mantradīkṣāvidhivarṇanam
nārada uvāca
śrutaṃ sahasranāmākhyaṃ śrīgāyatryāḥ phalapradam |
stotraṃ mahonnatikaraṃ mahābhāgyakaraṃ param
||1||श्रुतं सहस्रनामाख्यं श्रीगायत्र्याः फलप्रदम् ।
स्तोत्रं महोन्नतिकरं महाभाग्यकरं परम्
adhunā śrotumicchāmi dīkṣālakṣaṇamuttamam |
vinā yena na sidhyeta devīmantre'dhikāritā
||2||अधुना श्रोतुमिच्छामि दीक्षालक्षणमुत्तमम् ।
विना येन न सिध्येत देवीमन्त्रेऽधिकारिता
brāhmaṇānāṃ kṣatriyāṇāṃ viśāṃ strīṇāṃ tathaiva ca |
sāmānyavidhinā sarvaṃ vistareṇa vada prabho
||3||ब्राह्मणानां क्षत्रियाणां विशां स्त्रीणां तथैव च ।
सामान्यविधिना सर्वं विस्तरेण वद प्रभो
śrīnārāyaṇa uvāca
śṛṇu dīkṣāṃ pravakṣyāmi śiṣyāṇāṃ bhāvitātmanām |
devāgnigurupūjādāvadhikāro yayā bhavet
||4||शृणु दीक्षां प्रवक्ष्यामि शिष्याणां भावितात्मनाम् ।
देवाग्निगुरुपूजादावधिकारो यया भवेत्
divyaṃ jñānaṃ hi yā dadyātkuryātpāpakṣayaṃ tu yā |
saiva dīkṣeti samproktā vedatantraviśāradaiḥ
||5||दिव्यं ज्ञानं हि या दद्यात्कुर्यात्पापक्षयं तु या ।
सैव दीक्षेति सम्प्रोक्ता वेदतन्त्रविशारदैः
avaśyaṃ sā tu kartavyā yato bahuphalā matā |
guruśiṣyāvubhāvatrāpyatiśuddhāvapekṣitau
||6||अवश्यं सा तु कर्तव्या यतो बहुफला मता ।
गुरुशिष्यावुभावत्राप्यतिशुद्धावपेक्षितौ
gurustu vidhivatprātaḥ kṛtyaṃ sarvaṃ vidhāya ca |
snānasandhyādikaṃ sarvaṃ yathāvidhi vidhāya ca
||7||गुरुस्तु विधिवत्प्रातः कृत्यं सर्वं विधाय च ।
स्नानसन्ध्यादिकं सर्वं यथाविधि विधाय च
kamaṇḍalukaro maunī gṛhaṃ yāyātsarittaṭāt |
yāgamaṇḍapamāsādya viśettatrāsane vare
||8||कमण्डलुकरो मौनी गृहं यायात्सरित्तटात् ।
यागमण्डपमासाद्य विशेत्तत्रासने वरे
ācamya prāṇānāyamya gandhapuṣpavimiśritam |
saptavārāstramantreṇa japtaṃ vāri susādhayet
||9||आचम्य प्राणानायम्य गन्धपुष्पविमिश्रितम् ।
सप्तवारास्त्रमन्त्रेण जप्तं वारि सुसाधयेत्
vāriṇā tena matimānastramantraṃ samuccaran |
prokṣayeddvāramakhilaṃ tataḥ pūjāṃ samācaret
||10||वारिणा तेन मतिमानस्त्रमन्त्रं समुच्चरन् ।
प्रोक्षयेद्द्वारमखिलं ततः पूजां समाचरेत्
ūrdhvodumbarake devaṃ gaṇanāthaṃ tathā śriyam |
sarasvatīṃ nāmamantraiḥ pūjayedgandhapuṣpakaiḥ
||11||ऊर्ध्वोदुम्बरके देवं गणनाथं तथा श्रियम् ।
सरस्वतीं नाममन्त्रैः पूजयेद्गन्धपुष्पकैः
dvāradakṣiṇaśākhāyāṃ gaṅgāṃ vighneśamarcayet |
dvārasya vāmaśākhāyāṃ kṣetrapālaṃ ca sūryajām
||12||द्वारदक्षिणशाखायां गङ्गां विघ्नेशमर्चयेत् ।
द्वारस्य वामशाखायां क्षेत्रपालं च सूर्यजाम्
dehalyāṃ pūjayedastradevatāmastramantrataḥ |
sarvaṃ devīmayaṃ dṛśyamiti sañcintya sarvataḥ
||13||देहल्यां पूजयेदस्त्रदेवतामस्त्रमन्त्रतः ।
सर्वं देवीमयं दृश्यमिति सञ्चिन्त्य सर्वतः
divyānutsārayedvighnānastramantrajapena tu |
antarikṣagatānvighnānpādaghātaistu bhūmigān |
14 vāmaśākhāṃ spṛśanpaścātpraviśeddakṣiṇāṅghriṇā |
praviśya kumbhaṃ saṃsthāpya sāmānyārghyaṃ vidhāya ca
||15||दिव्यानुत्सारयेद्विघ्नानस्त्रमन्त्रजपेन तु ।
अन्तरिक्षगतान्विघ्नान्पादघातैस्तु भूमिगान् ।
१४ वामशाखां स्पृशन्पश्चात्प्रविशेद्दक्षिणाङ्घ्रिणा ।
प्रविश्य कुम्भं संस्थाप्य सामान्यार्घ्यं विधाय च
tena cārghyajalenāpi nairṛtyāṃ diśi pūjayet |
vāstunāthaṃ padmayoniṃ gandhapuṣpākṣatādibhiḥ
||16||तेन चार्घ्यजलेनापि नैर्ऋत्यां दिशि पूजयेत् ।
वास्तुनाथं पद्मयोनिं गन्धपुष्पाक्षतादिभिः
tataḥ kuryātpañcagavyaṃ tena cārghyodakena ca |
toraṇastambhaparyantaṃ prokṣayenmaṇḍapaṃ guruḥ
||17||ततः कुर्यात्पञ्चगव्यं तेन चार्घ्योदकेन च ।
तोरणस्तम्भपर्यन्तं प्रोक्षयेन्मण्डपं गुरुः
sarvaṃ devīmayaṃ cedaṃ bhāvayenmanasā kila |
mūlamantraṃ japanbhaktyā prokṣaṇaṃ syāccharāṇunā
||18||सर्वं देवीमयं चेदं भावयेन्मनसा किल ।
मूलमन्त्रं जपन्भक्त्या प्रोक्षणं स्याच्छराणुना
śaramantraṃ samuccārya tāḍayenmaṇḍapakṣamām |
huṃmantraṃ tu samuccārya kuryādabhyukṣaṇaṃ tataḥ
||19||शरमन्त्रं समुच्चार्य ताडयेन्मण्डपक्षमाम् ।
हुंमन्त्रं तु समुच्चार्य कुर्यादभ्युक्षणं ततः
dhūpayedantaraṃ dhūpairvikirān vikirettataḥ |
mārjayettāṃstu mārjanyā kuśanirmitayā punaḥ
||20||धूपयेदन्तरं धूपैर्विकिरान् विकिरेत्ततः ।
मार्जयेत्तांस्तु मार्जन्या कुशनिर्मितया पुनः
īśānadiśi tatpuñjaṃ kṛtvā saṃsthāpayenmune |
puṇyāhavācanaṃ kṛtvā dīnānāthāṃśca toṣayet
||21||ईशानदिशि तत्पुञ्जं कृत्वा संस्थापयेन्मुने ।
पुण्याहवाचनं कृत्वा दीनानाथांश्च तोषयेत्
viśenmṛdvāsane paścānnamaskṛtya guruṃ nijam |
prāṅmukho vidhivaddhyātvā deyamantrasya devatām
||22||विशेन्मृद्वासने पश्चान्नमस्कृत्य गुरुं निजम् ।
प्राङ्मुखो विधिवद्ध्यात्वा देयमन्त्रस्य देवताम्
bhūtaśuddhyādikaṃ kṛtvā pūrvoktenaiva vartmanā |
ṛṣyādinyāsakaṃ kuryāddeyamantrasya vai mune
||23||भूतशुद्ध्यादिकं कृत्वा पूर्वोक्तेनैव वर्त्मना ।
ऋष्यादिन्यासकं कुर्याद्देयमन्त्रस्य वै मुने
nyasenmuniṃ tu śirasi mukhe chandaḥ samīritam |
devatāṃ hṛdayāmbhoje guhye bījaṃ tu pādayoḥ
||24||न्यसेन्मुनिं तु शिरसि मुखे छन्दः समीरितम् ।
देवतां हृदयाम्भोजे गुह्ये बीजं तु पादयोः
śaktiṃ vinyasya paścāttu tālatrayaravāttataḥ |
digbandhaṃ kārayetpaścācchoṭikābhistribhirnaraḥ
||25||शक्तिं विन्यस्य पश्चात्तु तालत्रयरवात्ततः ।
दिग्बन्धं कारयेत्पश्चाच्छोटिकाभिस्त्रिभिर्नरः
prāṇāyāmaṃ tataḥ kṛtvā mūlamantramanusmaran |
mātṛkāṃ vinyaseddehe tatprakārastathocyate
||26||प्राणायामं ततः कृत्वा मूलमन्त्रमनुस्मरन् ।
मातृकां विन्यसेद्देहे तत्प्रकारस्तथोच्यते
oṃ aṃ nama iti procya nyasecchirasi mantravit |
evameva tu sarveṣu nyasetsthāneṣu vai mune
||27||ॐ अं नम इति प्रोच्य न्यसेच्छिरसि मन्त्रवित् ।
एवमेव तु सर्वेषु न्यसेत्स्थानेषु वै मुने
mūlamantraṃ ṣaḍaṅgaṃ ca nyasedaṅgeṣu sattamaḥ |
aṅguṣṭhādiṣvaṅgulīṣu hṛdayādiṣu ca kramāt
||28||मूलमन्त्रं षडङ्गं च न्यसेदङ्गेषु सत्तमः ।
अङ्गुष्ठादिष्वङ्गुलीषु हृदयादिषु च क्रमात्
namaḥ svāhāvaṣaḍyuktairhuṃvauṣaṭphaṭpadānvitaiḥ |
praṇavādiyutairmantraiḥ ṣaḍbhireva ṣaḍaṅgakam
||29||नमः स्वाहावषड्युक्तैर्हुंवौषट्फट्पदान्वितैः ।
प्रणवादियुतैर्मन्त्रैः षड्भिरेव षडङ्गकम्
varṇanyāsādikaṃ paścānmūlamantrasya yojayet |
sthāneṣu tattatkalpokteṣviti nyāsavidhiḥ smṛtaḥ
||30||वर्णन्यासादिकं पश्चान्मूलमन्त्रस्य योजयेत् ।
स्थानेषु तत्तत्कल्पोक्तेष्विति न्यासविधिः स्मृतः
tato nije śarīre'smiṃścintayedāsanaṃ śubham |
dakṣāṃse ca nyaseddharmaṃ vāmāṃse jñānameva ca
||31||ततो निजे शरीरेऽस्मिंश्चिन्तयेदासनं शुभम् ।
दक्षांसे च न्यसेद्धर्मं वामांसे ज्ञानमेव च
vāmorau cāpi vairāgyaṃ dakṣorāvatha vinyaset |
aiśvaryaṃ mukhadeśe tu mune dhyāyedadharmakam
||32||वामोरौ चापि वैराग्यं दक्षोरावथ विन्यसेत् ।
ऐश्वर्यं मुखदेशे तु मुने ध्यायेदधर्मकम्
vāmapārśve nābhideśe dakṣapārśve tathā punaḥ |
nañādīścāpi jñānādīnpūrvoktāneva vinyaset
||33||वामपार्श्वे नाभिदेशे दक्षपार्श्वे तथा पुनः ।
नञादीश्चापि ज्ञानादीन्पूर्वोक्तानेव विन्यसेत्
pādā dharmādayaḥ proktāḥ pīṭhasya munisattama |
adharmādyāstu gātrāṇi smṛtāni munipuṅgavaiḥ
||34||पादा धर्मादयः प्रोक्ताः पीठस्य मुनिसत्तम ।
अधर्माद्यास्तु गात्राणि स्मृतानि मुनिपुङ्गवैः
madhye'nantaṃ hṛdi sthāne nyasenmṛdvāsane sthale |
prapañcapadmaṃ vimalaṃ tasminsūryendupāvakān
||35||मध्येऽनन्तं हृदि स्थाने न्यसेन्मृद्वासने स्थले ।
प्रपञ्चपद्मं विमलं तस्मिन्सूर्येन्दुपावकान्
nyasetkalāyutānmantrī saṃkṣepāttā vadāmyaham |
sūryasya dvādaśa kalāstā indoḥ ṣoḍaśa smṛtāḥ
||36||न्यसेत्कलायुतान्मन्त्री संक्षेपात्ता वदाम्यहम् ।
सूर्यस्य द्वादश कलास्ता इन्दोः षोडश स्मृताः
daśa vahneḥ kalāḥ proktāstābhiryuktāṃstu tānsmaret |
sattvaṃ rajastamaścaiva nyasetteṣāmathopari
||37||दश वह्नेः कलाः प्रोक्तास्ताभिर्युक्तांस्तु तान्स्मरेत् ।
सत्त्वं रजस्तमश्चैव न्यसेत्तेषामथोपरि
ātmānamantarātmānaṃ paramātmānameva ca |
jñānātmānaṃ nyasedvidvānitthaṃ pīṭhasya kalpanā
||38||आत्मानमन्तरात्मानं परमात्मानमेव च ।
ज्ञानात्मानं न्यसेद्विद्वानित्थं पीठस्य कल्पना
amukāsanāya nama iti mantreṇa sādhakaḥ |
āsanaṃ pūjayitvā tu tasmindhyāyetparāmbikām
||39||अमुकासनाय नम इति मन्त्रेण साधकः ।
आसनं पूजयित्वा तु तस्मिन्ध्यायेत्पराम्बिकाम्
kalpoktavidhinā mantrī deyamantrasya devatām |
mānasairupacāraiśca pūjayettāṃ yathāvidhi
||40||कल्पोक्तविधिना मन्त्री देयमन्त्रस्य देवताम् ।
मानसैरुपचारैश्च पूजयेत्तां यथाविधि
mudrāḥ pradarśayedvidvānkalpoktā modakārikāḥ |
yābhirviracitābhistu modo devyāstu jāyate
||41||मुद्राः प्रदर्शयेद्विद्वान्कल्पोक्ता मोदकारिकाः ।
याभिर्विरचिताभिस्तु मोदो देव्यास्तु जायते
śrīnārāyaṇa uvāca
tataḥ svavāmabhāgāgre ṣaṭkoṇopari vartulam |
caturasrayutaṃ samyaṅmadhye maṇḍalamālikhet
||42||ततः स्ववामभागाग्रे षट्कोणोपरि वर्तुलम् ।
चतुरस्रयुतं सम्यङ्मध्ये मण्डलमालिखेत्
madhye trikoṇaṃ saṃlikhya śaṅkhamudrāṃ pradarśayet |
ṣaḍaṅgāni ca ṣaṭkoṇeṣvarcayetkusumādibhiḥ
||43||मध्ये त्रिकोणं संलिख्य शङ्खमुद्रां प्रदर्शयेत् ।
षडङ्गानि च षट्कोणेष्वर्चयेत्कुसुमादिभिः
agnyādiṣu tu koṇeṣu ṣaḍaṅgārcanamācaret |
ādhārapātramādāya śaṅkhasya munisattama
||44||अग्न्यादिषु तु कोणेषु षडङ्गार्चनमाचरेत् ।
आधारपात्रमादाय शङ्खस्य मुनिसत्तम
astramantreṇa samprokṣya sthāpayettatra maṇḍale |
maṃ vahnimaṇḍalāyoktvā tato daśakalātmane
||45||अस्त्रमन्त्रेण सम्प्रोक्ष्य स्थापयेत्तत्र मण्डले ।
मं वह्निमण्डलायोक्त्वा ततो दशकलात्मने
amukadevyā arghyapātrasthānāya nama ityapi |
mantro'yamuktaḥ śaṅkhasyāpyādhārasthāpane budhaiḥ
||46||अमुकदेव्या अर्घ्यपात्रस्थानाय नम इत्यपि ।
मन्त्रोऽयमुक्तः शङ्खस्याप्याधारस्थापने बुधैः
ādhāre pūrvamārabhya pradakṣiṇakrameṇa tu |
daśa vahnikalāḥ pūjyā vahnimaṇḍalasaṃsthitāḥ
||47||आधारे पूर्वमारभ्य प्रदक्षिणक्रमेण तु ।
दश वह्निकलाः पूज्या वह्निमण्डलसंस्थिताः
tato vai mūlamantreṇa prokṣitaṃ śaṅkhamuttamam |
sthāpayettatra cādhāre mūlamantramanusmaran
||48||ततो वै मूलमन्त्रेण प्रोक्षितं शङ्खमुत्तमम् ।
स्थापयेत्तत्र चाधारे मूलमन्त्रमनुस्मरन्
aṃ sūryamaṇḍalāyoktvā dvādaśānte kalātmane |
amukadevyarghyapātrāya nama ityuccarettataḥ
||49||अं सूर्यमण्डलायोक्त्वा द्वादशान्ते कलात्मने ।
अमुकदेव्यर्घ्यपात्राय नम इत्युच्चरेत्ततः
śaṃ śaṅkhāya padaṃ procya nama ityetaduccaret |
prokṣayettena taṃ śaṅkhaṃ tasmindvādaśa pūjayet
||50||शं शङ्खाय पदं प्रोच्य नम इत्येतदुच्चरेत् ।
प्रोक्षयेत्तेन तं शङ्खं तस्मिन्द्वादश पूजयेत्
sūryasya dvādaśa kalāstapanyādyā yathākramam |
vilomamātṛkāṃ procya mūlamantraṃ vilomakam
||51||सूर्यस्य द्वादश कलास्तपन्याद्या यथाक्रमम् ।
विलोममातृकां प्रोच्य मूलमन्त्रं विलोमकम्
jalairāpūrayecchaṅkhaṃ tatra cendoḥ kalāṃ nyaset |
oṃ somamaṇḍalāyoktvānte ṣoḍaśakalātmane
||52||जलैरापूरयेच्छङ्खं तत्र चेन्दोः कलां न्यसेत् ।
ॐ सोममण्डलायोक्त्वान्ते षोडशकलात्मने
amukārghyāmṛtāyeti hṛnmantrānto manuḥ smṛtaḥ |
pūjayenmanunā tena jalaṃ tu sṛṇimudrayā
||53||अमुकार्घ्यामृतायेति हृन्मन्त्रान्तो मनुः स्मृतः ।
पूजयेन्मनुना तेन जलं तु सृणिमुद्रया
tīrthānyāvāhya tatraivāpyaṣṭakṛtvo japenmanum |
ṣaḍaṅgāni jale nyasya hṛdā saṃpūjayedapaḥ
||54||तीर्थान्यावाह्य तत्रैवाप्यष्टकृत्वो जपेन्मनुम् ।
षडङ्गानि जले न्यस्य हृदा संपूजयेदपः
aṣṭakṛtvo japenmūlaṃ chādayenmatsyamudrayā |
tato dakṣiṇadigbhāge śaṅkhasya prokṣaṇīṃ nyaset
||55||अष्टकृत्वो जपेन्मूलं छादयेन्मत्स्यमुद्रया ।
ततो दक्षिणदिग्भागे शङ्खस्य प्रोक्षणीं न्यसेत्
śaṅkhāmbu kiñcinnikṣipya prokṣayettena sarvataḥ |
pūjādravyaṃ nijātmānaṃ viśuddhaṃ bhāvayettataḥ
||56||शङ्खाम्बु किञ्चिन्निक्षिप्य प्रोक्षयेत्तेन सर्वतः ।
पूजाद्रव्यं निजात्मानं विशुद्धं भावयेत्ततः
śrīnārāyaṇāya uvāca
tataḥ svapurato vedyāṃ sarvatobhadramaṇḍalam |
saṃlikhya karṇikāmadhyaṃ pūrayecchālitaṇḍulaiḥ
||57||ततः स्वपुरतो वेद्यां सर्वतोभद्रमण्डलम् ।
संलिख्य कर्णिकामध्यं पूरयेच्छालितण्डुलैः
āstīrya darbhāṃstatraiva nyasetkūrcaṃ salakṣaṇam |
ādhāraśaktimārabhya pīṭhamanvantamarcayet
||58||आस्तीर्य दर्भांस्तत्रैव न्यसेत्कूर्चं सलक्षणम् ।
आधारशक्तिमारभ्य पीठमन्वन्तमर्चयेत्
nirvraṇaṃ kumbhamādāyāpyastrādbhiḥ kṣālitāntaram |
tantunā veṣṭayettaṃ tu triguṇenāruṇena ca
||59||निर्व्रणं कुम्भमादायाप्यस्त्राद्भिः क्षालितान्तरम् ।
तन्तुना वेष्टयेत्तं तु त्रिगुणेनारुणेन च
navaratnodaraṃ kūrcayutaṃ gandhādipūjitam |
sthāpayettatra pīṭhe tu tāramantreṇa deśikaḥ
||60||नवरत्नोदरं कूर्चयुतं गन्धादिपूजितम् ।
स्थापयेत्तत्र पीठे तु तारमन्त्रेण देशिकः
aikyaṃ kumbhasya pīṭhasya bhāvayetpūrayettataḥ |
mātṛkāṃ pratilomena japaṃstīrthodakairmune
||61||ऐक्यं कुम्भस्य पीठस्य भावयेत्पूरयेत्ततः ।
मातृकां प्रतिलोमेन जपंस्तीर्थोदकैर्मुने
mūlamantraṃ ca sañjapya pūrayeddevatādhiyā |
aśvatthapanasāmrāṇāṃ komalairnavapallavaiḥ
||62||मूलमन्त्रं च सञ्जप्य पूरयेद्देवताधिया ।
अश्वत्थपनसाम्राणां कोमलैर्नवपल्लवैः
chādayetkumbhavadanaṃ caṣakaṃ saphalākṣatam |
saṃsthāpayeta matimān vastrayugmena veṣṭayet
||63||छादयेत्कुम्भवदनं चषकं सफलाक्षतम् ।
संस्थापयेत मतिमान् वस्त्रयुग्मेन वेष्टयेत्
prāṇasthāpanamantreṇa prāṇasthāpanamācaret |
āvāhanādimudrābhirmodayeddevatāṃ parām
||64||प्राणस्थापनमन्त्रेण प्राणस्थापनमाचरेत् ।
आवाहनादिमुद्राभिर्मोदयेद्देवतां पराम्
dhyāyettāṃ parameśānīṃ kalpoktena prakārataḥ |
svāgataṃ kuśalapraśnaṃ devyā agre samuccaret
||65||ध्यायेत्तां परमेशानीं कल्पोक्तेन प्रकारतः ।
स्वागतं कुशलप्रश्नं देव्या अग्रे समुच्चरेत्
pādyaṃ dadyāttato'pyarghyaṃ tataścācamanīyakam |
madhuparkaṃ ca sābhyaṅgaṃ devyai snānaṃ nivedayet
||66||पाद्यं दद्यात्ततोऽप्यर्घ्यं ततश्चाचमनीयकम् ।
मधुपर्कं च साभ्यङ्गं देव्यै स्नानं निवेदयेत्
vāsasī ca tato dadyādrakte kṣaume sunirmale |
nānāmaṇigaṇākīrṇānākalpānkalpayettataḥ
||67||वाससी च ततो दद्याद्रक्ते क्षौमे सुनिर्मले ।
नानामणिगणाकीर्णानाकल्पान्कल्पयेत्ततः
manunā puṭitairvarṇairmātṛkāyā vidhānataḥ |
devyā aṅgeṣu vinyasya candanādyaiḥ samarcayet
||68||मनुना पुटितैर्वर्णैर्मातृकाया विधानतः ।
देव्या अङ्गेषु विन्यस्य चन्दनाद्यैः समर्चयेत्
gandhaḥ kālāgurubhavaḥ karpūreṇa samanvitaḥ |
kāśmīraṃ candanaṃ cāpi kastūrīsahitaṃ mune
||69||गन्धः कालागुरुभवः कर्पूरेण समन्वितः ।
काश्मीरं चन्दनं चापि कस्तूरीसहितं मुने
kundapuṣpādipuṣpāṇi paradevyai samarpayet |
dhūpo'gurupuruvrātośīracandanaśarkarāḥ
||70||कुन्दपुष्पादिपुष्पाणि परदेव्यै समर्पयेत् ।
धूपोऽगुरुपुरुव्रातोशीरचन्दनशर्कराः
madhumiśrāḥ smṛtā devyāḥ priyā dhūpātmanā sadā |
dīpānanekāndattvātha naivedyaṃ darśayetsudhīḥ
||71||मधुमिश्राः स्मृता देव्याः प्रिया धूपात्मना सदा ।
दीपाननेकान्दत्त्वाथ नैवेद्यं दर्शयेत्सुधीः
pratidravyaṃ jalaṃ dadyātprokṣaṇīsthaṃ na cānyathā |
tataḥ kuryādaṅgapūjāṃ kalpoktāvaraṇāni ca
||72||प्रतिद्रव्यं जलं दद्यात्प्रोक्षणीस्थं न चान्यथा ।
ततः कुर्यादङ्गपूजां कल्पोक्तावरणानि च
sāṅgāṃ devīmathābhyarcya vaiśvadevaṃ tataścaret |
dakṣiṇe sthaṇḍilaṃ kṛtvā tatrādhāya hutāśanam
||73||साङ्गां देवीमथाभ्यर्च्य वैश्वदेवं ततश्चरेत् ।
दक्षिणे स्थण्डिलं कृत्वा तत्राधाय हुताशनम्
mūrtisthāṃ devatāṃ tatrāvāhya saṃpūjya ca kramāt |
tāravyāhṛtibhirhutvā mūlamantreṇa vai tataḥ
||74||मूर्तिस्थां देवतां तत्रावाह्य संपूज्य च क्रमात् ।
तारव्याहृतिभिर्हुत्वा मूलमन्त्रेण वै ततः
pañcaviṃśativāraṃ tu pāyasena sasarpiṣā |
hunetpaścādvyāhṛtibhiḥ punaśca juhuyānmune
||75||पञ्चविंशतिवारं तु पायसेन ससर्पिषा ।
हुनेत्पश्चाद्व्याहृतिभिः पुनश्च जुहुयान्मुने
gandhādyairarcayitvā ca devīṃ pīṭhe tu yojayet |
vahniṃ visṛjya haviṣā parito vikiredbalim
||76||गन्धाद्यैरर्चयित्वा च देवीं पीठे तु योजयेत् ।
वह्निं विसृज्य हविषा परितो विकिरेद्बलिम्
devatāyāḥ pārṣadebhyo gandhapuṣpādisaṃyutān |
pañcopacārāndattvātha tāmbūlaṃ chatracāmare
||77||देवतायाः पार्षदेभ्यो गन्धपुष्पादिसंयुतान् ।
पञ्चोपचारान्दत्त्वाथ ताम्बूलं छत्रचामरे
dadyāddevyai tato mantraṃ sahasrāvṛttito japet |
japaṃ samarpya caiśānyāṃ vikire diśi saṃsthite
||78||दद्याद्देव्यै ततो मन्त्रं सहस्रावृत्तितो जपेत् ।
जपं समर्प्य चैशान्यां विकिरे दिशि संस्थिते
karkarīṃ sthāpayettasyāṃ durgāmāvāhya pūjayet |
rakṣa rakṣeti coccārya nālamuktena vāriṇā
||79||कर्करीं स्थापयेत्तस्यां दुर्गामावाह्य पूजयेत् ।
रक्ष रक्षेति चोच्चार्य नालमुक्तेन वारिणा
astramantraṃ japandeśaṃ secayettu pradakṣiṇam |
karkarīṃ sthāpayetsthāne pūjayeccāstradevatām
||80||अस्त्रमन्त्रं जपन्देशं सेचयेत्तु प्रदक्षिणम् ।
कर्करीं स्थापयेत्स्थाने पूजयेच्चास्त्रदेवताम्
paścādgurustu śiṣyeṇa saha bhuñjīta vāgyataḥ |
tasyāṃ rātrau tu tadvedyāṃ nidrāṃ kuryātprayatnataḥ
||81||पश्चाद्गुरुस्तु शिष्येण सह भुञ्जीत वाग्यतः ।
तस्यां रात्रौ तु तद्वेद्यां निद्रां कुर्यात्प्रयत्नतः
śrīnārāyaṇa uvāca
tataḥ kuṇḍasya saṃskāraṃ sthaṇḍilasya ca vā mune |
pravakṣyāmi samāsena yathāvidhi vidhānataḥ
||82||ततः कुण्डस्य संस्कारं स्थण्डिलस्य च वा मुने ।
प्रवक्ष्यामि समासेन यथाविधि विधानतः
mūlamantraṃ samuccārya vīkṣayedastramantrataḥ |
prokṣayettāḍanaṃ kuryāttenaiva kavacena tu
||83||मूलमन्त्रं समुच्चार्य वीक्षयेदस्त्रमन्त्रतः ।
प्रोक्षयेत्ताडनं कुर्यात्तेनैव कवचेन तु
abhyukṣaṇaṃ samuddiṣṭaṃ tisrastisrastataḥ param |
prāgagrā udagagrāśca likhellekhāḥ samantataḥ
||84||अभ्युक्षणं समुद्दिष्टं तिस्रस्तिस्रस्ततः परम् ।
प्रागग्रा उदगग्राश्च लिखेल्लेखाः समन्ततः
praṇavena samabhyukṣya pīṭhaṃ devyāḥ samarcayet |
ādhāraśaktimārabhya pīṭhamantrāvasānakam
||85||प्रणवेन समभ्युक्ष्य पीठं देव्याः समर्चयेत् ।
आधारशक्तिमारभ्य पीठमन्त्रावसानकम्
tasminpīṭhe samāvāhya śivau paramakāraṇau |
gandhādyairupacāraiśca pūjayettau samāhitaḥ
||86||तस्मिन्पीठे समावाह्य शिवौ परमकारणौ ।
गन्धाद्यैरुपचारैश्च पूजयेत्तौ समाहितः
devīṃ dhyāyedṛtusnātāṃ saṃsaktāṃ śaṅkareṇa tu |
kāmāturāṃ tayoḥ krīḍāṃ kiñcitkālaṃ vibhāvayet
||87||देवीं ध्यायेदृतुस्नातां संसक्तां शङ्करेण तु ।
कामातुरां तयोः क्रीडां किञ्चित्कालं विभावयेत्
atha vahniṃ samādāya pātreṇa purato nyaset |
kravyādāṃśaṃ parityajya pūrvoktairvīkṣaṇādibhiḥ
||88||अथ वह्निं समादाय पात्रेण पुरतो न्यसेत् ।
क्रव्यादांशं परित्यज्य पूर्वोक्तैर्वीक्षणादिभिः
saṃskṛtya vahniṃ raṃ bījamuccārya tadanantaram |
caitanyaṃ yojayettasminpraṇavenābhimantrayet
||89||संस्कृत्य वह्निं रं बीजमुच्चार्य तदनन्तरम् ।
चैतन्यं योजयेत्तस्मिन्प्रणवेनाभिमन्त्रयेत्
saptavāraṃ tato dhenumudrāṃ sandarśayedguruḥ |
śareṇa rakṣitaṃ kṛtvā tanutreṇāvaguṇṭhayet
||90||सप्तवारं ततो धेनुमुद्रां सन्दर्शयेद्गुरुः ।
शरेण रक्षितं कृत्वा तनुत्रेणावगुण्ठयेत्
arcitaṃ triḥ paribhrāmya prādakṣiṇyena sattamaḥ |
kuṇḍopari japaṃstāraṃ jānuspṛṣṭamahītalaḥ
||91||अर्चितं त्रिः परिभ्राम्य प्रादक्षिण्येन सत्तमः ।
कुण्डोपरि जपंस्तारं जानुस्पृष्टमहीतलः
śivabījadhiyā devyā yonau vahniṃ vinikṣipet |
ācāmayettato devaṃ devīṃ ca jagadambikām
||92||शिवबीजधिया देव्या योनौ वह्निं विनिक्षिपेत् ।
आचामयेत्ततो देवं देवीं च जगदम्बिकाम्
citpiṅgala hanadahapacayugmaṃ tataḥ param |
sarvajñājñāpaya svāhā mantro'yaṃ vahnidīpane
||93||चित्पिङ्गल हनदहपचयुग्मं ततः परम् ।
सर्वज्ञाज्ञापय स्वाहा मन्त्रोऽयं वह्निदीपने
agniṃ prajvalitaṃ vande jātavedaṃ hutāśanam |
suvarṇavarṇamamalaṃ samiddhaṃ viśvatomukham
||94||अग्निं प्रज्वलितं वन्दे जातवेदं हुताशनम् ।
सुवर्णवर्णममलं समिद्धं विश्वतोमुखम्
mantreṇānena taṃ vahniṃ stuvīta paramādarāt |
tato nyasedvahnimantraṃ ṣaḍaṅgaṃ deśikottamaḥ
||95||मन्त्रेणानेन तं वह्निं स्तुवीत परमादरात् ।
ततो न्यसेद्वह्निमन्त्रं षडङ्गं देशिकोत्तमः
sahasrārciḥ svastipūrṇa uttiṣṭhapuruṣaḥ smṛtaḥ |
dhūmavyāpī saptajihvo dhanurdhara iti kramāt
||96||सहस्रार्चिः स्वस्तिपूर्ण उत्तिष्ठपुरुषः स्मृतः ।
धूमव्यापी सप्तजिह्वो धनुर्धर इति क्रमात्
jātiyuktāḥ ṣaḍaṅgāḥ syuḥ pūrvasthāneṣu vinyaset |
dhyāyedvahniṃ hemavarṇaṃ trinetraṃ padmasaṃsthitam
||97||जातियुक्ताः षडङ्गाः स्युः पूर्वस्थानेषु विन्यसेत् ।
ध्यायेद्वह्निं हेमवर्णं त्रिनेत्रं पद्मसंस्थितम्
iṣṭaśaktisvastikābhīrdhārakaṃ maṅgalaṃ param |
pariṣiñcettataḥ kuṇḍaṃ mekhalopari mantravit
||98||इष्टशक्तिस्वस्तिकाभीर्धारकं मङ्गलं परम् ।
परिषिञ्चेत्ततः कुण्डं मेखलोपरि मन्त्रवित्
darbhaiḥ paristaretpaścātparidhīnvinyasedatha |
trikoṇavṛttaṣaṭkoṇaṃ sāṣṭapatraṃ sabhūpuram
||99||दर्भैः परिस्तरेत्पश्चात्परिधीन्विन्यसेदथ ।
त्रिकोणवृत्तषट्कोणं साष्टपत्रं सभूपुरम्
yantraṃ vibhāvayedvahneḥ pūrvaṃ vā saṃlikhedatha |
tanmadhye pūjayedvahniṃ mantreṇānena vai mune
||100||यन्त्रं विभावयेद्वह्नेः पूर्वं वा संलिखेदथ ।
तन्मध्ये पूजयेद्वह्निं मन्त्रेणानेन वै मुने
vaiśvānara tato jātavedaḥ paścādihāvaha |
lohitākṣapadaṃ proktvā sarvakarmāṇi sādhaya
||101||वैश्वानर ततो जातवेदः पश्चादिहावह ।
लोहिताक्षपदं प्रोक्त्वा सर्वकर्माणि साधय
vahnijāyāntako mantrastena vahniṃ tu pūjayet |
madhye ṣaṭsvapi koṇeṣu hiraṇyā gaganā tathā
||102||वह्निजायान्तको मन्त्रस्तेन वह्निं तु पूजयेत् ।
मध्ये षट्स्वपि कोणेषु हिरण्या गगना तथा
raktā kṛṣṇā suprabhā ca bahurūpātiraktikā |
pūjayetsaptajihvāstāḥ kesareṣvaṅgapūjanam
||103||रक्ता कृष्णा सुप्रभा च बहुरूपातिरक्तिका ।
पूजयेत्सप्तजिह्वास्ताः केसरेष्वङ्गपूजनम्
daleṣu pūjayenmūrtīḥ śaktisvastikadhāriṇī |
jātavedāḥ saptajihvo havyavāhana eva ca
||104||दलेषु पूजयेन्मूर्तीः शक्तिस्वस्तिकधारिणी ।
जातवेदाः सप्तजिह्वो हव्यवाहन एव च
aśvodarajasaṃjño'nyaḥ punarvaiśvānarāhvayaḥ |
kaumāratejāḥ syādviśvamukho devamukhaḥ smṛtaḥ
||105||अश्वोदरजसंज्ञोऽन्यः पुनर्वैश्वानराह्वयः ।
कौमारतेजाः स्याद्विश्वमुखो देवमुखः स्मृतः
tārāgnaye padādyāḥ syurnatyantā vahnimūrtayaḥ |
lokapālāṃścaturdikṣu vajrādyāyudhasaṃyutān
||106||ताराग्नये पदाद्याः स्युर्नत्यन्ता वह्निमूर्तयः ।
लोकपालांश्चतुर्दिक्षु वज्राद्यायुधसंयुतान्
śrīnārāyaṇa uvāca
tataḥ sruksruvasaṃskārāvājyasaṃskāra eva ca |
kṛtvā homaṃ tataḥ kuryātsruveṇādāya vai ghṛtam
||107||ततः स्रुक्स्रुवसंस्कारावाज्यसंस्कार एव च ।
कृत्वा होमं ततः कुर्यात्स्रुवेणादाय वै घृतम्
dakṣiṇādghṛtabhāgāttu vahnerdakṣiṇalocane |
juhuyādagnaye svāhetyevaṃ vai vāmato'nyataḥ
||108||दक्षिणाद्घृतभागात्तु वह्नेर्दक्षिणलोचने ।
जुहुयादग्नये स्वाहेत्येवं वै वामतोऽन्यतः
somāya svāheti madhyādghṛtamādāya sattama |
agnīṣomābhyāṃ svāheti madhyanetre hunettataḥ
||109||सोमाय स्वाहेति मध्याद्घृतमादाय सत्तम ।
अग्नीषोमाभ्यां स्वाहेति मध्यनेत्रे हुनेत्ततः
punardakṣiṇabhāgāttu ghṛtamādāya vai mukhe |
agnaye sviṣṭakṛtsvāhetyanenaiva hunettataḥ
||110||पुनर्दक्षिणभागात्तु घृतमादाय वै मुखे ।
अग्नये स्विष्टकृत्स्वाहेत्यनेनैव हुनेत्ततः
satārābhirvyāhṛtibhirjuhuyādatha sādhakaḥ |
juhuyādagnimantreṇa trivāraṃ tu tataḥ param
||111||सताराभिर्व्याहृतिभिर्जुहुयादथ साधकः ।
जुहुयादग्निमन्त्रेण त्रिवारं तु ततः परम्
tatastu praṇavenaivāpyaṣṭāvaṣṭau ghṛtāhutīḥ |
garbhādhānādisaṃskārakṛte tu juhuyānmune
||112||ततस्तु प्रणवेनैवाप्यष्टावष्टौ घृताहुतीः ।
गर्भाधानादिसंस्कारकृते तु जुहुयान्मुने
garbhādhānaṃ puṃsavanaṃ sīmantonnayanaṃ tataḥ |
jātakarma nāmakarmāpyupaniṣkramaṇaṃ tathā
||113||गर्भाधानं पुंसवनं सीमन्तोन्नयनं ततः ।
जातकर्म नामकर्माप्युपनिष्क्रमणं तथा
annāśanaṃ tathā cūḍā vratabandhastathaiva ca |
mahānāmnyaṃ vrataṃ paścāttathaupaniṣadaṃ vratam
||114||अन्नाशनं तथा चूडा व्रतबन्धस्तथैव च ।
महानाम्न्यं व्रतं पश्चात्तथौपनिषदं व्रतम्
godānodvāhakau proktāḥ saṃskārāḥ śruticoditāḥ |
tataḥ śivaṃ pārvatīṃ ca pūjayitvā visarjayet
||115||गोदानोद्वाहकौ प्रोक्ताः संस्काराः श्रुतिचोदिताः ।
ततः शिवं पार्वतीं च पूजयित्वा विसर्जयेत्
juhuyātpañca samidho vahnimuddiśya sādhakaḥ |
paścādāvaraṇānāṃ cāpyekaikāmāhutiṃ hunet
||116||जुहुयात्पञ्च समिधो वह्निमुद्दिश्य साधकः ।
पश्चादावरणानां चाप्येकैकामाहुतिं हुनेत्
ghṛtaṃ sruci samādāya caturvāraṃ sruveṇa ca |
pidhāya tāṃ tu tenaiva mune tiṣṭhannijāsane
||117||घृतं स्रुचि समादाय चतुर्वारं स्रुवेण च ।
पिधाय तां तु तेनैव मुने तिष्ठन्निजासने
vauṣaḍantena manunā vahnestu juhuyāttataḥ |
mahāgaṇeśamantreṇa juhuyādāhutīrdaśa
||118||वौषडन्तेन मनुना वह्नेस्तु जुहुयात्ततः ।
महागणेशमन्त्रेण जुहुयादाहुतीर्दश
vahnau pīṭhaṃ samabhyarcya deyamantrasya devatām |
vahnau dhyātvā tu tadvaktre pañcaviṃśatisaṃkhyayā
||119||वह्नौ पीठं समभ्यर्च्य देयमन्त्रस्य देवताम् ।
वह्नौ ध्यात्वा तु तद्वक्त्रे पञ्चविंशतिसंख्यया
mūlamantreṇa juhuyādvaktraikīkaraṇāya ca |
vahnidevatayoraikyaṃ bhāvayannātmanā saha
||120||मूलमन्त्रेण जुहुयाद्वक्त्रैकीकरणाय च ।
वह्निदेवतयोरैक्यं भावयन्नात्मना सह
ekībhūtaṃ bhāvayettu tatastu sādhakottamaḥ |
ṣaḍaṅgaṃ devatānāṃ ca juhuyādāhutīḥ pṛthak
||121||एकीभूतं भावयेत्तु ततस्तु साधकोत्तमः ।
षडङ्गं देवतानां च जुहुयादाहुतीः पृथक्
ekādaśaiva juhuyādāhutīrmunisattama |
etena nāḍīsandhānaṃ vahnidevatayormune
||122||एकादशैव जुहुयादाहुतीर्मुनिसत्तम ।
एतेन नाडीसन्धानं वह्निदेवतयोर्मुने
ekaikakramayogenāpyāvṛttīnāṃ tathaiva ca |
ekaikakramayogena ghṛtena juhuyānmune
||123||एकैकक्रमयोगेनाप्यावृत्तीनां तथैव च ।
एकैकक्रमयोगेन घृतेन जुहुयान्मुने
tataḥ kalpoktadravyaistu juhuyādathavā tilaiḥ |
devatāmūlamantreṇa gajāntakasahasrakam
||124||ततः कल्पोक्तद्रव्यैस्तु जुहुयादथवा तिलैः ।
देवतामूलमन्त्रेण गजान्तकसहस्रकम्
evaṃ hutvā tato devīṃ santuṣṭāṃ bhāvayenmune |
tathaivāvṛtidevīśca vahnyādyā devatā api
||125||एवं हुत्वा ततो देवीं सन्तुष्टां भावयेन्मुने ।
तथैवावृतिदेवीश्च वह्न्याद्या देवता अपि
tataḥ śiṣyaṃ ca susnātaṃ kṛtasamyādikakriyam |
vastradvayayutaṃ svarṇābharaṇena samanvitam
||126||ततः शिष्यं च सुस्नातं कृतसम्यादिकक्रियम् ।
वस्त्रद्वययुतं स्वर्णाभरणेन समन्वितम्
kamaṇḍalukaraṃ śuddhaṃ kuṇḍasyāntikamānayet |
namaskṛtya tataḥ śiṣyo gurūnatha sabhāsadaḥ
||127||कमण्डलुकरं शुद्धं कुण्डस्यान्तिकमानयेत् ।
नमस्कृत्य ततः शिष्यो गुरूनथ सभासदः
kuladevaṃ namaskṛtya viśettatrātha viṣṭare |
gurustatastu taṃ śiṣyaṃ kṛpādṛṣṭyā vilokayet
||128||कुलदेवं नमस्कृत्य विशेत्तत्राथ विष्टरे ।
गुरुस्ततस्तु तं शिष्यं कृपादृष्ट्या विलोकयेत्
taccaitanyaṃ nije dehe bhāvayetsaṅgataṃ tviti |
tataḥ śiṣyatanusthānāmadhvanāṃ pariśodhanam
||129||तच्चैतन्यं निजे देहे भावयेत्सङ्गतं त्विति ।
ततः शिष्यतनुस्थानामध्वनां परिशोधनम्
kuryāttu homato vidvāndivyadṛṣṭyavalokanāt |
yena jāyeta śuddhātmā yogyo devādyanugrahe
||130||कुर्यात्तु होमतो विद्वान्दिव्यदृष्ट्यवलोकनात् ।
येन जायेत शुद्धात्मा योग्यो देवाद्यनुग्रहे
śrīnārāyaṇa uvāca
tanau dhyāyettu śiṣyasya ṣaḍadhvanaḥ kameṇa tu |
pādayostu kalādhvānamandhau tattvādhvakaṃ punaḥ
||131||तनौ ध्यायेत्तु शिष्यस्य षडध्वनः कमेण तु ।
पादयोस्तु कलाध्वानमन्धौ तत्त्वाध्वकं पुनः
nābhau tu bhuvanādhvānaṃ varṇādhvānaṃ tathā hṛdi |
padādhvānaṃ tathā bhāle mantrādhvānaṃ tu mūrdhani
||132||नाभौ तु भुवनाध्वानं वर्णाध्वानं तथा हृदि ।
पदाध्वानं तथा भाले मन्त्राध्वानं तु मूर्धनि
śiṣyaṃ spṛśaṃstu kūrcena tilairājyapariplutaiḥ |
śodhayāmyamumadhvānaṃ svāheti manumuccaran
||133||शिष्यं स्पृशंस्तु कूर्चेन तिलैराज्यपरिप्लुतैः ।
शोधयाम्यमुमध्वानं स्वाहेति मनुमुच्चरन्
tārāḍhyaṃ juhuyādaṣṭavāraṃ pratyadhvameva hi |
ṣaḍadhvanastatastāṃstu līnān brahmaṇi bhāvayet
||134||ताराढ्यं जुहुयादष्टवारं प्रत्यध्वमेव हि ।
षडध्वनस्ततस्तांस्तु लीनान् ब्रह्मणि भावयेत्
punarutpādayettasmātsṛṣṭimārgeṇa vai guruḥ |
ātmasthitaṃ taccaitanyaṃ punaḥ śiṣye tu yojayet
||135||पुनरुत्पादयेत्तस्मात्सृष्टिमार्गेण वै गुरुः ।
आत्मस्थितं तच्चैतन्यं पुनः शिष्ये तु योजयेत्
pūrṇāhutiṃ tato hutvā devatāṃ kalaśe nayet |
punarvyāhṛtibhirhutvā vahneraṅgāhutīstathā
||136||पूर्णाहुतिं ततो हुत्वा देवतां कलशे नयेत् ।
पुनर्व्याहृतिभिर्हुत्वा वह्नेरङ्गाहुतीस्तथा
ekaikaśo gururdattvā visṛjedvahnimātmani |
tataḥ śiṣyasya netre tu badhnīyādvāsasā guruḥ
||137||एकैकशो गुरुर्दत्त्वा विसृजेद्वह्निमात्मनि ।
ततः शिष्यस्य नेत्रे तु बध्नीयाद्वाससा गुरुः
netramantreṇa taṃ śiṣyaṃ kuṇḍato maṇḍalaṃ nayet |
puṣpāñjaliṃ mukhyadevyāṃ kārayecchiṣyahastataḥ
||138||नेत्रमन्त्रेण तं शिष्यं कुण्डतो मण्डलं नयेत् ।
पुष्पाञ्जलिं मुख्यदेव्यां कारयेच्छिष्यहस्ततः
netrabandhaṃ nirākṛtya veśayetkuśaviṣṭare |
bhūtaśuddhiṃ śiṣyadehe kuryātproktena vartmanā
||139||नेत्रबन्धं निराकृत्य वेशयेत्कुशविष्टरे ।
भूतशुद्धिं शिष्यदेहे कुर्यात्प्रोक्तेन वर्त्मना
mantroditāṃstathā nyāsānkṛtvā śiṣyatanau tataḥ |
maṇḍale veśayecchiṣyamanyasminkumbhasaṃsthitān
||140||मन्त्रोदितांस्तथा न्यासान्कृत्वा शिष्यतनौ ततः ।
मण्डले वेशयेच्छिष्यमन्यस्मिन्कुम्भसंस्थितान्
pallavāñchiṣyaśirasi vinyasenmātṛkāṃ japet |
kalaśasthajalaiḥ śiṣyaṃ snāpayeddevatātmakaiḥ
||141||पल्लवाञ्छिष्यशिरसि विन्यसेन्मातृकां जपेत् ।
कलशस्थजलैः शिष्यं स्नापयेद्देवतात्मकैः
vardhanījalasekaṃ ca kuryādrakṣārthamañjasā |
tataḥ śiṣyaḥ samutthāya vāsasī paridhāya ca
||142||वर्धनीजलसेकं च कुर्याद्रक्षार्थमञ्जसा ।
ततः शिष्यः समुत्थाय वाससी परिधाय च
kṛtabhasmāvalepaśca saṃviśedgurusannidhau |
tato guruḥ svakīyāttu hṛdayānnirgatāṃ śivām
||143||कृतभस्मावलेपश्च संविशेद्गुरुसन्निधौ ।
ततो गुरुः स्वकीयात्तु हृदयान्निर्गतां शिवाम्
praviṣṭāṃ śiṣyahṛdaye bhāvayetkaruṇānidhiḥ |
pūjayedgandhapuṣpādyairaikyaṃ vai bhāvayaṃstayoḥ
||144||प्रविष्टां शिष्यहृदये भावयेत्करुणानिधिः ।
पूजयेद्गन्धपुष्पाद्यैरैक्यं वै भावयंस्तयोः
tatastriṃśo dakṣakarṇe śiṣyasyopadiśedguruḥ |
mahāmantraṃ mahādevyāḥ svahastaṃ śirasi nyasan
||145||ततस्त्रिंशो दक्षकर्णे शिष्यस्योपदिशेद्गुरुः ।
महामन्त्रं महादेव्याः स्वहस्तं शिरसि न्यसन्
aṣṭottaraśataṃ mantraṃ śiṣyo'pi prajapenmune |
daṇḍavatpraṇamedbhūmau taṃ guruṃ devatātmakam
||146||अष्टोत्तरशतं मन्त्रं शिष्योऽपि प्रजपेन्मुने ।
दण्डवत्प्रणमेद्भूमौ तं गुरुं देवतात्मकम्
sarvasvamarpayettasmai yāvajjīvamananyadhīḥ |
ṛtvigbhyo dakṣiṇāṃ dattvā brāhmaṇāṃścāpi bhojayet
||147||सर्वस्वमर्पयेत्तस्मै यावज्जीवमनन्यधीः ।
ऋत्विग्भ्यो दक्षिणां दत्त्वा ब्राह्मणांश्चापि भोजयेत्
suvāsinīḥ kumārīśca baṭukāṃścaiva sarvaśaḥ |
dīnānāthāndaridrāṃśca vittaśāṭhyavivarjitaḥ
||148||सुवासिनीः कुमारीश्च बटुकांश्चैव सर्वशः ।
दीनानाथान्दरिद्रांश्च वित्तशाठ्यविवर्जितः
kṛtārthatāṃ svasya buddhvā nityamārādhayenmanum |
iti te kathitaḥ samyagdīkṣāvidhiranuttamaḥ
||149||कृतार्थतां स्वस्य बुद्ध्वा नित्यमाराधयेन्मनुम् ।
इति ते कथितः सम्यग्दीक्षाविधिरनुत्तमः
vimṛśyaitadaśeṣeṇa bhaja devīpadāmbujam |
nānyastu paramo dharmo brāhmaṇasyātra vidyate
||150||विमृश्यैतदशेषेण भज देवीपदाम्बुजम् ।
नान्यस्तु परमो धर्मो ब्राह्मणस्यात्र विद्यते
vaidikaḥ svasvagṛhyoktakrameṇopadiśenmanum |
tāntrikastantrarītyā tu sthitireṣā sanātanī
||151||वैदिकः स्वस्वगृह्योक्तक्रमेणोपदिशेन्मनुम् ।
तान्त्रिकस्तन्त्ररीत्या तु स्थितिरेषा सनातनी
tattaduktaprayogāṃste te te kuryurna cānyathā |
śrīnārāyaṇa uvāca |
iti sarvaṃ mayākhyātaṃ yatpṛṣṭaṃ nārada tvayā
||152||तत्तदुक्तप्रयोगांस्ते ते ते कुर्युर्न चान्यथा ।
श्रीनारायण उवाच ।
इति सर्वं मयाख्यातं यत्पृष्टं नारद त्वया
ataḥ paraṃ parāmbāyā bhaja nityaṃ padāmbujam |
nityamārādhya taccāhaṃ nirvṛtiṃ paramāṃ gataḥ
||153||अतः परं पराम्बाया भज नित्यं पदाम्बुजम् ।
नित्यमाराध्य तच्चाहं निर्वृतिं परमां गतः
vyāsa uvāca
iti rājannāradāya proktvā sarvamanuttamam |
samādhimīlitākṣastu dadhyau devīpadāmbujam
||154||इति राजन्नारदाय प्रोक्त्वा सर्वमनुत्तमम् ।
समाधिमीलिताक्षस्तु दध्यौ देवीपदाम्बुजम्
nārāyaṇastu bhagavān munivaryaśikhāmaṇiḥ |
nārado'pi tato natvā guruṃ nārāyaṇaṃ param |
jagāma sadyastapase devīdarśanalālasaḥ
||155||नारायणस्तु भगवान् मुनिवर्यशिखामणिः ।
नारदोऽपि ततो नत्वा गुरुं नारायणं परम् ।
जगाम सद्यस्तपसे देवीदर्शनलालसः
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ dvādaśaskandhe mantradīkṣāvidhivarṇanaṃ nāma saptamo'dhyāyaḥ || 7 ||
vargaḥdevībhāgavatapurāṇam