sūtasūta mahābhāga dhanyastvaṃ śivasaktadhīḥ
ṛṣaya ūcuḥ
sūtasūta mahābhāga dhanyastvaṃ śivasaktadhīḥ |
mahābalasya liṃgasya śrāviteyaṃ kathādbhutā
||1||सूतसूत महाभाग धन्यस्त्वं शिवसक्तधीः ।
महाबलस्य लिंगस्य श्रावितेयं कथाद्भुता
uttarasyāṃ diśāyāṃ ca śivaliṃgāni yāni ca |
teṣāṃ māhātmyamanagha vada tvaṃ pāpanāśakam
||2||उत्तरस्यां दिशायां च शिवलिंगानि यानि च ।
तेषां माहात्म्यमनघ वद त्वं पापनाशकम्
sūta uvāca
śṛṇutādarato viprā auttarāṇāṃ viśeṣataḥ |
māhātmyaṃ śivaliṃgānāṃ pravadāmi samāsataḥ
||3||शृणुतादरतो विप्रा औत्तराणां विशेषतः ।
माहात्म्यं शिवलिंगानां प्रवदामि समासतः
gokarṇaṃ kṣetramaparaṃ mahāpātakanāśanam |
mahāvanaṃ ca tatrāsti pavitramativistaram
||4||गोकर्णं क्षेत्रमपरं महापातकनाशनम् ।
महावनं च तत्रास्ति पवित्रमतिविस्तरम्
tatrāsti candrabhālākhyaṃ śivaliṃgamanuttamam |
rāvaṇena samānītaṃ sadbhaktyā sarvasiddhidam
||5||तत्रास्ति चन्द्रभालाख्यं शिवलिंगमनुत्तमम् ।
रावणेन समानीतं सद्भक्त्या सर्वसिद्धिदम्
tasya tatra sthitirvaidyanāthasyeva munīśvarāḥ |
sarvalokahitārthāya karuṇāsāgarasya ca
||6||तस्य तत्र स्थितिर्वैद्यनाथस्येव मुनीश्वराः ।
सर्वलोकहितार्थाय करुणासागरस्य च
snānaṃ kṛtvā tu gokarṇe candrabhālaṃ samarcya ca |
śivalokamavāpnoti satyaṃsatyaṃ na saṃśayaḥ
||7||स्नानं कृत्वा तु गोकर्णे चन्द्रभालं समर्च्य च ।
शिवलोकमवाप्नोति सत्यंसत्यं न संशयः
candrabhālasya liṃgasya mahimā paramādbhutaḥ |
na śakyo varṇituṃ vyāsādbhaktasnehitarasya hi
||8||चन्द्रभालस्य लिंगस्य महिमा परमाद्भुतः ।
न शक्यो वर्णितुं व्यासाद्भक्तस्नेहितरस्य हि
candrabhālamahādeva liṃgasya mahimā mahān |
yathākathaṃcitsaṃproktaḥ paraliṃgasya vai śṛṇu
||9||चन्द्रभालमहादेव लिंगस्य महिमा महान् ।
यथाकथंचित्संप्रोक्तः परलिंगस्य वै शृणु
dādhīcaṃ śivaliṃgaṃ tu miśrarṣivaratīrthake |
dadhīcinā munīśena suprītyā ca pratiṣṭhitam
||10||दाधीचं शिवलिंगं तु मिश्रर्षिवरतीर्थके ।
दधीचिना मुनीशेन सुप्रीत्या च प्रतिष्ठितम्
tatra gatvā ca tattīrthe snātvā samyagvidhānataḥ |
śivaliṃgaṃ samarcedvai dādhīceśvaramādarāt
||11||तत्र गत्वा च तत्तीर्थे स्नात्वा सम्यग्विधानतः ।
शिवलिंगं समर्चेद्वै दाधीचेश्वरमादरात्
dādhīcamūrtistatraiva samarcyā vidhipūrvakam |
śivaprītyarthamevāśu tīrthayātrā phalārthibhiḥ
||12||दाधीचमूर्तिस्तत्रैव समर्च्या विधिपूर्वकम् ।
शिवप्रीत्यर्थमेवाशु तीर्थयात्रा फलार्थिभिः
evaṃ kṛte muniśreṣṭhāḥ kṛtakṛtyo bhavennaraḥ |
iha sarvasukhaṃ bhuktvā paratra gatimāpnuyāt
||13||एवं कृते मुनिश्रेष्ठाः कृतकृत्यो भवेन्नरः ।
इह सर्वसुखं भुक्त्वा परत्र गतिमाप्नुयात्
naimiṣāraṇyatīrthe tu nikhilarṣipratiṣṭhitam |
ṛṣīśvaramiti khyātaṃ śivaliṃgaṃ sukhapradam
||14||नैमिषारण्यतीर्थे तु निखिलर्षिप्रतिष्ठितम् ।
ऋषीश्वरमिति ख्यातं शिवलिंगं सुखप्रदम्
taddarśanātpūjanācca janānāṃ pāpināmapi |
bhuktimuktiśca teṣāṃ tu paratreha munīśvarāḥ
||15||तद्दर्शनात्पूजनाच्च जनानां पापिनामपि ।
भुक्तिमुक्तिश्च तेषां तु परत्रेह मुनीश्वराः
hatyāharaṇatīrthe tu śivaliṃgamaghāpaham |
pūjanīyaṃ viśeṣeṇa hatyākoṭivināśanam
||16||हत्याहरणतीर्थे तु शिवलिंगमघापहम् ।
पूजनीयं विशेषेण हत्याकोटिविनाशनम्
devaprayāgatīrthe tu laliteśvaranāmakam |
śivaliṃgaṃ sadā pūjyaṃ naraissarvāghanāśanam
||17||देवप्रयागतीर्थे तु ललितेश्वरनामकम् ।
शिवलिंगं सदा पूज्यं नरैस्सर्वाघनाशनम्
nayapālākhyapuryyāṃ tu prasiddhāyāṃ mahītale |
liṃgaṃ paśupatīśākhyaṃ sarvakāmaphalapradam
||18||नयपालाख्यपुर्य्यां तु प्रसिद्धायां महीतले ।
लिंगं पशुपतीशाख्यं सर्वकामफलप्रदम्
śirobhāgasvarūpeṇa śivaliṃgaṃ tadasti hi |
tatkathāṃ varṇayiṣyāmi kedāreśvaravarṇane
||19||शिरोभागस्वरूपेण शिवलिंगं तदस्ति हि ।
तत्कथां वर्णयिष्यामि केदारेश्वरवर्णने
tadārānmuktināthākhyaṃ śivaliṃgaṃ mahādbhutam |
darśanādarcanāttasya bhuktirmuktiśca labhyate
||20||तदारान्मुक्तिनाथाख्यं शिवलिंगं महाद्भुतम् ।
दर्शनादर्चनात्तस्य भुक्तिर्मुक्तिश्च लभ्यते
iti vaśca samākhyātaṃ liṃgavarṇanamuttamam |
caturdikṣu muniśreṣṭhāḥ kimanyacchrotumicchatha
||21||इति वश्च समाख्यातं लिंगवर्णनमुत्तमम् ।
चतुर्दिक्षु मुनिश्रेष्ठाः किमन्यच्छ्रोतुमिच्छथ
iti śrīśivamahāpurāṇe caturthyāṃ koṭirudrasaṃhitāyāṃ candrabhālapaśupatināthaliṃgamāhātmyavarṇanaṃ nāmaikādaśo'dhyāyaḥ || 11 ||