gāyatrīmantrakavacavarṇanam
nārada uvāca
svāminsarvajagannātha saṃśayo'sti mama prabho |
catuḥṣaṣṭikalābhijña pātakādyogavidvara
||1||स्वामिन्सर्वजगन्नाथ संशयोऽस्ति मम प्रभो ।
चतुःषष्टिकलाभिज्ञ पातकाद्योगविद्वर
mucyate kena puṇyena brahmarūpaḥ kathaṃ bhavet |
dehaśca devatārūpo mantrarūpo viśeṣataḥ
||2||मुच्यते केन पुण्येन ब्रह्मरूपः कथं भवेत् ।
देहश्च देवतारूपो मन्त्ररूपो विशेषतः
karma tacchrotumicchāmi nyāsaṃ ca vidhipūrvakam |
ṛṣiśchando'dhidaivaṃ ca dhyānaṃ ca vidhivadvibho
||3||कर्म तच्छ्रोतुमिच्छामि न्यासं च विधिपूर्वकम् ।
ऋषिश्छन्दोऽधिदैवं च ध्यानं च विधिवद्विभो
śrīnārāyaṇa uvāca
astyekaṃ paramaṃ guhyaṃ gāyatrīkavacaṃ tathā |
paṭhanāddhāraṇānmartyaḥ sarvapāpaiḥ pramucyate
||4||अस्त्येकं परमं गुह्यं गायत्रीकवचं तथा ।
पठनाद्धारणान्मर्त्यः सर्वपापैः प्रमुच्यते
sarvānkāmānavāpnoti devīrūpaśca jāyate |
gāyatrīkavacasyāsya brahmaviṣṇumaheśvarāḥ
||5||सर्वान्कामानवाप्नोति देवीरूपश्च जायते ।
गायत्रीकवचस्यास्य ब्रह्मविष्णुमहेश्वराः
ṛṣayo ṛgyajuḥsāmātharvaśchandāṃsi nārada |
brahmarūpā devatoktā gāyatrī paramā kalā
||6||ऋषयो ऋग्यजुःसामाथर्वश्छन्दांसि नारद ।
ब्रह्मरूपा देवतोक्ता गायत्री परमा कला
tadbījaṃ bharga ityeṣā śaktiruktā manīṣibhiḥ |
kīlakaṃ ca dhiyaḥ proktaṃ mokṣārthe viniyojanam
||7||तद्बीजं भर्ग इत्येषा शक्तिरुक्ता मनीषिभिः ।
कीलकं च धियः प्रोक्तं मोक्षार्थे विनियोजनम्
caturbhirhṛdayaṃ proktaṃ tribhirvarṇeḥ śiraḥ smṛtam |
caturbhiḥ syācchikhā paścāt tribhistu kavacaṃ smṛtam
||8||चतुर्भिर्हृदयं प्रोक्तं त्रिभिर्वर्णेः शिरः स्मृतम् ।
चतुर्भिः स्याच्छिखा पश्चात् त्रिभिस्तु कवचं स्मृतम्
caturbhirnetramuddiṣṭaṃ caturbhiḥ syāttadastrakam |
atha dhyānaṃ pravakṣyāmi sādhakābhīṣṭadāyakam
||9||चतुर्भिर्नेत्रमुद्दिष्टं चतुर्भिः स्यात्तदस्त्रकम् ।
अथ ध्यानं प्रवक्ष्यामि साधकाभीष्टदायकम्
muktāvidrumahemanīladhavalacchāyairmukhaistrīkṣaṇai- ryuktāmindunibaddharatnamukuṭāṃ tattvārthavarṇātmikām |
gāyatrīṃ varadābhayāṅkuśakaśāḥ śubhraṃ kapālaṃ guṇaṃ śaṅkhaṃ cakramathāravindayugalaṃ hastairvahantīṃ bhaje
||10||मुक्ताविद्रुमहेमनीलधवलच्छायैर्मुखैस्त्रीक्षणै- र्युक्तामिन्दुनिबद्धरत्नमुकुटां तत्त्वार्थवर्णात्मिकाम् ।
गायत्रीं वरदाभयाङ्कुशकशाः शुभ्रं कपालं गुणं शङ्खं चक्रमथारविन्दयुगलं हस्तैर्वहन्तीं भजे
gāyatrī pūrvataḥ pātu sāvitrī pātu dakṣiṇe |
brahmasandhyā tu me paścāduttarāyāṃ sarasvatī
||11||गायत्री पूर्वतः पातु सावित्री पातु दक्षिणे ।
ब्रह्मसन्ध्या तु मे पश्चादुत्तरायां सरस्वती
pārvatī me diśaṃ rakṣetpāvakīṃ jalaśāyinī |
yātudhānī diśaṃ rakṣedyātudhānabhayaṅkarī
||12||पार्वती मे दिशं रक्षेत्पावकीं जलशायिनी ।
यातुधानी दिशं रक्षेद्यातुधानभयङ्करी
pāvamānī diśaṃ rakṣetpavamānavilāsinī |
diśaṃ raudrī ca me pātu rudrāṇī rudrarūpiṇī
||13||पावमानी दिशं रक्षेत्पवमानविलासिनी ।
दिशं रौद्री च मे पातु रुद्राणी रुद्ररूपिणी
ūrdhvaṃ brahmāṇī me rakṣedadhastādvaiṣṇavī tathā |
evaṃ daśa diśo rakṣetsarvāṅgaṃ bhuvaneśvarī
||14||ऊर्ध्वं ब्रह्माणी मे रक्षेदधस्ताद्वैष्णवी तथा ।
एवं दश दिशो रक्षेत्सर्वाङ्गं भुवनेश्वरी
tatpadaṃ pātu me pādau jaṅghe me savituḥ padam |
vareṇyaṃ kaṭideśe tu nābhiṃ bhargastathaiva ca
||15||तत्पदं पातु मे पादौ जङ्घे मे सवितुः पदम् ।
वरेण्यं कटिदेशे तु नाभिं भर्गस्तथैव च
devasya me taddhṛdayaṃ dhīmahīti ca gallayoḥ |
dhiyaḥ padaṃ ca me netre yaḥ padaṃ me lalāṭakam
||16||देवस्य मे तद्धृदयं धीमहीति च गल्लयोः ।
धियः पदं च मे नेत्रे यः पदं मे ललाटकम्
naḥ pātu me padaṃ mūrdhni śikhāyāṃ me pracodayāt |
tatpadaṃ pātu mūrdhānaṃ sakāraḥ pātu bhālakam
||17||नः पातु मे पदं मूर्ध्नि शिखायां मे प्रचोदयात् ।
तत्पदं पातु मूर्धानं सकारः पातु भालकम्
cakṣuṣī tu vikārārṇastukārastu kapolayoḥ |
nāsāpuṭaṃ vakārārṇo rekārastu mukhe tathā
||18||चक्षुषी तु विकारार्णस्तुकारस्तु कपोलयोः ।
नासापुटं वकारार्णो रेकारस्तु मुखे तथा
ṇikāra ūrdhvamoṣṭhaṃ tu yakārastvadharoṣṭhakam |
āsyamadhye bhakārārṇo rgokāraścibuke tathā
||19||णिकार ऊर्ध्वमोष्ठं तु यकारस्त्वधरोष्ठकम् ।
आस्यमध्ये भकारार्णो र्गोकारश्चिबुके तथा
dekāraḥ kaṇṭhadeśe tu vakāraḥ skandhadeśakam |
syakāro dakṣiṇaṃ hastaṃ dhīkāro vāmahastakam
||20||देकारः कण्ठदेशे तु वकारः स्कन्धदेशकम् ।
स्यकारो दक्षिणं हस्तं धीकारो वामहस्तकम्
makāro hṛdayaṃ rakṣeddhikāra udare tathā |
dhikāro nābhideśe tu yokārastu kaṭiṃ tathā
||21||मकारो हृदयं रक्षेद्धिकार उदरे तथा ।
धिकारो नाभिदेशे तु योकारस्तु कटिं तथा
guhyaṃ rakṣatu yokāra ūrū dvau naḥ padākṣaram |
prakāro jānunī rakṣeccokāro jaṅghadeśakam
||22||गुह्यं रक्षतु योकार ऊरू द्वौ नः पदाक्षरम् ।
प्रकारो जानुनी रक्षेच्चोकारो जङ्घदेशकम्
dakāraṃ gulphadeśe tu yakāraḥ padayugmakam |
takāravyañjanaṃ caiva sarvāṅgaṃ me sadāvatu
||23||दकारं गुल्फदेशे तु यकारः पदयुग्मकम् ।
तकारव्यञ्जनं चैव सर्वाङ्गं मे सदावतु
idaṃ tu kavacaṃ divyaṃ bādhāśatavināśanam |
catuḥṣaṣṭikalāvidyādāyakaṃ mokṣakārakam
||24||इदं तु कवचं दिव्यं बाधाशतविनाशनम् ।
चतुःषष्टिकलाविद्यादायकं मोक्षकारकम्
mucyate sarvapāpebhyaḥ paraṃ brahmādhigacchati |
paṭhanācchravaṇādvāpi gosahasraphalaṃ labhet
||25||मुच्यते सर्वपापेभ्यः परं ब्रह्माधिगच्छति ।
पठनाच्छ्रवणाद्वापि गोसहस्रफलं लभेत्
iti śrīmaddevībhāgavate mahāpurāṇe'ṣṭādaśasāhasryāṃ sahitāyāṃ dvādaśaskandhe gāyatrīmantrakavacavarṇanaṃ nāma tṛtīyo'dhyāyaḥ || 3 ||
vargaḥdevībhāgavatapurāṇam