dharmatīrthasya māhātmyaṃ kīdṛgdevena śaṃbhunā
agastya uvāca
dharmatīrthasya māhātmyaṃ kīdṛgdevena śaṃbhunā ||
skaṃda devyai samākhyātaṃ tadākhyāhi kṛpāṃ kuru
||1||धर्मतीर्थस्य माहात्म्यं कीदृग्देवेन शंभुना ॥
स्कंद देव्यै समाख्यातं तदाख्याहि कृपां कुरु
skaṃda uvāca
viṃdhyonnatihṛdākhyāmi dharmatīrthasamudbhavam ||
ākarṇaya mahāprājña yathā devena bhāṣitam
||2||विंध्योन्नतिहृदाख्यामि धर्मतीर्थसमुद्भवम् ॥
आकर्णय महाप्राज्ञ यथा देवेन भाषितम्
vṛtraṃ nihatya vṛtrārirbrahmahatyāmavāptavān ||
anutaptotha papraccha prāyaścittaṃ purohitam
||3||वृत्रं निहत्य वृत्रारिर्ब्रह्महत्यामवाप्तवान् ॥
अनुतप्तोथ पप्रच्छ प्रायश्चित्तं पुरोहितम्
bṛhaspatiruvāca
yadi tvaṃ devarājemāṃ brahmahatyāṃ sudustyajām ||
apānunutsustadyāhi kāśīṃ viśveśapālitām
||4||यदि त्वं देवराजेमां ब्रह्महत्यां सुदुस्त्यजाम् ॥
अपानुनुत्सुस्तद्याहि काशीं विश्वेशपालिताम्
nānyatkiṃcitkvaciddṛṣṭaṃ brahmahatyāmahauṣadham ||
rājadhānīṃ parityajya śakra viśveśituḥ parām
||5||नान्यत्किंचित्क्वचिद्दृष्टं ब्रह्महत्यामहौषधम् ॥
राजधानीं परित्यज्य शक्र विश्वेशितुः पराम्
bhairavasyāpihastāgrādapatadvaidhasaṃ śiraḥ ||
yatrānaṃdavane tatra vṛtraśatro vraja drutam
||6||भैरवस्यापिहस्ताग्रादपतद्वैधसं शिरः ॥
यत्रानंदवने तत्र वृत्रशत्रो व्रज द्रुतम्
sīmānamapi saṃprāpya śakrānaṃdavanasya hi ||
brahmahatyā palāyeta vepamānā nirāśrayā
||7||सीमानमपि संप्राप्य शक्रानंदवनस्य हि ॥
ब्रह्महत्या पलायेत वेपमाना निराश्रया
anyeṣāmapi pāpānāṃ mahāpāpajuṣāmapi ||
nāśayitrī parā kāśī viśveśa samadhiṣṭhitā
||8||अन्येषामपि पापानां महापापजुषामपि ॥
नाशयित्री परा काशी विश्वेश समधिष्ठिता
mahāpātakato muktiḥ kāśyāme va śatakrato ||
mahāsaṃsārato muktiḥ kāśyāmeva na cānyataḥ
||9||महापातकतो मुक्तिः काश्यामे व शतक्रतो ॥
महासंसारतो मुक्तिः काश्यामेव न चान्यतः
nirvāṇanagarī kāśī kāśī sarvāghasaṃghahṛt ||
viśveśituḥ priyā kāśī dyauḥ kāśī sadṛśī nahi
||10||निर्वाणनगरी काशी काशी सर्वाघसंघहृत् ॥
विश्वेशितुः प्रिया काशी द्यौः काशी सदृशी नहि
brahmahatyābhayaṃ yasya yasya saṃsārato bhayam ||
jātucittena na tyājyā kāśikā muktikāśikā
||11||ब्रह्महत्याभयं यस्य यस्य संसारतो भयम् ॥
जातुचित्तेन न त्याज्या काशिका मुक्तिकाशिका
jaṃtūnāṃ karmabījānāṃ yatra dehavisarjane ||
na jātucitprarohosti haradṛṣṭyāptaśuṣmaṇām
||12||जंतूनां कर्मबीजानां यत्र देहविसर्जने ॥
न जातुचित्प्ररोहोस्ति हरदृष्ट्याप्तशुष्मणाम्
tāṃ kāśīṃ prāpya vṛtrāre vṛtrahatyāpanuttaye ||
samārādhaya viśveśaṃ viśvamuktipradāyakam
||13||तां काशीं प्राप्य वृत्रारे वृत्रहत्यापनुत्तये ॥
समाराधय विश्वेशं विश्वमुक्तिप्रदायकम्
bṛhaspateriti vaco niśamya sa sahasradṛk ||
āyāddrutataraṃ kāśīṃ mahāpātakaghātukām
||14||बृहस्पतेरिति वचो निशम्य स सहस्रदृक् ॥
आयाद्द्रुततरं काशीं महापातकघातुकाम्
snātvottaravahāyāṃ ca dharmeśaṃ paritaḥ sthitaḥ ||
ārādhayanmahādevaṃ brahmadvatyāpa nuttaye
||15||स्नात्वोत्तरवहायां च धर्मेशं परितः स्थितः ॥
आराधयन्महादेवं ब्रह्मद्वत्याप नुत्तये
mahārudrajapāsaktaḥ sutrāmātha trilocanam ||
dadarśa liṃgamadhyasthaṃ svabhāsā dīpitāṃbaram
||16||महारुद्रजपासक्तः सुत्रामाथ त्रिलोचनम् ॥
ददर्श लिंगमध्यस्थं स्वभासा दीपितांबरम्
punastuṣṭāva vedoktai rudrasūktairanekadhā ||
viniṣkramya tato liṃgādāvirbhūya bhavovadat
||17||पुनस्तुष्टाव वेदोक्तै रुद्रसूक्तैरनेकधा ॥
विनिष्क्रम्य ततो लिंगादाविर्भूय भवोवदत्
śacīpate prasannosmi varaṃ varaya suvrata ||
kiṃ deyaṃ drutamākhyāhi dharmapīṭhakṛtāspada
||18||शचीपते प्रसन्नोस्मि वरं वरय सुव्रत ॥
किं देयं द्रुतमाख्याहि धर्मपीठकृतास्पद
śrutveti devadevasya sa premavacanaṃ hariḥ ||
sarvajña kiṃte'viditaṃ tamuvāceti vṛtrahā
||19||श्रुत्वेति देवदेवस्य स प्रेमवचनं हरिः ॥
सर्वज्ञ किंतेऽविदितं तमुवाचेति वृत्रहा
tatastatkṛpayānunno dharmapīṭhaniṣevaṇāt ||
niṣpādya tīrthaṃ tatreśo'tra snāhīṃdreti cābravīt
||20||ततस्तत्कृपयानुन्नो धर्मपीठनिषेवणात् ॥
निष्पाद्य तीर्थं तत्रेशोऽत्र स्नाहींद्रेति चाब्रवीत्
tatreṃdraḥ snānamātreṇa divyagaṃdho'bhavatkṣaṇāt ||
avāpa ca ruciṃ cāruṃ prāktanīṃ śātayājñikīm
||21||तत्रेंद्रः स्नानमात्रेण दिव्यगंधोऽभवत्क्षणात् ॥
अवाप च रुचिं चारुं प्राक्तनीं शातयाज्ञिकीम्
tadāścaryamatho dṛṣṭvā munayo nāradādayaḥ ||
parisasnurmudāyuktā dharmatīrthe'ghahāriṇi
||22||तदाश्चर्यमथो दृष्ट्वा मुनयो नारदादयः ॥
परिसस्नुर्मुदायुक्ता धर्मतीर्थेऽघहारिणि
atarpayanpitṝndivyānvyadhuḥ śrāddhāni śraddhayā ||
dharmeśaṃ snāpayāmāsustattīrthāmbubhṛtairghaṭaiḥ
||23||अतर्पयन्पितॄन्दिव्यान्व्यधुः श्राद्धानि श्रद्धया ॥
धर्मेशं स्नापयामासुस्तत्तीर्थाम्बुभृतैर्घटैः
tadā prabhṛti tattīrthaṃ dharmāṃdhuriti viśrutam ||
brahmahatyādi pāpānāmakleśaṃ kṣālanaṃ param
||24||तदा प्रभृति तत्तीर्थं धर्मांधुरिति विश्रुतम् ॥
ब्रह्महत्यादि पापानामक्लेशं क्षालनं परम्
yatphalaṃ tīrtharājasya snānena parikīrtyate ||
sahasraguṇitaṃ tatsyāddharmāṃdhu snānamātrataḥ
||25||यत्फलं तीर्थराजस्य स्नानेन परिकीर्त्यते ॥
सहस्रगुणितं तत्स्याद्धर्मांधु स्नानमात्रतः
gaṃgādvāre kurukṣetre gaṃgāsāgarasaṃgame ||
yatphalaṃ labhate martyo dharmatīrthe tadāpnuyāt
||26||गंगाद्वारे कुरुक्षेत्रे गंगासागरसंगमे ॥
यत्फलं लभते मर्त्यो धर्मतीर्थे तदाप्नुयात्
narmadāyāṃ sarasvatyāṃ gautamyāṃ siṃhage gurau ||
snātvā yatphalamāpyeta dharmakūpe tadāpnuyāt
||27||नर्मदायां सरस्वत्यां गौतम्यां सिंहगे गुरौ ॥
स्नात्वा यत्फलमाप्येत धर्मकूपे तदाप्नुयात्
mānase puṣkare caiva dvārike sāgare tathā ||
tīrthe snātvā phalaṃ yatsyāttatsyāddharmajalāśaye
||28||मानसे पुष्करे चैव द्वारिके सागरे तथा ॥
तीर्थे स्नात्वा फलं यत्स्यात्तत्स्याद्धर्मजलाशये
kārtikyāṃ sūkarakṣetre caitryāṃ gaurīmahāhrade ||
śaṃkhoddhāre haridine yatphalaṃ tatphalaṃ tviha
||29||कार्तिक्यां सूकरक्षेत्रे चैत्र्यां गौरीमहाह्रदे ॥
शंखोद्धारे हरिदिने यत्फलं तत्फलं त्विह
tīrthadvayaṃ pratīkṣaṃte sisnāsūnpitaro narān ||
gaṃgāyāṃ dharmakūpe ca piṃḍanirvapaṇāśayā
||30||तीर्थद्वयं प्रतीक्षंते सिस्नासून्पितरो नरान् ॥
गंगायां धर्मकूपे च पिंडनिर्वपणाशया
pitāmahasamīpe vā dharmeśasyāgratotha vā ||
phalgau ca dharmakūpe ca mādyaṃti prapitāmahāḥ
||31||पितामहसमीपे वा धर्मेशस्याग्रतोथ वा ॥
फल्गौ च धर्मकूपे च माद्यंति प्रपितामहाः
dharmakūpe naraḥ snātvā paritarpya pitāmahān ||
gayāṃ gatvā kimadhikaṃ kartā pitṛmudāvaham
||32||धर्मकूपे नरः स्नात्वा परितर्प्य पितामहान् ॥
गयां गत्वा किमधिकं कर्ता पितृमुदावहम्
yathā gayāyāṃ tṛptāḥ syuḥ piṃḍadāne pitāmahāḥ ||
dharmatīrthe tathaiva syurna nyūnaṃ naiva cādhikam ||
te dhanyāḥ pitṛbhaktāste prīṇitāstaiḥ pitāmahāḥ ||
paitrādṛṇāddharmatīrthe niṣkṛtiryaiḥ kṛtā sutaiḥ
||34||यथा गयायां तृप्ताः स्युः पिंडदाने पितामहाः ॥
धर्मतीर्थे तथैव स्युर्न न्यूनं नैव चाधिकम् ॥
ते धन्याः पितृभक्तास्ते प्रीणितास्तैः पितामहाः ॥
पैत्रादृणाद्धर्मतीर्थे निष्कृतिर्यैः कृता सुतैः
tattīrthasya prabhāveṇa niṣpāpobhūtkṣaṇena ca ||
praṇamya devadeveśamiṃdro'gādamarāvatīm
||35||तत्तीर्थस्य प्रभावेण निष्पापोभूत्क्षणेन च ॥
प्रणम्य देवदेवेशमिंद्रोऽगादमरावतीम्
apāro mahimā tasya dharmatīrthasya kuṃbhaja ||
tatkūpe svaṃ nirīkṣyāpi śrāddhadānaphalaṃ labhet
||36||अपारो महिमा तस्य धर्मतीर्थस्य कुंभज ॥
तत्कूपे स्वं निरीक्ष्यापि श्राद्धदानफलं लभेत्
tatrāpi kākiṇī mātraṃ yacchetpitṛmude naraḥ ||
akṣayaṃ phalamāpnoti dharmapīṭhaprabhāvataḥ
||37||तत्रापि काकिणी मात्रं यच्छेत्पितृमुदे नरः ॥
अक्षयं फलमाप्नोति धर्मपीठप्रभावतः
tatra yo bhojayedviprānyatinotha tapasvinaḥ ||
sikthe sikthe labhetsotha vājapeyaphalaṃ sphuṭam
||38||तत्र यो भोजयेद्विप्रान्यतिनोथ तपस्विनः ॥
सिक्थे सिक्थे लभेत्सोथ वाजपेयफलं स्फुटम्
prāpyāmarāvatīṃ śakrastato diviṣadāṃ puraḥ ||
dharmapīṭhasya māhātmyaṃ mahatkāśyāmavarṇayat
||39||प्राप्यामरावतीं शक्रस्ततो दिविषदां पुरः ॥
धर्मपीठस्य माहात्म्यं महत्काश्यामवर्णयत्
āgatya punarapyatra śaṃbhorānaṃdakānane ||
munivṛṃdārakaiḥ sārdhaṃ liṃgamasthāpayaddhariḥ
||40||आगत्य पुनरप्यत्र शंभोरानंदकानने ॥
मुनिवृंदारकैः सार्धं लिंगमस्थापयद्धरिः
tārakeśātpaścimata iṃdreśvaramitīritam ||
tasya saṃdarśanātpuṃsāmaiṃdraloko na dūrataḥ
||41||तारकेशात्पश्चिमत इंद्रेश्वरमितीरितम् ॥
तस्य संदर्शनात्पुंसामैंद्रलोको न दूरतः
taddakṣiṇe śacīśaśca svayaṃ śacyā pratiṣṭhitaḥ ||
śacīśārcanataḥ strīṇāṃ saubhāgyamatulaṃ bhavet
||42||तद्दक्षिणे शचीशश्च स्वयं शच्या प्रतिष्ठितः ॥
शचीशार्चनतः स्त्रीणां सौभाग्यमतुलं भवेत्
tatsamīpesti raṃbheśo bahusaukhyasamṛddhidaḥ ||
iṃdreśvarasya parito lokapāleśvaro paraḥ
||43||तत्समीपेस्ति रंभेशो बहुसौख्यसमृद्धिदः ॥
इंद्रेश्वरस्य परितो लोकपालेश्वरो परः
tadarcanātprasīdaṃti lokapālāḥ samṛddhidāḥ ||
dharmeśātpaścimāśāyāṃ dharaṇīśaḥ prakīrtitaḥ ||
taddarśanena dhairyaṃ syādrājye rājakulādiṣu
||44||तदर्चनात्प्रसीदंति लोकपालाः समृद्धिदाः ॥
धर्मेशात्पश्चिमाशायां धरणीशः प्रकीर्तितः ॥
तद्दर्शनेन धैर्यं स्याद्राज्ये राजकुलादिषु
dharmeśāddakṣiṇe pūjyaṃ tattveśākhyaṃ paraṃ naraiḥ ||
tattvajñānaṃ pravarteta talliṃgasya samarcanāt
||45||धर्मेशाद्दक्षिणे पूज्यं तत्त्वेशाख्यं परं नरैः ॥
तत्त्वज्ञानं प्रवर्तेत तल्लिंगस्य समर्चनात्
dharmeśātpūrvadigbhāge vairāgyeśaṃ samarcayet ||
nivṛttiścetasastasya liṃgasya sparśanādapi
||46||धर्मेशात्पूर्वदिग्भागे वैराग्येशं समर्चयेत् ॥
निवृत्तिश्चेतसस्तस्य लिंगस्य स्पर्शनादपि
jñāneśvaraṃ tathaiśānyāṃ jñānadaṃ sarvadehinām ||
aiśvaryeśamudīcyāṃ ca liṃgāddharmeśvarācchubhāt
||47||ज्ञानेश्वरं तथैशान्यां ज्ञानदं सर्वदेहिनाम् ॥
ऐश्वर्येशमुदीच्यां च लिंगाद्धर्मेश्वराच्छुभात्
taddarśanādbhavennṛṇāmaiśvaryaṃ manasepsitam ||
paṃcavaktrasya rūpāṇi liṃgānyetāni kuṃbhaja
||48||तद्दर्शनाद्भवेन्नृणामैश्वर्यं मनसेप्सितम् ॥
पंचवक्त्रस्य रूपाणि लिंगान्येतानि कुंभज
etānyavaśyaṃ saṃsevya naraḥ prāpnoti śāśvatam ||
anyattatraiva yadvṛttaṃ tadākhyāmi mune śṛṇu
||49||एतान्यवश्यं संसेव्य नरः प्राप्नोति शाश्वतम् ॥
अन्यत्तत्रैव यद्वृत्तं तदाख्यामि मुने शृणु
yacchrutvāpi naro ghore saṃsārābdhau na majjati ||
kadaṃbaśikharo nāma viṃdhyapādo mahāniha
||50||यच्छ्रुत्वापि नरो घोरे संसाराब्धौ न मज्जति ॥
कदंबशिखरो नाम विंध्यपादो महानिह
damasya putrastatrāsīddurdamo nāma pārthivaḥ ||
pitaryuparate rājyaṃ saṃprāpyāvijiteṃdriyaḥ
||51||दमस्य पुत्रस्तत्रासीद्दुर्दमो नाम पार्थिवः ॥
पितर्युपरते राज्यं संप्राप्याविजितेंद्रियः
haretpuraṃdhrīḥ prasabhaṃ paurāṇāṃ kāmamohitaḥ ||
asādhavaḥ priyāstasya sādhavo'priyatāṃ yayuḥ
||52||हरेत्पुरंध्रीः प्रसभं पौराणां काममोहितः ॥
असाधवः प्रियास्तस्य साधवोऽप्रियतां ययुः
adaṃḍyāndaṃḍayāṃcakre daṃḍyeṣvāsītparāṅamukhaḥ ||
sadaiva mṛgayāśīlaḥ so'bhūnmṛgayu saṃgataḥ
||53||अदंड्यान्दंडयांचक्रे दंड्येष्वासीत्पराङमुखः ॥
सदैव मृगयाशीलः सोऽभून्मृगयु संगतः
vivāsitāḥ svaviṣayāttena sanmatidāyinaḥ ||
dharmādhikāriṇaḥ śūdrā brāhmaṇāḥ karadīkṛtāḥ
||54||विवासिताः स्वविषयात्तेन सन्मतिदायिनः ॥
धर्माधिकारिणः शूद्रा ब्राह्मणाः करदीकृताः
paradāreṣusaṃtuṣṭaḥ svadāreṣu parāṅmukhaḥ ||
ānarca jātucinnaiva devau duḥkhāṃtakāriṇau
||55||परदारेषुसंतुष्टः स्वदारेषु पराङ्मुखः ॥
आनर्च जातुचिन्नैव देवौ दुःखांतकारिणौ
hāriṇau sarvapāpānāṃ sarvavāṃchitadāyinau ||
sarveṣāṃ jagatīsārau śrīkaṃṭhaśrīpatīpatī
||56||हारिणौ सर्वपापानां सर्ववांछितदायिनौ ॥
सर्वेषां जगतीसारौ श्रीकंठश्रीपतीपती
svaprajāsveka udito dhūmaketurivāparaḥ ||
durdamo nāma bhūpālaḥ kṣayāyā kāṃḍa eva hi
||57||स्वप्रजास्वेक उदितो धूमकेतुरिवापरः ॥
दुर्दमो नाम भूपालः क्षयाया कांड एव हि
sa kadācinmṛgayubhiḥ pāpardhi vyasanāturaḥ ||
sārdhaṃ viveśāraṇyāni gṛṣṭipṛṣṭhānugo hayī
||58||स कदाचिन्मृगयुभिः पापर्धि व्यसनातुरः ॥
सार्धं विवेशारण्यानि गृष्टिपृष्ठानुगो हयी
ekākī daivayogena durdamaḥ so'vanīpatiḥ |
dhanvī turaṃgamāruḍho'viśadānaṃdakānanam
||59||एकाकी दैवयोगेन दुर्दमः सोऽवनीपतिः ।
धन्वी तुरंगमारुढोऽविशदानंदकाननम्
sa vilokyātha sarvatra pādapā navakeśinaḥ ||
succhāyāṃśca suvistārāngataśrama ivābhavat
||60||स विलोक्याथ सर्वत्र पादपा नवकेशिनः ॥
सुच्छायांश्च सुविस्तारान्गतश्रम इवाभवत्
sugaṃdhena suśītena sumadena suvāyunā ||
kṣaṇaṃ saṃvījito rājā pallavavyajanaiḥ kujaiḥ
||63||सुगंधेन सुशीतेन सुमदेन सुवायुना ॥
क्षणं संवीजितो राजा पल्लवव्यजनैः कुजैः
kevalaṃ mṛgayā jātastatkhedo na vyapāvrajat ||
ājanmajanitaḥ khedo niragāttadvanekṣaṇāt
||62||केवलं मृगया जातस्तत्खेदो न व्यपाव्रजत् ॥
आजन्मजनितः खेदो निरगात्तद्वनेक्षणात्
madhye vanaṃ sa cāpaśyatprāsādaṃ cuṃbitāṃbaram ||
mahāratnaśalākānāṃ ramyamekamivākaram
||63||मध्ये वनं स चापश्यत्प्रासादं चुंबितांबरम् ॥
महारत्नशलाकानां रम्यमेकमिवाकरम्
athāvaruhya turagātsa bhūpālotivismitaḥ ||
dharmeśamaṃḍapaṃ prāpya svātmānaṃ praśaśaṃsa ha
||64||अथावरुह्य तुरगात्स भूपालोतिविस्मितः ॥
धर्मेशमंडपं प्राप्य स्वात्मानं प्रशशंस ह
dhanyosmyahaṃ prasannosmi dhanye medya vilocane ||
dhanyamadyatanaṃ cāharyadapaśyamimāṃ bhuvam
||65||धन्योस्म्यहं प्रसन्नोस्मि धन्ये मेद्य विलोचने ॥
धन्यमद्यतनं चाहर्यदपश्यमिमां भुवम्
punarniniṃda cātmānaṃ dharmapīṭha prabhāvataḥ ||
dhiṅmāṃ durjanasaṃsargaṃ tyaktasajjanasaṃgamam
||66||पुनर्निनिंद चात्मानं धर्मपीठ प्रभावतः ॥
धिङ्मां दुर्जनसंसर्गं त्यक्तसज्जनसंगमम्
jaṃtūdvegakaraṃ mūḍhaṃ prajāpīḍanapaṃḍitam ||
paradāraparadravyāpahṛtyāsukhamāninam
||67||जंतूद्वेगकरं मूढं प्रजापीडनपंडितम् ॥
परदारपरद्रव्यापहृत्यासुखमानिनम्
adyayāvanmama gataṃ vṛthājanmālpamedhasa ||
dharmasthānānīdṛśāni yaddṛṣṭāni na kutracit
||68||अद्ययावन्मम गतं वृथाजन्माल्पमेधस ॥
धर्मस्थानानीदृशानि यद्दृष्टानि न कुत्रचित्
evaṃ bahu viniṃdya svaṃ natvā dharmeśvaraṃ vibhum ||
āruhyāśvaṃ yayau rājā durdamo viṣayaṃ svakam
||69||एवं बहु विनिंद्य स्वं नत्वा धर्मेश्वरं विभुम् ॥
आरुह्याश्वं ययौ राजा दुर्दमो विषयं स्वकम्
tatomātyānsamāhūya kramāyātāṃściraṃtanān ||
navīnānparinirvāsya paurāṃścāpi samāhvayat
||70||ततोमात्यान्समाहूय क्रमायातांश्चिरंतनान् ॥
नवीनान्परिनिर्वास्य पौरांश्चापि समाह्वयत्
brāhmaṇāṃścanamaskṛtya tebhyo vṛttīḥ pradāya ca ||
putre rājyaṃ samāropya prajādharme niveśya ca
||71||ब्राह्मणांश्चनमस्कृत्य तेभ्यो वृत्तीः प्रदाय च ॥
पुत्रे राज्यं समारोप्य प्रजाधर्मे निवेश्य च
paridaṃḍya ca daṃḍārhānsādhūṃśca paritoṣya ca ||
dārānapi parityajya viṣayeṣu parāṅmukhaḥ
||72||परिदंड्य च दंडार्हान्साधूंश्च परितोष्य च ॥
दारानपि परित्यज्य विषयेषु पराङ्मुखः
samāgacchadathaikākī kāśīṃ śreyovikāsinīm ||
dharmeśvaraṃ samārādhya kālānnirvāṇamāptavān
||73||समागच्छदथैकाकी काशीं श्रेयोविकासिनीम् ॥
धर्मेश्वरं समाराध्य कालान्निर्वाणमाप्तवान्
dharmeśadarśanānnityaṃ tathābhūtaḥ sa durdamaḥ ||
babhūva damināṃ śreṣṭhaḥ prāṃte mokṣaṃ ca labdhavān
||74||धर्मेशदर्शनान्नित्यं तथाभूतः स दुर्दमः ॥
बभूव दमिनां श्रेष्ठः प्रांते मोक्षं च लब्धवान्
itthaṃ dharmeśa māhātmyaṃ mayā svalpaṃ nirūpitam ||
dharmapīṭhasya māhātmyaṃ samyakko veda kuṃbhaja
||79||इत्थं धर्मेश माहात्म्यं मया स्वल्पं निरूपितम् ॥
धर्मपीठस्य माहात्म्यं सम्यक्को वेद कुंभज
idaṃ dharmeśvarākhyānaṃ yaḥ śroṣyati narottamaḥ ||
ājanmasaṃcitātpāpātsa mukto bhavati kṣaṇāt
||76||इदं धर्मेश्वराख्यानं यः श्रोष्यति नरोत्तमः ॥
आजन्मसंचितात्पापात्स मुक्तो भवति क्षणात्
śrāddhakāle viśeṣeṇa dharmeśākhyānamuttamam ||
śrāvayedbrāhmaṇāndhīmānpitṝṇāṃ tṛptikāraṇam
||77||श्राद्धकाले विशेषेण धर्मेशाख्यानमुत्तमम् ॥
श्रावयेद्ब्राह्मणान्धीमान्पितॄणां तृप्तिकारणम्
dharmākhyānamidaṃ śṛṇvannapi dūrasthitaḥ sudhīḥ ||
sarvapāparvinirmukto gaṃtāṃte śivamaṃdiram
||78||धर्माख्यानमिदं शृण्वन्नपि दूरस्थितः सुधीः ॥
सर्वपापर्विनिर्मुक्तो गंतांते शिवमंदिरम्
iti śrīskāṃde mahāpurāṇe ekāśītisāhasryāṃ saṃhitāyāṃ caturthe kāśīkhaṃḍe uttarārdhe dharmeśvarākhyānanāmaikāśītitamodhyāyaḥ || 81 ||