gṛhagodhikākhyānam
nārada uvāca
vaiśākhe'dhvagataptānāṃ tṛṣārtānāṃ mahīpate ||
jaladānamakurvāṇastirśayonimavāpnuyāt
||1||वैशाखेऽध्वगतप्तानां तृषार्तानां महीपते ॥
जलदानमकुर्वाणस्तिर्शयोनिमवाप्नुयात्
atraivodāhara ntīmamitihāsaṃ purātanam ||
viprasya gṛhagodhāyāḥ saṃvādaṃ paramādbhutam
||2||अत्रैवोदाहर न्तीममितिहासं पुरातनम् ॥
विप्रस्य गृहगोधायाः संवादं परमाद्भुतम्
purā cekṣvākuvaṃśe'bhūddhemāṃga iti bhūmipaḥ ||
brahmaṇyaśca vadānyaśca jitāmitro jitendriyaḥ
||3||पुरा चेक्ष्वाकुवंशेऽभूद्धेमांग इति भूमिपः ॥
ब्रह्मण्यश्च वदान्यश्च जितामित्रो जितेन्द्रियः
yāvatyo bhūmikaṇikā yāvanto jalabiṃdavaḥ ||
yāvantyuḍūni gagane tāvatīradadātsa gāḥ
||4||यावत्यो भूमिकणिका यावन्तो जलबिंदवः ॥
यावन्त्युडूनि गगने तावतीरददात्स गाः
yeneṣṭayajñadarbhaiśca bhūmirbarhiṣmatī śubhā ||
gobhūtilahiraṇyādyaistoṣitā bahavo dvijāḥ
||5||येनेष्टयज्ञदर्भैश्च भूमिर्बर्हिष्मती शुभा ॥
गोभूतिलहिरण्याद्यैस्तोषिता बहवो द्विजाः
tenādattāni dānāni na vidyanta iti śrutam ||
tenādattaṃ jalaṃ caikaṃ sukhalabhyadhiyā nṛpa
||6||तेनादत्तानि दानानि न विद्यन्त इति श्रुतम् ॥
तेनादत्तं जलं चैकं सुखलभ्यधिया नृप
bodhito brahmaputreṇa vasiṣṭhena mahātmanā ||
amaulyaṃ sarvato labhyaṃ taddātā kiṃ phalaṃ labhet
||7||बोधितो ब्रह्मपुत्रेण वसिष्ठेन महात्मना ॥
अमौल्यं सर्वतो लभ्यं तद्दाता किं फलं लभेत्
durbuddhyā hetuvādaiśca na jalaṃ dattavāndvije ||
alabhyadāne puṇyaṃ syāditi vākyaṃ suyuktimat
||8||दुर्बुद्ध्या हेतुवादैश्च न जलं दत्तवान्द्विजे ॥
अलभ्यदाने पुण्यं स्यादिति वाक्यं सुयुक्तिमत्
sa ānarca dvijānvyaṅgāndaridrānvṛttikarśitān ||
nārcayacchrotriyānviprāṃstattvajñānbrahmavādinaḥ
||9||स आनर्च द्विजान्व्यङ्गान्दरिद्रान्वृत्तिकर्शितान् ॥
नार्चयच्छ्रोत्रियान्विप्रांस्तत्त्वज्ञान्ब्रह्मवादिनः
prakhyātānpūjayiṣyaṃti sarve lokā mahārhaṇāḥ ||
anāthānāmavidyānāṃ vyaṃgānāṃ ca dvijanmanām
||10||प्रख्यातान्पूजयिष्यंति सर्वे लोका महार्हणाः ॥
अनाथानामविद्यानां व्यंगानां च द्विजन्मनाम्
daridrāṇāṃ gatiḥ kā vā tasmātte me dayāspadam ||
iti durdhīrapātreṣu dattavānkimapi svayam
||11||दरिद्राणां गतिः का वा तस्मात्ते मे दयास्पदम् ॥
इति दुर्धीरपात्रेषु दत्तवान्किमपि स्वयम्
tena doṣeṇa mahatā cātakatvaṃ trijanmasu ||
ekajanmani gṛdhratvaṃ śvā'bhavatsaptajanmasu
||12||तेन दोषेण महता चातकत्वं त्रिजन्मसु ॥
एकजन्मनि गृध्रत्वं श्वाऽभवत्सप्तजन्मसु
paścānnṛpagṛhe jāto bhūpo'yaṃ gṛhagodhikā ||
śrutakīrtyākhyabhūpasya mithilādhipaternṛpa
||13||पश्चान्नृपगृहे जातो भूपोऽयं गृहगोधिका ॥
श्रुतकीर्त्याख्यभूपस्य मिथिलाधिपतेर्नृप
gṛhadvārapratolyāṃ ca vartate kīṭakāśanā ||
saptāśītiṣu varṣeṣu sthitaṃ tena durātmanā
||14||गृहद्वारप्रतोल्यां च वर्तते कीटकाशना ॥
सप्ताशीतिषु वर्षेषु स्थितं तेन दुरात्मना
videhādhipatergehe kadācidṛṣisattamaḥ ||
śrutadeva iti khyātaḥ śrauto madhyāhna āgataḥ
||15||विदेहाधिपतेर्गेहे कदाचिदृषिसत्तमः ॥
श्रुतदेव इति ख्यातः श्रौतो मध्याह्न आगतः
taṃ dṛṣṭvā sahasotthāya jātaharṣo narādhipaḥ ||
madhuparkādibhiḥ pūjya tasya pādāvanejanīḥ
||16||तं दृष्ट्वा सहसोत्थाय जातहर्षो नराधिपः ॥
मधुपर्कादिभिः पूज्य तस्य पादावनेजनीः
apo mūrdhnā vahankṣipraṃ tadotsiktaiśca biṃdubhiḥ ||
daivopadiṣṭakālena prokṣitā gṛhagodhikā
||17||अपो मूर्ध्ना वहन्क्षिप्रं तदोत्सिक्तैश्च बिंदुभिः ॥
दैवोपदिष्टकालेन प्रोक्षिता गृहगोधिका
sadyo jātasmṛtirabhūtsmṛtakarmādiduḥkhitā ||
trāhitrāhīti cukrośa brāhmaṇaṃ gṛhamāgatam
||18||सद्यो जातस्मृतिरभूत्स्मृतकर्मादिदुःखिता ॥
त्राहित्राहीति चुक्रोश ब्राह्मणं गृहमागतम्
tiryagjaṃturavaṃ śrutvā brāhmaṇo vismito'vadat ||
kutaḥ krośasi godhe tvaṃ daśeyaṃ kena karmaṇā
||19||तिर्यग्जंतुरवं श्रुत्वा ब्राह्मणो विस्मितोऽवदत् ॥
कुतः क्रोशसि गोधे त्वं दशेयं केन कर्मणा
tvaṃ devaḥ puruṣaḥ kaścinnṛpo vā'tha dvijo'tha vā ||
kastvaṃ brūhi mahābhāga tvāmadyāhaṃ samuddhare
||20||त्वं देवः पुरुषः कश्चिन्नृपो वाऽथ द्विजोऽथ वा ॥
कस्त्वं ब्रूहि महाभाग त्वामद्याहं समुद्धरे
ityuktaḥ sa nṛpaḥ prāha śrutadevaṃ mahāmatim ||
ahamikṣvākukulajo vedaśāstraviśāradaḥ
||21||इत्युक्तः स नृपः प्राह श्रुतदेवं महामतिम् ॥
अहमिक्ष्वाकुकुलजो वेदशास्त्रविशारदः
yāvatyo bhūmikaṇikā yāvantastoyabiṃdavaḥ ||
yāvaṃtyuḍūni gagane tāvatīradadaṃ sma gāḥ
||22||यावत्यो भूमिकणिका यावन्तस्तोयबिंदवः ॥
यावंत्युडूनि गगने तावतीरददं स्म गाः
sarve yajñā mayā ceṣṭāḥ pūrtānyācaritāni me ||
dānanyapi ca dattāni dharmarājastvanuṣṭhitaḥ
||23||सर्वे यज्ञा मया चेष्टाः पूर्तान्याचरितानि मे ॥
दानन्यपि च दत्तानि धर्मराजस्त्वनुष्ठितः
tathāpi durgatirjātā mama cordhvagatiṃ vinā ||
trivāraṃ cātakatvaṃ me gṛdhratvaṃ caikajanmani
||24||तथापि दुर्गतिर्जाता मम चोर्ध्वगतिं विना ॥
त्रिवारं चातकत्वं मे गृध्रत्वं चैकजन्मनि
saptajanmasvalarkatvaṃ prāptaṃ pūrvaṃ mayā dvija ||
siṃcatā'nena bhūpena tvapaḥ pādāvanejanīḥ
||25||सप्तजन्मस्वलर्कत्वं प्राप्तं पूर्वं मया द्विज ॥
सिंचताऽनेन भूपेन त्वपः पादावनेजनीः
biṃdavo dūramutkṣiptāstaiḥ sikto'haṃ kathaṃcana ||
tena janmasmṛtirabhūtsarvapāpmā hataśca me
||26||बिंदवो दूरमुत्क्षिप्तास्तैः सिक्तोऽहं कथंचन ॥
तेन जन्मस्मृतिरभूत्सर्वपाप्मा हतश्च मे
godhā janmāni bhāvyāni hyaṣṭā viṃśatikāni me |
dṛśyante daivasṛṣṭāni bibhye tairjanmabhirbhṛśam
||27||गोधा जन्मानि भाव्यानि ह्यष्टा विंशतिकानि मे ।
दृश्यन्ते दैवसृष्टानि बिभ्ये तैर्जन्मभिर्भृशम्
na kāraṇaṃ prapaśyābhi tanme vistarato vada ||
ityuktaḥ sa ṛṣiḥ prāha jñātvā vijñānacakṣuṣā
||28||न कारणं प्रपश्याभि तन्मे विस्तरतो वद ॥
इत्युक्तः स ऋषिः प्राह ज्ञात्वा विज्ञानचक्षुषा
śṛṇu bhūpa pravakṣyāmi tava duryonikāraṇam ||
na jalaṃ tu tvayā dattaṃ vaiśākhe mādhavapriye
||29||शृणु भूप प्रवक्ष्यामि तव दुर्योनिकारणम् ॥
न जलं तु त्वया दत्तं वैशाखे माधवप्रिये
tajjalaṃ sulabhaṃ matvā hyamūlyamiti niścitam ||
nādhvagānāṃ dvijātīnāṃ gharmakāle'pyajānatā
||30||तज्जलं सुलभं मत्वा ह्यमूल्यमिति निश्चितम् ॥
नाध्वगानां द्विजातीनां घर्मकालेऽप्यजानता
tathā pātraṃ samutsṛjya hyapātre pratidattavān ||
jvalantamagnimutsṛjya nahi bhasmani hūyate
||31||तथा पात्रं समुत्सृज्य ह्यपात्रे प्रतिदत्तवान् ॥
ज्वलन्तमग्निमुत्सृज्य नहि भस्मनि हूयते
bahudhā varṇitasyā'pi saugandhyādiyutasya ca ||
kaṇṭakānvitavṛkṣasya na kurvaṃti samarcanam
||32||बहुधा वर्णितस्याऽपि सौगन्ध्यादियुतस्य च ॥
कण्टकान्वितवृक्षस्य न कुर्वंति समर्चनम्
viśiṣṭānāṃ pādapānāmaśvatthaḥ sevyatāṃ gataḥ ||
tulasīṃ tu samutsṛjya bṛhatī pūjyate nu kim
||33||विशिष्टानां पादपानामश्वत्थः सेव्यतां गतः ॥
तुलसीं तु समुत्सृज्य बृहती पूज्यते नु किम्
anāthatvaṃ pūjyatāyāṃ na prayojakatāmiyāt ||
paṃgvādyā ye'pyanāthā hi dayāpātraṃ hi kevalam
||34||अनाथत्वं पूज्यतायां न प्रयोजकतामियात् ॥
पंग्वाद्या येऽप्यनाथा हि दयापात्रं हि केवलम्
taponiṣṭhā jñānaniṣṭhāḥ śrutiśāstraviśāradāḥ ||
viṣṇurūpāḥ sadā pūjyā netare tu kadācana
||35||तपोनिष्ठा ज्ञाननिष्ठाः श्रुतिशास्त्रविशारदाः ॥
विष्णुरूपाः सदा पूज्या नेतरे तु कदाचन
tatrāpi jñānino'tyarthaṃ viprā viṣṇoḥ sadaiva hi ||
jñānināmapi bhūpāla viṣṇureva sadā priyaḥ ||
tasmājjñānī sadā pūjyaḥ pūjyātpūjyataraḥ smṛtaḥ
||36||तत्रापि ज्ञानिनोऽत्यर्थं विप्रा विष्णोः सदैव हि ॥
ज्ञानिनामपि भूपाल विष्णुरेव सदा प्रियः ॥
तस्माज्ज्ञानी सदा पूज्यः पूज्यात्पूज्यतरः स्मृतः
avajñā sādhuvṛttānāmihā'mutra ca duḥkhadā ||
sevā vai mahatāṃ puṃsāṃ pumarthānāṃ hi kāraṇam
||37||अवज्ञा साधुवृत्तानामिहाऽमुत्र च दुःखदा ॥
सेवा वै महतां पुंसां पुमर्थानां हि कारणम्
koṭayo'pyandhajātīnāṃ na paśyaṃti yathā'yatham ||
evaṃ mandāyutānāṃ tu saṃgatirnārthadā bhavet
||38||कोटयोऽप्यन्धजातीनां न पश्यंति यथाऽयथम् ॥
एवं मन्दायुतानां तु संगतिर्नार्थदा भवेत्
nahyammayāni tīrthāni na devā mṛcchilāmayāḥ ||
te punaṃtyurukālena darśanādeva sādhavaḥ
||39||नह्यम्मयानि तीर्थानि न देवा मृच्छिलामयाः ॥
ते पुनंत्युरुकालेन दर्शनादेव साधवः
na sādhusevanātkvāpi sīdante taiḥ suśikṣitāḥ ||
janmamṛtyujarādyairvā sudhayā''pyāyitā yathā
||40||न साधुसेवनात्क्वापि सीदन्ते तैः सुशिक्षिताः ॥
जन्ममृत्युजराद्यैर्वा सुधयाऽऽप्यायिता यथा
na jalaṃ tu tvayā dattaṃ sādhavo vā na sevitāḥ ||
tena te durgatiśceyaṃ prāptā cekṣvākunaṃdana
||41||न जलं तु त्वया दत्तं साधवो वा न सेविताः ॥
तेन ते दुर्गतिश्चेयं प्राप्ता चेक्ष्वाकुनंदन
vaiśākhe matkṛtaṃ puṇyaṃ tubhyaṃ dāsyāmi śāntaye ||
bhūtaṃ bhavyaṃ bhavadyena karmajātaṃ vije ṣyasi
||42||वैशाखे मत्कृतं पुण्यं तुभ्यं दास्यामि शान्तये ॥
भूतं भव्यं भवद्येन कर्मजातं विजे ष्यसि
ityuktvā'pa upaspṛśya dadau puṇyamanuttamam
||43||इत्युक्त्वाऽप उपस्पृश्य ददौ पुण्यमनुत्तमम्
yadā dattaṃ brāhmaṇena snānaṃ caikadine kṛtam ||
tena dhvastā'khilāghastu tyaktvā tāṃ gṛhagodhikām
||44||यदा दत्तं ब्राह्मणेन स्नानं चैकदिने कृतम् ॥
तेन ध्वस्ताऽखिलाघस्तु त्यक्त्वा तां गृहगोधिकाम्
divyaṃ vimānamāruhya divyasragvastrabhūṣaṇaḥ ||
paśyatāmeva bhūtānāṃ maithilasya gṛhāṃtare
||45||दिव्यं विमानमारुह्य दिव्यस्रग्वस्त्रभूषणः ॥
पश्यतामेव भूतानां मैथिलस्य गृहांतरे
baddhāñjalipuṭo bhūtvā parikramya praṇamya ca ||
anujñāto yayau rājā stūyamāno'marairdivam
||46||बद्धाञ्जलिपुटो भूत्वा परिक्रम्य प्रणम्य च ॥
अनुज्ञातो ययौ राजा स्तूयमानोऽमरैर्दिवम्
tatra bhuktvā mahābhogānvarṣāyutamatandritaḥ ||
sa eva cekṣvākukule kākutstho'bhūnmahāprabhuḥ
||47||तत्र भुक्त्वा महाभोगान्वर्षायुतमतन्द्रितः ॥
स एव चेक्ष्वाकुकुले काकुत्स्थोऽभून्महाप्रभुः
saptadvīpavatīpālo brahmaṇyaḥ sādhusaṃmataḥ ||
devendrasya sakhā viṣṇoraṃśa eva mahāprabhuḥ
||48||सप्तद्वीपवतीपालो ब्रह्मण्यः साधुसंमतः ॥
देवेन्द्रस्य सखा विष्णोरंश एव महाप्रभुः
bodhitastu vasiṣṭhena vaiśākhoktānmanoramān ||
anuṣṭhāyākhilāndharmāṃstena dhvastākhilā'śubhaḥ
||49||बोधितस्तु वसिष्ठेन वैशाखोक्तान्मनोरमान् ॥
अनुष्ठायाखिलान्धर्मांस्तेन ध्वस्ताखिलाऽशुभः
divyaṃ jñānaṃ samāsādya viṣṇoḥ sāyujyamāptavān ||
vaiśākhaḥ śubhadastasmātpuṃbhiḥ sarvairanuṣṭhitaḥ
||50||दिव्यं ज्ञानं समासाद्य विष्णोः सायुज्यमाप्तवान् ॥
वैशाखः शुभदस्तस्मात्पुंभिः सर्वैरनुष्ठितः
āyuryaśaḥpuṣṭido'yaṃ mahāpāpaughanāśanaḥ ||
pumarthānāṃ nidānaṃ ca viṣṇuḥ prīṇātyanena tu
||51||आयुर्यशःपुष्टिदोऽयं महापापौघनाशनः ॥
पुमर्थानां निदानं च विष्णुः प्रीणात्यनेन तु
cāturvarṇyanaraiḥ sarvaiścaturāśramavartibhiḥ ||
anuṣṭheyo mahādharmo vaiśākhe mādhavāgame
||52||चातुर्वर्ण्यनरैः सर्वैश्चतुराश्रमवर्तिभिः ॥
अनुष्ठेयो महाधर्मो वैशाखे माधवागमे
iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāmbarīṣasaṃvāde gṛhagodhikākhyānaṃ nāma ṣaṣṭho'dhyāyaḥ || 6 ||