parāśakterāvirbhāvavarṇanam
janamejaya uvāca
bhagavansarvadharmajña sarvaśāstravatāṃvara |
dvijātīnāṃ tu sarveṣāṃ śaktyupāstiḥ śrutīritā
||1||भगवन्सर्वधर्मज्ञ सर्वशास्त्रवतांवर ।
द्विजातीनां तु सर्वेषां शक्त्युपास्तिः श्रुतीरिता
sandhyākālatraye'nyasmin kāle nityatayā vibho |
tāṃ vihāya dvijāḥ kasmādgṛhṇīyuścānyadevatāḥ
||2||सन्ध्याकालत्रयेऽन्यस्मिन् काले नित्यतया विभो ।
तां विहाय द्विजाः कस्माद्गृह्णीयुश्चान्यदेवताः
dṛśyante vaiṣṇavāḥ kecidgāṇapatyāstathāpare |
kāpālikāścīnamārgaratā valkaladhāriṇaḥ
||3||दृश्यन्ते वैष्णवाः केचिद्गाणपत्यास्तथापरे ।
कापालिकाश्चीनमार्गरता वल्कलधारिणः
digambarāstathā bauddhāścārvārkā evamādayaḥ |
dṛśyante bahavo loke vedaśraddhāvivarjitāḥ
||4||दिगम्बरास्तथा बौद्धाश्चार्वार्का एवमादयः ।
दृश्यन्ते बहवो लोके वेदश्रद्धाविवर्जिताः
kimatra kāraṇaṃ brahmaṃstadbhavān vaktumarhati |
buddhimantaḥ paṇḍitāśca nānātarkavicakṣaṇāḥ
||5||किमत्र कारणं ब्रह्मंस्तद्भवान् वक्तुमर्हति ।
बुद्धिमन्तः पण्डिताश्च नानातर्कविचक्षणाः
api santyeva vedeṣu śraddhayā tu vivarjitāḥ |
na hi kaścitsvakalyāṇaṃ buddhyā hātumihecchati
||6||अपि सन्त्येव वेदेषु श्रद्धया तु विवर्जिताः ।
न हि कश्चित्स्वकल्याणं बुद्ध्या हातुमिहेच्छति
kimatra kāraṇaṃ tasmādvada vedavidāṃvara |
maṇidvīpasya mahimā varṇito bhavatā purā
||7||किमत्र कारणं तस्माद्वद वेदविदांवर ।
मणिद्वीपस्य महिमा वर्णितो भवता पुरा
kīdṛk tadasti yaddevyāḥ paraṃ sthānaṃ mahattaram |
taccāpi vada bhaktāya śraddadhānāya me'nagha
||8||कीदृक् तदस्ति यद्देव्याः परं स्थानं महत्तरम् ।
तच्चापि वद भक्ताय श्रद्दधानाय मेऽनघ
prasannāstu vadantyeva guravo guhyamapyuta |
sūta uvāca |
iti rājño vacaḥ śrutvā bhagavān bādarāyaṇaḥ
||9||प्रसन्नास्तु वदन्त्येव गुरवो गुह्यमप्युत ।
सूत उवाच ।
इति राज्ञो वचः श्रुत्वा भगवान् बादरायणः
nijagāda tataḥ sarvaṃ krameṇaiva munīśvarāḥ |
yacchrutvā tu dvijātīnāṃ vedaśraddhā vivardhate
||10||निजगाद ततः सर्वं क्रमेणैव मुनीश्वराः ।
यच्छ्रुत्वा तु द्विजातीनां वेदश्रद्धा विवर्धते
vyāsa uvāca
samyakpṛṣṭaṃ tvayā rājan samaye samayocitam |
vuddhimānasi vedeṣu śraddhāvāṃścaiva lakṣyase
||11||सम्यक्पृष्टं त्वया राजन् समये समयोचितम् ।
वुद्धिमानसि वेदेषु श्रद्धावांश्चैव लक्ष्यसे
pūrvaṃ madoddhatā daityā devairyuddhaṃ tu cakrire |
śatavarṣaṃ mahārāja mahāvismayakārakam
||12||पूर्वं मदोद्धता दैत्या देवैर्युद्धं तु चक्रिरे ।
शतवर्षं महाराज महाविस्मयकारकम्
nānāśastrapraharaṇaṃ nānāmāyāvicitritam |
jagatkṣayakaraṃ nūnaṃ teṣāṃ yuddhamabhūnnṛpa
||13||नानाशस्त्रप्रहरणं नानामायाविचित्रितम् ।
जगत्क्षयकरं नूनं तेषां युद्धमभून्नृप
parāśaktikṛpāveśāddevairdaityā jitā yudhi |
bhuvaṃ svargaṃ parityajya gatāḥ pātālaveśmani
||14||पराशक्तिकृपावेशाद्देवैर्दैत्या जिता युधि ।
भुवं स्वर्गं परित्यज्य गताः पातालवेश्मनि
tataḥ praharṣitā devāḥ svaparākramavarṇanam |
cakruḥ parasparaṃ mohātsābhimānāḥ samantataḥ
||15||ततः प्रहर्षिता देवाः स्वपराक्रमवर्णनम् ।
चक्रुः परस्परं मोहात्साभिमानाः समन्ततः
jayo'smākaṃ kuto na syādasmākaṃ mahimā yataḥ |
sarvottaraḥ kutra daityāḥ pāmarā niṣparākramāḥ
||16||जयोऽस्माकं कुतो न स्यादस्माकं महिमा यतः ।
सर्वोत्तरः कुत्र दैत्याः पामरा निष्पराक्रमाः
sṛṣṭisthitikṣayakarā vayaṃ sarve yaśasvinaḥ |
asmadagre pāmarāṇāṃ daityānāṃ caiva kā kathā
||17||सृष्टिस्थितिक्षयकरा वयं सर्वे यशस्विनः ।
अस्मदग्रे पामराणां दैत्यानां चैव का कथा
parāśaktiprabhāvaṃ te na jñātvā mohamāgatāḥ |
teṣāmanugrahaṃ kartuṃ tadaiva jagadambikā
||18||पराशक्तिप्रभावं ते न ज्ञात्वा मोहमागताः ।
तेषामनुग्रहं कर्तुं तदैव जगदम्बिका
prādurāsītkṛpāpūrṇā yakṣarūpeṇa bhūmipa |
koṭisūryapratīkāśaṃ candrakoṭisuśītalam
||19||प्रादुरासीत्कृपापूर्णा यक्षरूपेण भूमिप ।
कोटिसूर्यप्रतीकाशं चन्द्रकोटिसुशीतलम्
vidyutkoṭisamānābhaṃ hastapādādivarjitam |
adṛṣṭapūrvaṃ taddṛṣṭvā tejaḥ paramasundaram
||20||विद्युत्कोटिसमानाभं हस्तपादादिवर्जितम् ।
अदृष्टपूर्वं तद्दृष्ट्वा तेजः परमसुन्दरम्
savismayāstadā procuḥ kimidaṃ kimidaṃ tviti |
daityānāṃ ceṣṭitaṃ kiṃ vā māyā kāpi mahīyasī
||21||सविस्मयास्तदा प्रोचुः किमिदं किमिदं त्विति ।
दैत्यानां चेष्टितं किं वा माया कापि महीयसी
kenacinnirmitā vātha devānāṃ smayakāriṇī |
sambhūya te tadā sarve vicāraṃ cakruruttamam
||22||केनचिन्निर्मिता वाथ देवानां स्मयकारिणी ।
सम्भूय ते तदा सर्वे विचारं चक्रुरुत्तमम्
yakṣasya nikaṭe gatvā praṣṭavyaṃ kastvamityapi |
balābalaṃ tato jñātvā kartavyā tu pratikriyā
||23||यक्षस्य निकटे गत्वा प्रष्टव्यं कस्त्वमित्यपि ।
बलाबलं ततो ज्ञात्वा कर्तव्या तु प्रतिक्रिया
tato vahniṃ samāhūya provācendraḥ surādhipaḥ |
gaccha vahne tvamasmākaṃ yato'si mukhamuttamam
||24||ततो वह्निं समाहूय प्रोवाचेन्द्रः सुराधिपः ।
गच्छ वह्ने त्वमस्माकं यतोऽसि मुखमुत्तमम्
tato gatvā tu jānīhi kimidaṃ yakṣamityapi |
sahasrākṣavacaḥ śrutvā svaparākramagarbhitam
||25||ततो गत्वा तु जानीहि किमिदं यक्षमित्यपि ।
सहस्राक्षवचः श्रुत्वा स्वपराक्रमगर्भितम्
vegātsa nirgato vahniryayau yakṣasya sannidhau |
tadā provāca yakṣastaṃ tvaṃ ko'sīti hutāśanam
||26||वेगात्स निर्गतो वह्निर्ययौ यक्षस्य सन्निधौ ।
तदा प्रोवाच यक्षस्तं त्वं कोऽसीति हुताशनम्
vīryaṃ ca tvayi kiṃ yattadvada sarvaṃ mamāgrataḥ |
agnirasmi tathā jātavedā asmīti so'bravīt
||27||वीर्यं च त्वयि किं यत्तद्वद सर्वं ममाग्रतः ।
अग्निरस्मि तथा जातवेदा अस्मीति सोऽब्रवीत्
sarvasya dahane śaktirmayi viśvasya tiṣṭhati |
tadā yakṣaṃ paraṃ tejastadagre nidadhau tṛṇam
||28||सर्वस्य दहने शक्तिर्मयि विश्वस्य तिष्ठति ।
तदा यक्षं परं तेजस्तदग्रे निदधौ तृणम्
dahainaṃ yadi te śaktirviśvasya dahane'sti hi |
tadā sarvabalenaivākarodyatnaṃ hutāśanaḥ
||29||दहैनं यदि ते शक्तिर्विश्वस्य दहनेऽस्ति हि ।
तदा सर्वबलेनैवाकरोद्यत्नं हुताशनः
na śaśāka tṛṇaṃ dagdhuṃ lajjito'gātsurānprati |
pṛṣṭe devaistu vṛttānte sarvaṃ provāca havyabhuk
||30||न शशाक तृणं दग्धुं लज्जितोऽगात्सुरान्प्रति ।
पृष्टे देवैस्तु वृत्तान्ते सर्वं प्रोवाच हव्यभुक्
vṛthābhimāno hyasmākaṃ sarveśatvādike surāḥ |
tatastu vṛtrahā vāyuṃ samāhūyedamabravīt
||31||वृथाभिमानो ह्यस्माकं सर्वेशत्वादिके सुराः ।
ततस्तु वृत्रहा वायुं समाहूयेदमब्रवीत्
tvayi protaṃ jagatsarvaṃ tvacceṣṭābhistu ceṣṭitam |
tvaṃ prāṇarūpaḥ sarveṣāṃ sarvaśaktividhārakaḥ
||32||त्वयि प्रोतं जगत्सर्वं त्वच्चेष्टाभिस्तु चेष्टितम् ।
त्वं प्राणरूपः सर्वेषां सर्वशक्तिविधारकः
tvameva gatvā jānīhi kimidaṃ yakṣamityapi |
nānyaḥ ko'pi samartho'sti jñātuṃ yakṣaṃ paraṃ mahaḥ
||33||त्वमेव गत्वा जानीहि किमिदं यक्षमित्यपि ।
नान्यः कोऽपि समर्थोऽस्ति ज्ञातुं यक्षं परं महः
sahasrākṣavacaḥ śrutvā guṇagauravagumphitam |
sābhimāno jagāmāśu yatra yakṣaṃ virājate
||34||सहस्राक्षवचः श्रुत्वा गुणगौरवगुम्फितम् ।
साभिमानो जगामाशु यत्र यक्षं विराजते
yakṣaṃ dṛṣṭvā tato vāyuṃ provāca mṛdubhāṣayā |
ko'si tvaṃ tvayi kā śaktirvada sarvaṃ mamāgrataḥ
||35||यक्षं दृष्ट्वा ततो वायुं प्रोवाच मृदुभाषया ।
कोऽसि त्वं त्वयि का शक्तिर्वद सर्वं ममाग्रतः
tato yakṣavacaḥ śrutvā garveṇa marudabravīt |
mātariśvāhamasmīti vāyurasmīti cābravīt
||36||ततो यक्षवचः श्रुत्वा गर्वेण मरुदब्रवीत् ।
मातरिश्वाहमस्मीति वायुरस्मीति चाब्रवीत्
vīryaṃ tu mayi sarvasya cālane grahaṇe'sti hi |
macceṣṭayā jagatsarvaṃ sarvavyāpāravadbhavet
||37||वीर्यं तु मयि सर्वस्य चालने ग्रहणेऽस्ति हि ।
मच्चेष्टया जगत्सर्वं सर्वव्यापारवद्भवेत्
iti śrutvā vāyuvāṇīṃ nijagāda paraṃ mahaḥ |
tṛṇametattavāgre yattaccālaya yathepsitam
||38||इति श्रुत्वा वायुवाणीं निजगाद परं महः ।
तृणमेतत्तवाग्रे यत्तच्चालय यथेप्सितम्
nocedgarvaṃ vihāyainaṃ lajjito gaccha vāsavam |
śrutvā yakṣavaco vāyuḥ sarvaśaktisamanvitaḥ
||39||नोचेद्गर्वं विहायैनं लज्जितो गच्छ वासवम् ।
श्रुत्वा यक्षवचो वायुः सर्वशक्तिसमन्वितः
udyogamakarottacca svasthānānna cacāla ha |
lajjito'gāddevapārśve hitvā garvaṃ sa cānilaḥ
||40||उद्योगमकरोत्तच्च स्वस्थानान्न चचाल ह ।
लज्जितोऽगाद्देवपार्श्वे हित्वा गर्वं स चानिलः
vṛttāntamavadatsarvaṃ garvanirvāpakāraṇam |
naitañjñātuṃ samarthāḥ sma mithyāgarvābhimāninaḥ
||41||वृत्तान्तमवदत्सर्वं गर्वनिर्वापकारणम् ।
नैतञ्ज्ञातुं समर्थाः स्म मिथ्यागर्वाभिमानिनः
alaukikaṃ bhāti yakṣaṃ tejaḥ paramadāruṇam |
tataḥ sarve suragaṇāḥ sahasrākṣaṃ samūcire
||42||अलौकिकं भाति यक्षं तेजः परमदारुणम् ।
ततः सर्वे सुरगणाः सहस्राक्षं समूचिरे
devarāḍasi yasmāttvaṃ yakṣaṃ jānīhi tattvataḥ |
tata indro mahāgarvāttadyakṣaṃ samupādravat
||43||देवराडसि यस्मात्त्वं यक्षं जानीहि तत्त्वतः ।
तत इन्द्रो महागर्वात्तद्यक्षं समुपाद्रवत्
prādravacca paraṃ tejo yakṣarūpaṃ parātparam |
antardhānaṃ tataḥ prāpa tadyakṣaṃ vāsavāgrataḥ
||44||प्राद्रवच्च परं तेजो यक्षरूपं परात्परम् ।
अन्तर्धानं ततः प्राप तद्यक्षं वासवाग्रतः
atīva lajjito jāto vāsavo devarāḍapi |
yakṣasambhāṣaṇābhāvāllaghutvaṃ prāpa cetasi
||45||अतीव लज्जितो जातो वासवो देवराडपि ।
यक्षसम्भाषणाभावाल्लघुत्वं प्राप चेतसि
ataḥ paraṃ na gantavyaṃ mayā tu surasaṃsadi |
kiṃ mayā tatra vaktavyaṃ svalaghutvaṃ surānprati
||46||अतः परं न गन्तव्यं मया तु सुरसंसदि ।
किं मया तत्र वक्तव्यं स्वलघुत्वं सुरान्प्रति
dehatyāgo varastasmānmāno hi mahatāṃ dhanam |
māne naṣṭe jīvitaṃ tu mṛtitulyaṃ na saṃśayaḥ
||47||देहत्यागो वरस्तस्मान्मानो हि महतां धनम् ।
माने नष्टे जीवितं तु मृतितुल्यं न संशयः
iti niścitya tatraiva garvaṃ hitvā sureśvaraḥ |
caritramīdṛśaṃ yasya tameva śaraṇaṃ gataḥ
||48||इति निश्चित्य तत्रैव गर्वं हित्वा सुरेश्वरः ।
चरित्रमीदृशं यस्य तमेव शरणं गतः
tasminneva kṣaṇe jātā vyomavāṇī nabhastale |
māyābījaṃ sahasrākṣa japa tena sukhī bhava
||49||तस्मिन्नेव क्षणे जाता व्योमवाणी नभस्तले ।
मायाबीजं सहस्राक्ष जप तेन सुखी भव
tato jajāpa paramaṃ māyābījaṃ parātparam |
lakṣavarṣaṃ nirāhāro dhyānamīlitalocanaḥ
||50||ततो जजाप परमं मायाबीजं परात्परम् ।
लक्षवर्षं निराहारो ध्यानमीलितलोचनः
akasmāccaitramāsīyanavamyāṃ madhyage ravau |
tadevāvirabhūttejastasminneva sthale punaḥ
||51||अकस्माच्चैत्रमासीयनवम्यां मध्यगे रवौ ।
तदेवाविरभूत्तेजस्तस्मिन्नेव स्थले पुनः
tejomaṇḍalamadhye tu kumārīṃ navayauvanām |
bhāsvajjapāprasūnābhāṃ bālakoṭiraviprabhām
||52||तेजोमण्डलमध्ये तु कुमारीं नवयौवनाम् ।
भास्वज्जपाप्रसूनाभां बालकोटिरविप्रभाम्
bālaśītāṃśamukuṭāṃ vastrāntarvyañjitastanīm |
caturbhirvarahastaistu varapāśāṅkuśābhayān
||53||बालशीतांशमुकुटां वस्त्रान्तर्व्यञ्जितस्तनीम् ।
चतुर्भिर्वरहस्तैस्तु वरपाशाङ्कुशाभयान्
dadhānāṃ ramaṇīyāṅgīṃ komalāṅgalatāṃ śivām |
bhaktakalpadrumāmambāṃ nānābhūṣaṇabhūṣitām
||54||दधानां रमणीयाङ्गीं कोमलाङ्गलतां शिवाम् ।
भक्तकल्पद्रुमामम्बां नानाभूषणभूषिताम्
trinetrāṃ mallikāmālākabarījūṭaśobhitām |
caturdikṣu caturvedairmūrtimadbhirabhiṣṭutām
||55||त्रिनेत्रां मल्लिकामालाकबरीजूटशोभिताम् ।
चतुर्दिक्षु चतुर्वेदैर्मूर्तिमद्भिरभिष्टुताम्
dantacchaṭābhirabhitaḥ padmarāgīkṛtakṣamām |
prasantasmeravadanāṃ koṭikandarpasundarām
||56||दन्तच्छटाभिरभितः पद्मरागीकृतक्षमाम् ।
प्रसन्तस्मेरवदनां कोटिकन्दर्पसुन्दराम्
raktāmbaraparīdhānāṃ raktacandanacarcitām |
umābhidhānāṃ purato devīṃ haimavatīṃ śivām
||57||रक्ताम्बरपरीधानां रक्तचन्दनचर्चिताम् ।
उमाभिधानां पुरतो देवीं हैमवतीं शिवाम्
nirvyājakaruṇāmūrtiṃ sarvakāraṇakāraṇām |
dadarśa vāsavastatra premagadgaditāntaraḥ
||58||निर्व्याजकरुणामूर्तिं सर्वकारणकारणाम् ।
ददर्श वासवस्तत्र प्रेमगद्गदितान्तरः
premāśrupūrṇanayano romāñcitatanustataḥ |
daṇḍavatpraṇanāmātha pādayorjagadīśituḥ
||59||प्रेमाश्रुपूर्णनयनो रोमाञ्चिततनुस्ततः ।
दण्डवत्प्रणनामाथ पादयोर्जगदीशितुः
tuṣṭāva vividhaiḥ stotrairbhaktisannatakandharaḥ |
uvāca paramaprītaḥ kimidaṃ yakṣamityapi
||60||तुष्टाव विविधैः स्तोत्रैर्भक्तिसन्नतकन्धरः ।
उवाच परमप्रीतः किमिदं यक्षमित्यपि
prādurbhūtaṃ ca kasmāttadvada sarvaṃ suśobhane |
iti tasya vacaḥ śrutvā provāca karuṇārṇavā
||61||प्रादुर्भूतं च कस्मात्तद्वद सर्वं सुशोभने ।
इति तस्य वचः श्रुत्वा प्रोवाच करुणार्णवा
rūpaṃ madīyaṃ brahmaitatsarvakāraṇakāraṇam |
māyādhiṣṭhānabhūtaṃ tu sarvasākṣi nirāmayam
||62||रूपं मदीयं ब्रह्मैतत्सर्वकारणकारणम् ।
मायाधिष्ठानभूतं तु सर्वसाक्षि निरामयम्
sarve vedā yatpadamāmananti tapāṃsi sarvāṇi ca yadvadanti |
yadicchanto brahmacaryaṃ caranti tatte padaṃ saṃgraheṇa bravīmi
||63||सर्वे वेदा यत्पदमामनन्ति तपांसि सर्वाणि च यद्वदन्ति ।
यदिच्छन्तो ब्रह्मचर्यं चरन्ति तत्ते पदं संग्रहेण ब्रवीमि
omityekākṣaraṃ brahma tadevāhuśca hrīṃmayam |
dve bīje mama mantrau sto mukhyatvena surottama
||64||ओमित्येकाक्षरं ब्रह्म तदेवाहुश्च ह्रींमयम् ।
द्वे बीजे मम मन्त्रौ स्तो मुख्यत्वेन सुरोत्तम
bhāgadvayavatī yasmātsṛjāmi sakalaṃ jagat |
tatraikabhāgaḥ samproktaḥ saccidānandanāmakaḥ
||65||भागद्वयवती यस्मात्सृजामि सकलं जगत् ।
तत्रैकभागः सम्प्रोक्तः सच्चिदानन्दनामकः
māyāprakṛtisaṃjñastu dvitīyo bhāga īritaḥ |
sā ca māyā parā śaktiḥ śaktimatyahamīśvarī
||66||मायाप्रकृतिसंज्ञस्तु द्वितीयो भाग ईरितः ।
सा च माया परा शक्तिः शक्तिमत्यहमीश्वरी
candrasya candrikeveyaṃ mamābhinnatvamāgatā |
sāmyāvasthātmikā caiṣā māyā mama surottama
||67||चन्द्रस्य चन्द्रिकेवेयं ममाभिन्नत्वमागता ।
साम्यावस्थात्मिका चैषा माया मम सुरोत्तम
pralaye sarvajagato madabhinnaiva tiṣṭhati |
prāṇikarmaparīpākavaśataḥ punareva hi
||68||प्रलये सर्वजगतो मदभिन्नैव तिष्ठति ।
प्राणिकर्मपरीपाकवशतः पुनरेव हि
rūpaṃ tadevamavyaktaṃ vyaktībhāvamupaiti ca |
antarmukhā tu yāvasthā sā māyetyabhidhīyate
||69||रूपं तदेवमव्यक्तं व्यक्तीभावमुपैति च ।
अन्तर्मुखा तु यावस्था सा मायेत्यभिधीयते
bahirmukhā tu yā māyā tamaḥśabdena socyate |
bahirmukhāttamorūpājjāyate sattvasambhavaḥ
||70||बहिर्मुखा तु या माया तमःशब्देन सोच्यते ।
बहिर्मुखात्तमोरूपाज्जायते सत्त्वसम्भवः
rajoguṇastadaiva syātsargādau surasattama |
guṇatrayātmakāḥ proktā brahmaviṣṇumaheśvarāḥ
||71||रजोगुणस्तदैव स्यात्सर्गादौ सुरसत्तम ।
गुणत्रयात्मकाः प्रोक्ता ब्रह्मविष्णुमहेश्वराः
rajoguṇādhiko brahmā viṣṇuḥ sattvādhiko bhavet |
tamoguṇādhiko rudraḥ sarvakāraṇarūpadhṛk
||72||रजोगुणाधिको ब्रह्मा विष्णुः सत्त्वाधिको भवेत् ।
तमोगुणाधिको रुद्रः सर्वकारणरूपधृक्
sthūladeho bhavedbrahmā liṅgadeho hariḥ smṛtaḥ |
rudrastu kāraṇo dehasturīyā tvahameva hi
||73||स्थूलदेहो भवेद्ब्रह्मा लिङ्गदेहो हरिः स्मृतः ।
रुद्रस्तु कारणो देहस्तुरीया त्वहमेव हि
sāmyāvasthā tu yā proktā sarvāntaryāmirūpiṇī |
ata ūrdhvaṃ paraṃ brahma madrūpaṃ rūpavarjitam
||74||साम्यावस्था तु या प्रोक्ता सर्वान्तर्यामिरूपिणी ।
अत ऊर्ध्वं परं ब्रह्म मद्रूपं रूपवर्जितम्
nirguṇaṃ saguṇaṃ ceti dvidhā madrūpamucyate |
nirguṇaṃ māyayā hīnaṃ saguṇaṃ māyayā yutam
||75||निर्गुणं सगुणं चेति द्विधा मद्रूपमुच्यते ।
निर्गुणं मायया हीनं सगुणं मायया युतम्
sāhaṃ sarvaṃ jagatsṛṣṭvā tadantaḥ sampraviśya ca |
prerayāmyaniśaṃ jīvaṃ yathākarma yathāśrutam
||76||साहं सर्वं जगत्सृष्ट्वा तदन्तः सम्प्रविश्य च ।
प्रेरयाम्यनिशं जीवं यथाकर्म यथाश्रुतम्
sṛṣṭisthititirodhāne prerayāmyahameva hi |
brahmāṇaṃ ca tathā viṣṇuṃ rudraṃ vai kāraṇātmakam
||77||सृष्टिस्थितितिरोधाने प्रेरयाम्यहमेव हि ।
ब्रह्माणं च तथा विष्णुं रुद्रं वै कारणात्मकम्
madbhayādvāti pavano bhītyā sūryaśca gacchati |
indrāgnimṛtyavastadvatsāhaṃ sarvottamā smṛtā
||78||मद्भयाद्वाति पवनो भीत्या सूर्यश्च गच्छति ।
इन्द्राग्निमृत्यवस्तद्वत्साहं सर्वोत्तमा स्मृता
matprasādādbhavadbhistu jayo labdho'sti sarvathā |
yuṣmānahaṃ nartayāmi kāṣṭhaputtalikopamān
||79||मत्प्रसादाद्भवद्भिस्तु जयो लब्धोऽस्ति सर्वथा ।
युष्मानहं नर्तयामि काष्ठपुत्तलिकोपमान्
kadāciddevavijayaṃ daityānāṃ vijayaṃ kvacit |
svatantrā svecchayā sarvaṃ kurve karmānurodhataḥ
||80||कदाचिद्देवविजयं दैत्यानां विजयं क्वचित् ।
स्वतन्त्रा स्वेच्छया सर्वं कुर्वे कर्मानुरोधतः
tāṃ māṃ sarvātmikāṃ yūyaṃ vismṛtya nijagarvataḥ |
ahaṅkārāvṛtātmāno mohamāptā durantakam
||81||तां मां सर्वात्मिकां यूयं विस्मृत्य निजगर्वतः ।
अहङ्कारावृतात्मानो मोहमाप्ता दुरन्तकम्
anugrahaṃ tataḥ kartuṃ yuṣmaddehādanuttamam |
niḥsṛtaṃ sahasā tejo madīyaṃ yakṣamityapi
||82||अनुग्रहं ततः कर्तुं युष्मद्देहादनुत्तमम् ।
निःसृतं सहसा तेजो मदीयं यक्षमित्यपि
ataḥ paraṃ sarvabhāvairhitvā garvaṃ tu dehajam |
māmeva śaraṇaṃ yāta saccidānandarūpiṇīm
||83||अतः परं सर्वभावैर्हित्वा गर्वं तु देहजम् ।
मामेव शरणं यात सच्चिदानन्दरूपिणीम्
vyāsa uvāca
ityuktyā ca mahādevī mūlaprakṛtirīśvarī |
antardhānaṃ gatā sadyo bhaktyā devairabhiṣṭutā
||84||इत्युक्त्या च महादेवी मूलप्रकृतिरीश्वरी ।
अन्तर्धानं गता सद्यो भक्त्या देवैरभिष्टुता
tataḥ sarve svagarvaṃ tu vihāya padapaṅkajam |
samyagārādhayāmāsurbhagavatyāḥ parātparam
||85||ततः सर्वे स्वगर्वं तु विहाय पदपङ्कजम् ।
सम्यगाराधयामासुर्भगवत्याः परात्परम्
trisandhyaṃ sarvadā sarve gāyatrījapatatparāḥ |
yajñabhāgādibhiḥ sarve devīṃ nityaṃ siṣevire
||86||त्रिसन्ध्यं सर्वदा सर्वे गायत्रीजपतत्पराः ।
यज्ञभागादिभिः सर्वे देवीं नित्यं सिषेविरे
evaṃ satyayuge sarve gāyatrījapatatparāḥ |
tārahṛllekhayoścāpi jape niṣṇātamānasāḥ
||87||एवं सत्ययुगे सर्वे गायत्रीजपतत्पराः ।
तारहृल्लेखयोश्चापि जपे निष्णातमानसाः
na viṣṇūpāsanā nityā vedenoktā tu kutracit |
na viṣṇudīkṣā nityāsti śivasyāpi tathaiva ca
||88||न विष्णूपासना नित्या वेदेनोक्ता तु कुत्रचित् ।
न विष्णुदीक्षा नित्यास्ति शिवस्यापि तथैव च
gāyatryupāsanā nityā sarvavedaiḥ samīritā |
yayā vinā tvadhaḥpāto brāhmaṇasyāsti sarvathā
||89||गायत्र्युपासना नित्या सर्ववेदैः समीरिता ।
यया विना त्वधःपातो ब्राह्मणस्यास्ति सर्वथा
tāvatā kṛtakṛtyatvaṃ nānyāpekṣā dvijasya hi |
gāyatrīmātraniṣṇāto dvijo mokṣamavāpnuyāt
||90||तावता कृतकृत्यत्वं नान्यापेक्षा द्विजस्य हि ।
गायत्रीमात्रनिष्णातो द्विजो मोक्षमवाप्नुयात्
kuryādanyanna vā kuryāditi prāha manuḥ svayam |
vihāya tāṃ tu gāyatrīṃ viṣṇūpāstiparāyaṇaḥ
||91||कुर्यादन्यन्न वा कुर्यादिति प्राह मनुः स्वयम् ।
विहाय तां तु गायत्रीं विष्णूपास्तिपरायणः
śivopāstirato vipro narakaṃ yāti sarvathā |
tasmādādyayuge rājan gāyatrījapatatparāḥ |
devīpadāmbujaratā āsansarve dvijottamāḥ
||92||शिवोपास्तिरतो विप्रो नरकं याति सर्वथा ।
तस्मादाद्ययुगे राजन् गायत्रीजपतत्पराः ।
देवीपदाम्बुजरता आसन्सर्वे द्विजोत्तमाः
iti śrīmaddevībhāgavate mahāpurāṇe'ṣṭādaśasāhasryāṃ sahitāyāṃ dvādaśaskandhe parāśakterāvirbhāvavarṇanaṃ nāmāṣṭamo'dhyāyaḥ || 8 ||
vargaḥvībhāgavatapurāṇam