितस्ततः ॥
यौवनस्थं सुरूपाढ्यं पंचबाणमिवापरम्
vrataprabhāvajairvyāptaṃ tejobhirbhāskaraṃ yathā ||
bālyātprabhṛti cīrṇena tapasā dagdhakilbiṣam
||16||व्रतप्रभावजैर्व्याप्तं तेजोभिर्भास्करं यथा ॥
बाल्यात्प्रभृति चीर्णेन तपसा दग्धकिल्बिषम्
sā tasya darśanādeva kāmabāṇaprapīḍitā ||
sānaṃdāḥ suratārthāya samīpaṃ samupādravat
||17||सा तस्य दर्शनादेव कामबाणप्रपीडिता ॥
सानंदाः सुरतार्थाय समीपं समुपाद्रवत्
sa dṛṣṭvā'dṛṣṭapūrvāṃ tāṃ mārgapṛcchākṛte tataḥ ||
sammukhaḥ prayayau tūrṇaṃ prahṛṣṭenāṃtarātmanā
||18||स दृष्ट्वाऽदृष्टपूर्वां तां मार्गपृच्छाकृते ततः ॥
सम्मुखः प्रययौ तूर्णं प्रहृष्टेनांतरात्मना
uvāca deśaṃ tāṃ pṛcchanstrīdharmāṃśca viśeṣataḥ ||
śubhalābho'stu te bhadre manasā karmaṇā girā
||19||उवाच देशं तां पृच्छन्स्त्रीधर्मांश्च विशेषतः ॥
शुभलाभोऽस्तु ते भद्रे मनसा कर्मणा गिरा
sadaiva vāsudevasya bhaktiścāvyabhicāriṇī ||
kaccittvaṃ vartase putri patipādaparāyaṇā ||
cāritravinayopetā sarvadā priyavādinī
||20||सदैव वासुदेवस्य भक्तिश्चाव्यभिचारिणी ॥
कच्चित्त्वं वर्तसे पुत्रि पतिपादपरायणा ॥
चारित्रविनयोपेता सर्वदा प्रियवादिनी
kaccittvaṃ sarvadābhīṣṭā patyurdānaistathārccanaiḥ ||
baṃdhūnsvamitravargaṃ ca tatpuraḥ pṛṣṭhatopi vā
||21||कच्चित्त्वं सर्वदाभीष्टा पत्युर्दानैस्तथार्च्चनैः ॥
बंधून्स्वमित्रवर्गं च तत्पुरः पृष्ठतोपि वा
kaccidbhartari saṃsupte tvaṃ niśavaśameṣyasi ||
utthānamaprabuddhe ca karoṣi varavarṇini
||22||कच्चिद्भर्तरि संसुप्ते त्वं निशवशमेष्यसि ॥
उत्थानमप्रबुद्धे च करोषि वरवर्णिनि
kaccitprātaḥ samutthāya karoṣi gṛhamārjanam ||
svayameva varārohe maṇḍanaṃ copamaṇḍanam
||23||कच्चित्प्रातः समुत्थाय करोषि गृहमार्जनम् ॥
स्वयमेव वरारोहे मण्डनं चोपमण्डनम्
kaccidevānnamaskṛtya guruṃ ca tadanaṃtaram ||
karoṣi tvaṃ prāṇayātrāṃ dattvānnaṃ śaktito jalam
||24||कच्चिदेवान्नमस्कृत्य गुरुं च तदनंतरम् ॥
करोषि त्वं प्राणयात्रां दत्त्वान्नं शक्तितो जलम्
kaccidastaṃgate sūrye nānnamaśnāsi bhābhini ||
adattvā vā svabhṛtyebhyaḥ sādhubhyaśca viśeṣataḥ
||25||कच्चिदस्तंगते सूर्ये नान्नमश्नासि भाभिनि ॥
अदत्त्वा वा स्वभृत्येभ्यः साधुभ्यश्च विशेषतः
kaccitpibasi pānīyaṃ saptavāraviśodhitam [|
nibiḍena svavastreṇa pālayaṃtī jalodbhavān ||
kacciddayāsamopetā gātrakleśakarānapi ||
yūkāmatkuṇadaṃśādīnputravatparirakṣasi
||27||कच्चित्पिबसि पानीयं सप्तवारविशोधितम् [।
निबिडेन स्ववस्त्रेण पालयंती जलोद्भवान् ॥
कच्चिद्दयासमोपेता गात्रक्लेशकरानपि ॥
यूकामत्कुणदंशादीन्पुत्रवत्परिरक्षसि
kaccitsādhumukhānnityaṃ śivadharmaṃ subhaktitaḥ ||
śṛṇoṣi bhaktito bhadre prakaroṣi ca sādaram
||28||कच्चित्साधुमुखान्नित्यं शिवधर्मं सुभक्तितः ॥
शृणोषि भक्तितो भद्रे प्रकरोषि च सादरम्
kvacicchrutvā''gamaṃ puṇyaṃ prakaroṣi ca pūjanam ||
śāstrasya vācakasyāpi vyākhyātuśca viśeṣataḥ
||29||क्वचिच्छ्रुत्वाऽऽगमं पुण्यं प्रकरोषि च पूजनम् ॥
शास्त्रस्य वाचकस्यापि व्याख्यातुश्च विशेषतः
kaccitpurāṇaśāstrāṇi praṇītāni janeśvaraiḥ ||
saṃlekhyākṣararamyāṇi sādhubhyaḥ saṃprayacchasi
||30||कच्चित्पुराणशास्त्राणि प्रणीतानि जनेश्वरैः ॥
संलेख्याक्षररम्याणि साधुभ्यः संप्रयच्छसि
yaḥ śrutvā sarva śāstrāṇi niṣkrayaṃ na prayacchati ||
śāstracauraḥ sa vijñeyo na caivāpnoti tatphalam
||31||यः श्रुत्वा सर्व शास्त्राणि निष्क्रयं न प्रयच्छति ॥
शास्त्रचौरः स विज्ञेयो न चैवाप्नोति तत्फलम्
kaccicchivālaye nṛtyagītavādyādikāḥ kriyāḥ ||
balipūjopahārāṃśca tvaṃ karoṣi ca śaktitaḥ
||32||कच्चिच्छिवालये नृत्यगीतवाद्यादिकाः क्रियाः ॥
बलिपूजोपहारांश्च त्वं करोषि च शक्तितः
kaccitprāvaraṇaṃ vastraṃ subhage sarvameva ca ||
saṃprayacchasi sādhubhyaḥ praṇipātapuraḥsaram
||33||कच्चित्प्रावरणं वस्त्रं सुभगे सर्वमेव च ॥
संप्रयच्छसि साधुभ्यः प्रणिपातपुरःसरम्
vṛthā paryaṭanaṃ nityaṃ kaccinna paramaṃdire ||
tvaṃ karoṣi viśālākṣi viśeṣeṇa niśāgame
||34||वृथा पर्यटनं नित्यं कच्चिन्न परमंदिरे ॥
त्वं करोषि विशालाक्षि विशेषेण निशागमे
kaccinnāśnāsi bhadre tvaṃ svabhartari bubhukṣite ||
ājñābhaṃgaṃ prayatnena kaccittatra prarakṣasi
||35||कच्चिन्नाश्नासि भद्रे त्वं स्वभर्तरि बुभुक्षिते ॥
आज्ञाभंगं प्रयत्नेन कच्चित्तत्र प्ररक्षसि
kaccitprakupite kāṃte nottarāṇi prayacchasi ||
tasyakopapraṇāśārṣaṃ priyaṃ kaccicca jalpasi
||36||कच्चित्प्रकुपिते कांते नोत्तराणि प्रयच्छसि ॥
तस्यकोपप्रणाशार्षं प्रियं कच्चिच्च जल्पसि
kaccittvaṃ proṣite kāṃte malināṃbaradhāriṇī ||
jāyase ca tathā dīnā vivarṇavadanā kṛśā
||37||कच्चित्त्वं प्रोषिते कांते मलिनांबरधारिणी ॥
जायसे च तथा दीना विवर्णवदना कृशा
kaccinmaṃdirapṛṣṭhe tvaṃ na dhatse bhinnabhājanam ||
ucchiṣṭaṃ vā janaistyaktamapi kāryopakārakam
||39||कच्चिन्मंदिरपृष्ठे त्वं न धत्से भिन्नभाजनम् ॥
उच्छिष्टं वा जनैस्त्यक्तमपि कार्योपकारकम्
kaccidvrajasi no rātrau jāgareṣu kathāsu ca ||
nirjhareṣu vivikteṣu pulineṣu vaneṣu ca
||39||कच्चिद्व्रजसि नो रात्रौ जागरेषु कथासु च ॥
निर्झरेषु विविक्तेषु पुलिनेषु वनेषु च
kaccinna kuruṣe maitrīṃ baṃdhakībhiḥ samaṃ śubhe ||
dhātrībhirmālikastrībhī rajakībhiśca bhāmini
||40||कच्चिन्न कुरुषे मैत्रीं बंधकीभिः समं शुभे ॥
धात्रीभिर्मालिकस्त्रीभी रजकीभिश्च भामिनि
kañciddadhāsi nityaṃ tvaṃ mukhaṃ kuṃkumaraṃjitam ||
śiraḥ puṣpasamākīrṇaṃ netre kajjalaraṃjite
||41||कञ्चिद्दधासि नित्यं त्वं मुखं कुंकुमरंजितम् ॥
शिरः पुष्पसमाकीर्णं नेत्रे कज्जलरंजिते
iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye viśvāmitrakuṇḍotpattivṛttānte viśvāmitramenakāsamāgamavarṇanaṃnāma dvicatvāriṃśo dhyāyaḥ || 42 ||