vīreśvarāvirbhāvaḥ
rājñyuvāca
avadhehi dharānātha kathayāmi yathātatham ||
vratasyāsya vidhānaṃ ca phalaṃ cābhīṣṭadevatām
||1||अवधेहि धरानाथ कथयामि यथातथम् ॥
व्रतस्यास्य विधानं च फलं चाभीष्टदेवताम्
purā puraḥ śrīdapatnyāḥ śrīmukhyā brahmasūnunā ||
nāradena sutārthinyā vratametadudīritam
||2||पुरा पुरः श्रीदपत्न्याः श्रीमुख्या ब्रह्मसूनुना ॥
नारदेन सुतार्थिन्या व्रतमेतदुदीरितम्
cīrṇaṃ cātha tayā devyā putrobhūnnalakūbaraḥ ||
anyābhirapi bahvībhiḥ putrāḥ prāptā vratāditaḥ
||3||चीर्णं चाथ तया देव्या पुत्रोभून्नलकूबरः ॥
अन्याभिरपि बह्वीभिः पुत्राः प्राप्ता व्रतादितः
vidhināpyatra saṃpūjyā gaurī sarvavidhānavit ||
stanaṃdhayena sahitā dhayatā stanamunmukham
||4||विधिनाप्यत्र संपूज्या गौरी सर्वविधानवित् ॥
स्तनंधयेन सहिता धयता स्तनमुन्मुखम्
mārgaśīrṣa tṛtīyāyāṃ śuklāyāṃ kalaśopari ||
tāmrapātraṃ nidhāyaikaṃ taṃḍulaiḥ paripūritam
||5||मार्गशीर्ष तृतीयायां शुक्लायां कलशोपरि ॥
ताम्रपात्रं निधायैकं तंडुलैः परिपूरितम्
avicchinnaṃ navīnaṃ ca rajanīrāgaraṃjitam ||
vāsaḥ pātropari nyasya sūkṣmātsūkṣmataraṃ param
||6||अविच्छिन्नं नवीनं च रजनीरागरंजितम् ॥
वासः पात्रोपरि न्यस्य सूक्ष्मात्सूक्ष्मतरं परम्
tasyopari śubhaṃ padmaṃ raviraśmivikāsitam ||
tatkarṇikāyā upari catuḥsvarṇavinirmitam
||7||तस्योपरि शुभं पद्मं रविरश्मिविकासितम् ॥
तत्कर्णिकाया उपरि चतुःस्वर्णविनिर्मितम्
vidhiṃ saṃpūjayedbhaktyā ratnapaṭṭābaṃrādibhiḥ ||
puṣpairnānāvidhai ramyaiḥ phalairnāraṃgamukhyakaiḥ
||8||विधिं संपूजयेद्भक्त्या रत्नपट्टाबंरादिभिः ॥
पुष्पैर्नानाविधै रम्यैः फलैर्नारंगमुख्यकैः
sugaṃdhaiścaṃdanādyaiśca karpūra mṛganābhibhiḥ ||
paramānnādi naivedyaiḥ pakvānnairbahubhaṃgibhiḥ
||9||सुगंधैश्चंदनाद्यैश्च कर्पूर मृगनाभिभिः ॥
परमान्नादि नैवेद्यैः पक्वान्नैर्बहुभंगिभिः
dhūpairagurumukhyaiśca ramye kusumamaṃḍape ||
rātrau jāgaraṇaṃ kāryaṃ viniṃdraiḥ paramotsavaiḥ
||10||धूपैरगुरुमुख्यैश्च रम्ये कुसुममंडपे ॥
रात्रौ जागरणं कार्यं विनिंद्रैः परमोत्सवैः
hastamātramite kuṃḍe jātavedasa ityṛcā ||
ghṛtena madhunāplutya juhuyānmaṃtraviddvijaḥ
||11||हस्तमात्रमिते कुंडे जातवेदस इत्यृचा ॥
घृतेन मधुनाप्लुत्य जुहुयान्मंत्रविद्द्विजः
sahasrakamalānāṃ ca smerāṇāṃ svayameva hi ||
navaprasūtāṃ kapilāṃ suśīlāṃ ca payasvinīm
||12||सहस्रकमलानां च स्मेराणां स्वयमेव हि ॥
नवप्रसूतां कपिलां सुशीलां च पयस्विनीम्
dadyādācāryavaryāya sālaṃkārāṃ salakṣaṇām ||
upoṣya daṃpatī bhaktyā navāṃbaravibhūṣitau
||13||दद्यादाचार्यवर्याय सालंकारां सलक्षणाम् ॥
उपोष्य दंपती भक्त्या नवांबरविभूषितौ
prātaḥsnātvā caturthyāṃ ca saṃpūjyācāryamādṛtaḥ ||
vastrairābharaṇairmālyairdakṣiṇābhirmudānvitau
||14||प्रातःस्नात्वा चतुर्थ्यां च संपूज्याचार्यमादृतः ॥
वस्त्रैराभरणैर्माल्यैर्दक्षिणाभिर्मुदान्वितौ
sopaskarāṃ ca tāṃ mṛrtimācāryāya nivedayet ||
samuccarannimaṃ maṃtraṃ vratakṛnmithunaṃ mudā
||15||सोपस्करां च तां मृर्तिमाचार्याय निवेदयेत् ॥
समुच्चरन्निमं मंत्रं व्रतकृन्मिथुनं मुदा
namo viśvavidhānajñe vidhe vividhakāriṇi ||
sutaṃ vaṃśakaraṃ dehi tuṣṭāmuṣmādvratācchubhāt
||16||नमो विश्वविधानज्ञे विधे विविधकारिणि ॥
सुतं वंशकरं देहि तुष्टामुष्माद्व्रताच्छुभात्
sahasaṃ bhojayitvātha dvijānāṃ bhaktipūrvakam ||
bhuktaśeṣeṇa cānnena kuryādvai pāraṇaṃ tataḥ
||17||सहसं भोजयित्वाथ द्विजानां भक्तिपूर्वकम् ॥
भुक्तशेषेण चान्नेन कुर्याद्वै पारणं ततः
itthametadvrataṃ rājaṃścikīrṣāmi tvayā saha ||
kuru caitatpriyaṃ mahyamabhīṣṭaphalalabdhaye
||18||इत्थमेतद्व्रतं राजंश्चिकीर्षामि त्वया सह ॥
कुरु चैतत्प्रियं मह्यमभीष्टफललब्धये
iti bhūpālavaryeṇa śrutvā saṃhṛṣṭacetasā ||
muneva taṃ samācīrṇaṃ sāṃtarvatnī babhūva ha
||19||इति भूपालवर्येण श्रुत्वा संहृष्टचेतसा ॥
मुनेव तं समाचीर्णं सांतर्वत्नी बभूव ह
tayātha prārthitā gaurī garbhiṇyā bhaktitoṣitā ||
putraṃ dehi mahāmāye sākṣādviṣṇvaṃśasaṃbhavam
||20||तयाथ प्रार्थिता गौरी गर्भिण्या भक्तितोषिता ॥
पुत्रं देहि महामाये साक्षाद्विष्ण्वंशसंभवम्
jātamātro vrajetsvargaṃ punagayāti cātra vai ||
bhaktaḥ sadāśive'tyarthaṃ prasiddhaḥ sarvabhūtale
||21||जातमात्रो व्रजेत्स्वर्गं पुनगयाति चात्र वै ॥
भक्तः सदाशिवेऽत्यर्थं प्रसिद्धः सर्वभूतले
vinaiva stanyapānena ṣoḍaśābdākṛtiḥ kṣaṇāt ||
evaṃbhūtaḥ suto gauri yathā me syāttathākuru
||22||विनैव स्तन्यपानेन षोडशाब्दाकृतिः क्षणात् ॥
एवंभूतः सुतो गौरि यथा मे स्यात्तथाकुरु
mṛḍānyāpi tathetyuktā rājñī bhaktyātituṣṭayā ||
atha kālena tanayaṃ mūlarkṣe sāpyajījanat
||23||मृडान्यापि तथेत्युक्ता राज्ञी भक्त्यातितुष्टया ॥
अथ कालेन तनयं मूलर्क्षे साप्यजीजनत्
hitairamātyairatha sā vijñaptāriṣṭasaṃsthitā ||
devi rājārthinī cettvaṃ tyaja duṣṭarkṣajaṃ sutam
||24||हितैरमात्यैरथ सा विज्ञप्तारिष्टसंस्थिता ॥
देवि राजार्थिनी चेत्त्वं त्यज दुष्टर्क्षजं सुतम्
sā maṃtrivākyamākarṇya kevalaṃ patidevatā ||
atyākṣīttaṃ tathā prāptaṃ tanayaṃ nayakovidā
||25||सा मंत्रिवाक्यमाकर्ण्य केवलं पतिदेवता ॥
अत्याक्षीत्तं तथा प्राप्तं तनयं नयकोविदा
dhātreyikāṃ samākārya prāhedaṃ sā nṛpāṃganā ||
paṃcamudre mahāpīṭhe vikaṭā nāma mātṛkā
||26||धात्रेयिकां समाकार्य प्राहेदं सा नृपांगना ॥
पंचमुद्रे महापीठे विकटा नाम मातृका
tadagre sthāpayitvāmuṃ bālaṃ dhātreyike vada ||
gauryādattaḥ śiśurasau tavāgre viniveditaḥ
||27||तदग्रे स्थापयित्वामुं बालं धात्रेयिके वद ॥
गौर्यादत्तः शिशुरसौ तवाग्रे विनिवेदितः
rājñyā patyuḥ priyeṣiṇyā maṃtrivijñaptinunnayā ||
sāpi rājñyuditaṃ śrutvā śiśuṃ lāsya śaśiprabham
||28||राज्ञ्या पत्युः प्रियेषिण्या मंत्रिविज्ञप्तिनुन्नया ॥
सापि राज्ञ्युदितं श्रुत्वा शिशुं लास्य शशिप्रभम्
vikaṭāyāḥ puraḥ sthāpya gṛhaṃ dhātreyikā gatā ||
atha sā vikaṭā devī samāhūya ca yoginīḥ
||29||विकटायाः पुरः स्थाप्य गृहं धात्रेयिका गता ॥
अथ सा विकटा देवी समाहूय च योगिनीः
uvāca nayata kṣipraṃ śiśuṃ mātṛgaṇāgrataḥ ||
tāsāmājñāṃ ca kuruta rakṣatāmuṃ prayatnataḥ
||30||उवाच नयत क्षिप्रं शिशुं मातृगणाग्रतः ॥
तासामाज्ञां च कुरुत रक्षतामुं प्रयत्नतः
yoginyo vikaṭāvākyātkhecaryastāḥ kṣaṇena tam ||
ninyurgaganamārgeṇa brāhmyādyā yatra mātaraḥ
||31||योगिन्यो विकटावाक्यात्खेचर्यस्ताः क्षणेन तम् ॥
निन्युर्गगनमार्गेण ब्राह्म्याद्या यत्र मातरः
praṇamya yoginīvṛṃdaṃ taṃ śiśuṃ sūryavarcasam ||
puro nidhāya mātṝṇāṃ provāca vikaṭoditam
||32||प्रणम्य योगिनीवृंदं तं शिशुं सूर्यवर्चसम् ॥
पुरो निधाय मातॄणां प्रोवाच विकटोदितम्
brahmāṇī vaiṣṇavī raudrī vārāhī nārasiṃhikā ||
kaumārī cāpi māheṃdrī cāmuṃḍā caiva caṃḍikā
||33||ब्रह्माणी वैष्णवी रौद्री वाराही नारसिंहिका ॥
कौमारी चापि माहेंद्री चामुंडा चैव चंडिका
dṛṣṭvā taṃ bālakaṃ ramyaṃ vikaṭāpreṣitaṃ tataḥ ||
papracchuryugapaḍḍiṃbhaṃ kaste tātaḥ prasūśca kaḥ
||34||दृष्ट्वा तं बालकं रम्यं विकटाप्रेषितं ततः ॥
पप्रच्छुर्युगपड्डिंभं कस्ते तातः प्रसूश्च कः
mātṛbhiśceti puṣṭaḥ sa yadā kiṃcinna vakti ca ||
tadā tadyoginīcakraṃ prāha mātṛgaṇastviti
||35||मातृभिश्चेति पुष्टः स यदा किंचिन्न वक्ति च ॥
तदा तद्योगिनीचक्रं प्राह मातृगणस्त्विति
rājyayogyo bhavatyeṣa mahālakṣaṇalakṣitaḥ ||
punastatraiva netavyo yoginyastvavilaṃbitam
||36||राज्ययोग्यो भवत्येष महालक्षणलक्षितः ॥
पुनस्तत्रैव नेतव्यो योगिन्यस्त्वविलंबितम्
paṃcamudrā mahādevī tiṣṭhate yatra kāmyadā |
yasyāḥ saṃsevanānnṛṇāṃ nirvāṇaśrīradūrataḥ
||37||पंचमुद्रा महादेवी तिष्ठते यत्र काम्यदा ।
यस्याः संसेवनान्नृणां निर्वाणश्रीरदूरतः
sarvatraśubhajanminyāṃ kāśyāṃ muktiḥ padepade ||
tathāpi saviśeṣaṃ hi tatpīṭhaṃ sarvasiddhikṛt
||38||सर्वत्रशुभजन्मिन्यां काश्यां मुक्तिः पदेपदे ॥
तथापि सविशेषं हि तत्पीठं सर्वसिद्धिकृत्
tatpīṭhasevanādasya ṣoḍaśābdākṛteḥ śiśoḥ ||
siddhirbhavitrī paramā viśveśānugrahātparāt
||39||तत्पीठसेवनादस्य षोडशाब्दाकृतेः शिशोः ॥
सिद्धिर्भवित्री परमा विश्वेशानुग्रहात्परात्
evaṃ mātṛgaṇāśīrbhiryoginībhiḥ kṣaṇena hi ||
prāpito mātṛvākyena paṃcamudrāṃkitaṃ punaḥ
||40||एवं मातृगणाशीर्भिर्योगिनीभिः क्षणेन हि ॥
प्रापितो मातृवाक्येन पंचमुद्रांकितं पुनः
saṃprāpya tanmahāpīṭhaṃ svargalokādihāgataḥ ||
ānaṃdakānane divyaṃ tatāpa vipulaṃ tapaḥ
||41||संप्राप्य तन्महापीठं स्वर्गलोकादिहागतः ॥
आनंदकानने दिव्यं तताप विपुलं तपः
tapasātīva tīvreṇa niścaleṃdriyacetasaḥ ||
tasya rājakumārasya prasannobhūdumādhavaḥ
||42||तपसातीव तीव्रेण निश्चलेंद्रियचेतसः ॥
तस्य राजकुमारस्य प्रसन्नोभूदुमाधवः
āvirbabhūva purato liṃgarūpeṇa śaṃkaraḥ ||
provāca ca prasannosmi varaṃ brūhi nṛpāṃgaja
||43||आविर्बभूव पुरतो लिंगरूपेण शंकरः ॥
प्रोवाच च प्रसन्नोस्मि वरं ब्रूहि नृपांगज
skaṃda uvāca
sarvajyotirmayaṃ liṃgaṃ purato vīkṣya vāṅmayam ||
saptapātālamudbhidya sthitaṃ bṛhadanugrahāta
||44||सर्वज्योतिर्मयं लिंगं पुरतो वीक्ष्य वाङ्मयम् ॥
सप्तपातालमुद्भिद्य स्थितं बृहदनुग्रहात
praṇamya daṃḍavadbhūmau parituṣṭāva dhūrjaṭim ||
sūktairjanmāṃtarābhyastaiḥ suhṛṣṭo rudradevataiḥ
||45||प्रणम्य दंडवद्भूमौ परितुष्टाव धूर्जटिम् ॥
सूक्तैर्जन्मांतराभ्यस्तैः सुहृष्टो रुद्रदेवतैः
tataḥ prasanno bhagavāndevadevo maheśvaraḥ ||
saṃtuṣṭastapasā tasya provāca vṛṣabhadhvajaḥ
||46||ततः प्रसन्नो भगवान्देवदेवो महेश्वरः ॥
संतुष्टस्तपसा तस्य प्रोवाच वृषभध्वजः
devadeva uvāca
varaṃ varaya saṃtapta tapasā kleśitaṃ vapuḥ ||
tvayedaṃ bālavapuṣā vaśīkṛtaṃ mano mama
||47||वरं वरय संतप्त तपसा क्लेशितं वपुः ॥
त्वयेदं बालवपुषा वशीकृतं मनो मम
śivoktaṃ ca samākarṇya varadānaṃ punaḥpunaḥ ||
varaṃ ca prārthayāṃcakre parihṛṣṭatanūruhaḥ
||48||शिवोक्तं च समाकर्ण्य वरदानं पुनःपुनः ॥
वरं च प्रार्थयांचक्रे परिहृष्टतनूरुहः
kumāra uvāca
devadevamahādeva yadi deyo varo mama ||
tadatra bhavatā stheyaṃ bhavatāpahṛtā sadā
||49||देवदेवमहादेव यदि देयो वरो मम ॥
तदत्र भवता स्थेयं भवतापहृता सदा
asmim̐lliṃge sthitaḥ śaṃbho kuru bhaktasamīhitam ||
vinā mudrādikaraṇaṃ maṃtreṇāpi vinā vibho
||50||अस्मिँल्लिंगे स्थितः शंभो कुरु भक्तसमीहितम् ॥
विना मुद्रादिकरणं मंत्रेणापि विना विभो
diśa siddhiṃ parāmatra darśanātsparśanānnateḥ ||
asya liṃgasya ye bhaktā manovākkāyakarmabhiḥ
||51||दिश सिद्धिं परामत्र दर्शनात्स्पर्शनान्नतेः ॥
अस्य लिंगस्य ये भक्ता मनोवाक्कायकर्मभिः
sadaivānugrahasteṣu kartavyo vara eṣa me ||
iti tadvratamākarṇya liṃgarūpovadatprabhuḥ
||52||सदैवानुग्रहस्तेषु कर्तव्यो वर एष मे ॥
इति तद्व्रतमाकर्ण्य लिंगरूपोवदत्प्रभुः
evamastu yaduktaṃ te vīravaiṣṇava sūnunā ||
janeturviṣṇubhaktācca rājño'mitrajjito bhavān
||53||एवमस्तु यदुक्तं ते वीरवैष्णव सूनुना ॥
जनेतुर्विष्णुभक्ताच्च राज्ञोऽमित्रज्जितो भवान्
viṣṇvaṃśa evamutpanno mama bhaktiparāṃgaja ||
vīravīreśvaraṃ nāma liṃgametattvadākhyayā
||54||विष्ण्वंश एवमुत्पन्नो मम भक्तिपरांगज ॥
वीरवीरेश्वरं नाम लिंगमेतत्त्वदाख्यया
kāśyāṃ dāsyatyabhīṣṭāni bhaktānāṃ ciṃtitānyaho ||
asmim̐lliṃge sadā vīra sthāsyāmyadyadināvadhi
||55||काश्यां दास्यत्यभीष्टानि भक्तानां चिंतितान्यहो ॥
अस्मिँल्लिंगे सदा वीर स्थास्याम्यद्यदिनावधि
dāsyāmi ca parāṃ siddhimāśritebhyo na saṃśayaḥ ||
paraṃ na mahimānaṃ me kalau kaścicca vetsyati
||56||दास्यामि च परां सिद्धिमाश्रितेभ्यो न संशयः ॥
परं न महिमानं मे कलौ कश्चिच्च वेत्स्यति
yastu vetsyati bhāgyena sa parāṃ siddhimāpsyati ||
atra japtaṃ hutaṃ dattaṃ stutamarcitameva vā
||57||यस्तु वेत्स्यति भाग्येन स परां सिद्धिमाप्स्यति ॥
अत्र जप्तं हुतं दत्तं स्तुतमर्चितमेव वा
jīrṇoddhārādikaraṇamakṣayyaphalahetukam ||
tvaṃ tu rājyaṃ paraṃ prāpya sarvabhūpāladurlabham
||58||जीर्णोद्धारादिकरणमक्षय्यफलहेतुकम् ॥
त्वं तु राज्यं परं प्राप्य सर्वभूपालदुर्लभम्
bhuktvā bhogāṃśca vipulānaṃte siddhimavāpsyasi ||
purī vārāṇasī ramyā sarvasmiñjagatītale
||59||भुक्त्वा भोगांश्च विपुलानंते सिद्धिमवाप्स्यसि ॥
पुरी वाराणसी रम्या सर्वस्मिञ्जगतीतले
puṇyastatrāpi saṃbhedaḥ saritorasi gaṃgayoḥ ||
tato'pi ca hayagrīvaṃ tīrthaṃ caivāti puṇyadam
||60||पुण्यस्तत्रापि संभेदः सरितोरसि गंगयोः ॥
ततोऽपि च हयग्रीवं तीर्थं चैवाति पुण्यदम्
yatra viṣṇurhayagrīvo bhaktaciṃtitamarpayet ||
hayagrīvācca vai tīrthādgajatīrthaṃ viśiṣyate
||61||यत्र विष्णुर्हयग्रीवो भक्तचिंतितमर्पयेत् ॥
हयग्रीवाच्च वै तीर्थाद्गजतीर्थं विशिष्यते
yatra vai snānamātreṇa gajadānaphalaṃ labhet ||
kokāvarāhatīrthaṃ ca puṇyadaṃ gajatīrthataḥ
||62||यत्र वै स्नानमात्रेण गजदानफलं लभेत् ॥
कोकावराहतीर्थं च पुण्यदं गजतीर्थतः
kokāvarāhamabhyarcya tatra no janmabhāgjanaḥ ||
api kokāvarāhācca dilīpeśvarasannidhau
||63||कोकावराहमभ्यर्च्य तत्र नो जन्मभाग्जनः ॥
अपि कोकावराहाच्च दिलीपेश्वरसन्निधौ
dilīpatīrthaṃ suśreṣṭhaṃ sadyaḥ pāpaharaṃ param ||
tataḥ sagaratīrthaṃ ca sagareśa samīpataḥ
||64||दिलीपतीर्थं सुश्रेष्ठं सद्यः पापहरं परम् ॥
ततः सगरतीर्थं च सगरेश समीपतः
yatra majjannaro majjenna bhūyo duḥkhasāgare ||
saptasāgaratīrthaṃ ca śubhaṃ sagaratīrthataḥ
||65||यत्र मज्जन्नरो मज्जेन्न भूयो दुःखसागरे ॥
सप्तसागरतीर्थं च शुभं सगरतीर्थतः
saptābdhisnānajaṃ puṇyaṃ yatra snātvā naro labhet ||
mahodadhīti vikhyātaṃ tīrthaṃ saptābdhitīrthataḥ
||66||सप्ताब्धिस्नानजं पुण्यं यत्र स्नात्वा नरो लभेत् ॥
महोदधीति विख्यातं तीर्थं सप्ताब्धितीर्थतः
sakṛdyatrāpluto dhīmāndahedaghamahodadhim ||
cauratīrthaṃ tataḥ puṇyaṃ kapileśvara sannidhau
||67||सकृद्यत्राप्लुतो धीमान्दहेदघमहोदधिम् ॥
चौरतीर्थं ततः पुण्यं कपिलेश्वर सन्निधौ
pāpaṃ suvarṇacauryādi yatra snātvā kṣayaṃ vrajet ||
haṃsatīrtha tatopīḍyaṃ kedāreśvara sannidhau
||68||पापं सुवर्णचौर्यादि यत्र स्नात्वा क्षयं व्रजेत् ॥
हंसतीर्थ ततोपीड्यं केदारेश्वर सन्निधौ
haṃsa svarūpī yatrāhaṃ nayāmi brahmadehinaḥ
||69||हंस स्वरूपी यत्राहं नयामि ब्रह्मदेहिनः
tatastribhuvanākhyasya keśavasyāti puṇyadam ||
tīrthaṃ yatrāplutā martyā martyalokaṃ viśaṃti na
||70||ततस्त्रिभुवनाख्यस्य केशवस्याति पुण्यदम् ॥
तीर्थं यत्राप्लुता मर्त्या मर्त्यलोकं विशंति न
govyāghre śvara tīrthaṃ ca tatopyadhikameva hi ||
svabhāvavairamutsṛjya yatrobhau siddhimāpatuḥ
||71||गोव्याघ्रे श्वर तीर्थं च ततोप्यधिकमेव हि ॥
स्वभाववैरमुत्सृज्य यत्रोभौ सिद्धिमापतुः
tatopi hi varaṃ vīra tīrthaṃ māṃdhātusaṃjñitam ||
cakravartipadaṃ yatra prāptaṃ tena mahībhujā
||72||ततोपि हि वरं वीर तीर्थं मांधातुसंज्ञितम् ॥
चक्रवर्तिपदं यत्र प्राप्तं तेन महीभुजा
tatopi mucukuṃdākhyaṃ tīrthaṃ cātīva puṇyadam ||
yatra snāto naro jātu ripubhirnābhibhūyate
||73||ततोपि मुचुकुंदाख्यं तीर्थं चातीव पुण्यदम् ॥
यत्र स्नातो नरो जातु रिपुभिर्नाभिभूयते
pṛthu tīrthaṃ tatopyuccaiḥ śreyasāṃ sādhanaṃ param ||
pṛthvīśvaraṃ yatra dṛṣṭvā naraḥ pṛthvīpatirbhavet
||74||पृथु तीर्थं ततोप्युच्चैः श्रेयसां साधनं परम् ॥
पृथ्वीश्वरं यत्र दृष्ट्वा नरः पृथ्वीपतिर्भवेत्
tataḥ paraśurāmasya tīrthaṃ cātīva siddhidam ||
yatra kṣatravadhātpāpājjāmadagnyo vimuktavān ||
adyāpi kṣatravadhajaṃ pāpaṃ tatra praṇaśyati ||
ekena snānamātreṇa jñānājñānakṛtena ca
||76||ततः परशुरामस्य तीर्थं चातीव सिद्धिदम् ॥
यत्र क्षत्रवधात्पापाज्जामदग्न्यो विमुक्तवान् ॥
अद्यापि क्षत्रवधजं पापं तत्र प्रणश्यति ॥
एकेन स्नानमात्रेण ज्ञानाज्ञानकृतेन च
tatopi śreyasāṃ kartṛ tīrthaṃ kṛṣṇāgrajasya hi ||
yatra sūtavadhātpāpādbaladevo vimuktavān
||77||ततोपि श्रेयसां कर्तृ तीर्थं कृष्णाग्रजस्य हि ॥
यत्र सूतवधात्पापाद्बलदेवो विमुक्तवान्
divodāsasya vai tīrthaṃ tatra rājño'timedhasaḥ ||
tatra snāto naro jātu na jñānāccyavateṃ'tataḥ
||78||दिवोदासस्य वै तीर्थं तत्र राज्ञोऽतिमेधसः ॥
तत्र स्नातो नरो जातु न ज्ञानाच्च्यवतेंऽततः
tatopi hi mahātīrthaṃ sarvapāpapraṇāśanam ||
yatra bhāgīrathī sākṣānmūrtirūpeṇa tiṣṭhati
||79||ततोपि हि महातीर्थं सर्वपापप्रणाशनम् ॥
यत्र भागीरथी साक्षान्मूर्तिरूपेण तिष्ठति
snātvā bhāgīrathī tīrthe kṛtvā śrāddhaṃ vidhānavit ||
dattvā dānaṃ ca pātrebhyo na bhūyo garbhabhāgbhavet
||80||स्नात्वा भागीरथी तीर्थे कृत्वा श्राद्धं विधानवित् ॥
दत्त्वा दानं च पात्रेभ्यो न भूयो गर्भभाग्भवेत्
harapāpaṃ ca bho vīra tīrthaṃ bhāgīrathītaṭe ||
tatra snātvā kṣayaṃ yāṃti mahāpāpakulānyapi
||81||हरपापं च भो वीर तीर्थं भागीरथीतटे ॥
तत्र स्नात्वा क्षयं यांति महापापकुलान्यपि
yo niṣpāpeśvaraṃ liṃgaṃ tatra paśyati mānavaḥ ||
niṣpāpo jāyate vīra sa talliṃgekṣaṇātkṣaṇāt
||82||यो निष्पापेश्वरं लिंगं तत्र पश्यति मानवः ॥
निष्पापो जायते वीर स तल्लिंगेक्षणात्क्षणात्
daśāśvamedhatīrthaṃ ca tatopi pravaraṃ matam ||
daśānāmaśvamedhānāṃ yatra snātvā phalaṃ labhet
||83||दशाश्वमेधतीर्थं च ततोपि प्रवरं मतम् ॥
दशानामश्वमेधानां यत्र स्नात्वा फलं लभेत्
tatopi śubhadaṃ vīra baṃdītīrthaṃ pracakṣate ||
yatra snāto naro mucyedapi saṃsārabaṃdhanāt
||84||ततोपि शुभदं वीर बंदीतीर्थं प्रचक्षते ॥
यत्र स्नातो नरो मुच्येदपि संसारबंधनात्
hiraṇyākṣeṇa daityena bahuśo devatāḥ purā ||
baṃdīkṛtā nigaḍitā stuṣṭuvurjagadaṃbikām
||85||हिरण्याक्षेण दैत्येन बहुशो देवताः पुरा ॥
बंदीकृता निगडिता स्तुष्टुवुर्जगदंबिकाम्
tato viśṛṃkhalībhūtairvaṃditā yajjagajjaniḥ ||
tadā prabhṛti baṃdīti gīyatedyāpi mānavaiḥ
||86||ततो विशृंखलीभूतैर्वंदिता यज्जगज्जनिः ॥
तदा प्रभृति बंदीति गीयतेद्यापि मानवैः
baṃdītīrthastu tatraiva mahānigaḍakhaṃḍanam ||
tatra snāto vimucyeta sarvasmātkarmapāśataḥ
||87||बंदीतीर्थस्तु तत्रैव महानिगडखंडनम् ॥
तत्र स्नातो विमुच्येत सर्वस्मात्कर्मपाशतः
baṃdītīrthaṃ mahāśreṣṭhaṃ kāśipuryāṃ viśāṃpate ||
tatra snāto naro yāyādvimuktiṃ devyanugrahāt
||88||बंदीतीर्थं महाश्रेष्ठं काशिपुर्यां विशांपते ॥
तत्र स्नातो नरो यायाद्विमुक्तिं देव्यनुग्रहात्
tatopi hi śreṣṭhataraṃ prayāgamiti viśrutam ||
prayāgamādhavo yatra sarvayāgaphalapradaḥ
||89||ततोपि हि श्रेष्ठतरं प्रयागमिति विश्रुतम् ॥
प्रयागमाधवो यत्र सर्वयागफलप्रदः
kṣoṇīvarāhatīrthaṃ ca tatopi śubhadaṃ param ||
tatra snāto naro jātu tiryagyoniṃ na gacchati
||90||क्षोणीवराहतीर्थं च ततोपि शुभदं परम् ॥
तत्र स्नातो नरो जातु तिर्यग्योनिं न गच्छति
tataḥ kāleśvaraṃ tīrthaṃ vīraśreṣṭhataraṃ param ||
kalikālau na bādhete yatra snātaṃ narottamam
||91||ततः कालेश्वरं तीर्थं वीरश्रेष्ठतरं परम् ॥
कलिकालौ न बाधेते यत्र स्नातं नरोत्तमम्
aśokatīrthaṃ tatraiva tatopyatitarāṃ śubham ||
yatra snāto naro jātu nāpatecchokasāgare
||92||अशोकतीर्थं तत्रैव ततोप्यतितरां शुभम् ॥
यत्र स्नातो नरो जातु नापतेच्छोकसागरे
tatoti nirmalataraṃ śukratīrthaṃ nṛpāṃgaja ||
śukradvārā na jāyeta yatra snāto narottamaḥ
||93||ततोति निर्मलतरं शुक्रतीर्थं नृपांगज ॥
शुक्रद्वारा न जायेत यत्र स्नातो नरोत्तमः
tato'pi puṇyadaṃ rājanbhavānītīrthamuttamam ||
yatra snātvā bhavānīśau dṛṣṭvā naiva punarbhavet
||94||ततोऽपि पुण्यदं राजन्भवानीतीर्थमुत्तमम् ॥
यत्र स्नात्वा भवानीशौ दृष्ट्वा नैव पुनर्भवेत्
prabhāsatīrthaṃ vikhyātaṃ tatopi śubhadaṃ nṛṇām ||
someśvarasya puratastatra snāto na garbhabhāk
||95||प्रभासतीर्थं विख्यातं ततोपि शुभदं नृणाम् ॥
सोमेश्वरस्य पुरतस्तत्र स्नातो न गर्भभाक्
tato garuḍatīrthaṃ ca saṃsāraviṣanāśanam ||
garuḍeśaṃ samabhyarcya tatra snātvā na śocati
||96||ततो गरुडतीर्थं च संसारविषनाशनम् ॥
गरुडेशं समभ्यर्च्य तत्र स्नात्वा न शोचति
brahmatīrthaṃ tataḥ puṇyaṃ vīrabrahmeśvarātpuraḥ ||
brahmavidyāmavāpnoti tatra snānena mānavaḥ
||97||ब्रह्मतीर्थं ततः पुण्यं वीरब्रह्मेश्वरात्पुरः ॥
ब्रह्मविद्यामवाप्नोति तत्र स्नानेन मानवः
tato vṛddhārkatīrthaṃ ca vidhitīrthaṃ tataḥ param ||
tatrāpluto naro yāti ravilokaṃ sunirmalam
||98||ततो वृद्धार्कतीर्थं च विधितीर्थं ततः परम् ॥
तत्राप्लुतो नरो याति रविलोकं सुनिर्मलम्
tato nṛsiṃhatīrthaṃ ca mahābhayanivāraṇam ||
kālādapi kutastatra snātvā paribibheti ca
||99||ततो नृसिंहतीर्थं च महाभयनिवारणम् ॥
कालादपि कुतस्तत्र स्नात्वा परिबिभेति च
tatopi puṇyadaṃ nṛṇāṃ tīrthaṃ citraratheśvaram ||
yatra snātvā ca dattvā ca citraguptaṃ na paśyati ||
dharmatīrthaṃ tataḥ puṇyaṃ dharmeśa purataḥ sthitam ||
tatra śrāddhadikaṃ kṛtvā pitṝṇāmanṛṇo bhavet
||1||ततोपि पुण्यदं नृणां तीर्थं चित्ररथेश्वरम् ॥
यत्र स्नात्वा च दत्त्वा च चित्रगुप्तं न पश्यति ॥
धर्मतीर्थं ततः पुण्यं धर्मेश पुरतः स्थितम् ॥
तत्र श्राद्धदिकं कृत्वा पितॄणामनृणो भवेत्
viśālatīrthaṃ vimalaṃ viśālaphaladaṃ tataḥ ||
tatra snātvā viśālākṣī dṛṣṭvā garbhena jāyate
||2||विशालतीर्थं विमलं विशालफलदं ततः ॥
तत्र स्नात्वा विशालाक्षी दृष्ट्वा गर्भेन जायते
jarāsaṃdheśa tīrthaṃ ca jarāsaṃdheśasannidhau ||
saṃsārajvarapīḍābhistatra snāto na muhyati
||3||जरासंधेश तीर्थं च जरासंधेशसन्निधौ ॥
संसारज्वरपीडाभिस्तत्र स्नातो न मुह्यति
tato'pi lalitātīrthaṃ mahāsaubhāgyavardhanam ||
snātvārcayitvā lalitāṃ na daridro na duḥkhabhāk
||4||ततोऽपि ललितातीर्थं महासौभाग्यवर्धनम् ॥
स्नात्वार्चयित्वा ललितां न दरिद्रो न दुःखभाक्
tato gautamatīrthaṃ ca sarvapāpaviśodhanam ||
snātvā piṃḍānvinirvāpya yatra śocati na kvacit
||5||ततो गौतमतीर्थं च सर्वपापविशोधनम् ॥
स्नात्वा पिंडान्विनिर्वाप्य यत्र शोचति न क्वचित्
gaṃgākeśavatīrthaṃ ca tīrthaṃ cāgastya saṃjñakam ||
tatastu yoginītīrthaṃ trisaṃdhyākhyaṃ tataḥ param
||6||गंगाकेशवतीर्थं च तीर्थं चागस्त्य संज्ञकम् ॥
ततस्तु योगिनीतीर्थं त्रिसंध्याख्यं ततः परम्
tatastu nārmadaṃ tīrthaṃ tata āruṃdhateyakam ||
vāsiṣṭhaṃ ca tatastīrthaṃ mārkaṃṇḍeyamanuttamam
||7||ततस्तु नार्मदं तीर्थं तत आरुंधतेयकम् ॥
वासिष्ठं च ततस्तीर्थं मार्कंण्डेयमनुत्तमम्
jñeyānyetāni tīrthāni puṇyadānyuttarottarama ||
khurakartari saṃjñaṃ ca tatastīrthamanuttamam
||8||ज्ञेयान्येतानि तीर्थानि पुण्यदान्युत्तरोत्तरम ॥
खुरकर्तरि संज्ञं च ततस्तीर्थमनुत्तमम्
tatra śrāddhādikaraṇānnaromucyeta kilbiṣaiḥ ||
tato bhagīrathaṃ tīrthaṃ rājarṣeratipuṇyadam
||9||तत्र श्राद्धादिकरणान्नरोमुच्येत किल्बिषैः ॥
ततो भगीरथं तीर्थं राजर्षेरतिपुण्यदम्
tatrālpamapi yacchedyatkalpāṃtepyakṣayaṃ hi tat ||
etebhyopi hi tīrthebhyo liṃgakoṭitrayādapi
||110||तत्राल्पमपि यच्छेद्यत्कल्पांतेप्यक्षयं हि तत् ॥
एतेभ्योपि हि तीर्थेभ्यो लिंगकोटित्रयादपि
vīravīreśvaraṃ liṃgaṃ mahāśreṣṭhaṃ bhaviṣyati ||
vīratīrthe naraḥ snātvā vīreśaṃ paripūjya ca
||11||वीरवीरेश्वरं लिंगं महाश्रेष्ठं भविष्यति ॥
वीरतीर्थे नरः स्नात्वा वीरेशं परिपूज्य च
tīrtheṣveteṣu sarveṣu snāto bhavati nānyathā ||
yastu vīreśvaraṃ liṃgaṃ naktamabhyarcayipyati ||
tena trikoṭisaṃkhyāni liṃgānīhārcitāni vai
||12||तीर्थेष्वेतेषु सर्वेषु स्नातो भवति नान्यथा ॥
यस्तु वीरेश्वरं लिंगं नक्तमभ्यर्चयिप्यति ॥
तेन त्रिकोटिसंख्यानि लिंगानीहार्चितानि वै
yastu kāmayate lakṣmīṃ muktidāṃ bhuktidāmapi ||
tena vīreśvaraṃ liṃgaṃ saṃsevyamatiyatnataḥ
||13||यस्तु कामयते लक्ष्मीं मुक्तिदां भुक्तिदामपि ॥
तेन वीरेश्वरं लिंगं संसेव्यमतियत्नतः
vidhāyaikaṃ jāgaraṇaṃ naro vīreśamarcayan ||
bhūtāyāṃ naiva gṛhṇāti śarīraṃ pāṃcabhautikam
||14||विधायैकं जागरणं नरो वीरेशमर्चयन् ॥
भूतायां नैव गृह्णाति शरीरं पांचभौतिकम्
idaṃ liṃgaṃ sadābhyarcyaṃ siddhaiḥ saṃsiddhikāmukaiḥ ||
aihikāmuṣmikānyasmātsarvānkāmānsamarthayet
||15||इदं लिंगं सदाभ्यर्च्यं सिद्धैः संसिद्धिकामुकैः ॥
ऐहिकामुष्मिकान्यस्मात्सर्वान्कामान्समर्थयेत्
paṃcāmṛtena snapanaṃ yaḥ kariṣyati mānavaḥ ||
palepale phalaṃ tasya vīreśe ghaṭakoṭijam
||16||पंचामृतेन स्नपनं यः करिष्यति मानवः ॥
पलेपले फलं तस्य वीरेशे घटकोटिजम्
yadanyatra phalaṃ liṃge koṭipuṣpa pradānataḥ ||
tadekenaiva puṣpeṇa vīreśe nātra saṃśayaḥ
||17||यदन्यत्र फलं लिंगे कोटिपुष्प प्रदानतः ॥
तदेकेनैव पुष्पेण वीरेशे नात्र संशयः
ekāmapyāhutiṃ dattvā vīreśvarasamīpataḥ ||
koṭihomaphalaṃ samyaṅnātra kāryā vicāraṇā
||18||एकामप्याहुतिं दत्त्वा वीरेश्वरसमीपतः ॥
कोटिहोमफलं सम्यङ्नात्र कार्या विचारणा
sikthesikthe ca naivaidyai koṭisikthaphalaṃ bhavet ||
atyalpamapi vīreśe kṛtamakṣayatāṃ vrajet
||19||सिक्थेसिक्थे च नैवैद्यै कोटिसिक्थफलं भवेत् ॥
अत्यल्पमपि वीरेशे कृतमक्षयतां व्रजेत्
apyekaṃ yo mahārudraṃ japedvīreśa sannidhau ||
jāpayedvā bhavettasya koṭirudraphalaṃ dhruvam
||120||अप्येकं यो महारुद्रं जपेद्वीरेश सन्निधौ ॥
जापयेद्वा भवेत्तस्य कोटिरुद्रफलं ध्रुवम्
vratotsargādi vīreśe yatkṛtaṃ vratibhirnṛbhiḥ ||
tatkoṭiguṇasaṃkhyākaṃ bhavatyeva na saṃśayaḥ
||21||व्रतोत्सर्गादि वीरेशे यत्कृतं व्रतिभिर्नृभिः ॥
तत्कोटिगुणसंख्याकं भवत्येव न संशयः
kṛtā aṣṭau namaskārā yena vīreśvarāgrataḥ ||
aṣṭakoṭi namaskāraphalaṃ tasya na saṃśayaḥ
||22||कृता अष्टौ नमस्कारा येन वीरेश्वराग्रतः ॥
अष्टकोटि नमस्कारफलं तस्य न संशयः
sarvāsāṃ saṃpadāṃ sthānamidaṃ liṃgaṃ bhaviṣyati ||
vīraśveraṃ na saṃdeho vīra me varadānataḥ
||23||सर्वासां संपदां स्थानमिदं लिंगं भविष्यति ॥
वीरश्वेरं न संदेहो वीर मे वरदानतः
jñānamutpatsyate puṃsāṃ tārakākhyaṃ mamājñayā ||
jīvatāmeva tatsevyametalliṃgaṃ śubhārthibhiḥ
||24||ज्ञानमुत्पत्स्यते पुंसां तारकाख्यं ममाज्ञया ॥
जीवतामेव तत्सेव्यमेतल्लिंगं शुभार्थिभिः
etacchrutvā punaḥ prāha vīro mitrajitaḥ sutaḥ ||
praṇamya devadeveśaṃ paripūrṇamanorathaḥ
||25||एतच्छ्रुत्वा पुनः प्राह वीरो मित्रजितः सुतः ॥
प्रणम्य देवदेवेशं परिपूर्णमनोरथः
tīrthānyetāni deveśa yānyuktāni mamāgrataḥ ||
kṛpayā punarapyeva tadanyāni vada prabho
||26||तीर्थान्येतानि देवेश यान्युक्तानि ममाग्रतः ॥
कृपया पुनरप्येव तदन्यानि वद प्रभो
ādikeśavamārabhya tattīrthācca bhagīrathāt ||
yeṣāṃ śravaṇamātreṇa niṣpāpo jāyate naraḥ
||27||आदिकेशवमारभ्य तत्तीर्थाच्च भगीरथात् ॥
येषां श्रवणमात्रेण निष्पापो जायते नरः
iti śrutvā maheśāno mahīpa tanayoditam ||
punastīrthāni gaṃgāyāṃ vaktuṃ samupacakrame
||128||इति श्रुत्वा महेशानो महीप तनयोदितम् ॥
पुनस्तीर्थानि गंगायां वक्तुं समुपचक्रमे
iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍe uttarārdhe vīreśvarāvirbhāvonāma tryaśītitamo'dhyāyaḥ || 83 ||