viśveśvaraliṃgamahimākhyaḥ
vyāsa uvāca
śṛṇu sūta yathā proktaṃ kuṃbhaje śarajanmanā ||
devadevasya caritaṃ viśveśasya parātmanaḥ
||1||शृणु सूत यथा प्रोक्तं कुंभजे शरजन्मना ॥
देवदेवस्य चरितं विश्वेशस्य परात्मनः
agastya uvāca
senānīḥ kathaya tvaṃ me tato nirvāṇamaṃḍapāt ||
nirgatya devo deveṃdraiḥ sahitaḥ kiṃ cakāra ha
||2||सेनानीः कथय त्वं मे ततो निर्वाणमंडपात् ॥
निर्गत्य देवो देवेंद्रैः सहितः किं चकार ह
skaṃda uvāca
muktimaṃḍapataḥ śaṃbhurbrahmaviṣṇupurogamaḥ ||
śṛṃgāramaṃḍapaṃ prāpya yaccakāra vadāmi tat
||3||मुक्तिमंडपतः शंभुर्ब्रह्मविष्णुपुरोगमः ॥
शृंगारमंडपं प्राप्य यच्चकार वदामि तत्
prāṅmukhastūpaviśyeśaḥ sahāsmābhiḥ saheśayā ||
brahmaṇādhiṣṭhitaḥ savye vāmapārśvetha śārṅgiṇā
||4||प्राङ्मुखस्तूपविश्येशः सहास्माभिः सहेशया ॥
ब्रह्मणाधिष्ठितः सव्ये वामपार्श्वेथ शार्ङ्गिणा
vījyamāno maheṃdreṇa ṛṣibhiḥ parito vṛtaḥ ||
gaṇaiḥ pṛṣṭhapradeśasthairjoṣaṃ tiṣṭhadbhirādarāt
||5||वीज्यमानो महेंद्रेण ऋषिभिः परितो वृतः ॥
गणैः पृष्ठप्रदेशस्थैर्जोषं तिष्ठद्भिरादरात्
udāyudhaiḥ sevyamānaścāvasanmānabhūribhiḥ ||
brahmaṇe viṣṇave śaṃbhuḥ pāṇimutkṣipya dakṣiṇam
||6||उदायुधैः सेव्यमानश्चावसन्मानभूरिभिः ॥
ब्रह्मणे विष्णवे शंभुः पाणिमुत्क्षिप्य दक्षिणम्
darśayāmāsa deveśo liṃgaṃ paśyata paśyata ||
idameva paraṃ jyotiridameva parātparam
||7||दर्शयामास देवेशो लिंगं पश्यत पश्यत ॥
इदमेव परं ज्योतिरिदमेव परात्परम्
idameva hi me rūpaṃ sthāvaraṃ cāti siddhidam ||
ete pāśupatā siddhā ābāla brahmacāriṇaḥ
||8||इदमेव हि मे रूपं स्थावरं चाति सिद्धिदम् ॥
एते पाशुपता सिद्धा आबाल ब्रह्मचारिणः
jiteṃdriyāstaponiṣṭhāḥ paṃcārthajñānanirmalāḥ ||
bhasmakūṭaśayā dātāḥ suśīlā ūrdhvaretasaḥ
||9||जितेंद्रियास्तपोनिष्ठाः पंचार्थज्ञाननिर्मलाः ॥
भस्मकूटशया दाताः सुशीला ऊर्ध्वरेतसः
liṃgārcanaratā nityamananyeṃdriyamānasāḥ ||
sadaiva vāruṇāgneya snānadvaya sunirmalāḥ
||10||लिंगार्चनरता नित्यमनन्येंद्रियमानसाः ॥
सदैव वारुणाग्नेय स्नानद्वय सुनिर्मलाः
kaṃdamūlaphalāhārāḥ paratattvārpitekṣaṇāḥ ||
satyavaṃto jitakrodhā nirmohā niṣparigrahāḥ
||11||कंदमूलफलाहाराः परतत्त्वार्पितेक्षणाः ॥
सत्यवंतो जितक्रोधा निर्मोहा निष्परिग्रहाः
nirīhā niṣprapaṃcāśca nirātaṃkā nirāmayāḥ ||
nirbhagā nirupāyāśca niḥsaṃgā nirmalāśayāḥ
||12||निरीहा निष्प्रपंचाश्च निरातंका निरामयाः ॥
निर्भगा निरुपायाश्च निःसंगा निर्मलाशयाः
nistīrṇodagrasaṃsārā nirvikalpā nirenasaḥ ||
nirdvaṃdvā niścitārthāśca nirahaṃkāravṛttayaḥ
||13||निस्तीर्णोदग्रसंसारा निर्विकल्पा निरेनसः ॥
निर्द्वंद्वा निश्चितार्थाश्च निरहंकारवृत्तयः
sadaiva me mahāprītā matputrā matsvarūpiṇaḥ ||
ete pūjyā namasyāśca madbuddhyāmatparāyaṇaiḥ
||14||सदैव मे महाप्रीता मत्पुत्रा मत्स्वरूपिणः ॥
एते पूज्या नमस्याश्च मद्बुद्ध्यामत्परायणैः
arciteṣveṣvahaṃ prīto bhaviṣyāmi na saṃśayaḥ ||
asminvaiśveśvare kṣetre saṃbhojyāḥ śivayoginaḥ
||15||अर्चितेष्वेष्वहं प्रीतो भविष्यामि न संशयः ॥
अस्मिन्वैश्वेश्वरे क्षेत्रे संभोज्याः शिवयोगिनः
koṭibhojyaphalaṃ samyagekaika parisaṃkhyayā ||
ayaṃ viśveśvaraḥ sākṣātsthāvarātmā jagatprabhuḥ
||16||कोटिभोज्यफलं सम्यगेकैक परिसंख्यया ॥
अयं विश्वेश्वरः साक्षात्स्थावरात्मा जगत्प्रभुः
sarveṣāṃ sarvasiddhīnāṃ kartā bhaktijuṣāmiha ||
ahaṃ kadāciddṛśyaḥ syāmadṛśyaḥ syāṃ kadācana
||17||सर्वेषां सर्वसिद्धीनां कर्ता भक्तिजुषामिह ॥
अहं कदाचिद्दृश्यः स्यामदृश्यः स्यां कदाचन
ānaṃdakānane cātra svairaṃ tiṣṭhāmi devatāḥ ||
anugrahāya sarveṣāṃ bhaktānāmiha sarvadā
||18||आनंदकानने चात्र स्वैरं तिष्ठामि देवताः ॥
अनुग्रहाय सर्वेषां भक्तानामिह सर्वदा
sthāsyāmi liṃgarūpeṇa ciṃtitārthaphalapradaḥ ||
svayaṃbhūnyasvayaṃbhūni yāni liṃgāni sarvataḥ ||
tāni sarvāṇi cāyāṃti draṣṭuṃ liṃgamidaṃ sadā
||19||स्थास्यामि लिंगरूपेण चिंतितार्थफलप्रदः ॥
स्वयंभून्यस्वयंभूनि यानि लिंगानि सर्वतः ॥
तानि सर्वाणि चायांति द्रष्टुं लिंगमिदं सदा
ahaṃ sarveṣu liṃgeṣu tiṣṭhmyeva na saṃśayaḥ ||
paraṃ tviyaṃ parāmūrtirmama liṃgasvarūpiṇī
||20||अहं सर्वेषु लिंगेषु तिष्ठा्म्येव न संशयः ॥
परं त्वियं परामूर्तिर्मम लिंगस्वरूपिणी
yena liṃgamidaṃ dṛṣṭaṃ śraddhayā śuddhacakṣuṣā ||
sākṣātkāreṇa tenāhaṃ dṛṣṭa eva divaukasaḥ
||21||येन लिंगमिदं दृष्टं श्रद्धया शुद्धचक्षुषा ॥
साक्षात्कारेण तेनाहं दृष्ट एव दिवौकसः
śravaṇādasya liṃgasya pātakaṃ janmasaṃcitam ||
kṣaṇātkṣayati śṛṇvaṃtu devā ṛṣigaṇaiḥ saha
||22||श्रवणादस्य लिंगस्य पातकं जन्मसंचितम् ॥
क्षणात्क्षयति शृण्वंतु देवा ऋषिगणैः सह
smaraṇādasya liṃgasya pāpaṃ janmadvayārjitam ||
avaśyaṃ naśyati kṣipraṃ mama vākyānna saṃśayaḥ
||23||स्मरणादस्य लिंगस्य पापं जन्मद्वयार्जितम् ॥
अवश्यं नश्यति क्षिप्रं मम वाक्यान्न संशयः
etalliṃgaṃ samuddiśya gṛhānniṣkramaṇakṣaṇāt ||
vilīyate mahāpāpamapi janmatrayārjitam
||24||एतल्लिंगं समुद्दिश्य गृहान्निष्क्रमणक्षणात् ॥
विलीयते महापापमपि जन्मत्रयार्जितम्
darśanādasya liṃgasya hayamedhaśatodbhavam ||
puṇyaṃ labheta niyataṃ mamānugrahatomarāḥ
||25||दर्शनादस्य लिंगस्य हयमेधशतोद्भवम् ॥
पुण्यं लभेत नियतं ममानुग्रहतोमराः
svayaṃbhuvosya liṃgasya mama viśveśituḥ surāḥ ||
rājasūyasahasrasya phalaṃ syātsparśamātrataḥ
||26||स्वयंभुवोस्य लिंगस्य मम विश्वेशितुः सुराः ॥
राजसूयसहस्रस्य फलं स्यात्स्पर्शमात्रतः
puṣpamātra pradānācca culukodakapūvarkam ||
śatasauvarṇikaṃ puṇyaṃ labhate bhaktiyogataḥ
||27||पुष्पमात्र प्रदानाच्च चुलुकोदकपूवर्कम् ॥
शतसौवर्णिकं पुण्यं लभते भक्तियोगतः
pūjāmātraṃ vidhāyāsya liṃgarājasya bhaktitaḥ ||
sahasrahemakamalapūjāphalamavāpyate
||28||पूजामात्रं विधायास्य लिंगराजस्य भक्तितः ॥
सहस्रहेमकमलपूजाफलमवाप्यते
vidhāya mahatī pūjāṃ paṃcāmṛtapuraḥsarām ||
asya liṃgasya labhate puruṣārthacatuṣṭayam
||29||विधाय महती पूजां पंचामृतपुरःसराम् ॥
अस्य लिंगस्य लभते पुरुषार्थचतुष्टयम्
vastrapūtajalairliṃgaṃ snāpayitvā mamāmarāḥ ||
lakṣāśvamedhajanitaṃ puṇyamāpnoti sattamaḥ
||30||वस्त्रपूतजलैर्लिंगं स्नापयित्वा ममामराः ॥
लक्षाश्वमेधजनितं पुण्यमाप्नोति सत्तमः
sugaṃdhacaṃdanarasairliṃgamālipya bhaktitaḥ ||
ālipyate surastrībhiḥ sugaṃdhairyakṣakardamaiḥ
||31||सुगंधचंदनरसैर्लिंगमालिप्य भक्तितः ॥
आलिप्यते सुरस्त्रीभिः सुगंधैर्यक्षकर्दमैः
sāmoda dhūpadānaiśca divyagaṃdhāśrayo bhavet ||
ghṛtadīpaprabodhaiśca jyotīrūpa vimānagaḥ
||32||सामोद धूपदानैश्च दिव्यगंधाश्रयो भवेत् ॥
घृतदीपप्रबोधैश्च ज्योतीरूप विमानगः
karpūravartidīpena sakṛddattena bhaktitaḥ ||
karpūradehagauraśrīrbhavedbhālavilocanaḥ
||33||कर्पूरवर्तिदीपेन सकृद्दत्तेन भक्तितः ॥
कर्पूरदेहगौरश्रीर्भवेद्भालविलोचनः
dattvā naivedyamātraṃ tu sikthesikthe yugaṃyugam ||
kailāsādrau vaseddhīmānmahābhogasamanvitaḥ
||34||दत्त्वा नैवेद्यमात्रं तु सिक्थेसिक्थे युगंयुगम् ॥
कैलासाद्रौ वसेद्धीमान्महाभोगसमन्वितः
viśveśe paramānnaṃ yo dadyātsājya saśarkaram ||
trailokyaṃ tarpitaṃ tena sadevapitṛmānavam
||35||विश्वेशे परमान्नं यो दद्यात्साज्य सशर्करम् ॥
त्रैलोक्यं तर्पितं तेन सदेवपितृमानवम्
mukhavāsaṃ tu yo dadyāddarpaṇaṃ cārucāmaram ||
ullocaṃ sukhaparyaṃkaṃ tasya puṇyaphalaṃ mahat
||36||मुखवासं तु यो दद्याद्दर्पणं चारुचामरम् ॥
उल्लोचं सुखपर्यंकं तस्य पुण्यफलं महत्
saṃkhyā sāgararatnānāṃ kathaṃcitkartumiṣyate ||
mukhavāsādidānasya kaḥ saṃkhyāmatra kārayet
||37||संख्या सागररत्नानां कथंचित्कर्तुमिष्यते ॥
मुखवासादिदानस्य कः संख्यामत्र कारयेत्
pūjopakaraṇadravyaṃ yo ghaṃṭā gaḍukādikam ||
bhaktyā me bhavane dadyātsa vasedatra meṃtike
||38||पूजोपकरणद्रव्यं यो घंटा गडुकादिकम् ॥
भक्त्या मे भवने दद्यात्स वसेदत्र मेंतिके
yo gītavādyanṛtyānāmekaṃ matprītaye vyadhāt ||
tasyāgrato divārātraṃ bhavettauryatrikaṃ mahat
||39||यो गीतवाद्यनृत्यानामेकं मत्प्रीतये व्यधात् ॥
तस्याग्रतो दिवारात्रं भवेत्तौर्यत्रिकं महत्
citralekhanakarmādi prāsāde me'tra kārayet ||
yaḥ sacitrānmahābhogānbhuṃkte matpurataḥ sthitaḥ
||40||चित्रलेखनकर्मादि प्रासादे मेऽत्र कारयेत् ॥
यः सचित्रान्महाभोगान्भुंक्ते मत्पुरतः स्थितः
sakṛdviśveśvaraṃ natvā madhye janmasudhīrnaraḥ ||
trailokyavaṃditapado jāyate vasudhāpatiḥ
||41||सकृद्विश्वेश्वरं नत्वा मध्ये जन्मसुधीर्नरः ॥
त्रैलोक्यवंदितपदो जायते वसुधापतिः
yastu viśvevaraṃ dṛṣṭvā hyanyatrāpi vipadyate ||
tasya janmāṃtare mokṣo bhavatyeva na saṃśayaḥ
||42||यस्तु विश्वेवरं दृष्ट्वा ह्यन्यत्रापि विपद्यते ॥
तस्य जन्मांतरे मोक्षो भवत्येव न संशयः
viśveśākhyā tu jihvāgre viśvanāthakathāśrutau ||
viśveśaśīlanaṃ citte yasya tasya janiḥ kutaḥ
||43||विश्वेशाख्या तु जिह्वाग्रे विश्वनाथकथाश्रुतौ ॥
विश्वेशशीलनं चित्ते यस्य तस्य जनिः कुतः
liṃgaṃ me viśvanāthasya dṛṣṭvā yaścānumodate ||
sa me gaṇeṣu gaṇyeta mahāpuṇyabalāśritaḥ
||44||लिंगं मे विश्वनाथस्य दृष्ट्वा यश्चानुमोदते ॥
स मे गणेषु गण्येत महापुण्यबलाश्रितः
nityaṃ viśveśa viśveśa viśvanātheti yo japet ||
trisaṃdhyaṃ taṃ sukṛtinaṃ japāmyahamapi dhruvam
||15||नित्यं विश्वेश विश्वेश विश्वनाथेति यो जपेत् ॥
त्रिसंध्यं तं सुकृतिनं जपाम्यहमपि ध्रुवम्
mamāpīdaṃ mahāliṃgaṃ sadā pūjyatamaṃ surāḥ . ||
tasmātsarvaprayatnena pūjyaṃ devarṣi mānavaiḥ
||46||ममापीदं महालिंगं सदा पूज्यतमं सुराः . ॥
तस्मात्सर्वप्रयत्नेन पूज्यं देवर्षि मानवैः
yairna viśveśvaro dṛṣṭo yairna viśveśvaraḥ smṛtaḥ ||
kṛtāṃtadūtaiste dṛṣṭāstaiḥ smṛtā garbhavedanā
||47||यैर्न विश्वेश्वरो दृष्टो यैर्न विश्वेश्वरः स्मृतः ॥
कृतांतदूतैस्ते दृष्टास्तैः स्मृता गर्भवेदना
yairidaṃ praṇataṃ liṃgaṃ praṇatāste surāsuraiḥ ||
yasyai kena praṇāmena dikpālapadamalpakam ||
dikpālapadataḥ pātaḥ pātaḥ śivanaternahi
||48||यैरिदं प्रणतं लिंगं प्रणतास्ते सुरासुरैः ॥
यस्यै केन प्रणामेन दिक्पालपदमल्पकम् ॥
दिक्पालपदतः पातः पातः शिवनतेर्नहि
śṛṇvaṃtu devarṣigaṇāḥ samastāstathyaṃ bruve tacca paropakṛtyai ||
na bhūrbhuvaḥ svargamaharjanāṃtarviśveśatulyaṃ kvacidasti liṃgam
||49||शृण्वंतु देवर्षिगणाः समस्तास्तथ्यं ब्रुवे तच्च परोपकृत्यै ॥
न भूर्भुवः स्वर्गमहर्जनांतर्विश्वेशतुल्यं क्वचिदस्ति लिंगम्
na satyaloke na tapasyaho surā vaikuṃṭhakailāsarasātaleṣu ||
tīrthaṃ kvacidvai maṇikarṇikāsamaṃ liṃgaṃ ca viśveśvaratulyamanyataḥ
||50||न सत्यलोके न तपस्यहो सुरा वैकुंठकैलासरसातलेषु ॥
तीर्थं क्वचिद्वै मणिकर्णिकासमं लिंगं च विश्वेश्वरतुल्यमन्यतः
na viśvanāthasya samaṃ hi liṃgaṃ na tīrthamanyanmaṇikarṇikātaḥ ||
tapovanaṃ kutracidasti nānyacchubhaṃ mamānaṃdavanena tulyam
||51||न विश्वनाथस्य समं हि लिंगं न तीर्थमन्यन्मणिकर्णिकातः ॥
तपोवनं कुत्रचिदस्ति नान्यच्छुभं ममानंदवनेन तुल्यम्
vārāṇasī tīrthamayī samastā yasyāstunāmāpi hi tīrthatīrtham ||
tatrāpi kācinmama saukhyabhūmirmahāpavitrā maṇikarṇikāsau
||52||वाराणसी तीर्थमयी समस्ता यस्यास्तुनामापि हि तीर्थतीर्थम् ॥
तत्रापि काचिन्मम सौख्यभूमिर्महापवित्रा मणिकर्णिकासौ
sthānādamuṣmānmamarājasaudhātprācyāṃ manāgīśasamāśritāyām ||
savyepasavye ca karāḥ krameṇa śatatrayī yāpi śatadvayī ca
||53||स्थानादमुष्मान्ममराजसौधात्प्राच्यां मनागीशसमाश्रितायाम् ॥
सव्येपसव्ये च कराः क्रमेण शतत्रयी यापि शतद्वयी च
hastāḥ śataṃ paṃca surāpagāyāmudīcyavācyormaṇikarṇikeyam ||
sārastrilokyāḥ parakośabhūmiryaiḥ sevitā te mama hṛcchayā hi
||54||हस्ताः शतं पंच सुरापगायामुदीच्यवाच्योर्मणिकर्णिकेयम् ॥
सारस्त्रिलोक्याः परकोशभूमिर्यैः सेविता ते मम हृच्छया हि
asminmamānaṃdavane yadetalliṃgaṃ sudhādhāma sudhāmadhāma ||
āsapta pātālatalātsvayaṃbhu samutthitaṃ bhaktakṛpāvaśena
||55||अस्मिन्ममानंदवने यदेतल्लिंगं सुधाधाम सुधामधाम ॥
आसप्त पातालतलात्स्वयंभु समुत्थितं भक्तकृपावशेन
yesmiñjanāḥ kṛtrimabhāvabuddhyā liṃgaṃ bhajiṣyaṃti ca hetuvādaiḥ ||
teṣāṃ hi daṃḍaḥ para eṣa eva nagarbhavāsādviramaṃti te dhruvam
||56||येस्मिञ्जनाः कृत्रिमभावबुद्ध्या लिंगं भजिष्यंति च हेतुवादैः ॥
तेषां हि दंडः पर एष एव नगर्भवासाद्विरमंति ते ध्रुवम्
yadyaddhitaṃ svasya sadaiva tattalliṃgetra deyaṃ mama bhaktimadbhiḥ ||
ihāpyamutrāpi na tasya saṃkṣayo yatheha pāpasya kṛtasya pāpibhiḥ
||57||यद्यद्धितं स्वस्य सदैव तत्तल्लिंगेत्र देयं मम भक्तिमद्भिः ॥
इहाप्यमुत्रापि न तस्य संक्षयो यथेह पापस्य कृतस्य पापिभिः
dūrasthitairapyadhibuddhibhiryairliṃgaṃ samārādhi mamedamatra ||
mayaiva dattaiḥ śubhavastujātairniḥśreyasaḥ śrīrvasaṃ(?)yetsatastān
||58||दूरस्थितैरप्यधिबुद्धिभिर्यैर्लिंगं समाराधि ममेदमत्र ॥
मयैव दत्तैः शुभवस्तुजातैर्निःश्रेयसः श्रीर्वसं(?)येत्सतस्तान्
śṛṇuṣva viṣṇo śṛṇu sṛṣṭikartaḥ śṛṇvaṃtu devarṣigaṇāḥ samastāḥ ||
idaṃ hi liṃgaṃ parasiddhidaṃ satāṃ bhedo manāgatra na matsakāśataḥ
||59||शृणुष्व विष्णो शृणु सृष्टिकर्तः शृण्वंतु देवर्षिगणाः समस्ताः ॥
इदं हि लिंगं परसिद्धिदं सतां भेदो मनागत्र न मत्सकाशतः
asminhi liṃge'khilasiddhisādhane samarpitaṃ yaiḥ sukṛtārjitaṃ vasu ||
tebhyotimātrākhilasaukhyasādhanaṃ dadāmi nirvāṇapadaṃ sunirbhayam
||60||अस्मिन्हि लिंगेऽखिलसिद्धिसाधने समर्पितं यैः सुकृतार्जितं वसु ॥
तेभ्योतिमात्राखिलसौख्यसाधनं ददामि निर्वाणपदं सुनिर्भयम्
utkṣipya bāhuṃ tvasakṛdbravīmi trayīmaye'smiṃstrayameva sāram ||
viśveśa liṃgaṃ maṇikarṇikāṃbu kāśīpurī satyamidaṃ trisatyam
||61||उत्क्षिप्य बाहुं त्वसकृद्ब्रवीमि त्रयीमयेऽस्मिंस्त्रयमेव सारम् ॥
विश्वेश लिंगं मणिकर्णिकांबु काशीपुरी सत्यमिदं त्रिसत्यम्
utthāya devotha sa śaktirīśastasminhi liṃge kṛtacārupūjaḥ ||
yayau layaṃ te ca surā jayeti jayeti coktvā nunuvustamīśam
||62||उत्थाय देवोथ स शक्तिरीशस्तस्मिन्हि लिंगे कृतचारुपूजः ॥
ययौ लयं ते च सुरा जयेति जयेति चोक्त्वा नुनुवुस्तमीशम्
skaṃda uvāca
kṣetrasya maitrāvaruṇe vimuktasya mahāmate ||
prabhāvasyaikadeśoyaṃ kathitaḥ kalmaṣāpahaḥ
||63||क्षेत्रस्य मैत्रावरुणे विमुक्तस्य महामते ॥
प्रभावस्यैकदेशोयं कथितः कल्मषापहः
tavāgre tu yathābuddhi kāśīviśleṣatāpi naḥ ||
acireṇaiva kālena kāśīṃ prāpsyasyanuttamām
||64||तवाग्रे तु यथाबुद्धि काशीविश्लेषतापि नः ॥
अचिरेणैव कालेन काशीं प्राप्स्यस्यनुत्तमाम्
astācalasya śikharaṃ prāptavāneṣa bhānumān ||
tavāpi hi mamāpyeṣa maunasya samayo'bhavat
||65||अस्ताचलस्य शिखरं प्राप्तवानेष भानुमान् ॥
तवापि हि ममाप्येष मौनस्य समयोऽभवत्
vyāsa uvāca
śrutveti sa muniḥ sūta saṃdhyopāstyai vinirgataḥ ||
praṇamyau meyamasakṛllopāmudrā samanvitaḥ
||66||श्रुत्वेति स मुनिः सूत संध्योपास्त्यै विनिर्गतः ॥
प्रणम्यौ मेयमसकृल्लोपामुद्रा समन्वितः
rahasyaṃ parivijñāya kṣetrasya śaśimaulinaḥ ||
agastyo niścitamanāḥ śivadhyānaparobhavat
||67||रहस्यं परिविज्ञाय क्षेत्रस्य शशिमौलिनः ॥
अगस्त्यो निश्चितमनाः शिवध्यानपरोभवत्
ānaṃdakānanasyeha mahimānaṃ mahattaram ||
kotra varṇayituṃ śaktaḥ sūta varṣaśatairapi
||68||आनंदकाननस्येह महिमानं महत्तरम् ॥
कोत्र वर्णयितुं शक्तः सूत वर्षशतैरपि
yathā devyai samākhyāyi śivena paramātmanā ||
tathā skaṃdena kathitaṃ māhātmyaṃ kuṃbhasaṃbhave
||69||यथा देव्यै समाख्यायि शिवेन परमात्मना ॥
तथा स्कंदेन कथितं माहात्म्यं कुंभसंभवे
tavāgre ca samākhyātaṃ śukādīnāṃ ca sattama ||
idānīṃ praṣṭukāmosi kiṃ tatpṛccha vadāmi te
||70||तवाग्रे च समाख्यातं शुकादीनां च सत्तम ॥
इदानीं प्रष्टुकामोसि किं तत्पृच्छ वदामि ते
śrutvādhyāyamimaṃ puṇyaṃ sarvakalmaṣanāśanam ||
samastaciṃtitaphalapradaṃ martyo bhavetkṛtī
||71||श्रुत्वाध्यायमिमं पुण्यं सर्वकल्मषनाशनम् ॥
समस्तचिंतितफलप्रदं मर्त्यो भवेत्कृती
iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe viśveśvaraliṃgamahimākhyo nāma navanavatitamo'dhyāyaḥ || 99 ||