ānaṃdabāṣpasalilaruddhakaṃṭhaṃ vilokya tam
skaṃda uvāca
ānaṃdabāṣpasalilaruddhakaṃṭhaṃ vilokya tam ||
mṛḍaḥ pasparśa pāṇibhyāṃ saudhābhyāṃ tu sudhāṃbudhiḥ
||1||आनंदबाष्पसलिलरुद्धकंठं विलोक्य तम् ॥
मृडः पस्पर्श पाणिभ्यां सौधाभ्यां तु सुधांबुधिः
atha tatsparśasaukhyena dharmarājo mahātapāḥ ||
punaraṃkurayāmāsa tapogni jvalitāṃ tanum
||2||अथ तत्स्पर्शसौख्येन धर्मराजो महातपाः ॥
पुनरंकुरयामास तपोग्नि ज्वलितां तनुम्
tataḥ provāca sa brādhnirdeva devamumāpatim ||
prasannavadanaṃ śāṃtaṃ śāṃtapāriṣadāvṛtam
||3||ततः प्रोवाच स ब्राध्निर्देव देवमुमापतिम् ॥
प्रसन्नवदनं शांतं शांतपारिषदावृतम्
prasannosi yadīśāna sarvajña karuṇānidhe ||
kimanyena vareṇātra yattvaṃ sākṣātkṛto mayā
||4||प्रसन्नोसि यदीशान सर्वज्ञ करुणानिधे ॥
किमन्येन वरेणात्र यत्त्वं साक्षात्कृतो मया
yaṃ na vedā viduḥ samyaṅna ca tau vedapūruṣau ||
tatopi varayogyosmi tannātha prārthayāmyaham
||5||यं न वेदा विदुः सम्यङ्न च तौ वेदपूरुषौ ॥
ततोपि वरयोग्योस्मि तन्नाथ प्रार्थयाम्यहम्
śrīkaṃṭhāṃḍaja ḍiṃbhānāmamīṣāṃ madhurabruvām ||
mattapaścirasākṣīṇāṃ matpuraḥ prāptajanmanām
||6||श्रीकंठांडज डिंभानाममीषां मधुरब्रुवाम् ॥
मत्तपश्चिरसाक्षीणां मत्पुरः प्राप्तजन्मनाम्
pitṛbhyāṃ parihīnānāmitihāsa kathāvidām ||
tyaktāhāravihārāṇāṃ kīrāṇāṃ varado bhava
||7||पितृभ्यां परिहीनानामितिहास कथाविदाम् ॥
त्यक्ताहारविहाराणां कीराणां वरदो भव
etatprasūtisamaye āmayena prapīḍitā ||
śukī paṃcatvamāpannā śukaḥ śyenena bhakṣitaḥ
||8||एतत्प्रसूतिसमये आमयेन प्रपीडिता ॥
शुकी पंचत्वमापन्ना शुकः श्येनेन भक्षितः
rakṣitānāmanāthānāṃ sadā manmukhadarśinām ||
anāthanātha bhavatā hyāyuḥśeṣasvarūpiṇā
||9||रक्षितानामनाथानां सदा मन्मुखदर्शिनाम् ॥
अनाथनाथ भवता ह्यायुःशेषस्वरूपिणा
iti dharmavacaḥ śrutvā paropakṛtinirmalam ||
tānāhūya mune śaṃbhurvinayāvanatānanān ||
uvāca dharmeti prītaḥ śukaśāvānidaṃ vacaḥ ||
ayi pattrarathā brūta sādhavo dharmasaṃgatāḥ
||11||इति धर्मवचः श्रुत्वा परोपकृतिनिर्मलम् ॥
तानाहूय मुने शंभुर्विनयावनताननान् ॥
उवाच धर्मेति प्रीतः शुकशावानिदं वचः ॥
अयि पत्त्ररथा ब्रूत साधवो धर्मसंगताः
ko varo bhavatā deyo dharmeśa paricāriṇām ||
sādhusaṃsargasaṃkṣīṇa janmāṃtaramahainasām
||12||को वरो भवता देयो धर्मेश परिचारिणाम् ॥
साधुसंसर्गसंक्षीण जन्मांतरमहैनसाम्
iti śrutvā maheśasya vacanaṃ te patattriṇaḥ ||
procuḥ praṇamya deveśaṃ namaste bhavanāśana
||13||इति श्रुत्वा महेशस्य वचनं ते पतत्त्रिणः ॥
प्रोचुः प्रणम्य देवेशं नमस्ते भवनाशन
pakṣiṇa ūcuḥ
anāthanātha sarvajña ko varo naḥ samīhitaḥ ||
itopi tryakṣa yatsākṣāttiryaktvepi samīkṣitāḥ
||14||अनाथनाथ सर्वज्ञ को वरो नः समीहितः ॥
इतोपि त्र्यक्ष यत्साक्षात्तिर्यक्त्वेपि समीक्षिताः
lābhāḥ saṃtūdyamavatāṃ girīśeha paraḥ śatāḥ ||
paraṃ paroyaṃ lābhotra yattvaṃ dṛggocarī bhaveḥ
||15||लाभाः संतूद्यमवतां गिरीशेह परः शताः ॥
परं परोयं लाभोत्र यत्त्वं दृग्गोचरी भवेः
yadetaddṛśyate nātha tatsarvaṃ kṣaṇabhaṃguram ||
abhaṃguro bhavānekastvatsaparyāpyabhaṃgurā
||16||यदेतद्दृश्यते नाथ तत्सर्वं क्षणभंगुरम् ॥
अभंगुरो भवानेकस्त्वत्सपर्याप्यभंगुरा
vicitrajanmakoṭīnāṃ smṛtirnotra parisphuret ||
etattapasviracitaliṃgapūjā vilokanāt
||17||विचित्रजन्मकोटीनां स्मृतिर्नोत्र परिस्फुरेत् ॥
एतत्तपस्विरचितलिंगपूजा विलोकनात्
devayonirapi prāptā ciramasmābhirīśitaḥ ||
divyāṃganā sahasrāṇi tatra bhuktvā svalīlayā
||18||देवयोनिरपि प्राप्ता चिरमस्माभिरीशितः ॥
दिव्यांगना सहस्राणि तत्र भुक्त्वा स्वलीलया
āsurī dānavī nāgī nairṛtī cāpi kainnarī ||
vidyādharī ca gāṃdharvī yonirasmābhirarjitā
||19||आसुरी दानवी नागी नैर्ऋती चापि कैन्नरी ॥
विद्याधरी च गांधर्वी योनिरस्माभिरर्जिता
naratve bhūpatitvaṃ ca pariprāptamanekaśaḥ ||
jale jalacaratvaṃ ca sthale ca sthalacāritā
||20||नरत्वे भूपतित्वं च परिप्राप्तमनेकशः ॥
जले जलचरत्वं च स्थले च स्थलचारिता
vane vanaukaso jātā grāmeṣu grāmavāsinaḥ ||
dātāro yācitāraśca rakṣitāraśca ghātukāḥ
||21||वने वनौकसो जाता ग्रामेषु ग्रामवासिनः ॥
दातारो याचितारश्च रक्षितारश्च घातुकाः
sukhinopi vayaṃ jātā duḥkhino vayamāsma ca ||
jetāraśca vayaṃ jātāḥ parājetāra eva ca
||22||सुखिनोपि वयं जाता दुःखिनो वयमास्म च ॥
जेतारश्च वयं जाताः पराजेतार एव च
adhītinopi mūrkhāśca svāminaḥ sevakā api ||
caturṣu bhūtagrāmeṣu uttamādhamamadhyamāḥ
||23||अधीतिनोपि मूर्खाश्च स्वामिनः सेवका अपि ॥
चतुर्षु भूतग्रामेषु उत्तमाधममध्यमाः
abhūma bhūriśaḥ śaṃbho na kvāpi sthairyamāgatāḥ ||
itoyonestato yonau tato yonestatonyataḥ
||24||अभूम भूरिशः शंभो न क्वापि स्थैर्यमागताः ॥
इतोयोनेस्ततो योनौ ततो योनेस्ततोन्यतः
pinākinkvāpi na prāpi sukhaleśo manāgapi ||
idānīṃ puṇyasaṃbhārairdharmeśvaravilokanāt
||25||पिनाकिन्क्वापि न प्रापि सुखलेशो मनागपि ॥
इदानीं पुण्यसंभारैर्धर्मेश्वरविलोकनात्
tāpaneḥsutapo vahnijvālāprajvalitainasaḥ ||
saṃvīkṣya tryakṣa sākṣāttvāṃ kṛtakṛtyā babhūvima
||26||तापनेःसुतपो वह्निज्वालाप्रज्वलितैनसः ॥
संवीक्ष्य त्र्यक्ष साक्षात्त्वां कृतकृत्या बभूविम
tathāpi cedvaro deyastiryakṣvasmāsu dhūrjaṭe ||
kṛpaṇeṣvapi śocyeṣu jñānaṃ sarvajña dehi tat
||27||तथापि चेद्वरो देयस्तिर्यक्ष्वस्मासु धूर्जटे ॥
कृपणेष्वपि शोच्येषु ज्ञानं सर्वज्ञ देहि तत्
yena jñānena muktāḥ smo'muṣmātsaṃsārabaṃdhanāt ||
yaṃtritāḥ prākṛtaiḥ pāśairadurbhedyaiśca mādṛśaiḥ
||28||येन ज्ञानेन मुक्ताः स्मोऽमुष्मात्संसारबंधनात् ॥
यंत्रिताः प्राकृतैः पाशैरदुर्भेद्यैश्च मादृशैः
aiṃdraṃ padaṃ na vāṃchāmo na cāṃdraṃ nānyadeva hi ||
vāñchāmaḥ kevalaṃ mṛtyuṃ kāśyāṃ śaṃbho'punarbhavam
||29||ऐंद्रं पदं न वांछामो न चांद्रं नान्यदेव हि ॥
वाञ्छामः केवलं मृत्युं काश्यां शंभोऽपुनर्भवम्
tvatsānnidhyādvijānīmaḥ sarvajña sakalaṃ vayam ||
yathā caṃdanasaṃsargātsarve surabhayo drumāḥ
||30||त्वत्सान्निध्याद्विजानीमः सर्वज्ञ सकलं वयम् ॥
यथा चंदनसंसर्गात्सर्वे सुरभयो द्रुमाः
etadeva paraṃ jñānaṃ saṃsārocchittikāraṇam ||
vapurvisarjanaṃ kāle yattavānaṃdakānane
||31||एतदेव परं ज्ञानं संसारोच्छित्तिकारणम् ॥
वपुर्विसर्जनं काले यत्तवानंदकानने
nirmathya viṣvagvāgjālaṃ sārabhūtamidaṃ param ||
brahmaṇodīritaṃ pūrvaṃ kāśyāṃ muktistanutyajām
||32||निर्मथ्य विष्वग्वाग्जालं सारभूतमिदं परम् ॥
ब्रह्मणोदीरितं पूर्वं काश्यां मुक्तिस्तनुत्यजाम्
yadvācyaṃ bahubhirgraṃthaistadaṣṭābhirihākṣaraiḥ ||
hariṇoktaṃ ravipuraḥ kaivalyaṃ kāśisaṃsthitau
||33||यद्वाच्यं बहुभिर्ग्रंथैस्तदष्टाभिरिहाक्षरैः ॥
हरिणोक्तं रविपुरः कैवल्यं काशिसंस्थितौ
yājñavalkyo munivaraḥ proktavānmunisaṃsadi ||
raveradhītya nigamānkāśyāmaṃte paraṃ padam
||34||याज्ञवल्क्यो मुनिवरः प्रोक्तवान्मुनिसंसदि ॥
रवेरधीत्य निगमान्काश्यामंते परं पदम्
svāmināpi jagaddhātrī purato maṃdarācale ||
idameva purā proktaṃ kāśīnirvāṇajanmabhūḥ
||35||स्वामिनापि जगद्धात्री पुरतो मंदराचले ॥
इदमेव पुरा प्रोक्तं काशीनिर्वाणजन्मभूः
kṛṣṇadvaipāyanopyevaṃ śaṃbho vakṣyati nānyathā ||
yatraviśveśvaraḥ sākṣānmuktistatra padepade
||36||कृष्णद्वैपायनोप्येवं शंभो वक्ष्यति नान्यथा ॥
यत्रविश्वेश्वरः साक्षान्मुक्तिस्तत्र पदेपदे
vadaṃtyanyepi munayastīrthasaṃnyāsakāriṇaḥ ||
ciraṃtanā lomaśādyāḥ kāśikā muktikāśikā
||37||वदंत्यन्येपि मुनयस्तीर्थसंन्यासकारिणः ॥
चिरंतना लोमशाद्याः काशिका मुक्तिकाशिका
vayamapyevaṃ jānīmo yatra svargataraṃgiṇī ||
ānaṃdakānane śaṃrbhomokṣastatraiva niścitam
||38||वयमप्येवं जानीमो यत्र स्वर्गतरंगिणी ॥
आनंदकानने शंर्भोमोक्षस्तत्रैव निश्चितम्
bhūtaṃ bhāvi bhaviṣyaṃ yatsvarge martye rasātale ||
tatsarvameva jānīmo dharmeśānugrahātparāt
||39||भूतं भावि भविष्यं यत्स्वर्गे मर्त्ये रसातले ॥
तत्सर्वमेव जानीमो धर्मेशानुग्रहात्परात्
ato hiraṇyagarbhoktaṃ hariproktaṃ munīritam ||
bhavatoktaṃ ca nikhilaṃ śaṃbho jānīmahe vayam
||40||अतो हिरण्यगर्भोक्तं हरिप्रोक्तं मुनीरितम् ॥
भवतोक्तं च निखिलं शंभो जानीमहे वयम्
karāmalakavatsarvametadbrahmāṃḍagolakam ||
asmadvāggocare'styeva dharmapīṭhaniṣevaṇāt
||41||करामलकवत्सर्वमेतद्ब्रह्मांडगोलकम् ॥
अस्मद्वाग्गोचरेऽस्त्येव धर्मपीठनिषेवणात्
dharmarājasya tapasā tiryañcopi vayaṃ vibho ||
jātāḥ sma nirvikalpaṃ hi sarvajñānasya bhājanam
||42||धर्मराजस्य तपसा तिर्यञ्चोपि वयं विभो ॥
जाताः स्म निर्विकल्पं हि सर्वज्ञानस्य भाजनम्
madhuraṃ mṛdulaṃ satyaṃ svapramāṇaṃ susaṃskṛtam ||
hitaṃ mitaṃ sadṛṣṭāṃtaṃ śrutvā pakṣisubhāṣitam
||43||मधुरं मृदुलं सत्यं स्वप्रमाणं सुसंस्कृतम् ॥
हितं मितं सदृष्टांतं श्रुत्वा पक्षिसुभाषितम्
devotivismayāpanno 'varṇayatpīṭhagauravam ||
trailokyanagare cātra kāśīrājagṛhaṃ mama
||44||देवोतिविस्मयापन्नो ऽवर्णयत्पीठगौरवम् ॥
त्रैलोक्यनगरे चात्र काशीराजगृहं मम
tatrāpi bhogabhavanamanarghyamaṇinirmitam ||
mokṣalakṣmīvilāsākhyaḥ prāsādo meti śarmabhūḥ
||45||तत्रापि भोगभवनमनर्घ्यमणिनिर्मितम् ॥
मोक्षलक्ष्मीविलासाख्यः प्रासादो मेति शर्मभूः
patattriṇo pimucyaṃte yaṃ kurvāṇāḥ pradakṣiṇam ||
svecchayā vicaraṃtaḥ khe khecarā api devatāḥ
||46||पतत्त्रिणो पिमुच्यंते यं कुर्वाणाः प्रदक्षिणम् ॥
स्वेच्छया विचरंतः खे खेचरा अपि देवताः
mokṣalakṣmīvilāsākhya prāsādasya vilokanāt ||
śarīrāddūrato yāti brahmahatyāpi nānyathā
||47||मोक्षलक्ष्मीविलासाख्य प्रासादस्य विलोकनात् ॥
शरीराद्दूरतो याति ब्रह्महत्यापि नान्यथा
mokṣalakṣmīvilāsasya kalaśo yairnirīkṣataḥ ||
nidhānakalaśāstāṃstu na muṃcaṃti padepade
||48||मोक्षलक्ष्मीविलासस्य कलशो यैर्निरीक्षतः ॥
निधानकलशास्तांस्तु न मुंचंति पदेपदे
dūratopi patākāpi mama prāsādamūrdhagā ||
netrātithī kṛtā yaistu nityaṃ te'tithayo mama
||49||दूरतोपि पताकापि मम प्रासादमूर्धगा ॥
नेत्रातिथी कृता यैस्तु नित्यं तेऽतिथयो मम
bhūmiṃ bhittvā svayaṃ jātastatprāsādamiṣeṇa hi ||
ānaṃdākhyasya kaṃdasya kopyeṣa paramoṃkuraḥ
||50||भूमिं भित्त्वा स्वयं जातस्तत्प्रासादमिषेण हि ॥
आनंदाख्यस्य कंदस्य कोप्येष परमोंकुरः
brahmādisthāvarāṃtāni yatra rūpaṇyanekaśaḥ ||
māmevopāsate nityaṃ citraṃ citragatānyapi
||51||ब्रह्मादिस्थावरांतानि यत्र रूपण्यनेकशः ॥
मामेवोपासते नित्यं चित्रं चित्रगतान्यपि
sasaudho mekhile loke sthānaṃ paramanirvṛteḥ ||
ratiśālā sa me ramyā sa me viśvāsabhūmikā
||52||ससौधो मेखिले लोके स्थानं परमनिर्वृतेः ॥
रतिशाला स मे रम्या स मे विश्वासभूमिका
mama sarvagatasyāpi prāsādoyaṃ parāspadam ||
paraṃ brahma yadāmnātaṃ paramopaniṣadgirā ||
amūrtaṃ tadahaṃ mūrto bhūyāṃ bhaktakṛpāvaśāt
||53||मम सर्वगतस्यापि प्रासादोयं परास्पदम् ॥
परं ब्रह्म यदाम्नातं परमोपनिषद्गिरा ॥
अमूर्तं तदहं मूर्तो भूयां भक्तकृपावशात्
naiḥśreyasyāḥ śriyo dhāma tadyāmyāṃ maṃḍaposti me ||
tatrāhaṃ satataṃ tiṣṭhe tatsadomaṃḍapaṃ mama
||54||नैःश्रेयस्याः श्रियो धाम तद्याम्यां मंडपोस्ति मे ॥
तत्राहं सततं तिष्ठे तत्सदोमंडपं मम
nimeṣārdhapramāṇaṃ ca kālaṃ tiṣṭhati niścalaḥ ||
tatra yastena vai yogaḥ samabhyastaḥ samāḥ śatam
||55||निमेषार्धप्रमाणं च कालं तिष्ठति निश्चलः ॥
तत्र यस्तेन वै योगः समभ्यस्तः समाः शतम्
nirvāṇamaṃḍapaṃ nāma tatsthānaṃ jagatītale ||
tatrarcaṃ saṃjapannekāṃ labhetsarvaśruteḥ phalam
||56||निर्वाणमंडपं नाम तत्स्थानं जगतीतले ॥
तत्रर्चं संजपन्नेकां लभेत्सर्वश्रुतेः फलम्
prāṇāyāmaṃ tu yaḥ kuryādapyekaṃ muktimaṃḍape ||
tenāṣṭāṃgaḥ samabhyasto yogo'nyatrāyutaṃ samāḥ
||57||प्राणायामं तु यः कुर्यादप्येकं मुक्तिमंडपे ॥
तेनाष्टांगः समभ्यस्तो योगोऽन्यत्रायुतं समाः
nirvāṇamaṃḍape yastu japedekaṃ ṣaḍakṣaram ||
koṭirudreṇa japtena yatphalaṃ tasya tadbhavet
||58||निर्वाणमंडपे यस्तु जपेदेकं षडक्षरम् ॥
कोटिरुद्रेण जप्तेन यत्फलं तस्य तद्भवेत्
śucirgaṃgāṃbhasi snāto yo japecchatarudriyam ||
nirvāṇamaṃḍape jñeyaḥ sa rudro dvijaveṣabhṛt
||59||शुचिर्गंगांभसि स्नातो यो जपेच्छतरुद्रियम् ॥
निर्वाणमंडपे ज्ञेयः स रुद्रो द्विजवेषभृत्
brahmayajñasakṛtkṛtvā mama dakṣiṇamaṃḍape ||
brahmalokamavāpyātha paraṃ brahmādhigacchati
||60||ब्रह्मयज्ञसकृत्कृत्वा मम दक्षिणमंडपे ॥
ब्रह्मलोकमवाप्याथ परं ब्रह्माधिगच्छति
dharmaśāstraṃ purāṇāni setihāsāni tatra yaḥ ||
paṭhennirabhilāṣuḥ sansa vasenmama veśmani
||61||धर्मशास्त्रं पुराणानि सेतिहासानि तत्र यः ॥
पठेन्निरभिलाषुः सन्स वसेन्मम वेश्मनि
tiṣṭhediṃdriyacāpalyaṃ yo nivārya kṣaṇaṃ kṛtī ||
nirvāṇamaṃḍapenyatra tena taptaṃ mahattapaḥ
||62||तिष्ठेदिंद्रियचापल्यं यो निवार्य क्षणं कृती ॥
निर्वाणमंडपेन्यत्र तेन तप्तं महत्तपः
vāyubhakṣaṇatonyatra yatpuṇyaṃ śaradāṃ śatam ||
tatpuṇyaṃ ghaṭikārdhena maunaṃ dakṣiṇamaṃḍape
||63||वायुभक्षणतोन्यत्र यत्पुण्यं शरदां शतम् ॥
तत्पुण्यं घटिकार्धेन मौनं दक्षिणमंडपे
mitaṃ kṛṣṇalakenāpi yodadyānmuktimaṃḍape ||
svarṇaṃ sauvarṇayānena sa tu saṃcarate divi
||64||मितं कृष्णलकेनापि योदद्यान्मुक्तिमंडपे ॥
स्वर्णं सौवर्णयानेन स तु संचरते दिवि
tatraikaṃ jāgaraṃ kuryādyasminkasmindinepi yaḥ ||
upoṣitorcayelliṃgaṃ sa sarvavratapuṇyabhāk
||65||तत्रैकं जागरं कुर्याद्यस्मिन्कस्मिन्दिनेपि यः ॥
उपोषितोर्चयेल्लिंगं स सर्वव्रतपुण्यभाक्
tatra dattvā mahādānaṃ tatra kṛtvā mahāvratam ||
tatrādhītyākhilaṃ vedaṃ cyavate na naro divaḥ
||66||तत्र दत्त्वा महादानं तत्र कृत्वा महाव्रतम् ॥
तत्राधीत्याखिलं वेदं च्यवते न नरो दिवः
prayāṇaṃ kurvate yasya prāṇā me muktimaṃḍape ||
samāmanupraviṣṭotra tiṣṭhedyāvadahaṃ khalu
||67||प्रयाणं कुर्वते यस्य प्राणा मे मुक्तिमंडपे ॥
समामनुप्रविष्टोत्र तिष्ठेद्यावदहं खलु
jalakrīḍāṃ sadā kuryāṃ jñānavāpyāṃ sahomayā ||
yadaṃbupānamātreṇa jñānaṃ jāyeta nimarlam
||68||जलक्रीडां सदा कुर्यां ज्ञानवाप्यां सहोमया ॥
यदंबुपानमात्रेण ज्ञानं जायेत निमर्लम्
tajjalakrīḍanasthānaṃ mama prītikaraṃ mahat ||
amuṣminrājasadane jāḍyahṛjjalapūritam
||69||तज्जलक्रीडनस्थानं मम प्रीतिकरं महत् ॥
अमुष्मिन्राजसदने जाड्यहृज्जलपूरितम्
tatprāsādapurobhāge mama śṛṃgāramaṃḍapaḥ ||
śrī pīṭhaṃ taddhi vijñeyaṃ niḥśrīkaśrīsamarpaṇam
||70||तत्प्रासादपुरोभागे मम शृंगारमंडपः ॥
श्री पीठं तद्धि विज्ञेयं निःश्रीकश्रीसमर्पणम्
madarthaṃ tatra yo dadyāddukūlāni śucīnyaho ||
mālyāni suvicitrāṇi yakṣakardamavaṃti ca
||71||मदर्थं तत्र यो दद्याद्दुकूलानि शुचीन्यहो ॥
माल्यानि सुविचित्राणि यक्षकर्दमवंति च
nānā nepathyavastūni pūjopakaraṇā'nyapi ||
sa śriyālaṃkṛtastiṣṭhedyatra kutrāpi sattamaḥ
||72||नाना नेपथ्यवस्तूनि पूजोपकरणाऽन्यपि ॥
स श्रियालंकृतस्तिष्ठेद्यत्र कुत्रापि सत्तमः
nirvāṇalakṣmīrvṛṇute taṃ nirvāṇapadāptaye ||
yatra kutrāpi nidhanaṃ prāpnuyādapi sa dhruvam
||73||निर्वाणलक्ष्मीर्वृणुते तं निर्वाणपदाप्तये ॥
यत्र कुत्रापि निधनं प्राप्नुयादपि स ध्रुवम्
mokṣalakṣmīvilāsākhya prāsādasyottare mama ||
aiśvaryamaḍapaṃ ramyaṃ tatraiśvaryaṃ dadāmyaham
||74||मोक्षलक्ष्मीविलासाख्य प्रासादस्योत्तरे मम ॥
ऐश्वर्यमडपं रम्यं तत्रैश्वर्यं ददाम्यहम्
matprāsādaiṃdradigbhāge jñānamaṃḍapamasti yat ||
jñānaṃ diśāmi satataṃ tatra māṃ dhyāyatāṃ satām
||75||मत्प्रासादैंद्रदिग्भागे ज्ञानमंडपमस्ति यत् ॥
ज्ञानं दिशामि सततं तत्र मां ध्यायतां सताम्
bhavāni rājasadane mamāsti hi mahānasam ||
yattatropahṛtaṃ puṇyaṃ nirviśāmi mudaiva tat
||76||भवानि राजसदने ममास्ति हि महानसम् ॥
यत्तत्रोपहृतं पुण्यं निर्विशामि मुदैव तत्
viśālākṣyā mahāsaudhe mama viśrāmabhūmikā ||
tatra saṃsṛtikhinnānāṃ viśrāmaṃ śrāṇayāmyaham
||77||विशालाक्ष्या महासौधे मम विश्रामभूमिका ॥
तत्र संसृतिखिन्नानां विश्रामं श्राणयाम्यहम्
niyamasnānatīrthaṃ ca cakrapuṣkariṇī mama ||
tatra snānavatāṃ puṃsāṃ tannairmalyaṃ diśāmyaham
||78||नियमस्नानतीर्थं च चक्रपुष्करिणी मम ॥
तत्र स्नानवतां पुंसां तन्नैर्मल्यं दिशाम्यहम्
yadāhuḥ paramaṃ tattvaṃ yadāhurbrahmasattamam ||
svasaṃvedyaṃ yadāhuśca tattatrāṃte diśāmyaham
||79||यदाहुः परमं तत्त्वं यदाहुर्ब्रह्मसत्तमम् ॥
स्वसंवेद्यं यदाहुश्च तत्तत्रांते दिशाम्यहम्
yadāhustārakaṃ jñānaṃ yadāhuratinirmalam ||
svātmārāmaṃ yadāhuśca tattatrāṃte diśāmyaham
||80||यदाहुस्तारकं ज्ञानं यदाहुरतिनिर्मलम् ॥
स्वात्मारामं यदाहुश्च तत्तत्रांते दिशाम्यहम्
jaganmaṃgalabhūryātra paramā maṇikarṇikā ||
vipāśayāmi tatrāhaṃ karmabhiḥ pāśitānpaśūn
||81||जगन्मंगलभूर्यात्र परमा मणिकर्णिका ॥
विपाशयामि तत्राहं कर्मभिः पाशितान्पशून्
nirvāṇaśrāṇane yatra pātrāpātraṃ na ciṃtaye ||
ānaṃdakānane tanme dānasthānaṃ divāniśam
||82||निर्वाणश्राणने यत्र पात्रापात्रं न चिंतये ॥
आनंदकानने तन्मे दानस्थानं दिवानिशम्
bhavāṃbudhau mahāgādhe prāṇinaḥ parimajjataḥ ||
bhūtvaiva karṇadhāroṃte yatra saṃtārayāmyaham
||83||भवांबुधौ महागाधे प्राणिनः परिमज्जतः ॥
भूत्वैव कर्णधारोंते यत्र संतारयाम्यहम्
saubhāgyabhāgyabhūryā vai vikhyātā maṇikarṇikā ||
dadāmi tasyāṃ sarvasvamagrajāyāṃtyajāya vā
||84||सौभाग्यभाग्यभूर्या वै विख्याता मणिकर्णिका ॥
ददामि तस्यां सर्वस्वमग्रजायांत्यजाय वा
mahāsamādhisaṃpannairvedāṃtārtha niṣevibhiḥ ||
duṣprāponyatra yo mokṣaḥ śocyairapi sa labhyate
||85||महासमाधिसंपन्नैर्वेदांतार्थ निषेविभिः ॥
दुष्प्रापोन्यत्र यो मोक्षः शोच्यैरपि स लभ्यते
dīkṣito vā divākīrtiḥ paṃḍito vāpyapaṃḍitaḥ ||
tulyo me mokṣadīkṣāyāṃ saṃprāpya maṇikarṇikām
||86||दीक्षितो वा दिवाकीर्तिः पंडितो वाप्यपंडितः ॥
तुल्यो मे मोक्षदीक्षायां संप्राप्य मणिकर्णिकाम्
yattyāgenyatra kṛpaṇastatprāpya maṇikarṇikām ||
dadāmi jaṃtumātrāya sarvasvaṃ cirasaṃcitam
||87||यत्त्यागेन्यत्र कृपणस्तत्प्राप्य मणिकर्णिकाम् ॥
ददामि जंतुमात्राय सर्वस्वं चिरसंचितम्
yadi daivādiha prāptastrisaṃyogo'tidurghaṭaḥ ||
avicāraṃ tadā deyaṃ sarvasvaṃ cirasaṃcitam
||88||यदि दैवादिह प्राप्तस्त्रिसंयोगोऽतिदुर्घटः ॥
अविचारं तदा देयं सर्वस्वं चिरसंचितम्
śarīramatha saṃpattiratha sā maṇikarṇikā ||
trisaṃyogoyamaprāpyo devairiṃdrādikairapi
||89||शरीरमथ संपत्तिरथ सा मणिकर्णिका ॥
त्रिसंयोगोयमप्राप्यो देवैरिंद्रादिकैरपि
punaḥ punarvicāryeti jaṃtumātrebhya eva ca ||
nirvāṇalakṣmīṃ yacchāmi sadopamaṇikarṇikam
||90||पुनः पुनर्विचार्येति जंतुमात्रेभ्य एव च ॥
निर्वाणलक्ष्मीं यच्छामि सदोपमणिकर्णिकम्
muktidā na mahī sā me vārāṇasyāṃ mahīyasī ||
tanmahī rajasā sāmyaṃ trilokyapi na codvahet
||91||मुक्तिदा न मही सा मे वाराणस्यां महीयसी ॥
तन्मही रजसा साम्यं त्रिलोक्यपि न चोद्वहेत्
paraṃ liṃgārcanasthānamavimukteśvareśvaram ||
tatra pūjāṃ sakṛtkṛtvā kṛtakṛtyo naro bhavet
||92||परं लिंगार्चनस्थानमविमुक्तेश्वरेश्वरम् ॥
तत्र पूजां सकृत्कृत्वा कृतकृत्यो नरो भवेत्
sāyaṃ pāśupatīṃ saṃdhyāṃ kuryāṃ paśupatīśvare ||
vibhūtidhāraṇāttatra paśupāśairna badhyate
||93||सायं पाशुपतीं संध्यां कुर्यां पशुपतीश्वरे ॥
विभूतिधारणात्तत्र पशुपाशैर्न बध्यते
prātaḥsadhyākaromyeva sadoṃkāraniketane ||
tatraikāpi kṛtā saṃdhyā sarvapātakakṛṃtanī
||94||प्रातःसध्याकरोम्येव सदोंकारनिकेतने ॥
तत्रैकापि कृता संध्या सर्वपातककृंतनी
vasāmi kṛttivāsehaṃ sadā prati caturdaśi ||
atra jāgaraṇaṃ kṛtvā caturdaśyāṃ na garbhabhāk
||99||वसामि कृत्तिवासेहं सदा प्रति चतुर्दशि ॥
अत्र जागरणं कृत्वा चतुर्दश्यां न गर्भभाक्
ratneśvarorcito dadyānmahāratnāni bhaktitaḥ ||
ratnaiḥ samarcya talliṃgaṃ strīratnādi labhennaraḥ
||96||रत्नेश्वरोर्चितो दद्यान्महारत्नानि भक्तितः ॥
रत्नैः समर्च्य तल्लिंगं स्त्रीरत्नादि लभेन्नरः
viṣṭapatritayāṃtaḥsthopyahaṃ liṃge triviṣṭape ||
tiṣṭhāmi satataṃ bhaktamanorathasamṛddhaye
||97||विष्टपत्रितयांतःस्थोप्यहं लिंगे त्रिविष्टपे ॥
तिष्ठामि सततं भक्तमनोरथसमृद्धये
virajaskaṃ mahāpīṭhaṃ tatra saṃsevya mānavaḥ ||
virajā jāyate nūnaṃ caturnada kṛtodakaḥ
||98||विरजस्कं महापीठं तत्र संसेव्य मानवः ॥
विरजा जायते नूनं चतुर्नद कृतोदकः
mahādeve mahāpīṭhaṃ mama sādhakasiddhidam ||
tatpīṭhadarśanādeva mahāpāpaiḥ pramucyate
||99||महादेवे महापीठं मम साधकसिद्धिदम् ॥
तत्पीठदर्शनादेव महापापैः प्रमुच्यते
pitṛprītipradaṃ pīṭhaṃ vṛṣabhadhvajasaṃjñakam ||
pitṛtarpaṇakṛttatra pitṝṃstārayati kṣaṇāt
||100||पितृप्रीतिप्रदं पीठं वृषभध्वजसंज्ञकम् ॥
पितृतर्पणकृत्तत्र पितॄंस्तारयति क्षणात्
ādikeśavapīṭhehamādikeśavarūpadhṛk ||
śvetadvīpaṃ naye bhaktānvaiṣṇavānativallabhān
||1||आदिकेशवपीठेहमादिकेशवरूपधृक् ॥
श्वेतद्वीपं नये भक्तान्वैष्णवानतिवल्लभान्
tatraiva maṃgalāpīṭhe sarvamaṃgaladāyini ||
upa paṃcanade tīrthe bhaktānsaṃtārayāmyaham
||2||तत्रैव मंगलापीठे सर्वमंगलदायिनि ॥
उप पंचनदे तीर्थे भक्तान्संतारयाम्यहम्
biṃdumādhavarūpeṇa yatrāhaṃ vaiṣṇavāñjanān ||
naye paṃcanadasnātāṃstadviṣṇoḥ paramaṃ padam
||3||बिंदुमाधवरूपेण यत्राहं वैष्णवाञ्जनान् ॥
नये पंचनदस्नातांस्तद्विष्णोः परमं पदम्
paṃcamudre mahāpīṭhe ye vīreśvarasevakāḥ ||
teṣāṃ paramanirvāṇaṃ kālenālpena jāyate
||4||पंचमुद्रे महापीठे ये वीरेश्वरसेवकाः ॥
तेषां परमनिर्वाणं कालेनाल्पेन जायते
tatra siddheśvarīpīṭhe caṃdreśvara samīpataḥ ||
tatra saṃnidhikartṝṇāṃ siddhiḥ ṣaṇmāsato bhavet
||5||तत्र सिद्धेश्वरीपीठे चंद्रेश्वर समीपतः ॥
तत्र संनिधिकर्तॄणां सिद्धिः षण्मासतो भवेत्
kāśyāṃ ca yoginīpīṭhe yogasiddhividhāyini ||
siddhīruccāṭanādyāśca kairna labdhāḥ susādhakaiḥ
||6||काश्यां च योगिनीपीठे योगसिद्धिविधायिनि ॥
सिद्धीरुच्चाटनाद्याश्च कैर्न लब्धाः सुसाधकैः
anekānīha pīṭhāni saṃti kāśyāṃ padepade ||
paraṃ dharmeśapīṭhasya kācicchaktiranuttamā
||7||अनेकानीह पीठानि संति काश्यां पदेपदे ॥
परं धर्मेशपीठस्य काचिच्छक्तिरनुत्तमा
yatrāmī bālakīrāśca nirmalajñānabhājanam ||
āsuḥ sadupadeśānme trātatrāteti bhāṣiṇaḥ
||8||यत्रामी बालकीराश्च निर्मलज्ञानभाजनम् ॥
आसुः सदुपदेशान्मे त्रातत्रातेति भाषिणः
etaddharmeśvaraṃ pīṭhaṃ tyajāmyadyadināvadhi ||
na kadācittaraṇijatvattapovanamuttamam
||9||एतद्धर्मेश्वरं पीठं त्यजाम्यद्यदिनावधि ॥
न कदाचित्तरणिजत्वत्तपोवनमुत्तमम्
mamānugrahataḥ kīrānetānpaśya raveḥ suta ||
divyavimānamāruhya gaṃtāro matpuraṃ mahat
||110||ममानुग्रहतः कीरानेतान्पश्य रवेः सुत ॥
दिव्यविमानमारुह्य गंतारो मत्पुरं महत्
tatra bhuktvā ciraṃ bhogāñjñānaṃ prāpya mayeritam ||
iha muktimavāpsyaṃti tvatsaṃsargātinirmalāḥ
||11||तत्र भुक्त्वा चिरं भोगाञ्ज्ञानं प्राप्य मयेरितम् ॥
इह मुक्तिमवाप्स्यंति त्वत्संसर्गातिनिर्मलाः
ityuktavati deveśe kailāsaśikharopamam ||
divyaṃ vimānamāpannaṃ rudrakanyāpariṣkṛtam
||12||इत्युक्तवति देवेशे कैलासशिखरोपमम् ॥
दिव्यं विमानमापन्नं रुद्रकन्यापरिष्कृतम्
āruhyate na yānena divyarūpavarāḥ khagāḥ ||
kailāsamabhisaṃjagmurdharmamāpṛcchyate'malāḥ
||113||आरुह्यते न यानेन दिव्यरूपवराः खगाः ॥
कैलासमभिसंजग्मुर्धर्ममापृच्छ्यतेऽमलाः
iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe dharmeśākhyānanāmaikonāśītitamo'dhyāyaḥ || 79 ||