satyaṃ matvā punaḥ prāha nandinīṃ putravatsalām
sūta uvāca
atha tācchapathāñchrutvā sa vyāghro vismayānvitaḥ ||
satyaṃ matvā punaḥ prāha nandinīṃ putravatsalām
||1||अथ ताच्छपथाञ्छ्रुत्वा स व्याघ्रो विस्मयान्वितः ॥
सत्यं मत्वा पुनः प्राह नन्दिनीं पुत्रवत्सलाम्
yadyevaṃ tadgṛhaṃ gaccha vīkṣayasva nijātmajam ||
sakhīnāmarpayitvātha bhūya āgamanaṃ kuru
||2||यद्येवं तद्गृहं गच्छ वीक्षयस्व निजात्मजम् ॥
सखीनामर्पयित्वाथ भूय आगमनं कुरु
sūta uvāca
iti vyāghravacaḥ śrutvā suśīlā nandinī tadā ||
gatālayaṃ samuddiśya yatra bālaḥ sutaḥ sthitaḥ
||3||इति व्याघ्रवचः श्रुत्वा सुशीला नन्दिनी तदा ॥
गतालयं समुद्दिश्य यत्र बालः सुतः स्थितः
athākālāgatāṃ dṛṣṭvā mātaraṃ trastacetasam ||
raṃbhamāṇāṃ samālokya vatsaḥ provāca vismayāt
||4||अथाकालागतां दृष्ट्वा मातरं त्रस्तचेतसम् ॥
रंभमाणां समालोक्य वत्सः प्रोवाच विस्मयात्
kasmāt prāptāsyakāle tu kasmādudbhrāṃtamānasā ||
vāṣpaklinnamukhī kasmādvada mātardrutaṃmama
||5||कस्मात् प्राप्तास्यकाले तु कस्मादुद्भ्रांतमानसा ॥
वाष्पक्लिन्नमुखी कस्माद्वद मातर्द्रुतंमम
naṃdinyuvāca
yadi pṛcchasi māṃ putra stanapānaṃ samācara ||
yena tṛptasya te sarvaṃ vṛttāṃtaṃ tadvadāmyaham
||6||यदि पृच्छसि मां पुत्र स्तनपानं समाचर ॥
येन तृप्तस्य ते सर्वं वृत्तांतं तद्वदाम्यहम्
sūta uvāca
so'pi tadvacanaṃ śrutvā pītvā kṣīraṃ yathocitam ||
āghrātaśca tayā mūrdhni tataḥ provāca satvaram
||7||सोऽपि तद्वचनं श्रुत्वा पीत्वा क्षीरं यथोचितम् ॥
आघ्रातश्च तया मूर्ध्नि ततः प्रोवाच सत्वरम्
sarvaṃ kīrtaya vṛttāṃtamadyāraṇyasamudbhavam ||
yena me jāyate svāsthyaṃ śrutvā mātastavāsyataḥ
||8||सर्वं कीर्तय वृत्तांतमद्यारण्यसमुद्भवम् ॥
येन मे जायते स्वास्थ्यं श्रुत्वा मातस्तवास्यतः
naṃdinyuvāca
ahaṃ gatā mahāraṇye hyadya putra yathecchayā ||
vyāghreṇāsāditā tatra bhramamāṇā itastataḥ
||9||अहं गता महारण्ये ह्यद्य पुत्र यथेच्छया ॥
व्याघ्रेणासादिता तत्र भ्रममाणा इतस्ततः
sa mayā prārthitaḥ putra bhakṣamāṇo nakhāyudhaḥ ||
śapathairāgamiṣyāmi gokule vīkṣya cātmajam
||10||स मया प्रार्थितः पुत्र भक्षमाणो नखायुधः ॥
शपथैरागमिष्यामि गोकुले वीक्ष्य चात्मजम्
sāhaṃ tena vinirmuktā śapathairbahubhiḥ kṛtaiḥ ||
bhūyastatraiva yāsyāmi dṛṣṭaḥ saṃbhāṣito bhavān
||11||साहं तेन विनिर्मुक्ता शपथैर्बहुभिः कृतैः ॥
भूयस्तत्रैव यास्यामि दृष्टः संभाषितो भवान्
vatsa uvāca
ahaṃ tatraiva yāsyāmi yatra tvaṃ hi pragacchasi ||
ślāghyaṃ hi maraṇaṃ samyaṅmāturagre mamādhunā
||12||अहं तत्रैव यास्यामि यत्र त्वं हि प्रगच्छसि ॥
श्लाघ्यं हि मरणं सम्यङ्मातुरग्रे ममाधुना
ekākināpi martavyaṃ tvayā hīnena vai mayā ||
vināpi kṣīrapānena svalpena samayena tu
||13||एकाकिनापि मर्तव्यं त्वया हीनेन वै मया ॥
विनापि क्षीरपानेन स्वल्पेन समयेन तु
yadi mātastvayā sārdhaṃ vyāghro māṃ sūdayiṣyati ||
yā gatirmātṛbhaktānāṃ sā me nūnaṃ bhaviṣyati
||14||यदि मातस्त्वया सार्धं व्याघ्रो मां सूदयिष्यति ॥
या गतिर्मातृभक्तानां सा मे नूनं भविष्यति
athavā ye tvayā tasya vihitāḥ śapathāḥ śubhe ||
te saṃtu mama tiṣṭha tvaṃ tasmādatraiva gokule ||
nāsti mātṛsamo bandhurbālānāṃ kṣīrajīvinām ||
nāsti mātṛsamo nātho nāsti mātṛsamā gatiḥ
||16||अथवा ये त्वया तस्य विहिताः शपथाः शुभे ॥
ते संतु मम तिष्ठ त्वं तस्मादत्रैव गोकुले ॥
नास्ति मातृसमो बन्धुर्बालानां क्षीरजीविनाम् ॥
नास्ति मातृसमो नाथो नास्ति मातृसमा गतिः
nāsti mātṛsamaḥ pūjyo nāsti mātṛsamaḥ sakhā ||
nāsti mātṛsamo deva iha loke paratra ca
||17||नास्ति मातृसमः पूज्यो नास्ति मातृसमः सखा ॥
नास्ति मातृसमो देव इह लोके परत्र च
evaṃ matvā sadā mātuḥ kartavyā bhaktiruttamaiḥ ||
tamenaṃ paramaṃ dharmaṃ prajāpativinirmitam ||
anutiṣṭhaṃti ye putrāste yāṃti paramāṃ gatim
||18||एवं मत्वा सदा मातुः कर्तव्या भक्तिरुत्तमैः ॥
तमेनं परमं धर्मं प्रजापतिविनिर्मितम् ॥
अनुतिष्ठंति ये पुत्रास्ते यांति परमां गतिम्
tasmādahaṃ gamiṣyāmi tvaṃ ca tiṣṭhātra gokule ||
ātmaprāṇaistava prāṇānrakṣayiṣyāmyasaṃśayam
||19||तस्मादहं गमिष्यामि त्वं च तिष्ठात्र गोकुले ॥
आत्मप्राणैस्तव प्राणान्रक्षयिष्याम्यसंशयम्
naṃdinyuvāca
mamaiva vihito mṛtyurna te putrādya vāsare ||
tatkathaṃ mama jīvaṃ tvaṃ rakṣasyasubhirātmanaḥ
||20||ममैव विहितो मृत्युर्न ते पुत्राद्य वासरे ॥
तत्कथं मम जीवं त्वं रक्षस्यसुभिरात्मनः
apaścimamidaṃ putra mātṛsaṃdiṣṭamuttamam ||
tvayā kāryaṃ prayatnena madvākyamanutiṣṭhatā
||21||अपश्चिममिदं पुत्र मातृसंदिष्टमुत्तमम् ॥
त्वया कार्यं प्रयत्नेन मद्वाक्यमनुतिष्ठता
bhramamāṇo vane putra mā pramādaṃ kariṣyasi ||
lobhātsaṃjāyate nāśa ihaloke paratra ca
||22||भ्रममाणो वने पुत्र मा प्रमादं करिष्यसि ॥
लोभात्संजायते नाश इहलोके परत्र च
samudramaṭavīṃ yuddhaṃ viśaṃte lobhamohitāḥ ||
iha tannāsti lobhena yatra kurvaṃti mānavāḥ
||23||समुद्रमटवीं युद्धं विशंते लोभमोहिताः ॥
इह तन्नास्ति लोभेन यत्र कुर्वंति मानवाः
lobhātpramādādviśraṃbhātpuruṣo vadhyate tribhiḥ ||
tasmāllobho na kartavyo na pramādo na viśvaset
||24||लोभात्प्रमादाद्विश्रंभात्पुरुषो वध्यते त्रिभिः ॥
तस्माल्लोभो न कर्तव्यो न प्रमादो न विश्वसेत्
ātmā putra tvayā rakṣyaḥ sarvadaiva praya tnataḥ ||
sarvebhyaḥ śvāpadebhyaśca bhramatā gahane vane
||25||आत्मा पुत्र त्वया रक्ष्यः सर्वदैव प्रय त्नतः ॥
सर्वेभ्यः श्वापदेभ्यश्च भ्रमता गहने वने
viṣamasthaṃ tṛṇānnādyaṃ kathaṃcitputraka tvayā ||
naikākinā pragaṃtavyaṃ yūthaṃ tyaktvā nijaṃ kvacit
||26||विषमस्थं तृणान्नाद्यं कथंचित्पुत्रक त्वया ॥
नैकाकिना प्रगंतव्यं यूथं त्यक्त्वा निजं क्वचित्
evaṃ saṃbhāṣya taṃ vatsamavalihya muhurmuhuḥ ||
śokena mahatāviṣṭā bāṣpavyākulalocanā
||27||एवं संभाष्य तं वत्समवलिह्य मुहुर्मुहुः ॥
शोकेन महताविष्टा बाष्पव्याकुललोचना
tataḥ sakhījanaṃ sarvaṃ gatā draṣṭuṃ dvijottamāḥ ||
nandinīṃ putraśokena pīḍitāṃgī suvihvalā
||28||ततः सखीजनं सर्वं गता द्रष्टुं द्विजोत्तमाः ॥
नन्दिनीं पुत्रशोकेन पीडितांगी सुविह्वला
tataḥ provāca tāḥ sarvā gatvā'raṇyaṃ dvijottamāḥ ||
caraṃtīḥ svecchayā hṛṣṭā vāṃchitāni tṛṇāni tāḥ
||29||ततः प्रोवाच ताः सर्वा गत्वाऽरण्यं द्विजोत्तमाः ॥
चरंतीः स्वेच्छया हृष्टा वांछितानि तृणानि ताः
bahule caṃpake dāme vasudhāre ghaṭasrave ||
haṃsanādi priyānaṃde śubhakṣīre mahodaye
||30||बहुले चंपके दामे वसुधारे घटस्रवे ॥
हंसनादि प्रियानंदे शुभक्षीरे महोदये
tathānyā dhenavo yāśca saṃsthitā gokulāṃtike ||
śṛṇvaṃtu vacanaṃ mahyaṃ kurvaṃtu ca tataḥ param ||
adyāhaṃ nijayūthasya bhramaṃtī nātidūrataḥ
||31||तथान्या धेनवो याश्च संस्थिता गोकुलांतिके ॥
शृण्वंतु वचनं मह्यं कुर्वंतु च ततः परम् ॥
अद्याहं निजयूथस्य भ्रमंती नातिदूरतः
tataśca gahanaṃ prāptā vanaṃ mānuṣavarjitam ||
vyāghreṇāsāditā tatra bhramaṃtī tṛṇavāṃchayā
||32||ततश्च गहनं प्राप्ता वनं मानुषवर्जितम् ॥
व्याघ्रेणासादिता तत्र भ्रमंती तृणवांछया
yuṣmākaṃ darśanārthāya sutasaṃbhāṣaṇāya ca ||
saṃprāptā śapathaiḥ kṛcchrāttaṃ viśvāsya nakhāyudham
||33||युष्माकं दर्शनार्थाय सुतसंभाषणाय च ॥
संप्राप्ता शपथैः कृच्छ्रात्तं विश्वास्य नखायुधम्
dṛṣṭaḥ saṃbhāṣitaḥ putraḥ śāsitaśca mayā hi saḥ ||
adhunā bhavatīnāṃ ca pradattaḥ putrako yathā
||34||दृष्टः संभाषितः पुत्रः शासितश्च मया हि सः ॥
अधुना भवतीनां च प्रदत्तः पुत्रको यथा
ajñānājjñānato vāpi bhavatīnāṃ mayā kṛtam ||
yatkiṃcidduṣkṛtaṃ bhadrāstatkṣaṃtavyaṃ prasādataḥ
||35||अज्ञानाज्ज्ञानतो वापि भवतीनां मया कृतम् ॥
यत्किंचिद्दुष्कृतं भद्रास्तत्क्षंतव्यं प्रसादतः
anātho hyabalo dīnaḥ kṣīrapo mama bālakaḥ ||
mātṛśokābhisaṃtaptaḥ pālyaḥ sarvābhireva saḥ
||36||अनाथो ह्यबलो दीनः क्षीरपो मम बालकः ॥
मातृशोकाभिसंतप्तः पाल्यः सर्वाभिरेव सः
bhramamāṇo'same sthāne vrajamāno'nyagokule ||
akāryeṣu ca saṃsakto nivāryaḥ sarvadā''darāt
||37||भ्रममाणोऽसमे स्थाने व्रजमानोऽन्यगोकुले ॥
अकार्येषु च संसक्तो निवार्यः सर्वदाऽऽदरात्
ahaṃ tatra gamiṣyāmi sa vyāghro yatra saṃsthitaḥ ||
apaścimapraṇāmo'yaṃ sarvāsāṃ vihito mayā
||38||अहं तत्र गमिष्यामि स व्याघ्रो यत्र संस्थितः ॥
अपश्चिमप्रणामोऽयं सर्वासां विहितो मया
dhenava ūcuḥ
na gaṃtavyaṃ tvayā tatra kathaṃcidapi naṃdini ||
āpaddharmaṃ na vetsi tvaṃ nūnaṃ yena pragacchasi
||39||न गंतव्यं त्वया तत्र कथंचिदपि नंदिनि ॥
आपद्धर्मं न वेत्सि त्वं नूनं येन प्रगच्छसि
na narmayuktaṃ vacanaṃ hinasti na strīṣu jātirna vivāhakāle ||
prāṇātyaye sarvadhanāpahāre paṃcānṛtānyāhurapātakāni
||40||न नर्मयुक्तं वचनं हिनस्ति न स्त्रीषु जातिर्न विवाहकाले ॥
प्राणात्यये सर्वधनापहारे पंचानृतान्याहुरपातकानि
tasmāttatra na gaṃtavyaṃ doṣo nāstyatra te śubhe ||
pālayasva nijaṃ putraṃ vrajāsmābhirnijaṃ gṛham
||41||तस्मात्तत्र न गंतव्यं दोषो नास्त्यत्र ते शुभे ॥
पालयस्व निजं पुत्रं व्रजास्माभिर्निजं गृहम्
naṃdinyuvāca
pareṣāṃ prāṇayātrārthaṃ tatkartuṃ yujyate śubhāḥ ||
ātmaprāṇahitārthāya na sādhūnāṃ praśasyate
||42||परेषां प्राणयात्रार्थं तत्कर्तुं युज्यते शुभाः ॥
आत्मप्राणहितार्थाय न साधूनां प्रशस्यते
satye pratiṣṭhito loko dharmaḥ satye pratiṣṭhitaḥ ||
udadhiḥ satyavākyena maryādāṃ na vilaṃghayet
||43||सत्ये प्रतिष्ठितो लोको धर्मः सत्ये प्रतिष्ठितः ॥
उदधिः सत्यवाक्येन मर्यादां न विलंघयेत्
viṣṇave pṛthivīṃ dattvā baliḥ pātālamāśritaḥ ||
satyavākyaṃ samāśritya na niṣkrāmati daityapaḥ
||44||विष्णवे पृथिवीं दत्त्वा बलिः पातालमाश्रितः ॥
सत्यवाक्यं समाश्रित्य न निष्क्रामति दैत्यपः
yaḥ svaṃ vākyaṃ pratijñāya na karoti yathoditam ||
kiṃ tena na kṛtaṃ pāpaṃ caureṇākṛta buddhinā
||45||यः स्वं वाक्यं प्रतिज्ञाय न करोति यथोदितम् ॥
किं तेन न कृतं पापं चौरेणाकृत बुद्धिना
sakhya ūcuḥ
tvaṃ naṃdini namaskāryā sarverapi surāsuraiḥ ||
yā tvaṃ satyapratiṣṭhārthaṃ prāṇāṃstyajasi dustyajān
||46||त्वं नंदिनि नमस्कार्या सर्वेरपि सुरासुरैः ॥
या त्वं सत्यप्रतिष्ठार्थं प्राणांस्त्यजसि दुस्त्यजान्
kiṃ tvāṃ kalyāṇi vakṣyāmaḥ svayaṃ dharmārthavādinīm ||
savareṃpi guṇairyuktā nityaṃ satye pratiṣṭhitām
||47||किं त्वां कल्याणि वक्ष्यामः स्वयं धर्मार्थवादिनीम् ॥
सवरेंपि गुणैर्युक्ता नित्यं सत्ये प्रतिष्ठिताम्
tasmādgaccha mahābhāge na śocyaḥ putrakastava ||
bhavatyā yadvayaṃ proktāstatkariṣyāma eva hi
||48||तस्माद्गच्छ महाभागे न शोच्यः पुत्रकस्तव ॥
भवत्या यद्वयं प्रोक्तास्तत्करिष्याम एव हि
etatpunarvayaṃ vidmaḥ sadā satyavatāṃ nṛṇām ||
na niṣphalaḥ kriyāraṃbhaḥ kathaṃcidapi jāyate
||49||एतत्पुनर्वयं विद्मः सदा सत्यवतां नृणाम् ॥
न निष्फलः क्रियारंभः कथंचिदपि जायते
sūta uvāca
evaṃ saṃbhāṣya taṃ sarvaṃ naṃdinī svasakhījanam ||
prasthitā vyāghramuddiśya putraśokena pīḍitā
||50||एवं संभाष्य तं सर्वं नंदिनी स्वसखीजनम् ॥
प्रस्थिता व्याघ्रमुद्दिश्य पुत्रशोकेन पीडिता
śokāgnināpi saṃtaptā nirāśā putradarśane ||
viyuktā cakravākīva lateva patitā taroḥ
||51||शोकाग्निनापि संतप्ता निराशा पुत्रदर्शने ॥
वियुक्ता चक्रवाकीव लतेव पतिता तरोः
aṃdheva dṛṣṭinirmuktā praskhalaṃtī padepade ||
vanādhidevatāḥ sarvāḥ prā'rthayacca sutārthataḥ
||52||अंधेव दृष्टिनिर्मुक्ता प्रस्खलंती पदेपदे ॥
वनाधिदेवताः सर्वाः प्राऽर्थयच्च सुतार्थतः
prasuptaṃ bhramamāṇaṃ vā mama putraṃ subālakam ||
vanādhidevatāḥ sarvā rakṣaṃtu vacanānmama
||53||प्रसुप्तं भ्रममाणं वा मम पुत्रं सुबालकम् ॥
वनाधिदेवताः सर्वा रक्षंतु वचनान्मम
evaṃ pralapya manasā saṃprāptā tatra yatra saḥ ||
āste visphūrjitāsyaśca tīkṣṇadaṃṣṭro bhayāvahaḥ
||54||एवं प्रलप्य मनसा संप्राप्ता तत्र यत्र सः ॥
आस्ते विस्फूर्जितास्यश्च तीक्ष्णदंष्ट्रो भयावहः
vyāghraḥ kṣutkṣāmakaṇṭhaśca tasyā mārgāvalokakaḥ ||
saṃraṃbhāṭopasaṃyuktaḥ sṛkkiṇī parilehayan
||55||व्याघ्रः क्षुत्क्षामकण्ठश्च तस्या मार्गावलोककः ॥
संरंभाटोपसंयुक्तः सृक्किणी परिलेहयन्
naṃdinyuvāca
āgatāhaṃ mahāvyāghra satye ca śapathe sthitā ||
kuru tṛptiṃ yathākāmaṃ mama māṃsena sāṃpratam
||56||आगताहं महाव्याघ्र सत्ये च शपथे स्थिता ॥
कुरु तृप्तिं यथाकामं मम मांसेन सांप्रतम्
tāṃ dṛṣṭvā so'pi duṣṭātmā vairāgyaṃ paramaṃ gataḥ ||
satyāśayā punaḥ prāptā saṃtyajya prāṇajaṃ bhayam
||57||तां दृष्ट्वा सोऽपि दुष्टात्मा वैराग्यं परमं गतः ॥
सत्याशया पुनः प्राप्ता संत्यज्य प्राणजं भयम्
vyāghra uvāca
svāgataṃ tava kalyāṇi sudheno satyavādini ||
na hi satyavatāṃ kiṃcidaśubhaṃ vidyate kvacit
||58||स्वागतं तव कल्याणि सुधेनो सत्यवादिनि ॥
न हि सत्यवतां किंचिदशुभं विद्यते क्वचित्
tvayoktaṃ śapathairbhadre āgamiṣyāmyahaṃ punaḥ ||
tena me kautukaṃ jātaṃ kimeṣā prakariṣyati
||59||त्वयोक्तं शपथैर्भद्रे आगमिष्याम्यहं पुनः ॥
तेन मे कौतुकं जातं किमेषा प्रकरिष्यति
so'haṃ bhadre durācāro nṛśaṃso jīvaghātakaḥ ||
yāsyāmi narakaṃ ghoraṃ karmaṇānena sarvadā
||60||सोऽहं भद्रे दुराचारो नृशंसो जीवघातकः ॥
यास्यामि नरकं घोरं कर्मणानेन सर्वदा
tasmāttvaṃ me mahābhāge pāpāsyātidurātmanaḥ ||
upadeśapradānena prasādaṃ kartumarhasi
||61||तस्मात्त्वं मे महाभागे पापास्यातिदुरात्मनः ॥
उपदेशप्रदानेन प्रसादं कर्तुमर्हसि
yena me syātparaṃ śreya iha loke paratra ca ||
na te'styaviditaṃ kiṃcitsatyācārānmatirmama
||62||येन मे स्यात्परं श्रेय इह लोके परत्र च ॥
न तेऽस्त्यविदितं किंचित्सत्याचारान्मतिर्मम
tasmāttvaṃ dharmasarvasvaṃ saṃkṣepānmama kīrtaya ||
satsaṃgamaphalaṃ yena mama saṃjāyate'khilam
||63||तस्मात्त्वं धर्मसर्वस्वं संक्षेपान्मम कीर्तय ॥
सत्संगमफलं येन मम संजायतेऽखिलम्
naṃdinyuvāca
tapaḥ kṛte praśaṃsaṃti tretāyāṃ dhyānameva ca ||
dvāpare yajñayogaṃ ca dānamekaṃ kalau yuge ||
sarveṣāmeva dānānāṃ nāsti dānamataḥ param
||64||तपः कृते प्रशंसंति त्रेतायां ध्यानमेव च ॥
द्वापरे यज्ञयोगं च दानमेकं कलौ युगे ॥
सर्वेषामेव दानानां नास्ति दानमतः परम्
carācarāṇāṃ bhūtānāmabhayaṃ yaḥ prayacchati ||
sa sarvabhayanirmuktaḥ paraṃ brahmā dhigacchati
||65||चराचराणां भूतानामभयं यः प्रयच्छति ॥
स सर्वभयनिर्मुक्तः परं ब्रह्मा धिगच्छति
vyāghra uvāca
anyeṣāṃ caiva bhūtānāṃ taddānaṃ yujyate śubhe ||
ahiṃsayā bhavedyeṣāṃ prāṇayātrānnapūrvakam
||66||अन्येषां चैव भूतानां तद्दानं युज्यते शुभे ॥
अहिंसया भवेद्येषां प्राणयात्रान्नपूर्वकम्
na hiṃsayā vinā'smākaṃ yataḥ syātprāṇadhāraṇam ||
tasmādbrūhi mahābhāge kiñcinmama sukhāvaham ||
upadeśaṃ sudharmāya hiṃsakasyāpi dehinām
||67||न हिंसया विनाऽस्माकं यतः स्यात्प्राणधारणम् ॥
तस्माद्ब्रूहि महाभागे किञ्चिन्मम सुखावहम् ॥
उपदेशं सुधर्माय हिंसकस्यापि देहिनाम्
nandinyuvāca
atrāsti sumahalliṃgaṃ purā bāṇapratiṣṭhitam ||
gahane yatprabhāvena tvayā muktāsmyahaṃ dhruvam
||68||अत्रास्ति सुमहल्लिंगं पुरा बाणप्रतिष्ठितम् ॥
गहने यत्प्रभावेन त्वया मुक्तास्म्यहं ध्रुवम्
tasya tvaṃ prātarutthāya kuru nityaṃ pradakṣiṇām ||
praṇāmaṃ ca tataḥ siddhiṃ vāṃchitāṃ samavāpsyasi
||69||तस्य त्वं प्रातरुत्थाय कुरु नित्यं प्रदक्षिणाम् ॥
प्रणामं च ततः सिद्धिं वांछितां समवाप्स्यसि
nānyasya karmaṇaḥ śaktirvidyate te nakhāyudha ||
pūjādikasya hīnatvāddhastābhyāmiti me matiḥ
||70||नान्यस्य कर्मणः शक्तिर्विद्यते ते नखायुध ॥
पूजादिकस्य हीनत्वाद्धस्ताभ्यामिति मे मतिः
evamuktvātha sā dhenurvyāghrasyātha vanāṃtike ||
talliṃgaṃ darśayāmāsa puraḥ sthitvā dvijottamāḥ
||71||एवमुक्त्वाथ सा धेनुर्व्याघ्रस्याथ वनांतिके ॥
तल्लिंगं दर्शयामास पुरः स्थित्वा द्विजोत्तमाः
so'pi saṃdarśanāttasya tatkṣaṇānmuktimāptavān ||
vyāghratvātpārthivo bhūyaḥ sa babhūva yathā purā
||72||सोऽपि संदर्शनात्तस्य तत्क्षणान्मुक्तिमाप्तवान् ॥
व्याघ्रत्वात्पार्थिवो भूयः स बभूव यथा पुरा
śāpaṃ durvāsasā dattaṃ rājyaṃ svaṃ sahitaiḥ sutaiḥ ||
sasmāra sa nṛpaśreṣṭhastataḥ provāca naṃdinīm
||73||शापं दुर्वाससा दत्तं राज्यं स्वं सहितैः सुतैः ॥
सस्मार स नृपश्रेष्ठस्ततः प्रोवाच नंदिनीम्
nṛpaḥ kalaśanāmāhaṃ haihayānvayasaṃbhavaḥ ||
śapto durvāsasā pūrvaṃ kasmiṃścitkāraṇāṃtare
||74||नृपः कलशनामाहं हैहयान्वयसंभवः ॥
शप्तो दुर्वाससा पूर्वं कस्मिंश्चित्कारणांतरे
tataḥ prasāditenoktastenāhaṃ naṃdinī yadā ||
darśayiṣyati talliṃgaṃ tadā muktirbhaviṣyati
||75||ततः प्रसादितेनोक्तस्तेनाहं नंदिनी यदा ॥
दर्शयिष्यति तल्लिंगं तदा मुक्तिर्भविष्यति
sā nūnaṃ nandinī tvaṃ hi jñātā śāpāntato mayā ||
tattvaṃ brūhi pradeśo'yaṃ katamo varadhenuke
||76||सा नूनं नन्दिनी त्वं हि ज्ञाता शापान्ततो मया ॥
तत्त्वं ब्रूहि प्रदेशोऽयं कतमो वरधेनुके
yena gacchāmyahaṃ bhūyaḥ svagṛhaṃ prati satvaram ||
mārgaṃ dṛṣṭvā mahābhāge mānuṣaṃ prāpya kañcana
||77||येन गच्छाम्यहं भूयः स्वगृहं प्रति सत्वरम् ॥
मार्गं दृष्ट्वा महाभागे मानुषं प्राप्य कञ्चन
naṃdinyuvāca
camatkārapurakṣetrametatpātakanāśanam ||
sarvatīrthamayaṃ rājansarvakāmapradāyakam
||78||चमत्कारपुरक्षेत्रमेतत्पातकनाशनम् ॥
सर्वतीर्थमयं राजन्सर्वकामप्रदायकम्
yadanyatra bhavecchreyo vatsareṇa tapasvinām ||
dinenaivātra tatsamyagjāyate nātra saṃśayaḥ
||79||यदन्यत्र भवेच्छ्रेयो वत्सरेण तपस्विनाम् ॥
दिनेनैवात्र तत्सम्यग्जायते नात्र संशयः
evaṃ matvā mayā liṃgaṃ snāpitaṃ payasā sadā ||
etadyūthaṃ parityajya bhaktyā pūtena cetasā
||80||एवं मत्वा मया लिंगं स्नापितं पयसा सदा ॥
एतद्यूथं परित्यज्य भक्त्या पूतेन चेतसा
rājovāca
gaccha nandini bhadraṃ te nijaṃ prāpnuhi bālakam ||
gokulaṃ ca sakhīḥ svāśca tathānyaṃ ca suhṛjjanam
||81||गच्छ नन्दिनि भद्रं ते निजं प्राप्नुहि बालकम् ॥
गोकुलं च सखीः स्वाश्च तथान्यं च सुहृज्जनम्
etatkṣetraṃ mayā pūrvaṃ brāhmaṇānāṃ mukhācchrutam ||
vāṃchitaṃ ca sadā praṣṭuṃ na ca draṣṭuṃ prapāritam
||82||एतत्क्षेत्रं मया पूर्वं ब्राह्मणानां मुखाच्छ्रुतम् ॥
वांछितं च सदा प्रष्टुं न च द्रष्टुं प्रपारितम्
rājyakarmaprasaktena bhogāsaktena naṃdini ||
svayamevādhunā labdhaṃ nāhaṃ santyaktumutsahe
||83||राज्यकर्मप्रसक्तेन भोगासक्तेन नंदिनि ॥
स्वयमेवाधुना लब्धं नाहं सन्त्यक्तुमुत्सहे
diṣṭyā me muninā tena dattaḥ śāpo mahātmanā ||
kathaṃ syādanyathā prāptiḥ kṣetrasyāsya suśobhane
||84||दिष्ट्या मे मुनिना तेन दत्तः शापो महात्मना ॥
कथं स्यादन्यथा प्राप्तिः क्षेत्रस्यास्य सुशोभने
sūta uvāca
evamuktvā mahīpālo nandinīṃ tāṃ visṛjya ca ||
sthitastatraiva talliṃgaṃ dhyāyamāno divāniśam
||85||एवमुक्त्वा महीपालो नन्दिनीं तां विसृज्य च ॥
स्थितस्तत्रैव तल्लिंगं ध्यायमानो दिवानिशम्
prāsādaṃ tatkṛte mukhyaṃ vidhāyādbhutadarśanam ||
kailāsaśikharākāraṃ tapastepe tadagrataḥ
||86||प्रासादं तत्कृते मुख्यं विधायाद्भुतदर्शनम् ॥
कैलासशिखराकारं तपस्तेपे तदग्रतः
tatastasya prabhāvena svalpaireva dinairdvijāḥ ||
saṃprāptaḥ paramāṃ siddhiṃ durlabhāṃ yājñikairapi
||87||ततस्तस्य प्रभावेन स्वल्पैरेव दिनैर्द्विजाः ॥
संप्राप्तः परमां सिद्धिं दुर्लभां याज्ञिकैरपि
tatra yaḥ kārtike māsi dīpakaṃ saṃprayacchati ||
sarvapāpavinirmuktaḥ śivaloke mahīyate ||
88 mārgaśīrṣe ca samprāpte gītanṛtyādikaṃ naraḥ ||
tadagre kurute bhaktyā sa gacchati parāṃ gatim
||89||तत्र यः कार्तिके मासि दीपकं संप्रयच्छति ॥
सर्वपापविनिर्मुक्तः शिवलोके महीयते ॥
८८ मार्गशीर्षे च सम्प्राप्ते गीतनृत्यादिकं नरः ॥
तदग्रे कुरुते भक्त्या स गच्छति परां गतिम्
etadvaḥ sarvamākhyātaṃ sarvapātakanāśanam ||
kalaśeśvaramāhātmyaṃ vistareṇa dvijottamāḥ
||90||एतद्वः सर्वमाख्यातं सर्वपातकनाशनम् ॥
कलशेश्वरमाहात्म्यं विस्तरेण द्विजोत्तमाः
bhaktyā paṭhati yaścaitacchraddhayā parayā yutaḥ ||
so'pi pāpavinirmuktaḥ śivaloke mahīyate
||91||भक्त्या पठति यश्चैतच्छ्रद्धया परया युतः ॥
सोऽपि पापविनिर्मुक्तः शिवलोके महीयते
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye kalaśeśvaramāhātmyavarṇanaṃnāmaikonapaṃcāśattamo' dhyāyaḥ || 51 ||